% Text title            : tattvopadesha
% File name             : tattvopadesha.itx
% Category              : shankarAchArya, advice
% Location              : doc\_z\_misc\_shankara
% Author                : Adi Shankaracharya
% Proofread by          : Sunder Hattangadi Ferit Arav f.arav at home.nl
% Description/comments  : Complete works 16 Prakarana 2 Page 195, 1910 Vani Vilas edition
% Latest update         : November 21, 2020
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Tattvopadeshah ..}##
\itxtitle{.. tattvopadeshaH ..}##\endtitles ##
tattva.npadArthashuddhyarthaM guruH shiShyaM vacho.abravIt |
vAkye tattvamasItyatra tvampadArthaM vivechaya || 1||
na tvaM deho.asi dR^ishyatvAdupajAtyAdimattvataH |
bhautikatvAdashuddhatvAdanityattvAttathaiva cha || 2||
adR^ishyo rUpahInastvaM jAtihIno.apyabhautikaH |
shuddhanityo.asi dR^igrUpo ghaTo yadvanna dR^igbhavet || 3||
na bhavAnindriyANyeShAM karaNatvena yA shrutiH |
prerakastvaM pR^ithaktebhyo na kartA karaNaM bhavet || 4||
nAnaitAnyekarUpastvaM bhinnastebhyaH kutaH shR^iNu |
na chaikendriyarUpastvaM sarvatrAhampratItitaH || 5||
na teShAM samudAyo.asi teShAmanyatamasya cha |
vinAshe.apyAtmadhIstAvadasti syAnnaivamanyathA || 6||
pratyekamapi tAnyAtmA naiva tatra nayaM shR^iNu |
nAnAsvAmikadeho.ayaM nashyedbhinnamatAshrayaH || 7||
nAnAtmAbhimataM naiva viruddhaviShayatvataH |
svAmyaikye tu vyavasthA syAdekapArthivadeshavat || 8||
na manastvaM na vA prANo jaDatvAdeva chaitayoH |
gatamanyatra me chittamityanyatvAnubhUtitaH || 9||
kShuttR^iDbhyAM pIDitaH prANo mamAyaM cheti bhedataH |
tayordraShTA pR^ithaktAbhyAM ghaTadraShTA ghaTAdyathA || 10||
suptau lInAsti yA bodhe sarvaM vyApnoti dehakam |
chichChAyayA cha sambaddhA na sA buddhirbhavAndvija || 11||
nAnArUpavatI bodhe suptau lInAticha~nchalA |
yato dR^igekarUpastvaM pR^ithaktasya prakAshakaH || 12||
suptau dehAdyabhAve.api sAkShI teShAM bhavAnyataH |
svAnubhUtisvarUpatvAnnAnyastasyAsti bhAsakaH || 13||
pramANaM bodhayantaM taM bodhaM mAnena ye janAH |
bubhutsyante ta edhobhirdagdhuM vA~nChanti pAvakam || 14||
vishvamAtmAnubhavati tenAsau nAnubhUyate |
vishvaM prakAshayatyAtmA tenAsau na prakAshyate || 15||
IdR^ishaM tAdR^ishaM naitanna parokShaM sadeva yat |
tadbrahma tvaM na dehAdidR^ishyarUpo.asi sarvadR^ik || 16||
ida.ntvenaiva yadbhAti sarvaM tachcha niShidhyate |
avAchyatattvamanidaM na vedyaM svaprakAshataH || 17||
satyaM j~nAnamanantaM cha brahmalakShaNamuchyate |
satyatvAjj~nAnarUpatvAdanantatvAttvameva hi || 18||
sati dehAdyupAdhau syAjjIvastasya niyAmakaH |
IshvaraH shaktyupAdhitvAddvayorbAdhe svayamprabhaH || 19||
apekShyate.akhilairmAnairna yanmAnamapekShate |
vedavAkyaM pramANaM tadbrahmAtmAvagatau matam || 20||
ato hi tattvamasyAdivedavAkyaM pramANataH |
brahmaNo.asti yayA yuktyA sAsmAbhiH samprakIrtyate || 21||
shodhite tvampadArthe hi tattvamasyAdi chintitam |
sambhavennAnyathA tasmAchChodhanaM kR^itamAditaH || 22||
dehendriyAdidharmAnyaH svAtmanyAropayanmR^iShA |
kartR^itvAdyabhimAnI cha vAchyArthastva.npadasya saH || 23||
dehendriyAdisAkShI yastebhyo bhAti vilakShaNaH |
svayaM bodhasvarUpatvAllakShyArthastva.npadasya saH || 24||
vedAntavAkyasaMvedyavishvAtItAkSharAdvayam |
vishuddhaM yatsvasaMvedyaM lakShyArthastatpadasya saH || 25||
sAmAnAdhikaraNyaM hi padayostattvamordvayoH |
sambandhastena vedAntairbrahmaikyaM pratipAdyate || 26||
bhinnapravR^ittihetutve padayorekavastuni |
vR^ittitvaM yattathaivaikyaM vibhaktyantakayostayoH || 27||
sAmAnAdhikaraNyaM tatsampradAyibhirIritam |
tathA padArthayoreva visheShaNavisheShyatA || 28||
ayaM saH so.ayamitivatsambandho bhavati dvayoH |
pratyaktvaM sadvitIyatvaM parokShatvaM cha pUrNatA || 29||
parasparaviruddhaM syAttato bhavati lakShaNA |
lakShyalakShaNasambandhaH padArthapratyagAtmanoH || 30||
mAnAntaroparodhAchcha mukhyArthasyAparigrahe |
mukhyArthasyAvinAbhUte pravR^ittirlakShaNochyate || 31||
trividhA lakShaNA j~neyA jahatyajahatI tathA |
anyobhayAtmikA j~neyA tatrAdyA naiva sambhavet || 32||
vAchyArthamakhilaM tyaktvA vR^ittiH syAdyA tadanvite |
ga~NgAyAM ghoSha itivajjahatI lakShaNA hi sA || 33||
vAchyArthasyaikadeshasya prakR^ite tyAga iShyate |
jahatI sambhavennaiva sampradAyavirodhataH || 34||
vAchyArthamaparityajya vR^ittiranyArthake tu yA |
kathiteyamajahatI shoNo.ayaM dhAvatItivat || 35||
na sambhavati sApyatra vAchyArthe.ativirodhataH |
virodhAMshaparityAgo dR^ishyate prakR^ite yataH || 36||
vAchyArthasyaikadeshaM cha parityajyaikadeshakam |
yA bodhayati sA j~neyA tR^itIyA bhAgalakShaNA || 37||
so.ayaM vipra idaM vAkyaM bodhayatyAditastathA |
tatkAlatvavishiShTaM cha tathaitatkAlasaMyutam || 38||
atastayorviruddhaM tattatkAlatvAdidharmakam |
tyaktvA vAkyaM yathA viprapiNDaM bodhayatIritam || 39||
tathaiva prakR^ite tattvamasItyatra shrutau shR^iNu |
pratyaktvAdInparityajya jIvadharmA.nstvamaHpadAt || 40||
sarvaj~natvaparokShAdInparityajya tataHpadAt |
shuddhaM kUTasthamadvaitaM bodhayatyAdarAtparam || 41||
tattvamoH padayoraikyameva tattvamasItyalam |
itthamaikyAvabodhena samyagj~nAnaM dR^iDhaM nayaiH || 42||
ahaM brahmeti vij~nAnaM yasya shokaM taratyasau |
AtmA prakAshamAno.api mahAvAkyaistathaikatA || 43||
tattvamorbodhyate.athApi paurvAparyAnusArataH |
tathApi shakyate naiva shrIguroH karuNAM vinA || 44||
aparokShayituM loke mUDhaiH paNDitamAnibhiH |
antaHkaraNasa.nshuddhau svayaM j~nAnaM prakAshate || 45||
vedavAkyairataH kiM syAdguruNeti na sAmpratam |
AchAryavAnpuruSho hi vedetyevaM shrutirjagau || 46||
anAdAviha saMsAre bodhako gurureva hi |
ato brahmAtmavastvaikyaM j~nAtvA dR^ishyamasattayA || 47||
advaite brahmaNi stheyaM pratyagbrahmAtmanA sadA |
tatpratyakShAtparij~nAtamadvaitabrahmachidghanam || 48||
pratipAdyaM tadevAtra vedAntairna dvayaM jaDam |
sukharUpaM chidadvaitaM duHkharUpamasajjaDam || 49||
vedAntaistaddvayaM samya~NnirNItaM vastuto nayAt |
advaitameva satyaM tvaM viddhi dvaitamasatsadA || 50||
shuddhe kathamashuddhaH syAd.hdR^ishyaM mAyAmayaM tataH |
shuktau rUpyaM mR^iShA yadvattathA vishvaM parAtmani || 51||
vidyate na svataH sattvaM nAsataH sattvamasti vA |
bAdhyatvAnnaiva saddvaitaM nAsatpratyakShabhAnataH || 52||
sadasanna viruddhatvAdato.anirvAchyameva tat |
yaH pUrvameka evAsItsR^iShTvA pashchAdidaM jagat || 53||
praviShTo jIvarUpeNa sa evAtmA bhavAnparaH |
sachchidAnanda eva tvaM vismR^ityAtmatayA param || 54||
jIvabhAvamanuprAptaH sa evAtmAsi bodhataH |
advayAnandachinmAtraH shuddhaH sAmrAjyamAgataH || 55||
kartR^itvAdIni yAnyAsaMstvayi brahmAdvaye pare |
tAnIdAnIM vichArya tvaM kiMsvarUpANi vastutaH || 56||
atraiva shR^iNu vR^ittAntamapUrvaM shrutibhAShitam |
kashchidgAndhAradeshIyo mahAratnavibhUShitaH || 57||
svagR^ihe svA~NgaNe suptaH pramattaH sankadAchana |
rAtrau chauraH samAgatya bhUShaNAnAM pralobhitaH || 58||
baddhvA deshAntaraM chaurairnItaH sangahane vane |
bhUShaNAnyapahR^ityApi baddhAkShakarapAdakaH || 59||
nikShipto vipine.atIva kushakaNTakavR^ishchikaiH |
vyAlavyAghrAdibhishchaiva sa~Nkule tarusa~NkaTe || 60||
vyAlAdiduShTasatvebhyo mahAraNye bhayAturaH |
shilAkaNTakadarbhAdyairdehasya pratikUlakaiH || 61||
kriyamANe viluThane vishIrNA~Ngo.asamarthakaH |
kShuttR^iDAtapavAyvagnyAdibhistapto.atitApakaiH || 62||
bandhamuktau tathA deshaprAptAveva suduHkhadhIH |
dadR^ishe ka.nchidAkroshannaikaM tatraiva tasthivAn || 63||
tathA rAgAdibhirvargaiH shatrubhirduHkhadAyibhiH |
chaurairdehAbhimAnAdyaiH svAnandadhanahAribhiH || 64||
brahmAnande pramattaH svAj~nAnanidrAvashIkR^itaH |
baddhastvaM bandhanairbhogatR^iShNAjvarAdibhirdR^iDham || 65||
advayAnandarUpAttvAM prachyAvyAtIva dhUrtakaiH |
dUranIto.asi deheShu saMsArAraNyabhUmiShu || 66||
sarvaduHkhanidAneShu sharIrAditrayeShu cha |
nAnAyoniShu karmAndhavAsanAnirmitAsu cha || 67||
praveshito.asi sR^iShTo.asi baddhaH svAnandadR^iShTitaH |
anAdikAlamArabhya duHkhaM chAnubhavansadA || 68||
janmamR^ityujarAdoShanarakAdiparamparAm |
nirantaraM viShaNNo.anubhavannatyantashokavAn || 69||
avidyAbhUtabandhasya nivR^ittau duHkhadasya cha |
svarUpAnandasa.nprAptau satyopAyaM na labdhavAn || 70||
yathA gAndhAradeshIyashchiraM daivAddayAlubhiH |
kaishchitpAnthaiH pariprAptairmuktadR^iShTyAdibandhanaH || 71||
saH svasthairupadiShTashcha paNDito nishchitAtmakaH |
grAmAdgrAmAntaraM gachChenmedhAvI mArgatatparaH || 72||
gatvA gAndhAradeshaM sa svagR^ihaM prApya pUrvavat |
bAndhavaiH sampariShvaktaH sukhI bhUtvA sthito.abhavat || 73||
tvamapyevamanekeShu duHkhadAyiShu janmasu |
bhrAnto daivAchChubhe mArge jAtashraddhaH sukarmakR^it || 74||
varNAshramAchAraparo.avAptapuNyamahodayaH |
IshvarAnugrahAllabdho brahmavidgurusattamaH || 75||
vidhivatkR^itasa.nnyAso vivekAdiyutaH sudhIH |
prApto brahmopadesho.adya vairAgyAbhyAsataH param || 76||
paNDitastatra medhAvI yuktyA vastu vichArayan |
nididhyAsanasampannaH prApto hi tvaM paraM padam || 77||
ato brahmAtmavij~nAnamupadiShTaM yathAvidhi |
mayAchAryeNa te dhIra samyaktatra prayatnavAn || 78||
bhUtvA vimuktabandhastvaM ChinnadvaitAtmasaMshayaH |
nirdvandvo niHspR^iho bhUtvA vicharasva yathAsukham || 79||
vastuto niShprapa~ncho.asi nityamuktaH svabhAvataH |
na te bandhavimokShau staH kalpitau tau yatastvayi || 80||
na nirodho na chotpattirna baddho na cha sAdhakaH |
na mumukShurna vai mukta ityeShA paramArthatA || 81||
shrutisiddhAntasAro.ayaM tathaiva tvaM svayA dhiyA |
saMvichArya nididhyAsya nijAnandAtmakaM param || 82||
sAkShAtkR^itvA parichChinnAdvaitabrahmAkSharaM svayam |
jIvanneva vinirmukto vishrAntaH shAntimAshraya || 83||
vichAraNIyA vedAnto vandanIyo guruH sadA |
gurUNAM vachanaM pathyaM darshanaM sevanaM nR^iNAm || 84||
gururbrahma svayaM sAkShAtsevyo vandyo mumukShubhiH |
nodvejanIya evAyaM kR^itaj~nena vivekinA || 85||
yAvadAyustvayA vandyo vedAntA gururIshvaraH |
manasA karmaNA vAchA shrutirevaiSha nishchayaH || 86||
bhAvAdvaitaM sadA kuryAtkriyAdvaitaM na karhichit |
advaitaM triShu lokeShu nAdvaitaM guruNA saha || 87||

iti shrImatparamahaMsaparivrAjakAchAryasya
shrIgovindabhagavatpUjyapAdashiShyasya
shrImachCha~NkarabhagavataH kR^itau
tattvopadeshaH sampUrNaH ||
##
Prooofread by Sunder HAttangadi
and Ferit Arav f.arav at home.nl

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}