.. vālmīki rāmāyaṇa - araṇyakāṇḍa ..

sarga - 47

sītāyā vacanaṃ śrutvā daśagrīvaḥ pratāpavān .
haste hastaṃ samāhatya cakāra sumahadvapuḥ .. 1..

sa maithilīṃ punarvākyaṃ babhāṣe ca tato bhṛśam .
nonmattayā śrutau manye mama vīryaparākramau .. 2..

udvaheyaṃ bhujābhyāṃ tu medinīmambare sthitaḥ .
āpibeyaṃ samudraṃ ca mṛtyuṃ hanyāṃ raṇe sthitaḥ .. 3..

arkaṃ rundhyāṃ śaraistīkṣṇairvibhindyāṃ hi mahītalam .
kāmarūpiṇamunmatte paśya māṃ kāmadaṃ patim .. 4..

evamuktavatastasya rāvaṇasya śikhiprabhe .
kruddhasya hariparyante rakte netre babhūvatuḥ .. 5..

sadyaḥ saumyaṃ parityajya bhikṣurūpaṃ sa rāvaṇaḥ .
svaṃ rūpaṃ kālarūpābhaṃ bheje vaiśravaṇānujaḥ .. 6..

saṃraktanayanaḥ śrīmāṃstaptakāñcanakuṇḍalaḥ .
daśāsyaḥ kārmukī bāṇī babhūva kṣaṇadācaraḥ .. 7..

sa parivrājakacchadma mahākāyo vihāya tat .
pratipede svakaṃ rūpaṃ rāvaṇo rākṣasādhipaḥ .. 8..

saṃraktanayanaḥ krodhājjīmūtanicayaprabhaḥ .
raktāmbaradharastasthau strīratnaṃ prekṣya maithilīm .. 9..

sa tāmasitakeśāntāṃ bhāskarasya prabhām iva .
vasanābharaṇopetāṃ maithilīṃ rāvaṇo.abravīt .. 10..

triṣu lokeṣu vikhyātaṃ yadi bhartāramicchasi .
māmāśraya varārohe tavāhaṃ sadṛśaḥ patiḥ .. 11..

māṃ bhajasva cirāya tvamahaṃ ślāghyastava priyaḥ .
naiva cāhaṃ kva cidbhadre kariṣye tava vipriyam .
tyajyatāṃ mānuṣo bhāvo mayi bhāvaḥ praṇīyatām .. 12..

rājyāccyutamasiddhārthaṃ rāmaṃ parimitāyuṣam .
kairguṇairanuraktāsi mūḍhe paṇḍitamānini .. 13..

yaḥ striyā vacanādrājyaṃ vihāya sasuhṛjjanam .
asminvyālānucarite vane vasati durmatiḥ .. 14..

ityuktvā maithilīṃ vākyaṃ priyārhāṃ priyavādinīm .
jagrāha rāvaṇaḥ sītāṃ budhaḥ khe rohiṇīm iva .. 15..

vāmena sītāṃ padmākṣīṃ mūrdhajeṣu kareṇa saḥ .
ūrvostu dakṣiṇenaiva parijagrāha pāṇinā .. 16..

taṃ dṛṣṭvā giriśṛṅgābhaṃ tīkṣṇadaṃṣṭraṃ mahābhujam .
prādravanmṛtyusaṅkāśaṃ bhayārtā vanadevatāḥ .. 17..

sa ca māyāmayo divyaḥ kharayuktaḥ kharasvanaḥ .
pratyadṛśyata hemāṅgo rāvaṇasya mahārathaḥ .. 18..

tatastāṃ paruṣairvākyairabhitarjya mahāsvanaḥ .
aṅkenādāya vaidehīṃ rathamāropayattadā .. 19..

sā gṛhītāticukrośa rāvaṇena yaśasvinī .
rāmeti sītā duḥkhārtā rāmaṃ dūragataṃ vane .. 20..

tāmakāmāṃ sa kāmārtaḥ pannagendravadhūm iva .
viveṣṭamānāmādāya utpapāthātha rāvaṇaḥ .. 21..

tataḥ sā rākṣasendreṇa hriyamāṇā vihāyasā .
bhṛśaṃ cukrośa matteva bhrāntacittā yathāturā .. 22..

hā lakṣmaṇa mahābāho gurucittaprasādaka .
hriyamāṇāṃ na jānīṣe rakṣasā kāmarūpiṇā .. 23..

jīvitaṃ sukhamarthāṃśca dharmahetoḥ parityajan .
hriyamāṇāmadharmeṇa māṃ rāghava na paśyasi .. 24..

nanu nāmāvinītānāṃ vinetāsi parantapa .
kathamevaṃvidhaṃ pāpaṃ na tvaṃ śādhi hi rāvaṇam .. 25..

nanu sadyo.avinītasya dṛśyate karmaṇaḥ phalam .
kālo.apyaṅgī bhavatyatra sasyānām iva paktaye .. 26..

sa karma kṛtavānetatkālopahatacetanaḥ .
jīvitāntakaraṃ ghoraṃ rāmādvyasanamāpnuhi .. 27..

hantedānīṃ sakāmā tu kaikeyī bāndhavaiḥ saha .
hriyeyaṃ dharmakāmasya dharmapatnī yaśasvinaḥ .. 28..

āmantraye janasthānaṃ karṇikārāṃśca puṣpitān .
kṣipraṃ rāmāya śaṃsadhvaṃ sītāṃ harati rāvaṇaḥ .. 29..

mālyavantaṃ śikhariṇaṃ vande prasravaṇaṃ girim .
kṣipraṃ rāmāya śaṃsadhvaṃ sītāṃ harati rāvaṇaḥ .. 30..

haṃsasārasasaṅghuṣṭāṃ vande godāvarīṃ nadīm .
kṣipraṃ rāmāya śaṃsadhvaṃ sītāṃ harati rāvaṇaḥ .. 31..

daivatāni ca yāntyasminvane vividhapādape .
namaskaromyahaṃ tebhyo bhartuḥ śaṃsata māṃ hṛtām .. 32..

yāni kāni cidapyatra sattvāni nivasantyuta .
sarvāṇi śaraṇaṃ yāmi mṛgapakṣigaṇānapi .. 33..

hriyamāṇāṃ priyāṃ bhartuḥ prāṇebhyo.api garīyasīm .
vivaśāpahṛtā sītā rāvaṇeneti śaṃsata .. 34..

viditvā māṃ mahābāhuramutrāpi mahābalaḥ .
āneṣyati parākramya vaivasvatahṛtām api .. 35..

rāmāya tu yathātattvaṃ jaṭāyo haraṇaṃ mama .
lakṣmaṇāya ca tatsarvamākhyātavyamaśeṣataḥ .. 36..




This devanagari etext of Valmiki Ramayana is based on Prof John Smith's revised CSX version of the original digital files produced by Professor Muneo Tokunaga of Kyoto University. In 1998, the files were converted from CSX to Devnag to ITRANS to XDVNG font for devanagari display on the web. In 2009 the ITRANS version was converted to unicode devanagari.

This page uses Unicode utf-8 encoding for devanagari/sanskrit transliteration. Please set the fonts and languages setting in your web browser to display the correct Unicode font. Some help is available at Notes on Viewing and Creating Devanagari Documents with Unicode Support. Some Unicode fonts for Devanagari are linked at http://devanaagarii.net. Some Unicode fonts for Sanskrit Transliteration are available at IndUni Fonts.

Questions, comments? Write to (sanskrit at cheerful dot c om).