.. vālmīki rāmāyaṇa - araṇyakāṇḍa ..

sarga - 42

tathā tu taṃ samādiśya bhrātaraṃ raghunandanaḥ .
babandhāsiṃ mahātejā jāmbūnadamayatsarum .. 1..

tatastriviṇataṃ cāpamādāyātmavibhūṣaṇam .
ābadhya ca kalāpau dvau jagāmodagravikramaḥ .. 2..

taṃ vañcayāno rājendramāpatantaṃ nirīkṣya vai .
babhūvāntarhitastrāsātpunaḥ sandarśane.abhavat .. 3..

baddhāsirdhanurādāya pradudrāva yato mṛgaḥ .
taṃ sa paśyati rūpeṇa dyotamānamivāgrataḥ .. 4..

avekṣyāvekṣya dhāvantaṃ dhanuṣpāṇirmahāvane .
ativṛttamiṣoḥ pātāllobhayānaṃ kadā cana .. 5..

śaṅkitaṃ tu samudbhrāntamutpatantamivāmbare .
daśyamānamadṛśyaṃ ca navoddeśeṣu keṣu cit .. 6..

chinnābhrairiva saṃvītaṃ śāradaṃ candramaṇḍalam .
muhūrtādeva dadṛśe muhurdūrātprakāśate .. 7..

darśanādarśanenaiva so.apākarṣata rāghavam .
āsītkruddhastu kākutstho vivaśastena mohitaḥ .. 8..

athāvatasthe suśrāntaśchāyāmāśritya śādvale .
mṛgaiḥ parivṛto vanyairadūrātpratyadṛśyata .. 9..

dṛṣṭvā rāmo mahātejāstaṃ hantuṃ kṛtaniścayaḥ .
sandhāya sudṛḍhe cāpe vikṛṣya balavadbalī .. 10..

tameva mṛgamuddiśya jvalantamiva pannagam .
mumoca jvalitaṃ dīptamastrabrahmavinirmitam .. 11..

sa bhṛśaṃ mṛgarūpasya vinirbhidya śarottamaḥ .
mārīcasyaiva hṛdayaṃ vibhedāśanisaṃnibhaḥ .. 12..

tālamātramathotpatya nyapatatsa śarāturaḥ .
vyanadadbhairavaṃ nādaṃ dharaṇyāmalpajīvitaḥ .
mriyamāṇastu mārīco jahau tāṃ kṛtrimāṃ tanum .. 13..

samprāptakālamājñāya cakāra ca tataḥ svaram .
sadṛśaṃ rāghavasyaiva hā sīte lakṣmaṇeti ca .. 14..

tena marmaṇi nirviddhaḥ śareṇānupamena hi .
mṛgarūpaṃ tu tattyaktvā rākṣasaṃ rūpamātmanaḥ .
cakre sa sumahākāyo mārīco jīvitaṃ tyajan .. 15..

tato vicitrakeyūraḥ sarvābharaṇabhūṣitaḥ .
hemamālī mahādaṃṣṭro rākṣaso.abhūccharāhataḥ .. 16..

taṃ dṛṣṭvā patitaṃ bhūmau rākṣasaṃ ghoradarśanam .
jagāma manasā sītāṃ lakṣmaṇasya vacaḥ smaran .. 17..

hā sīte lakṣmaṇetyevamākruśya tu mahāsvaram .
mamāra rākṣasaḥ so.ayaṃ śrutvā sītā kathaṃ bhavet .. 18..

lakṣmaṇaśca mahābāhuḥ kāmavasthāṃ gamiṣyati .
iti sañcintya dharmātmā rāmo hṛṣṭatanūruhaḥ .. 19..

tatra rāmaṃ bhayaṃ tīvramāviveśa viṣādajam .
rākṣasaṃ mṛgarūpaṃ taṃ hatvā śrutvā ca tatsvaram .. 20..

nihatya pṛṣataṃ cānyaṃ māṃsamādāya rāghavaḥ .
tvaramāṇo janasthānaṃ sasārābhimukhastadā .. 21..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).