% Text title            : maThAmnAyamahAnushAsanam
% File name             : maThAmnAyamahAnushAsanam.itx
% Category              : shankarAchArya
% Location              : doc\_z\_misc\_shankara
% Author                : Adyashankaracharya
% Transliterated by     : Ankur Nagpal ankurnagpal108 at gmail.com
% Proofread by          : Ankur Nagpal ankurnagpal108 at gmail.com
% Description-comments  : (importance of and rules for maThas)
% Latest update         : March 9, 2013
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. maThAmnAyamahAnushAsanam ..}##
\itxtitle{.. maThAmnAyamahAnushAsanam ..}##\endtitles ##

shAradA maThAmnAyaH |
prathamaH pashchimAmnAyaH shAradAmaTha uchyate  |
kITavAraH sampradAyastasya tIrthAshramau pade || 1||
dvArakAkhyaM hi kShetraM syAd devaH siddheshvaraH smR^itaH |
bhadrakAlI tu devI syAd hastAmalaka deshikaH || 2|| ## var ## AchAryo vishvarUpakaH
gomatItIrthamamalaM brahmachArI svarUpakaH  |
sAmavedasya vaktA cha tatra dharmaM samAcharet || 3|| 
jIvAtmaparamAtmaikya bodho yatra bhaviShyati |
tattvamasi mahAvAkyaM gotro.avigata uchyate || 4||
sindhu\-sauvIra\-saurAShTra\-mahArAShTrastathAntarAH |
deshAH pashchimadiksthA ye shAradAmaThabhAginaH || 5||
triveNIsa~Ngame tIrthe tattvamasyAdilakShaNe |
snAyAttattvArthabhAvena tIrthanAmnA sa uchyate || 6||
AshramagrahaNe prauDha AshApAshavivarjitaH |
yAtAyAtavinirmukta etadAshramalakShaNam  || 7||
kITAdayo visheSheNa vAryante yatra jantavaH |
bhUtAnukampayA nityaM kITavAraH sa uchyate || 8||
sva\-svarUpaM vijAnAti svadharma\-paripAlakaH |
svAnande krIDate nityaM svarUpo baTuruchyate || 9||

govardhana maThAmnAyaH |
pUrvAmnAyo dvitIyaH syAd govardhanamaThaH smR^itaH |
bhogavAraH sampradAyo vanAraNye pade smR^ite || 10||
puruShottamaM tu kShetraM syAMjjagannAtho.asya devatA |
vimalAkhyAhi devI syAdAchAryaH padmapAdakaH || 11||
tIrthaM mahodadhiH proktaM brahmachArI prakAshakaH |
mahAvAkyaM cha tatra syAt praj~nAnaM brahma chochyate || 12||
R^igvedapaThanaM chaiva kAshyapo gotramuchyate |
a~Ngaba~Ngakali~NgAshcha magadhotkalabarbarAH | 
govardhanamaThAdhInA deshAH prAchIvyavasthitAH || 13||
suramye nirjane sthAne vane vAsaM karoti yaH |
AshAbandhavinarmukto vananAmA sa uchyate || 14||
araNye saMsthito nityamAnande nandane vane |
tyaktvA sarvamidaM vishvamAraNyaM parikIrtyate || 15||
bhogo viShaya ityukto vAryate yena jIvinAm |
sampradAyo yatInA~ncha bhogavAraH sa uchyate || 16||
svayaM jyotirvijAnAti yogayuktivishAradaH |
tattvaj~nAnaprakAshena tena proktaH prakAshakaH || 17||

jyotirmaThAmnAyaH |
tR^itIyastUttarAmnAyo jyotirnAma maTho bhavet |
shrImaThashcheti vA tasya nAmAntaramudIritam || 18||
AnandavAro vij~neyaH sampradAyo.asya siddhidaH |
padAni tasya khyAtAni giriparvatasAgarAH || 19||
badarIkAshramaH kShetraM devo nArAyaNaH smR^itaH |
pUrNAgiri cha devI syAdAchAryastoTakaH smR^itaH || 20||
tIrthaM chAlakanandAkhyaM Anando brahmachAryabhUt |
ayamAtmA brahma cheti mahAvAkyamudAhR^itam || 21||
atharvavedavaktA cha bhR^igvAkhyaM gotramuchyate |
kurukAshmIrakAmbojapAMchAlAdivibhAgataH | 
jyotirmaThavashA deshA udIchIdigavasthitAH || 22||
vAso girivane nityaM gItAdhyayanatatparaH |
gaMbhIrAchalabuddhishcha girinAmA sa uchyate || 23||
vasan parvatamUleShu prauDhaM j~nAnaM vibharti yaH |
sArAsAraM vijAnAti parvataH parikIrtyate || 24||
tattvasAgaragambhIra j~nAnaratnaparigrahaH |
maryAdAM vai na la~Nghyeta sAgaraH parikIrtyate || 25||
Anando hi vilAsashcha vAryate yena jIvinAm |
sampradAyo yatInAM chAnandavAraH sa uchyate || 26||
satyaM j~nAnamanantaM yo nityaM dhyAyeta tattvavit |
svAnande ramate chaiva AnandaH parikIrtyate || 27||

shR^i~NgerI maThAmnAyaH |
chaturtho dakShiNAmnAyaH shR^i~NgerI tu maTho bhavet |
sampradAyo bhUrivAro bhUrbhavo gotramuchyate || 28||
padAni trINi khyAtAni sarasvatI bhAratI purI |
rAmeshvarAhvayaM kShetramAdivArAhadevatA || 29||
kAmAkShI tasya devI syAt sarvakAmaphalapradA |
sureshvarAkhya AchAryastu~Ngabhadreti tIrthakam || 30|| ## var ## hastAmalaka
chaitanyAkhyo brahmachArI yajurvedasya pAThakaH |
ahaM brahmAsmi tatraiva mahAvAkyaM samIritam || 31||
AndhradraviDakarNATakeralAdiprabhedataH |
shR^i~NgeryadhInA deshAste hyavAchIdigavasthitAH || 32||
svaraj~nAnarato nityaM svaravAdI kavIshvaraH |
saMsArasAgarAsArahantA.asau hi sarasvatI || 33||
vidyAbhareNa sampUrNaH sarvabhAraM parityajan |
duHkhabhAraM na jAnAti bhAratI parikIrtyate || 34||
j~nAnatattvena sampUrNaH pUrNatattvapade sthitaH |
parabrahmarato nityaM purInAmA sa uchyate || 35||
bhUrishabdena sauvarNyaM bAryate yena jIvinAm |
sampradAyo yatInAM cha bhUrivAraH sa uchyate || 36||
chinmAtraM chaityarahitamanantamajaraM shivam |
yo jAnAti sa vai vidvAn chaitanyaM tadvidhIyate || 37||

mahAnushAsanam |
maryAdaiShA suvij~neyA chaturmaThavidhAyinI |
tAmetAM samupAshritya AchAryAH sthApitAH kramAt || 38||
AmnAyAH kathitA hyete yatInA~ncha pR^ithak\-pR^ithak |
taiH sarveshchaturAchAryairniyogena yathAkramam || 39||
prayoktatavyAH svadharmeShu shAsanIyAstato.anyathA |
kurvantu eva satatamaTanaM dharaNItale || 40||
viruddhAcharaNaprAptAvAchAryANAM samAj~nayA  |
lokAn saMshIlayantveva svadharmApratirodhataH || 41||
sva\-svarAShTrapratiShThityai sa~nchAraH suvidhIyatAm |
maThe tu niyato vAsa AchAryasya na yujyate || 42||
varNAshramasadAchArA asmAbhirye prasAdhitAH |
rakShaNIyAH sadaivaite sva\-sva bhAge yathAvidhi || 43||
yato vinaShTirmahatI dharmasyAsya prajAyate |
mAndyaM santyAjyamevAtra dAkShyameva samAshrayet || 44||
parasparavibhAge tu na praveshaH kadAchana |
paraspareNa kartavyA hyAchAryeNa vyavasthitiH || 45||
maryAdAyA vinAshena lupyeranniyamAH shubhAH |
kalahA~NgArasampattiratastAM parivarjayet || 46||
parivrADAryamaryAdo mAmakInAM yathAvidhi |
chatuShpIThAdhigAM sattAM prayu~njyAchcha pR^ithak\-pR^ithak || 47||
shuchirjitendriyo veda\-vedA~NgAdivishAradaH |
yogaj~naH sarvashAstrANAM sa madAsthAnamApuyAt || 48||
uktalakShaNasampannaH syAchchenmatpIThabhAg bhavet |
anyathArUDhapITho.api nigrahArho manIShiNAm || 49||
najAtu maThamuchChindyAdidhikAriNyupasthite |
vighnAnAmapi bAhulyAdeSha dharmaH sanAtanaH || 50||
asmatpIThasamArUDhaH parivrADuktalakShaNaH |
ahameveti vij~neyo yasya deva iti shruteH || 51||
eka evAviShechyaH syAdante lakShaNasammataH |
tattatpIThe krameNaiva na bahu yujyate kvachit || 52||
sudhanvanaH samautsukyanivR^ityai dharma\-hetave |
devarAjopachArAMshcha yathAvadanupAlayet || 53||
kevalaM dharmamuddishya vibhavo brahmachetasAm |
vihitashchopakArAya padmapatranayaM vrajet || 54||
sudhanvA himahArAjastathAnye cha nareshvarAH |
dharmapAramparImetAM pAlayantu nirantaram || 55||
chAturvarNyaM yathAyogyaM vA~NmanaH kAyakarmabhiH |
guroH pIThaM samarcheta vibhAgAnukrameNa vai || 56||
dharAmAlambya rAjAnaH prajAbhyaH karabhAginaH |
kR^itAdhikArA AchAryA dharmatastadvadeva hi || 57||
dharmo mUlaM manuShyANAM sa chAchAryAvalambanaH |
tasmAdAchAryasumaNeH shAsanaM sarvato.adhikam || 58||
tasmAt sarvaprayatnena shAsanaM sarvasammatam |
AchAryasya visheSheNa hyaudAryabharabhAginaH || 59||
AchAryAkShipta daNDAstu kR^itvA pApAni mAnavAH |
nirmalAH svargamAyAnti santaH sukR^itino yathA || 60||
ityevaM manurapyAha gautamo.api visheShataH |
vishiShTashiShTAchAro.api mUlAdeva prasiddhyati || 61||
tAnAchAryopadeshAMshcha rAjadaNDAMshcha pAlayet |
tasmAdAchAryarAjAnAvanavadyau na nindayet || 62||
dharmasya paddhatirhyeShA jagataH sthitihetve |
sarvavarNAshramANAM hi yathAshAstraM vidhIyate || 63||
kR^ite vishvagururbrahmA tretAyAmR^iShIsattamaH |
dvApare vyAsa eva syAt kalAvatra bhavAmyaham || 64||
maThAshchatvAra AchAryAchatvArashchadhurandharAH |
sampradAyAshcha chatvAra eShA dharmavyavasthitiH || 65||
athordhvaM sheShA AmnAyAH vij~nAnaika vigrahAH
pa~nchamastUrdhva AmnAyaH sumerumaTha uchyate |
sampradAyo.asya kAshI syAt satyaj~nAnAbhidhe pade || 66||
kailAsaH kShetramityuktaM devatA.asya nira~njanaH |
devI mAyA tathAchArya Ishvaro.asya prakIrtitaH || 67||
tIrtha tu mAnasaM proktaM brahmatattvAvagAhi tat |
tatra saMyogamAtreNa saMnyAsaM samupAshrayet || 68||
sUkShmavedasya vaktA cha tatra dharmaM samAcharet |
ShaShTha svAtmAkhya AmnAyaH paramAtmA maTho mahAn || 69||
sattvatoShaH sampradAyaH padaM yogamanusmaret |
nabhaH sarovaraM kShetraM parahaMso.asya devatA || 70||
devI syAnmAnasI mAyA AchAryashchetanAhvayaH |
tripuTItIrthamutkR^iShTaM sarvapuNyapradAyakam || 71||
bhava\-pAshavinAshAya saMnyAsaM tatra chAshrayet |
vedAntavAkyavaktA cha tatra dharmaM samAcharet || 72||
saptamo niShkalAmnAyaH sahasrArkadyutirmaThaH |
sampradAyo.asya sachChiShyaH shrIguroH pAduke pade || 73||
tatrAnubhUtiH kShetraM syAd vishvarUpo.asya devatA |
devI chichChaktinAmnI hi AchAryaH sadguruH smR^itaH || 74||
sachChAstrashravaNaM tIrthaM jarAmR^ityuvinAshakam |
pUrNanandaprasAdena saMnyAsaM tatra chAshrayet || 75||

|| iti shrImadbhagavatpAdasvAmi Adyasha~NkarAchAryakR^itaH
shrImanmaThAmnAyamahAnushAsanaM sampUrNam ||

##
Encoded and proofread by Ankur Nagpal (ankurnagpal108 at gmail.com)

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}