% Text title            : Svatmanirupanam
% File name             : svAtmanirUpaNam.itx
% Category              : major\_works, shankarAchArya, advaita
% Location              : doc\_z\_misc\_major\_works
% Transliterated by     : Geoffrey Leroy
% Proofread by          : Geoffrey Leroy, M N Ramanuja
% Latest update         : March 8, 2025
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Svatmanirupanam ..}##
\itxtitle{.. svAtmanirUpaNam ..}##\endtitles ##
shrIgurucharaNadvandvaM vande.ahaM mathitaduHsahadvandvam |
bhrAntigrahopashAntiM pAMsumayaM yasya bhasitamAtanute || 1||
deshikavaraM dayAluM vande.ahaM nihatanikhilasandeham |
yachcharaNadvayamadvayamanubhavamupadishati tatpadasyArtham || 2||
saMsAradAvapAvakasantaptaH sakalasAdhanopetaH |
svAtmanirUpaNanipuNairvAkyaiH shiShyaH prabodhyate guruNA || 3||
asti svayamityasminnarthe kasyAsti saMshayaH puMsaH |
atrApi saMshayashchetsaMshayitA yaH sa eva bhavasi tvam || 4||
nAhamiti vetti yo.asau satyaM brahmaiva vetti nAstIti |
ahamasmIti vijAnanbrahmaivAsau svayaM vijAnAti || 5||
brahma tvameva tasmAnnAhaM brahmeti mohamAtramidam |
mohena bhavati bhedaH kleshAH sarve bhavanti tanmUlAH || 6||
na kleshapa~nchakamidaM bhajate kR^itakoshapa~nchakavivekaH |
ata eva pa~ncha koshAnkushaladhiyaH santataM vichinvanti || 7||
annaprANamanomayavij~nAnAnandapa~nchakoshAnAm |
ekaikAntarabhAjAM bhajati vivekAtprakAshatAmAtmA || 8||
vapuridamannamayAkhyaH kosho nAtmA jaDo ghaTaprAyaH |
prAgutpatteH pashchAttadabhAvasyApi dR^ishyamAnatvAt || 9||
koshaH prANamayo.ayaM vAyuvisheSho vapuShyavachChinnaH |
asya kathamAtmatA syAtkShuttR^iShNAbhyAmupeyuShaH pIDAm || 10||
kurute vapuShyahantAM gehAdau yaH karoti mamatAM cha |
rAgadveShavidheyo nAsAvAtmA manomayaH koshaH || 11||
suptau svayaM vilInA bodhe vyAptA kalevaraM sakalam |
vij~nAnashabdavAchyA chitpratibimbo na buddhirapyAtmA || 12||
suptigataiH sukhaleshairabhimanute yaH sukhI bhavAmIti |
AnandakoshanAmA so.aha~NkAraH kathaM bhavedAtmA || 13||
yaH sphurati bimbabhUtaH sa bhavedAnanda eva sakalAtmA |
prAgUrdhvamapi cha sattvAdavikAritvAdabAdhyamAnatvAt || 14||
annamayAderasmAdaparaM yadi nAnubhUyate ki~nchit |
anubhavitAnnamayAderastItyasminna kashchidapalApaH || 15||
svayamevAnubhavatvAdyadyapyetasya nAnubhAvyatvam |
sakR^idapyabhAvasha~NkA na bhavedbodhasvarUpasattAyAH || 16||
anubhavati vishvamAtmA vishvenAsau na chAnubhUyeta |
na khalu prakAshyate.asau vishvamasheShaM prakAshayanbhAnuH || 17||
tadidaM tAdR^ishamIdR^ishametAvattAvaditi cha yanna bhavet |
brAhma tadityavadheyaM no chedviShayo bhavetparokShaM cha || 18||
idamidamiti pratIte vastuni sarvatra bAdhyamAne.api |
anidamabAdhyaM tattvaM sattvAdetasya na cha parokShatvam || 19||
nAvedyamapi parokShaM bhavati brahma svayamprakAshatvAt |
satyaM j~nAnamanantaM brahmetyetasya lakShaNaM prathate || 20||
sati koshashaktyupAdhau sambhavatastasya jIvateshvarate |
no chettayorabhAvAdvigatavisheShaM vibhAti nijarUpam || 21||
sati sakaladR^ishyabAdhe na kimapyastIti lokasiddhaM chet |
yanna kimapIti siddhaM brahma tadeveti vedataH siddham || 22||
evaM matirahitAnAM tattvamasItyAdivAkyachintanayA |
pratibhAtyeSha parokShavadAtmA pratyakprakAshamAno.api || 23||
tasmAtpadArthashodhanapUrvaM vAkyasya chintayannartham |
deshikadayAprabhAvAdaparokShayati kShaNena chAtmAnam || 24||
dehendriyAdidharmAnAtmanyAropayannabhedena |
kartR^itvAdyabhimAnI bodhaH syAttvampadasya vAchyo.arthaH || 25||
dehasya chendriyANAM sAkShI tebhyo vilakShaNatvena |
pratibhAti yo.avabodhaH prokto.asau tvampadasya lakShyo.arthaH || 26||
vedAvasAnavAchA saMvedyaM sakalajagadupAdAnam |
sarvaj~natAdyupetaM chaitanyaM tatpadasya vAchyo.arthaH || 27||
vividhopAdhivimuktaM vishvAtItaM vishuddhamadvaitam |
akSharamanubhavavedyaM chaitanyaM tatpadasya lakShyo.arthaH || 28||
sAmAnAdhikaraNyaM tadanu visheShaNavisheShyatA cheti |
atha lakShyalakShakatvaM bhavati padArthAtmanAM cha sambandhaH || 29||
ekatra vR^ittirarthe shabdAnAM bhinnavR^ittihetUnAm |
sAmAnAdhikaraNyaM bhavatItyevaM vadanti lAkShaNikAH || 30||
pratyaktvaparokShatve paripUrNatvaM cha sadvitIyatvam |
itaretaraM viruddhaM tata iha bhavitavyameva lakShaNayA || 31||
mAnAntaroparodhAnmukhyArthasyAparigrahe jAte |
mukhyAvinAkR^ite.arthe yA vR^ittiH saiva lakShaNA proktA || 32||
nikhilamapi vAchyamarthaM tyaktvA vR^ittistadanvite.anyArthe |
jahatIti lakShaNA syAdga~NgAyAM ghoShavadiha na grAhyA || 33||
vAchyArthamatyajantyA yasyA vR^itteH pravR^ittiranyArthe |
iyamajahatIti kathitA shoNo dhAvativadatra na grAhyA || 34||
jahadajahatIti sA syAdyA vAchyArthaikadeshamapahAya |
bodhayati chaikadeshaM so.ayaM dvija itivadAshrayedenAm || 35||
so.ayaM dvija iti vAkyaM tyaktvA pratyakparokShadeshAdyam |
dvijamAtralakShakatvAtkathayatyaikyaM padArthayorubhayoH || 36||
tadvattattvamasIti tyaktvA pratyakparokShatAdIni |
chidvastu lakShayitvA bodhayati spaShTamasipadenaikyam || 37||
itthaM bodhitamarthaM mahatA vAkyena darshitaikyena |
ahamityaparokShayatAM vedo vedayati vItashokatvam || 38||
prAyaH pravartakatvaM vidhivachasAM lokavedayordR^iShTam |
siddhaM bodhayato.arthaM kathamiva tadbhavati tattvamasyAdeH || 39||
vidhireva na pravR^ittinta janayatyabhilaShitavastubodho.api |
rAjA yAti suto.abhUditi bodhena pravartate lokaH || 40||
aikyaparaiH shrutivAkyairAtmA shashvatprakAshyamAno.api |
deshikadayAvihInairaparokShayituM na shakyate puruShaiH || 41||
virahitakAmyaniShiddho vihitAnuShThAnanirmalasvAntaH |
bhajati nijameva bodhaM guruNA kimiti tvayA na mantavyam || 42||
karmabhireva na bodhaH prabhavati guruNA vinA dayAnidhinA |
AchAryavAnhi puruSho vedetyarthasya vedasiddhatvAt || 43||
vedo.anAditayA vA yadvA parameshvarapraNItatayA |
bhavati paramaM pramANaM bAdho nAsti svatashcha parato vA || 44||
nApekShate yadanyadyadapekShante.akhilAni mAnAni |
vAkyaM tannigamAnAM mAnaM brahmAdyatIndriyAvagatau || 45||
mAnaM prabodhayantaM bodhaM mAnena ye bubhutsante |
edhobhireva dahanaM dagdhuM vA~nChanti te mahAtmAnaH || 46||
vedo.anAdiramuShya vya~njaka IshaH svayamprakAshAtmA |
tadabhivyaktimudIkShya prokto.asau sUribhiH pramANamiti || 47||
rUpANAmavaloke chakShurivAnyanna kAraNaM dR^iShTam |
tadvadadR^iShTAvagatau vedavadanyo na vedako hetuH || 48||
nigameShu nishchitArthaM tantre kashchidyadi prakAshayati |
tadidamanuvAdamAtraM prAmANyaM tasya sidhyati na ki~nchit || 49||
aMshadvayavati nigame sAdhayati dvaitameva ko.apyaMshaH |
advaitameva vastu pratipAdayati prasiddhamaparoM.ashaH || 50||
advaitameva satyaM tasmindvaitaM na satyamadhyastam |
rajatamiva shuktikAyAM mR^igatR^iShNAyAmivodakasphuraNam || 51||
AropitaM yadi syAdadvaitaM vastvavastuni dvaite |
tadayuktameva yasmAtsatye.adhyAso bhavatyasatyAnAm || 52||
yadyAropaNamubhayostadvyatiriktasya kasyachidabhAvAt |
AropaNaM na shUnye tasmAdadvaitasatyatA grAhyA || 53||
pratyakShAdyanavagataM shrutyA pratipAdanIyamadvaitam |
dvaitaM na pratipAdyaM tasya svata eva lokasiddhatvAt || 54||
advaitaM sukharUpaM duHsahaduHkhaM sadA bhaveddvaitam |
yatra prayojanaM syAtpratipAdayati shrutistadevAsau || 55||
nigamagirA pratipAdyaM vastu yadAnandarUpamadvaitam |
svAbhAvikaM svarUpaM jIvatvaM tasya kechana bruvate || 56||
svAbhAvikaM yadi syAjjIvatvaM tasya vishadavij~napteH |
sakR^idapi na tadvinAshaM gachCheduShNaprakAshavadvahneH || 57||
yadvadayo rasaviddhaM kA~nchanatAM yAti tadvadevAsau |
jIvaH sAdhanashaktyA paratAM yAtIti kechidichChanti || 58||
tadidaM bhavati na yuktaM gatavati tasmiMshchireNa rasavIrye |
pratipadyate praNAshaM haimo varNo.apyayaHsamArUDhaH || 59||
jIvatvamapi tathedaM bahuvidhasukhaduHkhalakShaNopetam |
gatamiva sAdhanashaktyA pratibhAtyeva prayAti na vinAsham || 60||
tasmAtsvato yadi syAjjIvaH satataM sa eva jIvaH syAt |
evaM yadi paramAtmA paramAtmaivAyamiti bhavedyuktam || 61||
yadi vA pareNa sAmyaM jIvashchedbhajati sAdhanabalena |
kAlena tadapi kiyatA nashyatyeveti nishchitaM sakalaiH || 62||
tasmAtparaM svakIyaM dehaM mohAtmakaM cha saMsAram |
svaj~nAnena grasitvA pUrNaH svayameva shiShyate nAnyat || 63||
satyaM j~nAnamanantaM prakR^itaM paramAtmarUpamadvaitam |
avabodhayanti nikhilAH shrutayaH smR^itibhiH samaM samastAbhiH || 64||
advaitabodhakAnAM nikhilAnAM nigamavAkyajAlAnAm |
vAkyAntarANi sakalAnyabhidhIyante.asya sheShabhUtAni || 65||
yasminmihiravadudite timiravadapayAnti kartR^itAdIni |
j~nAnaM virahitabhedaM kathamiva tadbhavati tattvamasyAdeH || 66||
karmaprakaraNaniShThaM j~nAnaM karmA~NgamiShyate prAj~naiH |
bhinnaprakaraNabhAjaH karmA~NgatvaM kathaM bhavejj~napteH || 67||
adhikAriviShayabhedau karmaj~nAnAtmakAvubhau kANDau |
evaM sati kathamanayora~NgA~NgitvaM parasparaM ghaTate || 68||
j~nAnaM karmaNi na syAjj~nAne karmedamapi tathA na syAt |
tatkathamanayorubhayostapanatamovatsamuchchayo ghaTate || 69||
tasmAnmohanivR^ittau j~nAnaM na sahAyamanyadarthayate |
yadvadghanataratimiraprakaraparidhvaMsane sahasrAMshuH || 70||
j~nAnaM tadevamamalaM sAkShI vishvasya bhavati paramAtmA |
sambadhyate na dharmaiH sAkShI taireva sachchidAnandaH || 71||
rajjvAderuragAdyaiH sambandhavadasya dR^ishyasambandhaH |
satatamasa~Ngo.ayamiti shrutirapyamumarthameva sAdhayati || 72||
kartR^i cha karma cha yasya sphurati brahmaiva tanna jAnAti |
yasya na kartR^i na karma sphuTataramayameva vedituM kramate || 73||
kartR^itvAdikametanmAyAshaktyA prapadyate nikhilam |
iti kechidAhureShA bhrAntirbrahmAtirekato nAnyat || 74||
tasminbrahmaNi vidite vishvamasheShaM bhavedidaM viditam |
kAraNamR^idi viditAyAM ghaTakarakAdyA yathAvagamyante || 75||
tadidaM kAraNamekaM vigatavisheShaM vishuddhachidrUpam |
tasmAtsadekarUpAnmAyopahitAdabhUdidaM vishvam || 76||
kAraNamasaditi kechitkathayantyasato bhavenna kAraNatA |
a~NkurajananI shaktiH sati khalu bIje samIkShyate sakalaiH || 77||
kAraNamasaditi kathayanvandhyAputreNa nirvahetkAryam |
kiM cha mR^igatR^iShNikAmbhaH pItvodanyAM mahIyasIM shamayet || 78||
yasmAnna so.ayamasato vAdaH sambhavati shAstrayuktibhyAm |
tasmAtsadeva tattvaM sarveShAM bhavati kAraNaM jagatAm || 79||
jagadAkAratayApi prathate gurushiShyavigrahatayApi |
brahmAkAratayApi pratibhAtIdaM parAtparaM tattvam || 80||
satyaM jagaditi bhAnaM saMsR^itaye syAdapakvachittAnAm |
tasmAdasatyametannikhilaM pratipAdayanti nigamAntAH || 81||
paripakvamAnasAnAM puruShavarANAM purAtanaiH sukR^itaiH |
brahmaivedaM sarvaM jagaditi bhUyaH prabodhayatyeShaH || 82||
anavagatakA~nchanAnAM bhUShaNadhIreva bhUShaNe haime |
evamavivekabhAjAM jagati janAnAM na tAttvikI dhiShaNA || 83||
ahamAlambanasiddhaM kasya parokShaM bhavedidaM brahma |
tadapi vichAravihInairaparokShayituM na shakyate mugdhaiH || 84||
ahamidamiti cha matibhyAM satataM vyavaharati sarvaloko.api |
prathamA pratIchi charamA nivasati vapurindriyAdibAhyArthe || 85||
vapurindriyAdiviShaye yAhambuddhirmahatyasau bhrAntiH |
tadbuddhiratasminnityadhyAsatvena shAsyamAnatvAt || 86||
tasmAdasheShasAkShI paramAtmaivAhamartha ityuchitam |
ajaDavadeva jaDo.ayaM satsambandhAdbhavatyaha~NkAraH || 87||
tasmAtsarvasharIreShvahamahamityeva bhAsate spaShTaH |
yaH pratyayo vishuddhastasya brahmaiva bhavati mukhyo.arthaH || 88||
goshabdArtho gotvaM tadapi vyaktiH pratIyate.arthatayA |
ahamarthaH paramAtmA tadvadbhrAntyA bhavatyaha~NkAraH || 89||
dagdhR^itvAdikamayasaH pAvakasa~Ngena bhAsate yadvat |
tadvachchetanasa~NgAdahami pratibhAnti kartR^itAdIni || 90||
dehendriyAdidR^ishyavyatiriktaM vimalamatulamadvaitam |
ahamartha iti viditvA tadvyatiriktaM na kalpayetki~nchit || 91||
yadvatsukhaduHkhAnAmavayavabhedAdanekatA dehe |
tadvadihAsati bhede.apyanubhavavaividhyamAtmanAmeShAm || 92||
kimidaM kimasya rUpaM kathamidamAsIdamuShya ko hetuH |
iti na kadApi vichintyaM chintyaM mAyeti dhImatA vishvam || 93||
dantini dAruvikAre dAru tirobhavati so.api tatraiva |
jagati tathA paramAtmA paramAtmanyapi jagattirodhatte || 94||
Atmamaye mahati paTe vividhajagachchitramAtmanA likhitam |
svayameva kevalamasau pashyanpramudaM prayAti paramAtmA || 95||
chinmAtramamalamakShayamadvayamAnandamanubhavArUDham |
brahmaivAsti tadanyanna kimapyastIti nishchayo viduShAm || 96||
vyavahArasya dasheyaM vidyAvidyeti bhedaparibhAShA |
nAstyeva tattvadR^iShTA tattvaM brahmaiva nAnyadastyasmAt || 97||
astyanyaditi mataM chettadapi brahmaitadastitArUpam |
vyatiriktamastitAyA nAstitayA shUnyameva tatsiddham || 98||
tattvAvabodhashaktyA susthitayA bAdhitApi sA mAyA |
AdehapAtameShAmAbhAtyAtmAnamapi nijaM viduShAm || 99||
eSha visheSho viduShAM pashyanto.api prapa~nchasaMsAram |
pR^ithagAtmano na ki~nchitpashyeyuH sakalanigamanirNItAt || 100||
kiM chintyaM kimachintyaM kiM kathanIyaM kimapyakathanIyam |
kiM kR^ityaM kimakR^ityaM nikhilaM brahmeti jAnatAM viduShAm || 101||
nikhilaM dR^ishyavisheShaM dR^igrUpatvena pashyatAM viduShAm |
bandho nApi na muktirna parAtmatvaM na chApi jIvatvam || 102||
asakR^idanuchintitAnAmavyAhatataranijopadeshAnAm |
prAmANyaparamasImnAM nigamanamidameva nikhilanigamAnAm || 103||
iti bodhitaH sa guruNA shiShyo hR^iShTaH praNamya taM padayoH |
svAnubhavasiddhamarthaM svayamevAntarvichArayAmAsa || 104||
ajaro.ahamakSharo.ahaM prAj~no.ahaM pratyagAtmabodho.aham |
paramAnandamayo.ahaM paramashivo.ahaM bhavAmi paripUrNaH || 105||
Adyo.ahamAtmabhAjAmAtmAnandAnubhUtirasiko.aham |
AbAlagopamakhilairahamityanubhUyamAnamahimAham || 106||
ihaparasukhavimukho.ahaM nijasukhabodhAnubhUtibharito.aham |
itimatidUrataro.ahaM bhAvetarasukhaniShaktachitto.aham || 107||
Isho.ahamIshvarANAmIrShyAdveShAnuSha~Ngarahito.aham |
IkShaNaviShayamatInAmIpsitapuruShArthasAdhanaparo.aham || 108||
udayo.ahameva jagatAmupaniShadudyAnakR^itavihAro.aham |
udvelashokasAgarabADabamukhahavyavAhanArchiraham || 109||
UrjasvalanijavibhavairUrdhvamadhastiryagashnuvAno.aham |
UhApohavichArairurarIkR^itavatpratIyamAno.aham || 110||
R^iShirahamR^iShyagaNo.ahaM dR^iShTirahaM dR^ishyamAnamahameva |
R^iddhirahaM vR^iddhirahaM tR^iptirahaM tR^iptidIpadIptiraham || 111||
eko.ahametadIdR^ishamevamitisphuritabhedarahito.aham |
eShTavyo.ahamanIhairantaH sukR^itAnubhUtibhUto.aham || 112||
aikyAvabhAsako.ahaM vAkyaparij~nAnapAvanamatInAm |
aishamahameva tattvaM naishatamaHprAyamohamihiro.aham || 113||
ojo.ahamoShadhInAmotaprotAyamAnabhuvano.aham |
o~NkArasArasollasadAtmasukhAmodamattabhR^i~Ngo.aham || 114||
auShadhamahamashubhAnAmaupAdhikadharmajAlarahito.aham |
audAryAtishayo.ahaM vividhachaturvargavitaraNaparo.aham || 115||
a~NkushamahamakhilAnAM mahattayA mattavAraNendrANAm |
ambaramiva vimalo.ahaM shambararipujAtavikR^itirahito.aham || 116||
astavikalpamatInAmaskhaladupadeshagamyamAno.aham |
asthirasukhavimukho.ahaM susthirasukhabodhasampaduchito.aham || 117||
karuNArasabharito.ahaM kabalitakamalAsanAdiloko.aham |
kaluShAkR^itividhuro.ahaM kalmaShasukR^itopaleparahito.aham || 118||
khAnAmagocharo.ahaM khAtIto.ahaM khapuShpabhavago.aham |
khalajanadurAsado.ahaM khaNDaj~nAnApanodanaparo.aham || 119||
galitadvaitakatho.ahaM dehIbhavadakhilamUlahR^idayo.aham |
gantavyo.ahamanIhairgatyAgatirahitapUrNabodho.aham || 120||
ghanataravimohatimiraprakarapradhvaMsabhAnunikaro.aham |
ghaTikAvAsararajanIvatsarayugakalpakAlabhedo.aham || 121||
charadacharadAtmako.ahaM chaturamatishlAghanIyacharito.aham |
chapalajanadurgamo.ahaM cha~nchalabhavajaladhipAradesho.aham || 122||
ChandaHsindhunigUDhaj~nAnasukhAsvAdamodamAno.aham |
ChalapadavihitamatInAM Channo.ahaM shAntimArgagamyo.aham || 123||
jalajAsanAdigocharapa~nchamahAbhUtamUlabhUto.aham |
jagadAnandakaro.ahaM janmajarAmaraNarogarahito.aham || 124||
jha~NkR^itihu~NkR^itishi~njitabR^iMhitamukhavividhanAdabhedo.aham |
jhaTitighaTitAtmavedanadIpaparisphuritahR^idayabhavano.aham || 125||
j~nAnamahaM j~neyamahaM j~nAtAhaM j~nAnasAdhanagaNo.aham |
j~nAtR^ij~nAnaj~neyavinAkR^itamastitvamAtramevAham || 126||
tattvAtItapado.ahaM tanurahamasmIti bhAvarahito.aham |
tAmasaduradhigamo.ahaM tattvampadabodhabodhyahR^idayo.aham || 127||
daivatadaityanishAcharamAnavatirya~NmahIdharAdiraham |
dehendriyarahito.ahaM dakShiNapUrvAdidigvibhAgo.aham || 128||
dharmAdharmamayo.ahaM dharmAdharmAdibandharahito.aham |
dhArmikajanasulabho.ahaM dhanyo.ahaM dhAturAdibhUto.aham || 129||
nAmAdivirahito.ahaM narakasvargApavargarahito.aham |
nAdAntavedito.ahaM nAnAvidhanikhilanigamasAro.aham || 130||
parajIvabhedabAdhakaparamArthaj~nAnashuddhachitto.aham |
prakR^itirahaM vikR^itirahaM pariNatirahamasmi bhAgadheyAnAm || 131||
phaNadharabhUdharavAraNavigrahavidhR^itaprapa~nchasAro.aham |
phAlataloditalochanapAvakaparibhUtapa~nchabANo.aham || 132||
baddho bhavAmi nAhaM bandhAnmuktastathApi naivAham |
bodhyo bhavAmi nAhaM bodho.ahaM naiva bodhako nAham || 133||
bhaktirahaM bhajanamahaM bhuktirahaM bhuktimuktirahameva |
bhUtAnushAsano.ahaM bhUtabhavadbhavyamUlabhUto.aham || 134||
mAnyo.ahamasmi mahatAM mandamatInAmamAnanIyo.aham |
madarAgamAnamohitamAnasadurvAsanAdurApo.aham || 135||
yajanayajamAnayAjakayAgamayo.ahaM yamAdirahito.aham |
yamavaruNayakShavAsavarAkShasamarudIshavahnirUpo.aham || 136||
rakShAvidhAnashikShAvIkShitalIlAvalokamahimAham |
rajanIdivasavirAmasphuradanubhUtipramANasiddho.aham || 137||
lakShaNalakShyamayo.ahaM lAkShaNiko.ahaM layAdirahito.aham |
lAbhAlAbhamayo.ahaM labdhavyAnAmalabhyamAno.aham || 138||
varNAshramarahito.ahaM varNamayo.ahaM vareNyagaNyo.aham |
vAchAmagocharo.ahaM vachasAmarthena gamyamAno.aham || 139||
shamadamavirahitamanasAM shAstrashatairapyagamyamAno.aham |
sharaNamahameva viduShAM shakalIkR^itavividhasaMshayagaNo.aham || 140||
ShaDbhAvavirahito.ahaM ShaDguNarahito.ahamahitarahito.aham |
ShaTkoshavirahito.ahaM ShaT triMshattattvajAlarahito.aham || 141||
saMvitsukhAtmako.ahaM samAdhisa~NkalpakalpavR^ikSho.aham |
saMsAravirahito.ahaM sAkShAtkAro.ahamAtmavidyAyAH || 142||
havyamahaM kavyamahaM heyopAdeyabhAvashUnyo.aham |
harirahamasmi haro.ahaM vidhirahamevAsmi kAraNaM teShAm || 143||
kShAlitakaluShabhayo.ahaM kShapitabhavakleshajAlahR^idayo.aham |
kShAntAdyakSharasughaTitavividhavyavahAramUlamahameva || 144||
bahubhiH kimebhiruktairahamevedaM charAcharaM vishvam |
shIkaraphenatara~NgAH sindhoraparANi na khalu vastUni || 145||
sharaNaM na bhavati jananI na pitA na sutA na sodarA nAnye |
paramaM sharaNamidaM syAchcharaNaM mama mUrdhni deshikanyastam || 146||
Aste deshikacharaNaM niravadhirAste tadIkShaNe karuNA |
Aste kimapi taduktaM kimataH paramasti janmasAphalyam || 147||
kAruNyasArasAndrAH kA~NkShitavaradAnakalpakavisheShAH |
shrIgurucharaNakaTAkShAH shishirAH shamayanti chittasantApam || 148||
kabalitacha~nchalachetogurutaramaNDUkajAtaparitoShA |
shete hR^idayaguhAyAM chirataramekaiva chinmayI bhujagI || 149||
mayi sukhabodhapayodhau mahati brahmANDabudbudasahasram |
mAyAmayena marutA bhUtvA bhUtvA muhustirodhatte || 150||
gurukaruNayaiva nAvA prAktanabhAgyAnukUlamArutayA |
duHsahaduHkhatara~Ngaistu~NgaH saMsArasAgarastIrNaH || 151||
sati tamasi moharUpe vishvamapashyaM tadetadityakhilam |
uditavati bodhabhAnau kimapi na pashyAmi kiM nvidaM chitram || 152||
ityAtmabodhalAbhaM muhuranuchintya pramodamAnena |
prArabdhakarmaNo.ante paraM padaM prApyate hi kaivalyam || 153||
mohAndhakAraharaNaM saMsArodvelasAgarottaraNam |
svAtmanirUpaNametatprakaraNamantarvichintyatAM sadbhiH || 154||

iti shrImatparamahaMsaparivrAjakAchAryasya
shrIgovindabhagavatpUjyapAdashiShyasya
shrImachCha~NkarabhagavataH kR^itau
svAtmanirUpaNaM sampUrNam ||

##
Encoded by Geoffrey Leroy
Proofread by Geoffrey Leroy

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}