% Text title            : Svatmaprakashika
% File name             : svatmaprakashika.itx
% Category              : major\_works, shankarAchArya, advaita
% Location              : doc\_z\_misc\_major\_works
% Author                : Adi Shankaracharya
% Transliterated by     : Sunder Hattangadi
% Proofread by          : Sunder Hattangadi
% Latest update         : Nov. 9, 2009
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Svatmaprakashika ..}##
\itxtitle{.. svAtmaprakAshikA ..}##\endtitles ##
|| shrIH ||
jagatkAraNamaj~nAnamekameva chidanvitam |
eka eva manaH sAkShI jAnAtyevaM jagattrayam || 1||
vivekayuktabuddhyAhaM jAnAmyAtmAnamadvayam |
tathApi bandhamokShAdivyavahAraH pratIyate || 2||
vivarto.api prapa~ncho me satyavadbhAti sarvadA |
iti saMshayapAshena baddho.ahaM Chinddhi saMshayam || 3||
evaM shiShyavachaH shrutvA gururAhottaraM sphuTam |
nAj~nAnaM na cha buddhishcha na jaganna cha sAkShitA || 4||
bandhamokShAdayaH sarve kR^itAH satye.advaye tvayi |
bhAtItyukte jagatsarvaM sadrUpaM brahma tadbhavet || 5||
sarpAdau rajjusatteva brahmasattaiva kevalam |
prapa~nchAdhArarUpeNa vartate tajjaganna hi || 6||
yathekShumabhisaMvyApya sharkarA vartate tathA |
AshcharyabrahmarUpeNa tvaM vyApto.asi jagattrayam || 7||
marubhUmau jalaM sarvaM marubhUmAtrameva tat |
jagattrayamidaM sarvaM chinmAtraM suvichArataH || 8||
brahmAdistambaparyantAH prANinastvayi kalpitAH |
budbudAditara~NgAntA vikArAH sAgare yathA || 9||
tara~NgatvaM dhruvaM sindhurna vA~nChati yathA tathA |
viShayAnandavA~nChA te mahadAnandarUpataH || 10||
piShTaM vyApya guDaM yadvanmAdhuryaM na hi vA~nChati |
pUrNAnando jagadvyApya tadAnandaM na vA~nChati || 11||
dAridryAshA yathA nAsti sampannasya tathA tava |
brahmAnandanimagnasya viShayAshA na sambhavet || 12||
viShaM dR^iShTvAmR^itaM dR^iShTvA viShaM tyajati buddhimAn |
AtmAnamapi dR^iShTvA tvaM tyajAnAtmAnamAdarAt || 13||
ghaTAvabhAsako bhAnurghaTanAshe na nashyati |
dehAvabhAsakaH sAkShI dehanAshe na nashyati || 14||
nirAkAraM jagatsarvaM nirmalaM sachchidAtmakam |
dvaitAbhAvAtkathaM kasmAdbhayaM pUrNasya me vada || 15||
brahmAdikaM jagatsarvaM tvayyAnande prakalpitam |
tvayyeva lInaM jagattvaM kathaM lIyase vada || 16||
na hi prapa~ncho na hi bhUtajAtaM
na chendriyaM prANagaNo na dehaH |
na buddhichittaM na mano na kartA
brahmaiva satyaM paramAtmarUpam || 17||
sarvaM sukhaM viddhi suduHkhanAshA\-
tsarvaM cha sadrUpamasatyanAshAt |
chidrUpameva pratibhAnayuktaM
tasmAdakhaNDaM paramAtmarUpam || 18||
chideva dehastu chideva lokA\-
shchideva bhUtAni chidindriyANi |
kartA chidantaHkaraNaM chideva
chideva satyaM paramArtharUpam || 19||
na me bandho na me muktirna me shAstraM na me guruH |
mAyAmAtravilAso hi mAyAtIto.ahamadvayaH || 20||
rAjyaM karotu vij~nAnI bhikShAmaTatu nirbhayaH |
doShairna lipyate shuddhaH padmapatramivAmbhasA || 21||
puNyAni pApakarmANi svapnagAni na jAgrati |
evaM jAgratpuNyapApakarmANi na hi me prabhoH || 22||
kAyaH karotu karmANi vR^ithA vAguchyatAmiha |
rAjyaM dhyAyatu vA buddhiH pUrNasya mama kA kShatiH || 23||
prANAshcharantu taddharmaiH kAmairvA hanyatAM manaH |
AnandAmR^itapUrNasya mama duHkhaM kathaM bhavet || 24||
AnandAmbudhimagno.asau dehI tatra na dR^ishyate |
lavaNaM jalamadhyasthaM yathA tatra layaM gatam || 25||
indriyANi manaH prANA aha~NkAraH parasparam |
jADyasa~NgatimutsR^ijya magnA mayi chidarNave || 26||
AtmAnama~njasA vedmi tvaj~nAnaM prapalAyitam |
kartR^itvamadya me naShTaM kartavyaM vApi na kvachit || 27||
chidamR^itasukharAshau chittaphenaM vilInaM
kShayamadhigata eva vR^itticha~nchattara~NgaH |
stimitasukhasamudro nirvicheShTaH supUrNaH
kathamiha mama dukhaM sarvadaiko.ahamasmi || 28||
AnandarUpo.ahamakhaNDabodhaH
parAtparo.ahaM ghanachitprakAshaH |
meghA yathA vyoma na cha spR^ishanti
saMsAraduHkhAni na mAM spR^ishanti || 29||
asthimAMsapurIShAntracharmalomasamanvitaH |
annAdaH sthUladehaH syAdato.ahaM shuddhachidghanaH || 30||
sthUladehAshritA ete sthUlAdbhinnasya me na hi |
li~NgaM jaDAtmakaM nAhaM chitsvarUpo.ahamadvayaH || 31||
kShutpipAsAndhyabAdhiryakAmakrodhAdayo.akhilAH |
li~NgadehAshritA hyete naivAli~Ngasya me vibhoH || 32||
anAdyaj~nAnamevAtra kAraNaM dehamuchyate |
nAhaM kAraNadeho.api svaprakAsho nira~njanaH || 33||
jaDatvapriyamodatvadharmAH kAraNadehagAH |
na santi mama nityasya nirvikArasvarUpiNaH || 34||
jIvAdbhinnaH paresho.asti pareshatvaM kutastava |
ityaj~najanasaMvAdo vichAraH kriyate.adhunA || 35||
adhiShThAnaM chidAbhAso buddhiretattrayaM yadA |
aj~nAnAdekavadbhAti jIva ityuchyate tadA || 36||
adhiShThAnaM na jIvaH syAtpratyekaM nirvikArataH |
avastutvAchchidAbhAso nAsti tasya cha jIvatA || 37||
pratyekaM jIvatA nAsti buddherapi jaDatvataH |
jIva AbhAsakUTasthabuddhitrayamato bhavet || 38||
mAyAbhAso vishuddhAtmA trayametanmaheshvaraH |
mAyAbhAso.apyavastutvAtpratyekaM neshvaro bhavet || 39||
pUrNatvAnnirvikAratvAdvishuddhatvAnmaheshvaraH |
jaDatvahetormAyAyAmIshvaratvaM nu durghaTam || 40||
tasmAdetattrayaM mithyA tadartho neshvaro bhavet |
iti jIveshvarau bhAtaH svAj~nAnAnna hi vastutaH || 41||
ghaTAkAshamaThAkAshau mahAkAshe prakalpitau |
evaM mayi chidAkAshe jIveshau parikalpitau || 42||
mAyAtatkAryavilaye neshvaratvaM cha jIvatA |
tataH shuddhachidevAhaM chidvyomanirupAdhitaH || 43||
satyachiddhanamanantamadvayaM
sarvadR^ishyarahitaM nirAmayam |
yatpadaM vimalamadvayaM shivaM
tatsadAhamiti maunamAshraye || 44||
pUrNamadvayamakhaNDachetanaM
vishvabhedakalanAdivarjitam |
advitIyaparasaMvidaMshakaM
tatsadAhamiti maunamAshraye || 45||
janmamR^ityusukhaduHkhavarjitaM
jAtinItikulagotradUragam |
chidvivartajagato.asya kAraNaM
tatsadAhamiti maunamAshraye || 46||
ulUkasya yathA bhAnAvandhakAraH pratIyate |
svaprakAshe parAnande tamo mUDhasya bhAsate || 47||
yathA dR^iShTinirodhArto sUryo nAstIti manyate |
tathAj~nAnAvR^ito dehI brahma nAstIti manyate || 48||
yathAmR^itaM viShAdbhinnaM viShadoShairna lipyate |
na spR^ishAmi jaDAdbhinno jaDadoShAnprakAshayan || 49||
svalpApi dIpakaNikA bahulaM nAshayettamaH |
svalpo.api bodho mahatImavidyAM shamayettathA || 50||
chidrUpatvAnna me jADyaM satyatvAnnAnR^itaM mama |
AnandatvAnna me duHkhamaj~nAnAdbhAti tattrayam || 51||
kAlatraye yathA sarpo rajjau nAsti tathA mayi |
aha~NkArAdi dehAntaM jagannAstyahamadvayaH || 52||
bhAnau tamaHprakAshatvAnnA~NgIkurvanti sajjanAH |
tamastatkAryasAkShIti bhrAntabuddhiraho mayi || 53||
yathA shItaM jalaM vahnisambandhAduShNavadbhavet |
buddhitAdAtmyasambandhAtkartR^itvaM vastuto na hi || 54||
jalabindubhirAkAshaM na siktaM na cha shudhyati |
tathA ga~NgAjalenAyaM na shuddho nityashuddhataH || 55||
vR^ikShotpannaphalairvR^ikSho yathA tR^iptiM na gachChati |
mayyadhyastAnnapAnAdyaistathA tR^iptirna vidyate || 56||
sthANau prakalpitashchoraH sa sthANutvaM na bAdhate |
svasminkalpitajIvashcha svaM bAdhitumashakyate || 57||
aj~nAne buddhivilaye nidrA sA bhaNyate budhaiH |
vilInAj~nAnatatkArye mayi nidrA kathaM bhavet || 58||
buddheH pUrNavikAso.ayaM jAgaraH parikIrtyate |
vikArAdivihInatvAjjAgaro me na vidyate || 59||
sUkShmanADIShu sa~nchAro buddheH svapnaH prajAyate |
sa~nchAradharmarahite svapno nAsti tathA mayi || 60||
paripUrNasya nityasya shuddhasya jyotiSho mama |
AgantukamalAbhAvAtkiM snAnena prayojanam || 61||
deshAbhAvAtkva gantavyaM sthAnAbhAvAtkva vA sthitiH |
pUrNe mayi sthAnadeshau kalpitAvahamadvayaH || 62||
prANasa~nchArasaMshoShAtpipAsA jAyate khalu |
shoShaNAnarhachidrUpe mayyeShA jAyate katham || 63||
nADIShu pIDyamAnAsu vAyvagnibhyAM bhavetkShudhA |
tayoH pIDanahetutvAtsaMvidrUpe kathaM mayi || 64||
sharIrasthitishaithilyaM shvetalomasamanvitam |
jarA bhavati sA nAsti niraMshe mayi sarvage || 65||
yoShitkrIDA sukhasyAntargarvADhyaM yauvanaM kila |
AtmAnande pare pUrNe mayi nAsti hi yauvanam || 66||
mUDhabuddhiparivyAptaM duHkhAnAmAlayaM sadA |
bAlyaM kopanashIlAntaM na me sukhajalAmbudheH || 67||
evaM tattvavichArAbdhau nimagnAnAM sadA nR^iNAm |
paramAdvaitavij~nAnamaparokShaM na saMshayaH || 68||

iti shrImatparamahaMsaparivrAjakAchAryasya
shrIgovindabhagavatpUjyapAdashiShyasya
shrImachCha~NkarabhagavataH kR^itau
svAtmaprakAshikA sampUrNA ||
##


\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}