% Text title            : tattvamImAMsA
% File name             : tattvamImAMsA.itx
% Category              : major\_works
% Location              : doc\_z\_misc\_major\_works
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Source                : sAnkhyasaNgrahaH 1918
% Latest update         : September 15, 2014
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. tattvamImAMsA ..}##
\itxtitle{.. tattvamImAMsA ..}##\endtitles ##

sukhaikaviShayA bhUtAnAM pravR^ittiH | sukhaM cha sati
duHkhahetAvasambhavati | ato bhavati duHkhAbhighAtake jij~nAsA sA
cha tattvaj~nAnAt | atastattvamatra nirUpyate | nanu trividhaM duHkham
AdhyAtmikamAdhidaivikamAdhibhautikaM cha | tatrAdhyAtmikaM dvividhaM shArIraM
mAnasa~ncha | shArIraM vAtapittashleShmaNAM vaiShamyanimittaM mAnasaM
kAmakrodhAdinibandhanam | AdhibhautikaM mAnuShapashupakShyAdinimittam |
AdhidaivikaM yakSharAkShasagrahAdyAveshanibandhanam | teShAM chaiShAM
laukikairevopAyaiH pratIkAraH shakyate | tathA hi shArIrasyauShadhAdibhiH
mAnasasya manoj~nastrIpAnabhojanavastrAla~NkArAdiprAptyA Adhibhautikasya
nItishAstrAbhyAsasusthAnopaveshAdinA Adhidaivikasya maNimantrAdyupayogeneti
sukara upAyaH tattvaj~nAnaM tvanekajanmaraparAbhyAsasAdhyam | tathA cha
laukikAnAmAbhANakaH |
akke chenmadhu vindeta kimarthaM parvataM vrajet |
iShTasyArthasya samprAptau ko vidvAn yatnamAcharet || iti |
akke gR^ihakoNe | maivam | na hyetairupAyaiH sarvameva duHkhaM
nivartate | nivR^ittaM punarnotpadyate | yadyapi shAstrIyamapi
ahorAtramAsavarShAdisAdhyamupAyAntaraM sukaraM shrUyate apAma
somamamR^itA abhUmeti tathApi etadapi laukikopAyatulyameva | tathAhi
somayAgaH pashuvadhAdisAdhanatvAnna visheShataH shuddhaH | akR^ite
hi tadvadhaprAyashchitte svargAdigatyanantaraM paripachyate  eva
tadduHkham | na cha na hiMsyAtsarvAbhUtAnIti sAmAnyashAstrabhya
visheShashAstreNAgnIShomIyaM pashumAlabhetetyanena bAdhaH sha~NkyaH
bhinnaviShayatvena bAdhyabAdhakabhAvAsambhavAt agnIShomIyaM pashumAlabheteti
vAkyena hi vadhasya kratUpakArakatvameva bodhyate na tu puruShapratyavAyAbhAvaH |
evaM svargAderanityatvamapi sattve sati kAryatvAdanumIyate | tathA cha
shrutirapi
na karmaNA na prajayA dhanena
tyAgenaikenAmR^itatvamAnashuH |
pareNa nAkaM nihitaM guhAyAM
vibhrAjate yadyatayo vishanti ||
karmaNA jyotiShTomAdinA prajayA putreNa dhanena devatAj~nAnena
putreNAyaM loko jeyo vidyayA devalokaH karmaNA pitR^iloka iti
shrutyantarAt ebhiH pitrAdilokasyaiva prAptirnAmR^itatvasyeti
bhAvaha | tarhi kathamamR^itatvamityata Aha tyAgeneti |
sarvakarmasaMnyAsasAdhyaj~nAnenetyarthaH | tadamR^itatvaM svarga eva
chettattrAha pareNa nAkamiti | tarhi dUrasthatvAnna prApyamiti chettatrAha
nihitaM guhAyAmiti | tachchAsannatvAtpR^ithak janairapi labhyamiti chettatrAha
yadyataya iti | adUrabhUtamapyavivekinAM dUrabhUtameva | tathA shrutyantaram |
karmaNA mR^ityumR^iShayo niSheduH
prajAvanto dvaviNamIhamAnAH |
tathA.apare R^iShayo ye manIShiNaH
paraM karmabhyo.amR^itatvamAnashuriti ||
apAma somamamR^itA abhUmetyamR^itatvAbhidhAnaM tu chirasthityabhiprAyam |
yadAhuH AbhUtasamplavaM sthAnamamR^itatvaM hi bhAShyate iti |
tadetatsarvamabhipretyoktaM shAstrakR^idbhiH tadbiparItaH shreyAn
vyaktAvyaktaj~navij~nAnAt | asyArthaH | tasmAtsomapAnAderavishuddhAdanityAt
viparIto hiMsAdyasa~NkarAdvishuddha upAyaH shreyAn | sa cha katham
? vyaktasya kAryajAtasya tatkAraNasya avyaktasya pradhAnasya tAbhyAM parasya
tasyAtmanashcha vivekena j~nAnAdbhavati iti | na cha vivekotpannaphalasyApi
kAryatvAdanityatvaM shaMkyam | bhAvarUpakAryasyaivAnityatvAt duHkhadhvaMsasya
tu kAryatve.api nityatvAt |
athAtra shAstre chatasro vidhAH | prakR^itirvikR^itirubhayamanubhaya~ncheti |
tatra jagato mUlakAraNabhUtaM pradhAnaM na vikAraH kintu prakR^itireva
prakarotIti prakR^itiH sattvarajastamasAM sAmyAvasthA | asyAshcha
mUlAntaramanavasthAbhayAnnAstIti mUlaprakR^itirityuchyate | saiva shAstrAntare
avidyA mAyAshabdenochyate | etadevAvyaktaM sattvAdInAM guNAnAM vaiShamye
sati vyaktamityuchyate | yathAhi samudrajale chalitAchalitapradeshAH |
evaM triguNAtmike pradhAne pariNAmavAMstadvidhurashcha pradeshaH | tatra
prakR^itivikAreShu madhye Adyo vikAro mahAnityuchyate sa etadbuddhilakShaNaH |
sa Aha mahAnsAttviko rAjasastAmasashcheti trividhaH | buddhestu prathamo
vikAro.aha~NkAraH | ete cha mahadAdayaH prakR^itayo vikR^itayashcha |
tathAhi mahattattvamaha~NkArasya prakR^itirvikR^itishcha mUlaprakR^iteH |
ayaM hi kramaH prakR^itermahAn mahato.aha~NkAraM aha~NkArAtpa~ncha
tanmAtrAH tAbhyaH pa~ncha bhUtAni tanmAtrANi punaH kShIradadhyorantarAle
kalalapariNAmAtpariNatAni sUkShmabhUtAni kusumasaurabhyena
sUkShmasthUlatayopalakShyamANaM guNavaiShamyameva tanmAtrashabdena
bhUtashabdena chochyate | pa~ncha bhUtAni ekAdashendriyANi cheti eSha
ShoDashako gaNastu vikAra eva na prakR^itiH | puruShastvAtmA na prakR^itirna
vikR^itiH | tadetadAhuH |
mUlaprakR^itiravikR^itirmahadAdyAH prakR^itivikR^itayaH sapta |
ShoDashakastu vikAro na prakR^itirna vikR^itiH puruShaH ||  iti |
atha shAstraparibhAShA | dR^iShTamanumAnamAptavachana~ncheti trividhaM
laukikaM pramANam | ArShaM tu vij~nAnaM yoginAmeveti tadatra noktam | tatra
pR^ithivyAdayaH sukhAdayashchAsmadAdInAM viShayAH | tanmAtralakShaNAstu devAnAM
yoginAM cha viShayA na tvasmadAdInAm teShAM chendriyaiH sambandhaH sannikarShaH |
eva~ncha viShayasambaddhendriyAshrito yo buddhidharmo.adhyavasAyaH sa
eva pramANam | ayaM hi kramaH | viShayasambaddhAnAmindriyANAM vR^ittau
satyAM buddhestu tamobhibhave sati yaH sattvasamudrekaH so.adhyavasAya iti
j~nAnamiti vR^ittishchAkhyAyate | tadidaM pratyakShapramANam | asmAchcha
yashchetanAshakteranugrahastatphalaM pramA bodhaH | buddhisattvaM hi
prAkR^itatvAdachetanamiti tadIyo.adhyavasAyo.apyachetanaH ghaTAdivat |
evaM hi buddhisattvasya pariNAmabhedAH sukhAdayo.apyachetanAH | puruShastu
sukhAdyananuSha~NgI chetanaH | so.ayaM buddhitattvavarttinA j~nAnasukhAdinA
tatpratibimbito buddhisAdR^ishyaprAptyA j~nAnasukhAdimAniva bhavati
chitisAdR^ishyaprAptyA cha achetanApi buddhistadavadhyavasAyashcha chetana
iva bhavati | chArvAkAstu pratyakShAnyat na mAnamiti vadanti | tanmate
saMdigdhaviparyayastu puruShabodhanaM nopapadyeta | nahi puruShAntaragataH
saMshayaH anumAnaM kathanaM vinA vA j~nAtuM shakyaH |
pramANAntarANi tvatraivAntarbhavanti | tathAhi upamAnaM tAvat
gosadR^isho gavaya iti vAkyaM tajjanito bodho shabda evAntarbhavati
chakShuHsaMnikR^iShTasya gavayasya yat gosAdR^ishyaj~nAnaM tatpratyakShameva |
evaM jIvatashchaitrasya gR^ihAsattvena bahiHsattvakalpanamarthApattiH
sApyanumAna evAntarbhavati | vimatashchaitro bahirbhavitumarhati
gR^iheShvavidyamAnatvAt | yadA tvavyApakaH sannekatrAsti tadAnyatra nAsti
yadaikatra nAsti tadAnyatrAstIti vyAptigrahAt | evamiha vaTe yakShaH
prativasati iti aitihyaM na pramANamanirdiShTasvavaktR^ikatvena sandehAt |
Aptoktatvanishchaye tvAgama eva | evamabhAvo nAnupalabdhigamyaH kintu
pratyakSha eva | na hi bhUtalasya kaivalyalakShaNAtpariNAmavisheShAdanyo
ghaTAbhAvo nAma | sarva eva hi bhAvAH pratikShaNaM pariNAminaH sa cha
pariNAmabheda aindriyaka evetyalam |
tatra sUkShmasyAvyaktasyApratyakShatve.api mahadAdikAryeNa
tadanumIyate | tathAhi sadeva kAryaM kAraNavyApArAtprAgapi | asato
hi sattvaM duShkaram nahi nIlaM shilpisahasreNApi pItaM shakyaM
kartum | kintu tileShu pIDanena tailasyeva AvirbhAvamAtramutpattiH
tirobhAva eva vinAshaH | ki~nchAsambaddhasyApi kAryasya janyatve
sambaddhatvAvisheShAtsarvaM kAryaM sarvasmAdbhavediti kAryasambaddhasyaiva
kAraNasya janakatvamupeyam | na cha sadasatoH sambandho.astIti satkAryam |
ki~ncha tantudharmatvAttantUpAdeyatvAchcha na paTasyArthAntaratvam
yannaivaM tannaivaM yathA ghaTapaTau | tathA arthAntarayoH saMyogo vA
bhavati yathA kuMDabadarayoH aprAptirvA bhavati himavadvindhyayoH |
tasmAdyathA kUrmasharIre kUrmA~NgAni nivishamAnAni tirobhavanti na tatra
tAnyutpadyante na vinashyanti vA evamekasmAtsuvarNAdermukuTAdiprAdurbhAva
evotpattiH | eva~ncha mahadAdikAryaM pradhAne.abhinivishate avyaktaM
bhavati iti | kAraNe sattyeva kAryasya vibhAgAvibhAgAbhyAmavyaktaM
kAraNamastIti gamyate | tachchAvyaktaM nityaM vyApakaM cha sarvaM kAryaM
vyApnoti tathA niHkriyaM kvachidapyanAshrita~ncha evaM niravayavaM
svatantraM cha | etadviparItantu vyaktam | evaM vyaktamavyaktaM cha
sukhaduHkhamoharUpaguNatrayAnvitamachetanaM prasavadharmi cha tadviparItaH
puruShaH sukhAdayashcha guNAH sattvarajastamorUpAH | sattvasya prayojanaM
tu prakAshaH rajastu tasya pravartakaM tamastu niyAmakaM yadi hi tamasA
guruNA niyamyeta tadA rajaH laghu sattvaM sarvatra pravarttayet | yathA
sattvaM rajastamasI abhibhUya shAntA vR^ittimadhigachChati yathA cha rajaH
sattvarajasI abhibhUya ghorAM tathA tamaH sattvarajasI abhibhUya mUDhAmiti |
yadyapyete parasparaM virodhashIlAH tathApi yathA vAtapittashleShmANaH
parasparavirodhinaH sharIradhAraNarUpaikakAryakAriNaH evamete.api | evaM
sukhahetutvAtsattvaM sukhAtmakaM duHkhahetutvAdduHkhAtmakaM rajaH yanmohakaM
tattamaH | te cha sukhaduHkhamohAH parasparavirodhinaH svAnurUpANyeva
parasparaM viruddhAni sukhaduHkhamohAtmakAni nimittAni kalpayanti | tathAhi
ekaiva strI svAminaM prati sukharUpasadbhAvAttaM sukhAkaroti sapatnIstu
duHkhAkaroti evamatrApyekasyApi nimittabhedAdbhedaH | sukhaprakAshalAghavaistu
parasparamavirodhAnna nimittabhedAH kalpyante | sargAdau tu pariNAmasvabhAvA
guNAH kShaNamapyapariNamayya na tiShThantIti sattvaM sattvarUpatayA rajo
rajorUpatayA tamastamorUpatayA pravarttate | yathAhi ghanavimuktajalAnAM
jambIrakaravIranArikerAdyAshrayabhedAdasti bhedaH evamekarUpANAmapi guNAnAM
pratiguNAshrayavisheShAdanekarUpatA | AtmA tu vyaktAvyaktasaMghAtabhinnaH |
parArtho hi saMghAto bhavati | yathA shayanAsanAdayaH saMghAtAH
sharIrArthA dR^iShTAH | ki~ncha yathA rathAdi yaMtryAdinAdhiShThitaM
evaM triguNAtmakamapi pareNa kenachidadhiShThIyamAnaM yuktam | sa chAtmA
pratisharIraM bhinnaH na hyekasmin sukhini sarve sukhinaH | sa chAyaM puruShaH
sAkShI cha bhavati prakR^itirhi svaviShayacharitaM puruShAya pradarshayati |
tathAhi loke arthipratyarthinau vivAdaviShayaM sAkShiNe darshayataH | evaM
chAyaM draShTApi bhavati | tathA atraiguNAdasya kaivalyaM cha dharmaH |
Atyantiko hi duHkhatrayAbhAvaH kaivalyam | ata evAtriguNatvAnmadhyastho.api
bhavati sukhI hi sukhe tR^ipyan duHkhI dviShan madhyastho na bhavati |
Ata evobhayarAhityAdudAsIna ityuchyate | evamaprasavadharmitAdakartA.api |
yadyapi chetano.ahaM karomIti kR^itichaitanyayoraikAdhikaraNyaM pratIyate
tathApi puruShapradhAnAdisambandhAtpuruShachaitanyamavyakte guNakartR^itvaM
cha puruShe upacharyate | bhogyaM hi pradhAnaM bhoktAramantareNa na
saMbhavati iti bhavati tasya bhoktrapekShA puruShastu bhogyena pradhAnena
saMyuktastadgataM duHkhamAtmanyabhimanyamAnaH kaivalyaM prArthayate |
tachcha sattvapuruShAnyatAkhyAtinibandhanam na cha sattvapuruShAnyatAkhyAtiH
pradhAnamantareNeti kaivalyArthaM puruShaH pradhAnamapekShata iti tayoH
saMyogaH ata eva saMyogo na mahadAdisargamantareNa bhogAya kaivalyAya cha
paryApta iti saMyoga eva bhogApavargArthaM sargaM karotIti ||
atha vivekaj~nAnopayoginI buddhirnirUpyate | tasyAshcha vyApAro.adhyavasAyaH
tadabhinnaH | eSha buddherlakShaNaM samAnAsamAnajAtIyavyavachChedakatvAt |
tathAhi sarvo.api  vyavahartA.ahamatrAdhikR^ita iti abhimatya
mayA etatkartavyamiti adhyavasyati tatashcha pravartate | tatra
chitisannidhAnAdApannachaitanyAyA buddheryo.ayaM kartavyamiti
vinishayayaH so.adhyavasAyaH | tatra dharmo yAgAdyanuShThAnajanitaH |
j~nAnaM guNapuruShAnyatAkhyAtiH | vairAgyaM rAgAbhAvaH |
evamaishvaryamapi buddhidharmo yato.aNimAdiprAdurbhAvaH | ahamatra
shaktaH matto nAnyo.atrAdhikR^itaH ato.ahamasmi ityAdiko yo.abhimAnaH
so.aha~NkAravyApAratvAdaha~NkAraH | tamupajIvya hi buddhiradhyavasyati
karttavyametanmayeti aha~NkArAchcha dvividhaH sargaH sAttvikAdekAdashendriyANi
tAmasAttu pa~nchatanmAtrAH | rajasastu tatpravartakatvamAtrAtkAraNatvam |
sAttvikarAjasatAmasAha~NkArANAmeva krameNa vaikArikastaijaso bhUtAdiriti
saMj~nAH | chakShuHshrotraghrANarasanatvagAkhyAni buddhIndriyANi |
vAkpANipAdapAyUpasthAni karmendriyANi | mana ubhayAtmakaM
buddhIndriyaM karmendriya~ncha | chakShurAdInAM cha manodhiShThitAnAM
svaviShayeShu pravR^itteH | prathamaM vastudarshanantantaraM
bAlamUkAdivannirvikalpAtmakaM sAmAnyato j~nAnamutpadyate | pashchAchcha
vastudhamairjAtyAdibhiryo.adhyavasAyaH sa sa~NkalpAkhyo manaso
vyApAraH | ekasmAdaha~NkArAdekAdashavidhAni indriyANi bhavantItyatra tu
shabdAdyupabhogasampravartakAdR^iShTabheda eva niyAmakaH | adR^iShTabhedastu
guNapariNAma eva | pa~nchabuddhIndriyANAM sambaddhavastvAlochanaM vR^ittiH
vAgAdikarmendriyANAM tu vachanAdayo vR^ittayaH | evaM mahato.adhyavasAyaH
aha~NkArasyAbhimAnaH sa~Nkalpo manaso vR^ittirvyApAraH | kAryakaraNAbhimukhAnAM
karaNAnAM vR^ittisa~Nkarastu na bhavati | yathAhi parAvaskandAya pravR^ittAH
shAktIkayAShTIkAdayaH svaM svaM shaktyAdikamevAdadate na parasparayaShTyAdikam |
nanu yAShTIkAnAM chetanatvAdastu tathA pravR^ittiH karaNAnAM tvachetanAnAM
pravR^itterayuktatvAttatsvarUpasAmarthyopabhogAbhij~na adhiShThAtA svIkArya
iti chenna tatpravR^ittau puruShArthasya hetutvAt etachchopapAdayiShyati |
karaNAni tu trayodasha | karaNatvaM tu shabdasparshAdiprakAshanaM
karmendriyANAM tu vachanAdivyApAraH | etadbAhyakaraNaM
varttamAnakAlamantaShkaraNaM tu trikAlam | nadIpUrabhedAdabhUdvR^iShTiH
asti dhUmAdihAgniH pipIlikANDasaMcharaNAdbhaviShyati vR^iShTiriti
pratyayAt | ye tu vaisheShikAH kAlamekamatiriktaM svIkurvate |
tanmate.apyatItAnAgatAdivyavahArabhedaH upAdhibhedAdeva bhavati evaM cha
taistairupAdhibhirevAtItAnAgatAdibhedasiddhau kimatiriktakAlasvIkAreNeti
sAMkhyAH | eShAM chendriyANAma pradhAnApradhAnabhAvo.apyasti | yathAhi
grAmAdhyakShA karShakAdibhyaH karamAdAya viShayAdhyakShAya prayachChanti
viShayAdhyakShashcha sarvAdhyakShAya sa cha bhUpataye evaM bAhyendriyANyAlochya
manase samarpayanti manashcha sa~NkalpyAha~NkArAya aha~NkArashchAbhimatya
buddhau sarvAdhyakShAyAmiti | ete cha buddhIndriyamanoha~NkArA
guNavisheShA guNAnAM sattvarajastamasAM vikArAH parasparaM viruddhAM api
puruShArthenaikavAkyatApannAH yathA santamasApanayanena prakAshAya militA
vartitailavahnayaH pradIpo bhavati | nanu kasmAdbuddhau prayachChanti
na punaraha~NkArAya manase veti chenna puruShArthasya prayojakatayA
sAkShAtsAdhanaM pradhAnaM buddhireva aha~NkArAdayastu taM prati gauNAH |
asmadAdibhiH parasparavyAvR^ittAni nAnubhUyante iti shabdAditanmAtrANi
avisheShAH sUkShmANi cha | AkAshAdiShu tu sthUleShu kvachitsattvapradhAnatayA
shAntAH sukhAH prasannA laghavaH kechidrajastamaHpradhAnatayA ghorA mUDhAshcha |
te visheShAH punaH tridhA sUkShmaM sharIraM mAtApitR^ijaM mahAbhUtAni
cha | pradhAnenAdisarge pratipuruShamekaikamutpAditaM tathA.avyAhataM
shilAmapyanupravishati | sargAdAmahApralayamavatiShThate sUkShmaM
sharIraM tachcha mahadaha~NkAraikAdashendriyapa~nchatanmAtrasamudAyaH |
etachcha sharIraM bhogAnarha iti sthUlaM sharIraM ShATkaushikamAshrayati |
lomalohitamAMsAni mAtR^itaH snAyvasthimajjAnaH pitR^ita iti ShaT koshAH |
nanu dharmAdharmanimittaH saMsAraH tasya cha sUkShmasharIre.abhAvAtkathaM
sthUlasharIrAshrayaNamiti chet na dharmAdyanvitabuddhyA saMyogena
tasyApi dharmAdyabhivAsitatvAt yathAhi surabhipuShpAdisambandhAdvastramapi
tadAmodavAsitaM bhavati | dharmAdharmAdinimittakaM cha sthUlasharIragrahaNaM
tayoH saMsargeNa sUkShmasharIraM sthUlasharIramAshritya devo vA manuShyo
vA pashurvA bhavati | yathAhi naTastAM bhUmikAma vidhAya dharmarAjo
vA bhavati vatsarAjo vA bhavati iti | hetustvatra puruShArtha eva |
tatrordhvagamanasya nimittaM dharmaH | evamadharmeNAdhogatiH |
j~nAnena mokSho.aj~nAnena bandhaH | tattvAnabhij~nasya
puruShasya vairAgyamAtrAtprakR^ityAdiShvAtmabudhyopAsyamAneShu
tatraiva layaH rAgAtsaMsAraH aishvaryAdichChAyA avighAtaH
vighAtashchAnaishvaryAt | ayaM buddhisargaH chaturdhA
viparyayAshaktituShTisiddhibhedAt | tatra viparyayo.aj~nAnamavidyA |
viparyayaH pa~nchadhA avidyAsmitArAgadveShAbhiniveshA
yathAsaMkhyaM tamomohamahAmohatAmisrAndhatAmisrasaMj~nAbhedAt |
prakR^ityAdiShvanAtmasvAtmabuddhiravidyA tamaH |
devAdInAmaNidAdyaishvaryeShu shAshvatikatvAbhimAno.asmitA mohaH |
shabdAdiShu viShayeShu rAga AsaktirmahAmohaH | devAdInAmasurAdibhyaH
svaishvaryANimAbhighAtabhayamabhinivesho.andhatAmisraH | ashaktistu
andhatvapa~NgutvAdirUpA karaNavaikalyahetukA | tuShTayo dvedhA AdhyAtmikA
bAhyAshcha prakR^itivyatirikta AtmAstIti nishchitya saMnyAsAdeva tavApavarto
bhaviShyatIti upadeshAdau yA tuShTayastA AdhyAtmikyaH pa~nchaviShayoparamAt
yA tuShTayastA bAhyAH | AtmavidyAnAmadhyayanamananAdayaH siddhibhedAH |
evaM nirUpito buddhisargaH | tanmAtrasargo.api
devamanuShyapashvAdibhedAdbahudhA | tatrordhAdhomadhyalokAH
sattvarajotamobahulAH | nanu sukhaduHkhAdayaH prAkR^itA buddhiguNAH
kathaM chetane bhavantIti chetsatyam puri li~Nge sherate sa puruShaH |
evaM cha li~NgapuruShayoH sambandhAlli~NgadharmAnAtmanyadhyavasyati |
ayaM cha mahadAdi pR^ithivyAdimahAbhUtAntaH sargaH prakR^ityaiva
kR^itaH | niShkAraNatve tu sadaiva syAnnaiva vA syAt | Ishvarastu
na tatropAdAnaM chitishakterapariNAmAt | nApi IshvarAdhiShThitAyA
prakR^iteH kartR^itvaM nirvyApArasyAdhShThAtR^itvAsambhavAt | nahi
nirvyApArastakShAvAsyAdyadhitiShThati | nanu prakR^iteH kartR^itve
tasyA nityatvenAnuparamAtkadApi mokSho na syAditi chenna | yathA hi
odanakAmaH pakvaudano na pravartate punastatra evaM yaM yaM puruShaM
prakR^itirmochitavatI na taM prati punaH pravartate | nanvachetanAyAM
prakR^itau kathaM chetanadharmaH pravR^ittiH tasmAdasti prakR^iteradhiShThAtA
chetanaH AtmAnastu prakR^itisvarUpAnabhij~natvAnnAdhiShThAtumarhanti tasmAdasti
sarvArthadarshI prakR^iteradhiShThAtA sa cheshvara eveti chetsatyam yathAhi
vatvavivR^iddhyarthamachetanamapi kShIraM pravartate  tathA prakR^itirapi
puruShamokShAya pravartiShyate | na cheshvarAdhiShThAnatvena kShIre
pravR^ittiH sha~NkayA | dvidhA hi pravR^ittirbhavati svArthAya kAruNyAya
vA | na chAptasakalakAmasyeshvarasya kimapi prArthanIyamasti sargAtprAk
duHkhAbhAvena karuNAyA asaMbhavAt | ki~ncha karuNayA prerita IshvaraH sukhina
eva sarvAn prANinaH sR^ijet na vichitrAn | prakR^itestvachetanatayA nedaM
dvayaM kintu parArthaiva pravR^ittiH yathA pAriShadAnpradarshayannivartate
naTaH evaM prakR^itiH AtmAnaM shabdAdyAtmanA puruShAdbhedena prakAshya
nivartate |
phalAbhAve.api nirguNe upakAriNyapi puruShe prakR^itistapasvinI
pravartate eva yathAhi guNavAnupakAryapi bhR^ityo nirguNe upakAriNyapi
svAmini niShphalArAdhanaH | yadyapi nATyAnnivR^itto.api naTaH kAlAntare
punarapi pravartate evaM muktaM prati prakR^itistu na punaH pravartate
yathAhi vigalitavasanA kulavadhUH kadAchitkenachiddR^iShTA chettadAsau
tathA yatate yathA na puruShAntarANi pashyanti evaM prakR^itirapi
vivekena sAkShAtkR^itA.atilajjAvashAtpunaH svAtmAnaM na pradarshayati |
nanu savAsanakleshakarmAshayAnAM bandhanasaMj~nitAnAmapyapariNAmini
puruShe.asambhavAtkathaM mokShaH mucherbandhanavishleShArthatvAt |
ata eva na saMsAro.api sambhavati niShkriyatvAt | maivam |
yathAhi bhR^ityagatau jayaparAjayau svAminyupacharyete evaM
prakR^itigatayorapi bhogApavargayorvivekAgrahAtpuruShe upachAraH |
tatra dharmAdharmAj~nAnavairAgyAvairAgyaishvaryAnaishvaryarUpaiH
saptabhirbhAvairbadhnAti tattvaj~nAnena tu mochayati | evaM cha
kR^itAdasmAttattvAbhyAsAnnAsmi na me nAhamiti shuddhamutpadyate j~nAnaM
yadviShayo abhyAsastaM sAkShAtkArayatIti | nAsmItyanena kriyAmAtranniShidhyate
asteH kriyArthatvAt | nAhamityanena kartR^itvaM na me ityanena svAmitvaM
niShidhyate | bhogavivekasAkShAtkArau prakR^iteH prasotavyau tau cha
prasUtAviti nivR^ittA prakR^itistAM niShkriyaH svachChapuruShaH pashyati
prakR^itipuruShayorasaMsarge.apyavivekakhyAtinibandhanaH saMsAraH punarna
bhavati iti | ante tattvaj~nAnasya tadAnImeva sharIrapAtastu na bhavati |
yathAhi nivR^itte kulAlavyApAre saMskAravashAt chakraM bhramattiShThati
evaM saMskAravashAt sharIramapi sharIrapAtAnantaraM tu pradhAnasya
nivR^ittatvAdAtyantikamapi duHkhaM nashyati duHkhAbhAvarUpaM kaivalyamApnoti ||

iti shrImaddevIdattAtmajagamasevakasUnvAchAryakR^iShNamitrakR^itA tattvamImAMsA
samAptA ||
##
Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}