% Text title            : Vicharadipakah
% File name             : vichAradIpakaH.itx
% Category              : major\_works, upadesha
% Location              : doc\_z\_misc\_major\_works
% Transliterated by     : Tanvir Chowdhury
% Proofread by          : Tanvir Chowdhury
% Latest update         : December 4, 2022
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Vicharadipakah ..}##
\itxtitle{.. shrIvichAradIpakaH ..}##\endtitles ##
(shrImatparamahaMsasvAmibrahmAnandavirachitaH)
shrIramApataye namaH |
     || ma~NgalaM ||
phaNIndrabhogAmalatalpashAyine
      durantadurj~neyavichitramAyine |
samastasattvaikahR^idabjayAyine
      namo.astu meshAya vimokShadAyine || 1||
svachChAstratailashcha virAgavartika\-
      shchetaH supAtrashcha gurUktipAvakaH |
nirvAtahR^idgehagataH prakAshayet
      sarvepsitaM vastuvichAradIpakaH || 2||
kalau hi yogo na japastapo vrataM
      na chApi yAgo na surArchanaM tathA |
prayAti siddhiM duritaprabhAvata\-
      stato vichAraikaparAyaNo bhavet || 3||
AhAranidrAdi samaM sharIriShu
      vaisheShyamekaM hi nare vichAraNam |
tenojjhitaH pakShipashUpamaH smR^ita\-
      stasmAdvichAraikaparAyaNo bhavet || 4||
vichArahInasya vane.api bandhanaM
      bhavedavashyaM bharatAdivadyataH |
gR^ihe.api mukto janakAdivadbhave\-
      ttato vichAraikaparAyaNo bhavet || 5||
paThantu shAstrANi yajantu vAdhvarai\-
      raTantu tIrthAni tapantu tApakaiH |
vidanti nAtmAnamR^ite vichAraNaM
      tato vichAraikaparAyaNo bhavet || 6||
tasya kharUpaM tu samAsataH sphuTaM
      shAstrAntarAdatra vikR^iShya yatnataH |
sandarshyate shiShyaguruprasa~Ngato
      yuktyA kayApIha hi bodhyate vudhaiH || 7||
dR^iShTvA jarAjanmavipattisa~NkulaM
      sarva jagachchAMvutara~Ngabha~Nguram |
bhItaH samAgamya janojjhitaM sthalaM
      kashchinmumukShuH samachintayattvidam || 8||
aho vichitrAH khalu mohashaktayaH
      prachodito yAbhirahaM nirantaram |
janurjarAduHkhanipIDito.api no
      kadApi pashyAmi hitaM yadAtmanaH || 9||
bAlyaM mayA kelikalAkalApakai\-
      rnItaM cha nArIniratena yauvanam |
vR^iddho.adhunA kiM nu karomi sAdhanaM
      muktervR^ithA me khalu jIvitaM gatam || 10||
nidrAvyavAyAshanatatparo.abhavaM
      nityaM vivekApagato yathA pashuH |
nAtmAnamantaHsthamapi vyalokayaM
      sarvaM vR^ithA me khalu jIvitaM gatam || 11||
bhavApaho naiva satAM samAgamaH
      kR^itaH shrutA nApi kathAghahAriNI |
harerna tIrthAni gatAni vai mayA
      vR^ithAkhilaM me khalu jIvitaM gatam || 12||
chaturbhujashchakragadAyudhaH prabhu\-
      rnira~njanaH sarvabhavArtibha~njanaH |
smR^itaH kadApIha mayA na mAdhavo
      vR^ithAkhilaM me khalu jIvitaM gatam || 13||
ihA~NganAtAtasutAdibAndhavaiH
      samAgamo.ayaM mama kinnibandhanaH |
sadA.achalo vAMvutara~Ngacha~nchalo
      hitAvaho me kimutAhitAvahaH || 14||
ime cha dArAtmajasevakAdayaH
      samAshritA mAmatha karma vA nijam |
gatistathaiShAM nanu kA bhaviShyati
      mayi prayAte paralokamantataH || 15||
pApairanekaistu yadarthamAdarA\-
      dvittaM samAnIya karomyahaM vyayam |
te bAndhavA vai mama duHkhabhAginaH
      kiMvA bhaviShyanti gatasya rauravam || 16||
sAyaM sametyaikataruM viha~NgamAH
      prAtaH prayAntIha dishaM nijAM nijAm |
tyaktvA yathAnyonyamagaM cha taM tathA
      sarve samAyAnti cha yAnti bAndhavAH || 17||
yathA kapoto.annakaNAbhivA~nChayA
      shichaM vishanneti durantabandhanam |
kuTumbajAle viShayAshayAvishaM
      tathA vimuchyeya kathaM jagatpate || 18||
iyaM cha muktAlilasatpayodharA
      kaNanmaNivrAtanitambamaNDalA |
vibhAti ramyA lalanA.avichArato
      vichAradR^iShTyA tu kumAMsaputrikA || 19||
eShA tu baddhvAlakadAmabhirdR^iDhaM
      kR^iShTvA cha hAvA~nchitalolavIkShaNaiH |
mAma~NganA nartayatIha santataM
      nAdyApi lajje kapitulyatAM gataH || 20||
sUnurmayAyaM paripUjya devatA
      labdhaH prayatnena cha varddhito.adhunA |
mAmeva mUDhaH parishikShitaH striyA
      dveShTItyaho bhAgyaviparyayo hi me || 21||
anekayatnaiH samupArjya sarvataH
      sadAptirakShAkShatiduHkhadaM dhanam |
vyayaM kukAryeShu karomyaho padaM
      svakaM svakIyena kareNa hanyate || 22||
jale sthale yo.api cha shailamastake
      sadaiva puShNAti jagachcharAcharam |
sa me.ashanaM dAsyati vishvapAlako
      na kiM kimarthaM tu gato.asmi dInatAm || 23||
labdhvApi devepsitamAnuShaM vapu\-
      rnItaM samastaM gR^ihakR^ityakalpanaiH |
chintAmaNiM hastagataM vihAya vai
      krItaM mayA kAchadalaM kubuddhinA || 24||
idaM sadA.abhya~NgasutailavAsitaM
      varA~NganAli~NganalAlitaM muhuH |
hitAnnapAnauShadhivardhitaM vapuH
      kR^itaghnamante na samaM mayaiShyati || 25||
malImase.anAtmani nAshashAlini
      shuchitvamAtmatvamavaimi nityatAm |
anAdyavidyAtimirAvR^itekShaNaH
      kima~njanaM tasya bhavennivartakam || 26||
kShaNaM kShaNaM dIpashikhopamAM dadhat
      sarandhrakumbhAsravadaMvusannibham |
prayAtyasheShaM tu mamAyuruttamaM
      na sekShaNo.apIha vilokayAmyaho || 27||
gatA madIyAH pitaro yamAlayaM
      prayAnti chAnyepi dinandinaM prati |
ahaM tu pashyannapi tAnaho shaTha\-
      stathApi manye sthitimAtmano dhruvAm || 28||
ete cha jihvekShaNanAsikAdaya\-
      shchaurAstu shashvanmama dehavAsinaH |
lumpanti sarvAtmadhanaM pramAthino
      nAdyApyavekShe mama pashyatAj~natAm || 29||
pata~NgamInebhamR^igAlayo layaM
      prayAnti pa~nchendriyapa~nchagocharaiH |
mayA tu tatpa~nchakameva sevyate
      gatirna jAne mama kA bhaviShyati || 30||
yathA.ahituNDe patito.api meDakaH
      samIhate.attuM mashakAnachetanaH |
tathAntakAsyAntaritaH samantata\-
      stathApi kA~NkShe viShayAnaho jaDaH || 31||
sitaM shiraH sampatitA radAvalI
      mukhaM valivrAtavR^itaM cha chakShuShI |
gataprabhe me shithilAyate vapu\-
      stathApi cheto yuvatiM smaratyaho || 32||
adhaHshiraskena durantasa~NkaTe
      mayA yadambAjaThare vinishchitam |
smarAmi nAdyApi taduddhatAshayo
      murArimAyA hi kilAtidustarA || 33||
karomi duShkarma sadA prayatnataH
      phalaM tu vA~nChAmi sukhaM sukarmaNaH |
kara~njamAropya tu kena bhujyate
      phalaM rasAlasya bateyamaj~natA || 34||
ko.ahaM kathaM kena kutaH samudgato
      yAsyAmi chetaH kva sharIrasa~NkShaye |
kiM mesti chehAgamane prayojanaM
      vAso.atra me syAtkati vAsarANi vA || 35||
itthaM sudhIH shuddhadhiyA nirantara~Nga
      sa~nchintayannapyagamanna nishchayam |
khinnAntara~Ngastu tataH samitkaro
      gatvAbhyuvAchAtmavidAMvaraM gurum || 36||
shiShya uvAcha |
bhavArNave janmajarAtimi~Ngile
      tR^iShA.anale mohavivartasa~Nkule |
nimajjato me kimu tArakaM dR^iDhaM
      vadArtabandho mayi chedanugrahaH || 37||
gururuvAcha |
saMsAraduShpAramahodadhau nR^iNAM
      tumbIvadevordhvamadhashcha majjatAm |
govindapAdAmburuhaikachintanaM
      potaM vadantIha dR^iDhaM vipashchitaH || 38||
shiShya uvAcha |
ihaiva santyajya gR^ihaM sabAndhavaM
      dhanaM sharIraM cha gatasya dehinaH |
bhavedamutrAsya sahAyakastu kaH
      suhR^idvadetadvada vedavidvibho || 39||
gururuvAcha |
vadhUrjanitrI janakaH sahodaraH
      suto dhanaM mitramamutra gachChatA |
sameti sAkaM na sahAyako.api ko
      vinA svadharmeNa nareNa vai kvachit || 40||
shiShya uvAcha |
dharmasya mArgA bahavo maharShibhiH
      sandarshitA bhuktivimuktisiddhaye |
kasteShu gamyastu mayAtmashuddhaye
      niHsheShadharmaikarahasyavidguro || 41||
gururuvAcha |
vAchA cha chittena cha karmaNApi yat
      sampAlanaM nityamavekShya shAstrataH |
satyasya taddharmamihottamaM budhAH
      prAhustatastaM hi samAshrayAchiram || 42||
shiShya uvAcha |
idaM jagachchitracharitrachitritaM
      vinirmitaM kena kathaM kutastathA |
mR^iShA.amR^iShA vApi tato vilakShaNaM
      bhavedathAnAdi kimAdimanmune || 43||
gururuvAcha |
yaH sarvagaH sarvavidakSharaH prabhu\-
      rmayAdhipastanturivorNanAbhitaH |
tasmAdanirvAchyamidaM prajAyate
      vegAtmanA chedamanAdyudAhR^itam || 44|| 
(vegashabdo.atra pravAhavAchakaH, pravAhajavayorapItyamaraH, amarakoshaH)

shiShya uvAcha |
svakIyamuddishya kiletarasya vA
      prayojanaM kintu vinAprayojanam |
vinirmimIte jagadetadIshvaro
      vadaitadaj~nAnatamonabhomaNe || 45||
gururuvAcha |
sadAptakAmasya tu nAtmahetave
      na chetarasyApi na chApyahetukA |
jagatkriyA krIDanameva kevalaM
      vibhorvadatIMha tu vedavAdinaH || 46||
shiShya uvAcha |
nishAkarendrArkayamAnalAnilA
      gharAgharAdhAranadInadIshvarAH |
bhayena kasyAkhilashaktidhAriNaH
      sadaiva bhItA niyatiM tyajanti no || 47||
gururuvAcha |
yamIshvarANAM paramaM maheshvaraM
      tathodyataM vajramapi shrutirjagau |
bhayena tasyAkhilameva kampate
      yatheha rAj~no.anucharAdikaM jagat || 48||
jaDAni karmANi pR^ithak pR^ithagjanaiH
      kR^itAni chitrANi sadA samantataH |
vibud.hdhya kAlena tu ko.akhilArthavit
      phalaM dayAlurbhagavan prayachChati || 49||
gururuvAcha |
yeneshyate sarvamihAntarAtmanA
      lokeshvarA yasya nideshakAriNaH |
tenAkhilaM karmaphalaM prasUyate
      varShAMvunA sasyamivAvirodhataH || 50||
shiShya uvAcha |
divAkaro dAhakaro nishAkara\-
      staDidgaNashchoDugaNastathAnisham |
vibhAti kasyAmitadIptidIpito
      bravItu me saMshayashailadevarAT || 51||
na yatra sUryo na nishAkarastathA
      na chApi vidyujjvalanaH prakAshate |
shrutau svaya~njyotirudIritashcha yo
      vibhAti tasyAkhilameva tejasA || 52||
shiShya uvAcha |
sadevanAgAsurasiddhamAnavaM
      jagatsamagraM pralaye layonmukham |
vilIyate kasya tanAvanAshino
      jagatpaterbrUhi vipashchitAmpate || 53||
gururuvAcha |
yasyodare.anantatanormahAtmano
      brahmANDalakShANi parisphurantyalam |
khadyotakA bhAnti yathA nabhoM.agaNe
      tasminnidaM yAti layaM laye.akhilam || 54||
shiShya uvAcha |
ihAsti devaH khalu kastu pUjyatAM
      gataH kathaM tasya bhavechcha pUjanam |
supUjitenApi cha tena kiM phalaM
      bhavedihAmutra vadAshu me vibho || 55||
gururuvAcha |
yaH sarvago.avyaktavapuH svasaMsthiti\-
      ryanmUrtayo brahmamaheshamAdhavAH |
sarveshvaraM vedavachAMsi yaM jagu\-
      rdevAdhidevaM tamavehi sanmate || 56||
gururuvAcha |
na puShpamAlAbhirasau na chandanai\-
      rna dhUpadIpAdinivedanairapi |
prayAti toShaM tu manoM.avujArpaNAt
      tato.achiraM mokShaphalaM prayachChati || 57||
shiShya uvAcha |
sthalaM nivAsasya guro kva vidyate
      sadaiva devasya kathaM cha gamyate |
kathaM bhavettasya cha darshanaM drutaM
      bravItu me tattvadR^ishAM maNirbhavAn || 58||
gururuvAcha |
tasya sthalaM bhUmigataM na chAmbare
      pAtAlagaM vApi sadA hR^idambuje |
jAnIhi tadvAsamupetya chetasA
      pashyanti taM divyadR^ishastu yoginaH || 59||
shiShya uvAcha |
ahaM sharIraM kimutendriyANi vA
      mano.athavA prANagaNo.athavA matiH |
atho kimeShAM tu samuchchayo.asmi kiM
      tataH pR^ithagvAtmavidAM shiromaNe || 60||
gururuvAcha |
sharIrametanna tathendriyANyapi
      mano.api no prANagaNo.api no matiH |
na chApi dhImannasi tatsamuchchaya\-
      stato.anyamAtmAnamavehi sAkShiNam || 61||
shiShya uvAcha |
vicheShTate kena manaH prachoditaM
      karoti kenAsugaNo gamAgamau |
vapustathedaM nanu kena nIyate
      hR^idi praviShTena gururbravItu me || 62||
gururuvAcha |
karNasya karNaM manaso manaHshruti\-
      rvAchaM cha vAcho yamasorasuM jagau |
tenAnishaM yantramivAntarAtmanA
      sampreritaM sarvamidaM pravartate || 63||
shiShya uvAcha |
kartR^itvabhoktR^itvamukhaM kimAtmanaH
      kiM dharmajAlaM manaso.athavA mateH |
kiMvendriyANAM kimutAsugaM bhave\-
      detaddayAlo vada me vinishchitam || 64||
gururuvAcha |
karttA tu nAtmA na mano na shemuShI
      naivendriyANIha na chAsavastathA |
nAha~NkR^itirnApi vapurvivekinaH
      karttArameShAM tu samuchchayaM viduH || 65||
shiShya uvAcha |
nibad.hdhyate.ayaM kila kena hetunA
      tathaiva keneha jano vimuchyate |
bandhashcha mokShashcha kimAtmakaH smR^itaH
      kR^ipArdradR^iShTe vada me samAsataH || 66||
gururuvAcha |
nibad.hdhyate.ayaM viShayAnurAgato
      virAgatasteShu vimuchyate drutam |
svabhAvataH saMskhalanaM hi bandhanaM
      punaH sthitistatra vimuktiruchyate || 67||
shiShya uvAcha |
jIvo vibhurvANurutApi madhyamo
      nAnA.athavaikaH kimu madhyasa~NkhyakaH |
nityo.athavA kiM pralaye vinashyati
      sarvaM tadetatkR^ipayA vadAshu me || 68||
gururuvAcha |
nANuH samastAvayavAnugo yato
      no madhyamo.ayaM pariNAmavarjanAt |
AkAshavatsarvagato hi gIyate
      tasmAttvamenaM vibhumeva nishchinu || 69||
shiShya uvAcha |
raviryathaiko nikhilAkShibhAsaka\-
      stathA.ayamAtmAkhiladehadIpakaH |
upAdhibhedAchcha bhavedvyavasthitiH
      pramANahInA tu tR^itIyakalpanA || 70||
gururuvAcha |
samastavastvekavinAshasAkShiNo
      bhavedvinAsho na kadApi kenachit |
laye bhavechchedvada kastadAshraya\-
      statastvimaM nityamavehi dehinam || 71||
shiShya uvAcha |
svarUpamIshasya tu kiM vinishchitaM
      tathAsya jIvasya cha kiM vapurbhavet |
kiyattayorasti tathaiva chAntaraM
      bravItu me tattvavidAM varo bhavAn || 72||
gururuvAcha |
mAyAyutaM brahma maheshvaraM vudhA
      jIvaM sametaM cha vadantyavidyayA |
naivAntaraM ki~nchidupAdhimantarA
      samyagvichAreNa tayo.astu labhyate || 73||
shiShya uvAcha |
kathaM mahAmbhodhitara~Ngatulyayo\-
      rviruddhadharmAspadayoH parasparam |
bhavedihaikyaM parameshajIvayo\-
      rvadaitadAtmAnubhavAdbhavArtihan || 74||
gururuvAcha |
yathAbdhitA chApi tara~NgatA tayo\-
      rvihAya nIraikyamihopalakShyate |
apAsya jIveshvarabhAvamIkShyate
      tathA chidAnandamayaM vichakShaNaiH || 75||
shiShya uvAcha |
bahUnupAyAnavadanniharShayo
      vishuddhayeM.ataHkaraNasya nishchitAn |
bhavettu teShAmachiraM vishodhako
      mahAmate kastamupAdishAshu me || 76||
gururuvAcha |
na tIrthayAtrAbhiridaM na chAdhvarai\-
      stapobhirugrairna japairvratairapi |
tathA vishud.hdhyatyachiraM yathA hare\-
      rananyachetaHsmaraNena nityashaH || 77||
shiShya uvAcha |
anekashAstrANi purarShipu~NgavaiH
      kR^itAni sarvANi cha yuktimanti vai |
pramANatA teShu tu kasya sambhave \-
      dasheShashAstrArthavichArasAravit || 78||
gururuvAcha |
yadyaddhi vedAnugataM sayuktikaM
      tattattu bAloktamapIha gR^ihyate |
tadbAhyamapyambujajanmanoditaM
      prAmANyamAyAti vacho na karhichit || 79||
shiShya uvAcha |
upAsanAj~nAnamutApi karma vA
      bhaveddR^iDhaM kinnu vimokShasAdhanam |
atho kimetAni samuchchitAni vA
      kimanyadapyasti tadAptikAraNam || 80||
gururuvAcha |
nopAsanA naiva cha karma kAraNaM
      mokShasya naivApi samuchchayastayoH |
j~nAnaM vadantIha tu tasya sAdhanaM
      nAnyo.asti panthA bhavarogashAntaye || 81||
shiShya uvAcha |
upAsanAyAshcha tathaiva karmaNo
      bhavedvibodhasya cha kinnu sAdhanam |
svarUpameShAM cha kimasti nishchitaM
      pR^ithak pR^ithagbrUhi vibho samAsataH || 82||
gururuvAcha |
shraddhA manaHsthairyamupAsanasya vai
      svAstikyavittAdhikatAdikarmaNaH |
j~nAnasya vairAgyavivechanAdikaM
      vij~nA vadantIha tu sAdhanaM pR^ithak || 83||
gururuvAcha |
dAnAgnihotrAdi tu karmaNastatho\-
      pAsteshcha chetorpaNamiShTavastuni |
brahmAtmanoraikyavinishchayaM budhAH
      prAhurvibodhasya cha lakShaNaM pR^ithak || 84||
shiShya uvAcha |
kasyeha vR^ikShasya phale sukhAsukhe
      shAkhAshcha kAstasya matA mahAmate |
bIjaM cha mUlaM cha padAni kAni kiM
      sa~NkShepato brUhi pR^ithaka pR^ithagguro || 85||
gururuvAcha |
yo.anekajanmArjitavAsanApadaH
      sa~NkalpamUlo.anubhavaikabIjakaH |
dharmetarottu~NgalatopashobhitaH
      karmadrumastasya phale sukhAsukhe || 86||
shiShya uvAcha |
kathaM nu nirmUlanamasya chAchiraM
      bhavedguro karmatarorasheShataH |
nirUDhapAdasya cha bhItidAyino
      dayAnidhe tadvada me vinishchitam || 87||
gururuvAcha |
vairAgyamevAsya dR^iDhaM dR^iDhAshayAH
      shastraM vadantIha vivekasaMshitam |
tenainamunmUlaya bodhavIryato
      nAnyattu tatsAdhanamasti vai kvachit || 88||
shiShya uvAcha |
sukhAya loko yatate nirantaraM
      sukhaM cha duHkhena sadaiva mishritam |
amishritaM yannu tadApyate kathaM
      tadarthinaM me vada vedavidguro || 89||
gururuvAcha |
yasyaitadAnandamahodadherlavaM
      sarvaM bhavennirvR^itamAshritaM jagat |
yatra sthito vetti na duHkhamaNvapi
      tatprApyate.akAmahatAtmavedinA || 90||
shiShya uvAcha |
tathaiva duHkhApagamAya jantavaH
      sadA yatante sa tu naiva sid.hdhyati |
padaM nu ki~nchAkhiladuHkhavarjitaM
      bhavedbhavAMstatkR^ipayA bravItu me || 91||
gururuvAcha |
mahendralokaM bhuvanaM svayambhuvo
      rameshadhAmApi nagaM pinAkinaH |
prayAtu pAtAlamapi pramuchyate
      na duHkhaleshAttu vinAtmasaMsthitim || 92||
shiShya uvAcha |
j~nAnodayAnantaramasya dehinaH
      karttavyamastIha na ki~nchanApi vA |
chedasti kiM tatkR^ipayA bravItu me
      samyagbhavAnAgamago.apyagocharaH || 93||
gururuvAcha |
j~nAnAmR^itAtR^isamatervivekino
      naivAsti ki~nchitkaraNIyatAM gatam |
yadyasti tadvR^ittinirodhanaM sadA
      nAnyatkadApIti vadanti sUrayaH || 94||
shiShya uvAcha |
imA dhvajAgrAgnishikhAtaDitprabhA
      nadIrayAshvatthadalAlicha~nchalAH |
kathaM niruddhA nanu chittavR^ittayo
      bhavanti tanme vada yoginAM pate || 95||
gururuvAcha |
yathA pramattA vanadantinaH kvachit
      prayatyupAyena vinA na nigraham |
tathaiva yogena vinA na vR^ittayo
      nirodhanaM yAnti tatastamabhyaset || 96||
shiShya uvAcha |
kiM lakShaNaM tasya vadanti yogino
      yogasya chA~NgAni kiyanti santi vai |
nirvighnamAyAti kathaM cha siddhatAM
      yogIndra me brUhi samAsataH sphuTam || 97||
gururuvAcha |
santyajya sa~NkalpavikalpajAlakaM
      yatra sthitiM yAti mano.atarAtmani |
yogaM tamaShTA~Ngamavehi sa dhruvaM
      vairAgyato.abhyAsabalAchcha sid.hdhyati || 98||
shiShya uvAcha |
kiM pauruSheNAbhimataM svakarmaNA
      pUrvArjitenota janairavApyate |
vastvetayoH ki~ncha baliShThamuchyate
      sarvArthavidbrUhi yadeva nishchitam || 99||
gururuvAcha |
naikena puMsA tanayaH kvachidyathA
      naivaikayA vA~NganayApi janyate |
saMyogamevAtra tathaiva kAraNaM
      viddhi tvamAdyaM cha baliShThametayoH || 100||
shiShya uvAcha |
sarvatragaM vedavachobhiruchyate
      brahmopalAdau tu kathaM na lakShyate |
asmachCharIreShu yathaitada~njasA
      sarvaj~na me brUhi vibodhavR^iddhaye || 101||
gururuvAcha |
sAmAnyataH sarvagatApi bhAnubhA
      yadvadvisheSheNa vibhAti darpaNe |
brahmApi sarvatragataM matau sphuTaM
      tadvadvibhAtItyanubhUyate budhaiH || 102||
shiShya uvAcha |
parivrajanneva jano vimuchyate
      gR^ihepi tiShThankimu vA dayodadhe |
tayoshcha kiM tatra vimokShakAraNaM
      vadaitadAmnAyavacho.anurodhataH || 103||
gururuvAcha |
visheShato nyastagR^iho vimuchyate
      kvachidgR^ihastho.api cha pUrvayatnataH |
na cheha kashchinniyamo.asti pakShiNo.a\-
      bhavanmR^igAshchApi yato vivekinaH || 104||
gururuvAcha |
shavopamaM dehamimaM vilokaya\-
      nnaTedimAM yastu dharAM gataspR^ihaH |
asaktachetAH samadarshanaH kShamI
      shuchirdayAluH sa vimuchyate yatiH || 105||
gururuvAcha |
yathAptituShTo.anR^itarAgavarjitaH
      svadharmaniShTho.atithipUjakaH shuchiH |
jitendriyo vR^iddhajanAnugaH kShamI
      vichArashIlashcha gR^ihepi muchyate || 106||
shiShya uvAcha |
shamaM gato me.akhilasaMshayajvaro
      bhavanmukhAmbhojavachomR^itadravaiH |
vane.athavA kiM sadane vihAriNA
      mayA kathaM stheyamihAdhunA guro || 107||
gururuvAcha |
sharIrataH karma samArachan bahi\-
      rgatAntarAsaktiramitramitrayoH |
samaH satAM setumala~Nghaya.Nstata\-
      stapovane vA sadane ramasva bhoH || 108||
gururuvAcha |
manobhramaM vishvamidaM charAcharaM
      vilokayannAtmaratirgataiShaNaH |
vinirmamo mAnamadAdivarjita\-
      stapovane vA sadane ramasva bhoH || 109||
gururuvAcha |
ahaM hariH sarvamidaM cha tanmayaM
      tato.anyadAsInna bhaviShyati kvachit |
imaM dR^iDhaM nishchayamantarAsthita\-
      stapovane vA sadane ramasva bhoH || 110||
tataH samabhyarchya guruM muhurmuhuH
      praNamya chaivAmuditAshayo.agamat |
sukhepsurekAntaniketanaM tato
      jagAma santyaktatanuH paraM padam || 111||
imaM mumukShuH sumumukShumokShadaM
      vichArayedyastu vichAradIpakam |
samAhitaH so.astasamastasaMshayaH
      punarbhavaM yAti na yAti tatpadam || 112||
vichAradIpakaH so.ayaM manoviShNvAlaye.arpitaH |
brahmAnandAbhidhAnena yatinA harituShTaye || 113||

shrImatparamahaMsasvAmibrahmAnandavirachitaH
shrIvichAradIpakaHM sampUrNaH |

hariH OM ||

##
Encoded and proofread by Tanvir Chowdhury

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}