.. vālmīki rāmāyaṇa - bālakāṇḍa ..

sarga - 47

pṛṣṭvā tu kuśalaṃ tatra parasparasamāgame .
kathānte sumatirvākyaṃ vyājahāra mahāmunim .. 1..

imau kumārau bhadraṃ te devatulyaparākramau .
gajasiṃhagatī vīrau śārdūlavṛṣabhopamau .. 2..

padmapatraviśālākṣau khaḍgatūṇīdhanurdharau .
aśvināviva rūpeṇa samupasthitayauvanau .. 3..

yadṛcchayaiva gāṃ prāptau devalokādivāmarau .
kathaṃ padbhyāmiha prāptau kimarthaṃ kasya vā mune .. 4..

bhūṣayantāvimaṃ deśaṃ candrasūryāvivāmbaram .
parasparasya sadṛśau pramāṇeṅgitaceṣṭitaiḥ .. 5..

kimarthaṃ ca naraśreṣṭhau samprāptau durgame pathi .
varāyudhadharau vīrau śrotumicchāmi tattvataḥ .. 6..

tasya tadvacanaṃ śrutvā yathāvṛtthaṃ nyavedayat .
siddhāśramanivāsaṃ ca rākṣasānāṃ vadhaṃ tathā .. 7..

viśvāmitravacaḥ śrutvā rājā paramaharṣitaḥ .
atithī paramau prāptau putrau daśarathasya tau .
pūjayāmāsa vidhivatsatkārārhau mahābalau .. 8..

tataḥ paramasatkāraṃ sumateḥ prāpya rāghavau .
uṣya tatra niśāmekāṃ jagmaturmithilāṃ tataḥ .. 9..

tāṃ dṛṣṭvā munayaḥ sarve janakasya purīṃ śubhām .
sādhu sādhviti śaṃsanto mithilāṃ samapūjayan .. 10..

mithilopavane tatra āśramaṃ dṛśya rāghavaḥ .
purāṇaṃ nirjanaṃ ramyaṃ papraccha munipuṅgavam .. 11..

śrīmadāśramasaṅkāśaṃ kiṃ nvidaṃ munivarjitam .
śrotumicchāmi bhagavankasyāyaṃ pūrva āśramaḥ .. 12..

tacchrutā rāghaveṇoktaṃ vākyaṃ vākya viśāradaḥ .
pratyuvāca mahātejā viśvamitro mahāmuniḥ .. 13..

hanta te kathayiṣyāmi śṛṇu tattvena rāghava .
yasyaitadāśramapadaṃ śaptaṃ kopānmahātmanā .. 14..

gautamasya naraśreṣṭha pūrvamāsīnmahātmanaḥ .
āśramo divyasaṅkāśaḥ surairapi supūjitaḥ .. 15..

sa ceha tapa ātiṣṭhadahalyāsahitaḥ purā .
varṣapūgānyanekāni rājaputra mahāyaśaḥ .. 16..

tasyāntaraṃ viditvā tu sahasrākṣaḥ śacīpatiḥ .
muniveṣadharo.ahalyāmidaṃ vacanamabravīt .. 17..

ṛtukālaṃ pratīkṣante nārthinaḥ susamāhite .
saṅgamaṃ tvahamicchāmi tvayā saha sumadhyame .. 18..

muniveṣaṃ sahasrākṣaṃ vijñāya raghunandana .
matiṃ cakāra durmedhā devarājakutūhalāt .. 19..

athābravītsuraśreṣṭhaṃ kṛtārthenāntarātmanā .
kṛtārtho.asi suraśreṣṭha gaccha śīghramitaḥ prabho .
ātmānaṃ māṃ ca deveśa sarvadā rakṣa mānadaḥ .. 20..

indrastu prahasanvākyamahalyāmidamabravīt .
suśroṇi parituṣṭo.asmi gamiṣyāmi yathāgatam .. 21..

evaṃ saṅgamya tu tayā niścakrāmoṭajāttataḥ .
sa sambhramāttvaranrāma śaṅkito gautamaṃ prati .. 22..

gautamaṃ sa dadarśātha praviśanti mahāmunim .
devadānavadurdharṣaṃ tapobalasamanvitam .
tīrthodakapariklinnaṃ dīpyamānamivānalam .
gṛhītasamidhaṃ tatra sakuśaṃ munipuṅgavam .. 23..

dṛṣṭvā surapatistrasto viṣaṇṇavadano.abhavat .. 24..

atha dṛṣṭvā sahasrākṣaṃ muniveṣadharaṃ muniḥ .
durvṛttaṃ vṛttasampanno roṣādvacanamabravīt .. 25..

mama rūpaṃ samāsthāya kṛtavānasi durmate .
akartavyamidaṃ yasmādviphalastvaṃ bhaviṣyati .. 26..

gautamenaivamuktasya saroṣeṇa mahātmanā .
petaturvṛṣaṇau bhūmau sahasrākṣasya tatkṣaṇāt .. 27..

tathā śaptvā sa vai śakraṃ bhāryāmapi ca śaptavān .
iha varṣasahasrāṇi bahūni tvaṃ nivatsyasi .. 28..

vāyubhakṣā nirāhārā tapyantī bhasmaśāyinī .
adṛśyā sarvabhūtānāmāśrame.asminnivatsyasi .. 29..

yadā caitadvanaṃ ghoraṃ rāmo daśarathātmajaḥ .
āgamiṣyati durdharṣastadā pūtā bhaviṣyasi .. 30..

tasyātithyena durvṛtte lobhamohavivarjitā .
matsakāśe mudā yuktā svaṃ vapurdhārayiṣyasi .. 31..

evamuktvā mahātejā gautamo duṣṭacāriṇīm .
imamāśramamutsṛjya siddhacāraṇasevite .
himavacchikhare ramye tapastepe mahātapāḥ .. 32..

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).