Kumbhaghonam Edition in Odia/Oriya Script
17. ମହାପ୍ରସ୍ଥାନିକପର୍ବ
ମହାପ୍ରସ୍ଥାନିକପର୍ବ - ଅଧ୍ଯାଯ 001
॥ ଶ୍ରୀଃ ॥
17.1. ଅଧ୍ଯାଯଃ 001
Mahabharata - Mahaprasthanika Parva - Chapter Topics
ଭ୍ରାତୃଭିର୍ଦ୍ରୌପଦ୍ଯା ଚ ସହ ସ୍ବର୍ଗେ ଜିଗମିଷୁଣା ଯୁଧିଷ୍ଠିରେଣ ଯୁଯୁତ୍ସୌ ରାଜ୍ଯଭାରନିବେଶନପୂର୍ବକଂ ପରିକ୍ଷିତୋ ରାଜ୍ଯେଽଭିଷେଚନମ୍॥ 1 ॥ ତଥା କୃଚ୍ଛ୍ରାତ୍ପୌରାନୁମତିସଂପାଦନେନ ବଲ୍କଲଧାରଣାଦିପୂର୍ବକଂ ଶୁନା ସହ ଗୃହାତ୍ପ୍ରସ୍ଥାନମ୍॥ 2 ॥ ଅର୍ଜୁନେନ ମଧ୍ଯେମାର୍ଗମଗ୍ନିବଚସା ସନିଷଙ୍ଗସ୍ଯ ଗାଣ୍ଡୀବସ୍ଯ ବରୁଣୋଦ୍ଦେଶେନ ସମୁଦ୍ରେ ପ୍ରକ୍ଷେପଣମ୍॥ 3 ॥Mahabharata - Mahaprasthanika Parva - Chapter Text
ଶ୍ରୀବେଦବ୍ଯାସାଯ ନମଃ।
ନାରାଯଣଂ ନମସ୍କୃତ୍ଯ ନରଂ ଚୈବ ନରୋତ୍ତମମ୍।
ଦେବୀଂ ସରସ୍ବତୀଂ ବ୍ଯାସଂ ତତୋ ଜଯମୁଦୀରଯେତ୍॥ 17-1-1 (98316)
ଜନମେଜଯ ଉବାଚ। 17-1-1x (8075)
ଏବଂ ବୃଷ୍ଣ୍ଯନ୍ଧକକୁଲେ ଶ୍ରୁତ୍ବା ମୌସଲମାହବମ୍।
ପାଣ୍ଡବାଃ କିମକୁର୍ବନ୍ତ ତଥା କୃଷ୍ଣେ ଦିବଂ ଗତେ॥ 17-1-1 (98317)
ବୈଶମ୍ପାଯନ ଉବାଚ। 17-1-2x (8076)
ଶ୍ରୁତ୍ବୈବଂ କୌରବୋ ରାଜା ବୃଷ୍ଣୀନାଂ କଦନଂ ମହତ୍।
ପ୍ରସ୍ଥାନେ ମତିମାଧାଯ ବାକ୍ଯମର୍ଜୁନମବ୍ରବୀତ୍॥ 17-1-2 (98318)
କାଲଃ ପଚତି ଭତାନି ସର୍ବାଣ୍ଯେବ ମହାମତେ।
କାଲପାଶମହଂ ମନ୍ଯେ ତ୍ବମପି ଦ୍ରଷ୍ଟୁମର୍ହସି॥ 17-1-3 (98319)
ଇତ୍ଯୁକ୍ତଃ ସ ତୁ କୌନ୍ତେଯଃ କାଲଃ କାଲ ଇତି ବ୍ରୁବନ୍।
ଅନ୍ବପଦ୍ଯତ ତଦ୍ବାକ୍ଯଂ ଭ୍ରାତୁର୍ଜ୍ଯେଷ୍ଠସ୍ଯ ଧୀମତଃ॥ 17-1-4 (98320)
ଅର୍ଜୁନସ୍ଯ ମତଂ ଜ୍ଞାତ୍ବା ଭୀମସେନୋ ଯମୌ ତଥା।
ଅନ୍ବପଦ୍ଯନ୍ତ ତଦ୍ବାକ୍ଯଂ ଯଦୁକ୍ତଂ ସବ୍ଯସାଚିନା॥ 17-1-5 (98321)
ତତୋ ଯୁଯୁତ୍ସୁମାନାଯ୍ଯ ପ୍ରବ୍ରଜନ୍ଧର୍ମକାମ୍ଯଯା।
ରାଜ୍ଯଂ ପରିଦଦୌ ସର୍ବଂ ବୈଶ୍ଯାପୁତ୍ରେ ଯୁଧିଷ୍ଠିରଃ॥ 17-1-6 (98322)
ଅଭିଂଷିଚ୍ଯ ସ୍ବରାଜ୍ଯେ ଚ ରାଜାନଂ ଚ ପରିକ୍ଷିତମ୍।
ଦୁଃଖାର୍ତଶ୍ଚାବ୍ରବୀଦ୍ରାଜା ସୁଭଦ୍ରାଂ ପାଣ୍ଡବାଗ୍ରଜଃ॥ 17-1-7 (98323)
ଏଷ ପୁତ୍ରସ୍ଯ ପୁତ୍ରସ୍ତେ କୁରୁରାଜୋ ଭବିଷ୍ଯତି।
ଯଦୂନାଂ ପରିଶେଷଶ୍ଚ ବଜ୍ରୋ ରାଜା କୃତଶ୍ଚ ହ॥ 17-1-8 (98324)
ପରିକ୍ଷିଦ୍ଧାସ୍ତିନପୁରେ ଶକ୍ରପ୍ରସ୍ଥେ ଚ ଯାଦବଃ।
ବଜ୍ରୋ ରାଜା ତ୍ବଯା ରକ୍ଷ୍ଯୋ ମା ଚାଧର୍ମେ ମନଃ କୃଥାଃ॥ 17-1-9 (98325)
ଇତ୍ଯୁକ୍ତ୍ବା ଧର୍ମରାଜାଃ ସ ବାସୁଦେବସ୍ଯ ଧୀମତଃ।
ମାତୁଲସ୍ଯ ଚ ବୃଦ୍ଧସ୍ଯ ରାମଦୀନାଂ ତଥୈବ ଚ॥ 17-1-10 (98326)
ଭ୍ରାତୃଭିଃ ସହ ଧର୍ମାତ୍ମା କୃତ୍ବୋଦକମତନ୍ଦ୍ରିତଃ।
ଶ୍ରାଦ୍ଧାନ୍ଯଦ୍ଦିଶ୍ଯ ସର୍ବେଷାଂ ଚକାର ବିଦିବତ୍ତଦା॥ 17-1-11 (98327)
ଦ୍ବୈପାଯନଂ ନାରଦଂ ଚ ମାର୍କଣ୍ଡେଯଂ ତପୋଧନମ୍।
ଭାରଦ୍ବାଜଂ ଯାଜ୍ଞବଲ୍କ୍ଯଂ ହରିମୁଦ୍ଦିଶ୍ଯ ଯତ୍ନବାନ୍।
ଅଭୋଜଯତ୍ସ୍ବାଦୁ ଭୋଜ୍ଯଂ କୀର୍ତଯିତ୍ବା ଚ ଶାର୍ଙ୍ଗିଣଂ॥ 17-1-12 (98328)
ଦଦୌ ରତ୍ନାନି ବାସାଂସି ଗ୍ରାମାନଶ୍ବାନ୍ରଥାଂସ୍ତଥା।
ସ୍ତ୍ରିଯଶ୍ଚ ଦ୍ବିଜମୁଖ୍ଯେଭ୍ଯସ୍ତଦା ଶତସହସ୍ରଶଃ॥ 17-1-13 (98329)
କୃପମଭ୍ଯର୍ଚ୍ଯ ଚ ଗୁରୁମଥ ପୌରପୁରସ୍କୃତମ୍।
`ଆହୂଯ ଭରତଶ୍ରେଷ୍ଠ ସଂନିବେଶ୍ଯାସନେ ତଦା।'
ଶିଷ୍ଯଂ ପରିକ୍ଷିତଂ ତସ୍ମୈ ତଦୌ ଭରତସତ୍ତମଃ॥ 17-1-14 (98330)
ତତସ୍ତୁ ପ୍ରକୃତୀଃ ସର୍ବାଃ ସମାନାଯ୍ଯ ଯୁଧିଷ୍ଠିରଃ।
ସର୍ବମାଚଷ୍ଟ ରାଜର୍ଷିକୀର୍ଷିତମଥାତ୍ମନଃ॥ 17-1-15 (98331)
ତେ ଶ୍ରୁତ୍ବୈବ ବଚସ୍ତସ୍ଯ ପୌରଜାନପଦା ଜନାଃ।
ଭୃଶମୁଦ୍ବିଗ୍ରମନସୋ ନାଭ୍ଯନନ୍ଦନ୍ତ ତଦ୍ବଚଃ॥ 17-1-16 (98332)
ନୈବଂ କର୍ତବ୍ଯମିତି ତେ ତଦୋଚୁସ୍ତଂ ଜନାଧିପମ୍।
ନ ଚ ରାଜା ତଥାଽକାର୍ଷୀତ୍କାଲପର୍ଯାଯଧର୍ମିବିତ୍॥ 17-1-17 (98333)
ତତୋଽନୁମାନ୍ଯ ଧର୍ମାତ୍ମା ପୌରଜାନପଦଂ ଜନମ୍।
ଗମନାଯ ମତିଂ ଚକ୍ରେ କୃଷ୍ଣସ୍ଯ ଗମନାଦପି॥ 17-1-18 (98334)
`ବର୍ତମାନେ ବିବାଦେ ତୁ ବାସ୍ତୁବିକ୍ରଯିଣଂ ପ୍ରତି।
ଧନେଚ୍ଛା ଯୁଗପତ୍ପ୍ରାପ୍ତା କ୍ଷେତ୍ରତସ୍ବାମିଭୂଭୃତାମ୍॥ 17-1-19 (98335)
ପ୍ରାପ୍ତଂ କଲିଯୁଗଂ ଜ୍ଞାତ୍ବା ସହଦେବୋ ହସନ୍ନିବ।
ରାଜ୍ଞସ୍ତୁ କଥଯାମାସ ଧର୍ମୋ ନଷ୍ଟସ୍ତୁ ସଙ୍କରଃ॥ 17-1-20 (98336)
ଶ୍ରୁତ୍ବା ତୁ ଦୁର୍ମନା ରାଜା ପର୍ଯାପ୍ତଂ ଜୀବନଂ ମମ।'
ଇତି ସ୍ମ ରାଜା କୌରବ୍ଯୋ ଧର୍ମପୁତ୍ରୋ ଯୁଧିଷ୍ଠିରଃ।
ଉତ୍ସୃଜ୍ଯାଭରଣାନ୍ଯଙ୍ଗାଜ୍ଜଗୃହେ ବଲ୍କଲାନ୍ଯୁତ॥ 17-1-21 (98337)
ଭୀମାର୍ଜୁନଯମାଶ୍ଚୈବ ଦ୍ରୌପଦୀ ଚ ଯଶସ୍ବିନୀ।
ତଥୈବ ଜଗୃହୁଃ ସର୍ବେ ବଲ୍କଲାନି ନରାଧିପ॥ 17-1-22 (98338)
ବିଧିବତ୍କାରଯିତ୍ବେଷ୍ଟିଂ ନୈଷ୍ଠିକୀଂ ଭରତର୍ଷଭ।
ସମୁତ୍ସୃଜ୍ଯାପ୍ସୁ ସର୍ବେଽଗ୍ନୀନ୍ପ୍ରତସ୍ଥୁର୍ନରପୁଙ୍ଗବାଃ॥ 17-1-23 (98339)
ତତଃ ପ୍ରରୁରୁଦୁଃ ସର୍ବାଃ ସ୍ତ୍ରିଂଯୋ ଦୃଷ୍ଟ୍ବା ନରୋତ୍ତମାନ୍।
ପ୍ରସ୍ଥିତାନ୍ଦ୍ରୌପଦୀଷଷ୍ଠାନ୍ପୁରା ଦ୍ଯୂତଜିତାନ୍ଯଥା॥ 17-1-24 (98340)
ହର୍ଷୋଽଭବଚ୍ଚ ସର୍ବେଷାଂ ଭ୍ରାତୄଣାଂ ଗମନଂ ପ୍ରତି।
ଯୁଧିଷ୍ଠିରମତଂ ଜ୍ଞାତ୍ବା ବୃଷ୍ଣିକ୍ଷଯମବେକ୍ଷ୍ଯ ଚ। 17-1-25 (98341)
ଭ୍ରାତରଃ ପଞ୍ଚ କୃଷ୍ଣା ଚ ଷଷ୍ଠୀ ଶ୍ବା ଚୈବ ସପ୍ତମଃ।
ଆତ୍ମନା ସପ୍ତମୋ ରାଜା ନିର୍ଯଯୌ ଗଜସାହ୍ବଯାତ୍।
ପୌରୈରନୁଗତୋ ଦୂରଂ ସର୍ବୈରନ୍ତଃପୁରୈସ୍ତଥା॥ 17-1-26 (98342)
ନ ଚୈନମଶକତ୍କଶ୍ଚିନ୍ନିବର୍ତସ୍ବେତି ଭାଷିତୁମ୍।
ନ୍ଯବର୍ତନ୍ତ ତତଃ ସର୍ବେ ନରା ନଗରବାସିନଃ॥ 17-1-27 (98343)
କୃପପ୍ରଭୃତଯଶ୍ଚୈବ ଯୁଯୁତ୍ସୁଂ ପର୍ଯବାରଯନ୍।
ବିବେଶ ଗଙ୍ଗାଂ କୌରବ୍ଯ ଉଲୂପୀ ଭୁଜଗାତ୍ମଜା॥ 17-1-28 (98344)
ଚିତ୍ରାଙ୍ଗଦା ଯଯୌ ଚାପି ମଣଲୂରପୁରଂ ପ୍ରତି।
ଶିଷ୍ଟାଃ ପରିକ୍ଷିତଂ ତ୍ବନ୍ଯା ମାତରଃ ପର୍ଯବାରଯନ୍॥ 17-1-29 (98345)
ପାଣ୍ଡବାଶ୍ଚ ମହାତ୍ମାନୋ ଦ୍ରୌପଦୀ ଚ ଯଶସ୍ବିନୀ।
କୃତୋପବାସାଃ କୌରବ୍ଯ ପ୍ରଯଯୁଃ ପ୍ରାଙ୍ମୁଖାସ୍ତତଃ॥ 17-1-30 (98346)
ଯୋଗଯୁକ୍ତା ମହାତ୍ମାନସ୍ତ୍ଯାଗଧର୍ମମୁପେଯୁଷଃ।
ଅଭିଜଗ୍ମୁର୍ବହୂନ୍ଦେସାନ୍ସରିତଃ ସାଗରାଂସ୍ତଥା॥ 17-1-31 (98347)
ଯୁଧିଷ୍ଠିରୋ ଯଯାବଗ୍ରେ ଭୀମସ୍ତୁ ତଦନନ୍ତରମ୍।
ଅର୍ଜୁନସ୍ତସ୍ଯ ଚାନ୍ବେବ ଯମୌ ଚାପି ଯଥାକ୍ରମମ॥ 17-1-32 (98348)
ପୃଷ୍ଠତସ୍ତୁ ବରାରୋହା ଶ୍ଯାମା ପଦ୍ମଦଲେକ୍ଷଣା।
ଦ୍ରୌପଦୀ ଯୋଷିତାଂଶ୍ରେଷ୍ଠା ଯଯୌ ଭରତସତ୍ତମ। 17-1-33 (98349)
ଶ୍ବା ଚୈବାନୁଯାଯାବେକଃ ପ୍ରସ୍ଥିତାନ୍ପାଣ୍ଡବାନ୍ବନମ୍।
କ୍ରମେଣି ତେ ଯଯୁର୍ବୀରା ଲୌହିତ୍ଯଂ ସଲିଲାର୍ଣବମ୍॥ 17-1-34 (98350)
ଗାଣ୍ଡୀବଂ ତୁ ଧନୁର୍ଦିବ୍ଯଂ ନ ମୁମୋଚ ଧନଂଜଯଃ।
ରତ୍ନଲୋଭାନ୍ମହାରାଜ ତେ ଚାକ୍ଷଯ୍ଯେ ମହେଷୁଧୀ॥ 17-1-35 (98351)
ଅଗ୍ନିଂ ତେ ଦଦୃଶୁସ୍ତତ୍ର ସ୍ଥିତଂ ଶୈଲମିବାଗ୍ରତଃ।
ମାର୍ଗମାବୃତ୍ଯ ତିଷ୍ଠନ୍ତଂ ସାକ୍ଷାତ୍ପୁରୁଷବିଗ୍ରହମ୍॥ 17-1-36 (98352)
ତତୋ ଦେବଃ ସ ସପ୍ତାର୍ଚିଃ ପାଣ୍ଡବାନିଦମବ୍ରବୀତ୍।
ଭୋଭୋ ପାଣ୍ଡୁସୁତା ବୀରାଃ ପାବକଂ ମାଂ ନିବୋଧତ॥ 17-1-37 (98353)
ଯୁଧିଷ୍ଠିର ମହାବାହୋ ଭୀମସେନ ପରଂତପ।
ଅର୍ଜୁନାଶ୍ବିସୁତୌ ବୀରୌ ନିବୋଧତ ବଚୋ ମମ॥ 17-1-38 (98354)
ଅହମଗ୍ନିଃ କୁରୁଶ୍ରେଷ୍ଠା ମଯା ଦଗ୍ଧଂ ଚ ଖାଣ୍ଡବମ୍।
ଅର୍ଜୁନସ୍ଯ ପ୍ରଭାବେନ ତଥା ନାରାଯଣସ୍ଯ ଚ॥ 17-1-39 (98355)
ଅଯଂ ବଃ ଫଲ୍ଗୁନୋ ଭ୍ରାତା ଗାଣ୍ଡୀବଂ ପରମାଯୁଧମ୍।
ପରିତ୍ଯଜ୍ଯ ବନେ ଯାତୁ ନାନେନାର୍ଥୋସ୍ତି କଶ୍ଚନ॥ 17-1-40 (98356)
ଚକ୍ରରତ୍ନଂ ତୁ ଯତ୍କୃଷ୍ଣେ ସ୍ଥିତମାସୀନ୍ମହାତ୍ମନି।
ଗତଂ ତଚ୍ଚ ପୁନର୍ହସ୍ତେ କାଲେନୈଷ୍ଯତି ତସ୍ଯ ହ॥ 17-1-41 (98357)
ବରୁଣାଦାହୃତଂ ପୂର୍ବଂ ମଯୈତତ୍ପାର୍ଥକାରଣାତ୍।
ଗାଣ୍ଡୀବଂ ଧନୁଷାଂ ଶ୍ରେଷ୍ଠଂ ବରୁଣାଯୈବ ଦୀଯତାମ୍॥ 17-1-42 (98358)
ତତସ୍ତେ ଭ୍ରାତରଃ ସର୍ବେ ଧନଂଜଯମଚୋଦଯନ୍।
ସ ଜଲେ ପ୍ରାକ୍ଷିପଚ୍ଚୈତତ୍ତଥାଽକ୍ଷଯ୍ଯେ ମହେଷୁଧୀ॥ 17-1-43 (98359)
ତତୋଽଗ୍ନିର୍ଭରତଶ୍ରେଷ୍ଠ ତତ୍ରୈବାନ୍ତରଧୀଯତ।
ଯଯୁସ୍ଚ ପାଣ୍ଡବା ବୀରାସ୍ତତସ୍ତେ ଦକ୍ଷିଣାମୁଖାଃ॥ 17-1-44 (98360)
ତତସ୍ତେ ତୂତ୍ତରେଣୈବ ତୀରେଣ ଲବଣାଂଭସଃ।
ଜଗ୍ମୁର୍ଭରତଶାର୍ଦୂଲ ଦିଶଂ ଦକ୍ଷିଣପଶ୍ଚିମାମ୍॥ 17-1-45 (98361)
ତତଃ ପୁନଃ ସମାବୃତ୍ତାଃ ପଶ୍ଚିମାଂ ଦିଶମେବ ତେ।
ଦଦୃଶୁର୍ଦ୍ବାରକାଂ ଚାପି ସାଗରେଣ ପରିପ୍ଲୁତାମ୍॥ 17-1-46 (98362)
ଉଦୀଚୀଂ ପୁନରାବୃତ୍ତ୍ଯ ଯଯୁର୍ଭରତସତ୍ତମାଃ।
ପ୍ରାଦକ୍ଷିଣ୍ଯଂ ଚିକୀର୍ଷନ୍ତଃ ପୃଥିବ୍ଯା ଯୋଗଧର୍ମିଣଃ॥ ॥ 17-1-47 (98363)
ଇତି ଶ୍ରୀମନ୍ମହାଭାରତେ ମହାପ୍ରସ୍ଥାନିକପର୍ବଣି ପ୍ରଥମୋଽଧ୍ଯାଯଃ॥ 1 ॥
Mahabharata - Mahaprasthanika Parva - Chapter Footnotes
7-1-2 ପ୍ରସ୍ଥାନେ ସ୍ବର୍ଗଂ ଗନ୍ତୁଂ ଗୃହାନ୍ନିଃସରଣେ॥ 7-1-3 ପାଶଂ ତତ୍କୃତମାକର୍ଷଂ ମରଣମିତିଯାବତ୍। ତଦହଂ ମନ୍ଯେ ଅଙ୍ଗୀକରୋମି। ତ୍ବମପ୍ଯେତଦ୍ଦ୍ରଷ୍ଟୁମାଲୋଚିତୁମ୍॥ 7-1-5 କାଲଃ କାଲ ଇତି ନିତ୍ଯାର୍ଥେ ଦ୍ବିତ୍ବମ୍। ଅପରିହାର୍ଯଃ କାଲୋ ମୃତ୍ଯୁଃ ସୋଽଦ୍ଯୈବାସ୍ତୁ କିଂ ଚିରେଣେତ୍ଯାଶଯଃ॥ 7-1-6 ଧର୍ମକାମ୍ଯଯା ପ୍ରବଜନ୍ନତୂଦ୍ବେଗେନ। ପରିଦଦୌ ତଦଧୀନଂ କୃତବାନ୍। ତସ୍ଯାଭିଷେକେଽନଧିକାରାତ୍॥ 7-1-7 ସ୍ବରାଜ୍ଯେ ହାସ୍ତିନପୁରେ॥ 7-1-9 ଅଧର୍ମେ ପରିକ୍ଷିଦ୍ବଜ୍ରଯୋର୍ବାଲଯୋରରକ୍ଷଣଜେ। ମହାପ୍ରସ୍ଥାନମିଯଂ ମା କୁର୍ଯାଦିତି ଭାବଃ॥ 7-1-13 ସ୍ତ୍ରିଯୋ ଦାସୀଃ॥ 7-1-18 ଅନୁମାନ୍ଯାନୁମତିପ୍ରଦଂ କୃତ୍ବା॥ 7-1-23 ନୈଷ୍ଠିକୀଂ ପାର୍ଯନ୍ତିକୀଂ ଉତ୍ସର୍ଗେଷ୍ଟିମିତ୍ଯର୍ଥଃ। ଆତ୍ମନ୍ଯଗ୍ନୀନ୍ସମାରୋପ୍ଯାପ୍ସ୍ବଗ୍ନୀନୁତ୍ସୃଜ୍ଯେତି ଜ୍ଞେଯମ୍॥ 7-1-29 ଅନ୍ଯା ଯୁଧିଷ୍ଠିରାଦୀନାଂ ଭାର୍ଯାଃ ଶ୍ରଉତସୋମାଦୀନାଂ ମାତରଃ॥ 7-1-34 ଲୌହିତ୍ଯଂ ଉଦଯାଚଲପ୍ରାନ୍ତସ୍ଥଂ ସମୁଦ୍ରମ॥ 7-1-40 ଅନେନ ଗାଣ୍ଡୀବେନ। ଅର୍ଥଃ ପ୍ରଯୋଜନମ୍॥ 7-1-41 କାଲେନ ଅବତାରାନ୍ତରେ॥ମହାପ୍ରସ୍ଥାନିକପର୍ବ - ଅଧ୍ଯାଯ 002
॥ ଶ୍ରୀଃ ॥
17.2. ଅଧ୍ଯାଯଃ 002
Mahabharata - Mahaprasthanika Parva - Chapter Topics
ମେରୁଗିରିଂପ୍ରତି ଗଚ୍ଛନ୍ତଂ ଯୁଧିଷ୍ଠିରଂ ଜ୍ଯେଷ୍ଠ୍ଯକ୍ରମାଦନୁଗଚ୍ଛତ୍ସୁ ଦୌପଦ୍ଯାଦିଷୁ ଯୋଗଭ୍ରଂଶାତ୍କ୍ରମେଣ ଭୂମୌ ନିପତତ୍ସୁ ଭୀମପ୍ରଶ୍ନାତ୍ତଂ ପ୍ରତି ଯୁଧିଷ୍ଠିରେଣ ତେଷାଂ ପତନେ ହେତୁକଥନମ୍॥ 1 ॥ ତଥା ତତଃ ଶୁନା କେବଲମନୁଗମ୍ଯମାନେନ ସତା ପୁରୋଗମନମ୍॥ 2 ॥Mahabharata - Mahaprasthanika Parva - Chapter Text
ବୈଶମ୍ପାଯନ ଉବାଚ।
ତତସ୍ତେ ନିଯତାତ୍ମାନ ଉଦୀଚୀଂ ଦିଶମାସ୍ଥିତାଃ।
ଦଦୃଶୁର୍ଯୋଗଯୁକ୍ତାଶ୍ଚ ହିମବନ୍ତଂ ମହାଗିରିମ୍॥ 17-2-1 (98364)
ତଂ ଚାପ୍ଯତିକ୍ରମନ୍ତସ୍ତେ ଦଦୃଶୁର୍ବାଲୁକାର୍ଣବମ୍।
ଅବୈକ୍ଷନ୍ତ ମହାଶୈଲଂ ମେରୁଂ ଶିଖରିଣାଂ ବରମ୍॥ 17-2-2 (98365)
ତେଷାଂ ତୁ ଗଚ୍ଛତାଂ ଶୀଘ୍ରଂ ସର୍ବେଷାଂ ଯୋଗଧାର୍ମିଣାମ୍।
ଯାଜ୍ଞସେନୀ ଭ୍ରଷ୍ଟଯୋଗା ନିପପାତ ମହୀତଲେ॥ 17-2-3 (98366)
ତାଂ ତୁ ପ୍ରପତିତାଂ ଦୃଷ୍ଟ୍ବା ଭୀମସେନୋ ମହାବଲଃ।
ଉବାଚ ଧର୍ମରାଜାନଂ ଯାଜ୍ଞସେନୀମବେକ୍ଷ୍ଯ ହ॥ 17-2-4 (98367)
ନାଧର୍ମଶ୍ଚରିତଃ କଶ୍ଚିଦ୍ରାଜପୁତ୍ର୍ଯା ପରଂତପ।
କାରଣଂ କିଂନୁ ତଦ୍ବ୍ରୂହି ଯତ୍କୃଷ୍ଣା ପତିତା ଭୁବି॥ 17-2-5 (98368)
ଯୁଧିଷ୍ଠିର ଉବାଚ। 17-2-6x (8077)
ପକ୍ଷପାତୋ ମହାନସ୍ଯା ବିଶେଷେଣ ଧନଂଜଯେ।
ତସ୍ଯୈତତ୍ଫଲମଦ୍ଯୈଷା ଭୁଙ୍କ୍ତେ ପୁରୁଷସତ୍ତମ॥ 17-2-6 (98369)
ବୈଶମ୍ପାଯନ ଉବାଚ। 17-2-7x (8078)
ଏବମୁକ୍ତ୍ବାଽନବେକ୍ଷ୍ଯୈନାଂ ଯଯୌ ଭରତସତ୍ତମଃ।
ସମାଧାଯ ମନୋ ଧୀମାନ୍ଧର୍ମାତ୍ମା ପୁରୁଷର୍ଷଭଃ॥ 17-2-7 (98370)
ସହଦେବସ୍ତତୋ ବିଦ୍ବାନ୍ନିପପାତ ମହୀତଲେ।
ତଂ ଚାପି ପତିତଂ ଦୃଷ୍ଟ୍ବା ଭୀମୋ ରାଜାନମବ୍ରବୀତ୍॥ 17-2-8 (98371)
ଯୋଽଯମସ୍ମାସୁ ସର୍ବେଷୁ ଶୁଶ୍ରୂଷୁରନହଂକୃତଃ।
ସୋଯଂ ମାଦ୍ରବତୀପୁତ୍ରଃ କସ୍ମାନ୍ନିପତିତୋ ଭୁବି॥ 17-2-9 (98372)
ଯୁଧିଷ୍ଠିର ଉବାଚ। 17-2-10x (8079)
ଆତ୍ମନଃ ସଦୃଶଂ ପ୍ରାଜ୍ଞଂ ନୈଷୋଽମନ୍ଯତ କଞ୍ଚନ।
ତେନ ଦୋଷେଣ ପତିତୋ ବିଦ୍ବାନେଷ ନୃପାତ୍ମଜଃ॥ 17-2-10 (98373)
ବୈଶମ୍ପାଯନ ଉବାଚ। 17-2-11x (8080)
ଇତ୍ଯୁକ୍ତ୍ବା ତଂ ସମୁତ୍ସୃଜ୍ଯ ସହଦେବଂ ଯଯୌ ତଦା।
ଭ୍ରାତୃଭିଃ ସହ କୌନ୍ତେଯଃ ଶୁନା ଚୈବ ଯୁଧିଷ୍ଠିରଃ॥ 17-2-11 (98374)
କୃଷ୍ଣଂ ନିପତିତାଂ ଦୃଷ୍ଟ୍ବା ସହଦେବଂ ଚ ପାଣ୍ଡବମ୍।
ଆର୍ତୋ ବନ୍ଧୁପ୍ରିଯଃ ଶୂରୋ ନକୁଲୋ ନିପପାତ ହ॥ 17-2-12 (98375)
ତସ୍ମିନ୍ନିପତିତେ ବୀରେ ନକୁଲେ ଚାରୁଦର୍ଶନେ।
ପୁନରେବ ତଦା ଭୀମୋ ରାଜାନମିଦମବ୍ରବୀତ୍॥ 17-2-13 (98376)
ଯୋଽଯମକ୍ଷତଧର୍ମାତ୍ମା ଭ୍ରାତା ବଚନକାରକଃ।
ରୂପେଣାପ୍ରତିମୋ ଲୋକେ ନକୁଲଃ ପତିତୋ ଭୁବି॥ 17-2-14 (98377)
ଇତ୍ଯୁକ୍ତୋ ଭୀମସେନେନ ପ୍ରତ୍ଯୁବାଚ ଯୁଧିଷ୍ଠିରଃ।
ନକୁଲଂ ପ୍ରତି ଧର୍ମାତ୍ମା ସର୍ବବୁଦ୍ଧିମତାଂବରଃ॥ 17-2-15 (98378)
ରୂପେଣି ମତ୍ସମୋ ନାସ୍ତି କଶ୍ଚିଦିତ୍ଯସ୍ଯ ଦର୍ଶନମ୍।
ଅଧିକଶ୍ଚାହମେବୈକ ଇତ୍ଯସ୍ଯ ମନସି ସ୍ଥିତମ୍॥ 17-2-16 (98379)
ନକୁଲଃ ପତିତସ୍ତସ୍ମାଦାଗଚ୍ଛ ତ୍ବଂ ବୃକୋଦର।
ଯସ୍ଯ ଯଦ୍ବିହିତଂ ବୀର ସୋଽବଶ୍ଯଂ ତଦୁପାଶ୍ନୁତେ॥ 17-2-17 (98380)
ତାଂସ୍ତୁ ପ୍ରପତିତାନ୍ଦୃଷ୍ଟ୍ବା ପାଣ୍ଡବଃ ଶ୍ବେତବାହନଃ।
ପପାତ ଶୋକସଂତପ୍ତସ୍ତତୋନୁ ପରବୀରହା॥ 17-2-18 (98381)
ତସ୍ମିଂସ୍ତୁ ପୁରୁଷବ୍ଯାଘ୍ରେ ପତିତେ ଶକ୍ରତେଜସି।
ମ୍ରିଯମାଣେ ଦୁରାଧର୍ଷେ ଭୀମୋ ରାଜାନମବ୍ରବୀତ୍॥ 17-2-19 (98382)
ଅନୃତଂ ନ ସ୍ମରାମ୍ଯସ୍ଯ ସ୍ବୈରେଷ୍ବପି ମହାତ୍ମନଃ।
ଅଥ କସ୍ଯ ବିକାରୋଽଯଂ ଯେନାଯଂ ପତିତୋ ଭୁବି॥ 17-2-20 (98383)
ଯୁଧିଷ୍ଠିର ଉବାଚ। 17-2-21x (8081)
ଏକୋହଂ ନିର୍ଦହେଯଂ ବୈ ଶତ୍ରୂନିତ୍ଯର୍ଜୁନୋଽବ୍ରବୀତ୍।
ନ ଚ ତତ୍କୃତବାନେଷ ଶୂରମାନୀ ତତୋପତତ୍॥ 17-2-21 (98384)
ଅବମେନେ ଧନୁର୍ଗ୍ରାହାନେଷ ସର୍ବାଂଶ୍ଚ ଫଲ୍ଗୁନଃ।
ତଥା ଚୈତନ୍ନ ତୁ ତଥା କର୍ତବ୍ଯଂ ଭୂତିମିଚ୍ଛତା॥ 17-2-22 (98385)
ବୈଶମ୍ପାଯନ ଉବାଚ। 17-2-23x (8082)
ଇତ୍ଯୁକ୍ତ୍ବା ପ୍ରସ୍ଥିତୋ ରାଜା ଭୀମୋଥ ନିପପାତ ହ।
ପତିତଶ୍ଚାବ୍ରବୀଦ୍ଭୀମୋ ଧର୍ମରାଜଂ ଯୁଧିଷ୍ଠିରମ୍॥ 17-2-23 (98386)
ଭୋଭୋ ରାଜନ୍ନବେକ୍ଷସ୍ବ ପତିତୋହଂ ପ୍ରିଯସ୍ତବ।
କିଂନିମିତ୍ତଂ ଚ ପତନଂ ବ୍ରୂହି ମେ ଯଦି ବେତ୍ଥ ହ॥ 17-2-24 (98387)
ଯୁଧିଷ୍ଠିର ଉବାଚ। 17-2-25x (8083)
ଅତିଭୁକ୍ତଂ ଚ ଭବତା ପ୍ରାଣେନ ଚ ବିକତ୍ଥସେ।
ଅନବେକ୍ଷ୍ଯ ପରଂ ପାର୍ଥ ତେନାସି ପତିତଃ କ୍ଷିତୌ॥ 17-2-25 (98388)
ଇତ୍ଯୁକ୍ତ୍ବା ତଂ ମହାବାହୁର୍ଜଗାମାନବଲୋକଯନ୍।
ଶ୍ବାପ୍ଯେକୋନୁଯଯୌ ଯସ୍ତେ ବହୁଶଃ କୀର୍ତିତୋ ମଯା॥ ॥ 17-2-26 (98389)
ଇତି ଶ୍ରୀମନ୍ମହାଭାରତେ ମହାପ୍ରସ୍ଥାନିକପର୍ବଣି ଦ୍ବିତୀଯୋଽଧ୍ଯାଯଃ॥ 2 ॥
Mahabharata - Mahaprasthanika Parva - Chapter Footnotes
7-2-1 ତତୋ ଦିକ୍ତ୍ରଯପ୍ରଦକ୍ଷିଣୀକରଣାନନ୍ତରମ୍। ଯୋଗଯୁକ୍ତାଃ ସମାହିତମନସଃ॥ 7-2-3 ଭ୍ରଷ୍ଟଯୋଗା ଧ୍ଯାନାତ୍ ସ୍ଖଲିତମାନସା॥ 7-2-7 ଅନବେକ୍ଷ୍ଯ ସ୍ବର୍ଗାନ୍ତରାଯରୂପଃ ସ୍ନେହୋ ମାଭୂଦିତି ଭାବଃ॥ମହାପ୍ରସ୍ଥାନିକପର୍ବ - ଅଧ୍ଯାଯ 003
॥ ଶ୍ରୀଃ ॥
17.3. ଅଧ୍ଯାଯଃ 003
Mahabharata - Mahaprasthanika Parva - Chapter Topics
ଶୁନା ସହ ଗଚ୍ଛନ୍ତଂ ଯୁଧିଷ୍ଠିରଂ ପ୍ରତି ଇନ୍ଦ୍ରେଣ ସ୍ବର୍ଗଗମନାଯ ନିଜରତାରୋହଣଚୋଦନା॥ 1 ॥ ଯୁଧିଷ୍ଠିରେ ଶୁନା ବିନା ରଥାରୋହଣମରୋଚଯମାନେ ଯମେନ ନିଜସ୍ବରୂପପ୍ରକାଶନେନ ତତ୍ପ୍ରଶଂସନମ୍॥ 2 ॥ ତତୋ ଯମେନ୍ଦ୍ରାଦିଭୀ ରଥେନ ସ୍ବର୍ଗଂ ପ୍ରାପିତେନ ଯୁଧିଷ୍ଠିରେଣ ତତ୍ର ଭୀମାଦ୍ଯଦର୍ଶନାଦିନ୍ଦ୍ରଂପ୍ରତି ଭ୍ରାତ୍ରାଦୀନ୍ବିନା ସ୍ବସ୍ଯ ସ୍ବର୍ଗେପ୍ଯନଭିରୁଚିକଥନପୂର୍ବକଂ ତତ୍ସମୀପଗମନେଚ୍ଛାନିବେଦନମ୍॥ 3 ॥Mahabharata - Mahaprasthanika Parva - Chapter Text
ବୈଶମ୍ପାଯନ ଉବାଚ।
ତତଃ ସନ୍ନାଦଯଞ୍ଶକ୍ରୋ ଦିବଂ ଭୂମିଂ ଚ ସର୍ବଶଃ।
ରଥେନୋପଯଯୌ ପାର୍ଥମାରୋହେତ୍ଯବ୍ରବୀଚ୍ଚ ତମ୍॥ 17-3-1 (98390)
ସ୍ବଭ୍ରାତୄନ୍ପତିତାନ୍ଦୃଷ୍ଟ୍ବା ଧର୍ମରାଜୋ ଯୁଧିଷ୍ଠିରଃ।
ଅବ୍ରବୀଚ୍ଛୋକସଂତପ୍ତଃ ସହସ୍ରାକ୍ଷମିଦଂ ବଚଃ॥ 17-3-2 (98391)
ଭ୍ରାତରଃ ପତିତା ମେଽତ୍ର ଗଚ୍ଛେଯୁସ୍ତେ ମଯା ସହ।
ନ ବିନା ଭ୍ରାତୃଭିଃ ସ୍ବର୍ଗମିଚ୍ଛେ ଗନ୍ତୁଂ ସୁରେଶ୍ବର॥ 17-3-3 (98392)
ସୁକୁମାରୀ ସୁଖାର୍ହା ଚ ରାଜପୁତ୍ରୀ ପୁରଂଦର।
ସାଽସ୍ମାଭିଃ ସହ ଗଚ୍ଛେତ ତଦ୍ଭବାନନୁମନ୍ଯତାମ୍॥ 17-3-4 (98393)
ଶକ୍ର ଉବାଚ। 17-3-5x (8084)
ଭ୍ରାତୄନ୍ଦ୍ରକ୍ଷ୍ଯସି ସ୍ବର୍ଗେ ତ୍ବମଗ୍ରତସ୍ତ୍ରିଦିବଂ ଗତାନ୍।
କୃଷ୍ଣଯା ସହିତାନ୍ସର୍ବାନ୍ମା ଶୁଚୋ ଭରତର୍ଷଭ॥ 17-3-5 (98394)
ନିକ୍ଷିପ୍ଯ ମାନୁଷଂ ଦେହଂ ଗତାସ୍ତେ ଭରତର୍ଷଭ।
ଅନେନ ତ୍ବଂ ଶରୀରେଣ ସ୍ବର୍ଗଂ ଗନ୍ତା ନ ସଂଶଯଃ॥ 17-3-6 (98395)
ଯୁଧିଷ୍ଠିର ଉବାଚ। 17-3-7x (8085)
ଅଯଂ ଶ୍ବା ଭୂତଭବ୍ଯେଶ ଭକ୍ତୋ ମାଂ ନିତ୍ଯମେବ ହ।
ସ ଗଚ୍ଛେତ ମଯା ସାର୍ଧମାନୃଶଂସ୍ଯା ହି ମେ ମତିଃ॥ 17-3-7 (98396)
ଶକ୍ର ଉବାଚ। 17-3-8x (8086)
ଅମର୍ତ୍ଯତ୍ବଂ ମତ୍ସମତ୍ବଂ ଚ ରାଜ-
ଞ୍ଶ୍ରିଯଂ କୃତ୍ସ୍ନାଂ ମହତୀଂ ଚୈବ ସିଦ୍ଧିମ୍।
ସଂପ୍ରାପ୍ତୋଦ୍ଯ ସ୍ବର୍ଗସୁଖାନି ଚ ତ୍ବଂ
ତ୍ଯଜ ଶ୍ବାନଂ ନାତ୍ର ନୃଶଂସମସ୍ତି॥ 17-3-8 (98397)
ଯୁଧିଷ୍ଠିର ଉବାଚ। 17-3-9x (8087)
ଅନାର୍ଯମାର୍ଯେଣି ସହସ୍ରନେତ୍ର
ଶକ୍ଯଂ କର୍ତୁଂ ଦୁଷ୍କରମେତଦାର୍ଯ।
ମା ମେ ଶ୍ରିଯା ସଙ୍ଗମନଂ ତଯାଽସ୍ତୁ
ଯସ୍ଯାଃ କୃତେ ଭକ୍ତଜନଂ ତ୍ଯଜେଯମ୍॥ 17-3-9 (98398)
ଇନ୍ଦ୍ର ଉବାଚ। 17-3-10x (8088)
ସ୍ବର୍ଗେ ଲୋକେ ଶ୍ବବତାଂ ନାସ୍ତି ଧିଷ୍ଣ୍ଯ-
ମିଷ୍ଟାପୂର୍ତଂ କ୍ରୋଧବଶା ହରନ୍ତି।
ତତୋ ବିଚାର୍ଯି କ୍ରିଯତାଂ ଧର୍ମରାଜ
ତ୍ଯଜ ଶ୍ବାନଂ ନାତ୍ର ନୃଶଂସମସ୍ତି। 17-3-10 (98399)
ଯୁଧିଷ୍ଠିର ଉବାଚ। 17-3-11x (8089)
ଭକ୍ତତ୍ଯାଗଂ ପ୍ରାହୁରତ୍ଯନ୍ତପାପଂ
ତୁଲ୍ଯଂ ଲୋକେ ବ୍ରହ୍ମବଧ୍ଯାକୃତେନ।
ତସ୍ମାନ୍ନାହଂ ଜାତୁ କଥଞ୍ଚନାଦ୍ଯ
ତ୍ଯକ୍ଷ୍ଯାମ୍ଯେନଂ ସ୍ବସୁଖାର୍ଥୀ ମହେନ୍ଦ୍ରଃ॥ 17-3-11 (98400)
ଭୀତଂ ଭକ୍ତଂ ନାନ୍ଯଦସ୍ତୀତି ଚାର୍ତଂ
ପ୍ରାପ୍ତଂ କ୍ଷୀଣଂ ରକ୍ଷଣେ ପ୍ରାଣଲିପ୍ସୁମ୍।
ପ୍ରାଣତ୍ଯାଗାଦପ୍ଯହଂ ନୈବ ମୋକ୍ତୁଂ
ଯତେଯଂ ବୈ ନିତ୍ଯମେତଦ୍ବ୍ରତଂ ମେ॥ 17-3-12 (98401)
ଇନ୍ଦ୍ର ଉବାଚ। 17-3-13x (8090)
ଶୁନା ଦୃଷ୍ଟଂ କ୍ରୋଧବଶା ହରନ୍ତି
ଯଦ୍ଦତ୍ତମିଷ୍ଟଂ ବିବୃତମଥୋ ହୁତଂ ଚ।
ତସ୍ମାଚ୍ଛୁନସ୍ତ୍ଯାଗମିମଂ କୁରୁଷ୍ବ
ଶୁନସ୍ତ୍ଯାଗାତ୍ପ୍ରାପ୍ସ୍ଯସେ ଦେବଲୋକମ୍॥ 17-3-13 (98402)
ତ୍ଯକ୍ତ୍ବା ଭ୍ରାତୄନ୍ଦଯିତାଂ ଚାପି କୃଷ୍ଣାଂ
ପ୍ରାପ୍ତୋ ଲୋକଃ କର୍ମଣା ସ୍ବେନ ବୀର।
ଶ୍ବାନଂ ଚୈନଂ ନ ତ୍ଯଜସେ କଥଂ ନୁ
ତ୍ଯାଗଂ କୃତ୍ସ୍ନଂ ଚାସ୍ଥିତୋ ମୁହ୍ଯସେଽଦ୍ଯ॥ 17-3-14 (98403)
ଯୁଧିଷ୍ଠିର ଉବାଚ। 17-3-15x (8091)
ନ ବିଦ୍ଯତେ ସଂଧିରଥାପି ବିଗ୍ରହୋ
ମୃତୈର୍ମର୍ତ୍ଯୈରିତି ଲୋକେଷୁ ନିଷ୍ଠା।
ନ ତେ ମଯା ଜୀବଯିତୁଂ ହି ଶକ୍ଯା-
ସ୍ତତସ୍ତ୍ଯାଗସ୍ତେଷୁ କୃତୋ ନ ଜୀବତାମ୍॥ 17-3-15 (98404)
ପ୍ରତିପ୍ରଦାନଂ ଶରଣାଗତସ୍ଯ
ସ୍ତ୍ରିଯା ବଧୋ ବ୍ରାହ୍ମଣସ୍ବାପହାରଃ।
ମିତ୍ରଦ୍ରୋହସ୍ତାନି ଚତ୍ବାରି ଶକ୍ର
ଭକ୍ତତ୍ଯାଗଶ୍ଚୈବ ସମୋ ମତୋ ମେ॥ 17-3-16 (98405)
ବୈଶମ୍ପାଯନ ଉବାଚ। 17-3-17x (8092)
ତଦ୍ଧର୍ମରାଜସ୍ଯ ବଚୋ ନିଶମ୍ଯ
ଧର୍ମସ୍ବରୂପୀ ଭଗବାନୁବାଚ।
ଯୁଧିଷ୍ଠିରଂ ପ୍ରୀତିଯୁକ୍ତୋ ନରେନ୍ଦ୍ରଂ
ଶ୍ଲକ୍ଷ୍ଣୈର୍ବାକ୍ଯୈଃ ସଂସ୍ତବସଂପ୍ରଯୁକ୍ତୈଃ॥ 17-3-17 (98406)
ଅଭିଜାତୋସି ରାଜେନ୍ଦ୍ର ପିତୁର୍ବୃତ୍ତେନ ମେଧଯା।
ଅନୁକ୍ରୋଶେନି ଚାନେନ ସର୍ବଭୂତେଷୁ ଭାରତ॥ 17-3-18 (98407)
ପୁରା ଦ୍ବୈତବନେ ଚାସି ମଯା ପୁତ୍ର ପରୀକ୍ଷିତଃ।
ପାନୀଯାର୍ଥେ ପରାକ୍ରାନ୍ତା ଯତ୍ର ତେ ଭ୍ରାତରୋ ହତାଃ॥ 17-3-19 (98408)
ଭୀମାର୍ଜୁନୌ ପରିତ୍ଯଜ୍ଯ ଯତ୍ର ତ୍ବଂ ଭ୍ରାତରାବୁଭୌ।
ମାତ୍ରୋଃ ସାମ୍ଯମଭୀପ୍ସନ୍ବୈ ନକୁଲଂ ଜୀବମିଚ୍ଛସି॥ 17-3-20 (98409)
ଅଯଂ ଶ୍ବା ଭକ୍ତ ଇତ୍ଯେବଂ ତ୍ଯକ୍ତୋ ଦେବରଥସ୍ତ୍ବଯା।
ତସ୍ମାତ୍ସ୍ବର୍ଗେ ନ ତେ ତୁଲ୍ଯଃ କଶ୍ଚିଦସ୍ତି ନରାଧିପଃ॥ 17-3-21 (98410)
ଅତସ୍ତବାକ୍ଷଯା ଲୋକାଃ ସ୍ବଶରୀରେଣ ଭାରତ।
ପ୍ରାପ୍ତୋସି ଭରତଶ୍ରେଷ୍ଠ ଦିବ୍ଯାଂ ଗତିମନୁତ୍ତମାମ୍॥ 17-3-22 (98411)
ବୈଶମ୍ପାଯନ ଉବାଚ। 17-3-23x (8093)
ତତୋ ଧର୍ମଶ୍ଚ ଶକ୍ରଶ୍ଚ ମରୁତଶ୍ଚାଶ୍ବିନାବପି।
ଦେବା ଦେବର୍ଷଯଶ୍ଚୈବ ରଥମାରୋପ୍ଯ ପାଣ୍ଡବମ୍॥ 17-3-23 (98412)
ପ୍ରଯଯୁଃ ସ୍ବୈର୍ବିମାନୈସ୍ତେ ସିଦ୍ଧାଃ କାମବିହାରିଣଃ।
ସର୍ବେ ବିରଜସଃ ପୁଣ୍ଯାଃ ପୁଣ୍ଯବାଗ୍ବୁଦ୍ଧିକର୍ମିଣଃ॥ 17-3-24 (98413)
ସ ତଂ ରଥଂ ସମାସ୍ଥାଯ ରାଜା କୁରୁକୁଲୋଦ୍ବହଃ।
ଊର୍ଧ୍ବମାଚକ୍ରମେ ଶୀଘ୍ରଂ ତେଜସାଽଽବୃତ୍ଯରୋଦସୀ॥ 17-3-25 (98414)
ତତୋ ଦେବନିକାଯ୍ଯସ୍ଥୋ ନାରଦଃ ସର୍ବଲୋକବିତ୍।
ଉବାଚୋଚ୍ଚୈସ୍ତଦା ବାକ୍ଯଂ ବୃହଦ୍ବାଦୀ ବୃହତ୍ତପାଃ॥ 17-3-26 (98415)
ଯେଽପି ରାଜର୍ଷଯଃ ପୂର୍ବେ ତେ ଚାପି ସମୁପସ୍ଥିତାଃ।
କୀତି ପ୍ରଚ୍ଛାଦ୍ଯ ତେଷାଂ ବୈ କୁରୁରାଜୋଽଧିତିଷ୍ଠତି॥ 17-3-27 (98416)
ଲୋକାନାବୃତ୍ଯ ଯଶସା ତେଜସା ବୃତ୍ତସଂପଦା।
ସ୍ବଶରୀରେଣ ସମ୍ପ୍ରାପ୍ତଂ ନାନ୍ଯଂ ଶୁଶ୍ରମ ପାଣ୍ଡବାତ୍॥ 17-3-28 (98417)
ତେଜାଂସି ଯାନି ଦୃଷ୍ଟାନି ଭୂମିଷ୍ଠେନ ତ୍ବଯା ବିଭୋ।
ବେଶ୍ମାନି ଭୁବି ଦେବାନାଂ ପଶ୍ଯାମୂନି ସହସ୍ରଶଃ॥ 17-3-29 (98418)
ନାରଦସ୍ଯ ବଚଃ ଶ୍ରୁତ୍ବା ରାଜା ବଚନମବ୍ରବୀତ୍।
ଭ୍ରାତୄନପଶ୍ଯନ୍ଧର୍ମାତ୍ମା ସ୍ବପକ୍ଷାଂଶ୍ଚୈବ ପାର୍ଥିବାନ୍॥ 17-3-30 (98419)
ଶୁଭଂ ବା ଯଦି ବା ପାପଂ ଭ୍ରାତୄଣାଂ ସ୍ଥାନମଦ୍ଯ ମେ।
ତଦେବ ପ୍ରାପ୍ତୁମିଚ୍ଛାମି ଲୋକାନ୍ଯାନ୍ନ କାମଯେ॥ 17-3-31 (98420)
ରାଜ୍ଞସ୍ତୁ ବଚନଂ ଶ୍ରୁତ୍ବା ଦେବରାଜଃ ପୁରଂଦରଃ।
ଆନୃଶଂସ୍ଯସମାଯୁକ୍ତଂ ପ୍ରତ୍ଯୁବାଚ ଯୁଧିଷ୍ଠିରମ୍॥ 17-3-32 (98421)
ସ୍ଥାନେଽସ୍ମିନ୍ବସ ରାଜେନ୍ଦ୍ର କର୍ମଭିର୍ନିର୍ଜିତେ ଶୁଭୈଃ।
କିଂ ତ୍ବଂ ମାନୁଷ୍ଯକଂ ସ୍ନେହମଦ୍ଯାପି ପରିକର୍ଷସି॥ 17-3-33 (98422)
ସିଦ୍ଧିଂ ପ୍ରାପ୍ତୋସି ପରମାଂ ଯତା ନାନ୍ଯଃ ପୁମାନ୍କ୍ବଚିତ୍।
ନୈବ ତେ ଭ୍ରାତରଃ ସ୍ଥାନଂ ସମ୍ପ୍ରାପ୍ତାଃ କୁରୁନନ୍ଦନ॥ 17-3-34 (98423)
ଅଦ୍ଯାପି ମାନୁଷୋ ଭାବଃ ସ୍ପୃଶତେ ତ୍ବାଂ ନରାଧିପ।
ସ୍ବର୍ଗୋଽଯଂ ପଶ୍ଯ ଦେବର୍ଷୀନ୍ସିଦ୍ଧାଂଶ୍ଚ ତ୍ରିଦିବାଲଯାନ୍॥ 17-3-35 (98424)
ଯୁଧିଷ୍ଠିରସ୍ତୁ ଦେବେନ୍ଦ୍ରମେବଂବାଦିନମୀଶ୍ବରମ୍।
ପୁନରେବାବ୍ରବୀଦ୍ଧୀମାନିଦଂ ବଚନମର୍ଥବତ୍॥ 17-3-36 (98425)
ତୈର୍ବିନା ନୋତ୍ସହେ ବସ୍ତୁମିହ ଦୈତ୍ଯନିବର୍ହଣ।
ଗନ୍ତୁମିଚ୍ଛାମି ତତ୍ରାହଂ ଯତ୍ର ମେ ଭ୍ରାତରୋ ଗତାଃ॥ 17-3-37 (98426)
ଯତ୍ର ସା ବୃହତୀ ଶ୍ଯାମା ବୁଦ୍ଧିସତ୍ତ୍ବଗୁଣାନ୍ବିତା।
ଦ୍ରୌପଦୀ ଯୋଷିତାଂଶ୍ରେଷ୍ଠା ଯତ୍ର ଚୈବ ସୁତା ମମ॥ ॥ 17-3-38 (98427)
ଇତି ଶ୍ରୀମନ୍ମହାଭାରତେ ମହାପ୍ରସ୍ଥାନିକପର୍ବଣି ତୃତୀଯୋଽଧ୍ଯାଯଃ॥ 3 ॥ ମହାପ୍ରସ୍ଥାନିକଂ ପର୍ବଂ ସମାପ୍ତମ୍॥ 17 ॥
------------
ଅତଃ ପରଂ ସ୍ବର୍ଗାରୋହଣପର୍ବଃ ତସ୍ଯାଯମାଦ୍ଯଃ ଶ୍ଲୋକଃ। ଜନମେଜଯ ଉବାଚ। ସ୍ବର୍ଗଂ ତ୍ରିବିଷ୍ଟପଂ ପ୍ରାପ୍ଯ ମମ ପୂର୍ବପିତାମହାଃ। ପାଣ୍ଡବା ଧାର୍ତରାଷ୍ଟ୍ରାଶ୍ଚ କାନି ସ୍ଥାନାନି ଭେଜିରେ॥ 1 ॥ ଇଦଂ ମହାପ୍ରସ୍ଥାନିକଂ ପର୍ବ କୁଂଭଘୋଣସ୍ଯେନ ଟୀ.ଆର୍. କୃଷ୍ଣମାଚାର୍ଯେଣ ଟୀ.ଆର୍. ବ୍ଯାସାଚାର୍ଯେଣ ଚ ମୁମ୍ବଯ୍ଯାଂ ନିର୍ଣଯସାଗରମୁଦ୍ରାଯନ୍ତ୍ରେ ମୁଦ୍ରାପିତମ୍। ଶକାବ୍ଦାଃ 1832 ସନ 1910.