% Text title            : abhijnaana shaakuntala
% File name             : shaakuntala.itx
% Category              : major\_works, kAlidAsa
% Location              : doc\_z\_misc\_major\_works
% Author                : Kalidas
% Transliterated by     : Professor Muneo Tokunaga July 26, 1999
% Proofread by          : Shrirang Nene snene at lds.com
% Latest update         : August 28, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. The AbhijnAnashAkuntalam of KAlidAsa ..}##
\itxtitle{.. abhij~nAnashAkuntalam ..}##\endtitles ##

atha abhij~nAnashAku.ntalam |

prathamo.a~NkaH |

yA sR^iShTiH sraShTurAdyA vahati vidhihutaM yA haviryA cha hotrI
ye dve kAlaM vidhattaH shrutiviShayaguNA yA sthitA vyApya vishvam |
yAM AhuH sarvabIjaprakR^itiriti yayA prANinaH prANavantaH
pratyaxAbhiH prapannastanubhiravatu vastAbhiraShTAbhirIshaH || 1||
(nAndyante )
sUtradhAraH \-\- ( nepathyAbhimukhamavalokya )
Arye yadi nepathyavidhAnamavasi amitastAvadAgamyatAm |
( pravishya )
naTI \- Aryaputra iyamasmi |
sUtradhAraH \-\- Arya abhirUpabhUyiShThA pariShadiyam | adya khalu
kAlidAsagrathitavastunA navenAbhij~nAnashaku.ntalAkhyena
nATakenopasthAtavyamasmAbhiH | tatpratipAtramAdhIyatAM yatnaH |
naTI \-\- suvihitaprayogatayAyAryasya na kimapi parihAsyate |
sUtradhAraH \-\- Arye kathayAmi te bhUtArtham |
A paritoShAdviduShAM na sAdhu manye prayogavij~nAnam |
balavadapi shixitAnAmAtmanyapratyayaM chetaH || 2||
naTI \-\- Arya evametat | anantarakaraNIyamArya Aj~nApayatu |
sUtradhAraH \-\- kimanyadasyAH pariShadaH shrutiprasAdanataH | tadimameva
tAvadachirapravR^ittamupabhogaxamaM grIShmasamayamadhikR^itya gIyatAm |
samprati hi -
subhagasalilAvagAhAH pATalasa.nsargasurabhivanavAtAH |
prachChAyasulabhanidrA divasAH pariNAmaramaNIyAH || 3||
naTI \-\- tathA |
( iti gAyati )
IShadIShachchumbitAni bhramaraiH sukumArakesarashikhAni |
avata.nsayanti damamAnAH pramadAH shirIShakusumAni || 4||
sUtradhAraH \-\- Arya sAdhu gItam | aho
rAgabaddhachittavR^ittirAlikhita iva sarvato ra~NgaH |
tadidAnIM katamatprakaraNamAshrityainamArAdhayAmaH |
naTI \-\- nanvAryamishraiH prathamamevAj~naptamabhij~nAnashaku.ntalaM
nAmApUrvaM nATakaM prayoge adhikriyatAmiti |
sUtradhAraH \-\- Arye samyaganubodhito.asmi | asminxaNe vismR^itaM khalu
mayA tat | kutaH |
tavAsmi gItarAgeNa hAriNA prasabhaM hR^itaH |
eSha rAjeva duShyantaH sAra~NgeNatira.nhasA || 5||
( iti niShkrAntau )
( prastAvanA )
( tataH pravishati mR^igAnusArI sasharachApahasto rAjA rathena sUtashcha
)
sUtaH \-\- ( rAjAnaM mR^igaM chAvalokya ) AyuShman |
kR^iShNasAre dadashchaxustvayi chAdhijyakArmuke |
mR^igAnusAriNaM sAxAtpashyAmIva pinAkinam.h || 6||
rAjAH \-\- sUta dUramamunA sAra~NgeNa vayamAkR^iShTAH | ayaM
punaridAnImapi grIvAbha~NgabhirAmaM muhuranupatati syandane dattadR^iShTiH
pashchArdhena praviShTaH sharapatanabhayAdbhUyasA pUrvakAyam |
darbhaiNrardhAvalIDhaiH shramavivR^itamukhabhra.nshibhiH kIrNavartmA
pashyodagraplutatvAdviyati bahutaraM stokamurvyAm prayAti || 7||
( savismayam )
tadeSha kathamanupatata eva me prayatnaprexaNIyaH saMvR^ittaH |
sUtaH \-\- AyuShman udghAtinI bhUmiriti mayA rashmisaMyamanAdrathasya
mandIkR^ito vegaH | tena mR^iga eSha viprakR^iShTAntaraH saMvR^ittaH |
samprati samadeshavartinaste na durAsado bhaviShyati |
rAjAH \-\- tena hi muchyantAmabhIShavaH |
sUtaH \-\- yadAj~nApayatyAyuShmAn |
( rathavegaM nirUpya )
AyuShmanpashya pashya |
mukteShu rashmiShu nirAyatapUrvakAyA
niShkampachAmarashikhA nibhR^itordhvakarNAH |
Atmauddhatairapi rajobhirala~NghanIyA
dhAvantyamI mR^igajavAxamayeva rathyAH || 8||
rAjAH \-\- satyam | atItya harito harI.nshcha vartante vAjinaH | tathA
hi |
yadAloke sUxmaM vrajati sahasA tadvipulatAM
yadardhe viChinnaM bhavati kR^itasa.ndhAnamiva tat |
prakR^ityA yadvaktraM tadapi samarekhaM nayanayorna
me dUre ki~nchitxaNamapi na pArshve rathajjavAt.h || 9||
sUta pashyainaM vyApadyamAnam |
( iti sharasa.ndhAnaM nATayati )
( nepathye )
bho bho rAjan AshramamR^igo.ayaM na hantavyo na hantavyaH |
sUtaH \-\- ( AkarNyAvalokya cha )
AyuShmanasya khalu te bANapAtavartinaH kR^iShTasArasyAntare tapasvina
upasthitAH |
rAjAH \-\- ( sasambhramam )
tena hi pragR^ihyantAM vAjinaH |
sUtaH \-\- tathA |
( iti rathaM sthApayati )
(tataH pravishatyAtmanAtR^itIyo vaikhAnasaH )
vaikhAnasaH \-\- ( hastamudyamya )
rAjan AshramamR^igo.ayaM na hantavyo na hantavyaH |
na khalu na khalu bANaH sa.nnipAtyo.ayamasminmR^iduni
mR^igasharIre puShparAshAvivAgniH |
kva bata hariNakAnAM jIvitaM chAtilolaM kva cha
nishitanipAtA vajrasArAH sharAste || 10||
tatsAdhukR^itasa.ndhAnaM pratisa.nhara sAyakam |
ArtatrANAya vaH shastraM na prahartumanAgasi || 11||
rAjAH \-\- eSha pratisamhR^itaH |
( iti yathoktaM karoti )
vaikhAnasaH \-\- sadR^ishametat puruva.nshapradIpasya bhavataH |
janma yasya purorva.nshe yuktarUpamidaM tava |
putrameva~NguNopetaM chakravartinamApnuhi || 12||
itarau \-\- ( bAhU udyamya ) sarvathA chakravartinaM putramApnuhi |
rAjAH \-\- ( sapraNAmam )
pratigR^ihItaM brAhmaNavachanam |
vaikhAnasaH \-\- rAjan samidAharaNAya prasthitA vayam | eSha khalu
kaNvasya kulapateranumAlinItIramAshramo dR^ishyate | na
chedanyakAryAtipAtaH pravishya pratigR^ihyatAmAtitheyaH satkAraH | api
cha |
ramyAstapodhanAnAM pratihatavighnAH kriyAH samavalokya |
j~nAsyasi kiyadbhujo me raxati maurvIkiNA~Nka iti || 13||
rAjAH \-\- api sa.nnihito.atra kulapatiH |
vaikhAnasaH \-\- idAnImeva duhitaraM shaku.ntalAmatithisatkArAya
niyujya daivaM asyAH pratikUlaM shamayituM somatIrthaM gataH |
rAjAH \-\- bhavatu | tAmeva pashyAmi | sA khalu viditabhaktiM mAM
maharSheH kariShyati |
vaikhAnasaH \-\- sAdhayAmastAvat |
( iti sashiShyo niShkrAntaH )
rAjAH \-\- sUta chodayAshvAn puNyAshramadarshanena tAvadAtmAnaM
punImahe |
sUtaH \-\- yadAj~nApayatyAyuShman |
( iti bhUyo rathavegaM nirUpayati )
rAjAH \-\- ( samantAdavalokya )
sUta akathito.api j~nAyata eva yathAyamAshramAbhogastapovanasyeti |
sUtaH \-\- kathamiva |
rAjAH \-\- kiM na pashyati bhavAn | iha hi
nIvArAH shukagarbhakoTaramukhabhraShTAstarUNAmadhaH
prasnigdhAH kvachidi~NgudIphalabhidaH sUchyanta evopalAH |
vishvAsopagamAdabhinnagatayaH shabdaM sahante
mR^igAstoyAdhArapathAshcha valkalashikhAniShyandarekhA~NkitAH || 14||
##<##kulyAmbhobhiH pavanachapalaiH shAkhino dhautamUlA
##<##bhinno rAgaH kisalayaruchAmAjyadhUmodgamena |
##<##ete chArvAgupavanabhuvi chChinnadarbhAnkurAyAM
##<##naShTA.nshakA hariNashishavo mandamandaM charanti |
sUtaH \-\- sarvamupapannam |
rAjAH \-\- ( stokamantaraM gatvA )
tapovananivAsinAmuparodho mA bhUt | etAvatyeva rathaM sthApaya
yAvadavatarAmi |
sUtaH \-\- dhR^itAH pragrahAH | avataratvAyuShmAn |
rAjAH \-\- ( avatIrya )
sUta vinItaveSheNa praveShTavyAni tapovanAni nAma | idaM
tAvadgR^ihyatAm |
( iti sUtasyAbharaNAni dhanushchopanIyArpayati )
sUta yAvadAshramavAsinaH pratyavexyAhamupAvarte
tAvadArdrapR^iShThAH kriyantAM vAjinaH |
sUtaH \-\- tathA |
( iti niShkrAntaH )
rAjAH \-\- ( parikramyAvalokya cha )
idamAshramadvAram | yAvatpravishAmi |
( pravishya | nimittaM sUchayan )
shAntamidamAshramapadaM sphurati cha bAhuH kutaH phalamihasya |
athavA bhavitavyAnAM dvArANi bhavanti sarvatra || 15||
( nepathye )
ita itaH sakhyau |
rAjAH \-\- ( karNaM dattvA )
aye daxiNena vR^ixavATikAmAlApa iva shrUyate | yAvadatra gachChAmi |

( parikramyAvalokya cha )
aye etAstapasvikanyakAH svapramANAnurUpaiH sechanaghaTairbAlapAdapebhyaH
payo dAtuita evAbhivartante |
( nipuNaM nirUpya )
aho madhuramAsAM darshanam |
shuddhAntadurlabhamidaM vapurAshramavAsino yadi janasya |
dUrIkR^itAH khalu guNairudyAnalatA vanalatAbhiH || 16||
yAvadimAM ChAyAmAshritya pratipAlayAmi |
( iti vilokayan sthitaH )
( tataH pravishyati yathoktavyApArA saha sakhIbhyAM shaku.ntala )
shaku.ntalA \-\- ita itaH sakhyau |
anasUyA \-\- halA shakuntale tvatto.api tAtakAshyapasyAshramavR^ixakAH
priyatarA iti tarkayAmi | yena navamAlikAkusumapelavApi
tvameteShAmAlavAlapUraNe niyuktA |
shaku.ntalA \-\- na kevalaM tAtaniyoga eva | asti me sodarasneho.apyeteShu |
( iti vR^ixasechanaM rUpayati )
rAjAH \-\- kathamiyaM sA kaNvaduhitA | asAdhudarshI khalu
tatrabhavAnkAshyapo ya imAmAshramadharme niyu~Nkte |
idaM kilAvyAjamanoharaM vapustapaHxamaM sAdhayituM ya ichChati |
dhruvaM sa nIlotpalapatradhArayA shamIlatAM ChetumR^iShirvyavasyati || 
17 || 
bhavatu | pAdapAntarhita eva vishrabdhaM tAvadenAM pashyAmi |
( iti tathA karoti )
shaku.ntalA \-\- sakhi anasUye atipinaddhena valkalena priyaMvadayA
niyantritA.asmi | shithilaya tAvadetat |
anasUyA \-\- tathA |
( iti shithilayati )
priyaMvadA \-\- ( sahAsam )
atra payodharavistArayitR^i Atmano yauvanaM upAlabhasva | mAM kiM
upAlabhase |
rAjAH \-\- kAmamananurUpamasya vapuSho valkalaM na
punarala.nkArashriyaM na puShyati | kutaH |
sarasijamanuviddhaM shaivalenApi ramyaM
malinamapi himA.nshorlaxma laxmIM tanoti |
iyamadhikamanoj~nA valkalenApi tanvI
kimiva hi madhurANAM maNDanaM nAkR^itInAm.h || 18||
shaku.ntalA \-\- ( agrato.avalokya )
eSha vAtIritapallavA~NgulIbhistvarayatIva mAM kesaravR^ixakaH |
yAvadenaM sambhAvayAmi |
( iti parikrAmati )
priyaMvadA \-\- halA shakuntale atraiva tAvanmuhUrtaM tiShTha
yAvatvayopagatayA latAsanAtha ivAyaM kesaravR^ixakaH pratibhAti |
shaku.ntalA \-\- ataH khalu priyaMvadAsi tvam |
rAjAH \-\- priyamapi tathyamAha shaku.ntalAM priyaMvadA | asyAH khalu
adharaH kisalayarAgaH komalaviTapAnukAriNau bAhU |
kusumamiva lobhanIyaM yauvanama~NgeShu sa.nnaddham.h || 19||
anasUyA \-\- halA shakuntale iyaM svayamvaravadhUH sahakArasya tvayA
kR^itanAmadheyA vanajyotsneti navamAlikA |
enAM vismR^itA.asi |
shaku.ntalA \-\- tadAtmAnamapi vismariShyAmi |
( latAmupetyAvalokya cha )
halA ramaNIye khalu kAla etasya latApAdapamithunasya vyatikaraH
saMvR^ittaH | navakusumayauvanA vanajyotsnA snigdhapallavatayopabhogaxamaH
sahakAraH |
( iti pashyantI tiShThati )
priyaMvadA \-\- anasUye jAnAsi kiM shaku.ntalA vanajyotsnAmatimAtraM
pashyatIti |
anasUyA \-\- na khalu vibhAvayAmi | kathaya |
priyaMvadA \-\- yathA vanajyotsnAnurUpeNa pAdapena sa.ngatA api
nAmaivamahamapyAtmanonurUpaM varaM labheyeti |
shaku.ntalA \-\- eSha nUnaM tavAtmagato manorathaH |
( iti kalashamAvarjayati )
rAjAH \-\- api nAma kulapateriyamasavarNaxetrasambhavA syAt | athavA
kR^itaM sa.ndehena |
asa.nshayaM xatraparigrahaxamA yadAryamasyAmabhilAShi me manaH |
satAM hi sa.ndehapadeShu vastuShu pramANamantaHkaraNa pravR^ittayaH || 20||
tathApi tattvata enAmupalasye |
shaku.ntalA \-\- ( sasambhramam )
ambho | salilasekasambhramodgato navamAlikAmujjhitvA vadanaM me
madhukarobhivartate |
( iti bhramarabAdhAM rUpayati )
rAjAH \-\- ( saspR^iham )
chalapA~NgAM dR^iShTiM spR^ishasi bahusho vepathumatIM
rahasyAkhyAyIva svanasi mR^idu karNAntikacharaH |
karau vyAdhunvatyAH pibasi ratisarvasvamadharam.h
vayaM tattvAnveShAnmadhukara hatAstvaM khalu kR^itI || 21||
shaku.ntalA \-\- na eSha dhR^iShTo viramati | anyato gamiShyAmi |
kathamito.apyAgachChati | halA paritrAyethAM mAmanena durvinItena
madhukareNAbhibhUyamAnAm |
ubhe \-\- ( sasmitam ) ke AvAM paritrAtum | duShya.ntamAkranda |
rAjaraxitavyAni tapovanAni nAma |
rAjAH \-\- avasaro.ayamAtmAnaM prakAshayitum | na bhetavyaM na
bhetavyam -|
( ityardhokte svagatam )
rAjabhAvastvabhij~nAto bhavet | bhavatu evaM tAvadabhidhAsye |
shaku.ntalA \-\- ( padAntare sthitvA | sadR^iShTixepam )
kathamito.api mAmanusarati |
rAjAH \-\- ( satvaramupasR^itya )
AH
kaH paurave vasumatIM shAsati shAsitari durvinItAnAm.h
ayamAcharatyavinayaM mugdhAsu tapasvikanyAsu || 22||
( sarvA rAjAnaM dR^iShTA ki.nchidiva sambhrAntAH )
anasUyA \-\- Arya na khalu kimapyatyAhitam | iyaM nau priyasakhI
madhukareNAbhibhUyamAnA kAtarIbhUtA |
( iti shaku.ntalAM darshayati )
rAjAH \-\- ( shaku.ntalAbhimukho bhUtvA )
api tapo vardhate |
( shaku.ntalA sAdhvasAdavachanA tiShThati )
anasUyA \-\- idAnImatithivisheShalAbhena | halA shakuntale
gachChoTajam | phalamishramarghamupahara | idaM pAdodakaM bhaviShyati|
rAjAH \-\- bhavatInAM sUnR^itayaiva girAkR^itamAtithyam |
priyaMvadA \-\- tena hyasyAM praChAyashItalAyAM saptaparNavedikAyAM
muhUrtamupavishya parishramavinodaM karotvAryaH |
rAjAH \-\- nUnaM yUyamapyanena karmaNA parishrAntAH |
anasUyA \-\- halA shakuntale uchitaM naH paryupAsanamatithInAm |
atropavishAmaH |
( iti sarvA upavishanti )
shaku.ntalA \-\- ( Atmagatam )
kiM nu khalvimaM prexya tapovanavirodhino vikArasya gamanIyAsmi
sa.nvR^ittA |
rAjAH \-\- ( sarvA vilokya )
aho samavayorUparamaNIyaM bhavatInAM sauhArdam |
priyaMvadA \-\- ( janAntikam )
anasUye ko nu khalveSha chaturagambhIrAkR^itirmadhuraM
priyamAlapanprabhAvavAniva laxyate |
anasUyA \-\- sakhi mamApyasti kautUhalam | pR^ichChAmi tAvadenam |
( prakAsham )
Aryasya madhurAlApajanito vishrambho mAM mantrayate katama AryeNa
rAjarShiva.nsho.ala.nkriyate katamo vA virahaparyutsukajanaH kuto deshaH
kinnimittaM vA sukumArataro.api tapovanagamanaparishramasyAtmA
padamupanItaH |
shaku.ntalA \-\- ( Atmagatam )
hR^idaya mottAmya | eShA tvayA chintitAnyanasUyA mantrayate |
rAjAH \-\- ( Atmagatam )
kathamidAnIM AtmAnaM nivedayAmi kathaM vAtmApahAraM karomi | bhavatu |
evaM tAvadenAM vaxye |
( prakAsham )
bhavati yaH pauraveNa rAj~nA dharmAdhikAre niyuktaH
sohamavighnakriyaupalambhAya dharmAraNyamidaM AyAtaH |
( shaku.ntalA shR^i~NgAralajjAM rUpayati )
anasUyA \-\- ( ubhayorAkAraM viditvA | janAntikam )
halA shakuntale yadyatrAdya tAtaH sa.nnihito bhavet |
shaku.ntalA \-\- tataH kiM bhavet |
sakhyau \-\- imaM jIvitasarvasvenApyatithivisheShaM kR^itArthaM
kariShyati |
shaku.ntalA \-\- yuvAmapetam | kimapi hR^idaye kR^itvA matrayethe | na
yuvayorvachanaM shroShyAmi |
rAjAH \-\- vayamapi tAvadbhavatyoH sakhIgataM kimapi pR^ichChAmaH |
sakhyau \-\- Arya anugraha iveyamabhyarthanA |
rAjAH \-\- bhagavAnkAshyapaH shAshvate brahmaNi sthita iti prakAshaH |
iyaM cha vaH sakhI tadAtmajeti kathametat |
anasUyA \-\- shR^iNotvAryaH | asti ko.api kaushika iti gotranAmadheyo
mahAprabhAvo rAjarShiH |
rAjAH \-\- asti | shrUyate |
anasUyA \-\- tamAvayoH priyasakhyAH prabhavamavagachCha | ujjhitAyAH
sharIrasaMvardhanAdibhistAtakAshyapo.asyAH pitA |
rAjAH \-\- ujjhitashabdena janitaM me kautUhalam |
AmUlAchChhrotumichChAmi |
anasUyA \-\- shR^iNotv AryaH | gautamItIre purA kila tasya
rAjarSherugre tapasi vartamAnasya kimapi jAtasha~NkairdevairmenakA
nAmApsarAH preShitA niyamavighnakAriNI |
rAjAH \-\- astyetadanyasamAdhibhIrutvaM devAnAm |
anasUyA \-\- tato vasa.ntodArasamaye tasyA unmAdayitR^i rUpaM prexya -
( ityardhokte lajjayA viramati )
rAjAH \-\- parastAjj~nAyata eva | sarvathApsaraHsambhavaiShA |
anasUyA \-\- atha kim |
rAjAH \-\- upapadyate |
mAnuShIShu kathaM vA syAdasya rUpasya sambhavaH |
na prabhAtaralaM jyotirudeti vasudhAtalAt.h || 23||
( shaku.ntalA.adhomukhI tiShThati )
rAjAH \-\- ( Atmagatam )
labdhAvakAsho me manorathaH | kiM tu sakhyA parihAsodAhR^itAM
varaprArthanAM shrutvA dhR^itadvaidhIbhAvakAtaraM me manaH |
priyaMvadA \-\- ( sasmitaM shaku.ntalAM vilokya nAyakAbhimukhI bhUtvA )
punarapi vaktukAma ivAryaH |
( shaku.ntalA sakhIma~NgulyA tarjayati )
rAjAH \-\- samyagupalaxitaM bhavatyA | asti naH
sachcharitashravaNalobhAdanyadapi praShTavyam |
priyaMvadA \-\- alaM vichArya | aniyantraNAnuyogastapasvijano nAma |
rAjAH \-\- iti sakhIM te j~nAtumichChAmi |
vaikhAnasaM kimanayA vratamApradAnAd -
vyApArarodhi madanasya niShevitavyam |
atyantamAtmasadR^ishexaNavallabhAbhirAho
nivatsyati samaM hariNA~NganAbhi || 24||
priyaMvadA \-\- Arya dharmacharaNe.api paravasho.ayaM janaH | guroH
punarasyA anurUpavarapradAne sa.nkalpaH |
rAjAH \-\- ( Atmagatam )
na duravApeyaM khalu prArthanA |
bhava hR^idaya sAbhilAShaM samprati sa.ndehanirNayo jAtaH |
Asha~Nkase yadagniM tadidaM sparshaxamaM ratnam.h || 25||
shaku.ntalA \-\- ( saroShamiva )
anasUye gamiShyAmyaham |
anasUyA \-\- kinnimittam |
shaku.ntalA \-\- imAmasambaddhapralApinIM priyaMvadAM AryAyai gautamyai
nivedayiShyAmi |
anasUyA \-\- sakhi na yuktamakR^itasatkAramatithivisheShaM visR^ijya
svaChandato gamanam |
( shaku.ntalA na ki.nchiduktvA prasthitaiva )
rAjAH \-\- ( grahItumichChannigR^ihyAtmAnam | Atmagatam )
aho cheShTApratirUpikA kAmijanamanovR^ittiH | ahaM hi
anuyAsyanmunitanayAM sahasA vinayena vAritaprasaraH |
sthAnAdanuchchalannapi gatveva punaH pratinivR^ittaH || 26||
priyaMvadA \-\- ( shaku.ntalAM nirudhya )
halA na te yuktaM gantum |
shaku.ntalA \-\- ( sabhrUbha~Ngam )
kinnimittam |
priyaMvadA \-\- vR^ixasechane dve dhArayasi me | ehi tAvat | AtmAnaM
mochayitvA tato gamiShyasi |
( iti balAdenAM nivartayati )
rAjAH \-\- bhadre vR^ixasechanAdeva parishrAntAmatrabhavatIM laxaye |
tathA hyasyAH
srastA.nsAvatimAtralohitatalau bAhU ghaTotxepaNAdadyapi stanavepathuM
janayati shvAsaH pramANAdhikaH |
baddhaM karNashirISharodhi vadane dharmAmbhasAM jAlakaM
bandhe sra.nsini chaikahastayamitAH paryAkulA mUrdhajAH || 27||
tadahamenAnnR^iNAM karomi |
( itya~NgulIyaM dAtumichChati )
( ubhe nAmamudrAxarANyanuvAchya parasparamavalokayataH )
rAjAH \-\- alamasmAnanyathA sambhAvya | rAj~naH parigrahoyamiti
rAjapuruSha mAmavagachChata |
priyaMvadA \-\- tena hi nArhatya~NgulIyakama~NgulIviyogam | Aryasya
vachanenAnR^iNedAnImeShA |
( ki~nchidvihasya )
halA shakuntale mochitAsyanukampinAryeNa | athavA mahArAjena |
gachChedAnIm |
shaku.ntalA \-\- ( Atmagatam )
yadyAtmanaH prabhaviShyAmi |
( prakAsham )
kA tvaM visraShTavyasya roddhavyasya vA |
rAjAH \-\- ( shaku.ntalAM vilokya | Atmagatam )
kiM nu khalu yathA vayamasyAmevamiyamapyasmAnprati syAt | athavA
labdhAvakAshA me prArthanA | kutaH |
vAchaM na mishrayati yadyapi madvachobhiH
karNaM dadAtyabhimukhaM mayi bhAShamANe |
kAmaM na tiShThati madAnanasammukhInA
bhUyiShThamanyaviShayA na tu dR^iShTirasyAH || 28||
( nepathye )
bho bhostapasvinaH sannihitAstapovanasattvaraxAyai bhavata | pratyAsannaH
kila mR^igayAvihArI pArthivo duShyantaH |
turagakhurahatastathA hi reNurviTapaviShaktajalArdravalkaleShu |
patati pariNatAruNaprakAshaH shalabhasamUha ivAshramadrumeShu || 29||
api cha |
tIvrAghAtapratihatataruskandhalagnaikadantaH
pAdAkR^iShTavratativalayAsa~Ngasa.njAtapAshaH |
mUrto vighnastapasa iva no bhinnasAra~NgayUtho
dharmAraNyaM pravishati gajaH syandanAlokabhItaH || 30||
( sarvAH karNaM dattvA ki.nchidiva sambhrAntAH )
rAjAH \-\- ( Atmagatam )
aho dhik paurA asmadanveShiNastapovanuparundhanti | bhavatu |
pratigamiShyAmastAvat |
sakhyau \-\- Arya anenAraNyakavR^ittAntena paryAkulAH smaH | anujAnIhi
na uTajagamanAya |
rAjAH \-\- ( sasambhramam )
gachChantu bhavatyaH | vayamapyAshramapIDA yathA na bhavati tathA
prayatiShyAmahe |
( sarve uttiShThanti )
sakhyau \-\- Arya asambhAvitAtithisatkAraM bhUyo.api prexaNanimittaM
lajjAmahe AryaM vij~nApayitum |
rAjAH \-\- mA maivam | darshanenaiva bhavatInAM puraskR^ito.asmi |
shaku.ntalA \-\- anasUye abhinavakushasUchyA parixataM me charaNaM
kurabakashAkhAparilagnaM cha valkalam | tAvatparipAlayata mAM
yAvadetanmochayAmi |
( shaku.ntalA rAjAnamavalokayantI savyAjaM vilambya saha sakhIbhyAM
niShkrAntA )
rAjAH \-\- mandautsukyo.asmi nagaragamanaM prati |
yAvadanuyAtrikAnsametya nAtidUre tapovanasya niveshayeyam | na khalu
shaknomi shaku.ntalAvyApArAdAtmAnaM nivartayitum | mama hi
gachChati puraH sharIraM dhAvati pashchAdasa.nstutaM chetaH |
chInA.nshukamiva ketoH prativAtaM nIyamAnasya || 31||
( iti niShkrAntAH sarve )

( iti prathamo.a~NkaH | )

dvitIyo.a~NkaH |

( tataH pravishati viShaNNo vidUShakaH )
vidUShakaH \-\- ( niHshvasya )
bho diShTam | etasya mR^igayAshIlasya rAj~no vayasyabhAvena nirviNNo.asmi
| ayam mR^igo.ayaM vahAro.ayaM shArdUla iti madhyAhne.api
grIShmaviralapAdapaChAyAsu vanarAjiShvAhiNDayate aTavIto.aTavI |
patrasa~NkarakaShAyANi kaduShNAni girinadIjalAni pIyante | aniyatavelaM
shUlyamA.nsabhUyiShTha AhAro bhujyate | turagAnudhAvanakaNDitasa.ndhe
rAtrAvapi nikAmaM shayitavyaM nAsti | tato mahatyeva pratyUShe
dAsyAHputraiH shakunilubdhakairvanagrahaNakolAhalena pratibodhito.asmi |
iyatedAnImapi pIDA na niShkrAmati | tato gaNDasyopari piNDakaH
sa.nvR^ittaH | hyaH kilAsmAsvavahIneShu tatra bhavato
mR^igAnusAreNAshramapadaM praviShTasya tApasakanyakA shaku.ntalA
mamAdhanyatayA darshitA | sAmprataM nagaragamanAya manaH kathamapi na
karoti | adyApi tasya tAmeva chintayato.axNoH prabhAtamAsIt | kA gatiH
| yAvattaM kR^itAchAraparikramaM pashyAmi |
( iti parikramyAvalokya cha )
eSha bANAsanahastAbhiryavanIbhirvanapuShpamAlAdhAriNIbhiH parivR^ita
ita evAgaChati priyavayasyaH | bhavatu | angabhangavikala iva bhUtvA
sthAsyAmi | yadyevamapi nAma vishramaM labheya |
( iti daNDakAShThamavalambya sthitaH )
( tataH pravishati yathAnirdiShTaparivAro rAjA )
rAjAH \-\-
kAmaM priyA na sulabhA manastu tadbhAvadarshanAshvAsi |
akR^itArthe.api manasije ratimubhayaprArthanA kurute || 1||
( smitaM kR^itvA )
evamAtmAbhiprAyasambhAviteShTajanachittavR^ittiH prArthayitA viDambyate
|
snigdhaM vIxitamanyato.api nayane yatprerayantyA tayA
yAtaM yachcha nitambayorgurutayA mandaM vilAsAdiva |
mA gA ityuparuddhayA yadapi sA sAsUyamuktA sakhI
sarvaM tatkila matparAyaNamaho kAmI svatAM pashyati || 2||
vidUShakaH \-\- ( tathAsthita eva )
bho vayasya na me hastapAdaM prasarati tadvA~NmAtreNa jApayiShyAmi |
jayatu jayatu bhavAn |
rAjAH \-\- kuto.ayaM gAtropaghAtaH |
viduShakaH \-\- kutaH kila svayamaxyAkulIkR^ityAshrukAraNaM pR^ichChasi
|
rAjAH \-\- na khalvAvagachChAmi |
viduShakaH \-\- bho vayasya yadvetasaH kubjalIlAM viDambayati tatkimAtmanaH
prabhAveNa nanu nadIvegasya |
rAjAH \-\- nadIvegastatra kAraNam |
viduShakaH \-\- mamApi bhavAn |
rAjAH \-\- kathamiva |
viduShakaH \-\- evaM rAjakAryANyujjhitvaitAdR^isha Akulapradeshe
vanacharavR^ittinA tvayA bhavitavyam | yatsatyaM pratyahaM
shvApadasamutsAraNaiH saMxobhitasa.ndhibandhAnAM mama
gAtrANAmanIsho.asmi saMvR^ittaH | tatprasIda me | ekAhamapi
tAvadvishramyatAm |
rAjAH \-\- ( svagatam )
ayaM chaivamAha | mamApi kAshyapasutAmanusmR^itya mR^igayAviklavaM chetaH |
kutaH |
na namayitumadhijyamasmi shakto dhanuridamAhitasAyakaM mR^igeShu |
sahavasatimupetya yaiH priyAyAH kR^ita iva mugdhavilokitopadeshaH || 3||
viduShakaH \-\- ( rAj~no mukhaM vilokya )
atrabhavAnkimapi hR^idaye kR^itvA mantrayate | araNye mayA ruditamAsIt |

rAjAH \-\- ( sasmitam )
kimanyat | anatikramaNIyaM me suhR^idvAkyamiti sthito.asmi |
viduShakaH \-\- chira.n jIva |
( iti gantumiChati )
rAjAH \-\- vayasya tiShTha | sAvasheShaM me vachaH |
viduShakaH \-\- Aj~nApayatu bhavAn |
rAjAH \-\- vishrAntena bhavatA mamApyekasminnanAyAse karmaNi sahAyena
bhavitavyam |
viduShakaH \-\- kiM modakakhAdikAyAm | tena hyayaM sugR^ihItaH xaNaH |
rAjAH \-\- yatra vaxyAmi | kaH ko.atra bhoH |
( pravishya )
dauvArikaH \-\- ( praNamya )
Aj~nApayatu bharttA |
rAjAH \-\- raivataka senApatistAvadAhUyatAm |
dauvArikaH \-\- tathA |
( iti niShkramya senApatinA saha punaH pravishya )
eSha Aj~nAvachanotkaNTho bhartetodattadR^iShTireva tiShThati |
upasarpatvAryaH |
senApati \-\- ( rAjAnamavalokya )
dR^iShTadoShApi svAmini mR^igayA kevalaM guNa eva saMvR^ittA | tathA hi
devaH
anavaratadhanurjyAsphAlanakrUrapUrva
ravikiraNasahiShNu svedaleshairabhinnam |
apachitamapi gAtraM vyAyatatvAdalaxyaM
girichara iva nAgaH prANasAraM bibharti || 4||
( upetya )
jayatu jayatu svAmI | gR^ihItashvApadamaraNyam | kimanyatrAvasthIyate |

rAjAH \-\- mandotsAhaH kR^ito.asmi mR^igayApavAdinA mAdhavyena |
senApati \-\- ( janAntikam )
sakhe sthirapratibandho bhava | ahaM
tAvatsvAminashchittavR^ittimanuvartiShye |
( prakAsham )
pralapatveSha vaidheyaH | nanu prabhureva nidarshanam |
medashChedakR^ishodaraM laghu bhavatyutthAnayogyaM vapuH
sattvAnAmapi laxyate vikR^itimachchittaM bhayakrodhayoH |
utkarShaH sa cha dhanvinAM yadiShavaH sidhyanti laxye chale
mithyaiva vyasanaM vadanti mR^igayAmIdR^igvinodaH kutaH || 5||
viduShakaH \-\- apehi re utsAhahetuka | atrabhavAnprakR^itimApannaH | tvaM
tAvadaTavIto.aTavImAhiNDamAno naranAsikAlolupasya jIrNarxisya kasyApi
mukhe patiShyasi |
rAjAH \-\- bhadra senApate Ashramasa.nnikR^iShTe sthitAH smaH | ataste
vacho nAbhinandAmi | adya tAvat |
gAhantAM mahiShA nipAnasalilaM shR^i~NgairmuhustADitam.h
ChAyAbaddhakadambakaM mR^igakulaM romanthamabhyasyatu |
vishrabdhaM kriyatAM varAhatatibhirmustAxatiH palvale
vishrAmaM labhatAmidaM cha shithitalajyAbandhamasmaddhanuH || 6||
senApati \-\- yatprabhaviShNave rochate |
rAjAH \-\- tena hi nivartaya pUrvagatAnvanagrAhiNaH | yathA na me
sainikAstapovanamuparundhanti tathA niSheddhavyAH | pashya |
shamapradhAneShu tapodhaneShu gUDhaM hi dAhAtmakamasti tejaH |
sparshAnukUlA iva sUryakAntAstadanyatejo.abhibhavAdvamanti || 7||
senApati \-\- yadAj~nApayati svAmI |
viduShakaH \-\- dhva.nsatAM te utsAhavR^ittAntaH |
( niShkrAntaH senApatiH )
rAjAH \-\- ( parijanaM vilokya )
apanayantu bhavatyo mR^igayAvesham | raivataka tvamapi svaM niyogamashUnyaM
kuru |
parijana \-\- yaddeva Aj~nApayati |
( iti niShkrAntaH )
viduShakaH \-\- kR^itaM bhavatA nirmaxikam |
sAmpratametasminpAdapaChAyAvirachitavitAnasanAthe shilAtale niShIdatu
bhavAnyAvadahamapi sukhAsIno bhavAmi |
rAjAH \-\- gachChAgrataH |
viduShakaH \-\- etu bhavAn |
( ityubhau parikramyaupaviShTau )
rAjAH \-\- mAdhavya anavAptachaxuHphalo.asi | yena tvayA darshanIyaM na
dR^iShTam |
viduShakaH \-\- nanu bhavAnagrato me vartate |
rAjAH \-\- sarvaH kAntamAtmIyaM pashyati | ahaM tu tAM
evAshramalalAmabhUtAM shaku.ntalAmadhikR^itya bravImi |
viduShakaH \-\- ( svagatam ) bhavatu | asyAvasaraM na dAsye |
( prakAsham )
bho vayasya te tApasakanyakAbhyarthanIyA dR^ishyate |
rAjAH \-\- sakhe na parihArye vastuni pauravANAM manaH pravartate |
surayuvatisambhavaM kila munerapatyaM tadujjhitAdhigatam |
arkasyopari shithilaM chyutamiva navamAlikAkusumam.h || 8||
viduShakaH \-\- ( vihasya )
yathA kasyApi piNDakharjUrairudvejitasya tiNDyAM
( tintiNyAM )
abhilASho bhavettathA strIratnaparibhogiNaH bhavata iyamabhyarthanA |
rAjAH \-\- na tAvadenAM pashyAsi yenaivamavAdIH |
viduShakaH \-\- tatkhalu ramaNIyaM yadbhavato.api vismayamutpAdayati |
rAjAH \-\- vayasya kiM bahunA |
chitre niveshya parikalpitasattvayogA
rUpochchayena manasA vidhinA kR^itA nu |
strIratnasR^iShTiraparA pratibhAti sA me
dhAturvibhutvamanuchintya vapushcha tasyAH || 9||
viduShakaH \-\- yadyevaM pratyAdesha idAnIM rUpavatInAm |
rAjAH \-\- idaM cha me manasi vartate |
anAghrAtaM puShpaM kisalayamalUnaM kararuhairanAviddhaM
ratnaM madhu navamanAsvAditarasam |
akhaNDaM puShyAnAM phalamiva cha tadrUpamanaghaM na jAne
bhoktAraM kamiha samupasthAsyati vidhiH || 10||
viduShakaH \-\- tena hi laghu paritrAyatAmenAM bhavAn | mA kasyApi
tapasvina ingudItailachikkaNashIrShasya haste patiShyati |
rAjA \-\- paravatI khalu tatrabhavatI | na cha sa.nnihito.atra gurujanaH |
viduShakaH \-\- atha bhavantamantareNa kIdR^ishastasyA dR^iShTirAgaH |
rAjAH \-\- nisargAdevApragalbhastapasvikanyAjanaH | tathApi tu
abhimukhe mayi samhR^itamIxitaM hasitamanyanimittakR^itodayam |
vinayavAritavR^ittiratastayA na vivR^ito madano na cha saMvR^itaH || 11||
viduShakaH \-\- na khalu dR^iShTamAtrasya tavA~NkaM samArohati |
rAjAH \-\- mithaH prasthAne punaH shAlInatayApi kAmamAviShkR^ito
bhAvastatrabhavatyA | tathA hi |
darbhA~NkureNa charaNaH xata ityakANDe tanvI
sthitA katichideva padAni gatvA |
AsIdvivR^ittavadanA cha vimochayantI
shAkhAsu valkalamasaktamapi drumANAm.h || 12||
viduShakaH \-\- tena hi gR^ihItapAtheyo bhava | kR^itaM tvayopavanaM
tapovanamiti pashyAmi |
rAjAH \-\- sakhe tapasvibhiH kaishchitparij~nAto.asmi | chintaya
tAvatkenApadeshena punarAshramapadaM gachChAmaH |
viduShakaH \-\- ko.aparo.apadesho yuShmAkaM rAj~nAm |
nIvAraShaShThabhAgamasmAkamupaharantviti |
rAjAH \-\- mUrkha anyameva bhAgadheyamete tapasvino nirvapanti yo
ratnarAshInapi vihAyAbhinandyate | pashya |
yaduttiShThati varNebhyo nR^ipANAM xayi tatphalam |
tapaHShaDbhAgamaxayyaM dadatyAraNyakA hi naH || 13||
( nepathye )
hanta siddhArthau svaH |
rAjAH \-\- ( karNaM dattvA )
aye dhIraprashAntasvaraistapasvibhirbhavitavyam |
( pravishya )
dauvArikaH \-\- jayatu jayatu bhartA | etau dvau R^iShikumArau
pratIhArabhUmimupasthitau |
rAjAH \-\- tena hyavilambitaM praveshaya tau |
dauvArikaH \-\- eSha praveshayAmi |
( iti niShkramya R^iShikumArAbhyAM saha pravishya )
( ubhau rAjAnaM vilokayataH )
prathamaH \-\- aho dIptimato.api vishvasanIyatAsya vapuShaH | athavA
upapannametadasmin R^iShibhyo nAtibhinne rAjani | kutaH |
adhyAkrAntA vasatiramunApyAshrame sarvabhogye
raxAyogAdayamapi tapaH pratyahaM sa.nchinoti |
asyApi dyAM spR^ishati vashinashchAraNadvandvagItaH
puNyaHshabdo muniriti muhuH kevalaM rAjapUrvaH || 14||
dvitIyaH \-\- gautama ayaM sa balabhitsakho duShyantaH |
prathamaH \-\- atha kim |
dvitIyaH \-\- tena hi
naitachchitraM yadayamudadhishyAmasImAM dharitrImekaH
kR^itsnAM nagaraparighaprA.nshubAhurbhunakti |
Asha.nsante samitiShu surA baddhavairA hi daityairasyAdhijye
dhanuShi vijayaM pauruhUte cha vajre || 15||
ubhau \-\- ( upagamya )
vijayasva rAjan |
rAjAH \-\- ( AsanAdutthAya )
abhivAdaye bhavantau |
ubhau \-\- svasti bhavate |
( iti phalAnyupaharataH )
rAjAH \-\- ( sapraNAmaM parigR^ihyaH )
Aj~nApayitumichChAmi |
ubhau \-\- vidito bhavAnAshramasadAmihasthaH | tena bhavantaM prArthayante
|
rAjAH \-\- kimAj~nApayanti |
ubhau \-\- tatrabhavataH kaNvasya maharSherasA.nnidhyAdraxA.nsi na
iShTivighnamutpAdayanti | tatkatipayarAtraM sArathidvitIyena bhavatA
sanAthIkriyatAmAshrama iti |
rAjAH \-\- anugR^ihIto.asmi |
viduShakaH \-\- ( apavArya )
eShedAnImanukUlA te.abhyarthanA |
rAjAH \-\- ( smitaM kR^itvA )
raivataka madvachanAduchyatAM sArathiH | sabANAsanaM rathamupasthApayeti
|
dauvArikaH \-\- yaddeva Aj~nApayati |
( iti niShkrAntaH )
ubhau \-\- ( saharSham )
anukAriNi pUrveShAM yuktarUpamidaM tvayi |
ApannAbhayasatreShu dIxitAH khalu pauravAH || 16||
rAjAH \-\- ( sapraNAmam )
gachChatAM puro bhavantau | ahamapyanupadamAgata eva |
ubhau \-\- vijayasva
( iti niShkrAntau )
rAjAH \-\- mAdhavya apyasti shaku.ntalAdarshane kutUhalam |
viduShakaH \-\- prathamaM saparivAhamAsIt | idAnIM
rAxasavR^ittAntena bindurapi nAvasheShitaH |
rAjAH \-\- mA bhaiShIH | nanu matsamIpe vartiShyase |
viduShakaH \-\- eSha rAxasAdraxito.asmi |
( pravishya )
dauvArikaH \-\- sajjo ratho bharturvijayaprasthAnamapexate | eSha
punarnagarAddevInAmAj~naptiharaH karabhaka AgataH |
rAjAH \-\- ( sAdaram )
kimambAbhiH preShitaH |
dauvArikaH \-\- atha kim |
rAjAH \-\- nanu praveshyatAm |
dauvArikaH \-\- tathA |
( iti niShkramya karabhakeNa saha pravishya )
eSha bhartA | upasarpa |
karabhakaH \-\- jayatu jayatu bhartA | devyAj~nApayati | AgAmini
chaturthadivase pravR^ittapAraNo me upavAso bhaviShyati | tatra
dIrghAyuShAvashyaM sambhAvanIyeti |
rAjAH \-\- itastapasvikAryam | ito gurujanAj~nA |
dvayamapyanatikramaNIyam | kimatra pratividheyam |
viduShakaH \-\- trisha~NkurivAntarA tiShTha |
rAjAH \-\- satyamAkulIbhUto.asmi |
kR^ityayorbhinnadeshatvAd dvaidhIbhavati me manaH |
puraH patihataM shaile srotaH srotovaho yathA || 17||
( vichintya )
sakhe tvamambayA putra iti pratigR^ihItaH | ato bhavAnitaH pratinivR^itya
tapasvikAryavyagramAnasaM mAmAvedya tatrabhavatInAM
putrakR^ityamanuShThAtumarhati |
viduShakaH \-\- na khalu mAM raxobhIrukaM gaNayasi |
rAjAH \-\- ( sasmitam )
kathametadbhavati sambhAvyate |
viduShakaH \-\- yathA rAjAnujena gantavyaM tathA gachChAmi |
rAjAH \-\- nanu tapovanoparodhaH pariharaNIya iti
sarvAnAnuyAtrikA.nstvayaiva saha prasthApayAmi |
viduShakaH \-\- ( sagarvam )
tena hi yuvarAjo.asmIdAnIM saMvR^ittaH |
rAjAH \-\- ( svagatam )
chapalo.ayaM baTuH | kadAchidasmatprArthanAmantaHpurebhyaH kathayet |
bhavatu | enamevaM vaxye |
( vidUShakaM haste gR^ihItvA | prakAsham )
vayasya R^iShigauravAdAshramaM gachChAmi | na khalu satyameva
tApasakanyakAyAM mamAbhilAShaH | pashya |
kva vayaM kva paroxamanmatho mR^igashAvaiH samamedhito janaH |
parihAsavijalpitaM sakhe paramArthena na gR^ihyatAM vachaH || 18||
viduShakaH \-\- atha kim |
( iti niShkrAntAH sarve )
( iti dvitIyo.a~NkaH | )

tR^itIyo.a~NkaH |

( tataH pravishati kushAnAdAya yajamAnashiShyaH )
shiShyaH \-\- aho mahAnubhAvaH pArthivo duShyantaH | yatpraviShTamAtra
evAshramaM tatrabhavati nirupadravANi naH karmANi saMvR^ittAni |
kA kathA bANasa.ndhAne jyAshabdenaiva dUrataH |
hu.nkAreNeva dhanuShaH sa hi vighnAnapohati || 1||
yAvadimAnvedisa.nstaraNArthaM darbhAnR^itvigbhya upaharAmi |
( parikramyAvalokya cha | AkAshe )
priyaMvade kasyidamushIrAnulepanaM mR^iNAlavanti cha nalinIpatrANi
nIyante |
( shrutimabhinIya )
kiM bravIShi | Atapala~NghanAdbalavadasvasthA shaku.ntalA tasyAH
sharIranirvApaNAyeti | tarhi yatnAdupacharyatAm | sA khalu bhagavataH
kaNvasya kulapateruchChvasitam | ahamapi tAvadvaitAnikaM shAntyudakamasyai
gaitamIhaste visarjayiShyAmi |
( iti niShkrAntaH )
viShkambhakaH |
( tataH pravishati kAmayamAnAvastho rAjA )
rAjAH \-\- ( sachintaM niHshvasya )
jAne tapaso vIryaM sA bAlA paravatIti me viditam |
alamasmi tato hR^idayaM tathApi nedaM nivartayitum.h || 2||
( madanabAdhAM nirUpya )
bhagavankusumAyudha tvayA chandramasA cha
vishvasanIyAbhyAmatisa.ndhIyate kAmijanasArthaH | kutaH |
tava kusumasharatvaM shItarashmitvamindordvayamidamayathArthaM
dR^ishyate madvidheShu |
visR^ijati himagarbhai.nragnimindurmayUkhaistvamapi
kusumabANAnvajrasArIkaroShi || 3||
athavA |
##( ##adyApi nUnaM harakopavahninastvayi jvalatyaurva ivAmburAshau |
##( ##tvamanyathA manmatha madvidhAnAM bhasmAvasheShaH
##( ##kathamitthamuShNaH || 
anishamapi makaraketurmanaso rujamAvahannabhimato me |
yadi madirAyatanayanAM tAmadhikR^itya praharatIti || 4||
( sakhedaM parikramya )
kva nu khalu sa.nsthite karmaNi sadasyairanuj~nAtaH khinnamAtmAnaM
vinodayAmi |
( niHshvasya )
kiM nu khalu me priyAdarshanAdR^ite sharaNamanyat | yAvadenAmanviShyAmi
|
( sUryamavalokya )
imAmugrAtapavelAM prAyeNa latAvalayavatsu mAlinItIreShu sasakhIjanA
shaku.ntalA gamayati | tatraiva tAvadgachChAmi |
( parikramya sa.nsparshaM rUpayitvA )
aho pravAtasubhago.ayamuddeshaH |
shakyamaravindasurabhiH kaNavAhI mAlinItara~NgANAm |
a~Ngairana~NgataptairaviralamAli~NgituM pavanaH || 5||
( parikramyAvalokya cha )
asminvetasaparixipte latAmaNDape sa.nnihitayA shaku.ntalayA bhavitavyam |
tathA hi |
abhyunnatA purastAdavagADhA jaghanagauravAtpashchAt |
dvAre.asya pANDusikate padapa~NktirdR^ishyate.abhinavA || 6||
yAvadviTapAntareNAvalokayAmi |
( parikramya tathA kR^itvA | saharSham )
aye labdhaM netranirvANam | eShA me manorathapriyatamA sakusumAstaraNaM
shilApaTTamadhishayAnAsakhIbhyAmanvAsyate | bhavatu | shroShyAmyAsAM
vishrambhakathitAni |
( iti vilokayansthitaH )
( tataH pravishati yathoktavyApArA saha sakhIbhyAM shaku.ntalA )
sakhyau \-\- ( upavIjya | sasneham )
halA shakuntale api sukhayati te nalinIpatravAtaH |
shaku.ntalA \-\- kiM vIjayato mAM sakhyau |
( sakhyau viShAdaM nATayitvA parasparamavalokayataH )
rAjAH \-\- balavadasvasthasharIrA shaku.ntalA dR^ishyate |
( savitarkam )
tatkimayamAtapadoShaH syAduta yathA me manasi vartate |
( sAbhilAShaM nirvarNya )
atha vA kR^itaM sa.ndehena |
stananyastoshIraM prashithilamR^iNAlaikavalayaM
priyAyAH sAbAdhaM kimapi kamanIyaM vapuridam |
samastApaH kAmaM manasijanidAghaprasarayorna
tu grIShmasyaivaM subhagamaparAddhaM yuvatiShu || 7||
priyaMvadA \-\- ( janAntikam )
anasUye tasya rAjarSheH prathamadarshanArabhyaparyutsukeva shaku.ntalA |
kiM nu khalvasyAstannimitto.ayamAta~Nko bhavet |
anasUyA \-\- sakhi mamApIdR^ishyAsha~NkA hR^idayasya | bhavatu | praxyAmi
tAvadenAm |
( prakAsham )
sakhi praShTavyAsi kimapi | balavAnkhalu te sa.ntApaH |
shaku.ntalA \-\- ( pUrvArdhena shayanAdutthAya )
halA kiM vaktukAmAsi |
anasUyA \-\- halA shakuntale anabhyantare khalvAvAM madanagatasya
vR^ittAntasya | kiM tu yAdR^ishItihAsanibandheShu
kAmayamAnAnAmavasthA shrUyate tAdR^ishIM tava pashyAmi | kathaya
ki.nnimittaM te sa.ntApaH | vikAraM khalu paramArthato.aj~nAtvA.anArambhaH
pratIkArasya |
rAjAH \-\- anasUyAmapyanugato madIyastarkaH | na hi svAbhiprAyeNa me
darshanam |
shaku.ntalA \-\- ( Atmagatam )
balavAnkhalu me.abhiniveshaH | idAnImapi sahasaitayorna shaknomi
nivedayitum |
priyaMvadA \-\- sakhi shakuntale suShThu eShA bhaNati | kimAtmana
Ata~Nkamupexase | anudivasaM khalu parihIyase.a~NgaiH | kevalaM lAvaNyamayI
ChAyA tvAM na mu~nchati |
rAjAH \-\- avitathamAha priyaMvadA | tathA hi
xAmaxAmakapolamAnanamuraH kAThinyamuktastanaM
madhyaHklAntataraH prakAmavinatAva.nsau ChaviH pANDurA |
shochyA cha priyadarshanA cha madanakliShTeyamAlaxyate
patrANAmiva shoShaNena marutA spR^iShTA latA mAdhavI || 8||
shaku.ntalA \-\- sakhi kasya vAnyasya kathayiShyAmi |
ki.ntvAyAsayitrIdAnIM vAM bhaviShyAmi |
ubhe \-\- ata eva khalu nirbandhaH | snigdhajanasa.nvibhaktaM hi duHkhaM
sahyavedanaM bhavati |
rAjAH \-\- pR^iShTA janena samaduHkhasukhena bAlA
neyaM na vaxyati manogatamAdhihetum |
dR^iShTo vivR^itya bahusho.apyanayA satR^iShNamatrAntare
shravaNakAtaratAM gato.asmi || 9||
shaku.ntalA \-\- sakhi yataHprabhR^iti mama darshanapathamAgataH sa
tapovanaraxitA rAjarShiH |
( ityardhokte lajjAM nATayati )
ubhe \-\- kathayatu priyasakhI |
shaku.ntalA \-\- tata Arabhya tadgatenAbhilASheNaitadavasthAsmi
saMvR^ittA |
rAjAH \-\- ( saharSham )
shrutaM shrotavyam |
smara eva tApaheturnirvApayitA sa eva me jAtaH |
divasa ivAbhrashyAmastapAtyaye jIvalokasya || 10||
shaku.ntalA \-\- tadyadi vAmanumataM tathA vartethAM yathA tasya
rAjarSheranukampanIyA bhavAmi | anyathAvashyaM si~nchata me tilodakam |
rAjAH \-\- sa.nshayachChedi vachanam |
priyaMvadA \-\- ( janAntikam )
anasUye dUragatamanmathA.axameyaM kAlaharaNasya | yasminbaddhabhAvaiShA
sa lalAmabhUtaH pauravANAm | tadyuktamasyA abhilASho.abhinanditum |
anasUyA \-\- tathA yathA bhaNasi |
priyaMvadA \-\- ( prakAsham )
sakhi diShTyAnurUpaste.abhiniveshaH | sAgaramujjhitvA kutra vA
mahAnadyavatarati | ka idAnIM sahakAramantareNAtimuktalatAM pallavitAM
sahate |
rAjAH \-\- kimatra chitraM yadi vishAkhe shashA~NkalekhAmanuvartete |
anasUyA \-\- kaH punarupAyo bhavedyenAvilambitaM nibhR^itaM cha sakhyA
manorathaM sampAdayAvaH |
priyaMvadA \-\- nibhR^itamiti chintanIyaM bhavet | shIghramiti sukaram |

anasUyA \-\- kathamiva |
priyaMvadA \-\- nanu sa rAjarShirasyAM snigdhadR^iShTyA
sUchitAbhilASha etAndivasAnprajAgarakR^isho laxyate |
rAjAH \-\- satyamitthambhUta evAsmi | tathA hi
idamashishirairantastApAdvivarNamaNIkR^itaM
nishi nishi bhujanyastApA~NgaprasAribhirashrubhiH |
anabhilulitajyAghAtA~NkaM muhurmaNibandhanAtkanakavalayaM
srastaM srastaM mayA pratisAryate || 11||
priyaMvadA \-\- ( vichintya )
halA madanalekho.asya kriyatAm taM sumanogopitaM kR^itvA
devaprasAdasyApadeshena tasya hastaM prApayiShyAmi |
anasUyA \-\- rochate me sukumAraH prayogaH kiM vA shaku.ntalA bhaNati |
shaku.ntalA \-\- kiM niyogo vAM vikalpyate |
priyaMvadA \-\- tena hyAtmana upanyAsapUrvaM chintaya tAvatkimapi
lalitapadabandhanam |
shaku.ntalA \-\- halA chintayAmyaham | avadhIraNAbhIrukaM punarvepate
me hR^idayam |
rAjAH \-\- ( saharSham )
ayaM sa te tiShThati sa.ngamotsuko
visha~Nkase bhIru yato.avadhIraNAm |
labheta vA prArthayitA na vA shriyaM
shriyA durApaH kathamIpsito bhavet.h || 12||
sakhyau \-\- ayi AtmaguNAvamAnini ka idAnIM sharIranirvApayitrIM
shAradIM jyotsnAM paTAntena vArayati |
shaku.ntalA \-\- ( sasmitam )
niyojitedAnImasmi |
( ityupaviShTA chintayati )
rAjAH \-\- sthAne khalu vismR^itanimeSheNa chaxuShA priyAmavalokayAmi |
yataH
unnamitai kabhrUlatamAnanamasyAH padAni rachayantyAH |
kaNTakitena prathayati mayyanurAgaM kapolena || 13||
shaku.ntalA \-\- halA chintitaM mayA gItavastu | asa.nnihitAni
punarlekhanasAdhanAni |
priyaMvadA \-\- etasmi~nshukodarasukumAre nalinIpatre nakhairnixiptavarNaM
kuru |
shaku.ntalA \-\- ( yathoktaM rUpayitvA )
halA shR^iNutamidAnIM sa~NgatArthaM na veti |
ubhe \-\- avahite svaH |
shaku.ntalA \-\- ( vAchayati )
tava na jAne hR^idayaM mama punaH kAmo divA.api rAtrAvapi |
nirghR^iNa tapati balIyastvayi vR^ittamanorathAyA a~NgAni || 14||
rAjAH \-\- ( sahasopasR^itya )
tapati tanugAtri madanastvAmanishaM mAM punardahatyeva |
glapayati yathA shashA~NkaM na tathA hi kumudvatIM divasaH || 15||
sakhyau \-\- ( vilokya saharShamutthAya )
svAgatamavilambino manorathasya |
( shaku.ntalA.abhyutthAtumichChati )
rAjAH \-\- alamalamAyAsena |
sa.ndaShTakusumashayanAnyAshuklAntabisabha~NgasurabhINi |
guruparitApAni na te gAtrANyupachAramarhanti || 16||
anasUyA \-\- itaH shilAtalaikadeshamala.nkarotu vayasyaH |
( rAjopavishati | shaku.ntalA salajjA tiShThati )
priyaMvadA \-\- dvayorapi yuvayoranyonyAnurAgaH pratyaxaH | sakhIsnehaH
punarmAM punaruktavAdinIM karoti |
rAjAH \-\- bhadre naitatparihAryam | vivaxitaM hyanuktamanutApaM janayati
|
priyaMvadA \-\- Apannasya viShayanivAsino janasyArtihareNa rAj~nA
bhavitavyamityeSha vo dharmaH |
rAjAH \-\- nAsmAtparam |
priyaMvadA \-\- tena hIyamAvayoH priyasakhI tvAmuddishyedamavasthAntaraM
bhagavatA madanenAropitA | tadarhasyabhyupapattyA jIvitamasyA
avalambitum |
rAjAH \-\- bhadre sAdhAraNo.ayaM praNayaH | sarvathAnugR^ihIto.asmi |
shaku.ntalA \-\- ( priyaMvadAmavalokyaM )
halA kimantaHpuravirahaparyutsukasya rAjarSheruparodhena |
rAjAH \-\- sundari
idamananyaparAyaNamanyathA hR^idayasa.nnihite hR^idayaM mama |
yadi samarthayase madirexaNe madanabANahato.asmi hataH punaH || 17||
anasUyA \-\- vayasya bahuvallabhA rAjAnaH shrUyante | yathA nau
priyasakhI bandhujanashochanIyA na bhavati tathA nirvAhaya |
rAjAH \-\- bhadre kiM bahunA
parigrahabahutve.api dve pratiShThe kulasya me |
samudrarasanA chorvI sakhI cha yuvayoriyam.h || 18||
ubhe \-\- nirvR^ite svaH |
priyaMvadA \-\- ( sadR^iShTixepam )
anasUye eSha itodattadR^iShTirutsuko mR^igapotako mAtaramanviShyati | ehi
| sa.nyojayAva enam |
( ityubhe prasthite )
shaku.ntalA \-\- halA asharaNAsmi | anyatarA yuvayorAgachChatu |
ubhe \-\- pR^ithivyA yaH sharaNaM sa tava samIpe vartate |
( iti niShkrAnte )
shaku.ntalA \-\- kathaM gate eva |
rAjAH \-\- alamAvegena | nanvayamArAdhayitA janastava samIpe vartate |
kiM shItalaiH klamavinodibhirArdravAtAnsa~nchArayAmi
nalinIdalatAlavR^intaiH |
a~Nke nidhAya karabhoru yathAsukhaM te saMvAhayAmi charaNAvuta padmatAmrau
 || 19||
shaku.ntalA \-\- na mAnanIyeShvAtmAnamaparAdhayiShye |
( ityutthAya gantumichChati )
rAjAH \-\- sundari anirvANo divasaH iyaM cha te sharIrAvasthA |
utsR^ijya kusumashayanaM nalinIdalakalpitastanAvaraNam |
kathamAtape gamiShyasi paribAdhApelavaira~NgaiH || 20||
( iti balAdenAM nivartayati )
shaku.ntalA \-\- paurava raxa vinayam | madanasa.ntaptApi na khalvAtmanaH
prabhavAmi |
rAjAH \-\- bhIru alaM gurUjanbhayena | dR^iShTvA te viditadharmA
tatrabhavAnnAtra doShaM grahIShyati kulapatiH | pashya |
gAndharveNa vivAhena bahavyo rAjarShikanyakAH |
shrUyante pariNItAstAH pitR^ibhishchAbhinanditAH || 21||
shaku.ntalA \-\- mu~ncha tAvanmAm | bhUyo.api sakhIjanamanumAnayiShye
|
rAjAH \-\- bhavatu | moxyAmi |
shaku.ntalA \-\- kadA |
rAjAH \-\-
aparixatakomalasya yAvatkusumasyeva navasya ShaTpadena |
adharasya pipAsatA mayA te sadayaM sundari gR^ihyate raso.asya || 22||
( iti mukhamasyAH samunnamayitumichChati | shaku.ntalA pariharati nATyena )
( nepathye )
chakravAkavadhuke Amantrayasva sahacharam | upasthitA rajanI |
shaku.ntalA \-\- ( sasambhramam )
paurava asa.nshayaM mama sharIravR^ittAntopalambhAyAryA gautamIta
evAgachChati | tadviTapAntarito bhava |
rAjAH \-\- tathA |
( ityAtmAnamAvR^itya tiShThati )
( tataH pravishati pAtrahastA gautamI sakhyau cha )
sakhyau \-\- ita ita AryA gautamI |
gautamI \-\- ( shaku.ntalAmupetya )
jAte api laghusa.ntApAni te.a~NgAni |
shaku.ntalA \-\- Arye asti me visheShaH |
gautamI \-\- anena darbhodakena nirAbAdhameva te sharIraM bhaviShyati |
( shirasi shakutalAmabhyuxya )
vatse pariNato divasaH | ehi uTajameva gachChAmaH |
( iti prasthitAH )
shaku.ntalA \-\- ( Atmagatam )
hR^idaya prthamameva sukhopanate manorathe kAtarabhAvaM na mu~nchasi |
sAnushayavighaTitasya kathaM te sAmprataM sa.ntApaH |
( padAntare sthitvA | prakAsham )
latAvalaya sa.ntApahAraka Amantraye tvAM bhUyo.api paribhogAya |
( iti duHkhena niShkrAntA shaku.ntalA sahetarAbhiH )
rAjA ( pUrvasthAnamupetya | saniHshvAsam )
aho vighnavatyaH prArthitArthasiddhayaH | mayA hi
muhura~NgulisaMvR^itAdharoShThaM pratiShedhAxaraviklavAbhirAmam |
mukhama.nsavivarti paxmalAxyAH kathamapyunnamitaM na chumbitaM tu || 23||
kva nu khalu samprati gachChAmi | atha vA ihaiva priyAparibhuktamukte
latAvalaye muhUrtaM sthAsyAmi |
( sarvato.avalokya )
tasyAH puShpamayI sharIralulitA shayyA shilAyAmiyaM
klAnto manmathalekha eSha nalinIpatre nakhairarpitaH |
hastAdbhraShTamidaM bisAbharaNamityAsajyamAnexaNo
nirgantuM sahasA na vetasagR^ihAchChaknomi shUnyAdapi || 24||
( AkAshe )
rAjan.h
sAya.ntane savanakarmaNi sampravR^itte
vediM hutAshanavatIM paritaH prayastAH |
ChAyAshcharanti bahudhA bhayamAdadhAnAH
sa.ndhyApayodakapishAH pishitAshanAnAm.h || 25||
rAjAH \-\- ayamahamAgachChAmi |
( iti niShkrAntaH )

( iti tR^itIyo.a~NkaH | )

chaturtho.a~NkaH |

( tataH pravishataH kusumAvachayaM nATayantyau sakhyau | )
anasUyA \-\- halA priyaMvade yadyapi gAndharveNa vidhinA nirvR^ittakalyANA
shaku.ntalA.anurUpabhartR^igAminI saMvR^itteti nirvR^itaM me hR^idayaM
tathApyetAvachchintanIyam |
priyaMvadA \-\- kathamiva |
anasUyA \-\- adya sa rAjarShiriShTiM parisamApyarShibhirvisarjita Atmano
nagaraM pravishyAntaHpurasamAgata itogataM vR^ittAntaM smarati vA na veti
|
priyaMvadA \-\- visrabdhA bhava | na tAdR^ishA AkR^itivisheShA
guNavirodhino bhavanti | tAta idAnImimaM R^ittAntaM shrutvA na jAne kiM
pratipatsyata iti |
anasUyA \-\- yathAhaM pashyAmi tathA tasyAnumataM bhavet |
priyaMvadA \-\- kathamiva |
anasUyA \-\- guNavate kanyakA pratipAdanIyetyayaM tAvatprathamaH
sa.nkalpaH | taM yadi daivameva sampAdayati nanvaprayAsena kR^itArtho
gurujanaH |
priyaMvadA \-\- ( puShpabhAjanaM vilokya )
sakhi avachitAni balikarmaparyAptAni kusumAni |
anasUyA \-\- nanu sakhyAH shaku.ntalAyAH saubhAgyadevatArchanIyA |
priyaMvadA \-\- yujyate |
( iti tadeva karmAbhinayataH )
( nepathye )
ayamahaM bhoH |
anasUyA \-\- ( karNaM dattvA )
sakhi atithInAmiva niveditam |
priyaMvadA \-\- nanUTajasannihitA shaku.ntalA |
anasuyA \-\- adya punarhR^idayenAsannihitA | alametAvadbhiH kusumaiH |
( iti prasthite )
( nepathye )
AH
atithiparibhAvini vichintayantI yamananyamAnasA tapodhanaM vetsi na
mAmupasthitam |
smariShyati tvAM na sa bodhito.api sankathAM pramattaH prathamaM kR^itAmiva
 || 1||
priyaMvadA \-\- hA dhik hA dhik | apriyameva saMvR^ittam | kasminnapi
pUjArhe.aparAddhA shUnyahR^idayA shaku.ntalA |
( puro.avalokya )
na khalu yasminkasminnapi | eSha durvAsAH sulabhakopo maharShiH | tathA
shaptvA vegabalotphullayA durvArayA gatyA pratinivR^ittaH |
anasUyA \-\- ko.anyo hutavahAddagdhuM prabhavati | gachCha | pAdayoH
praNamya nivartayainaM yAvadahamarghodakamupakalpayAmi |
priyaMvadA \-\- tathA
( iti niShkrAntA )
anasUyA \-\- ( padAntare skhalitaM nirUpya )
aho AvegaskhalitayA gatyA prabhraShTaM mamAgrahastAtpuShpabhAjanam.h
|
( iti puShpochchayaM rUpayati )
( pravishya )
priyaMvadA \-\- sakhi prakR^itivakraH sa kasyAnunayaM pratigR^ihNAti |
kimapi punaH sAnukroshaH kR^itaH |
anasUyA \-\- ( sasmitam )
tasminbahavetadapi | kathaya |
priyaMvadA \-\- yadA nivartituM nechChati tadA vij~nApito mayA |
bhagavan prathama iti prexyAvij~nAtatapaHprabhAvasya duhitR^ijanasya
bhagavataiko.aparAdho marShayitavya iti |
anasUyA \-\- tatastataH |
priyaMvadA \-\- tato na me vachanamanyathAbhavitumarhati kiM
tvabhij~nAnAbharaNadarshanena shApo nivartiShyata iti mantrayamANa
evAntarhitaH |
anasUyA \-\- shakyamidAnImAshvasitum | asti tena rAjarShiNA
samprasthitena svanAmadheyA~Nkitama~NgulIyakaM smaraNIyamiti svayaM
pinaddham | tasminsvAdhInopAyA shaku.ntalA bhaviShyati |
priyaMvadA \-\- sakhi ehi | devakAryaM tAvadasyA nirvartayAvaH |
( iti parikrAmataH )
priyaMvadA \-\- ( vilokya )
anasUye pashya tAvat | vAmahastopahitavadanA.a.alikhiteva priyasakhI |
bhartR^igatayA chintayAtmAnamapi naiShA vibhAvayati | kiM
punarAgantukam |
anasUyA \-\- priyaMvade dvayoreva nau mukhe eSha vR^ittAntastiShThatu |
raxitavyA khalu prakR^itipelavA priyasakhI |
priyaMvadA \-\- ko nAmoShNodakena navamAlikAM si~nchati |
( iti niShkrAnte )
viShkambhakaH |
( tataH pravishati suptotthitaH shiShyaH )
shiShyaH \-\- velopalaxaNArthamAdiShTo.asmi tatrabhavatA
pravAsAdupAvR^ittena kAshyapena | prakAshaM nirgatastAvadavalokayAmi
kiyadavashiShTaM rajanyA iti |
( parikramyAvalokya cha )
hanta prabhAtam | tathA hi |
yAtyekato.astashikharaM patiroShadhInAmAviShkR^itAruNapuraHsara
ekato.arkaH |
tejodvayasya yugapadvyasanodayAbhyAM loko niyamyata ivAtmadashAntareShu || 
2 || 
api cha |
antarhite shashini saiva kumudvatI me
vR^iShTiM na nandayati sa.nsmaraNIyashobhA |
iShTapravAsajanitAnyabalAjanasya
duHkhAni nUnamatimAtrasuduHsahAni || 3||
( pravishyApaTIxepeNa )
anasUyA \-\- yadyapi nAma viShayaparA~Nmukhasya janasyaitanna viditaM
tathApi tena rAj~nA haku.ntalAyAmanAryamAcharitam |
shiShyaH \-\- yAvadupasthitAM homavelAM gurave nivedayAmi |
( iti niShkrAntaH )
anasUyA \-\- pratibuddhApi kiM kariShyAmi | na ma uchiteShvapi
nijakaraNIyeShu hastapAdaM prasarati | kAma idAnIM sakAmo bhavatu
yenAsatyasa.ndhe jane shuddhahR^idayA sakhI padaM kAritA | atha vA
durvAsaHshApa eSha vikArayati | anyathA kathaM sa rAjarShistAdR^ishAni
mantrayitvaitAvataH kAlasya lekhamAtramapi na visR^ijati |
tadito.abhij~nAnama~NgulIyakaM tasya visR^ijAvaH | duHkhashIle tapasvijane
ko.abhyarthyatAm | nanu sakhIgAmI doSha
iti vyavasitApi na pArayAmi pravAsapratinivR^ittasya tAtakAshyapasya
duShyantapariNItAmApannasattvAM shaku.ntalAM nivedayitum |
ittha~Ngate.asmAbhiH kiM karaNIyam |
( pravishya )
priyaMvadA \-\- ( saharSham )
sakhi tvarasva tvarasva shaku.ntalAyAH prasthAnakautukaM nivartayitum |
anasUyA \-\- sakhi kathametat |
priyaMvadA \-\- shR^iNu | idAnIM sukhashayitapR^ichChikA
shaku.ntalAsakAshaM gatAsmi |
anasUyA \-\- tatastataH |
priyaMvadA \-\- tAvadenAM lajjAvanatamukhIM pariShvajya
tAtakAshyapenaivamabhinanditam | diShTyA dhUmAkulitadR^iShTerapi
yajamAnasya pAvaka evAhutiH patitA | vatse sushiShyaparidattA
vidyevashochanIyAsi saMvR^ittA | adyaiva R^iShiraxitAM tvAM bhartuH
sakAshaM visarjayAmIti |
anasUyA \-\- atha kena sUchitastAtakAshyapasya vR^ittAntaH |
priyaMvadA \-\- agnisharaNaM praviShTasya sharIraM vinA ChandomayyA
vANyA |
anasUyA \-\- ( savismayam ) kathamiva |
priyaMvadA \-\- ( sa.nskR^itamAshritya )
duShyantenAhitaM tejo dadhAnAM bhUtaye bhuvaH |
avehi tanayAM brahmannagnigarbhAM shamImiva || 4||
anasUyA \-\- ( priyaMvadAmAshliShya )
sakhi priyaM me | kiM tvadyaiva shaku.ntalA nIyata ityutkaNThAsAdhAraNaM
paritoShamanubhavAmi |
priyaMvadA \-\- sakhi AvAM tAvadutkaNThAM vinodayiShyAvaH | sA
tapasvinI nirvR^itA bhavatu |
anasUyA \-\- tena hyetasmi.nshchUtashAkhAvalambite nAlikerasamudgaka
etannimittameva kAlAntaraxamA nixiptA mayA kesaramAlikA | tadimAM
hastasannihitAM kuru | yAvadahamapi tasyai mR^igarochanAM tIrthamR^ittikAM
dUrvAkisalayAnIti ma~NgalasamAlambhanAni virachayAmi |
priyaMvadA \-\- tathA kriyatAm |
( anasUyA niShkrAntA | priyaMvadA nATyena sumanaso gR^ihNAti )
( nepathye )
gautami AdishyantAM shAr~NgaravamishrAH shaku.ntalAnayanAya |
priyaMvadA \-\- ( karNaM dattvA )
anasUye tvarasva tvarasva | ete khalu hastinApuragAmina R^iShayaH
shabdAyyante |
( pravishya samAlambhanahastA )
anasUyA \-\- sakhi ehi | gachChAvaH |
( iti parikrAmataH )
priyaMvadA \-\- ( vilokya )
eShA sUryodaya eva shikhAmajjitA pratIShTanIvArahastAbhiH
svastivAchanikAbhistApasIbhirabhinandyamAnA shaku.ntalA tiShThati |
upasarpAva enAm |
( ityupasarpataH )
( tataH pravishati yathoddiShTavyApArA AsanasthA shaku.ntalA )
tApasInAmanyatamA \-\- ( shaku.ntalAM prati )
jAte bharturbahumAnasUchakaM mahAdevIshabdaM labhasva |
dvitIyA \-\- vatse vIraprasavinI bhava |
tR^itIyA \-\- vatse bharturbahumatA bhava |
( ityAshiSho dattvA gautamIvarjaM niShkrAntAH )
sakhyau \-\- ( upasR^itya )
sakhi sukhamajjanaM te bhavatu |
shaku.ntalA \-\- svAgataM me sakhyoH | ito niShIdatam |
ubhe ( ma~NgalapAtrANyAdAya | upavishya )
halA sajjA bhava | yAvatte ma~NgalasamAlambhanaM virachayAvaH |
shaku.ntalA \-\- idamapi bahu mantavyam | durlabhamidAnIM me
sakhImaNDanaM bhaviShyati |
( iti bAShpaM visR^ijati )
ubhe \-\- sakhi uchitaM na te ma~NgalakAle roditum |
(ityashrUNi pramR^ijya nATyena prasAdhayataH)
priyaMvadA \-\- AbharaNochitaM rUpamAshramasulabhaiH
prasAdhanairviprakAryate |
( pravishyopAyanahastAvR^iShikumArakau )
ubhau \-\- idamala.nkaraNam | ala.nkriyatAmatrabhavatI |
( sarvA vilokya vismitAH )
gautamI \-\- vatsa nArada kuta etat |
prathamaH \-\- tAtakAshyapaprabhAvAt |
gautamI \-\- kiM mAnasI siddhiH |
dvitIyaH \-\- na khalu | shrUyatAm | tatrabhavatA vayamAj~naptAH
shaku.ntalAhetorvanaspatibhyaH kusumAnyAharateti |
tata idAnIM
xaumaM kenachidindupANDu taruNA mA~NgalyamAviShkR^itaM
niShThyUtashcharaNopabhogasulabho lAxArasaH kenachit |
anyebhyo vanadevatAkaratalairAparvabhAgotthitai\-
rdattAnyAbharaNAni tatkisalayodbhedapratidvandvibhiH || 5||
priyaMvadA \-\- ( shaku.ntalAM vilokya )
halA anayAbhyupapattyA sUchitA te bharturgehe.anubhavitavyA rAjalaxmIH
|
( shaku.ntalA vrIDAM rUpayati )
prathama \-\- gautama ehyehi | abhiShekottIrNAya kAshyapAya
vanaspatisevAM nivedayAvaH |
dvitIyaH \-\- tathA |
( iti niShkrAntau )
sakhyau \-\- aye anupayuktabhUShaNo.ayaM janaH |
chitrakarmaparichayenA~NgeShu ta AbharaNaviniyogaM kurvaH |
shaku.ntalA \-\- jAne vAM naipuNam |
( ubhe nATyenAla~NkurUtaH )
( tataH pravishati snAnottIrNaH kAshyapaH ) |
kAshyapaH \-\- yAsyatyadya shakuntaleti hR^idayaM sa.nspR^iShTamutkaNThayA
kaNThaH stambhitabAShpavR^ittikaluShashchintAjaDaM darshanam |
vaiklavyaM mama tAvadIdR^ishamidaM snehAdaraNyaukasaH
pIDyante gR^ihiNaH kathaM nu tanayAvishleShaduHkhairnavaiH || 6||
( iti parikrAmati )
sakhyau \-\- halA shakuntale avasitamaNDanAsi | paridhatsva sAmprataM
xaumayugalam |
( shakuntalotthAya paridhatte )
gautamI \-\- jAte eSha te AnandaparivAhiNA chaxuShA pariShvajamAna
iva gururupasthitaH | AchAraM tAvatpratipadyasva |
shaku.ntalA \-\- ( savrIDam )
tAta vande |
kAshyapaH \-\- vatse |
yayAteriva sharmiShThA bharturbahumatA bhava |
sutaM tvamapi samrAjaM seva pUrumavApnuhi || 7||
gautamI \-\- bhagavAn varaH khalveShaH | nAshIH |
kAshyapaH \-\- vatse itaH sadyo hutAnagnInpradaxiNIkuruShva |
( sarve parikrAmanti )
kAshyapaH \-\- ( R^ikChandasA.a.ashAste )
amI vediM paritaH kL^iptadhiShNyAH
samidvantaH prAntasa.nstIrNadarbhAH |
apaghnato duritaM havyagandhairvaitAnAstvAM
vahnayaH pAvaya.ntu || 8||
pratiShThasvedAnIm |
( sadR^iShTixepam )
kva te shAr~NgaravamishrAH |
( pravishya )
shiShya \-\- bhagavan ime smaH |
kAshyapa \-\- bhaginyAste mArgamAdeshaya |
shAr~Ngarava \-\- ita ito bhavatI |
( sarve parikrAmanti )
kAshyapa \-\- bho bhoH sa.nnihitAstapovanataravaH |
pAtuM na prathamaM vyavasyati jalaM yuShmAsvapIteShu yA
nAdatte priyamaNDanApi bhavatAM snehena yA pallavam |
Adye vaH kusumaprasUtisamaye yasyA bhavatyutsavaH
seyaM yAti shaku.ntalA patigR^ihaM sarvairanuj~nAyatAm.h || 9||
( kokilaravaM sUchayitvA )
anumatagamanA shaku.ntalA tarubhiriyaM vanavAsabandhubhiH |
paribhR^itavirutaM kalaM yathA prativachanIkR^itamebhirIdR^isham.h || 10||
( AkAshe )
ramyAntaraH kamalinIharitaiH
sarobhishChAyAdrumairniyamitArkamayUkhatApaH |
bhUyAtkusheshayarajomR^idureNurasyAH shAntAnukUlapavanashcha shivashcha
panthAH || 11||
( sarve savismayamAkarNayanti )
gautamI \-\- jAte j~nAtijanasnigdhAbhiranuj~nAtagamanAsi
tapovanadevatAbhiH | praNama bhagavatIH |
shaku.ntalA \-\- ( sapraNAmaM parikramya | janAntikam )
halA priyaMvade AryaputradarshanotsukAyA apyAshramapadaM parityajantyA
duHkhena me charaNau purataH pravartete |
priyaMvadA \-\- na kevalaM tapovanavirahakAtarA sakhyeva |
tvayopasthitaviyogasya tapovanasyApi tAvatsamavasthA dR^ishyate |
udgalitadarbhakavalA mR^igyaH parityaktanartanA mayUrAH |
apasR^itapANDupatrA mu~nchantyashrUNIva latAH || 12||
shaku.ntalA \-\- ( smR^itvA )
tAta latAbhaginIM vanajyotsnAM tAvadAmantrayiShye |
kAshyapaH \-\- avaimi te tasyAM sodaryAsneham | iyaM tAvaddaxiNena |
shaku.ntalA \-\- ( upetya latAmAli~Ngya )
vanajyotsne chUtasa.ngatApi mAM pratyAli~NgetogatAbhiH shAkhAbAhAbhiH |
adyaprabhR^iti dUraparivartinI te khalu bhaviShyAmi |
kAshyapaH \-\-
sa.nkalpitaM prathamameva mayA tavArthe
bhartAramAtmasadR^ishaM sukR^itairgatA tvam |
chUtena sa.nshritavatI navamAlikeyamasyAmahaM
tvayi cha samprati vItachintaH || 13||
itaH panthAnaM pratipadyasva |
shaku.ntalA \-\- ( sakhyau prati )
halA eShA dvayoryuvayorhaste nixepaH |
sakhyau \-\- ayaM janaH kasya haste samarpitaH |
( iti bAShpaM viharataH )
kAshyapaH \-\- anasUye alaM ruditvA | nanu bhavatIbhyAmeva
sthirIkartavyA shaku.ntalA |
( sarve parikramanti )
shaku.ntalA \-\- tAta eShoTajaparyantachAriNI garbhamantharA
mR^igavadhUryadA.anaghaprasavA bhavati tadA mahyaM kamapi
priyanivedayitR^ikaM visarjayiShyatha |
kAshyapaH \-\- nedaM vismariShyAmaH |
shaku.ntalA \-\- ( gatibha~NgaM rUpayitvA )
ko nu khalveSha nivasane me sajjate |
( iti parAvartate )
kAshyapaH \-\- vatse,
yasya tvayA vraNaviropaNami~NgudInAM
tailaM nyaShichyata mukhe kushasuchividdhe |
shyAmAkamuShTiparivardhitako jahAti
so.ayaM na putrakR^itakaH padavIM mR^igaste || 14||
shaku.ntalA \-\- vatsa kiM sahavAsaparityAginIM mAmanusarasi |
achiraprasUtayA jananyA vinA vardhita eva | idAnImapi mayA virahitaM
tvAM tAtashchintayiShyati | nivartasva tAvat |
( iti rudatI prasthitA )
kAshyapaH \-\-
utpaxmaNornayanayoruparuddhavR^ittiM
bAShpaM kuru sthiratayA viratAnubandham |
asminnalaxitanatonnatabhUmibhAge
mArge padAni khalu te viShamIbhavanti || 15||
shAr~NgaravaH \-\- bhavagAn | odakAntaM snigdho jano.anugantavya iti
shrUyate | tadidaM sarastIram | atra sa.ndishya pratigantumarhati |
kAshyapaH \-\- tena hImAM xIravR^ixaChAyAmAshrayAmaH |
( sarve parikramya sthitAH )
kAshyapaH \-\- ( Atmagatam )
kiM nu khalu tatrabhavato duShyantasya yuktarUpamasmAbhiH sa.ndeShTavyam.h
|
( iti chintayati )
shaku.ntalA \-\- ( janAntikam )
halA pashya | nalinIpatrAntaritamapi sahacharamapashyantyAturA
chakravAkyaraTati duShkaramahaM karomIti |
anasUyA \-\- sakhi maivaM mantrayasva |
eShApi priyeNa vinA gamayati rajanIM viShAdadIrghatarAm |
gurvapi virahaduHkhamAshAbandhaH sAhayati || 16||
kAshyapaH \-\- shAr~Ngarava iti tvayA madvachanAtsa rAjA shaku.ntalAM
puraskR^itya vaktavyaH |
shAr~NgaravaH \-\- Aj~nApayatu bhagavAn |
kAshyapaH \-\- asmAnsAdhu vichintya saMyamadhanAnuchchaiH kulaM
chAtmanastvayyasyAH kathamapybAndhavakR^itAM snehapravR^ittiM cha tAm |
sAmAnyapratipattipUrvakamiyaM dAreShu dR^ishyA tvayA
bhAgyAyattamataH paraM na khalu tadvAchyaM vadhUbandhubhiH || 17||
shAr~NgaravaH \-\- gR^ihItaH sa.ndeshaH |
kAshyapaH \-\- vatse tvamidAnImanushAsanIyAsi | vanaukaso.api santo
laukikaj~nA vayam |
shAr~NgaravaH \-\- na khalu dhImatAM kashchidaviShayo nAma |
kAshyapaH \-\- sA tvamitaH patikulaM prApya \-\-
shushrUShasva gurUnkuru priyasakhIvR^ittiM sapatnIjane
bhartR^irviprakR^itApi roShaNatayA mA sma pratIpaM gamaH |
bhUyiShThaM bhava daxiNA parijane bhAgyeShvanutsekinI
yAntyevaM gR^ihiNIpadaM yuvatayo vAmAH kulasyAdhayaH || 18||
anasuyA \-\- kathaM vA gautamI manyate |
gautamI \-\- etAvAnvadhUjanasyopadeshaH | jAte etatkhalu sarvamavadhAraya
|
kAshyapaH \-\- vatse pariShvajasva mAM sakhIjanaM cha |
shaku.ntalA \-\- tAta ita eva kiM priyaMvadAnusUye sakhyau nivartiShyete |
kAshyapa \-\- vatse ime api pradeye | na yuktamanayostatra gantum | tvayA
saha gautamI yAsyati |
shaku.ntalA \-\- ( pitaramAshliShya )
kathamidAnIM tAtasyA~NkAtparibhraShTA malayataTonmUlitA chandanalateva
deshAntare jIvitaM dhArayiShyAmi |
kAshyapaH \-\- vatse kimevaM kAtarAsi |
abhijanavato bhartuH shlAghye sthitA gR^ihiNIpade
vibhavagurubhiH kR^ityaistasya pratixaNamAkulA |
tanayamachirAtprAchIvArkaM prasUya cha pAvanaM
mama virahajAM na tvaM vatse shuchaM gaNayiShyasi || 19||
( shaku.ntalA pituH pAdayoH patati )
kAshyapaH \-\- yadichChAmi te tadastu |
shaku.ntalA \-\- ( sakhyAvupetya )
halA dve api mAM samameva pariShvajethAm |
sakhyau \-\- ( tathA kR^itvA )
sakhi yadi nAma sa rAjA pratyabhij~nAnamantharo
bhavettatastasmAyidamAtmanAmadheyA~Nkitama~NgulIyakaM darshaya |
shaku.ntalA \-\- anena sa.ndehena vAmAkampitAsmi |
sakhyau \-\- mA bhaiShIH | atisnehaH pApasha~NkI |
shAr~NgaravaH \-\- yugAntaramArUDhaH savitA | tvaratAmatrabhavatI |
shaku.ntalA \-\- ( AshramAbhimukhI sthitvA )
tAta kadA nu bhUyastapovanaM prexiShye |
kAshyapa \-\- shrUyatAm |
bhUtvA chirAya chaturantamahIsapatnI
dauShyantimapratirathaM tanayaM niveshya |
bhartrA tadarpitakuTumbabhareNa sArdhaM
shAnte kariShyasi padaM punarAshrame.asmin.h || 20||
gautamI \-\- jAte parihIyate gamanavelA | nivartaya pitaram | atha vA
chireNApi punaH punareShaivaM mantrayiShyate | nivartatAM bhavAn |
kAshyapaH \-\- vatse uparudhyate tapo.anuShThAnam |
shaku.ntalA \-\- ( bhUyaH pitaramAshliShya ) tapashcharaNapIDitaM
tAtasharIram | tanmAtimAtraM mama kR^ita utkaNThasva |
kAshyapaH \-\- ( saniHshvAsam )
shamameShyati mama shokaH kathaM nu vatse tvayA rachitapUrvam |
uTajadvAravirUDhaM nIvArabaliM vilokayataH || 21||
gachCha | shivAste panthAnaH santu |
( niShkrAntA shaku.ntalA sahayAyinashcha )
sakhyau \-\- ( shaku.ntalAM vilokya )
hA dhik hA dhik | antarhitA shaku.ntalA vanarAjyA |
kAshyapaH \-\- ( saniHshvAsam )
anasUye gatavatI vAM sahachAriNI | nigR^ihya shokamanugachChataM mAM
prasthitam |
ubhe \-\- tAta shaku.ntalAvirahitaM shUnyamiva tapovanaM kathaM pravishAvaH
|
kAshyapaH \-\- snehavR^ittirevandarshinI |
( savimarshaM parikramya )
hanta bhoH shaku.ntalAM patikulaM visR^ijya labdhamidAnIM svAsthyam |
kutaH |
artho hi kanyA parakIya eva tAmadya sampreShya parigrahItuH |
jAto mamAyaM vishadaH prakAmaM pratyarpitanyAsa ivAntarAtmA || 22||
( iti niShkrAntAH sarve )

( iti chaturtho.a~NkaH | )

pa~nchamo.a~NkaH |

( tataH pravishatyAsanastho rAjA vidUShakashcha )
viduShakaH \-\- ( karNaM dattvA )
bho vayasya sa.ngItashAlAntare.avadhAnaM dehi | kalavishuddhAyA gIteH
svarasaMyogaH shrUyate | jAne trayabhavatI ha.nsapadikA varNaparichayaM
karotIti |
rAjAH \-\- tUShNIM bhava | yAvadAkarNayAmi |
( AkAshe gIyate )
abhinavamadhulolupastvaM tathA parichumbya chUtama~njarIm |
kamalavasatimAtranirvR^ito madhukara vismR^ito.asyenAM katham.h || 1||
rAjAH \-\- aho rAgaparivAhiNI gItiH |
viduShakaH \-\- kiM tAvadgItyA avagato.axarArthaH |
rAjAH \-\- ( smitaM kR^itvA )
sakR^itkR^itapraNayo.ayaM janaH | tadasyA devIM vasumatImantareNa
mahadupAlambhanaM gato.asmi | sakhe mAdhavya madvachanAduchyatAM
ha.nsapadikA | nipuNamupAlabdhAH sma iti |
viduShakaH \-\- yadbhavAnAj~nApayati |
( utthAya )
bho vayasya gR^ihItasya tayA parakIyairhastaiH shikhaNDake
tADyamAnasyApsarasA vItarAgasyeva nAstIdAnIM me moxaH |
rAjAH \-\- gachCha | nAgarikavR^ittyA sa~nj~nApayainAm |
viduShakaH \-\- kA gatiH | ( iti niShkrAntAH )
rAjAH \-\- ( Atmagatam )
kiM nu khalu gItamevaMvidhArthamAkarNyeShTajanavirahAdR^itepi
balavadutkaNThito.asmi | athavA |
ramyANi vIxya madhurA.nshcha nishamya shabdAnparyutsuko bhavati
yatsukhito.api jantuH |
tachchetasA smarati nUnamabodhapUrvaM bhAvasthirANi
jananAntarasauhR^idAni || 2||
( iti paryAkulastiShThati )
( tataH pravishati ka~nchukI )
ka~nchukI \-\- aho nu khalvIdR^ishImavasthAM pratipanno.asmi |
AchAra ityavahitena mayA gR^ihItA
yA vetrayaShTiravarodhagR^iheShu rAj~naH |
kAle gate bahutithe mama saiva jAtA
prasthAnaviklavagateravalambanArthA || 3||
bhoH kAmaM dharmakAryamanatipAtyaM devasya | tathApIdAnImeva
dharmAsanAdutthitAya punaruparodhakAri kaNvashiShyAgamanamasmai notsahe
nivedayitum | atha vA.avishramo.ayaM lokatantrAdhikAraH | kutaH |
bhAnuH sakR^idyuktatura~Nga eva rAtrindivaM gandhavahaH prayAti |
sheShaH sadaivAhitabhUmibhAraH ShaShThA.nshavR^itterapi dharma eShaH || 
4 || 
yAvanniyogamanutiShThAmi |
( parikramyAvalokya cha )
eSha devaH
prajAH prajAH svA iva tantrayitvA
niShevate shrAntamanA viviktam |
yUthAni sa.nchArya raviprataptaH
shItaM divA sthAnamiva dvipendraH || 5||
( upagamya )
jayatu jayatu devaH | ete khalu himagirerupatyakAraNyavAsinaH
kAshyapasa.ndeshamAdAya sastrIkAstapasvinaH samprAptAH | shrutvA devaH
pramANam |
rAjAH \-\- ( sAdaram )
kiM kAshyapasa.ndeshahAriNaH |
ka~nchukI \-\- atha kim |
rAjAH \-\- tena hi madvachanAdvij~nApyatAmupAdhyAyaH somarAtaH |
amUnAshramavAsinaH shrautena vidhinA satkR^itya svayameva
praveshayitumarhasIti | ahamapyatra tapasvidarshanochite pradeshe sthitaH
pratipAlayAmi |
ka`nchukI \-\- yadAj~nApayati devaH |
( iti niShkrAntaH )
rAjAH \-\- ( utthAya )
vetravati agnisharaNamArgamAdeshaya |
pratihArI \-\- ita ito devaH |
rAjAH \-\- ( parikrAmati | adhikArakhedaM nirUpya )
sarvaH prArthitamarthamadhigamya sukhI sampadyate jantuH | rAj~nAM tu
charitArthatA duHkhottaraiva |
autsukyamAtramavasAyayati pratiShThA
klishnAti labdhaparipAlanavR^ittireva |
nAtishramApanayanAya yathA shramAya
rAjyaM svahastadhR^itadaNDamivAtapatram.h || 6||
( nepathye )
vaitAlikau \-\- vijayatAM devaH |
prathamaH \-\-
svasukhanirabhilAShaH khidyase lokahetoH
pratidinamathavA te vR^ittirevaMvidhaiva |
anubhavati hi mUrdhnA padapastIvramuShNaM
shamayati paritApaM ChAyayA sa.nshritAnAm.h || 7||
dvitIyaH \-\-
niyamayasi vimArgaprasthitAnAttadaNDaH
prashamayasi vivAdaM kalpase raxaNAya |
atanuShu vibhaveShu j~nAtayaH santu nAma
tvayi tu parisamAptaM bandhukR^ityaM prajAnAm.h || 8||
rAjAH \-\- ete klAntamanasaH punarnavIkR^itAH smaH |
( iti parikrAmati )
pratihArI \-\- eSha abhinavasammArjanasashrIkaH
sannihitahomadhenuragnisharaNAlindaH | Arohatu devaH |
rAjAH \-\- ( Aruhya parijanA.nsAvalambI tiShThati )
vetravati kimuddishya bhagavatA kAshyapena matsakAshamR^iShayaH preShitAH
syuH |
kiM tAvadvratinAmupoDhatapasAM vighnaistapo dUShitaM
dharmAraNyachareShu kenachiduta prANiShvasachcheShTitam |
Ahosvitprasavo mamApacharitairviShTambhito
vIrudhAmityArUDhabahupratarkamaparichChedAkulaM me manaH || 9||
pratihArI \-\- sucharitanandina R^iShayo devaM sabhAjayitumAgatA iti
tarkayAmi |
( tataH pravishanti gautamIsahitAH shaku.ntalAM puraskR^itya munayaH |
purashchaiShAM ka~nchukI purohitashcha )
ka~nchukI \-\- ita ito bhavantaH |
shAr~NgaravaH \-\- shAradvata |
mahAbhAgaH kAmaM narapatirabhinnasthitirasau
na kashchidvarNAnAmapathamapakR^iShTo.api bhajate |
tathApIdaM shashvatparichitaviviktena manasA
janAkIrNaM manye hutavahaparItaM gR^ihamiva || 10||
shAradvataH \-\- sthAne bhavAnpurapraveshAditthambhUtaH saMvR^ittaH |
ahamapi
abhyaktamapi snAtaH shuchirashuchimiva prabuddha iva suptam |
baddhamiva svairagatirjanamiha sukhasa~Nginamavaimi || 11||
shaku.ntalA \-\- ( nimittaM sUchayitvA )
aho kiM me vAmetarannayanaM visphurati |
gautamI \-\- jAte pratihatamama~Ngalam | sukhAni te bhartR^ikuladevatA
vitarantu |
( iti parikrAmati )
purohitaH \-\- ( rAjAnaM nirdishya )
bho bhostapasvinaH asAvatrabhavAnvarNAshramANAM raxitA prAgeva
muktAsano vaH pratipAlayati | pashyatainam |
shAr~NgaravaH \-\- bho mahAbrAhmaNa kAmametadabhinandanIyaM tathApi
vayamatra madhyasthAH | kutaH
bhavanti namrAstaravaH phalAgamairnavAmbubhirdUravilambino ghanAH |
anuddhatAH satpuruShAH samR^iddhibhiH svabhAva evaiSha paropakAriNAm.h
 || 12||
pratIhArI \-\- deva prasannamukhavarNA dR^ishyante | jAnAmi
vishrabdhakAryA R^iShayaH |
rAjAH \-\- ( shaku.ntalAM dR^iShTvA )
athAtrabhavatI
kA svidavaguNThanavatI nAtiparisphuTasharIralAvaNyA |
madhye tapodhanAnAM kisalayamiva pANDupatrANAm.h || 13||
pratIhArI \-\- deva kutUhalagarbhaH prahito na me tarkaH prasarati | nanu
darshanIyA punarasyA AkR^itirlaxyate |
rAjAH \-\- bhavatu | anirvarNanIyaM parakalatram |
shaku.ntalA \-\- ( hastamurasi kR^itvA | Atmagatam )
hR^idaya kimevaM vepase | Aryaputrasya bhAvamavadhArya dhIraM tAvadbhava |

purohitaH \-\- ( puro gatvA )
ete vidhivadarchitAstapasvinaH | kashchideShAmupAdhyAyasa.ndeshaH | taM
devaH shrotumarhati |
rAjAH \-\- avahito.asmi |
R^iShayaH \-\- ( hastAnudyamya )
vijayasva rAjan |
rAjAH \-\- sarvAnabhivAdaye |
R^iShayaH \-\- iShTena yujyasva |
rAjAH \-\- api nirvighnatapaso munayaH |
R^iShayaH \-\-
kuto dharmakriyAvighnaH satAM raxitari tvayi |
tamastapati dharmA.nshau kathamAvirbhaviShyati || 14||
rAjAH \-\- arthavAnkhalu me rAjashabdaH | atha bhagavAnlokAnugrahAya
kushalI kAshyapaH |
shAr~NgaravaH \-\- svAdhInakushalAH siddhimantaH | sa
bhavantamanAmayaprashnapUrvakamidamAha |
rAjAH \-\- kimAj~nApayati bhagavAn |
shAr~NgaravaH \-\- yanmithaHsamayAdimAM madIyAM duhitaraM
bhavAnupAya.nsta tanmayA prItimatA yuvayoranuj~nAtam | kutaH
tvamarhatAM prAgrasaraH smR^ito.asi naH
shaku.ntalA mUrtimatI cha satkriyA |
samAnaya.nstulyaguNaM vadhUvaraM
chirasya vAchyaM na gataH prajApatiH || 15||
tadidAnImApannasattveyaM pratigR^ihyatAM sahadharmAcharaNAyeti |
gautamI \-\- Arya kimapi vaktukAmAsmi | na me vachanAvasaro.asti |
kathamiti |
nApexito gurujano.anayA tvayA pR^iShTo na bandhujanaH |
ekaikasminneva charite bhaNAmi kimekaikam.h || 16||
shaku.ntalA \-\- ( Atmagatam )
kiM nu khalvAryaputro bhaNati |
rAjAH \-\- kimidamupanyastam |
shaku.ntalA \-\- ( Atmagatam )
pAvakaH khalu vachanopanyAsaH |
shAr~NgaravaH \-\- kathamidaM nAma | bhavanta eva sutarAM
lokavR^ittAntaniShNAtAH |
satImapi j~nAtikulaikasa.nshrayAM
jano.anyathA bhartR^imatIM visha~Nkate |
ataH samIpe pariNeturiShyate |
priyA.apriyA vA pramadA svabandhubhiH || 17||
rAjAH \-\- kimatrabhavatI mayA pariNItapUrvA |
shaku.ntalA \-\- ( saviShAdam Atmagatam )
hR^idaya sAmprataM te Asha~NkA |
shAr~NgaravaH \-\-
kiM kR^itakAryadveSho dharmaM prati vimukhatA |
kR^itAvaj~nA |
rAjAH \-\- kuto.ayamasatkalpanAprashnaH |
shAr~NgaravaH \-\-
mUrchChantyamI vikArAH prAyeNaishvaryamatteShu || 18||
rAjAH \-\- visheSheNadhixipto.asmi |
gautamI \-\- jAte muhUrtaM mA lajjasva | apaneShyAmi
tAvatte.avaguNThanam | tatastvAM bhartAbhij~nAsyati |
( iti yathoktaM karoti )
rAjAH \-\- ( shaku.ntalAM nirvarNya | Atmagatam )
idamupanatamevaM rUpamakliShTakAnti
prathamaparigR^ihItaM syAnna vetyavyavasyan |
bhramara iva vibhAte kundamantastuShAraM
na cha khalu parobhoktuM nApi shaknomi hAtum.h || 19||
( iti vichArayansthitaH )
pratIhArI \-\- ( svagatam )
aho dharmApexitA bhartuH | idR^ishaM nAma sukhopanataM rUpaM dR^iShTA
ko.anyo vichArayati |
shAr~NgaravaH \-\- bho rAjan kimiti joShamAsyate |
rAjAH \-\- bhostapodhanAH chintayannapi na khalu svIkaraNamatrabhavatyAH
smarAmi | tatkathamimAmabhivyaktasattvalaxaNAM pratyAtmAnaM
xetriNamAsha~NkamAnaH pratipatsye |
shaku.ntalA \-\- ( apavArya )
Aryasya pariNaya eva sa.ndehaH | kuta idAnIM me dUrAdhirohiNyAshA |
shAr~NgaravaH\-\- mA tAvat |
kR^itAbhimarshAmanumanyamAnaH sutAM tvayA nAma munirvimAnyaH |
muShTaM pratigrAhayatA svamarthaM pAtrIkR^ito dasyurivAsi yena ||  20||

shAradvataH \-\- shAr~Ngarava virama tvamidAnIm | shakuntale
vaktavyamuktamasmAbhiH | so.ayamatrabhavAnevamAha |
dIyatAmasmai pratyayaprativachanam |
shaku.ntalA \-\- ( apavArya )
idamavasthAntaraM gate tAdR^ishe.anurAge kiM vA smAritena | AtmedAnIM
me shochanIya iti vyavasitametat |
( prakAsham )
Aryaputra \-
( ityardhokte )
saMshayita idAnIM pariNaye naiSha samudAchAraH |
paurava yuktaM nAma te tathA purAshramapade svabhAvottAnahR^idayamimaM
janaM samayapUrvaM pratArya sAmpratamIdR^ishairaxaraiH pratyAkhyAtum |
rAjAH \-\- ( karNau vidhAya )
shAntaM pApam |
vyapadeshamAvilayituM kimIhase janamimaM cha pAtayitum |
kUla.nkaSheva sindhuH prasannamambhastaTataruM cha || 21||
shaku.ntalA \-\- bhavatu | yadi paramArthataH paraparigrahasha~NkinA
tvayaivaM pravR^ittaM tadabhij~nAnenAnena tavAsha~NkAmapaneShyAmi |
rAjAH \-\- udAraH kalpaH |
shaku.ntalA \-\- ( mudrAsthAnaM parAmR^ishya )
hA dhik hA dhik | a~NgulIyakashUnyA me.a~NguliH |
( iti saviShAdaM gautamImavexate )
gautamI \-\- nUnaM te shakrAvatArAbhyantare shachItIrthasalilaM
vandamAnAyAH prabhraShTama~NgulIyakam |
rAjAH \-\- ( sasmitam )
idaM tatpratyutpannamati straiNamiti yaduchyate |
shaku.ntalA \-\- atra tAvadvidhinA darshitaM prabhutvam | aparaM te
kathayiShyAmi |
rAjAH \-\- shrotavyamidAnIM saMvR^ittam |
shaku.ntalA \-\- nanvekasmindivase navamAlikAmaNDape
nalinIpatrabhAjanagatamudakaM tava haste sannihitamAsIt |
rAjAH \-\- shR^iNumastAvat |
shaku.ntalA \-\- tatxaNe sa me putrakR^itako dIrghApA~Ngo nAma mR^igapotaka
upasthitaH | tvayAyaM tAvatprathamaM pibatvityanukampinopachChandita udakena
| na punaste.aparichayAdhdastAbhyAsamupagataH | pashchAttasminneva mayA
gR^ihIte salile.anena kR^itaH praNayaH | tadA tvamitthaM prahasito.asi |
sarvaH saga.ndheShu vishvasiti | dvAvapyatrAraNyakAviti |
rAjAH \-\-
evamAdibhirAtmakAryanirvartinInAmanR^itamayavA~NmadhubhirAkR^iShyante
viShayiNaH |
gautamI \-\- mahAbhAga nArhasyevaM mantrayitum |
tapovanasaMvardhito.anabhij~no.ayaM janaH kaitavasya |
rAjAH \-\- tApasavR^iddhe |
strINAmashixitapaTutvamamAnuShIShu
sa.ndR^ishyate kimuta yAH pratibodhavatyaH |
prAgantarixagamanAstvamapatyajAtamanyairdvijaiH
parabhR^itAH khalu poShayanti || 22||
shaku.ntalA \-\- ( saroSham )
anArya Atmano hR^idayAnumAnena prexase | ka idAnImanyo
dharmaka~nchukapraveshinastR^iNachChannakUpopamasya tavAnukR^itiM
pratipatsyate |
rAjAH \-\- ( Atmagatam )
sa.ndigdhabuddhiM mAM kurvannakaitava ivAsyAH kopo laxyate | tathA hyanayA
mayyeva vismaraNadAruNachittavR^ittau
vR^ittaM rahaH praNayamapratipadyamAne |
bhedAdbhruvoH kuTilayoratilohitAxyA
bhagnaM sharAsanamivAtiruShA smarasya || 23||
( prakAsham )
bhadre prathitaM duShyantasya charitam | tathApIdaM na dR^ishyate |
shaku.ntalA \-\- suShThu tAvadatra svachChandachAriNI kR^itAsmi
yAhamasya puruva.nshapratyayena mukhamadhorhR^idayaviShasya
hastAbhyAsamupagatA |
shAr~NgaravaH \-\- itthamAtmakR^itaM chApalaM dahati |
ataH parIxya kartavyaM visheShAtsa.ngataM rahaH |
aj~nAtahR^idayeShvevaM vairIbhavati sauhR^idam.h || 24||
rAjAH \-\- ayi bhoH kimatrabhavatIpratyayAdevAsmAnsaMyutadoShAxaraiH
xiNutha |
shAr~NgaravaH \-\-( sAsUyam )
shrutaM bhavadbhiradharottaram |
A janmanaH shAThyamashixito yastasyApramANaM vachanaM janasya |
parAtisa.ndhAnamadhIyate yairvidyeti te santu kilAptavAchaH || 25||
rAjAH \-\- bhoH satyavAdin abhyupagataM tAvadasmAbhirevam | kiM
punarimAmatisa.ndhAya labhyate |
shAr~NgaravaH \-\- vinipAtaH |
rAjAH \-\- vinipAtaH pauravaiH prArthyata iti na shraddheyametat |
shAradvataH\-\- shAr~Ngarava kimuttareNa | anuShThito guroH sa.ndeshaH |
pratinivartAmahe vayam |
( rAjAnaM prati )
tadeShA bhavataH kAntA tyaja vainAM gR^ihANa vA |
upapannA hi dAreShu prabhutA sarvatomukhI || 26||
gautami gachChAgrataH |
( iti prasthitAH )
shaku.ntalA \-\- kathamanena kitavena vipralabdhAsmi | yUyamapi mAM
parityajatha |
( ityanupratiShThate )
gautamI \-\- ( sthitvA )
vatsa shAr~Ngarava anugachChatIyaM khalu naH karuNaparidevinI shaku.ntalA |
pratyAdeshaparuShe bhartari kiM vA me putrikA karotu |
shAr~NgaravaH \-\- ( saroShaM nivR^itya )
kiM purobhAge svAtantryamavalambase |
( shaku.ntalA bhItA vepate )
shAr~NgaravaH \-\- shaku.ntale |
yadi yathA vadati xitipastathA tvamasi kiM piturutkulayA tvayA |
atha tu vetsi shuchi vratamAtmanaH patikule tava dAsyamapi xamam.h || 27||
tiShTha | sAdhayAmo vayam |
rAjAH \-\- bhostapasvin kimatrabhavatIM vipralabhase |
kumudAnyeva shashA~NkaH savitA bodhayati pa~NkajAnyeva |
vashinAM hi paraparigrahasa.nshleShaparA~NmukhI vR^ittiH || 28||
shAr~NgaravaH \-\- yadA tu pUrvavR^ittamanyasa~NgAdvismR^ito bhavA.nstadA
kathamadharmabhIruH |
rAjAH \-\- bhavantamevAtra gurulAghavaM pR^ichChAmi |
mUDhaH syAmahameShA vA vadenmithyeti sa.nshaye |
dAratyAgI bhavAmyAho parastrIsparshapA.nsulaH || 29||
purohitaH \-\- ( vichArya )
yadi tAvadevaM kriyatAm |
rAjAH \-\- anushAstu mAM bhavAn |
purohitaH \-\- atrabhavatI tAvadAprasavAdasmadgR^ihe tiShThatu | kuta
idamuchyata iti chet | tvaM sAdhubhirAdiShTapUrvaH prathamameva
chakravartinaM putraM janayiShyasIti | sa chenmunidauhitrastallaxaNopapanno
bhaviShyati abhinandya shuddhAntamenAM praveshayiShyasi | viparyaye tu
piturasyAH samIpanayanamavasthitameva |
rAjAH \-\- yathA gurubhyo rochate |
purohitaH \-\- vatse anugachCha mAm |
shaku.ntalA \-\- bhagavati vasudhe dehi me vivaram |
( iti rudatI prasthitA | niShkrAntA saha purodhasA tapasvibhishcha )
( rAjA shApavyavahitasmR^itiH shaku.ntalAgatameva chintayati )
( nepathye )
AshcharyamAshcharyam |
rAjAH \-\- ( AkarNya )
kiM nu khalu syAt |
( pravishya )
purohitaH \-\- ( savismayam )
deva adbhutaM khalu saMvR^ittam |
rAjAH \-\- kimiva |
purohitaH \-\- deva parAvR^itteShu kaNvashiShyeShu -
sA nindantI svAni bhAgyAni bAlA bAhUtxepaM krandituM cha pravR^ittA |
rAjAH \-\- kiM cha |
purohitaH \-\-
strIsa.nsthAnaM chApsarastIrthamArAdutxipyainAM jyotirekaM jagAma || 30||
( sarve vismayaM rUpayanti )
rAjAH \-\- bhagavan prAgapi so.asmAbhirarthaH pratyAdiShTa eva | kiM
vR^ithA tarkeNAnviShyate | vishrAmyatu bhavAn |
purohita \-\- ( vilokya )
vijayasva |
( iti niShkrAntaH )
rAjAH \-\- vetravati paryAkulo.asmi | shayanabhUmimArgamAdeshaya |
pratIhArI \-\- ita ito devaH |
( iti prasthitA )
rAjAH \-\-
kAmaM pratyAdiShTAM smarAmi na parigrahaM munestanayAm |
balavattu dUyamAnaM pratyAyayatIva mAM hR^idayam.h || 31||
( iti niShkrAntAH sarve )

( iti pa~nchamo.a~NkaH | )

ShaShTho.a~NkaH |

( tataH pravishati nAgarikaH shyAlaH pashchAdbaddhaM puruShamAdAya
raxiNau cha )
raxiNau \-\- ( puruShaM tADayitvA )
are kumbhIraka kathaya kutra tvayetanmaNibandhanotkIrNanAmadheyaM
rAjakIyama~NgulIyakaM samAsAditam |
puruShaH \-\- ( bhItinATitakena )
prasIdantu bhAvamishrAH | nAhamIdR^ishakarmakArI |
prathamaH \-\- kiM shobhano brAhmaNa iti kR^itvA
( kalayitvA )
rAj~nA pratigraho dattaH |
puruShaH \-\- shR^iNutedAnIm | ahaM shakrAvatArAbhyantaravAsI
dhIvaraH |
dvitiyaH \-\-pATachchara kimasmAbhirjAtiH pR^iShTA |
shyAlaH \-\- sUchaka kathayatu sarvananukrameNa | mainamantarA
pratibadhnItam |
ubhau \-\- yadAvutta Aj~nApayati | kathaya |
puruShaH \-\- ahaM jAlodgAlAdibhirmatsyabandhanopAyaiH kuTumbabharaNaM
karomi |
shyAlaH \-\- ( vihasya )
vishuddha idAnImAjIvaH |
puruShaH \-\- bhartaH mA evaM bhaNa |
sahajaM kila yadvininditaM na khalu tatkarma vivarjanIyam |
pashumAraNakarmadAruNo.anukampAmR^idureva shrotriyaH || 1||
shyAlaH \-\- tatastataH |
puruShaH \-\- ekasmindivase khaNDasho rohitamatsyo mayA kalpitaH |
yAvattasyodarAbhyantare prexe tAvadidaM ratnabhAsurama~NgulIyakaM
dR^iShTam | pashchAdahamasya vikrayAya darshayangR^ihIto bhAvamishraiH |
mArayata vA mu~nchata vA | ayamasyAgamavR^ittAntaH |
shyAlaH \-\- jAnuka visragandhI godhAdI matsyabandha eva niHsa.nshayam |
a~NgulIyakadarshanamasya vimarshayitavyam | rAjakulameva gachChAmaH |
raxiNau \-\- tathA | gachCha are granthibhedaka |
( sarve parikrAmanti )
shyAlaH \-\- sUchaka imaM gopuradvAre.apramattau pratipAlayataM
yAvadidama~NgulIyakaM yathAgamanaM bharte nivedya tataH shAsanaM pratIShya
niShkrAmAmi |
ubhau \-\- pravishatvAvuttaH svAmiprasAdAya |
( iti niShkrAntaH shyAlaH )
prathamaH \-\- jAnuka chirAyate khalvAvuttaH |
dvitIyaH \-\- nanvavasaropasarpaNIyA rAjAnaH |
prathamaH \-\- jAnuka sphurato mama hastAvasya vadhasya sumanasaH pinaddhum.h
|
( iti puruShaM nirdishati )
puruShaH \-\- nArhati bhAvo.akAraNamAraNo bhavitum |
dvitIyaH \-\- ( vilokya )
eSha nau svAmI patrahasto rAjashAsanaM pratIShyetomukho dR^ishyate |
gR^idhrabalirbhaviShyasi shuno mukhaM vA draxyAsi |
( pravishya )
shyAlaH \-\- sUchaka muchyatAmeSha jAlopajIvI | upapannaH
khalvasyA~NgulIyakasyAgamaH |
sUchakaH \-\- yathAvutto bhaNati | eSha yamasadanaM pravishya
pratinivR^ittaH |
( iti puruShaM parimuktabandhanaM karoti )
puruShaH \-\- ( shyAlaM praNamya )
bhartaH atha kIdR^isho ma AjIvaH |
shyAlaH \-\- eSha bhartrA~NgulIyakamUlyasammitaH prasAdo.api dApitaH |
( iti puruShAya svaM prayachChati )
puruShaH \-\- ( sapraNAmaM pratigR^ihya )
bhartaH anugR^ihIto.asmi |
sUchakaH \-\- eSha nAmAnugraho yachChUlAdavatArya hastiskandhe
pratiShThApitaH |
jAnuka \-\- Avutta pAritoShikaM kathayati tenA~NgulIyakena bhartuH
sammatena bhavitavyamiti |
shyAlaH \-\- na tasminmahArhaM ratnaM bharturbahumatamiti tarkayAmi | tasya
darshanena bhartrA.abhimato janaH smR^itaH | muhUrtaM prakR^itigambhIro.api
paryashrunayana AsIt |
sUchakaH \-\- sevitaM nAmAvuttena |
jAnukaH \-\- nanu bhaNa | asya kR^ite mAtsyikabharturiti |
( iti puruShamasUyayA pashyati )
puruShaH \-\- bhaTTAraka ito.ardhaM yuShmAkaM sumanomUlyaM bhavatu |
jAnukaH \-\- etAvadyujyate |
shyAlaH \-\- dhIvara mahattarastvaM priyavayasyaka idAnIM me saMvR^ittaH |
kAdambarIsAxikamasmAkaM prathamasauhR^idamiShyate | tachChauNDikApaNameva
gachChAmaH |
(iti niShkrAntAH sarve)
praveshakaH |
( tataH pravishatyAkAshayAnena sAnumatI nAmApsarAH )
sAnumatI \-\- nirvartitaM mayA
paryAyanirvartanIyamapsarastIrthasA.nnidhyaM
yAvatsAdhujanasyabhiShekakAla iti sAmpratamasya rAjarSherudantaM
pratyaxIkariShyAmi | menakAsambandhena sharIrabhUtA me shaku.ntalA |
tayA cha duhitR^inimittamAdiShTapUrvAsmi |
( samantAdavalokya )
kiM nu khalu R^itUtsave.api nirutsavArambhamiva rAjakulaM dR^ishyate | asti
me vibhavaH praNidhAnena sarvaM parij~nAtum | kiM tu sakhyA Adaro mayA
mAnayitavyaH | bhavatu | anayorevodyAnapAlikayostiraskariNIpratichChannA
pArshvavartinI bhUtvopalapsye |
( iti nATyenAvatIrya sthitA )
( tataH pravishati chUtA~NkuramavalokayantI cheTI | aparA cha
pR^iShThatastasyAH )
prathamA \-\-
AtAmraharitapANDura jIvitasarvaM vasantamAsasya ( yoH ) |
dR^iShTo.asi chUtakoraka R^ituma~Ngala tvAM prasAdayAmi || 2||
dvitIyA \-\- parabhR^itike kimekAkinI mantrayase |
prathamA \-\- madhukarike chUtakalikAM dR^iShTtvonmattA parabhR^itikA
bhavati |
dvitIyA \-\- ( saharShaM tvarayopagamya )
kathamupasthito madhumAsaH |
prathamA \-\- madhukarike tavedAnIM kAla eSha madavibhramagItAnAm |
dvitIyA \-\- sakhi avalambasva mAM yAvadagrapAdasthitA bhUtvA
chUtakalikAM gR^ihItvA kAmadevArchanaM karomi |
prathamA \-\- yadi mamApi khalvardhamarchanaphalasya |
dvitIyA \-\- akathite.apyetatsampadyate yata ekameva nau jIvItaM
dvidhAsthitaM sharIram |
( sakhImavalambya sthitA chUtA~NkuraM gR^ihNAti )
aye apratibuddho.api chUtaprasavo.atra bandhanabha~Ngasurabhirbhavati |
( iti kapotahastakaM kR^itvA )
tvamasi mayA chUtA~Nkura dattaH kAmAya gR^ihItadhanuShe |
pathikajanayuvatilaxyaH pa~nchAbhyadhikaH sharo bhava || 3||
( iti chUtA~NkuraM xipati )
( pravishyApaTIxepeNa kupitaH ) |
ka~nchukI \-\- mA tAvadanAtmaj~ne | devena pratiShiddhe vasantotsave
tvamAmrakalikAbha~NgaM kimArabhase |
ubhe \-\- ( bhIte )
prasIdatvAryaH | agR^ihItArthe AvAm |
ka~nchukI \-\- na kila shrutaM yuvAbhyAM yadvAsantikaistarubhirapi devasya
shAsanaM pramANIkR^itaM tadAshrayibhiH patribhishcha | tathA hi
chUtAnAM chiranirgatApi kalikA badhnAti na svaM rajaH
sannaddhaM yadapi sthitaM kurabakaM tatkorakAvasthayA |
kaNTheShu skhalitaM gate.api shishire pu.nskokilAnAM rutaM
sha~Nke saMharati smaro.api chakitastUNArdhakR^iShTaM sharam.h || 4||
sanumatI \-\- nAsti sa.ndehaH | mahAprabhAvo rAjarShiH |
prathamA \-\- Arya kati divasAnyAvayormitrAvasunA rAShTriyeNa
bhaTTinIpAdamUlaM preShitayoH | atra cha nau pramadavanasya pAlanakarma
samarpitam | tadAgantukatayA.ashrutapUrva AvAbhyAmeSha vR^ittAntaH |
ka~nchukI \-\- bhavatu | na punarevaM pravartitavyam |
ubhe \-\- Arya kautUhalaM nau | yadyanena janena shrotavyaM kathayatvAryaH
kinnimittaM bhartrA vasantotsavaH pratiShiddhaH |
sAnumatI \-\- utsavapriyAH khalu manuShyAH | guruNA kAraNena
bhavitavyam |
ka~nchukI \-\- bahulIbhUtametatkiM na kathyate | kimatrabhavatyoH karNapathaM
nAyAtaM shaku.ntalApratyAdeshakaulInam |
ubhe \-\- shrutaM rAShTriyamukhAdyAvada~NgulIyakadarshanam |
ka~nchukI \-\- tena hyalpaM kathayitavyam | yadaiva khalu
svA~NgulIyakadarshanAdanusmR^itaM devena satyamUDhapUrvA me tatrabhavatI
rahasi shaku.ntalA mohAtpratyAdiShTeti tadAprabhR^ityeva
pashchAttApamupagato devaH | tathA hi
ramyaM dveShTi yathA purA prakR^itibhirna pratyahaM sevyate
shayyAprAntavivartanairvigamayatyunnidra eva xapAH |
dAxiNyena dadAti vAchamuchitAmantaHpurebhyo yadA gotreShu
skhalitastadA bhavati cha vrIDAvilaxashchiram.h || 5||
sAnumatI \-\- priyaM me |
ka~nchukI \-\- asmAtprabhavato vaimanasyAdutsavaH pratyAkhyAtaH |
ubhe \-\- yujyate |
( nepathye )
etu etu bhavAn |
ka~nchukI \-\- ( karNaM dattvA )
aye | ita evAbhivartate devaH | svakarmAnuShThIyatAm |
ubhe \-\- tathA |
(iti niShkrAnte)
( tataH pravishati pashchAttApasadR^ishaveSho rAjA vidUShakaH
pratIhArI cha | )
ka~nchukI \-\- ( rAjAnamavalokya )
aho sarvAsvavasthAsu ramaNIyatvamAkR^itivisheShANAm | evamutsuko.api
priyadarshano devaH | tathA hi
pratyAdiShTavisheShamaNDanavidhirvAmaprakoShThArpitaM
bibhratkA~nchanamekameva valayaM shvAsoparaktAdharaH |
chintAjAgaraNapratAntanayanastejoguNAdAtmanaH
sa.nskArollikhito mahAmaNiriva xINo.api nAlaxyate || 6||
sAnumatI \-\- ( rAjAnaM dR^iShTvA )
sthAne khalu pratyAdeshavimAnitA.apyasya kR^ite shaku.ntalA klAmyati |
rAjAH \-\- ( dhyAnamandaM parikramya )
prathamaM sAra~NgAxyA priyayA pratibodhyamAnamapi suptam |
anushayaduHkhAyedaM hatahR^idayaM samprati vibuddham.h || 7||
sAnumatI \-\- nanvIdR^ishAni tapasvinyA bhAgadheyAni |
vidUShakaH \-\- ( apavArya )
la~Nghita eSha bhUyo.api shaku.ntalAvyAdhinA | na jAne kathaM
chikitsitavyo bhaviShyatIti |
ka~nchukI \-\- ( upagamya )
jayatu jayatu devaH | mahArAja pratyavexitAH pramadavanabhUmayaH
yathAkAmamadhyAstAM vinodasthAnAni mahArAjaH |
rAjAH \-\- vetravati madvachanAdamAtyamAryapishunaM brUhi |
chiraprabodhAnna sambhAvitamasmAbhiradya dharmAsanamadhyAsitum |
yatpratyavexitaM paurakAryamAryeNa tatpatramAropya dIyatAmiti |
pratIhArI \-\- yaddeva Aj~nApayati |
( iti niShkrAntA )
rAjAH \-\- vAtAyana tvamapi svaM niyogamashUnyaM kuru |
ka~nchukI \-\- yadAj~nApayati devaH |
( iti niShkrAntaH )
vidUShakaH \-\- kR^itaM bhavatA nirmaxikam | sAmprataM
shishirAtapachChedaramaNIye.asminpramadavanoddesha AtmAnaM ramayiShyasi |
rAjAH \-\- vayasya yaduchyate randhropanipAtino.anarthA iti tadvyabhichAri
vachaH | kutaH
munisutApraNayasmR^itirodhinA mama cha muktamidaM tamasA manaH |
manasijena sakhe prahariShyatA dhanuShi chUtasharashcha niveshitaH || 8||
vidUShakaH \-\- tiShTha tAvat | anena daNDakAShThena kandarpabANaM
nAshayiShyAmi |
( iti daNDakAShThamudyamya chUtA~NkuraM pAtayitumichChati )
rAjAH \-\- ( sasmitam )
bhavatu | dR^iShTaM brahmavarchasam | sakhe kvopaviShTaH priyAyAH
ki.nchidanukAriNIShu latAsu dR^iShTiM vilobhayAmi |
viShUShaka \-\- nanvAsannaparichArikA chaturikA bhavatA sa.ndiShTA |
mAdhavImaNDapa imAM velAmativAhayiShye | tatra me chitraphalakagatAM
svahastalikhitAM tatrabhavatyAH shaku.ntalAyAH pratikR^itimAnayeti |
rAjAH \-\- IdR^ishaM hR^idayavinodanasthAnam | tattameva mArgamAdeshaya
|
vidUShakaH \-\- ita ito bhavAn |
( ubhau parikramataH | sAnumatyanugachChati )
vidUShakaH \-\- eSha maNishilApaTTakasanAtho mAdhavImaNDapa
upahAraramaNIyatayA niHsa.nshayaM svAgateneva nau pratIchChati |
tatpravishya niShIdatu bhavAn |
( ubhau praveshaM kR^itvopaviShTau )
sAnumatI \-\- latAsa.nshritA draxyAmi tAvatsakhyAH pratikR^itam |
tatastasyai bharturbahumukhamanurAgaM nivedayiShyAmi |
( iti tathA kR^itvA sthitA )
rAjAH \-\- sakhe sarvamidAnIM smarAmi shaku.ntalAyAH
prathamavR^ittAntam | kathitavAnasmi bhavate cha | sa
bhavAnpratyAdeshavelAyAM matsamIpagato nAsIt | pUrvamapi na tvayA
kadAchitsa.nkIrtitaM tatrabhavatyA nAma | kachchidahamiva vismR^itavAnasi
tvam |
vidUShakaH \-\- na vismarAmi | kiM tu sarvaM kathayitvAvasAne punastvayA
parihAsavijalpa eSha na bhUtArtha ityAkhyAtam | mayApi
mR^itpiNDabuddhinA tathaiva gR^ihItam | athavA bhavitavyatA khalu
balavatI |
sAnumatI \-\- evaM nvidam |
rAjAH \-\- ( dhyAtvA )
sakhe trAyasva mAm |
vidUShakaH \-\- bhoH kimetat | anupapannaM khalvIdR^ishaM tvayi | kadApi
satpuruShAH shokavAstavyA na bhavanti | nanu pravAte.api niShkampA
girayaH |
rAjAH \-\- vayasya nirAkaraNaviklavAyAH priyAyAH samavasthAmanusmR^itya
balavadasharaNo.asmi | sA hi
itaH pratyAdeshAtsvajanamanugantuM vyavasitA
sthitA tiShThetyuchchairvadati gurushiShye gurusame |
punardR^iShTiM bAShpaprasarakaluShAmarpitavatI mayi
krUre yattatsaviShamiva shalyaM dahati mAm.h || 9||
sAnumatI \-\- aho | IdR^ishI svakAryaparatA | asya sa.ntApenAhaM rame |
vidUShakaH \-\- bhoH asti me tarkaH kenApi tatrabhavatyAkAshachAriNA
nIteti |
rAjAH \-\- kaH patidevatAmanyaH parAmarShTumutsaheta | menakA kila
sakhyAste janmapratiShTheti shrutavAnasmi | tatsahachAriNIbhiH sakhI te
hR^iteti me hR^idayamAsha~Nkate |
sAnumatI \-\- sammohaH khalu vismayanIyo na pratibodhaH |
vidUShakaH \-\- yadyevamasti khalu samAgamaH kAlena tatrabhavatyA |
rAjAH \-\- kathamiva |
vidUShakaH \-\- na khalu mAtApitarau bhartR^iviyogaduHkhitAM duhitaraM
chiraM draShTuM pArayataH |
rAjAH \-\- vayasya |
svapno nu mAyA nu matibhramo nu kliShTaM nu tAvatphalameva puNyam |
asannivR^ittyai tadatItamete manorathA nAma taTaprapAtAH || 10||
vidUShakaH \-\- maivam | nanva~NgulIyakameva nidarshanamavashyaM
bhAvyachintanIyaH samAgamo bhavatIti |
rAjAH \-\- ( a~NgulIyakaM vilokya )
aye idaM tAvadasulabhasthAnabhra.nshi shochanIyam |
tava sucharitama~NgulIya nUnaM pratanu mameva vibhAvyate phalena |
aruNanakhamanoharAsu tasyAshchyutamasi labdhapadaM yada~NgulIShu || 11||
sAnumatI \-\- yadyanyahastagataM bhavetsatyameva shochanIyaM bhavet |
vidUShakaH \-\- bhoH iyaM nAmamudrA kenodhdAtena tatrabhavatyA
hastAbhyAsaM prApitA |
sAnumatI \-\- mamApi kautUhalenAkArita eShaH |
rAjAH \-\- shrUyatAm | svanagarAya prasthitaM mAM priyA
sabAShpamAha kiyachchireNAryaputraH pratipattiM dAsyatIti |
vidUShakaH \-\- tatastataH |
rAjAH \-\- pashchAdimAM mudrAM tada~Ngulau niveshayatA mayA
pratyabhihitA |
ekaikamatra divase divase madIyaM nAmAxaraM gaNaya gachChasi yAvadantam.h
|
tAvatpriye madavarodhagR^ihapraveshaM netA janastava samIpamupaiShyatIti
 || 12||
tachcha dAruNAtmanA mayA mohAnnAnuShThitam |
sAnumatI \-\- ramaNIyaH khalvavadhirvidhinA visaMvAditaH |
vidUShakaH \-\- atha kathaM dhIvarakalpitasya rohitamatsyasyodarAbhyantara
AsIt |
rAjAH \-\- shachItIrthaM vandamAnAyAH sakhyAste
hastAdga~NgAsrotasi paribhraShTam |
vidUShakaH \-\- yujyate |
sAnumatI \-\- ata eva tapasvinyAH shaku.ntalAyA adharmabhIrorasya
rAjarSheH pariNaye sa.ndeha AsIt |
atha vedR^isho.anurAgo.abhij~nAnamapexate | kathamivaitat |
rAjAH \-\- upAlapsye tAvadidama~NgulIyakam |
vidUShakaH \-\- ( Atmagatam )
gR^ihIto.anena panthA unmattAnAm |
rAjAH \-\- kathaM nu taM bandhurakomalA~NguliM karaM vihAyAsi
nimagnamambhasi | athavA |
achetanaM nAma guNaM na laxayenmayaiva kasmAdavadhIritA priyA || 13||
vidUShakaH \-\- ( Atmagatam )
kathaM bubhuxayA khAditavyo.asmi |
rAjAH \-\- priye
akAraNaparityAgAnushayataptahR^idayastAvadanukampyatAmayaM janaH
punardarshanena |
( pravishyApaTIxepeNa chitraphalakahastA )
chaturikA \-\- iyaM chitragatA bhaTTinI |
( iti chitraphalakaM darshayati )
vidUShakaH \-\- ( vilokya )
sAdhu vayasya | madhurAvasthAnadarshanIyo bhAvAnupraveshaH | skhalatIva
me dR^iShTirnimnonnatapradesheShu |
sAnumatI \-\- aho eShA rAjarShernipuNatA | jAne sakhyagrato me vartata
iti |
rAjAH \-\-
yadyatsAdhu na chitre syAtkriyate tattadanyathA |
tathApi tasyA lAvaNyaM rekhayA ki~nchidanvitam.h || 14||
sAnumatI \-\- sadR^ishametatpashchAttApaguroH snehasyAnavalepasya cha |
vidUShakaH \-\- bhoH idAnIM tisrastatrabhavatyo dR^ishyante | sarvAshcha
darshanIyAH | katamA.atra tatrabhavatI shaku.ntalA |
sAnumatI \-\- anabhij~naH khalvIdR^ishasya rUpasya moghadR^iShTirayaM janaH
|
rAjAH \-\- tvaM tAvatkatamAM tarkayasi |
vidUShakaH \-\- tarkayAmi yaiShA shithilabandhanodvAntakusumena
keshAntenodbhinnasvedabindunA vadanena visheShato.apasR^itAbhyAM
bAhubhyAmavasekasnigdhataruNapallavasya chUtapAdapasya pArshva
iShatparishrAntevAlikhitA sA shaku.ntalA | itare sakhyAviti |
rAjAH \-\- nipuNo bhavAn | astyatra me bhAvachihnam |
svinnA~Ngulivinivesho rekhAprAnteShu dR^ishyate malinaH |
ashru cha kapolapatitaM dR^ishyamidaM varNikochChvAsAt.h || 15||
chaturike ardhalikhitametadvinodasthAnam | gachCha | vartikAM tAvadAnaya
|
chaturikA \-\- Arya mAdhavya avalambasva chitraphalakaM yAvadAgachChAmi
|
rAjAH \-\- ahamevaitadavalambe |
( iti yathoktaM karoti )
( niShkrAntA cheTi )
rAjAH \-\- ( niHshvasya )
sAxAtpriyAmupagatAmapahAya pUrvaM chitrArpitAM punarimAM bahu
manyamAnaH |
strotovahAM pathi nikAmajalAmatItya jAtaH sakhe
praNayavAnmR^igatR^iShNikAyAm.h || 16||
vidUShakaH \-\- ( Atmagatam )
eSho.atrabhavAnnadImatikramya mR^igatR^iShNikAM sa~NkrAntaH |
( prakAsham )
bhoH aparaM kimatra lekhitavyam |
sAnumati \-\- yo yaH pradeshaH sakhyA me.abhirUpastaM tamAlekhitukAmo
bhavet |
rAjAH \-\- shrUyatAm |
kAryA saikatalInaha.nsamithunA srotovahA mAlinI
pAdAstAmabhito niShaNNahariNA gaurIguroH pAvanAH |
shAkhAlambitavalkalasya cha tarornirmAtumichChAmyadhaH
shR^i~Nge kR^iShNamR^igasya vAmanayanaM kaNDUyamAnAM mR^igIm.h || 17||
vidUShakaH \-\- ( Atmagatam )
yathAhaM pashyAmi pUritavyamanena chitraphalakaM lambakUrchAnAM
tApasAnAM kadambaiH |
rAjAH \-\- vayasya anyashcha | shaku.ntalAyAH prasAdhanamabhipretamatra
vismR^itamasmAbhiH |
vidUShakaH \-\- kimiva |
sAnumatI \-\- vanavAsasya saukumAryasya vinayasya cha yatsadR^ishaM
bhaviShyati |
rAjAH \-\-
kR^itaM na karNArpitabandhanaM sakhe shirIShamAgaNDavilambikesaram |
na vA sharachchandramarIchikomalaM mR^iNAlasUtraM rachita stanAntare || 
18 || 
vidUShakaH \-\- bhoH kiM nu tatrabhavatI
raktakuvalayapallavashobhinA.agrahastena mukhamAvArya chakitachakiteva
sthitA |
( sAvadhAnaM nirUpya dR^iShTvA )
AH eSha dAsyAHputraH kusumarasapATachcharastatrabhavatyA
vadanakamalamabhila~Nghate madhukaraH |
rAjAH \-\- nanu vAryatAmeSha dhR^iShTaH |
vidUShakaH \-\- bhavAnevAvinItAnAM shAsitA.asya vAraNe
prabhaviShyati |
rAjAH \-\- yujyate | ayi bhoH kusumalatApriyAtithe kimatra
paripatanakhedamanubhavasi |
eShA kusumaniShaNNA tR^iShitApi satI bhavantamanuraktA
pratipAlayati madhukarI na khalu madhu vinA tvayA pibati || 19||
sAnumatI \-\- adyAbhijAtaM khalveSha vAritaH |
vidUShakaH \-\- pratiShiddhApi vAmaiShA jAtiH |
rAjAH \-\- evaM bho na me shAsane tiShThasi | shrUyatAM tarhi samprati |
akliShTabAlatarupallavalobhanIyaM pItaM mayA sadayameva ratotsaveShu |
bimbAdharaM spR^ishasi chedbhramara priyAyAstvAM kArayAmi
kamalodarabandhanastham.h || 20||
vidUShakaH \-\- evaM tIxNadaNDasya kiM na bheShyati |
( prahasya | Atmagatam )
eSha tAvadunmattaH | ahamapyetasya sa~NgenedR^ishavarNa iva saMvR^ittaH |
( prakAsham )
bhoH chitraM khalvetat |
rAjAH \-\- kathaM chitram |
sAnumatI \-\- ahamapIdAnImavagatArthA | kiM
punaryathAlikhitAnubhAvyeShaH |
rAjAH \-\- vayasya kimidamanuShThitaM paurobhAgyam |
darshanasukhamanubhavataH sAxAdiva tanmayena hR^idayena |
smR^itikAriNA tvayA me punarapi chitrIkR^itA kAntA || 21||
( iti bAShpaM viharati )
sAnumatI \-\- pUrvAparavirodhyapUrva eSha virahamArgaH |
rAjAH \-\- vayasya kathamevamavishrAntaduHkhamanubhavAmi |
prajAgarAtkhilIbhUtastasyAH svapne samAgamaH |
bAShpastu na dadAtyenAM draShTuM chitragatAmapi || 22||
sAnumatI \-\- sarvathA pramArjitaM tvayA pratyAdeshaduHkhaM
shaku.ntalAyAH |
( pravishya )
chaturikA \-\- jayatu bhartA | vartikAkaraNDakaM gR^ihItvetomukhaM
prasthitAsmi |
rAjAH \-\- kiM cha |
chaturikA \-\- sa me hastAdantarA taralikAdvitIyayA devyA
vasumatyAhamevAryaputrasyopaneShyAmIti sabalAtkAraM gR^ihItaH |
vidUShakaH \-\- diShTyA tvaM muktA |
chaturikA \-\- yAvaddevyA viTapalagnamuttarIyaM taralikA mochayati
tAvanmayA nirvAhita AtmA |
rAjAH \-\- vayasya upasthitA devI bahumAnagarvitA cha | bhavAnimAM
pratikR^itiM raxatu |
vidUShakaH \-\- AtmAnamiti bhaNa |
( chitraphalakamAdAyotthAya cha )
yadi bhavAnantaHpurakUTavAgurAto moxyate tadA mAM meghapratichChande
prAsAde shabdAyaya |
( iti drutapadaM niShkrAntaH )
sAnumatI \-\- anyasa.nkrAntahR^idayo.api prathamasambhAvanAmapexate |
atishithilasauhArda idAnImeShaH |
( pravishya patrahastA )
pratIhArI \-\- jayatu jayatu devaH |
rAjAH \-\- vetravati na khalvantarA dR^iShTA tvayA devI |
pratIhArI \-\- atha kim | patrahastAM mAM prexya pratinivR^ittA |
rAjAH \-\- kAryaj~nA kAryoparodhaM me pariharati |
pratIhArI \-\- deva amAtyo vij~nApayati |
arthajAtasya gaNanAbahulatayaikameva paurakAryamavexitaM taddevaH
patrArUDhaM pratyaxIkarotviti |
rAjAH \-\- itaH patraM darshaya |
( pratihAryupanayati )
rAjAH \-\- ( anuvAchya )
katham | samudravyavahArI sArthavAho dhanamitro nAma nauvyasane vipannaH
| anapatyashcha kila tapasvI | rAjagAmI tasyArthasa.nchaya
ityetadamAtyena likhitam | kaShTaM khalvanapatyatA | vetravati
bahudhanatvAdbahupatnIkena tatrabhavatA bhavitavyam | vichAryatAM yadi
kAchidApannasattvA tasya bhAryAsu syAt |
pratIhArI \-\- deva idAnImeva sAketakasya shreShThino duhitA
nirvR^ittapu.nsavanA jAyAsya shrUyate |
rAjAH \-\- nanu garbhaH pitryaM rikthamarhati | gachCha | evamamAtyaM
brUhi |
pratIhArI \-\- yaddeva Aj~nApayati |
( iti prasthitA )
rAjAH \-\- ehi tAvat |
pratIhArI \-\- iyamasmi |
rAjAH \-\- kimanena sa.ntatirasti nAstIti |
yena yena viyujyante prajAH snigdhena bandhunA |
sa sa pApAdR^ite tAsAM duShyanta iti ghuShyatAm.h || 23||
pratIhArI \-\- evaM nAma ghoShayitavyam |
( niShkramya | punaH praviShya )
kAle pravR^iShTamivAbhinanditaM devasya shAsanam |
rAjAH \-\- ( dIrghamuShNaM cha niHshvasya )
evaM bhoH sa.ntatiChedaniravalambAnAM kulAnAM mUlapuruShAvasAne
sampadaH paramupatiShThante | mamApyante puruva.nshashriya eSha eva
vR^ittAntaH |
pratIhArI \-\- pratihatamama~Ngalam |
rAjAH \-\- dhi~NmAmupasthitashreyovamAninam |
sAnumatI \-\- asa.nshayaM sakhImeva hR^idaye kR^itvA nindito.anenAtmA |
rAjAH \-\-
saMropite.apyAtmani dharmapatnI tyaktA mayA nAma kulapratiShThA |
kalpiShyamANA mahate phalAya vasu.ndharA kAla ivoptabIjA || 24||
sAnumatI \-\- aparichChinnedAnIM te sa.ntatirbhaviShyati |
chaturikA \-\- ( janAntikam )
aye anena sArthavAhavR^ittAntena dviguNodvego bhartA | enamAshvAsayituM
meghapratichChandAdAryaM mAdhavyaM gR^ihItvAgachCha |
pratIhArI \-\- suShThu bhaNasi |
( iti niShkrAntA )
rAjAH \-\- aho duShyantasya sa.nshayamArUDhAH piNDabhAjaH | kutaH |
asmAtparaM bata yathAshruti sambhR^itAni ko naH kule nivapanAni
niyachChatIti |
nUnaM prasUtivikalena mayA prasiktaM dhautAshrusheShamudakaM pitaraH
pibanti || 25||
( iti mohamupagataH )
chaturikA \-\- ( sasambhramamavalokya )
samAshvasitu samAshvasitu bhartA |
sAnumatI \-\- hA dhik hA dhik | sati khalu dIpe
vyavadhAnadoSheNaiSho.andhakAradoShamanubhavati | ahamidAnImeva
nirvR^itaM karomi |
atha vA shrutaM mayA shaku.ntalAM samAshvAsayantyA mahendrajananyA
mukhAdyaj~nabhAgotsukA devA eva tathAnuShThAsyanti yathAchireNa
dharmapatnIM bhartAbhinandiShyatIti | tadyuktametaM kAlaM
pratipAlayitum | yAvadanena vR^ittAntena priyasakhIM samAshvAsayAmi |
( ityudbhrAntakena niShkrAntA )
( nepathye )
abrahmaNyam |
rAjAH \-\- ( pratyAgataH | karNaM dattvA )
aye mAdhavyasyevArtasvaraH | kaH ko.atra bhoH |
( pravishya )
pratIhArI \-\- ( sasambhramam )
paritrAyatAM devaH sa.nshayagataM vayasyam |
rAjAH \-\- kenAttagandho mANavakaH |
pratIhArI \-\- adR^iShTarUpeNa kenApi sattvenAtikramya
meghapratichChandasya prAsAdasyAgrabhUmimAropitaH |
rAjAH \-\- ( utthAya )
mA tAvat | mamApi sattvairabhibhUyante gR^ihAH | atha vA |
ahanyahanyAtmana eva tAvajj~nAtuM pramAdaskhalitaM na shakyam |
prajAsu kaH ke pathA prayAtItyasheShato veditumasti shaktiH || 26||
( nepathye )
bho vayasya avihA avihA |
rAjAH \-\- ( gatibhedena parikrAman )
sakhe na bhetavyam |
( nepathye )
( punastadeva paThitvA )
kathaM na bheShyAmi | eSha mAM ko.api pratyavanatashirodharamixumiva
tribha~NgaM karoti |
rAjAH \-\- ( sadR^iShTixepam )
dhanustAvat |
( pravishya shAr~NgahastA )
yavanI \-\- bhartaH etadhdastAvApasahitaM sharAsanam |
( rAjA sasharaM dhanurAdatte )
( nepathye )
eSha tvAmabhinavakaNThashoNitArthI shArdUlaH pashumiva hanmi
cheShTamAnam |
ArtAnAM bhayamapanetumAttadhanvA duShyantastava sharaNaM
bhavatvidAnIm.h || 27||
rAjAH \-\- ( saroSham )
kathaM mAmevoddishati | tiShTha kuNapAshana | tvamidAnIM na bhaviShyasi |
( shAr~NgamAropya )
vetravati sopAnamArgamAdeshaya |
pratihArI \-\- ita ito devaH |
( sarve satvaramupasarpanti )
rAjAH \-\- ( samantAdvilokya )
shUnyaM khalvidam |
( nepathye )
avihA | avihA | ahaM atrabhavantaM pashyAmi | tvaM mAM na pashyasi |
biDAlagR^ihIto mUShaka iva nirAsho.asmi jIvite saMvR^ittaH |
rAjAH \-\- bhostiraskariNIgarvita madIyamastraM tvAM draxyati | eSha
tamiShuM sa.ndadhe |
yo haniShyati vadhyaM tvAM raxyaM raxiShyati dvijam |
ha.nso hi xIramAdatte tanmishrA varjayatyapaH || 28||
( ityastraM sa.ndhatte )
( tataH pravishati vidUShakamutsR^ijya mAtaliH )
mAtaliH \-\-
kR^itA sharavyaM hariNA tavAsurAH sharAsanaM teShu vikR^iShyatAmidam.h
|
prasAdasaumyAni satAM suhR^ijjane patanti chaxU.nShi na dAruNAH sharAH
 || 29||
rAjAH \-\- ( sasambhramamastramupasa.nharan )
aye mAtaliH | svAgataM mahendrasArathe |
( pravishya )
vidUShakaH \-\- ahaM yeneShTipashumAraM mAritaH so.anena
svAgatenAbhinadyate |
mAtaliH \-\- ( sasmitam )
AyuShmanshrUyatAM yadarthamasmi hariNA bhavatsakAshaM preShitaH |
rAjAH \-\- avahito.asmi |
mAtaliH \-\- asti kAlanemiprasUtirdurjayo nAma dAnavagaNaH |
rAjAH \-\- asti | shrutapUrvaM mayA nAradAt |
mAtaliH \-\-
sakhyuste sa kila shatakratorajayya stasya tvaM raNashirasi smR^ito nihantA |
uchChettuM prabhavati yanna saptasaptistannaishaM timiramapAkaroti chandraH
 || 30||
sa bhavAnAttashastra eva idAnImaindrarathamAruhya vijayAya
pratiShThatAm |
rAjAH \-\- anugR^ihIto.ahamanayA maghavataH sambhAvanayA | atha
mAdhavyaM prati bhavatA kimevaM prayuktam |
mAtaliH \-\- tadapi kathyate | ki~nchinnimittAdapi
manaHsa.ntApAdAyuShmAnmayA viklavo dR^iShTaH |
pashchAtkopayitumAyuShmantaM tathA kR^itavAnasmi | kutaH |
jvalati chalitendhano.agnirviprakR^itaH pannagaH phaNAM kurute |
prAyaH svaM mahimAnaM xobhAtpratipadyate hi janaH || 31||
rAjAH \-\- ( janAntikam )
vayasya anatikramaNIyA divaspaterAj~nA | tadatra parigatArthaM kR^itvA
madvachanAdamAtyapishunaM brUhi |
tvanmatiH kevalA tAvat paripAlayatu prajAH |
adhijyamidamanyasminkarmaNi vyApR^itaM dhanuH || 32||
iti |
vidUShakaH \-\- yadbhavAnAj~nApayati |
( iti niShkrAntaH )
mAtaliH \-\- AyuShmAnrathamArohatu |
( rAjA rathArohaNaM nATyati )
( niShkrAntAH sarve )

( iti ShaShTho a~NkaH | )

saptamo.a~NkaH |

( tataH pravishatyAkAshayAnena rathAdhirUDho rAjA mAtalishcha )
rAjAH \-\- mAtale anuShThitanidesho.api maghavataH
satkriyAvisheShAdanupayuktamivAtmAnaM samarthaye |
mAtaliH \-\- ( sasmitam )
AyuShman ubhayamapyaparitoShaM samarthaye |
prathamopakR^itaM marutvataH pratipattyA laghu manyate bhavAn |
gaNayatyavadAnavismito bhavataH so.api na satkriyAguNAn.h || 1||
rAjAH \-\- mAtale mA maivam | sa khalu
manorathAnAmapyabhUmirvisarjanAvasarasatkAraH | mama hi divaukasAM
samaxamardhAsanopaveshitasya |
antargataprArthanamantikasthaM jayantamudvIxya kR^itasmitena |
AmR^iShTavaxoharichandanA~NkA mandAramAlA hariNA pinaddhA || 2||
mAtaliH \-\- kimiva nAmAyuShmAnamareshvarAnnArhati | pashya |
sukhaparasya harerubhayaiH kR^itaM tridivamuddhR^itadAnavakaNTakam |
tava sharairadhunA nataparvabhiH puruShakesariNashcha purA nakhaiH || 3||
rAjAH \-\- atra khalu shatakratoreva mahimA stutyaH |
sidhyanti karmasu mahatsvapi yanniyojyAH |
sambhAvanAguNamavehi tamIshvarANAm |
kiM vA.abhaviShyadaruNastamasAM vibhettA
taM chetsahasrakiraNo dhuri nAkariShyat.h || 4||
mAtaliH \-\- sadR^ishaM tavaitat |
( stokamantaramatItya )
AyuShman itaH pashya nAkapR^iShThapratiShThitasya saubhAgyamAtmayashasaH
|
vichChittisheShaiH surasundarINAM varNairamI kalpalatA.nshukeShu |
vichintya gItaxamamarthajAtaM divaukasastvachcharitaM likhanti || 5||
rAjAH \-\- mAtale asurasamprahArotsukena pUrvedyurdivamadhirohatA mayA
na laxitaH svargamArgaH | katamasminmarutAM pathi vartAmahe |
mAtaliH \-\-
trisrotasaM vahati yo gaganapratiShThAM jyotI.nShi vartayati cha
pravibhaktarashmiH |
tasya dvitIyaharivikramanistamaskaM vAyorimaM parivahasya vadanti mArgam.h
 || 6||
rAjAH \-\- mAtale ataH khalu sabAhyAntaHkaraNo mamAntarAtmA prasIdati
|
( rathA~Ngamavalokya )
meghapadavImavatIrNau svaH |
mAtaliH \-\- kathamavagamyate |
rAjAH \-\- ayamaravivarebhyashchAtakairniShpatadbhirharibhirachirabhAsAM
tejasA chAnuliptaiH |
gatamupari ghanAnAM vArigarbhodarANAM
pishunayati rathaste shIkaraklinnanemiH || 7||
mAtaliH \-\- xaNAdAyuShmAnsvAdhikArabhUmau vartiShyate |
rAjAH \-\- ( adho.avalokya )
mAtale vegAvataraNAdAshcharyadarshanaH saMlaxyate manuShyalokaH | tathA
hi |
shailAnAmavarohatIva shikharAdunmajjatAM medinI |
parNAbhyantaralInatAM vijahati skandhodayAtpAdapAH |
sa.ntAnaistanubhAvanaShTasalilA vyaktiM bhajantyApagAH |
kenApyutxipateva pashya bhuvanaM matpArshvamAnIyate || 8||
mAtaliH \-\- sAdhu dR^iShTam |
( sabahumAnamavalokya )
aho udAraramaNIyA pR^ithivI |
rAjAH \-\- mAtale katamo.ayaM pUrvAparasamudrAvagADhaH
kanakarasanisyandI sA.ndhya iva meghaparighaH sAnumAnAlokyate |
mAtali \-\- AyuShman eSha khalu hemakUTo nAma
kimpuruShaparvatastapaHsa.nsiddhixetram | pashya |
svAyambhuvAnmarIcheryaH prababhUva prajApatiH |
surAsuraguruH so.atra sapatnIkastapasyati || 9||
rAjAH \-\- tena hyanatikramaNIyAni shreyA.nsi | pradaxiNIkR^itya
bhagavantaM gantumichChAmi |
mAtaliH \-\- prathamaH kalpaH |
( nATyenAvatIrNau )
rAjAH \-\- ( savismayam )
upoDhashabdA na rathA~NganemayaH pravartamAnaM na cha dR^ishyate rajaH |
abhUtalasparshanatayA.aniruddhatastavAvatIrNo.api ratho na laxyate || 10||
mAtaliH \-\- etAvAneva shatakratorAyuShmatashcha visheShaH |
rAjAH \-\- mAtale katamasminpradeshe mArIchAshramaH |
mAtaliH \-\- ( hastena darshayan )
valmIkArdhanimagnamUrtirurasA sa.ndaShTasarpatvachA
kaNThe jIrNalatApratAnavalayenAtyarthasampIDitaH |
a.nsavyApi shakuntanIDanichitaM bibhrajjaTAmaNDalaM
yatra sthANurivAchalo munirasAvabhyarkabimbaM sthitaH || 11||
rAjAH \-\- namaste kaShTatapase |
mAtaliH \-\- ( saMyatapragrahaM rathaM kR^itvA )
etau aditiparivardhitamandAravR^ixaM prajApaterAshramaM praviShTau svaH |
rAjAH \-\- svargAdadhikataraM nirvR^itisthAnam.h
amR^itahR^idamivAvagADho.asmi |
mAtaliH \-\- ( rathaM sthApayitvA )
avataratvAyuShmAn |
rAjAH \-\- ( avatIrya )
mAtale bhavAnkathamidAnIm |
mAtaliH \-\- saMyantrito mayA rathaH | vayamapyavatarAmaH |
( tathA kR^itvA )
ita AyuShman |
( parikramya )
dR^ishyantAmatrabhavatAmR^iShINAM tapovanabhUmayaH |
rAjAH \-\- nanu vismayAdavalokayAmi |
prANAnAmanilena vR^ittiruchitA satkalpavR^ixe vane
toye kA~nchanapadmareNukapishe dharmAbhiShekakriyA |
dhyAnaM ratnashilAtaleShu vibudhastrIsannidhau saMyamo
yatkA~Nxanti tapobhiranyamunayastasmi.nstapasyantyamI || 12||
mAtaliH \-\- utsarpiNI khalu mahatAM prArthanA |
( parikramya | AkAshe )
aye vR^iddhashAkalya kimanutiShThati bhagavAnmArIchaH | kiM bravIShi |
dAxAyaNyA prativratArdhamadhikR^itya pR^iShTastasyai
maharShipatnIsahitAyai kathayatIti |
rAjAH \-\- ( karNaM dattvA )
aye pratipAlyAvasaraH khalu prastAvaH |
mAtaliH \-\- ( rAjAnamavalokya )
asminnashokavR^ixamUle tAvadAstAmAyuShmAn yAvattvAmindragurave
nivedayitumantarAnveShI bhavAmi |
rAjAH \-\- yathA bhavAnmanyate |
( iti sthitaH )
mAtaliH \-\- AyuShman sAdhayAmyaham |
( iti niShkrAntaH )
rAjAH \-\- ( nimittaM sUchayitvA )
manorathAya nAsha.nse kiM bAho spandase vR^ithA |
pUrvAvadhIritaM shreyo duHkhaM hi parivartate || 13||
( nepathye )
mA khalu chApalaM kuru | kathaM gata evAtmanaH prakR^itim |
rAjAH \-\- ( karNaM dattvA )
abhUmiriyamavinayasya | ko nu khalveSha niShidhyate |
( shabdAnusAreNAvalokya | savismayam )
aye ko nu khalvayamanubadhyamAnastapasvinIbhyAmabAlasattvo bAlaH |
ardhapItastanaM mAturAmardakliShTakesaram |
prakrIDituM siMhashishuM balAtkAreNa karShati || 14||
( tataH pravishati yathAnirdiShTakarmA tapasvinIbhyAM bAlaH )
bAlaH \-\- jR^imbhasva siMha dantA.nste gaNayiShye |
prathamA \-\- avinIta kiM no.apatyanirvisheShANi sattvAni viprakaroShi |
hanta vardhate te saMrambhaH | sthAne khalu R^iShijanena sarvadamana iti
kR^itanAmadheyo.asi |
rAjAH \-\- kiM nu khalu bAle.asminnaurasa iva putre snihyati me manaH |
nUnamanapatyatA mAM vatsalayati |
dvitIyA \-\- eShA khalu kesariNI tvAM la~Nghayati yadyasyAH putrakaM na
mu~nchasi |
bAlaH \-\- ( sasmitam )
aho balIyaH khalu bhIto.asmi |
( ityadharaM darshayati )
rAjAH \-\-
mahatastejaso bIjaM bAlo.ayaM pratibhAti me |
sphuli~NgAvasthayA vahniredhApexa iva sthitaH || 15||
prathamA \-\- vatsa enaM bAlamR^igendraM mu~ncha | aparaM te krIDanakaM
dAsyAmi |
bAlaH \-\- kutra | dehyetat |
( iti hastaM prasArayati )
rAjAH \-\- kathaM chakravartilaxaNamapyanena dhAryate | tathA hyasya |
pralobhyavastupraNayaprasArito vibhAti jAlagrathitA~NguliH karaH |
alaxyapatrAntaramiddharAgayA navoShasA bhinnamivaikapa~Nkajam.h || 16||
dvitIyA \-\- suvrate na shakya eSha vAchAmAtreNa viramayitum | gachCha
tvam | madIya uTaje mArkaNDeyasyarShikumArasya varNachitrito
mR^ittikAmayUrastiShThati | tamasyopahara |
prathamA \-\- tathA |
( iti niShkrAntA )
bAlaH \-\- anenaiva tAvatkrIDiShyAmi |
( iti tApasIM vilokya hasati )
rAjAH \-\- spR^ihayAmi khalu durlalitAyasmai |
AlaxyadantamukulAnanimittahAsairavyaktavarNaramaNIyavachaHpravR^ittIn |
a~NkAshrayapraNayinastanayAnvahanto dhanyAstada~NgarajasA malinIbhavanti || 
17 || 
tApasI \-\- bhavatu | na mAmayaM gaNayati |
( pArshvamavalokya )
ko.atra R^iShikumArANAm |
( rAjAnamavalokya )
bhadramukha ehi tAvat | mochayAnena durmochahastagraheNa DimbhalIlayA
bAdhyamAnaM bAlamR^igendram | ( \-durmoka\- )
rAjAH \-\- ( upagamya | sasmitam )
ayi bho maharShiputra |
evamAshramaviruddhavR^ittinA saMyamaH kimiti janmatastvayA |
sattvasa.nshraya sukho.api dUShyate kR^iShNasarpashishuneva chandanaH || 18
 || 
tApasI \-\- bhadramukha na khalvayamR^iShikumAraH |
rAjAH \-\- AkArasadR^ishaM cheShTitamevAsya kathayati |
sthAnapratyayAttu vayamevantarkiNaH |
( yathAbhyarthitamanutiShThanbAlasparshamupalabhya | Atmagatam )
anena kasyApi kulA~NkureNa spR^iShTasya gAtreShu sukhaM mamaivam |
kAM nirvR^itiM chetasi tasya kuryAdyasyAyama~NkAtkR^itinaH prarUDhaH || 19
 || 
tApasI \-\- ( ubhau nirvarNya )
AshcharyamAshcharyam |
rAjAH \-\- Arye kimiva |
tApasI \-\- asya bAlakasya te.api saMvAdinyAkR^itiriti vismitA.asmi |
aparichitasyApi te.apratilomaH saMvR^itta iti |
rAjAH \-\- ( bAlakamupalAlayan )
na chenmunikumAro.ayamatha ko sya vyapadeshaH |
tApasI \-\- puruva.nshaH |
rAjAH \-\- ( Atmagatam )
kathamekAnvayo mama | ataH khalu madanukAriNamenamatrabhavatI manyate |
astyetatpauravANAmantyaM kulavratam |
bhavaneShu rasAdhikeShu pUrvaM xitiraxArthamushanti ye nivAsam |
niyataikavratiyatAni pashchAttarumUlAni gR^ihIbhavanti teShAm.h || 20||
( prakAsham )
na punarAtmagatyA mAnuShANAmeSha viShayaH |
tApasI \-\- yathA bhadramukho bhaNati | apsaraHsambandhenAsya jananyatra
devagurostapovane prasUtA |
rAjAH \-\- ( apavArya )
hanta dvitIyamidamAshAjananam |
( prakAsham )
atha sA tatrabhavatI kimAkhyasya rAjarSheH patnI |
tApasI \-\- kastasya dharmadAraparityAgino nAma sa.nkIrtayituM
chintayiShyati |
rAjAH \-\- ( svagatam )
iyaM khalu kathA mAmeva laxyIkaroti | yadi tAvadasya shishormAtaraM
nAmataH pR^ichChAmi | atha vA.anAryaH paradAravyavahAraH |
( praviShya mR^inmayUrahastA )
tApasI \-\- sarvadamana shaku.ntalAvaNyaM prexasva |
bAlaH \-\- ( sadR^iShTixepam )
kutra vA mama mAtA |
ubhe \-\- nAmasAdR^ishyena va~nchito mAtR^ivatsalaH |
dvitIyA \-\- vatsa asya mR^ittikAmayUrasya ramyatvaM pashyeti bhaNito.asi |
rAjAH \-\- ( Atmagatam )
kiM vA shakuntaletyasyA mAturAkhyA | santi punarnAmadheyasAdR^ishyAni |
api nAma mR^igatR^iShNikeva
nAmamAtraprastAvo me viShAdAya kalpate |
bAlaH \-\- mAtaH rochate ma eSha bhadramayUraH |
( iti krIDanakamAdatte )
prathamA \-\- ( vilokya | sodvegam )
aho raxAkaraNDakamasya maNibandhe na dR^ishyate |
rAjAH \-\- alamAvegena | nanvidamasya siMhashAvavimardAtparibhraShTam |
( ityAdAtumichChati )
ubhe \-\- mA khalvetadavalambya katham | gR^ihItamanena |
( iti vismayAduronihitahaste parasparamavalokayataH )
rAjAH \-\- kimarthaM pratiShiddhAH smaH |
prathamA \-\- shR^iNotu mahArAjaH | eShA.aparAjitA nAmauShadhirasya
jAtakarmasamaye bhagavatA mArIchena dattA | etAM kila
mAtApitarAvAtmAnaM cha varjayitvA.aparo bhUmipatitAM na gR^ihNAti |
rAjAH \-\- atha gR^ihNAti |
prathamA \-\- tatastaM sarpo bhUtvA dashati |
rAjAH \-\- bhavatIbhyAM kadAchidasyAH pratyaxIkR^itA vikriyA |
ubhe \-\- anekashaH |
rAjAH \-\- ( saharSham | Atmagatam )
kathamiva sampUrNamapi me manorathaM nAbhinandAmi |
( iti bAlaM pariShvajate )
dvitIyA \-\- suvrate ehi | imaM vR^ittAntaM niyamavyApR^itAyai
shaku.ntalAyai nivedayAvaH |
( iti niShkrAnte )
bAlaH \-\- mu~ncha mAm | yAvanmAtuH sakAshaM gamiShyAmi |
rAjAH \-\- putraka mayA sahaiva mAtaramabhinandiShyasi |
bAlaH \-\- mama khalu tAto duShyantaH | na tvam |
rAjAH \-\- ( sasmitam )
eSha vivAda eva pratyAyayati |
( tataH pravishatyekaveNIdharA shaku.ntalA )
shaku.ntalA \-\- vikArakAle.api prakR^itisthAM sarvadamanasyauShadhiM
shrutvA na me AshA.a.asIdAtmano bhAgadheyeShu | atha vA yathA
sAnumatyA.a.akhyAtaM tathA sambhAvyata etat |
rAjAH \-\- ( shaku.ntalAM vilokya )
aye seyamatrabhavatI shaku.ntalA yaiShA
vasane paridhUsare vasAnA niyamaxAmamukhI dhR^itaikaveNiH |
atiniShkaruNasya shuddhashIlA mama dIrghaM virahavrataM bibharti || 21||
shaku.ntalA \-\- ( pashchAttApavivarNaM rAjAnaM dR^iShTvA )
na khalvAryaputra iva | tataH ka eSha idAnIM kR^itaraxAma~NgalaM
dArakaM me gAtrasa.nsargeNa dUShayati |
bAlaH \-\- ( mAtaramupetya )
mAtaH eSha ko.api puruSho mAM putra ityAli~Ngati |
rAjAH \-\- priye krauryamapi me tvayi prayuktamanukUlapariNAmaM saMvR^ittaM
yadahamidAnIM tvayA pratyabhij~nAtamAtmAnaM pashyAmi |
shaku.ntalA \-\- ( Atmagatam )
hR^idaya samAshvasihi samAshvasihi |
parityaktamatsareNAnukampitAsmi daivena | AryaputraH khalveShaH |
rAjAH \-\- priye |
smR^itibhinnamohatamaso diShTyA pramukhe sthitAsi me sumukhi |
uparAgAnte shashinaH samupagatA rohiNI yogam.h || 22||
shaku.ntalA \-\- jayatu jayatvAryaputraH |
(ityardhokte bAShpakaNThI viramati)
rAjAH \-\- sundari |
bAShpeNa pratiShiddhe.api jayashabde jitaM mayA |
yatte dR^iShTamasa.nskArapATaloShThapuTaM mukham.h || 23||
bAlaH \-\- mAtaH ka eShaH |
shaku.ntalA \-\- vatsa te bhAgadheyAni pR^ichCha |
rAjAH \-\- ( shaku.ntalAyAH pAdayoH praNipatya )
sutanu hR^idayAtpratyAdeshavyalIkamapaitu te
kimapi manasaH sammoho me tadA balavAnabhUt |
prabalatamasAmevamprAyAH shubheShu hi vR^ittayaH
srajamapi shirasyandhaH xiptAM dhunotyahisha~NkayA || 24||
shaku.ntalA \-\- uttiShThatvAryaputraH | nUnaM me sucharitapratibandhakaM
purAkR^itaM teShu divaseShu pariNAmAbhimukhamAsIdyena
sAnukrosho.apyAryaputro mayi virasaH saMvR^ittaH |
( rAjottiShThati )
shaku.ntalA \-\- atha kathamAryaputreNa smR^ito duHkhabhAgyayaM janaH |
rAjAH \-\- uddhR^itaviShAdashalyaH kathayiShyAmi |
mohAnmayA sutanu pUrvamupexitaste
yo baddhabinduradharaM paribAdhamAnaH |
taM tAvadAkuTilapaxmavilagnamadya
bAShpaM pramR^ijya vigatAnushayo bhaveyam.h || 25||
( iti yathoktamanutiShThati )
shaku.ntalA \-\- ( nAmamudrAM dR^iShTvA )
Aryaputra idaM tada~NgulIyakam |
rAjAH \-\- asmAda~NgulIyopalambhAtkhalu smR^itirupalabdhA |
shaku.ntalA \-\- viShamaM kR^itamanena yattadA.a.aryaputrasya pratyayakAle
durlabhamAsIt |
rAjAH \-\- tena hi R^itusamavAyachihnaM pratipadyatAM latA kusumam |
shaku.ntalA \-\- nAsya vishvasimi | Aryaputra evaitaddhArayatu |
( tataH pravishati mAtaliH )
mAtaliH \-\- diShTyA dharmapatnIsamAgamena putramukhadarshanena
chAyuShmAnvardhate |
rAjAH \-\- abhUtsampAditasvAduphalo me manorathaH | mAtale na khalu
vidito.ayamAkhaNDalena vR^ittAntaH syAt |
mAtaliH \-\- ( sasmitam )
kimIshvarANAM paroxam | etvAyuShmAn | bhagavAnmArIchaste darshanaM
vitarati |
rAjAH \-\- shakuntale avalambyatAM putraH | tvAM puraskR^itya bhagavantaM
draShTumichChAmi |
shaku.ntalA \-\- jihremyAryaputreNa saha gurusamIpaM gantum |
rAjAH \-\- apyAcharitavyamabhyudayakAleShu | ehyehi |
( sarve parikrAmanti )
( tataH pravishatyadityA sArdhamAsanastho mArIchaH )
mArIchaH \-\- ( rAjAnamavalokya )
dAxAyaNi |
putrasya te raNashirasyayamagrayAyI
duShyanta ityabhihito bhuvanasya bhartA |
chApena yasya vinivartitakarma jAtaM
tatkoTimatkulishamAbharaNaM maghonaH || 26||
aditiH \-\- sambhAvanIyAnubhAvA.asyAkR^itiH |
mAtaliH \-\- AyuShman etau putraprItipishunena chaxuShA divaukasAM
pitarAvAyuShmantamavalokayataH | tAvupasarpa |
rAjAH \-\- mAtale |
prAhurdvAdashadhA sthitasya munayo yattejasaH kAraNaM
bhartAraM bhuvanatrayasya suShuve yadyaj~nabhAgeshvaram |
yasminnAtmabhavaH paro.api puruShashchakre bhavAyAspadaM
dvandvaM daxamarIchisambhavamidaM tatsraShTurekAntaram.h || 27||
mAtaliH \-\- atha kim |
rAjAH \-\- ( upagamya )
ubhAbhyAmapi vAsavaniyojyo duShyantaH praNamati |
mArIcha \-\- vatsa chiraM jIva | pR^ithivIM pAlaya |
aditiH \-\- vatsa apratiratho bhava |
shaku.ntalA \-\- dArakasahitA vAM pAdavadanaM karomi |
mArIchaH \-\- vatse |
AkhaNDalasamo bhartA jayantapratimaH sutaH |
AshIranyA na te yogyA paulomIsadR^ishI bhava || 28||
aditiH \-\- jAte bharturbahumatA bhava | ayaM cha dIrghAyurvatsaka
ubhayakulanandano bhavatu | upavishata |
( sarve prajApatimabhita upavishanti )
mArIchaH \-\- ( ekaikaM nirdi.nshan )
diShTyA shaku.ntalA sAdhvI sadapatyamidaM bhavAn |
shraddhA vittaM vidhishcheti tritayaM tatsamAgatam.h || 29||
rAjAH \-\- bhagavan | prAgabhipretasiddhiH | pashchAddarshanam |
ato.apUrvaH khalu vo.anugrahaH | kutaH |
udeti pUrvaM kusumaM tataH phalaM ghanodayaH prAktadanantaraM payaH |
nimittanaimittikayorayaM kramastava prasAdasya purastu sampadaH || 30||
mAtaliH \-\- evaM vidhAtAraH prasIdanti |
rAjAH \-\- bhagavan imAmAj~nAkarIM vo gAndharveNa vivAhavidhinopayamya
kasyachitkAlasya bandhubhirAnItAM
smR^itishaithilyAtpratyAdishannaparAddho.asmi tatrabhavato
yuShmatsagotrasya kaNvasya | pashchAda~NgulIyakadarshanAdUDhapUrvAM
tadduhitaramavagato.aham | tachchitramiva me pratibhAti |
yathA gajo neti samaxarUpe tasminnapakrAmati sa.nshayaH syAt |
padAni dR^iShTvA tu bhavetpratItistathAvidho me manaso vikAraH || 31||
mArIchaH \-\- vatsa alamAtmAparAdhasha~NkayA | sammoho.api
tvayyanupapannaH | shrUyatAm |
rAjAH \-\- avahito.asmi |
mArIchaH \-\- yadaivApsarastIrthAvataraNAtpratyaxavaiklavyAM
shaku.ntalAmAdAya menakA dAxAyaNImupagatA tadaiva
dhyAnAdavagato.asmi durvAsasaH shApAdiyaM tapasvinI
sahadharmachAriNItvayA pratyAdiShTA nAnyatheti | sa
chAyama~NgulIyakadarshanAvasAnaH |
rAjAH \-\- ( sochChvAsam )
eSha vachanIyAnmukto.asmi |
shaku.ntalA \-\- ( svagatam )
diShTyA.akAraNapratyAdeshI nAryaputraH | na punaH shaptamAtmAnaM
smarAmi | atha vA prApto mayA sa hi shApo virahashUnyahR^idayayA na
viditaH | ataH sakhIbhyAM sa.ndiShTAsmi bhartura~NgulIyakaM
darshayitavyamiti |
mArIchaH \-\- vatse charitArthAsi | tadidAnIM sahadharmachAriNaM prati
na tvayA manyuH kAryaH | pashya |
shApAdasi pratihatA smR^itirodharUxe
bhartaryapetatamasi prabhutA tavaiva |
ChAyA na mUrChati malopahataprasAde
shuddhe tu darpaNatale sulabhAvakAshA || 32||
rAjAH \-\- yathAha bhagavAn |
mArIchaH \-\- vatsa kachchidabhinanditastvayA
vidhivadasmAbhiranuShThitajAtakarmA putra eSha shAkuntaleyaH |
rAjAH \-\- bhagavan atra khalu me va.nshapratiShThA |
( iti bAlaM hastena gR^ihNAti )
mArIchaH \-\- tathAbhAvinamenaM chakravartinamavagachChatu bhavAn |
pashya |
rathenAnuddhAtastimitagatinA tIrNajaladhiH
purA saptadvIpAM jayati vasudhAmapratirathaH |
ihAyaM sattvAnAM prasabhadamanAtsarvadamanaH
punaryAsyatyAkhyAM bharata iti lokasya bharaNAt.h || 33||
rAjAH \-\- bhagavatA kR^itasa.nskAre sarvamasminvayamAshAsmahe |
aditiH \-\- bhagavan asyA duhitR^imanorathasampatteH kaNvo.api
tAvatchChrutavistAraH kriyatAm | duhitR^ivatsalA menakehaivopacharantI
tiShThati |
shaku.ntalA \-\- ( Atmagatam )
manorathaH khalu me bhaNito bhagavatyA |
mArIchaH \-\- tapaHprabhavAtpratyaxaM sarvameva tatrabhavataH |
rAjAH \-\- ataH khalu mama nAtikruddho muniH |
mArIchaH \-\- tathApyasau priyamasmAbhiH praShTavyaH | kaH ko.atra bhoH |
( pravishya )
shiShyaH \-\- bhagavan ayamasmi |
mArIchaH \-\- gAlava idAnImeva vihAyasA gatvA mama
vachanAttatrabhavate kaNvAya priyamAvedaya yathA putravatI shaku.ntalA
tachChApanivR^ittau smR^itimatA duShyantena pratigR^ihIteti |
shiShyaH \-\- yadAj~nApayati bhagavAn |
( iti niShkrAntaH )
mArIchaH \-\- vatsa tvamapi svApatyadArasahitaH sakhyurAkhaNDalasya
rathamAruhya te rAjadhAnIM pratiShThasva |
rAjAH \-\- yadAj~nApayati bhagavAn |
mArIchaH \-\- api cha |
tava bhavatu biDaujAH prAjyavR^iShTiH prajAsu
tvamapi vitatayaj~no vajriNaM prINayasva |
yugashataparivartAnevamanyonyakR^ityairnayatamu\-
bhayalokAnugrahashlAghanIyaiH || 34||
rAjAH \-\- bhagavan yathAshakti shreyase yatiShye |
mArIchaH \-\- vatsa kiM te bhUyaH priyamupakaromi |
rAjAH \-\- ataH paramapi priyamasti | yadIha bhagavAnpriyaM kartumichChati
tarhIdamastu |
( bharatavAkyam )
pravartatAM prakR^itihitAya pArthivaH
sarasvatI shrutamahatAM mahIyatAm |
mamApi cha xapayatu nIlalohitaH
punarbhavaM parigatashaktirAtmabhUH || 35||
( niShkrAntAH sarve )

( iti saptamo.a~NkaH | )

samAptamidamabhij~nAnashaku.ntalaM nAma nATakam |
##\medskip\hrule\medskip
The AbhijnAnazAkuntalam of KAlidAsa
ed. by M.R. Kale
Bombay 1898 (ninth ed. 1961)

Input by Muneo Tokunaga
Input finished on July 26N 1999.
From Kyoto University's Sanskrit ftp archives at
 ftp://ccftp.kyoto-su.ac.jp/pub/doc/sanskrit/

Proofread by Shrirang Nene snene at lds.com


\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}