% Text title            : raghuvansha3
% File name             : raghuvansha3.itx
% Category              : major\_works, kAlidAsa
% Location              : doc\_z\_misc\_major\_works
% Author                : kalidasa
% Transliterated by     : Mrs and Mr H Desiraju Rao and Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : April 28, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha by Kalidas Chapter 3 ..}##
\itxtitle{.. raghuva.nshaM sargaH 3 kAlidAsakR^itam ..}##\endtitles ##

athepsita.n bharturupasthitodaya.n sakhIjanodvIkShaNakaumudImukham |
nidAnamikShvAkukulasya sa.ntateH sudakShiNA dauhR^idalakShaNa.n dadhau || 3\-1||
sharIrasAdAdasamagrabhUShaNA mukhena sAlakShyata lodhrapANDunA |
tanuprakAshena viceyatArakA prabhAtakalpA shashineva sharvarI || 3\-2||
tadAnana.n mR^itsurabhi kShitIshvaro rahasyupAghrAya na tR^iptimAyayau |
karIva sikta.n pR^iShataiH payomucA.n shucivyapAye vanarAjipalvalam || 3\-3||
diva.n marutvAniva bhokShyate bhuva.n digantavishrAntaratho hi tatsutaH |
ato.abhilAShe prathama.n tathAvidhe mano babandhAnyarasAnvila~Nghya sA || 3\-4||
na me hriyA sha.nsati ki.ncidIpsita.n spR^ihAvatI vastuShu keShu mAgadhI |
iti sma pR^icChatyanuvelamAdR^itaH priyAsakhIruttarakosaleshvaraH || 3\-5||
upetya sA dohadaduHkhashIlatA.n yadeva vavre tadapashyadAhR^itam |
na hIShTamasya tridive.api bhUpaterabhUdanAsAdyamadhijyadhanvanaH || 3\-6||
krameNa nistIrya ca dohadavyathA.n pracIyamAnAvayavA rarAja sA |
purANapatrApagamAdanantara.n lateva sa.nnaddhamanoj~napallavA || 3\-7||
dineShu gacChatsu nitAntapIvara.n tadIyamAnIlamukha.n stanadvayam |
tirashcakAra bhramarAbhinIlayoH sujAtayoH pa~NkajakoshayoH shriyam || 3\-8||
nidhAnagarbhAmiva sAgarAmbarA.n shamImivAbhyantaralInapAvakAm |
nadImivAntaHsalilA.n sarasvatI.n nR^ipaH sasattvA.n mahiShImamanyata || 3\-9||
priyAnurAgasya manaH samunnaterbhujArjitAnA.n ca digantasa.npadAm |
yathAkrama.n pu.nsavanAdikAH kriyA dhR^iteshca dhIraH sadR^ishIrvyadhatta saH || 3\-10||
surendramAtrAshritagarbhagauravAtprayatnamuktAsanayA gR^ihAgataH |
tayopacArA~njalikhinnahastayA nananda pAriplavanetrayA nR^ipaH || 3\-11||
kumArabhR^ityAkushalairanuShThite bhiShagbhirAptairatha garbhabharmaNi |
patiH pratItaH prasavonmukhI.n priyA.n dadarsha kAle divamabhritAmiva || 3\-12||
grahaistataH pa~ncabhiruccasa.nsthitairasUryagaiH sUcitabhAgyasa.npadam |
asUta putra.n samaye shacIsamA trisAdhanA shaktirivArthamakShayam || 3\-13||
dishaH prasedurmaruto vavuH sukhAH pradakShiNArcirhaviragnirAdade |
babhUva sarva.n shubhasha.nsi tatkShaNa.n bhavo hi lokAbhyudayAya tAdR^ishAm || 3\-14||
ariShTashayyA.n parito visAriNA sujanmanastasya nijena tejasA |
nishIthadIpAH sahasA hatatviSho babhUvurAlekhyasamarpitA iva || 3\-15||
janAya shuddhAntacarAya sha.nsate kumArajanmAmR^itasa.nmitAkSharam |
AdeyamAsIttrayameva bhUpateH shashiprabha.n Chatramubhe ca cAmare || 3\-16||
nivAtapadmastimitena cakShuShA nR^ipasya kAnta.n pibataH sutAnanam |
mahodadheH pUra ivendudarshanAdguruH praharShaH prababhUva nAtmani || 3\-17||
sa jAtakarmaNyakhile tapasvinA tapovanAdetya purodhasA kR^ite |
dilIpasUnurmaNirAkarodbhavaH prayuktasa.nskAra ivAdhika.n babhau || 3\-18||
sukhashravA ma~NgalatUryanisvanAH pramodanR^ityaiH saha vArayoShitAm|
na kevala.n sadmani mAgadhIpateH pathi vyajR^imbhanta divaukasAmapi ||3\-19||
na sa.nyatastasya babhUva rakShiturvisarjayedya.n sutajanmaharShitaH |
R^iNAbhidhAnAtsvayameva kevala.n tadA pitR^INA.n mumuce sa bandhanAt || 3\-20||
shrutasya yAyAdayamantamarbhakaH tathA pareShA.n yudhi ceti pArthivaH |
avekShya dhAtorgamanArthamarthaviccakAra nAmnA raghumAtmasambhavam || 3\-21||
pituH prayatnAtsa samagrasa.npadaH shubhaiH sharIrAvayavairdine dine |
pupoSha vR^iddhi.n haridashvadIdhiteranupraveshAdiva bAlacandramAH || 3\-22||
umAvR^iShA~Nkau sharajanmanA yathA yathA jayantena shacIpurandarau |
tathA nR^ipaH sA ca sutena mAgadhI nanandatustatsadR^ishena tatsamau || 3\-23||
rathA~NkanAmnoriva bhAvabandhana.n babhUva yatprema parasparAshrayam |
vibhaktamapyekasutena tattayoH parasparasyopari paryacIyata || 3\-24||
uvAca dhAtryA prathamodita.n vaco yayau tadIyAmavalambya cA~Ngulim |
abhUcca namraH praNipAtashikShayA piturmuda.n tena tatAna so.arbhakaH || 3\-25||
tama~NkamAropya sharIrayogajaiH sukhairniShi~ncantamivAmR^ita.n tvaci |
upAntasa.nmIlitalocano nR^ipashcirAtsutasparsharasaj~natA.n yayau || 3\-26||
ama.nsta cAnena parArdhyajanmanA sthiterabhettA sthitimantamanvayam |
svamUrtibhedena guNAgryavartinA patiH prajAnAmiva sargamAtmanaH || 3\-27||
sa vR^ittacUlashcalakAkapakShakairamAtyaputraiH savayobhiranvitaH |
liperyathAvadgrahaNena vA~Nmaya.n nadImukheneva samudramAvishat || 3\-28||
athopanIta.n vidhivadvipashcito vininyurena.n guravo gurupriyam |
avandhyayatnAshca babhUvuratra te kriyA hi vastUpahitA prasIdati || 3\-29||
dhiyaH samagraiH sa guNairudAradhIH kramAccatasrashcaturarNavopamAH |
tatAra vidyAH pavanAtipAtibhirdisho haridbhirharitAmiveshvaraH || 3\-30||
tvaca.n ca medhyA.n paridhAya rauravImashikShatAstra.n pitureva mantravat |
na kevala.n tadgururekapArthivaH kShitAvabhUdekadhanurdharo.api saH || 3\-31||
mahokShatA.n vatsataraH spR^ishanniva dvipendrabhAva.n kalabhaH shrayanniva |
raghuH kramAdyauvanabhinnashaishavaH pupoSha gAmbhIryamanohara.n vapuH || 3\-32||
athAsya godAnavidheranantara.n vivAhadIkShA.n niravartayadguruH |
narendrakanyAstamavApya satpati.n tamonuda.n dakShasutA ivAbabhuH || 3\-33||
yuvA yugavyAyatabAhura.nsalaH kavATavakShAH pariNaddhaka.ndharaH |
vapuHprakarShAdajayadguru.n raghustathApi nIcairvinayAdadR^ishyata || 3\-34||
tataH prajAnA.n ciramAtmanA dhR^itA.n nitAntagurvI.n laghayiShyatA dhuram |
nisargasa.nskAravinIta ityasau nR^ipeNa cakre yuvarAjashabdabhAk || 3\-35||
narendramUlAyatanAdanantara.n tadAspada.n shrIryuvarAjasa.nj~nitam |
agacChada.nshena guNAbhilAShiNI navAvatAra.n kamalAdivotpalam || 3\-36||
vibhAvasuH sArathineva vAyunA ghanavyapAyena gabhasthimAniva |
babhUva tenAtitarA.n suduHsahaH kaTaprabhedena karIva pArthivaH || 3\-37||
niyujya ta.n homatura.ngarakShaNe dhanurdhara.n rAjasutairanudrutam |
apUrNamekena shatakratUpamaH shata.n kratUnAmapavighnamApa saH || 3\-38||
tataH para.n tena makhAya yajvanA tura.ngamutsR^iShTamanargala.n punaH |
dhanurbhR^itAmagrata eva rakShiNA.n jahAra shakraH kila gUDhavigrahaH || 3\-39||
viShAdaluptapratipatti vismita.n kumArasainya.n sapadi sthita.n ca tat |
vasiShThadhenushca yadR^IcChayAgatA shrutaprabhAvA dadR^ishe.atha nandinI || 3\-40||
tada~Nkanisyandanajalena locane pramR^ijya puNyena puraskR^itaH satAm |
atIndriyeShvapyupapannadarshano babhUva bhAveShu dilIpanandanaH || 3\-41||
sa pUrvataH parvatapakShashAtana.n dadarsha deva.n naradevasa.nbhavaH |
punaH punaH sUtaniShiddhacApala.n harantamashva.n ratharashmisa.nyutam || 3\-42||
shataistamakShNAmanimeShavR^ittibhirhari.n viditvA haribhishca vAjibhiH |
avocadena.n gaganaspR^ishA raghuH svareNa dhIreNa nivartayanniva || 3\-43||
makhA.nshabhAjA.n prathamo manIShibhistvameva devendra sadA nigadyase |
ajasradIkShAprayatasya madguroH kriyAvighAtAya katha.n pravartase || 3\-44||
trilokanAthena sadA makhadviShastvayA niyamyA nanu divyacakShuShA |
sa cetsvaya.n karmasu dharmacAriNA.n tvamantarAyo bhavasi cyuto vidhiH || 3\-45||
tada~Nkamagrya.n maghavanmahAkratoramu.n tura.nga.n pratimoktumarhasi |
pathaH shruterdarshayitAra IshvarA malImasAmadadate na paddhatim || 3\-46||
iti pragalbha.n raghuNA samIrita.n vaco nishamyAdhipatirdivaukasAm |
nivartayAmAsa ratha.n savismayaH pracakrame ca prativaktumuttaram || 3\-47||
yadAttha rAjanyakumAra tattathA yashastu rakShya.n parato yashodhanaiH |
jagatprakAsha.n tadasheShamijyayA bhavadgururla~Nghayitu.n mamodyataH || 3\-48||
hariryathaikaH puruShottamaH smR^ito maheshvarastryambaka eva nAparaH |
tathA vidurmA.n munayaH shatakratu.n dvitIyagAmI na hi shabda eSha naH || 3\-49||
ato.ayamashvaH kapilAnukAriNA pitustvadIyasya mayApahAritaH |
ala.n prayatnena tavAtra mA nidhAH pada.n padavyA.n sagarasya sa.ntateH || 3\-50||
tataH prahAsyApabhayaH purandara.n punarbabhAShe turagasya rakShitA |
gR^ihANa shastra.n yadi sarga eSha te na khalvanirjitya raghu.n kR^itI bhavAn || 3\-51||
sa evamuktvA maghavantamunmukhaH kariShyamANaH sashara.n sharAsanam |
atiShThadAlIDhavisheShashobhinA vapuHprakarSheNa viDambiteshvaraH || 3\-52||
raghoravaShTambhamayena patriNA hR^idi kShato gotrabhidapyamarShaNaH |
navAmbudAnIkamuhUrtalA~nChane dhanuShyamogha.n samadhatta sAyakam || 3\-53||
dilIpasUnoH sa bR^ihadbhujAntara.n pravishya bhImAsurashoNitocitaH |
papAvanAsvAditapUrvamAshugaH kutUhaleneva manuShyashoNitam || 3\-54||
hareH kumAro.api kumAravikramaH suradvipAsphAlanakarkashA~Ngulau |
bhuje shacIpatravisheShakA~Nkite svanAmacihna.n nicakhAna sAyakam || 3\-55||
jahAra cAnyena mayUrapatriNA shareNa shakrasya mahAshanidhvajam |
cukopa tasmai sa bhR^isha.n surashriyaH prasahya keshavyaparopaNAdiva || 3\-56||
tayorupAntasthitasiddhasainika.n garutmadAshIviShabhImadarshanaiH |
babhUva yuddha.n tumula.n jayaiShiNoradhomukhairUrdhvamukhaishca patribhiH || 3\-57||
atiprabandhaprahitAstravR^iShTibhistamAshraya.n duShprasahasya tejasaH |
shashAka nirvApayitu.n na vAsavaH svatashcyuta.n vahnimivAdbhirambudaH || 3\-58||
tataH prakoShThe haricandanA~Nkite pramathyamAnArNavadhIranAdinIm |
raghuH shashA~NkArdhamukhena patriNA sharAsanajyAmalunAdbiDaujasaH || 3\-59||
sa cApamutsR^ijya vivR^iddhamatsaraH praNAshanAya prabalasya vidviShaH |
mahIdhrapakShavyaparopaNocita.n sphuratprabhAmaNDalamastramAdade || 3\-60||
raghurbhR^isha.n vakShasi tena tADitaH papAta bhUmau saha sainikAshrubhiH |
nimeShamAtrAdavadhUya ca vyathA.n sahotthitaH sainikaharShanisvanaiH || 3\-61||
tathApi shastravyavahAraniShThure vipakShabhAve ciramasya tasthuShaH |
tutoSha vIryAtishayena vR^itrahA pada.n hi sarvatra guNairnidhIyate || 3\-62||
asa~NgamadriShvapi sAravattayA na me tvadanyena visoDhamAyudham |
avehi mA.n prItamR^ite tura~NgamAtkimicChasIti sphuTamAha vAsavaH || 3\-63||
tato niSha~NgAdasamagramudhR^ita.n suvarNapu~Nkhadyutira~njitA~Ngulim |
narendrasUnuH pratisa.nharanniShu.n priya.nvadaH pratyavadatsureshvaram || 3\-64||
amocyamashva.n yadi manyase prabho tataH samApte vidhinaiva karmaNi |
ajasradIkShAprayataH sa madguruH kratorasheSheNa phalena yujyatAm || 3\-65||
yathA sa vR^ittAntamima.n sadogatastrilocanaikA.nshatayA durAsadaH |
tavaiva sa.ndeshaharAdvishA.npatiH shR^iNoti lokesha tathA vidhIyatAm || 3\-66||
tatheti kAma.n pratishushruvAnraghoryathAgata.n mAtalisArathiryayau |
nR^ipasya nAtipramanAH sadogR^iha.n sudakShiNAsUnurapi nyavartata || 3\-67||
tamabhyanandatprathama.n prabodhitaH prajeshvaraH shAsanahAriNA hareH |
parAmR^ishanharShajaDena pANinA tadIyama~Nga.n kulishavraNA~Nkitam || 3\-68||
iti kShitIsho navati.n navAdhikA.n mahAkratUnA.n mahanIyashAsanaH |
samArurukShurdivamAyuShaH kShaye tatAna sopAnaparamparAmiva || 3\-69||
atha sa viShayavyAvR^ittAtmA yathAvidhi sUnave
nR^ipatikakuda.n dattvA yUne sitAtapavAraNam |
munivanatarucChAyA.n devyA tayA saha shishriye
galitavayasAmikShvAkUNAmida.n hi kulavratam || 3\-70||

|| iti shrIkAlidAsakR^ite raghuva.nshe mahAkAvye rAjyAbhiSheko nAma tR^itIyaH sargaH ||
##
Encoding by
Arvind Kolhatkar and Mrs. and Mr. Desriraju H. Rao.
Proofread and corrected by
Arvind Kolhatkar akolhatkar at rogers.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}