\documentstyle[11pt,multicol,itrans]{iarticle}
#include=ijag.inc
#endwordvowel=.h
\portraitpage
\parindent=0pt                % no indents
\let\usedvng=\normaldvng      % \Largedvng	
\pagestyle{headings} 
\begin{document}
#indian
\centerline{\hugedvng .. vaalmiiki raamaayaNa..}\medskip
##\setcounter{section}{0}##
##\begin{center}##
\section{baalakaaNDa}
##\end{center}##
\medskip
 2
nAradasya tu tadvAkya.n shrutvA vAkyavishAradaH . 
pUjayAmAsa dharmAtmA sahashiShyo mahAmuniH .. 1..\\
yathAvatpUjitastena devarShirnAradastadA . 
ApR^iShTvaivAbhyanuGYAtaH sa jagAma vihAyasaM .. 2..\\
sa muhUta.n gate tasmindevalokaM munistadA . 
jagAma tamasAtIra.n jAhnavyAstvavidUrataH .. 3..\\
sa tu tIra.n samAsAdya tamasAyA mahAmuniH . 
shiShyamAha sthitaM pArshve dR^iShTvA tIrthamakardamam .. 4..\\
akardamamida.n tIrthaM bharadvAja nishAmaya . 
ramaNIyaM prasannAmbu sanmanuShyamano yathA .. 5..\\
nyasyatA.n kalashastAta dIyatA.n valkalaM mama . 
idamevAvagAhiShye tamasAtIrthamuttamam .. 6..\\
evamukto bharadvAjo vAlmIkena mahAtmanA . 
prAyachchhata munestasya valkalaM niyato guroH .. 7..\\
sa shiShyahastAdAdAya valkalaM niyatendriyaH . 
vichachAra ha pashya.nstatsarvato vipula.n vanam .. 8..\\
tasyAbhyAshe tu mithuna.n charantamanapAyinam . 
dadarsha bhagavA.nstatra krau~nchayoshchAruniHsvanam .. 9..\\
tasmAttu mithunAdekaM pumA.nsaM pApanishchayaH . 
jaghAna vairanilayo niShAdastasya pashyataH .. 10..\\
ta.n shoNitaparItA~NgaM veShTamAnaM mahItale . 
bhAryA tu nihata.n dR^iShTvA rurAva karuNAM giram .. 11..\\
tathA tu ta.n dvijaM dR^iShTvA niShAdena nipAtitam . 
R^iSherdharmAtmanastasya kAruNya.n samapadyata .. 12..\\
tataH karuNaveditvAdadharmo.ayamiti dvijaH . 
nishAmya rudatI.n krau~nchImida.n vachanamabravIt .. 13..\\
mA niShAda pratiShThA.n tvamagamaH shAshvatI.n samAH . 
yatkrau~nchamithunAdekamavadhIH kAmamohitam .. 14..\\
tasyaivaM bruvatashchintA babhUva hR^idi vIkShataH . 
shokArtenAsya shakuneH kimida.n vyAhR^itaM mayA .. 15..\\
chintayansa mahAprAGYashchakAra matimAnmatim . 
shiShya.n chaivAbravIdvAkyamida.n sa munipu~NgavaH .. 16..\\
pAdabaddho.akSharasamastantrIlayasamanvitaH . 
shokArtasya pravR^itto me shloko bhavatu nAnyathA .. 17..\\
shiShyastu tasya bruvato munervAkyamanuttamam . 
pratijagrAha sa.nhR^iShTastasya tuShTo.abhavadguruH .. 18..\\
so.abhiSheka.n tataH kR^itvA tIrthe tasminyathAvidhi . 
tameva chintayannarthamupAvartata vai muniH .. 19..\\
bharadvAjastataH shiShyo vinItaH shrutavAnguroH . 
kalashaM pUrNamAdAya pR^iShThato.anujagAma ha .. 20..\\
sa pravishyAshramapada.n shiShyeNa saha dharmavit . 
upaviShTaH kathAshchAnyAshchakAra dhyAnamAsthitaH .. 21..\\
AjagAma tato brahmA lokakartA svayamprabhuH . 
chaturmukho mahAtejA draShTu.n taM munipu~Ngavam .. 22..\\
vAlmIkiratha ta.n dR^iShTvA sahasotthAya vAgyataH . 
prA~njaliH prayato bhUtvA tasthau paramavismitaH .. 23..\\
pUjayAmAsa ta.n devaM pAdyArghyAsanavandanaiH . 
praNamya vidhivachchainaM pR^iShTvAnAmayamavyayam .. 24..\\
athopavishya bhagavAnAsane paramArchite . 
vAlmIkaye maharShaye sandideshAsana.n tataH .. 25..\\
upaviShTe tadA tasminsAkShAllokapitAmahe . 
tadgatenaiva manasA vAlmIkirdhyAnamAsthitaH .. 26..\\
pApAtmanA kR^ita.n kaShTa.n vairagrahaNabuddhinA . 
yastAdR^isha.n chAruravaM krau~ncha.n hanyAdakAraNAt .. 27..\\
shochanneva muhuH krau~nchImupashlokamimaM punaH . 
jagAvantargatamanA bhUtvA shokaparAyaNaH .. 28..\\
tamuvAcha tato brahmA prahasanmunipu~Ngavam . 
shloka eva tvayA baddho nAtra kAryA vichAraNA .. 29..\\
machchhandAdeva te brahmanpravR^itteya.n sarasvatI . 
rAmasya charita.n kR^itsnaM kuru tvamR^iShisattama .. 30..\\
dharmAtmano guNavato loke rAmasya dhImataH . 
vR^itta.n kathaya dhIrasya yathA te nAradAchchhrutam .. 31..\\
rahasya.n cha prakAshaM cha yadvR^ittaM tasya dhImataH . 
rAmasya saha saumitre rAkShasAnA.n cha sarvashaH .. 32..\\
vaidehyAshchaiva yadvR^ittaM prakAsha.n yadi vA rahaH . 
tachchApyavidita.n sarvaM vidita.n te bhaviShyati .. 33..\\
na te vAganR^itA kAvye kA chidatra bhaviShyati . 
kuru rAma kathAM puNyA.n shlokabaddhAM manoramAm .. 34..\\
yAvatsthAsyanti girayaH saritashcha mahItale . 
tAvadrAmAyaNakathA lokeShu prachariShyati .. 35..\\
yAvadrAmasya cha kathA tvatkR^itA prachariShyati . 
tAvadUrdhvamadhashcha tvaM mallokeShu nivatsyasi .. 36..\\
ityuktvA bhagavAnbrahmA tatraivAntaradhIyata . 
tataH sashiShyo vAlmIkirmunirvismayamAyayau .. 37..\\
tasya shiShyAstataH sarve jaguH shlokamimaM punaH . 
muhurmuhuH prIyamANAH prAhushcha bhR^ishavismitAH .. 38..\\
samAkSharaishchaturbhiryaH pAdairgIto maharShiNA . 
so.anuvyAharaNAdbhUyaH shokaH shlokatvamAgataH .. 39..\\
tasya buddhiriya.n jAtA vAlmIkerbhAvitAtmanaH . 
kR^itsna.n rAmAyaNa.n kAvyamIdR^ishaiH karavANyaham .. 40..\\
udAravR^ittArthapadairmanoramais 
tadAsya rAmasya chakAra kIrtimAn . 
samAkSharaiH shlokashatairyashasvino 
yashaskara.n kAvyamudAradhIrmuniH .. 41..\\
##\end{multicols}##
##
\medskip\hrule\medskip
The files in this directory are revised versions of the         
digital files produced by Professor Muneo Tokunaga, Kyoto       
University, and copyrighted by him. I am grateful to Professor  
Tokunaga for his agreement to this use of his original files    
and for permitting the revised versions to be made publicly     
available.   \\                                                   
Dr J. D. Smith ;                            
email: jds10@cam.ac.uk  ; 
http://bombay.oriental.cam.ac.uk/index.html                     
\medskip\hrule\medskip
ITRANS conversion questions to: Avinash Chopde <avinash@acm.org>
\medskip\hrule\medskip
Last updated on \today ; Send corrections to sanskrit@cheerful.com
\end{document}