% Text title            : Upadeshasarabhashyam
% File name             : upadeshasArabhAShyam.itx
% Category              : major\_works, gaNapati-muni, bhAShya
% Location              : doc\_z\_misc\_major\_works
% Author                : Vasishtha Ganapati Muni's Sanskrit Commentary on Ramana Maharshi's Upadeshasaram
% Proofread by          : Sunder Hattangadi
% Description-comments  : The Collected Works of Vasishtha Kavyakantha Ganapati Muni Vol 07-31
% Latest update         : July 24, 2013
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. UpadeshasaraBhashyam ..}##
\itxtitle{.. upadeshasArabhAShyam ..}##\endtitles ##

               || shrIH ||
atha ramaNasya bhagavato maharSherupadeshasAraM vyAkhyAsyAmaH |
tasyAyamAdimaH shloko bhavati ||

         karturAj~nayA prApyate phalam |
         karma kiM paraM karma tajjaDam || 1||

mImAMsakAbhimataM phalapradatve karmaNaH prAdhAnyaM khaNDayitumayamArambhaH |
phalaM karturIshvarasya Aj~nayA prApyate | karma paraM kim |
netyarthaH | tatkarma jaDaM bhavati |
karmaNaH paratvAbhAvAya jaDatvamatra hetutvenopanyastam |
karma yasmAjjaDaM tasmAnna paramiti yAvat |

nanu, na vayaM karmaNaH paratvamuddishya vivadAmaH | phalapradatve karmaNaH
prAdhAnyamityevAsmAkaM vAdaH | mAstu paraM karma | tathA.api svajanyApUrvadvArA
phalapradaM bhavet | evaM hi pramANabhUtAni vaidikavAkyAni sa~NgachCheranniti
chet |

na | jyotiShTomAdInAM svargasAdhakatvAdibodhayatAM vAkyAnAM parameshvarasya
shubhAshubhaphalapradatve karmasApekShatvokterapi samanvetuM shakyatvAt | api
cha shubhAshubhaphalapradatvaM cha sarveShAM jaganniyAmakatvAnnAtirichyate |
tajjaganniyAmakaM tadeva paraM syAt | ata eva karmavAdino daivashabdena
tajjanyApUrvaM vadanti | maharShishcha karma kiM paramityatra tadapUrvamevoddishati,
vyavahAreShu karmApUrvayoravibhakttvAt | tasmAnna vayaM karma paraM vadAma iti
pUrvapakShiNA vaktumashakyam | ayaM bhAvaH | mImAMsakakalpitamapUrvaM
jaDatvAnna param | na cha shubhAshubhAni phalAni svatantratayA dAtumIShTe |
gauravaM cha bhavati tasya kalpana Ishvarasyaiva sApekShasya karmaphaladAtR^itve
pramANavAkyAnAmabAdhAt |

         kR^itimahodadhau patanakAraNam |
         phalamashAshvataM gatinirodhakam || 2||

phalaM karmaphalaM ashAshvataM sat, bhogenAvakShINamanushayamAtrasheShamiti yAvat |
kR^itimahodadhau karmamahAsamudre patanakAraNaM bhavatIti sheShaH | yadi phalaM
shAshvataM syAt tarhi punarAvR^ittirna syAt | phalasyAshAshvatatvAdeva
sheShAnushayavashAtpunarAvR^ittisambhava iti bhAvaH | ata eva gatinirodhakam |
gateH punarAvR^ittirahitAyAH paradhAmagaternirodhakaM pratibandhakaM bhavatIti
sheShaH | atrAshAshvataM phalameva patanakAraNamuktaM bhagavatA, na karma,
tasmAtsakAmakarmaiva dUShayati bhagavAnityavagantavyam |

         IshvarArpitaM nechChayA kR^itam |
         chittashodhakaM muktisAdhakam || 3||

IshvarArpitaM IshvarAya vishvAdhyakShAya arpitaM tvamevAsya karmaNaH phalaM yatheShTaM
jagataH kArye vini~NkShveti samarpitam | nechChayA anichChayA, na~no na
lopAbhAvo naikAdivat | kR^itaM karma chittashodhakaM chittasya manasaH shodhakaM
shuddhikAri | muktisAdhakaM mukteH saMsArabandhAdvimokShasya sAdhakaM cha
bhavati | manasi shuddhe hi mokShaH sulabhaH |

         kAyavA~NmanaH kAryamuttamam |
         pUjanaM japashchintanaM kramAt || 4||

tadeva karma vibhajate | kAyavA~NmanaH kAryaM pUjanaM japashchintanaM cha,
kAyakAryaM pUjanaM vAkkAryaM japaH manaH kAryaM chintanaM cheti kramAdanvayo
bodhyaH | tadidaM trayaM kramAduttamam | pUjanaM prathamaM karma | tata uttamaM
japAkhyaM karma | tata uttamaM dhyAnamiti yAvat | atra stotrasya jape
sa~Ngraho j~neyaH |

         jagata IshadhIyuktasevanam |
         aShTamUrtibhR^iddevapUjanam || 5||

pUrvashloke pUjanashabdena sAmAnyato vigrahArAdhanamabhihitam | tasyAvaratvena
kIrtanAdetadavagamyate | adhunA pUjAprasa~Ngena sarvakarmotkR^iShTaM vishiShTaM
pUjanamekamabhidadhAti | jagataH prapa~nchasya IshadhIyuktasevanaM Ishvara evedaM
jagaditi dhiyA yuktaM sevanam | sarvaM khalvidaM brahna tajjalAniti shAnta
upAsIte | shANDilyavidyoktamupAsanamiti yAvat | aShTamUrtibhR^iddevapUjanaM
bhavati | pa~nchamahAbhUtAni sUryAchandramasau jIvashcheshvarasyAShTau mUrtivisheShA
uchyante | tAbhishcha mUrtibhiH sarvaM jagadAkrAntamiti hetorvishvasyeshvara\-
dhiyopAsanamaShTamUrtyupAsanaM bhavatIti bhAvaH | idaM tu pUrNaM pUjanam | nAsya
pUrvashlokoktapUjane sa~NgrahaH | tasya sarvAvaratvAdasya sarvottamatvAt |
dhyAna evAsya sa~Ngraho bhavati | dhiya evaikarUpAyA atra prAdhAnyAt |
sAmAnyataH pUjanaM tu shivamUrtiShvanyatamasyAH pR^ithivyAH svalpaikadeshasya
bhavati | kAyaniShpAdyaM cha bhavati | idaM tu sarvAsAM mUrtinAM sAkalyena
buddhiniShpAdyamityanayorasti bhUyAnvisheShaH |

         uttamastavAduchchamandataH |
         chittajaM japadhyAnamuttamam || 6||

uttamastavAtsatyAdvaidikAttR^ishAdArShAdvA.anyasmAt | uchchamandataH
uchchAnmandAdupAMshoshcha prakaraNAjjapAditi sheShaH | chittajaM mAnasikaM japa\-
dhyAnaM japa eva dhyAnamityatra samAsaH | na japo dhyAnaM cha tayoH samAhAra
iti | dhyAnasya mAnasikajapAdavyatirekAt | uttamaM bhavati |
stotravAchakopAMshujapebhyo dhyAnaM shreShThamiti bhAvaH | AdyeShvapi triShu yathottaraM
shraiShThyamUhyam |

         AjyadhArayA srotasA samam |
         saralachintanaM viralataH param || 7||

AjyadhArayA ghR^itadhArayA srotasA nadIpravAhena cha samam, saralachintanaM
saralaM nityaM sahajaM niryachchintanaM dhyAnaM viralataH madhye madhye vichChinnAt
paraM shreShTham | uttame dhyAne.api sachChedAdavichChedaM shasyata iti yAvat |
dhyAne bhaktirUpasnehasambandhaM sUchayitumAjyadhAraupamyam | nairmalyaM sUchayituM
pravAhaupamyam |

         bhedabhAvanAtso.ahamityasau |
         bhAvanA.abhidA pAvanI matA || 8||

bhUyo dhyAne visheShAntaramAha bhedabhAvanAt dhyAne dhyAtuH svasmAdIshvaraM
bhinnaM kalpayitvA yadbhAvanaM kriyate tasmAt so.ahamityasau Ishvara
evAhamityAkArakA abhidA bhedarahitA bhAvanA pAvanI pavitra matA |
bhedena dhyAnAdabhedena dhyAnamuttamamiti bhAvaH |

         bhAvashUnyasadbhAvasusthitiH |
         bhAvanAbalAdbhaktiruttamA || 9||

bhAvanAbalAt abhedabhAvanAbalAdityeva sAmarthyAt | bhAvashUnyasadbhAva\-
susthitiH bhAvashUnyA sa~NkalpashUnyA sadbhAvena sattayA susthitirniShThA
uttamA bhaktirbhavati | bhinnabhAvanAyAM yA bhaktiH sA tvavareti parisheShanyAyAt
sidhyati ||

         hR^itsthale manaH svasthatA kriyA |
         bhaktiyogabodhAshcha nishchitam || 10||

hR^itsthale AtmanaH sthAne manaHsvasthatA manasaH svasthAnasthitatA |
kriyA karma bhavati | bhaktiyogabodhAshcha bhaktiryogo bodhashcha bhavati |
nishchitam, na kashchitsaMshaya ityarthaH | manasaH svajanisthAne hR^idaye.avatIrya
niShThaiva karma paryavasannaM sarvakarmamaulibhUtam | saiva bhaktiH paryavasannA
sarvabhaktimaulibhUtA | saiva yogaH paryavasannaH sarvayogamaulibhUtaH | saiva
j~nAnaM paryavasannamiti yAvat |

         vAyurodhanAllIyate manaH |
         jAlapakShivadrodhasAdhanam || 11||

vAyurodhanAt vAyoH prANasya rodhanAt pratiShTambhanAnniyamanAdvA manaH
jAlapakShivat lIyate Atmani nishchalaM ruddhaM bhavati | idaM rodhasAdhanam |
pUrvavAkyArthasya kartR^itvAdidamiti tasyAkShepaH | haThena kumbhakasya sAdhanaM
pratiShTambhanaM prANasya bhavati | satataM yAtAyAtapratyavekShaNAnniyamanaM bhavati |
tasyApi kumbhakasaMj~nA rAjayoginAM matenAviruddhA | uttaraiva maharSheriShTA
prakriyA yadayamAha gItAsu (ramaNagItAsu) \' prANarodhashcha manasA prANasya
pratyavekShaNam | kumbhakaM sidhyati hyevaM satatapratyavekShaNAt \' iti |

         chittavAyavashchitkriyAyutAH |
         shAkhayordvayI shaktimUlakA || 12||

chitkriyAyutAH krameNa chitA kriyayA cha yutAH chittavAyavaH chittAni manAMsi
vAyavaH prANashcha chidyutAni chittAni kriyAyutAH prANAshcheti yAvat |
shaktimUlakA shaktirIshvarashaktirmUlaM yasyAstAdR^ishI shAkhayordvayI bhavati |
Adishakterj~nAnashaktishAkhA chittAni | kriyAshaktishAkhA prANA iti
tAtparyam | janabahutvApekShayA chittaprANayorbahuvachanena nirdeshaH | ayaM
bhAvaH | yato mano vAyushcha shAkhAdvayamIshvarashakteH, tasmAttadubhayaM cha
tadadhigamAya mArgIbhavitumarhati |

         layavinAshane ubhayarodhane |
         layagataM punarbhavati no mR^itam || 13||

layo vinAshanaM cha layavinAshane, ubhayarodhane ubhayavidharodhane bhavataH |
madhyamapadalopasamAsaH | layagataM mana ityadhyAhAraH | punarbhavati jAyate |
mR^itaM vinaShTaM no na jAyate | vR^ittimAtropasaMhAro layaH | tadvato yogina
utthAnaM samAdhishcha paryAyeNa bhavataH | vR^ittimUlAha~NkAropasaMhAro vinAshanam |
tadvato j~nAnino nityaH samAdhirbhavati |

         prANabandhanAllInamAnasam |
         ekachintanAnnAshametyadaH || 14||

vAyurodhanAditi shlokoktAtprANabandhanAt prANapratiShTambhanAt prANa\-
niyamanAdvA lInamAnasaM lInaM manaH adaH ekachintanAdAtmaikyAnu\-
sandhAnAnnAshameti | prANarodho manaso layahetureva bhavati na vinAshana\-
hetuH | lIne manasyaikyAnusandhAnaM manonAshanAyetyarthaH |

         naShTamAnasotkR^iShTayoginaH |
         kR^ityamasti kiM svasthitiM yataH || 15||

svasthitimAtmaniShThAm, yataH prAptasya naShTamAnasotkR^iShTayoginaH kR^ityaM
kimasti | naShTe manasi na ki~nchitkartavyaM shiShyata iti bhAvaH |

         dR^ishyavAritaM chittamAtmanaH |
         chittvadarshanaM tattvadarshanam || 16||

dR^ishyavAritaM dR^ishyebhyo vAritaM parAvR^ittamantarmukhamiti yAvat | chittaM
AtmanashchittvadarshanaM bhavati | vyatirekato viShayebhyaH parAvR^ittameva
chittamanvayata AtmachittvadarshanaM bhavatItyakSharArthaH | chittasya
bahirmukhatvAbhAve nidrA.abhAve chAntarmukhaM tadAtmachittvadarshanarUpameva
paryavasyet | athA.a.aha yadAtmanashchittvadarshanaM tadeva tattvadarshanam |

         mAnasaM tu kiM mArgaNe kR^ite |
         naiva mAnasaM mArga ArjavAt || 17||

mAnasaM tu kiM kiM svarUpa iti mArgaNe vichAraNe kR^ite mAnasaM naiva na
parishiShyata iti bhAvaH | vichArayitA svayameva hi mAnasasya svarUpam |
svarashmivisheShatvAnmAnasasya | vichAraNasamaye sa cha rashmirAtmanyupasaMhR^ito
bhavatIti tadA naiva mAnasamityupadishati bhagavAn | ayamevArjavAnmArgaH |

         vR^ittayastvahaM vR^ittimAshritAH |
         vR^ittayo mano viddhyahaM manaH || 18||

vR^ittayastu ahaM vR^ittiM ahamityAkArakaM sa~NklpaM AshritA tanmUlakAH
tatprakR^itikA ityarthaH | vR^ittaya eva manaH saMsR^itau vijR^imbhaNakAle |
tasmAnmano.ahaM viddhi | yasmAdahaMvR^ittimAshritAH sarvA vR^ittayastasmAttadrUpaM
manastatprakR^itibhUtA.ahaMvR^ittirUpaM paryavasyatIti tAtparyam |

         ahamayaM kuto bhavati chinvataH |
         ayi patatyahaM nijavichAraNam || 19||

ayamahaM aha~NkAraH ahaMvR^ittirUpaH kuto bhavati iti chinvataH mArgayataH
vichArayataH, ahaM so.aha~NkAraH, patati nAshameti | idameva
nijavichAraNamAtmavichAraNam | ayIti shiShyasambodhanam | atrApi
vAkyArthasya kartR^itvAdidamityAkShipyate |

         ahami nAshabhAjyahamahaMtayA |
         sphurati hR^itsvayaM paramapUrNasat || 20||

ahami manomUlavR^ittirUpe nAshabhAji sati paramapUrNasat paramamakhaNDaM
sachcha hR^it svarUpaM svayaM ahamahaMtayA ahamahamiti dhiyA sphurati bhAsate |
nanvahami nAshaM prApte kutaH punaranyasyAhamaH sambhava | uchyate | ahantA
vyaktitvAnnAtirichyate | tanmanogatamAtmagataM cha dvividhaM bhavati |
manogate.ahaMbhAve nAtmanyahaMbhAvaH | taduparama Atmano vyaktitvaM bhAseta |
tasmAduktamekasminnahami nAshaM gate.anyadahaMtayA sphuratIti |

         idamahaMpadAbhikhyamanvaham |
         ahami lInake.apyalayasattayA || 21||

idaM hR^it ahaMpadAbhikhyaM ahaM padamabhikhyA yasyeti | ahamiti padaM
manasi gauNamAtmani mukhyamiti bhAvaH | hetumAha | anvahaM ahami
lInake.api manomayAha~NkAre naShTe.api alayasattayA anaShTasadbhAvena |
ayaM bhAvaH | yo.ahaMpadArthaH sa Atmeti pAmaro.apya~NgIkuryAt | aha~NkAre
shAnte nAtmA shAnto dR^ishyate | sphuratyevAhamiti | manastu shAntaM bhavati |
evamanvayavyatirekAbhyAmahaMpadaM manasi gauNamAtmani mukhyamiti siddham |
kathaM gauNaM kathaM mukhyam | manaso.aha~NkArasambandhAttatra gauNam |
AtmanyahantAyAH sattArUpeNa nityaM bhAnAttatra mukhyam |

         vigrahendriyaprANadhItamaH |
         nAhamekasattajjaDaM hyasat || 22||

ekasat ekasadrUpaH ahaM vigrahendriyaprANadhItamo na, dehendriyaprANabuddhi\-
rUpaM timiraM na | kAraNamAha | hi yasmAtkAraNAt tadvigrahAdi jaDaM
asachcha | yajjaDaM tatkathamAtmA | yannAsti tatkathamAtmA |

         sattvabhAsikA chitkva vetarA |
         sattayA hi chichchittayA hyaham || 23||

sadvastu kena bhAsata ityAsha~Nkya pariharati | sattvabhAsikA itarA chit
kva vA | netyarthaH | sattAM bhAsayitumanyasyAshchito nAvasara iti yAvat |
kAraNamAha | hi yasmAt sattayA chidbhavati yatsattadeva
svabhAvatashchinmayam ityarthaH | hi yasmAchcha kAraNAt ahaM chittayA bhavAmi |
yA chitsaiva svabhAvato.ahaMpadArtha ityarthaH | sattAchittAhantAnAM trikaM
svabhAvataH samAnAdhikaraNamiti yAvat | chidrashmisanbandhAnmanasyahantA
gauNIti prAgevAveditam |

         IshajIvayorveShadhIbhidA |
         satsvabhAvato vastu kevalam || 24||

IshajIvayoH veShadhIbhidA bhavati | veShato bhedashchANDapiNDopAdhikR^itaH |
dhIto bhedaH sarvaj~natvAlpaj~natvAbhyAm | evamapi vastu kevalamekameva |
kutaH | satsvabhAvataH sattArUpadharmAnvayAt | atra kAlatraye.api sadeva
sachChabdenochyate | anyathA dR^ishyAnAM cha vinashvarANAM bhAnakAlikasattAm
Ashritya satsvabhAvaprasaktiH syAt |

         veShahAnataH svAtmadarshanam |
         IshadarshanaM svAtmarUpataH || 25||

veShahAnataH piNDopAdhisambandhabhAvanAnAshanAt svAtmadarshanaM bhavati |
aparokSha AtmAnubhavaH syAdityarthaH | astu svAtmadarshanaM kathamIshadarshanaM
syAditi chedatrAha | svAtmarUpataH Isha eva svAtmano rUpamiti
hetostadeveshadarshanam | shuddhasvAtmadarshanAdIshadarshanaM nAparamastIti
tAtparyam | veShahInasyAtmano.aparichChinnatvAnna tadanubhavaH parichChinnaH,
api tu pUrNa eveti |

         AtmasaMsthitiH svAtmadarshanam |
         AtmanirdvayAdAtmaniShThatA || 26||

darshanamiti pUrvashlokoktapadena bhUyastripuTIsambhavamAsha~Nkya pariharati |
AtmasaMsthitirAtmaniShThaivAtmadarshanam | na tatra tripuTyA avasaraH | sA
chAtmaniShThatA AtmanirdvayAdbhavati | Atmani~NkShaShThatAyAM dvaitasamparko
leshato.api na vartitavyaH | yadi dvaitaM bhAseta tatra tanmayaniShThA kathaM
syAditi tAtparyam |

         j~nAnavarjitA.aj~nAnahInachit |
         j~nAnamasti kiM j~nAtumantaram || 27||

j~nAnavarjitA aj~nAnahInA cha chit j~nAnaM bhavati | nanu j~nAne j~nAnavarjitatvaM
kathamiti chetkAraNamAha | j~nAtuM yat ki~nchidinyadvedituM antaraM bhedaH
asti kim | nAstIti bhAvaH | tatra sthitau bhedAbhAvAttadAshritaloka\-
prasiddhaj~nAnAbhAvaH | evamapi sA sthitirj~nAnamayyeva pUrNAnubhUtirUpa\-
tvAt |

         kiM svarUpamityAtmadarshane |
         avyayAbhavApUrNachitsukham || 28||

kiM svarUpaM kiM me rUpamiti vichAraNavidhayA Atmadarshane sati,
AtmaniShThAyAM siddhAyAM, avyayaM nAsharahitaM abhavamakR^itrimaM sahajamiti
yAvat | ApUrNamAsamantAtpUrNaM chitsukhaM sampadyata iti sheShaH |
etadanubhUtivarNanaM bhavati punarmArgapradarshanapUrvakam |

         bandhamuktyatItaM paraM sukham |
         vindatIha jIvastu daivikaH || 29||

daivikaH dehAtmabhAvarahita AtmaniShThaH tasyAmavasthAyAmeva hi Atmano
divyatvaM parisphuret | jIvastu bandhamuktyatItaM bandhamuktibhyAmatItaM
paraM sukhamAnandaM vindati prApnoti | bandhasphUrtisApekShA muktisphUrtiH |
tasmAdaj~nAninAM vyavahAra eva sA.avastha muktirityabhidhIyate | anubhavino
bandhasphUrtirahitasya muktisphUrtirapi nAstIti tasya sAvasthA bandha\-
muktyatItaiva vaktavyA |

         ahamapetakaM nijavibhAnakam |
         mahadidaM tapo ramaNavAgiyam || 30||

ahamapetakaM ahamA manomUlAha~NkAreNa anAtmagatayA.ahaMvR^ityeti yAvat |
apetakaM viyutaM nijavibhAnakaM svarUpavibhAnaM idaM mahattapaH | Atmano\-
.apyahamahaMtayA sphuraNAdahamapetakamityatra gauNasyAhaMbhAvasya nirAso
bodhyaH | sarvebhyastapebhyo nityamAtmasphuraNaM mahattapa iti tAtparyam |
iyaM ramaNavAk.h ramaNasya maharShervAk.h iyamityanena sarvasyApi granthasya
grahaNam | naitachChlokamAtrasya | sa eSha upadeshasArastriMshatA shlokAnAM
nibaddho bhagavato ramaNasya maharShervijayatetarAM vijayatetarAm |

iti shrIbhagavanmaharShiramaNAntevAsino vAsiShThasya
narasiMhasUnorgaNapateH kR^itiH upadeshasArabhAShyaM samAptam |

vibhavAbde jyeShThamAse paurNamyAM bhAnuvAsare |
chandroparAgasamaye bhAShyametadudIritam ||
##

From The Collected Works of Vasishtha Kavyakantha Ganapati Muni Vol 07-31
Proofread by Sunder Hattangadi

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}