.. vālmīki rāmāyaṇa - bālakāṇḍa ..

sarga - 39

devatānāṃ vacaḥ śrutvā bhagavānvai pitāmahaḥ .
pratyuvāca susantrastānkṛtāntabalamohitān .. 1..

yasyeyaṃ vasudhā kṛtsnā vāsudevasya dhīmataḥ .
kāpilaṃ rūpamāsthāya dhārayatyaniśaṃ dharām .. 2..

pṛthivyāścāpi nirbhedo dṛṣṭa eva sanātanaḥ .
sagarasya ca putrāṇāṃ vināśo.adīrghajīvinām .. 3..

pitāmahavacaḥ śrutvā trayastriṃśadarindamaḥ .
devāḥ paramasaṃhṛṣṭāḥ punarjagmuryathāgatam .. 4..

sagarasya ca putrāṇāṃ prādurāsīnmahātmanām .
pṛthivyāṃ bhidyamānāyāṃ nirghāta sama niḥsvanaḥ .. 5..

tato bhittvā mahīṃ sarvāṃ kṛtvā cāpi pradakṣiṇam .
sahitāḥ sagarāḥ sarve pitaraṃ vākyamabruvan .. 6..

parikrāntā mahī sarvā sattvavantaśca sūditāḥ .
devadānavarakṣāṃsi piśācoragakiṃnarāḥ .. 7..

na ca paśyāmahe.aśvaṃ tamaśvahartārameva ca .
kiṃ kariṣyāma bhadraṃ te buddhiratra vicāryatām .. 8..

teṣāṃ tadvacanaṃ śrutvā putrāṇāṃ rājasattamaḥ .
samanyurabravīdvākyaṃ sagaro raghunandana .. 9..

bhūyaḥ khanata bhadraṃ vo nirbhidya vasudhātalam .
aśvahartāramāsādya kṛtārthāś ca nivartatha .. 10..

piturvacanamāsthāya sagarasya mahātmanaḥ .
ṣaṣṭiḥ putrasahasrāṇi rasātalamabhidravan .. 11..

khanyamāne tatastasmindadṛśuḥ parvatopamam .
diśāgajaṃ virūpākṣaṃ dhārayantaṃ mahītalam .. 12..

saparvatavanāṃ kṛtsnāṃ pṛthivīṃ raghunandana .
śirasā dhārayāmāsa virūpākṣo mahāgajaḥ .. 13..

yadā parvaṇi kākutstha viśramārthaṃ mahāgajaḥ .
khedāccālayate śīrṣaṃ bhūmikampastadhā bhavet .. 14..

taṃ te pradakṣiṇaṃ kṛtvā diśāpālaṃ mahāgajam .
mānayanto hi te rāma jagmurbhittvā rasātalam .. 15..

tataḥ pūrvāṃ diśaṃ bhittvā dakṣiṇāṃ bibhiduḥ punaḥ .
dakṣiṇasyāmapi diśi dadṛśuste mahāgajam .. 16..

mahāpadmaṃ mahātmānaṃ sumahāparvatopamam .
śirasā dhārayantaṃ te vismayaṃ jagmuruttamam .. 17..

tataḥ pradakṣiṇaṃ kṛtvā sagarasya mahātmanaḥ .
ṣaṣṭiḥ putrasahasrāṇi paścimāṃ bibhidurdiśam .. 18..

paścimāyāmapi diśi mahāntamacalopamam .
diśāgajaṃ saumanasaṃ dadṛśuste mahābalāḥ .. 19..

taṃ te pradakṣiṇaṃ kṛtvā pṛṣṭvā cāpi nirāmayam .
khanantaḥ samupakrāntā diśaṃ somavatīṃ tadā .. 20..

uttarasyāṃ raghuśreṣṭha dadṛśurhimapāṇḍuram .
bhadraṃ bhadreṇa vapuṣā dhārayantaṃ mahīmimām .. 21..

samālabhya tataḥ sarve kṛtvā cainaṃ pradakṣiṇam .
ṣaṣṭiḥ putrasahasrāṇi bibhidurvasudhātalam .. 22..

tataḥ prāguttarāṃ gatvā sāgarāḥ prathitāṃ diśam .
roṣādabhyakhanansarve pṛthivīṃ sagarātmajāḥ .. 23..

dadṛśuḥ kapilaṃ tatra vāsudevaṃ sanātanam .
hayaṃ ca tasya devasya carantamavidūrataḥ .. 24..

te taṃ yajñahanaṃ jñātvā krodhaparyākulekṣaṇāḥ .
abhyadhāvanta saṅkruddhāstiṣṭha tiṣṭheti cābruvan .. 25..

asmākaṃ tvaṃ hi turagaṃ yajñiyaṃ hṛtavānasi .
durmedhastvaṃ hi samprāptānviddhi naḥ sagarātmajān .. 26..

śrutvā tadvacanaṃ teṣāṃ kapilo raghunandana .
roṣeṇa mahatāviṣṭo huṅkāramakarottadā .. 27..

tatastenāprameyena kapilena mahātmanā .
bhasmarāśīkṛtāḥ sarve kākutstha sagarātmajāḥ .. 28..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).