.. vālmīki rāmāyaṇa - bālakāṇḍa ..

sarga - 63

surakāryamidaṃ rambhe kartavyaṃ sumahattvayā .
lobhanaṃ kauśikasyeha kāmamohasamanvitam .. 1..

tathoktā sāpsarā rāma sahasrākṣeṇa dhīmatā .
vrīḍitā prāñjalirbhūtvā pratyuvāca sureśvaram .. 2..

ayaṃ surapate ghoro viśvāmitro mahāmuniḥ .
krodhamutsrakṣyate ghoraṃ mayi deva na saṃśayaḥ .
tato hi me bhayaṃ deva prasādaṃ kartumarhasi .. 3..

tāmuvāca sahasrākṣo vepamānāṃ kṛtāñjalim .
mā bhaiṣi rambhe bhadraṃ te kuruṣva mama śāsanam .. 4..

kokilo hṛdayagrāhī mādhave ruciradrume .
ahaṃ kandarpasahitaḥ sthāsyāmi tava pārśvataḥ .. 5..

tvaṃ hi rūpaṃ bahuguṇaṃ kṛtvā paramabhāsvaram .
tamṛṣiṃ kauśikaṃ rambhe bhedayasva tapasvinam .. 6..

sā śrutvā vacanaṃ tasya kṛtvā rūpamanuttamam .
lobhayāmāsa lalitā viśvāmitraṃ śucismitā .. 7..

kokilasya tu śuśrāva valgu vyāharataḥ svanam .
samprahṛṣṭena manasā tata enāmudaikṣata .. 8..

atha tasya ca śabdena gītenāpratimena ca .
darśanena ca rambhāyā muniḥ sandehamāgataḥ .. 9..

sahasrākṣasya tatkarma vijñāya munipuṅgavaḥ .
rambhāṃ krodhasamāviṣṭaḥ śaśāpa kuśikātmajaḥ .. 10..

yanmāṃ lobhayase rambhe kāmakrodhajayaiṣiṇam .
daśavarṣasahasrāṇi śailī sthāsyasi durbhage .. 11..

brāhmaṇaḥ sumahātejāstapobalasamanvitaḥ .
uddhariṣyati rambhe tvāṃ matkrodhakaluṣīkṛtām .. 12..

evamuktvā mahātejā viśvāmitro mahāmuniḥ .
aśaknuvandhārayituṃ kopaṃ santāpamāgataḥ .. 13..

tasya śāpena mahatā rambhā śailī tadābhavat .
vacaḥ śrutvā ca kandarpo maharṣeḥ sa ca nirgataḥ .. 14..

kopena sa mahātejāstapo.apaharaṇe kṛte .
indriyairajitai rāma na lebhe śāntimātmanaḥ .. 15..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).