.. vālmīki rāmāyaṇa - bālakāṇḍa ..

sarga - 9

sumantraścodito rājñā provācedaṃ vacastadā .
yatharṣyaśṛṅgastvānītaḥ śṛṇu me mantribhiḥ saha .. 1..

romapādamuvācedaṃ sahāmātyaḥ purohitaḥ .
upāyo nirapāyo.ayamasmābhirabhicintitaḥ .. 2..

ṛṣyaśṛṅgo vanacarastapaḥsvādhyāyane rataḥ .
anabhijñaḥ sa nārīṇāṃ viṣayāṇāṃ sukhasya ca .. 3..

indriyārthairabhimatairnaracitta pramāthibhiḥ .
puramānāyayiṣyāmaḥ kṣipraṃ cādhyavasīyatām .. 4..

gaṇikāstatra gacchantu rūpavatyaḥ svalaṅkṛtāḥ .
pralobhya vividhopāyairāneṣyantīha satkṛtāḥ .. 5..

śrutvā tatheti rājā ca pratyuvāca purohitam .
purohito mantriṇaśca tathā cakruśca te tadā .. 6..

vāramukhyāstu tacchrutvā vanaṃ praviviśurmahat .
āśramasyāvidūre.asminyatnaṃ kurvanti darśane .. 7..

ṛṣiputrasya ghorasya nityamāśramavāsinaḥ .
pituḥ sa nityasantuṣṭo nāticakrāma cāśramāt .. 8..

na tena janmaprabhṛti dṛṣṭapūrvaṃ tapasvinā .
strī vā pumānvā yaccānyatsattvaṃ nagara rāṣṭrajam .. 9..

tataḥ kadā cittaṃ deśamājagāma yadṛcchayā .
vibhāṇḍakasutastatra tāścāpaśyadvarāṅganāḥ .. 10..

tāścitraveṣāḥ pramadā gāyantyo madhurasvaraiḥ .
ṛṣiputramupāgamya sarvā vacanamabruvan .. 11..

kastvaṃ kiṃ vartase brahmañjñātumicchāmahe vayam .
ekastvaṃ vijane ghore vane carasi śaṃsa naḥ .. 12..

adṛṣṭarūpāstāstena kāmyarūpā vane striyaḥ .
hārdāttasya matirjātā ākhyātuṃ pitaraṃ svakam .. 13..

pitā vibhāṇḍako.asmākaṃ tasyāhaṃ suta aurasaḥ .
ṛṣyaśṛṅga iti khyātaṃ nāma karma ca me bhuvi .. 14..

ihāśramapado.asmākaṃ samīpe śubhadarśanāḥ .
kariṣye vo.atra pūjāṃ vai sarveṣāṃ vidhipūrvakam .. 15..

ṛṣiputravacaḥ śrutvā sarvāsāṃ matirāsa vai .
tadāśramapadaṃ draṣṭuṃ jagmuḥ sarvāś ca tena ha .. 16..

gatānāṃ tu tataḥ pūjāmṛṣiputraścakāra ha .
idamarghyamidaṃ pādyamidaṃ mūlaṃ phalaṃ ca naḥ .. 17..

pratigṛhya tu tāṃ pūjāṃ sarvā eva samutsukāḥ .
ṛṣerbhītāśca śīghraṃ tu gamanāya matiṃ dadhuḥ .. 18..

asmākamapi mukhyāni phalānīmāni vai dvija .
gṛhāṇa prati bhadraṃ te bhakṣayasva ca mā ciram .. 19..

tatastāstaṃ samāliṅgya sarvā harṣasamanvitāḥ .
modakānpradadustasmai bhakṣyāṃśca vividhāñśubhān .. 20..

tāni cāsvādya tejasvī phalānīti sma manyate .
anāsvāditapūrvāṇi vane nityanivāsinām .. 21..

āpṛcchya ca tadā vipraṃ vratacaryāṃ nivedya ca .
gacchanti smāpadeśāttā bhītāstasya pituḥ striyaḥ .. 22..

gatāsu tāsu sarvāsu kāśyapasyātmajo dvijaḥ .
asvasthahṛdayaścāsīdduḥkhaṃ sma parivartate .. 23..

tato.aparedyustaṃ deśamājagāma sa vīryavān .
manojñā yatra tā dṛṣṭā vāramukhyāḥ svalaṅkṛtāḥ .. 24..

dṛṣṭvaiva ca tadā vipramāyāntaṃ hṛṣṭa mānasāḥ .
upasṛtya tataḥ sarvāstāstamūcuridaṃ vacaḥ .. 25..

ehyāśramapadaṃ saumya asmākamiti cābruvan .
tatrāpyeṣa vidhiḥ śrīmānviśeṣeṇa bhaviṣyati .. 26..

śrutvā tu vacanaṃ tāsāṃ sarvāsāṃ hṛdayaṅgamam .
gamanāya matiṃ cakre taṃ ca ninyustadā striyaḥ .. 27..

tatra cānīyamāne tu vipre tasminmahātmani .
vavarṣa sahasā devo jagatprahlādayaṃstadā .. 28..

varṣeṇaivāgataṃ vipraṃ viṣayaṃ svaṃ narādhipaḥ .
pratyudgamya muniṃ prahvaḥ śirasā ca mahīṃ gataḥ .. 29..

arghyaṃ ca pradadau tasmai nyāyataḥ susamāhitaḥ .
vavre prasādaṃ viprendrānmā vipraṃ manyurāviśet .. 30..

antaḥpuraṃ praviśyāsmai kanyāṃ dattvā yathāvidhi .
śāntāṃ śāntena manasā rājā harṣamavāpa saḥ .. 31..

evaṃ sa nyavasattatra sarvakāmaiḥ supūjitaḥ .
ṛṣyaśṛṅgo mahātejāḥ śāntayā saha bhāryayā .. 32..

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).