.. vālmīki rāmāyaṇa - bālakāṇḍa ..

sarga - 43

sa gatvā sāgaraṃ rājā gaṅgayānugatastadā .
praviveśa talaṃ bhūmeryatra te bhasmasātkṛtāḥ .. 1..

bhasmanyathāplute rāma gaṅgāyāḥ salilena vai .
sarva lokaprabhurbrahmā rājānamidamabravīt .. 2..

tāritā naraśārdūla divaṃ yātāś ca devavat .
ṣaṣṭiḥ putrasahasrāṇi sagarasya mahātmanaḥ .. 3..

sāgarasya jalaṃ loke yāvatsthāsyati pārthiva .
sagarasyātmajāstāvatsvarge sthāsyanti devavat .. 4..

iyaṃ ca duhitā jyeṣṭhā tava gaṅgā bhaviṣyati .
tvatkṛtena ca nāmnā vai loke sthāsyati viśrutā .. 5..

gaṅgā tripathagā nāma divyā bhāgīrathīti ca .
tripatho bhāvayantīti tatastripathagā smṛtā .. 6..

pitāmahānāṃ sarveṣāṃ tvamatra manujādhipa .
kuruṣva salilaṃ rājanpratijñām apavarjaya .. 7..

pūrvakeṇa hi te rājaṃstenātiyaśasā tadā .
dharmiṇāṃ pravareṇātha naiṣa prāpto manorathaḥ .. 8..

tathaivāṃśumatā tāta loke.apratimatejasā .
gaṅgāṃ prārthayatā netuṃ pratijñā nāpavarjitā .. 9..

rājarṣiṇā guṇavatā maharṣisamatejasā .
mattulyatapasā caiva kṣatradharmasthitena ca .. 10..

dilīpena mahābhāga tava pitrātitejasā .
punarna śaṅkitā netuṃ gaṅgāṃ prārthayatānagha .. 11..

sā tvayā samatikrāntā pratijñā puruṣarṣabha .
prāpto.asi paramaṃ loke yaśaḥ paramasaṃmatam .. 12..

yacca gaṅgāvataraṇaṃ tvayā kṛtamarindama .
anena ca bhavānprāpto dharmasyāyatanaṃ mahat .. 13..

plāvayasva tvamātmānaṃ narottama sadocite .
salile puruṣavyāghra śuciḥ puṇyaphalo bhava .. 14..

pitāmahānāṃ sarveṣāṃ kuruṣva salilakriyām .
svasti te.astu gamiṣyāmi svaṃ lokaṃ gamyatāṃ nṛpa .. 15..

ityevamuktvā deveśaḥ sarvalokapitāmahaḥ .
yathāgataṃ tathāgacchaddevalokaṃ mahāyaśāḥ .. 16..

bhagīratho.api rājarṣiḥ kṛtvā salilamuttamam .
yathākramaṃ yathānyāyaṃ sāgarāṇāṃ mahāyaśāḥ .
kṛtodakaḥ śucī rājā svapuraṃ praviveśa ha .. 17..

samṛddhārtho naraśreṣṭha svarājyaṃ praśaśāsa ha .
pramumoda ca lokastaṃ nṛpamāsādya rāghava .
naṣṭaśokaḥ samṛddhārtho babhūva vigatajvaraḥ .. 18..

eṣa te rāma gaṅgāyā vistaro.abhihito mayā .
svasti prāpnuhi bhadraṃ te sandhyākālo.ativartate .. 19..

dhanyaṃ yaśasyamāyuṣyaṃ svargyaṃ putryamathāpi ca .
idamākhyānamākhyātaṃ gaṅgāvataraṇaṃ mayā .. 20..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).