.. vālmīki rāmāyaṇa - bālakāṇḍa ..

sarga - 57

tatastriśaṅkorvacanaṃ śrutvā krodhasamanvitam .
ṛṣiputraśataṃ rāma rājānamidamabravīt .. 1..

pratyākhyāto.asi durbuddhe guruṇā satyavādinā .
taṃ kathaṃ samatikramya śākhāntaramupeyivān .. 2..

ikṣvākūṇāṃ hi sarveṣāṃ purodhāḥ paramā gatiḥ .
na cātikramituṃ śakyaṃ vacanaṃ satyavādinaḥ .. 3..

aśakyamiti covāca vasiṣṭho bhagavānṛṣiḥ .
taṃ vayaṃ vai samāhartuṃ kratuṃ śaktāḥ kathaṃ tava .. 4..

bāliśastvaṃ naraśreṣṭha gamyatāṃ svapuraṃ punaḥ .
yājane bhagavāñśaktastrailokyasyāpi pārthiva .. 5..

teṣāṃ tadvacanaṃ śrutvā krodhaparyākulākṣaram .
sa rājā punarevaitānidaṃ vacanamabravīt .. 6..

pratyākhyāto.asmi guruṇā guruputraistathaiva ca .
anyāṃ gatiṃ gamiṣyāmi svasti vo.astu tapodhanāḥ .. 7..

ṛṣiputrāstu tacchrutvā vākyaṃ ghorābhisaṃhitam .
śepuḥ paramasaṅkruddhāścaṇḍālatvaṃ gamiṣyasi .
evamuktvā mahātmāno viviśuste svamāśramam .. 8..

atha rātryāṃ vyatītāyāṃ rājā caṇḍālatāṃ gataḥ .
nīlavastradharo nīlaḥ paruṣo dhvastamūrdhajaḥ .
cityamālyānulepaśca āyasābharaṇo.abhavat .. 9..

taṃ dṛṣṭvā mantriṇaḥ sarve tyaktvā caṇḍālarūpiṇam .
prādravansahitā rāma paurā ye.asyānugāminaḥ .. 10..

eko hi rājā kākutstha jagāma paramātmavān .
dahyamāno divārātraṃ viśvāmitraṃ tapodhanam .. 11..

viśvāmitrastu taṃ dṛṣṭvā rājānaṃ viphalīkṛtam .
caṇḍālarūpiṇaṃ rāma muniḥ kāruṇyamāgataḥ .. 12..

kāruṇyātsa mahātejā vākyaṃ parama dhārmikaḥ .
idaṃ jagāda bhadraṃ te rājānaṃ ghoradarśanam .. 13..

kimāgamanakāryaṃ te rājaputra mahābala .
ayodhyādhipate vīra śāpāccaṇḍālatāṃ gataḥ .. 14..

atha tadvākyamākarṇya rājā caṇḍālatāṃ gataḥ .
abravītprāñjalirvākyaṃ vākyajño vākyakovidam .. 15..

pratyākhyāto.asmi guruṇā guruputraistathaiva ca .
anavāpyaiva taṃ kāmaṃ mayā prāpto viparyayaḥ .. 16..

saśarīro divaṃ yāyāmiti me saumyadarśanam .
mayā ceṣṭaṃ kratuśataṃ tacca nāvāpyate phalam .. 17..

anṛtaṃ nokta pūrvaṃ me na ca vakṣye kadā cana .
kṛcchreṣvapi gataḥ saumya kṣatradharmeṇa te śape .. 18..

yajñairbahuvidhairiṣṭaṃ prajā dharmeṇa pālitāḥ .
guravaśca mahātmānaḥ śīlavṛttena toṣitāḥ .. 19..

dharme prayatamānasya yajñaṃ cāhartumicchataḥ .
paritoṣaṃ na gacchanti guravo munipuṅgava .. 20..

daivameva paraṃ manye pauruṣaṃ tu nirarthakam .
daivenākramyate sarvaṃ daivaṃ hi paramā gatiḥ .. 21..

tasya me paramārtasya prasādamabhikāṅkṣataḥ .
kartumarhasi bhadraṃ te daivopahatakarmaṇaḥ .. 22..

nānyāṃ gatiṃ gamiṣyāmi nānyaḥ śaraṇamasti me .
daivaṃ puruṣakāreṇa nivartayitumarhasi .. 23..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).