.. vālmīki rāmāyaṇa - bālakāṇḍa ..

sarga - 75

śrutvā tajjāmadagnyasya vākyaṃ dāśarathistadā .
gauravādyantritakathaḥ pitū rāmamathābravīt .. 1..

śrutavānasmi yatkarma kṛtavānasi bhārgava .
anurundhyāmahe brahmanpiturānṛṇyamāsthitaḥ .. 2..

vīryahīnamivāśaktaṃ kṣatradharmeṇa bhārgava .
avajānāmi me tejaḥ paśya me.adya parākramam .. 3..

ityuktvā rāghavaḥ kruddho bhārgavasya varāyudham .
śaraṃ ca pratisaṅgṛhya hastāllaghuparākramaḥ .. 4..

āropya sa dhanū rāmaḥ śaraṃ sajyaṃ cakāra ha .
jāmadagnyaṃ tato rāmaṃ rāmaḥ kruddho.abravīdvacaḥ .. 5..

brāhmaṇo.asīti pūjyo me viśvāmitrakṛtena ca .
tasmācchakto na te rāma moktuṃ prāṇaharaṃ śaram .. 6..

imāṃ vā tvadgatiṃ rāma tapobalasamārjitān .
lokānapratimānvāpi haniṣyāmi yadicchasi .. 7..

na hyayaṃ vaiṣṇavo divyaḥ śaraḥ parapurañjayaḥ .
moghaḥ patati vīryeṇa baladarpavināśanaḥ .. 8..

varāyudhadharaṃ rāma draṣṭuṃ sarṣigaṇāḥ surāḥ .
pitāmahaṃ puraskṛtya sametāstatra saṅghaśaḥ .. 9..

gandharvāpsarasaścaiva siddhacāraṇakiṃnarāḥ .
yakṣarākṣasanāgāśca taddraṣṭuṃ mahadadbhutam .. 10..

jaḍīkṛte tadā loke rāme varadhanurdhare .
nirvīryo jāmadagnyo.asau ramo rāmamudaikṣata .. 11..

tejobhirhatavīryatvājjāmadagnyo jaḍīkṛtaḥ .
rāmaṃ kamala patrākṣaṃ mandaṃ mandamuvāca ha .. 12..

kāśyapāya mayā dattā yadā pūrvaṃ vasundharā .
viṣaye me na vastavyamiti māṃ kāśyapo.abravīt .. 13..

so.ahaṃ guruvacaḥ kurvanpṛthivyāṃ na vase niśām .
iti pratijñā kākutstha kṛtā vai kāśyapasya ha .. 14..

tadimāṃ tvaṃ gatiṃ vīra hantuṃ nārhasi rāghava .
manojavaṃ gamiṣyāmi mahendraṃ parvatottamam .. 15..

lokāstvapratimā rāma nirjitāstapasā mayā .
jahi tāñśaramukhyena mā bhūtkālasya paryayaḥ .. 16..

akṣayyaṃ madhuhantāraṃ jānāmi tvāṃ sureśvaram .
dhanuṣo.asya parāmarśātsvasti te.astu parantapa .. 17..

ete suragaṇāḥ sarve nirīkṣante samāgatāḥ .
tvāmapratimakarmāṇamapratidvandvamāhave .. 18..

na ceyaṃ mama kākutstha vrīḍā bhavitumarhati .
tvayā trailokyanāthena yadahaṃ vimukhīkṛtaḥ .. 19..

śaramapratimaṃ rāma moktumarhasi suvrata .
śaramokṣe gamiṣyāmi mahendraṃ parvatottamam .. 20..

tathā bruvati rāme tu jāmadagnye pratāpavān .
rāmo dāśarathiḥ śrīmāṃścikṣepa śaramuttamam .. 21..

tato vitimirāḥ sarvā diśā copadiśastathā .
surāḥ sarṣigaṇā rāmaṃ praśaśaṃsurudāyudham .. 22..

rāmaṃ dāśarathiṃ rāmo jāmadagnyaḥ praśasya ca .
tataḥ pradakṣiṇīkṛtya jagāmātmagatiṃ prabhuḥ .. 23..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).