% Text title            : sAMkhyasAra
% File name             : sAMkhyasAra.itx
% Category              : major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : September 15, 2014, October 6, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. sA~NkhyasAraH ..}##
\itxtitle{.. sA~NkhyasAraH ..}##\endtitles ##

pUrvabhAgaH |
prathamaH parichChedaH |

mahadAkhyaH svayambhUryo jagada~Nkura IshvaraH |
sarvAtmane namastasmai viShNave sarvajiShNave || 1||
sA~NkhyakArikayA leshAdAtmatattvaM vivechitam |
sA~NkhyasAraviveko.ato vij~nAnena prapa~nchyate || 2||
prAyaH sa~NkalitA sA~NkhyaprakriyA kArikAgaNe |
sA.ato.atra varNyate leshAt tadanuktAMshamAtrataH || 3||
sA~NkhyabhAShye prakR^ityAdeH svarUpaM vistarAn mayA |
proktaM tasmAt tadapyatra sa~NkShepAdeva vakShyate || 4||
AtmAnAtmavivekasAkShAtkArAt kartR^itvAdyakhilAbhimAnanivR^ittyA
tatkAryarAgadveShadharmAdharmAdyanutpAdAt pUrvotpannakarmaNAM
chAvidyArAgAdisahakAryuchChedarUpadAnena vipAkAnArambhakatvAt
prArabdhasamAptyanantaraM punarjanmAbhAvena trividhaduHkhAtyantanivR^ittirUpo
mokSho bhavatIti shrutismR^itiDiNDimaH | tatra shrutayaH | athAkAmayamAno
yo.akAmo niShkAmo na tasya prANA utkrAmantIhaiva samavalIyante |
AtmAnaM chedvijAnIyAdayamastIti pUruShaH |
kimichChan kasya kAmAya sharIramanusa~ncharet ||
yadA sarve pramuchyante kAmA ye.asya hR^idi shritAH |
atha martyo.amR^ito bhavatyatra brahma samashnute ||
kAmAn yaH kAmayate manyamAnaH
sa karmabhirjAyate tatra tatra |
paryAptakAmasya kR^itAtmanastu
ihaiva sarve pravilIyanti kAmAH ||
ityAdyAH | smR^itayashcha kaurmAdyAH | yathA kaurme |
rAgadveShAdayo doShAH sarve bhrAntinibandhanAH |
kAryo hyasya bhaveddoShaH puNyApuNyamiti shrutiH ||
tadvashAdeva sarveShAM sarvadehasamudbhavaH |
iti | mokShadharme cha |
indriyANIndriyArthAshcha nopasarpantyatarShulam |
hInashcha karaNairdehI na dehaM punararhati ||
tasmAt tarShAtmakAd rAgAd bIjAjjAyanti jantavaH |
iti | nanu rAgAbhAve.api kevalakarmavashAnnarakAdiprApteH kathaM rAgasya
karmasahakAritvaM vipAkArambha upapannam | narakAdau visheShato
rAgAbhAve.api sAmAnyato rAgasattvAt | niShiddhastryAdigAminAM
stryAdirAgAdeva taptalohamayanArIsamAli~NganAdirUpanarakotpatteH |
yadyapyavidyAsmitArAgadveShabhayAkhyaM kleshapa~nchakameva janmAdivipAkArambhe
karmaNAM sahakAri bhavati |
tadeva saktaH saha karmaNaiti
li~NgaM mano yatra niShiktamasya |
iti shrutAvabhimAnarAgadveShAdijanyasya viShayavAsanAkhyasa~NgasAmAnyasyaiva
janmAdivipAkArambhe karmasahakAritvasiddheH |
yatra yatra mano dehI dhArayet sakalaM dhiyA |
snehAddveShAdbhayAdvA.api yAti tattatsarUpatAm ||
ityAdismR^iteshcha | tathA cha kleshamUlaH karmAshayaH | sati mUle
tadvipAko jAtyAyurbhogA iti yogasUtrAbhyAmapyadR^iShTe tadvipAkArambhe
cha kleshAnAM hetutvavachanAchcha | tathA.apyavidyAsmitAsattve
rAgasyAvashyakatvAddveShabhayayoshcha rAgamUlakatvAdrAga eva mukhyato
janmAdihetutayA yathoktavAkyairnirdishyata iti | nanu |
kShIyante chAsya karmANi tasmin dR^iShTe parAvare |
ityAdishruterj~nAnasya prAchInakarmanAshakatvamevochitaM dAhakatvaM
kathamiShyata iti chenna |
j~nAnAgnidagdhakarmANaM tamAhuH paNDitaM budhAH |
ityAdivAkyairdAhasyApi shravaNena lAghavAddAhaparatvasyaiva nAshAdivAkyeShvapi
kalpanauchityAt | karmaNAM dAhashcha kleshAkhyasahakAryuchChedena naiShphalyam |
karmaNAM nAshastu prArabdhabhogAnte chittanAshAdeva bhaviShyati | ato
lokasiddhenAvidyAnAshenaiva dvAreNa karmaphalAnutpattisambhavAnna j~nAnasya
karmanAshakatvaM gauravAdityAdikaM yogavArttike prapra~nchitamasmAbhiriti
dik | tasmAdvivekasAkShAtkArAdavidyAsmitArAgAdikleshanivR^ittau
trividhaduHkhAtyantanivR^ittirUpaparamapuruShArthaH siddhyatItyupapannam |
tathA cha yogasUtradvayam | heyaM duHkhamanAgatam | vivekkhyAtiraviplavA
hAnopAya iti |

iti shrIvij~nAnabhikShuvirachite sA~NkhyasAre.abhyarhitattvAdAdau
vivekakhyAtiphalasya paramapuruShArthasya parichChedaH || *||

\-\-\-\-\-\-\-\-\-\-\-\-\-\-\-\-\-\-

atha dvitIyaH parichChedaH

athAtmAnAtmavivekaj~nAnasya kiM svarUpaM taduchyate | AtmA
tAvat sukhaduHkhAdyanubhaviteti sAmAnyato lokaprasiddhiH anAtmA cha
prakR^ityAdirjaDavargaH tayoranyonyavaidharmyeNa pariNAmitvApariNAmitvAdirUpeNa
doShaguNAtmakena heyopAdeyatayA pR^ithaktvena j~nAnaM vivekaj~nAnam |
tathA cha shrutiH | sa eSha neti netyAtmA.agR^ihyo na hi gR^ihyate.ashIryo
na hi shIryate.asa~Ngo na hi sajyate.asito na vyathate na riShyatItyAdi |
smR^itishcha |
so.atha pratinivR^ittAkSho gurudarpaNabodhitaH |
svato.anyAM vikriyAM mauDhyAdAsthitAma~njasaikShata ||
athAsau prakR^itirnAhamiyaM hi kaluShAtmikA |
shuddhabuddhasvabhAvo.ahamiti tyajati tAM vidan ||
evaM dehendriyAdibhyaH shuddhatvenAtmani smR^ite |
nikhilA savikAreyaM tyaktaprAyA.ahicharmavat ||
iti | sUtraM cha | evaM tattvAbhyAsAnneti netIti tyAgAdvivekasiddhiriti |
tattvaj~nAnasya lakShaNaM cha mAtsye kR^itam |
avyaktAdye visheShAnte vikAre.asmiMshcha varNite |
chetanAchetanAnyatvaj~nAnena j~nAnamuchyate ||
iti | yadyapyanyonyabhedaj~nAnameva vivekaj~nAnaM tathApyAtmavisheShyakameva
tanmokShakAraNaM bhavati | AtmA vA.are draShTavya ityAdi
shrutismR^itibhyaH | nanvanAtmanyAtmabuddhirUpA yA.avidyA
pAta~njalAdiShUktA tasyAH kathamAtmavisheShyakavivekaj~nAnanAshyatvaM
prakArAdibhedAditi chenna | tAdR^ishAvidyAyA
anAtmavisheShyakavivekaj~nAnadvAreNAtmavisheShyakavivekaj~nAnanAshyatvAditi |
yachcha yogena nirvikalpakamAtmaj~nAnaM jAyate tadvivekaj~nAnadvAraiva
mokShakAraNaM bhavati na tu sAkShAdavidyAnivartakatvAbhAvAt |
ahaM gauraH kartA sukhI duHkhItyAdi j~nAnameva hyavidyA
saMsArAnarthahetutayA shrutismR^itinyAyasiddhA tasyAshcha nivartikA
nAhaM gaura ityAdirUpA vivekakhyAtireva bhavati | samAne viShaye
grAhyAbhAvatvaprakArakagrAhyAbhAvaj~nAnatvenaiva virodhAt | anyathA
shuktanirvikalpakasyApi idaM rajatamiti j~nAnavirodhitvApatteH | ki~ncha
yatoktAbhAvaj~nAne grAhyaj~nAnavirodhitvasyAvashyakatayA nirvikalpakaj~nAnasya
bhramanivartakatvaM na pR^ithak kalpyate gauravAt | api chAthA.ata
Adesho neti neti na hyetasmAditi netyanyat paramastItyAdishrutyA
vivekopadeshApekShayottamopadesho nAstItyuchyate |
kShetrakShetraj~nayorevamantaraM j~nAnachakShuShA |
bhUtaprakR^itimokShaM cha ye viduryAnti te param ||
iti gItAdivAkyaishcha vivekaj~nAnasyaiva mokShahetutvamuchyate |
ato vivekaj~nAnameva sAkShAdavidyAnivR^ittyA
mokShahetuH | yogena kevalAtmasAkShAtkArastu
yogyAnupalabdhividhayopAdhyAdigatadharmAbhAvamupAdhyAdibhedaM
cha grAhayati tato.avidyAnivR^ittiriti | etena sarvabhUteShu
samatAj~nAnamAtmanaH sarvAtmakatvAdij~nAnaM cha shrutismR^ityorgIyamAnaM
vivekaj~nAnasyaiva sheShabhUtaM sarvadarshaneShu mantavyam | j~nAnAntarANAM
sAkShAdabhimAnAnivartakatvAt | brahmamImAMsAyAM tvayaM visheSho yat
paramAtmavivekasheShatvam | sA~NkhyashAstre tu sAmAnyAtmavivekasheShatvamiti
dik | nanu yathoktavivekakhyAtito.apyatyantamavidyochChedo na ghaTate |
vivekakhyAteravidyApratibandhakatvamAtratvena vivekakhyAtinAshottaraM
punarabhimAnasambhavAt | shuktirajatavivekadarshino.api kAlAntare
shuktau rajatabhramavaditi | maivam | dR^iShTAntavaiShamyAt | shuktyAdiShu
jAte.api sAkShAtkAre dUratvAdirUpaviShayadoShANAM paTalAdirUpakaraNadoShANAM
chotpattisambhavena punarbhramo yuktaH | anAtmanyAtmAbhimAne tvanAdivAsanaiva
doShaH sarvAstikasammataH jAtamAtrasyAbhimAne doShAntarAnupalabdheH |
sA mithyAj~nAnavAsanA yadA vivekakhyAtiparamparAjanyadR^iDhavAsanonmUlitA
tadaiva vivekasAkShAtkAraniShThochyate | tatpUrvamavashyaM vAsanAleshato
mithyAMshasya kasyApyAtmani bhAvAt tasyAM cha vivekakhyAtiniShThAyAM jAtAyAM
na punarabhimAnaH sambhavati vAsanAkhyadoShAbhAvAditi tu mahadvaiShamyam | yadi
tu buddhipuruShayoranyonyapratibimbanAdikamavivekakAraNaM doSha iShyate tadA tu
taddoShaM bAdhitvaiva vivekasAkShAtkAra udita iti na tasya punarbhramahetutvaM
phalabalena yogajadharmAsahakR^itasyaiva tasya doShatvakalpanAsambhavAditi |
vivekakhyAtiniShThA cha gItAdiShu lakShitA |
prakAshaM cha pravR^ittiM cha mohameva cha pANDava |
na dveShTi sampravR^ittAni na nivR^ittAni kA~NkShati ||
udAsInavadAsIno guNairyo na vichAlyate |
sarvArambhaparityAgI guNAtItaH sa uchyate ||
iti | guNAtIto nivR^ittaguNAbhimAnaH | adhikaM tu j~nAnilakShaNamagre
vakShyAmaH | nanvevamapi vivekapratiyogipadArthAnAmAnantyena prAtisvikarUpaiH
sarvapadArthebhyo vivekagrahAsambhavAt kathaM vivekakhyAtermokShahetutvamiti
chenna | dR^ishyatvapariNAmitvAdisAmAnyarUpairvivekagrahasambhavAt |
tathA hi | draShTA svasAkShAtprakAshebhyo bhinnaH prakAshakatvAdyo
yasya prakAshakaH sa tasmAdbhinnaH yathA ghaTAdAloko
vR^ittiprakAshyAchcha vR^ittirityanumAnenAdAvantardR^ishyebhyo
buddhivR^ittitadArUDhArthebhyo vivekato buddhIsAkShI sidhyati |
karmakartR^ivirodhashchAnukUlastarkaH | atra Atmani vyabhichAravAraNAya
sAkShAtpadam | vR^ittidvAraivAtmanaH svaviShayatvAt | nanvatrAnumAne
buddhivR^ittimAtrAdvivekaH sidhyatu | tasyA eva sAkShadAtmadR^ishyatvAt
na prakR^ityAdibhya iti chenna | vR^ittInAmaj~nAtasattvAbhAvena
hyatrAnumAne lAghavAdvakShyamANatarkagaNAchchAkhilavR^ittInAM draShTA
vibhukUTasthanityaikaj~nAnasvarUpatayaiva sidhyati | yathA naiyAyikAnAM
kShitiH sakartR^ikA kAryatvAdityanumAne lAghavAt karturekatvanityatvAdikaM
tadvat | tatra vibhutvaM parichChinnabhinnatvaM kUTasthatvAdikatvaM
cha pariNAmibhinnatvAdikamato buddhyAtmanordR^igdR^ishyarUpato
vivekagrahe sati taduttarAnumAnena pariNAmitvApariNAmitvAdirUpaiH
sAmAnyato.apyAtmAnAtmavivekagraho ghaTata iti | ataeva pAta~njale
sattvapuruShAnyatAkhyAtireva mokShahetutayA sthale sthale vyAsabhAShye
proktA | sattvapuruShAnyatAkhyAtirUpadR^igdR^ishyavivekagrahottaraM
yathoktarItyA prakR^ityAdivivekagrahAt | tatra cha sattvashabde
buddhisthatvena buddhisattvamuktamiti | evaM cha prakR^ityAdipadArthAnAM
vishiShyaj~nAnAbhAve.api tadvivekaj~nAnaM ghaTate | etena
dR^igdR^ishyavivekAdavidyAnivR^ittiriti prAchAM pravAdo.apyupapAditaH |
ki~nchAtmA prakR^ititatkAryebhyo bhinno.apariNAmitvAdityAdyanumAnairapi
sAmAnyato dR^ishyaviveko draShTari sambhavatIti | yattvAdhunikA vedAntibruvA
dR^ishyatvenaiva prakR^ityAdInAM draShTR^itvena cha prakR^ityAdyakhilajaDebhya
AtmavivekaM manyante |
ghaTadraShTA ghaTAdbhinnaH sarvathA na ghaTo yathA |
dehadraShTA tathA deho nAhamityAdirUpataH ||
tanna | AtmA vA.are draShTavya ityAdishrutibhirAtmano.api dR^ishyatvAt
sAkShAddR^ishyatvavivakShayA cha prakR^ityAderasa~NgrahAt karaNadvAraiva
taddarshanAt | athaivaM kalpanIyaM Atmano vR^ittivyApyatvameva
dR^ishyatvaM shrutyAdibhirvidhIyate na tu prakAshyatvarUpaphalavyApyatvam |
svayamprakAshasvarUpasya prakAshApekShAvirahAt | ato.atra
dR^ishyatvaM prakAshyatvaM tachchAtmani nAstIti tadapi tuchCham |
yathA hyahamityanubhUyamAno.apyAtmA chaitanyAkhyaphalavyApyo na bhavatIti
bhavadbhiruchyate tathaiva bauddhairapIShyate sukhaduHkhAdimattvenApi buddhiH
svaprakAshatayA chaitanyavyApyA na bhavatIti | tathA chAtmanIva buddhAvapi
dR^ishyatvAsiddhyA dR^ishyatvena rUpeNa buddhiviveko.atyantApekShito.api
na sidhyatIti bhAShyAdiShu chAnyAnyatra dUShaNAnyuktAnIti dik | nanu
sambhavatyevaM sAmAnyarUpeNa vivekagrahaH | tathApi sAmAnyAnyeva bahUni santi
pariNAmitvasaMhatyakAritvasukhaduHkhamohAtmakatvachaturviMshatitattvatvAdInyatastaistai
rUpairvivekagrahANAM mokShahetutve.ananugamadoSha iti chenna |
abhimAnapratibandhakaj~nAnatvenaivAnugamAditi | athaivaM
sAmAnyarUpeNa vivekasyaiva sarvAbhimAnanivartakatayA nAhaM
deho nendriyANityAdipratyekarUpairvivekagrahANAM mokShahetutvaM
shrutismR^ityoruchyamAnaM kathaM ghaTeteti chenna | avAntaravivekAnAM
sAmAnyavivekaprapa~nchamAtratvAditi ||

iti shrIvij~nAnabhikShuvirachite sA~NkhyasAre mokShahetuvivekaj~nAnasya
svarUpasya parichChedaH || *||
\-\-\-\-\-\-\-\-\-\-\-\-\-\-\-\-\-\-\-\-

atha tR^itIyaH parichChedaH |

atha ke te prakR^ityAdayo yebhyaH puruSho vivechanIya ityuchyate |
prakR^itirbuddhyaha~NkArau tanmAtraikAdashendriyam |
bhUtAni cheti  sAmAnyAchchaturviMshatireva te ||
eteShveva dharmadharmyabhedena guNakarmasAmAnyAnAmantarbhAvaH | tatra
prakR^ititvaM sAkShAt paramparayA.akhilavikAropAdAnatvaM prakR^iShTAkR^itiH
pariNAmarUpA.asyA iti vyutpatteH | prakR^itiH shaktirajA pradhAnamavyaktaM
tamo mAyA.avidyetyAdayaH prakR^iteH paryAyAH |
brAhmIti vidyA.avidyeti mAyeti cha tathA pare |
prakR^itishcha parA cheti vadanti paramarShayaH ||
iti smR^iteH | sA cha sAmyAvasthayopalakShitaM sattvAdidravyatrayam |
kAryasattvAdivAraNAyopalakShitAntam | sAmyAvasthA cha
nyUnAdhikabhAvenAsaMhananAvasthA akAryAvastheti yAvat | mahadAdikaM tu
kAryasattvAdikaM na kadA.apyakAryAvasthaM bhavatIti tadvyAvR^ittiH |
vaiShamyAvasthAyAmapi prakR^ititvasiddhaya upalakShitamityuktam |
akAryamiti tUpalakShitAntasya niShkR^iShTArthaH | sattvAdiguNavatI
sattvAdyatiriktA prakR^itiriti na sha~NkanIyam | sattvAdInAmataddharmatvaM
tadrUpatvAditi sA~NkhyasUtreNa sattvAdInAM prakR^itisvarUpahetunA
prakR^itidharmatvapratiShedhAt | yogasUtratadbhAShyAbhyAmapi
guNAnAmeva prakR^ititvavachanAchcha | guNebhya eva kAryotpattau
tadanyaprakR^itikalpanAvaiyarthyAchcha | prakR^iterguNA ityAdivAkyaM tu
vanasya vR^ikShA itivad bodhyam |
sattvaM rajastama iti prakR^iterabhavan guNAH |
iti sattvAdInAM prakR^itikAryatvavachanaM tu guNanityatAvAkyavirodhena
mahattattvakAraNIbhUtakAryasattvAdiparameva | mahadAdisR^iShTirhi
guNavaiShamyAt shrUyate | tachcha vaiShamyaM sajAtIyasavalanena
guNAntaravyAvR^ittaprakAshAdiphalopahitaH sattvAdivyavahArayogyaH
pariNAma iti | etenAShTAviMshatitattvapakSho.apyupapAdito mantavyaH |
vaiShamya eva sattvAdivyavahArashcha shrutau dR^ishyate | yathA tama
evedamagra Asa tatpareNeritaM viShamatvaM prayAtyetad vai rajaso
rUpaM khalvIritaM viShamatvaM prayAtyetad vai sattvasya rUpamiti |
sattvAditrayaM cha sukhaprakAshalAghavaprasAdAdiguNavattayA |
saMyogavibhAgAdimattayA.anAshritatvopAdAnatvAdinA cha draShTavye.api
puruShopakaraNatvAt puruShabandhakatvAchcha guNashabdenochyate |
indriyAdivat | guNAnAM sukhaduHkhamohAtmakatvapravAdastu
dharmadharmyabhedAt | manasaH sa~NkalpAtmakatvavat | tatra sattvaM
sukhaprasAdaprakAshAdyanekadharmakaM prAdhAnyatastu sukhAtmakamuchyate |
evaM rajo.api duHkhakAluShyapravR^ittyAdyanekadharmakaM prAdhAnyatastu
duHkhAtmakamuchyate | tathA tamo.api mohAvaraNastambhanAdyanekadharmakaM
prAdhAnyatastu mohAtmakamuchyate | ta eva dharmAsteShAM lakShaNAni
bhavanti | sattvAdisa~nj~nA chAnvarthA | sato bhAvaH sattvamuttamatvamiti
vyutpattyA hi dharmaprAdhAnyenottamaM puruShopakaraNaM sattvashabdArthaH |
madhyamaM cha rajaHshabdArtho rAgayogAt | adhamaM cha tamaHshabdArthaH |
adharmAvaraNayogAt | tAni cha sattvAdIni pratyekamasa~NkhyavyaktayaH |
laghutvAdidharmairanyonyasAdharmyaM vaidharmyaM cha guNAnAmiti sA~NkhyasUtrAt |
atra hi sUtre laghutvAdinA bahUnAM sattvAnAM sAdharmyaM tenaiva rajastamobhyAM
vaidharmyam | evaM chalatvAdinA gurutvAdinA cha bahUnAM rajasAM bahUnAM cha
tamasAM tadubhayamuktamiti | ki~ncha yadi sattvAditrayamekaikavyaktireva syAt
tat trayaM vibhveva vaktavyam | ekadA.anekabrahmANDAdisR^iShTishravaNAt | tathA
cha kAryANAmanantavaichitryaM na ghaTate | na cha saMyogavaichitryAdvaichitryaM
syAditi vAchyam | vibhUnAM trayANAM guNAnAM svataH saMyogavaichitryAsambhavAt |
dravyAntarasya chAvachChedakIbhUtasyAbhAvAditi | tasmAt
sattvAdInyasa~NkhyavyaktikAnyeva dravyANi | teShu tritvavachanaM tu
sattvatvAdivibhAjakopAdhitrayeNa vaisheShikANAM navadravyavachanavaditi
siddham | tAni cha sattvAdIni yathAyogyamaNuvibhuparimANakAni |
anyathA rajasashchalasvabhAvatvavachanavirodhAt | AkAshakAraNatvasya
cha vibhutvauchityAt | sarveShAM kAraNadravyANAM vibhutve kAryANAM
parichChinnatvAnupapatteshcha | nanvevaM vaisheShikoktAnyeva pArthivANvAdIni
prakR^itirityAyAyamiti chenna | gandhAdiguNashUnyatvena kAraNadravyeShu
pR^ithivItvAdyabhAvato.asmAkaM visheShAt | taduktaM viShNupurANAdiShu ||
avyaktaM kAraNaM yat tat pradhAnamR^iShisattamaiH |
prochyate prakR^itiH sUkShmA nityaM sadasadAtmakam ||
shabdasparshavihInaM tadrUpAdibhirasaMyutam |
triguNaM tajjagadyoniranAdiprabhavApyayam ||
ityAdinA |
vaisheShikANAM kAraNadravyeShu gandhAdyanumAnaM
tu bhAShye.asmAbhirnirAkR^itam | athaivamapi
prakR^iteraNuvibhusAdhAraNasattvAdyanekavyaktirupatve.aparichChinnatvaikatvAkriyatvasiddhAntakShatiriti
maivam | kAraNadravyatvarUpaprakR^ititvenaivAparichChinnatvavachanAt |
gandhatvena gandhAnAM pR^ithivIvyApakatAvat | AkAshAdiprakR^itInAM
vibhutvenaiva prakR^itivibhutvasiddhAntopapatteshcha | tathA
puruShabhedena sargabhedena cha bhedAbhAvasyaivaikashabdArthatvAt |
ajAmekAmiti shrutitastathA.avagamAt |
athAdhyavasAyAbhimAnAdikriyArAhityasyaivAkriyashabdArthatvAt |
anyathA shrutismR^itiShUktasya prakR^itikShobhasyAnupapatteriti |
prakR^itigatAshchApare visheShA bhAShye draShTavyAH | prakR^ityanumAnaM chedam |
sukhaduHkhamohAtmakaM mahadAdikAryaM sukhaduHkhamohAtmakadravyakAryaM
sukhaduHkhamohAtmakatvAt vastrAdikAryashayyAdivaditi | shrutismR^itI
chAtrAnugrAhakastarkaH | evaM sAmAnyato.anumitAyAH prakR^itervisheShAH
shAstrAdyogAchchAvagantavyAH | anumAnasya sAmAnyamAtraviShayakatvAt |
nanvantareva sukhAdikamupalabhyate bAhyavastuShu sukhAdau kiM pramANaM yena
dR^iShTAntatA syAditi | uchyate | antaHkaraNasya sukhAdihetutayA viShayeShu
sukhAdikaM sidhyati | na cha rUpAdigatottamatvAdikameva sukhAdyutpAdane
niyAmakam | uttamatvAderjAtirUpatve nIlatvapItatvAdinA jAtisA~NkaryApatteH |
kAlAdibhedairekasyA eva rUpavyakteH sukhaduHkhotpAdakatvAchcha |
ataH sukhAdimattvamevottamatvAdikam | ki~ncha ghaTarUpamiti pratyayavat
strIsukhaM chandanasukhamityAdipratyayAdapi viShaye sukhAdyuchitam |
adhikaM tu bhAShye draShTavyam | tadevaM prakR^itirnirUpitA | mahattattvaM
nirUpyate | prakR^iteH sakAshAdbuddhyAkhyaM mahattattvaM jAyate | tasya
dharmAdirUpaprakR^iShTaguNayogAn mahatsa~nj~nA tadeva cha lakShaNam | mahAn
buddhiH praj~netyAdayashcha tasya paryAyAH | tathA choktamanugItAyAm |
mahAnAtmA matirviShNurjiShNuH shambhushcha vIryavAn |
buddhiH praj~nopalabdhishcha tathA brahmA dhR^itiH smR^itiH ||
paryAyavAchakairetairmahAnAtmA nigadyate |
sarvataH pANipAdashcha sarvato.akShishiromukhaH ||
sarvataH shrutimAMlloke sarvaM vyApya sa tiShThati |
aNimA laghimA prAptirIshAno jyotiravyayaH ||
j~nAnavantashcha ye kechidalubdhA jitamanyavaH |
vimuktAH sarva evaite mahattvamupayAntyuta |
viShNurevAdisargeShu svayambhUrbhavati prabhuH ||
iti | atra sattvAdyaMshatrayeNa mahato devatAtrayopAdhitvAt tadavivekena
brahmaviShNushivatvavachanam | taduktaM viShNau |
sAttviko rAjasashchaiva tAmasashcha tridhA mahAn |
iti | mAtsye cha |
savikArAt pradhAnAt tu mahattattvamajAyata |
mahAniti yataH khyAtirlokAnAM jAyate sadA ||
guNebhyaH kShobhyamANebhyastrayo devA vijaj~nire |
ekA mUrtistrayo devA brahmaviShNumaheshvarAH ||
iti | aNimetyAdibhAvanirdesho dharmadharmyabhedAt |
brahmasha~NkarApekShayA.apyAdau viShNurUpeNaiva mahAnAvirbhavatIti
viShNurevetyardhenoktam | ekameva mahattattvamaMshato
rajastamaHsambhedena pariNataM sad vyaShTijIvAnAmupAdhiradharmAdiyuktaM
kShudramapi bhavati | mahaduparAgAdviparItamiti sA~NkhyasUtrAt |
mahattattvasya prAdhAnyenAsAdhAraNyena chAdhyavasAyo vR^ittiH |
mahadaha~NkAramanastritayAtmakasyAntaHkaraNasya mahattattvaM bIjAvastheti |
atra prakR^itermahAn mahato.aha~NkAra ityAdisR^iShTikrame shAstrameva pramANam |
anumAnena sAmAnyataH kAryANAM sakAraNakatvamAtrasiddheH na tu sR^iShTau
bhUtAdikramo vA.antaHkaraNAdikramo vetyekataravadhArakamanumAnaM sambhavati |
spaShTali~NgAbhAvAt | shrutismR^ityanugR^ihItaM yathAkatha~nchilli~NgaM tu
mahadAdikrame.astIti bhAShye.asmAbhiH pradarshitam | mahattattvaM nirUpitam |
aha~NkAro nirUpyate | mahattattvAdaha~NkAra utpadyate | a~NkurAt shAkhAvat |
tasya chAbhimAnavR^ittikatvAdaha~NkArasa~nj~nA | kumbhakArasa~nj~nAvat |
tadeva lakShaNam | tasya cha paryAyAH kaurme proktAH |
aha~NkAro.abhimAna~ncha kartA mantA cha saMsmR^itaH |
AtmA cha prakulo jIvo yataH sarvAH pravR^ittayaH ||
iti | sa chAha~NkArastrividhatayA trividhakAryahetuH | taduktaM kaurme |
vaikArikastaijasashcha bhUtAdishchaiva tAmasaH |
trividho.ayamaha~NkAro mahataH sambabhUva ha ||
taijasAdindriyANi syurdevA vaikArikAddasha |
ekAdashaM manashchAtra svaguNenobhayAtmakam ||
bhUtatanmAtrasargastu bhUtAderabhavan prajAH |
iti | vaikArikaH sAttvikaH | taijaso rAjasaH | svaguNenindriyavR^ittiShu
sAhAyyarUpeNotkarSheNa | ubhayAtmakaM j~nAnakarmobhayendriyAtmakam |
anyatramanA abhUvaM nA.ashrauShamityAdishrutyA manaso
j~nAnakarmobhayendriyasahakAritvasiddheriti | ekAdashendriyadevAshcha |
digvAtArkaprachetoshvivahnIndropendramitrakAH |
chandrashcha
iti | aha~NkAro nirUpitaH | indriyAdIni nirUpyante | aha~NkArAdAdau mana
utpadyate |
shabdarAgAchChrotramasya jAyate bhAvitAtmanaH |
rUparAgAt tathA chakShurghrANaM gandhajighR^ikShayA ||
ityAdinA mokShadharmAdAvindriyAdInAM manovR^ittirAgAdikAryatvashravaNAt |
tatashchAha~NkArAt sa~NkalpapUrvakaM dashendriyANi pa~nchatanmAtrAni
chotpadyante | indriyatanmAtrayoshcha kAryakAraNabhAvasyAbhAvAt kramaniyamo
nAsti | tatrendriyeShu nAstyavAntarakAryakAraNabhAvaH pramANAbhAvAt |
tanmAtreShu tvasti | sa yathA | shabdatanmAtrAdvakShyamANakrameNa
sparshatanmAtraM shabdasparshobhayaguNakamevaM krameNaikaikaguNavR^iddhyA
paratanmAtratrayaM pUrvapUrvatanmAtrebhya utpadyate pAta~njalabhAShye
tanmAtreShu krameNaikaikaguNavR^iddhivachanAt | tatashcha pa~nchatanmAtrebhyaH
pa~nchabhUtAni jAyante | tatrAha~NkArAt pa~nchatanmAtrANAM taddvArA bhUtAnAM
chotpattau kramaH kUrmaviShNvAdipurANeShUktaH | yathA kUrme |
bhUtAdistu vikurvANaH shabdamAtraM sasarja ha |
AkAshaM suShiraM tasmAdutpannaM shabdalakShaNam ||
AkAshastu vikurvANaH sparshamAtraM sasarja ha |
vAyurutpadyate tasmAt tasya sparsho guNo mataH ||
ityAdikrameNeti | nanvevamAkAshAdibhUtachatuShTayasyApi
tattvAntarArambhakatvena prakR^ititvApattyA
kevalavikR^ititvasiddhAntakShatiriti chenna | AkAshAdInAM
sparshAditanmAtreShvaha~NkAropaShTambhamAtreNa kAraNatvasya
purANeShUktatvAditi | tadevaM trayoviMshatitattvAnAmutpattiruktA | tatra
pa~nchabhUtAni varjayitvA.aha~NkAraM cha buddhau praveshya saptadashakaM
li~NgasharIrasa~nj~naM bhavati vahnerindhanavadAtmano.abhivyaktisthAnatvAt |
tachcha sarvapuruShANAM sargAdAvutpadya prAkR^itapralayaparyantaM tiShThati |
tenaiva chehalokaparalokayoH saMsaraNaM jIvAnAM bhavati | prANashcha
buddhereva vR^ittibheda ityato na li~NgasharIrAt pR^itha~N nirdishyate | tasya
li~NgasharIrasya sUkShmANi pa~nchabhUtAnyAshrayashchitrAdivadAshrayaM
vinA paramasUkShmasya lokAntaragamanAsambhavAt | idaM cha
li~NgasharIramAdau svayambhuva upAdhibhUtamekameva jAyate | tasyaiva
virADAkhyavakShyamANasthUlasharIravat | tatashcha vyaShTijIvAnAmupAdhibhUtAni
vyaShTili~NgasharIrANi tadaMshabhUtAni tato vibhajyante | piturli~NgasharIrAt
putrali~NgasharIravat | taduktaM sUtrakAreNa | vyaktibhedaH karmavisheShAditi |
manunA.apyuktam |
teShAM tvavayavAn sUkShmAn  ShaNNAmapyamitaujasAm |
sanniveshyAtmamAtrAsu sarvabhUtAni nirmame ||
iti | ShaNNAmiti ShaDindriyaM samastali~NgasharIropalakShakam |
tathA cha svayambhUH svali~NgasharIrAvayavAn sUkShmAn alpAn
AtmamAtrAsu svAMshachetaneShu saMyojya sarvaprANinaH sasarjetyarthaH |
li~NgasharIraM nirUpitam | sthUlasharIrotpattiruchyate |
dashaguNitamahattattvamadhye.aha~NkAro.aha~NkArasyApi dashaguNitasya madhye
vyoma vyomno.api dashaguNitasya madhye vAyurvAyorapi dashaguNitasya madhye
tejaH tejaso.api dashaguNitasya madhye jalaM jalasyApi dashaguNitasya
madhye pR^ithivI samutpadyate | saiva sthUlasharIrasya bIjam | tadeva cha
pR^ithivIrUpaM bIjamaNDarUpeNa pariNamate | tasyApi dashaguNitasyANDarUpasya
pR^ithivyAvaraNasya madhye chaturdashabhuvanAtmakaM svayambhuvaM sthUlasharIraM
tatsa~NkalpAdevotpadyate | tenaiva sharIreNa svayambhUrnArAyaNa ityuchyate |
taduktaM manunA svayambhuvaM prakR^itya |
so.abhidhyAya sharIrAt svAt sisR^ikShurvividhAH prajAH |
apa eva sasarjAdau tAsu bIjamavAsR^ijat ||
tadaNDamabhavaddhaimaM sahasrAMshusamaprabham |
tasmin jaj~ne svayaM brahmA sarvalokapitAmahaH ||
sa vai sharIrI prathamaH sa vai puruSha uchyate |
AdikartA sa bhUtAnAM brahmAgre samavartata ||
Ape nArA iti proktA Apo vai narasUnavaH |
tA yadasyAyanaM pUrvaM tena nArAyaNaH smR^itaH ||
ityAdineti | tata eva chAdipuruShAt vyaShTipuruShANAM vibhAgAdante cha
tatraiva layAt sa eva chaika Atmeti shrutismR^ityorvyavahriyate | ato na
vyavahAraparatayA nArAyaNa eva sarvabhUtAnAmAtmeti shrutismR^itivirodha iti |
tatashcha sa nArAyaNo virAT sharIrI svanAbhikamalakarNikAsthAnIyasya
sumerorupari chaturmukhAkhyasvayambhuvaM sR^iShTvA taddvArA.anyAnapi
vyaShTisharIriNaH sthAvarAntAn sasarja | tathA cha smaryate |
tachCharIrasamutpannaiH kAryaistaiH karaNaiH saha |
kShetraj~nAH samajAyanta gAtrebhyastasya dhImataH ||
iti | yattu sheShashAyino nArAyaNasya
nAbhikamalashrotrachakShurAdibhyashchaturmukhasyAvirbhAvaH
shrUyate taddainandinasargeShveva kalpabhedena mantavyam |
dainandinapralayeShveva hi nArAyaNasharIre pravishyaikIbhUya suptAnAM
devAnAM chaturmukhAdikrameNAvirbhAvaH sheShashAyinaH sakAshAdghaTate na
tvAdisargeShu | dainandinapralaya eva lIlAvigraheNa shayanAditi | tadevaM
sa~NkShepatashchaturviMshatitattvAni teShAM sR^iShTirUpaM prayojanaM choktam |
tatra yadyasmAjjAyate tasya tadApUraNenaiva sthitiH tatastasya saMhAro.api
tatraiva bhavati |
yadyasmAjjAyate tattvaM tattatra pravilIyate |
lIyante pratilomAni jAyante chottarottaram ||
iti bhAratAdibhya iti | ete cha sR^iShTisthitisaMhArarUpAH sthUlA eva
pariNAmAshchaturviMshatitattvAnAM kUTasthapuruShavivekAya pradarshitAH |
sUkShmA apyanye pratikShaNapariNAmA eteShAM smaryante | tathA |
nityadA hya~NgabhUtAni bhavanti na bhavanti cha |
kAlenAlakShyavegena sUkShmatvAttanna dR^ishyate ||
iti | atashcha sarvaM jaDavastu paramArthataH sarvadaivAsaduchyate |
tatashcha tasmAdvirajyAtmaiva paramArthasatyo duHkhabhIrubhirdraShTavyaH |
taduktamanugItAyAm |
avyaktabIjaprabhavo budhiskandhamayo mahAn |
mahAha~NkAraviTapa indriyA~NkurakoTaraH ||
mahAbhUtaprashAkhashcha visheShapratishAkhavAn |
sadAparNaH sadApuShpaH shubhAshubhaphalodayaH ||
AjIvaH sarvabhUtAnAM brahmavR^ittaH sanAtanaH |
etajj~nAtvA cha tattvena j~nAnena paramAsinA ||
ChittvA chAkSharatAM prApya jahAti mR^ityujanmanI |

iti shrIvij~nAnabhikShuvirachite sA~NkhyasAre vivekapratiyoginAM
prakR^ityAdInAM svarUpaparichChedaH || *||
iti sA~NkhyasArasya pUrvabhAgaH ||

\-\-\-\-\-\-\-\-\-\-\-\-\-\-\-\-\-\-\-\-

athottarabhAgaH ||

prathamaH parichChedaH ||

atha shiShyaiH sukhenaiva grahItuM padyamAlayA |
vivekasyAnuyogyAtmA puruShAkhyo nirUpyate || 1||
tatra sAmAnyataH siddho jAne.ahamiti dhIbalAt |
draShTA.ato nityavibhvAdidharmaireva sa sAdhyate || 2||
bhoktA nityastadarthatvAt tatkarmotpAditatvataH |
mahadAdivikArANAM sarveShAmavisheShataH || 3||
api chAdR^iShTasaMskArAdhAratvAdbIjarUpataH |
dhIranAdirato.asyAshcha siddhA bhokturanAditA || 4||
svasvAmibhAvAnAditvamR^ite bhoktR^ivyavasthiteH |
svabhaktavR^ittisaMskAravattvaM svatvaM tu buddhiShu || 5||
svAmyaM svaniShThasaMskArahetuvR^itteshcha bhoktari |
atashcha ghaTate svatvanAshe kaivalyamAtmanaH || 6||
bhoktushchAnAdibhAvasya vinAshe hetvasambhavAt |
na nAsho bhokturastIti bhoktA nityo hi sidhyati || 7||
janyo j~nAnaprakAsho.asya nityatve tu na yujyate |
na hyaprakAshe kutrApi prakAshotpattirIkShyate || 8||
kArye prakAshAkhyaguNe.avayavAnAM hi tadguNaH |
kAraNaM tena nAnityaH prakAsho nityavastuni || 9||
prakAshAshrayasaMyogAt prakAshabhUma indhane |
Adarshe chAvR^iterbha~NgAt prakAshotpattivibhramaH || 10||
tasmAnnityAtmano j~nAnaM nityaM vAchyaM tathA sati |
lAghavAjj~nAnamevAtmA nirAdhAraH prakalpyate || 11||
anAshritatayA dravyaM saMyogAdeshcha tanmatam |
ato j~nAne.ahamityAdibuddhirapyupapadyate || 12||
piNDe.ahandhIrhi mUDhAnAM dhruvaivAnAdidoShataH |
saMyogAttatra piNDe tu j~nAnavattvamatiH pramA || 13||
santu vA.a.adheyatA.alpatvajanmanAshAdibuddhayaH |
shrotrasya nabhasIvArthaj~nAnasya j~nAnamAtrake || 14||
tasmAllAghavatarkeNa bAdhakAbhAvatastathA |
shrutyAdibhishcha nityAtmA chidrUpeNaiva sidhyati || 15||
tajj~nAnaM vibhu nityatvAddehavyApitayA.api cha |
madhyatve nAshitA hi syAdaNutve vA.alpadeshatA || 16||
vibhutve.api svadhIvR^ittereva sAkShAnnirIkShaNAt |
na sarvatra sadA sarvabhAnaM j~nAne prasajyate || 17||
arthabhAnaM chitAvarthapratibimbo mato budhaiH |
vR^ittereva chittau sAkShAtpratibimbanayogyatA || 18||
ato.asa~Nge.api kUTasthachaitanye vibhuni dhruve |
vR^ittidvArakamevAnyabhAnaM phalabalAn matam || 19||
anvayavyatirekAbhyAM vR^ittijanyatayA.akhilaH |
vR^ityaikAdhikaraNyena kAmAdirdhIShu nAtmasu || 20||
ato.antaHsvavikArANAM svasvabuddhiShvavasthiteH |
kUTAstha eva sarvo.api chidAkAshagaNaH samaH || 21||
nityashuddho nityabuddho nityamukto nira~njanaH |
svaprakAsho nirAdhAraH pradIpaH sarvavastuShu || 22||
nanvevamekataivAstu lAghavAdAtmanAM svavat |
dhIShveva sukhaduHkhAdivaidharmyAditi chenna tat || 23||
bhogAbhogAdivaidharmyeNaikarUpe.api chidgaNe |
shrutismR^itibhyAmuktena bhedasiddheH parasparam || 24||
sukhAdipratibimbhAtmA bhogo.apyasya na vastutaH |
tathA.apyasya chitau bhAvAbhAvau syAtAM hi bhedakau || 25||
aupAdhikau yathA shyAmarAgau sphaTikabhedakau |
svadR^iShTAntashcha viShamo vaidharmyAsiddhito.ambare || 26||

iti shrIvij~nAnabhikShuvirachite sA~NkhyasAre puruShasvarUpaparichChedaH || *||

\-\-\-\-\-\-\-\-\-\-\-\-\-\-\-\-\-\-\-
atha dvitIyaH parichChedaH ||

athAtmAnAtmavaidharmye guNadoShAtmake tayoH |
vakShye vistArato yena viveko.atisphuTo bhavet || 1||
sAmAnyAtmaghanAkAshe sAnnidhyeritashaktibhiH |
jAyate lIyate bhUtvA bhUyo.ayaM jagadambudaH || 2||
triguNAtmakashaktInAM pariNAmairatashchitiH |
AdhAravidhayA vishvopAdAnamavikArataH || 3||
yathA.a.adharatayA toyaM dharopAdAnamiShyate |
svasthapArthivatanmAtradvAreNaivaM chitirmatA || 4||
ato jagadupAdAnamapi brahmAvikArataH |
kUTasthanityaparyAyaparamArthasaduchyate || 5||
svArthatvAt svAnubhUtyA cha siddhatvAt paramArthasat |
svataH sthityA svataH siddhyA lokaiH sanniti hIryate || 6||
pratikShaNavikAreNa taistai rUpairapAyataH |
prakR^ityAdirasat sarvo jaDArtho.abdhau tara~Ngavat || 7||
yattu kAlAntareNApi nAnyasa~nj~nAmupaiti vai |
pariNAmAdisambhUtAM tadvastvityAdikasmR^iteH || 8||
parArthAdhInasattvAchcha paradR^iShTyA cha siddhitaH |
parataH sannasanneva tatparApekShayA mataH || 9||
sato.astitvaM tu nAsattA nAstitve satyatA kutaH |
iti gAruDatashchaivaM sadasattvavyavasthiteH || 10||
ato na sannAsadidaM jagat sadasadAtmakam |
asadviShayakatvAchcha tasya dhIstAttviko bhramaH || 11||
jagadvR^ikShasya chaitanyaM sAro.asArastathetarat |
prapa~nchasya sthirAMsho hi chitirevAvikArataH || 12||
tadanyadakhilaM tuchChamasAratvAdudIryate |
tathA.anR^itamasachchApi tadapekShAsthiratvataH || 13||
evaMvidhaivAtmasattA anyAsattA cha darshitA |
vAsiShThAdau vistarato yathA leshAttaduchyate || 14||
svapno jAgratyasadrUpaH svapne jAgradasadvapuH |
mR^itirjanmanyasadrUpA mR^itau janmApyasanmayam || 15||
jaganmayI bhrAntiriti na kadApi na vidyate |
vidyate na kadAchichcha jalabudbudavat sthitam || 16||
AtmaivAsti paraM satyaM nAnyAH saMsAradR^iShTayaH |
shuktikArajataM yadvadyathA marumarIchikA || 17||
asti sarvagataM shAntaM paramAtmaghanaM shuchi |
achintyachinmAtravapuH paramAkAshamAtatam || 18||
tatsarvagaM sarvashakti sarvaM sarvAtmakaM svayam |
yatra yatra yathodeti yathA.a.aste tatra tatra vai || 19||
AvirbhAvatirobhAvamayAstribhuvanormayaH |
sphurantyatitate yasmin marAviva marIchayaH || 20||
asateva satI toyanadyeva laharI chalA |
manasevendrajAlashrIrjAgatI pravitanyate || 21||
brahmaNA tanyate vishvaM manasaiva svayambhuvA |
manomayamato vishvaM yannAma paridR^ishyate || 22||
yo hyashuddhamatirmUDho rUDho na vitate pade |
vajrasAramidaM tasya jagadastyasadeva sat || 23||
avyutpannasya kanake kAnake kaTake yathA |
kaTakaj~naptirevAsti na manAgapi hemadhIH || 24||
tathA.aj~nasya purAgAranaganAgendrabhAsurA |
iyaM dR^ishyadR^igevAsti na tvanyA paramArthadR^ik || 25||
ityAdivAkyairvAsiShThe nAtyantAsatyatoditA |
jagato.aparavAkyairhi satkAryaM prAkR^itaM matam || 26||
nAmarUpavinirmuktaM yasmin santiShThate jagat |
tamAhuM prakR^itiM kechin mAyAmeke.apare tvaNUn || 27||
suShuptAvasthayA chakrapadmarekhAshilodare |
yathA sthitA chiterantastatheyaM jagadAvalI || 28||
prakR^itivratatirvyomni jAtA brahmANDasatphalA |
ityAdivAkyaiH sA~NkhyIyasatkAryAdyupavarNanAt || 29||

iti shrIvij~nAnabhikShuvirachite sA~NkhyasAre AtmAnAtmanoH
satyatvAsatyatvavaidharmyaparichChedaH || *||

\-\-\-\-\-\-\-\-\-\-\-\-\-\-\-\-\-\-\-

atha tR^itIyaH parichChedaH ||

tadevAtmanaH sattA darshitA.anyavilakShaNA |
atha chidrUpatAM vakShye buddhivR^ittivilakShaNAm || 1||
anubhUtishchitirbodho vedanaM chochyate pumAn |
vedyaM jaDaM tamo.aj~nAnaM pradhAnAdikamuchyate || 2||
vedanaM vedyasambandhAdeva vettrabhidhIyate |
yathA prakAshyasambandhAt prakAsho.api prakAshakaH || 3||
yathA vA.arthoparAgeNa bhAnamarthasya bhAsakam |
evaM vedyoparaktasyAsvAMshasyAdhAratAM.ashini || 4||
asa~NgAyAM chitau vedyoparAgo.ayaM na dhIShviva |
kintu sAkShAddvArato vA chiti tatpratibimbanam || 5||
bAhyaM vR^ittyAkhyakaraNAbhAvAdanuparAgataH |
chitirnaivekShate chetyaM vibhutve.api cha sarvataH || 6||
tathA chidapi vR^ittyAkhyakaraNAbhAvato.arthavat |
svagocharAM vR^ittimR^ite tiShThatyaj~nAtasattayA || 7||
tadevaM chinnirAkArA prakAshAkAsharUpiNI |
tiShThatyavyaktarUpA cha mokShAdau vR^ittyabhAvataH || 8||
buddhivR^ittistu sAkArA parichChinnA cha dIpavat |
vyaktA cha sarvadA tadvadasa~NkhyA kShaNabha~NgurA || 9||
jaDA cha paradR^ishyatvAdghaTadIpAdivan matA |
vR^itteH prakAshatA tvarthAkAratvAdakShataiva hi || 10||
yathA.asyAkAratArhatvAdAdarshastatprakAshakaH |
sarvAkAratvayogyatvAt saivaM sarvaprakAshikA || 11||
na punarvR^ittidraShTR^itvaM chitastadbhinnadraShTR^itA |
vR^itteryato gauravaM syAddvayorj~nAtR^itvakalpane || 12||
buddhyArUDhaM tvanyavastu taddvArA pratibimbitam |
pashyatyanubhavo nAnyo draShTA buddhyAdiko.akhilaH || 13||
ityevaM buddhivR^ittibhyo vailakShaNyaM chitIritam |
chidachittvAkhyavaidharmyaM dehAdibhyaH sphuTantvidam || 14||
anyonyapratibimbena sArUpyAdvR^itibodhayoH |
bodhavyavahR^itirvR^ittau lohe.agnivyavahAravat || 15||
naivAlpabuddhyAshakyo.ayaM viveko vR^ittibodhayoH |
tArkikA yatra sammUDhAH sA~NkhyAnAM shreShThatA yataH || 16||
vij~nAnavAdino bauddhA vR^ittibodhAvivekataH |
j~nAtAtmatvashrutau mUDhA menire kShaNikAM chitim || 17||
sattvapuMso viveko.ayaM vR^ittitadbodharUpayoH |
nAshakyaH sudhiyAM yadvaddhaMsAnAM kShIranIrayoH || 18||
etadantashcha saMsAro mokShAstatraiva saMsthitaH |
yadvR^ittibhyo vivekena tadbodhasyAvadhAraNam || 19||
sarvo.apyanubhavaM veda na kashchidapi vedatAm |
vivekamAtramasmin hi bhAsamAne.apyapekShate || 20||
AtmA vivektuM bAhyArthe na shakyo vR^itimishraNAt |
ato vR^ittau vivektavyo vR^ittibodhatayaiva saH || 21||
yathA buddhyA vivekArho nAgnira~NgAramishraNAt |
so.a~NgAre tu vivekArho kAShThadagdhR^itayA sphuTam || 22||
ataeva shrutau svapne dR^ishyavR^ittivivekataH |
svayaMjyotiHsvarUpeNa tasyA draShTA pradarshitaH || 23||
sAkShAt prakAsho yo yasya sa tadbhinno mato budhaiH |
ghaTAdibhyo yathA.a.aloka AlokAchchApi vR^ittayaH || 24||
vR^itteH sAkShAt prakAshatvAdato.anubhavarUpakaH |
vR^ittibhyo bhinna Atmeti shIghro mArgaH svadarshane || 25||
evamAdiprakAreNa buddhisattvaprakAshataH |
vilakShaNatayA siddhashchitprakAsho.asya bhAsakaH || 26||
svapnadehAdidR^iShTAntaistasmAchChrutyAdidarshitaiH |
jAgraddehendriyArthebhyashchitirbhinnatayA matA || 27||
svapne dehAdikaM sarvaM chidbhinnaM chiti bhAsate |
jAgratyevaM visheShastu yadbAhyamapi bhAsate || 28||
svapne manomayatvAchcha sAkShAchchidviShayo.akhilam |
karaNadvArato bAhyaM chito jAgrati gocharaH || 29||
sarvaM dehAdikaM svapnajAgratorekarUpataH |
bhAti chidvyomni nAtrArthabAhyAntarbhedato bhidA || 30||
chidvyomni vAsanAto dhIH pramANAdvA.artharUpiNI |
tatashchito.arthabhAnaM yat tat samaM svapnajAgratoH || 31||
tadidaM svAnubhUtyaiva prochyate na parokShataH |
svapnadR^iShTAntasadR^isho nopAyo.astyAtmadarshane || 32||
suShuptau hi yathA svapne svAtmanyevekShate.akhilam |
AtmAnaM chaikadeshasthaM manyate jAgare tathA || 33||
suShuptirAtmanastattvaM svarUpAvasthitestadA |
jAgratsvapnau mAyikau tu mR^iShAsArUpyato dhiyA || 34||
buddheH suShuptistamasA.a.avaraNaM tadvilakShaNA |
chiteH suShuptirvR^ittyAkhyadR^ishyAvaraNashUnyatA || 35||
pUrNaH kUTasthanityashcha svasvadhImAtravR^ittidR^ik |
vR^ittyAkhyadR^ishyavirahAt sarvadA nekShate pumAn || 36||
vR^ittideshe yathA bodhastathA sarvatra sarvadA |
vR^ithaiva tapyate mUDhairvyayanAshAdinA.a.atmanaH || 37||
duHkhabhogamahAroganidAnaM dehagehinI |
buddhirna tyajyate mUDhairmahAnidrAsukhaM yataH || 38||
anAdibuddhigArhasthyaM vivekastyajyate na chet |
na mokSho bAhyasannyAsAdihAmutrAsukhaM param || 39||
samachinmAtrarUpeShu svaparAtmasu sarvadA |
buddhimAtravivekena svaparAdibhidA mR^iShA || 40||
chinmAtre nirguNe svAminyAropyaivAtmakartR^itAm |
svAmyavaj~nAparAdhena vadhyate dhIH svakarmabhiH || 41||
sAdhvI tu dhIH patiM dR^iShTvA yAthAtathyena tatparA |
ihAnandamayI chAnte patidehe layaM vrajet || 42||
nAhaM kartA sukhI duHkhI chinmAtrAkAsharUpakaH |
evaM nAthaM chintayantI na patyurduHkhabhogadA || 43||

iti shrIvij~nAnabhikShuvirachite sA~NkhyasAre
AtmAnAtmanoshchidachittvavaidharmyaparichChedaH || *||

\-\-\-\-\-\-\-\-\-\-\-\-\-\-\-\-\-\-\-

atha chaturthaH parichChedaH ||

ityevamAtmanaH prokto buddhyAdibhyo vilakShaNaH |
chitprakAsho.adhunA.a.anandarUpatA vakShyate tathA || 1||
duHkhaM kAmasukhApekShA sukhaM duHkhasukhAtyayaH |
iti smR^iteH sukhAtmatvaM nityanirduHkhatA.a.atmanaH || 2||
paribhAShAbalAdrUDhibAdhaH sarvatra sammataH |
anyathA paribhASheyaM mokShashAstre bhavedvR^ithA || 3||
yadvA parokShavAdena paramapriyatAptaye |
rUpikA sukhagIH puMsi vibhutvAptyai svashabdavat || 4||
nAnandaM na nirAnandamityAdishrutibhiH sphuTam |
AtmanyAnandarUpatvaniShedhAdyuktisaMyutAt || 5||
upAsAdyarthashUnyatvAnneti neti shrutestathA |
niShedhavAkyaM balavadvidhivAkyAditi sthitiH || 6||
nirnirAnandamiti cha svopAdhyAnandabhoktR^itAm |
svAmitvarUpiNIM vakti na nirdhana itIva hi || 7||
preyo.anyasmAchcha sarvasmAditi shrutyA sukhAdapi |
ukta AtmA priyastasya sukhatvoktishcha nochitA || 8||
AnandAdyAH pradhAnasya iti vedAntasUtrataH |
vedAnte.api na siddhAnta AtmanaH sukharUpatA || 9||
vistArAdbrahmamImAMsAbhAShye.asmAbhiH parIkShitam |
chiterasukharUpatvaM premA vyAkhyAyate.adhunA || 10||



mA na bhUvamahaM shashvadbhUyAsamiti rUpakaH |
nirnimitto.anurAgo yaH sa premA paramashchiti || 11||
anyAsheShatayA buddheH sneho.ayaM na sukheShvapi |
ataH priyatamaH svAtmA nAnyo.ato hyadhikaH priyaH || 12||
AtmatvenAtmani premA na sukhatvAdyapekShate |
ahaM syAmiti chedyasmAt sukhaM syAmiti neShyate || 13||
tathA cha sukhatAduHkhAbhAvate vA.a.atmatA.api cha |
premNi prayojikA siddhA svataHpremAtmataiva tu || 14||
tasmAdvastuta Atmaiva priyo naipAdhikatvataH |
aupAdhikItaraprItirasthiratvAnna tAttvikI || 15||
prItiranyatra chAnityAvivekAdyaiH sukhAdiShu |
AtmaprItistu nityA.ato nityAnandaH pumAn mataH || 16||
AtmanaH priyatAM buddhiryadi pashyet samAhitA |
sarvAtishAyinIM tarhi sukhAbdhau kiM na majjati || 17||
priyadarshanato buddheH sukhaM lokeShu dR^ishyate |
ato.anumeyaM paramapriyadR^iShTyA paraM sukham || 18||
AtmArthatvena sarvatra prItirAtmA svataH priyaH |
iti shashvachChrutiH prAha AtmadR^iShTividhitsayA || 19||
tato.apyanupamaM j~neyaM priyAtmekShaNataH sukham |
bhu~njate tat sukhaM dhIrA jIvanmuktA mahAdhiyaH || 20||
antarAtmasukhaM satyamavisaMvAdi yoginam |
apashyan kR^ipaNo bAhyasukhArthI va~nchito janaH || 21||
sukhAshayA bahiH pashyan dehI hIndriyarandhrakaiH |
vAtAyanairgR^ihItvA.antaH sukhaM vetti na bAhyadR^ik || 22||
dukhalabhyAn duHkhamayAn pariNAme.atiduHkhadAn |
viShayotthAn sukhAbhAsAn dhik svAtmasukharodhakAn || 23||

iti shrIvij~nAnabhikShuvirachite sA~NkhyasAre AtmAnAtmanoH
priyApriyatvavaidharmyaparichChedaH || *||

\-\-\-\-\-\-\-\-\-\-\-\-\-\-\-\-\-\-\-

atha pa~nchamaH parichChedaH |

parichChedatrayeNoktaM sachchidAnandarUpakam |
gIyamAnaM shrutismR^ityorAtmano lakShaNatrayam || 1||
tadvaiparItyamanyeShAM lakShaNaM cheritaM sphuTam |
AbhyAM tu guNadoShAbhyAM viveko doShahR^it paraH || 2||
nairguNyasaguNatvAdivaidharmyANyaparANyapi |
bahUni vakShye sa~NkShepAt pumprakR^ityorataH param || 3||
dhiyo.arthAkArayA vR^ittyA janitatvAt sukhAdayaH |
sAmAnAdhikaraNyena kalpyante lAghavAd dhiyAm || 4||
mahadAderjaDatvena taddhetushcha jaDo mataH |
kAryakAraNasAjAtyaM dR^iShTaM loke hi sarvataH || 5||
ata AtmA bodhamAtratayA sidhyati lAghavAt |
guNAH sarve prakR^ityAdervikArAshchetare.akhilAH || 6||
AtmA tu nirguNastadvat kUTasthashcha mato budhaiH |
chiteH kUTasthasa~nj~nA tu sthiratvAd girikUTavat || 7||
lepashchetarasambandhe tadrUpairuparaktatA |
yathA viShayasambandhAdbuddhau bhavati vAsanA || 8||
bhANDAdau dravyayogAchcha tattaddravyasya vAsanA |
lepahetushcha sambandhaH sa~NgaH sambandhi chA~njanam || 9||
ato nira~njano.asa~Ngo nirlepashchochyate pumAn |
nabhaHpuShkarapatrAdidR^iShTAntaiH paramarShibhiH || 10||
chinmAtrAnantashaktyabdhau pumarthapavaneritAH |
sattvAdishaktayo yAnti vishvabudbudarUpatAm || 11||
ata IshashchidAtmaiva jagataH sannidhAnataH |
maNivat prerakatvena jaDAnAmayasAmiva || 12||
pumAneva jagatkartA jagadbhartA.akhileshvaraH |
svAmyarthe mR^ityavadyasmAjjaDavargaH pravartate || 13||
karaNAni cha deheShu rAjArthamadhikArivat |
bhogyajAtaM manomantriNyarpayanti svabhAvataH || 14||
tairbhogyairyuktamAtmAnamAvedayati dhIshchiti |
IkShAmAtreNa tadbhu~Nkte rAjevAtmA.akhileshvaraH || 15||
dhanAderIshvaro deho dehasyendriyamIshvaram |
indriyasyeshvarI buddhirbuddherAtmeshvaraH paraH || 16||
kUTasthasyeshvarasyAnyo nAsti preraka ityataH |
IshvarasyAvadhitvena draShTA vai parameshvaraH || 17||
anyasyAgantukaishvaryaM bahuvyApArasa~Nkulam |
nirvyApArasya nirdoShamanAdyaishvaryamAtmanaH || 18||
sarvashaktimayo hyAtmA shaktimaNDalatANDavaH |
saMsAraM tannivR^ittiM cha mAyayA.a.apnoti helayA || 19||
sarvAtishAyi nirdoShamaishvaryamidamAtmanaH |
pashyato yogino brAhmamapyaishvaryaM tR^iNAyate || 20||
bAhyasyAtmochyate deho dehasyAtmendriyANi cha |
buddhirAtmendriyAntasya buddherAtmA tu chinnabhaH || 21||
ata AtmAvadhitvena paramAtmochyate chitiH |
tathA.antaHkaraNairyogAjjIva ityuchyate chitiH || 22||
avidyAkAryarahitaH paramAtmani cha smR^itiH |
yasya yadvyApakaM tasya tadbrahmA.ato dharAdikam || 23||
prakR^ityantaM bhavedbrahma svasvakAryAdyapekShayA |
seshvare sA~NkhyavAde.api chiterevAnumanyate || 24||
pare vA paramAtmatvAdikaM tu na jaDe kvachit |
adhyakShavyApakatvAbhyAM paraM brahma tu chetanaH || 25||
tasyAdhyakShaM vyApakaM cha na hetuvidhayA.asti hi |
asa~NkhyAtmA nabhorAshiravibhaktaikarUpakaH || 26||
so.atashchidghanavij~nAnaghanAtmaghanasaMj~nakaH |
prakAshasyAnapekShatvAt svasya draShTR^itayA.api cha || 27||
svaprakAshaH pumAnukta itare tadvilakShaNAH |
bhogo.abhyavahR^itiH sA cha kUTasthe nAsti dhIShviva || 28||
dhIvR^ittipratibimbAkhyagauNabhogA tu bhoktR^itA |
sAkShAddhIvR^itidraShTR^itvAd buddhisAkShyuchyate pumAn || 29||
vinA vikAraM draShTR^itvAt sAkShI tUkto.akhilasya saH |
chaityoparAgarUpatvAt sAkShitA.apyadhruvA chitaH || 30||
upalakShaNamevedamapi vyAvR^ittaye jaDAt |
ataH pumAnanirdeshyo.aNushcha sUkShmashcha kathyate || 31||
vinA dR^ishyamadR^ishyatvAdavyaktashchochyate sataH |
adR^ishyo dR^ishyate rAhurgR^ihItena yathendunA || 32||
adR^ishyaM chAsyamAdarshe chit tathA svasvabuddhiShu |
chiti vishvasya sa~Ngashched vishvaM bhAseta sarvadA || 33||
vishvAdhAro.apyataH shUnyamiti chidgIyate khavat |
dR^ishyadoShAn mR^iShAbuddhirdR^iShTyAropya nirmale || 34||
Adarshe malavadvyomni doShadR^iShTyA tu tapyate |
vastutashchiti nAstyeva malo dR^ishyAshritaH sadA || 35||
atashcha nirmalaH svastho nirdoShashchochyate pumAn |
sajAtIyeShu vaidharmyalakShaNA nAsti yadbhidA || 36||
ata AtmA samaH prokta aikarUpyAchcha sarvadA |
dehAdhyakShatayA dehI puryabhivyaktitaH pumAn || 37||
ekAkievAdadvitIyaH kevalashchochyate tu saH |
chichChaktyapratibandhena prochyate.anAvR^itaH pumAn || 38||
sarvasvAmitayA chAtmA kShetraj~naH kShetravedanAt |
hR^itsarovaradhIpadmadalavR^ittiShu lIlayA || 39||
charannivAnandamInAn bhu~njAno haMsa uchyate |
hakAreNa bahiryAti sakAreNa vishan punaH || 40||
prAnavR^ittyA.anaya chApi prANyAtmA haMsa uchyate |
sharIrAgarihR^iddyAmaguhAyAM buddhibhAryayA || 41||
vyajyamAnastayA sArdhaM svapanniva guhAshayaH |
triguNAtmakamAyAM svAM sAnnidhyAt pariNAmayan || 42||
mAyIti kathyate chAtmA tatkR^itAnR^itaveShadhR^ik |
svAnyekAdasha bhUtAni pa~nchaitAni tu ShoDasha || 43||
puMsaH kalAstattvatastu niraMshatvAt sa niShkalaH |
ahaMshabdaH svAmivAchI svAmI sAkShI tu chetasaH || 44||
ato.ahamiti shabdena chinmAtraM prochyate budhaiH |
sarveshvaraH sarvavettA sarvakartA.advayaH pumAn || 45||
sAmAnyAduchyate yadvad rAjA sarvanarAdhipaH |
AtmAdvaitasya sUtreNa jAtimAtreNa varNanAt || 46||
pralaye hi vijAtIyadvaitashUnyatvamAtmanAm |
asa~NgatvAnnityashuddho nityabuddhashcha chittvataH || 47||
nityamuktastathA nityanirduHkhatvAt pumAn mataH |
ityAdugurushAstroktadishA svAnubhavena cha || 48||
vaidharmyAdAtmano.anAtmavivekaH kriyatAM budhaiH |
parichChedachatuShkeNa pumprakR^ityoH suvistarAt |
vaidharmyagaNa ukto.ayaM dhyAyinAmAshu muktidaH || 49||

iti shrIvij~nAnabhikShuvirachite sA~NkhyasAre AtmavaidharmyagaNaparichChedaH
|| *||

\-\-\-\-\-\-\-\-\-\-\-\-\-\-\-\-\-\-\-

atha ShaShThaH parichChedaH |

vivekameva sadyuktyA matvA tadanubhUyate |
rAjayogaM yathA kuryAt samAsena taduchyate || 1||
ashakto rAjayogasya haThayoge.adhikAravAn |
vAsiShThe cha vasiShThAya bhusuNDenaivamIritam || 2||
j~nAnAvR^ittI rAjayoge prANAyamAsane haThe |
mukhye te.a~NgatayA.anyonyaM sevye shaktyanusArataH || 3||
viShaye.anantadoShA ye shrutismR^itisamIritAH |
ta Adau paridraShTavyAshchittasthairyAya yogibhiH || 4||
kAmabIjAnyanantAni samprarohanti yaddhR^idi |
tatrATavInibhe j~nAnapuNyasasyaM na vardhate || 5||
doShadR^iShTyagnisandagdhe kAmabIje tu chetasi |
gurushAstrahalaiH kR^iShTe sukShetre tadvivardhate || 6||
satyeShvasattAM prachurAM tathA ramyeShvaramyatAm |
sukheShu prachuraM duHkhaM pashyan dhIro virajyate || 7||
brahmaloko.api narako vinAshAmedhyapUritaH |
yuktashcha svAdhikairanyaistraiguNyAdapi duHkhayuk || 8||
tatratyairapi muktyarthaM yatyate janmabhIrubhiH |
ato j~neyaH samAsena lokaH sarvo.api duHkhayukt || 9||
idaM me syAdidaM mA syAditIchChAvyathitaM manaH |
svabhAvAt tena vij~neyaM duHkhaM chittena sa~NgatiH || 10||
sukhaM suShuptiH paramA duHkhaM viShayavedanam |
sukhaduHkhasamAso.ayaM kimanyairbahubhAShitaiH || 11||
tasmAdanarthAnarthAbhAn parIkShya viShayAn sudhIH |
utsR^ijet paramArthArthI bAlaramyAnahIniva || 12||
ityAdikAnantadoShadR^iShTyA rAgasya tAnave |
mAyAvivekataH shuddhamAtmAnaM chintayet sadA || 13||
idaM taditi nirdeShTuM guruNA.api na shakyate |
udAsInasyAtmatattvaM svayameva prakAshate || 14||
buddhibodhAtmako buddhisAkShI buddheH paro vibhuH |
kUTastho.ahaM chidAditya ityekAgro.anuchintayet || 15||
vR^ittibodho ghaTachChidramiva nAshyalpa IkShyate |
vastuto vR^ittibodho.ahaM pUrNo vyomavadakShayaH || 16||
antaryad dR^ishyate sarvaM tadbuddhervR^ittiruchyate |
tebhyo duHkhAtmakebhyo.ahaM sAkShAt tadvIkShitA pR^ithak || 17||
karmakartR^ivirodho hi vR^ittyA vR^ittiprakAshane |
vR^ittidhArAkalpane cha gauravAditi nishchitam || 18||
harShashokabhayakrodhalobhamohamadaistathA |
dveShAbhimAnakArpaNyanidrAlasyasmarAdibhiH || 19||
dharmAdharmaishcha sampUrNA buddhirduHkhamayI tu me |
AtmAnaM darshayatyeva bhAskarAyeva rogiNaH || 20||
ahaM sarvagataM shAntaM paramAtmaghanaM shuchi |
achintyachinmAtranabho vishvadarpaNamakShayam || 21||
nira~njanaM nirAdhAraM nirguNaM nirupadravam |
nirvisheShaM sajAtIyAt samastArthAvabhAsakam || 22||
brahmaviShNumaheshAdyAH sthAvarAntAshcha chetanAH |
avaidharmyAtmakAbhedAdahamityanuchintayet || 23||
ahamanye cha puruShAH samachidvyomarUpiNaH |
ata Atmaika evA.ahamiti shrutiShu gIyate || 24||
iti pashyan svabhogaishcha yogI vishvaM prapUjayet |
Atmayogo.apyayaM proktaH shrutyuktaH sA~NkhyayoginAm || 25||
sarvabhUtasthamAtmAnaM sarvabhUtAni chAtmani |
samaM pashyannAtmayAjI svArAjyamadhigachChati || 26||
ityevaM manunA.apyAtmayAgo j~nAnA~NgamIritaH |
tasmAdabhayadAnena svabhogAdyarchanena cha || 27||
sammAnayan bhUtajAtamAtmAnamanuchintayet |
brahmaviShNushivAdInAM bhoge rAgashcha hIyate || 28||
teShAM svasAmyadR^iShTyA.ataH sAmyaM yogI vichintayet |
utpattau pralaye chaiva sarvAvasthAsu sarvadA || 29||
sarveShAmekarUpatvaM draShTU rAgAdikaM kutaH |
viShNvAdayo mahaishvaryaM bhu~nja nA api nAdhikA || 30||
matto.ato.alaM tadaishvaryairavivekijanapriyaiH |
guNakarmAdibhiH ki~nchinnirIkShyAdhikamAtmanaH || 31||
tadarthaM yatate loko nAhaM pashyAmi me.adhikam |
tathA nyUnaM na pashyAmi yadatikramasha~NkayA || 32||
devA daityajayAyeva yatiShye tajjayAshayA |
ahaM yathA tathaivAnye AbrahmA nArakA janAH || 33||
dR^ishyante svAtmavat premNA pitR^ibhrAtR^isutAdivat |
ka Isha Ishitavyo vA kaH shreShThaH ko.adhamo.api vA || 34||
abhinne bhedadR^iShTyA syAnmR^ityorbhayamiti shrutiH |
chidvyomasvekarUpeShu IshAnIshAdirUpakaH || 35||
rUpabhedo hyasan sarvaH sphaTike rUpabhedavat |
dhiyAM rUpaiH pumAneko bahurUpa iveyate || 36||
vR^ikacharmAdirUpAdyairmAyIva bahurUpadhR^ik |
mAmAli~Ngya nirAkAraM vividhAkAradhAriNI || 37||
mAyaivaikA hi nR^ityantI mohayatyakhilA dhiyaH |
puMsAM bhedo buddhibhedAdambubhedAdyathA raveH || 38||
vyomnashcha ChidrarUpeNa bhedaH kumbhAdibhedataH |
ataH shuddho buddhamuktaH sarvadA sarvago.avyayaH || 39||
ahamanye cha tatrA.aho shatrumitrAdidhIrmR^iShA |
brahmaNIshe harAvindre sarvabhUtagaNe tathA || 40||
uttamAdhamamadhyatvavibhAgo mAyayA mR^iShA |
triguNAtmakamAyAyAstraividyAdAtmano.api hi || 41||
uttamAdhamamadhyatvatraividhyaM naiva hi svataH |
yathA dehe tathA.anyatra chitprakAsho.ayamavyayaH || 42||
vyaktatAvyaktatAmAtrabhedo hyantarabAhyayoH |
evamanye.api puruShA baddhamuktAvisheShataH || 43||
IshAnIshAvisheShAchcha puruShArtho na me.astyataH |
mahAnidraiva me sAdhvI duHkhabhogaharA priyA || 44||
apriyA mUDhachittAnAmasAdhvI dhIhatAtmanAm |
chidAdarshe mayi dhiyo yadyapi pratibimbanam || 45||
tattvato naiva doShAya tathA.api tyAjyameva tat |
svabhAvAdasya heyatvaM svAnubhUtyA hi sidhyati || 46||
yathA ko.api parasyApi vairUpyaM na didR^ikShati |
svAminyAropyAtmadoShAn sAdhvIyamanutapyate || 47||
nirdoShaM svAminaM dR^iShTvA nirdoShA syAt pativratA |
evamasyA rUpabhede.apyekarUpo.asmi sarvadA || 48||
bhu~njAno vA.apyabhu~njAnastAM madarthAmananyagAm |
yathaikarUpatopAdhiyogAyogadashAsvaho || 49||
AdarshasyAmalasyaiva chinnabhodarpaNasya me |
dR^ishyabuddhigatA doShAH sAkShAttaddraShTari prabhau || 50||
na santi mayi mohAdyA bhAskare bhAsyadoShavat |
duHkhairbaddhA svamAtmAnaM tyaktvA madbhAvamAgatA || 51||
muchyate duHkhabandhAddhIrna me mokSho na bandhanam |
kUTasthAsa~Ngachidvyomni dhIduHkhapratibimbanam || 52||
yo.anyo bandho bhogarUpaH so.api chiddarpaNe mR^iShA |
jAgradAditrayAvasthAsAkShI tAbhirvivarjitaH || 53||
ahaM pUrNashchidAditya udayAstavivarjitaH |
darpaNe mukhavadvishvaM mayi bodhe na tAttvikam || 54||
vibhutve cha bAhyAntaH suShuptyAdAvadarshanAt |
mayi vA.anyatra vA puMsi kevalAnubhave vibhau || 55||
bhAti yattadvivartto dhIpratibimbAtmakatvataH |
shuktau rajatavad vishvamato mayi na doShakR^it || 56||
marIchau toyavat tadvadvyomAdau nagarAdivat |
kAlatraye.api nAstyeva mayi vishvaM sanAtane || 57||
anyatrAstvathavA mA.astu buddhyAdau mama tena kim |
mayi sarvaM yathA vyomni sarvatrAhaM yathA nabhaH || 58||
na sarvaM mayi sarvatra nAhaM chAlepataH khavat |
ata evAvibhAgAkhyAbhedena kShIranIravat || 59||
j~nAnAtmakamidaM vishvaM gAyanti paramarShayaH |
jaganmama madarthatvAnmachCharIrasukhAdivat || 60||
yatha mama tathA.anyeShAM mamaiveti dhiyo bhramaH |
vastutastu na kasyApi kimapi vyabhichArataH || 61||
svAmitvasyAdhruvatvena pAnthasyAvAsagehavat |
ekaM chinmAtramastIha shuddhaM shUnyaM nira~njanam || 62||
sUkShmAt sUkShmataraM tatra na jaganna jagatkriyA |
dR^ishyate sarvadR^ishyADhyA svasvabuddhiparamparA || 63||
chinmaNDalamahAdarshe pratibimbamupAgatA |
kvachidvyaktaM kvachit sUkShmaM nabhaH sarvatra tiShThati || 64||
yathA tathA chidAkAshaM dhIdeshe.anyatra cha sthitam |
chidAkAshamayaM vishvaM yato.ato dhIritastataH || 65||
bhramantI tatra tatraiva bhAsate.arke ghaTAdivat |
dharmAdharmau janmamR^ityU sukhaduHkhAdi chAkhilam || 66||
jAgratyapi mR^iShA svapna iva janmAdikaM mama |
dR^ishyayogaviyogAbhyAM chito janmavinAshadhIH || 67||
abhivyaktyanabhivyaktidoShAbhyAM shashino yathA |
mahAsuShuptau bhavajanmamR^ityu\-
duHsvapnadhArAH kShaNabha~NgurA dhiyaH |
pashyAmyahaM tAbhiraliptarUpo
ghanairUrtairvigatai raveH kim || 68||
ityevaM satataM dhyAyannekAgramanasA sudhIH |
sAkShAtkarotyAtmatattvaM vAgagochararUpataH || 69||
svarUpaM nirmalaM shAntaM manastyajati chet kShaNam |
tadaiva dR^ishyasaMskArasheShAt sa~NkShubhyatIndriyam || 70||
utthitanutthitAMstatra indriyArIn punaH punaH |
vivekenaiva vajreNa hanyAdindro girIniva || 71||

iti shrIvij~nAnabhikShuvirachite sA~NkhyasAre rAjayogaprakAraparichChedaH
|| *||

\-\-\-\-\-\-\-\-\-\-\-\-\-\-\-\-\-\-\-

atha saptamaH parichChedaH |

evamAtmAnubhavino jIvanmuktasya lakShaNam |
spaShTaM vakShye bhavedyena j~nAnAj~nAnaparIkShaNam || 1||
shravaNAn mananAdvA.api anyathA.a.atmaj~natAbhramAt |
kuryAdgurumavidvAMsaM syAchchAj~no j~nAbhimAnyapi || 2||
naishvaryAnAgataj~natvAdikaM j~nAnasya lakShaNam |
tadR^ite.api hi kaivalyaM yogabhAShyakR^iteritam || 3||
shrautasmArtAni vAkyAni j~nAnino mokShabhAginaH |
lakShakANyeva likhyante vishvAsAtishayAya vai || 4||
yatra sarvANi bhUtAni AtmaivAbhUd vijAnataH |
tatra ko mohaH kaH shoka ekatvamanupashyataH || 5||
yaH sarvatrAnabhisnehastat tat prApya shubhAshubham |
nAbhinandanti na dveShTi tasya praj~nA pratiShThitA || 6||
na vismarati sarvatra yathA satatago gatim |
na vismarati nishchetyaM chinmAtraM prAj~nadhIstathA || 7||
nodeti nAstamAyAti sukhe duHkhe mukhaprabhA |
yathApUrvasthitiryasya sa jIvanmukta uchyate || 8||
yo jAgartti suShuptastho yasya jAgranna vidyate |
yasya nirvAsano bodhaH sa jIvanmukta uchyate || 9||
rAgadveShabhayAdInAmanurUpaM charannapi |
yo.antarvyomavadatyachChaH sa jIvanmukta uchyate || 10||
yasya nAha~NkR^ito bhAvo buddhiryasya na lipyate |
kurvato.akurvato vA.api sa jIvanmukta uchyate || 11||
api shItaruchAvarke atyuShNe.apIndumaNDale |
apyadhaHprasavatyagnau jIvanmuto na chAnyadhIH || 12||
chidAtmana imA nityamprasphurantIha shaktayaH |
ityasyAshcharyajAleShu nAbhyudeti kutUhalam || 13||
paravyasaninI nArI vyagrA.api gR^ihakarmaNi |
tadevAsvAdayatyantarnarasa~NgarasAyanam || 14||
evaM tattve pare shuddhe dhIro vishrAntimAgataH |
tadevAsvAdayatyantarbahirvyavaharannapi || 15||
yo nityamadhyAtmamayo nityamantarmukhaH sukhI |
gambhIrashcha prasannashcha girAviva mahAhR^idaH || 16||
parAnandarasAkShubdho ramate svAtmanA.a.atmani |
sarvakarmaparityAgI nityahR^iShTo nirAmayaH || 17||
na puNyena na pApena netareNApi lipyate |
yena kena chidAchChanno yena kena chidAshitaH || 18||
yatra kvachana shAyI cha sa samrADiva rAjate |
varNadharmAshramAchArashAstramantranayepsitaH || 19||
nirgachChati jagajjAlAt pa~njarAdiva kesarI |
vAchAmatItaviShamo viShayAshAdR^ishekShitaH || 20||
kAmapyupagataH shobhAM sharadIva nabhastalam |
niHstotro nirnamaskAraH pUjyapUjAvivarjitaH || 21||
saMyukto vA viyukto vA sadAchAranayakramaiH |
etAvadeva khalu li~Ngamali~NgamUrtteH
saMshAntasaMsR^itichirabhramanirvR^ittasya |
tadyasya yanmadanakopaviShAdalobha\-
mohApadAmanudinaM nipuNaM tanutvam || 22||
turyavishrAntiyuktasya pratitIpasya bhavArNavAt |
na kR^itenAkR^itenArtho na shrutismR^itivibhramaiH || 23||
tanuM tayajatu vA tIrthe shvapachasya gR^ihe.athavA |
j~nAnasamprAptisamaye mukta evAmalAshayaH || 24||
na mokSho nabhasaH pR^iShThe na pAtAle na bhUtale |
sarvAshAsa~NkShaye chetaHkShayo mokSha iti shruteH || 25||
jIvanmuktapadaM tyaktA svadehe kAlasAtkR^ite |
vishatyadehamuktatvaM pavano.aspandatAmiva || 26||
anAptAkhilashailAdipratibimbe hi yAdR^ishI |
syAddarpaNe darpaNatA kevalAtmasvarUpiNI || 27||
ahaM tvaM jagadityAdau prashAnte dR^ishyasambhrame |
syAt tAdR^ishI kevalatA sthite draShTaryavIkShaNe || 28||
chinmAtraM chetyarahitamanantamajaraM shivam |
anAdimadhyanilayaM yadanAdhi nirAmayam || 29||
na shUnyaM nApi chAkAraM na dR^ishyaM na cha darshanam |
anAkhyamanabhivyaktaM tat ki~nchidavashiShyate || 30||

iti shrIvij~nAnabhikShuvirachite sA~NkhyasAre jIvanmuktiparamamuktyoH
parichChedaH || *||

iti sA~NkhyasArasyottarabhAgaH | sA~NkhyasArAkhyaM prakaraNaM samAptam |

\-\-\-\-\-\-\-\-\-\-\-\-\-\-\-\-\-
##
Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}