.. vālmīki rāmāyaṇa - bālakāṇḍa ..

sarga - 33

kṛtodvāhe gate tasminbrahmadatte ca rāghava .
aputraḥ putralābhāya pautrīmiṣṭimakalpayat .. 1..

iṣṭyāṃ tu vartamānāyāṃ kuśanābhaṃ mahīpatim .
uvāca paramaprītaḥ kuśo brahmasutastadā .. 2..

putraste sadṛśaḥ putra bhaviṣyati sudhārmikaḥ .
gādhiṃ prāpsyasi tena tvaṃ kīrtiṃ loke ca śāśvatīm .. 3..

evamuktvā kuśo rāma kuśanābhaṃ mahīpatim .
jagāmākāśamāviśya brahmalokaṃ sanātanam .. 4..

kasya cittvatha kālasya kuśanābhasya dhīmataḥ .
jajñe paramadharmiṣṭho gādhirityeva nāmataḥ .. 5..

sa pitā mama kākutstha gādhiḥ paramadhārmikaḥ .
kuśavaṃśaprasūto.asmi kauśiko raghunandana .. 6..

pūrvajā bhaginī cāpi mama rāghava suvratā .
nāmnā satyavatī nāma ṛcīke pratipāditā .. 7..

saśarīrā gatā svargaṃ bhartāramanuvartinī .
kauśikī paramodārā sā pravṛttā mahānadī .. 8..

divyā puṇyodakā ramyā himavantamupāśritā .
lokasya hitakāmārthaṃ pravṛttā bhaginī mama .. 9..

tato.ahaṃ himavatpārśve vasāmi niyataḥ sukham .
bhaginyāḥ snehasaṃyuktaḥ kauśikyā raghunandana .. 10..

sā tu satyavatī puṇyā satye dharme pratiṣṭhitā .
pativratā mahābhāgā kauśikī saritāṃ varā .. 11..

ahaṃ hi niyamādrāma hitvā tāṃ samupāgataḥ .
siddhāśramamanuprāpya siddho.asmi tava tejasā .. 12..

eṣā rāma mamotpattiḥ svasya vaṃśasya kīrtitā .
deśasya ca mahābāho yanmāṃ tvaṃ paripṛcchasi .. 13..

gato.ardharātraḥ kākutstha kathāḥ kathayato mama .
nidrāmabhyehi bhadraṃ te mā bhūdvighno.adhvanīha naḥ .. 14..

niṣpandāstaravaḥ sarve nilīnā mṛgapakṣiṇaḥ .
naiśena tamasā vyāptā diśaś ca raghunandana .. 15..

śanairviyujyate sandhyā nabho netrairivāvṛtam .
nakṣatratārāgahanaṃ jyotirbhiravabhāsate .. 16..

uttiṣṭhati ca śītāṃśuḥ śaśī lokatamonudaḥ .
hlādayanprāṇināṃ loke manāṃsi prabhayā vibho .. 17..

naiśāni sarvabhūtāni pracaranti tatastataḥ .
yakṣarākṣasasaṅghāśca raudrāśca piśitāśanāḥ .. 18..

evamuktvā mahātejā virarāma mahāmuniḥ .
sādhu sādhviti taṃ sarve munayo hyabhyapūjayan .. 19..

rāmo.api saha saumitriḥ kiṃ cidāgatavismayaḥ .
praśasya muniśārdūlaṃ nidrāṃ samupasevate .. 20..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).