|| ṛgvedaḥ maṇḍalaṁ 2 ||
tvama̍gne̱ dyubhi̱stvamā̍śuśu̱kṣaṇi̱stvama̱dbhyastvamaśma̍na̱spari̍ |
tvaṁ vane̍bhya̱stvamoṣa̍dhībhya̱stvaṁ nṛ̱ṇāṁ nṛ̍pate jāyase̱ śuci̍ḥ || 2.001.01
tavā̍gne ho̱traṁ tava̍ po̱tramṛ̱tviya̱ṁ tava̍ ne̱ṣṭraṁ tvama̱gnidṛ̍tāya̱taḥ |
tava̍ praśā̱straṁ tvama̍dhvarīyasi bra̱hmā cāsi̍ gṛ̱hapa̍tiśca no̱ dame̍ || 2.001.02
tvama̍gna̱ indro̍ vṛṣa̱bhaḥ sa̱tāma̍si̱ tvaṁ viṣṇu̍rurugā̱yo na̍ma̱sya̍ḥ |
tvaṁ bra̱hmā ra̍yi̱vidbra̍hmaṇaspate̱ tvaṁ vi̍dhartaḥ sacase̱ pura̍ṁdhyā || 2.001.03
tvama̍gne̱ rājā̱ varu̍ṇo dhṛ̱tavra̍ta̱stvaṁ mi̱tro bha̍vasi da̱sma īḍya̍ḥ |
tvama̍rya̱mā satpa̍ti̱ryasya̍ sa̱mbhuja̱ṁ tvamaṁśo̍ vi̱dathe̍ deva bhāja̱yuḥ || 2.001.04
tvama̍gne̱ tvaṣṭā̍ vidha̱te su̱vīrya̱ṁ tava̱ gnāvo̍ mitramahaḥ sajā̱tya̍m |
tvamā̍śu̱hemā̍ rariṣe̱ svaśvya̱ṁ tvaṁ na̱rāṁ śardho̍ asi purū̱vasu̍ḥ || 2.001.05
tvama̍gne ru̱dro asu̍ro ma̱ho di̱vastvaṁ śardho̱ māru̍taṁ pṛ̱kṣa ī̍śiṣe |
tvaṁ vātai̍raru̱ṇairyā̍si śaṁga̱yastvaṁ pū̱ṣā vi̍dha̱taḥ pā̍si̱ nu tmanā̍ || 2.001.06
tvama̍gne draviṇo̱dā a̍ra̱ṁkṛte̱ tvaṁ de̱vaḥ sa̍vi̱tā ra̍tna̱dhā a̍si |
tvaṁ bhago̍ nṛpate̱ vasva̍ īśiṣe̱ tvaṁ pā̱yurdame̱ yaste'vi̍dhat || 2.001.07
tvāma̍gne̱ dama̱ ā vi̱śpati̱ṁ viśa̱stvāṁ rājā̍naṁ suvi̱datra̍mṛñjate |
tvaṁ viśvā̍ni svanīka patyase̱ tvaṁ sa̱hasrā̍ṇi śa̱tā daśa̱ prati̍ || 2.001.08
tvāma̍gne pi̱tara̍mi̱ṣṭibhi̱rnara̱stvāṁ bhrā̱trāya̱ śamyā̍ tanū̱ruca̍m |
tvaṁ pu̱tro bha̍vasi̱ yaste'vi̍dha̱ttvaṁ sakhā̍ su̱śeva̍ḥ pāsyā̱dhṛṣa̍ḥ || 2.001.09
tvama̍gna ṛ̱bhurā̱ke na̍ma̱sya1̱̍stvaṁ vāja̍sya kṣu̱mato̍ rā̱ya ī̍śiṣe |
tvaṁ vi bhā̱syanu̍ dakṣi dā̱vane̱ tvaṁ vi̱śikṣu̍rasi ya̱jñamā̱tani̍ḥ || 2.001.10
tvama̍gne̱ adi̍tirdeva dā̱śuṣe̱ tvaṁ hotrā̱ bhāra̍tī vardhase gi̱rā |
tvamiḻā̍ śa̱tahi̍māsi̱ dakṣa̍se̱ tvaṁ vṛ̍tra̱hā va̍supate̱ sara̍svatī || 2.001.11
tvama̍gne̱ subhṛ̍ta utta̱maṁ vaya̱stava̍ spā̱rhe varṇa̱ ā sa̱ṁdṛśi̱ śriya̍ḥ |
tvaṁ vāja̍ḥ pra̱tara̍ṇo bṛ̱hanna̍si̱ tvaṁ ra̱yirba̍hu̱lo vi̱śvata̍spṛ̱thuḥ || 2.001.12
tvāma̍gna ādi̱tyāsa̍ ā̱syaṁ1̱̍ tvāṁ ji̱hvāṁ śuca̍yaścakrire kave |
tvāṁ rā̍ti̱ṣāco̍ adhva̱reṣu̍ saścire̱ tve de̱vā ha̱vira̍da̱ntyāhu̍tam || 2.001.13
tve a̍gne̱ viśve̍ a̱mṛtā̍so a̱druha̍ ā̱sā de̱vā ha̱vira̍da̱ntyāhu̍tam |
tvayā̱ martā̍saḥ svadanta āsu̱tiṁ tvaṁ garbho̍ vī̱rudhā̍ṁ jajñiṣe̱ śuci̍ḥ || 2.001.14
tvaṁ tānsaṁ ca̱ prati̍ cāsi ma̱jmanāgne̍ sujāta̱ pra ca̍ deva ricyase |
pṛ̱kṣo yadatra̍ mahi̱nā vi te̱ bhuva̱danu̱ dyāvā̍pṛthi̱vī roda̍sī u̱bhe || 2.001.15
ye sto̱tṛbhyo̱ goa̍grā̱maśva̍peśasa̱magne̍ rā̱timu̍pasṛ̱janti̍ sū̱raya̍ḥ |
a̱smāñca̱ tāśca̱ pra hi neṣi̱ vasya̱ ā bṛ̱hadva̍dema vi̱dathe̍ su̱vīrā̍ḥ || 2.001.16
ya̱jñena̍ vardhata jā̱tave̍dasama̱gniṁ ya̍jadhvaṁ ha̱viṣā̱ tanā̍ gi̱rā |
sa̱mi̱dhā̱naṁ su̍pra̱yasa̱ṁ sva̍rṇaraṁ dyu̱kṣaṁ hotā̍raṁ vṛ̱jane̍ṣu dhū̱rṣada̍m || 2.002.01
a̱bhi tvā̱ naktī̍ru̱ṣaso̍ vavāśi̱re'gne̍ va̱tsaṁ na svasa̍reṣu dhe̱nava̍ḥ |
di̱va i̱veda̍ra̱tirmānu̍ṣā yu̱gā kṣapo̍ bhāsi puruvāra sa̱ṁyata̍ḥ || 2.002.02
taṁ de̱vā bu̱dhne raja̍saḥ su̱daṁsa̍saṁ di̱vaspṛ̍thi̱vyora̍ra̱tiṁ nye̍rire |
ratha̍miva̱ vedya̍ṁ śu̱kraśo̍ciṣama̱gniṁ mi̱traṁ na kṣi̱tiṣu̍ pra̱śaṁsya̍m || 2.002.03
tamu̱kṣamā̍ṇa̱ṁ raja̍si̱ sva ā dame̍ ca̱ndrami̍va su̱ruca̍ṁ hvā̱ra ā da̍dhuḥ |
pṛśnyā̍ḥ pata̱raṁ ci̱taya̍ntama̱kṣabhi̍ḥ pā̱tho na pā̱yuṁ jana̍sī u̱bhe anu̍ || 2.002.04
sa hotā̱ viśva̱ṁ pari̍ bhūtvadhva̱raṁ tamu̍ ha̱vyairmanu̍ṣa ṛñjate gi̱rā |
hi̱ri̱śi̱pro vṛ̍dhasā̱nāsu̱ jarbhu̍ra̱ddyaurna stṛbhi̍ścitaya̱droda̍sī̱ anu̍ || 2.002.05
sa no̍ re̱vatsa̍midhā̱naḥ sva̱staye̍ saṁdada̱svānra̱yima̱smāsu̍ dīdihi |
ā na̍ḥ kṛṇuṣva suvi̱tāya̱ roda̍sī̱ agne̍ ha̱vyā manu̍ṣo deva vī̱taye̍ || 2.002.06
dā no̍ agne bṛha̱to dāḥ sa̍ha̱sriṇo̍ du̱ro na vāja̱ṁ śrutyā̱ apā̍ vṛdhi |
prācī̱ dyāvā̍pṛthi̱vī brahma̍ṇā kṛdhi̱ sva1̱̍rṇa śu̱kramu̱ṣaso̱ vi di̍dyutaḥ || 2.002.07
sa i̍dhā̱na u̱ṣaso̱ rāmyā̱ anu̱ sva1̱̍rṇa dī̍dedaru̱ṣeṇa̍ bhā̱nunā̍ |
hotrā̍bhira̱gnirmanu̍ṣaḥ svadhva̱ro rājā̍ vi̱śāmati̍thi̱ścāru̍rā̱yave̍ || 2.002.08
e̱vā no̍ agne a̱mṛte̍ṣu pūrvya̱ dhīṣpī̍pāya bṛ̱haddi̍veṣu̱ mānu̍ṣā |
duhā̍nā dhe̱nurvṛ̱jane̍ṣu kā̱rave̱ tmanā̍ śa̱tina̍ṁ puru̱rūpa̍mi̱ṣaṇi̍ || 2.002.09
va̱yama̍gne̱ arva̍tā vā su̱vīrya̱ṁ brahma̍ṇā vā citayemā̱ janā̱ ati̍ |
a̱smāka̍ṁ dyu̱mnamadhi̱ pañca̍ kṛ̱ṣṭiṣū̱ccā sva1̱̍rṇa śu̍śucīta du̱ṣṭara̍m || 2.002.10
sa no̍ bodhi sahasya pra̱śaṁsyo̱ yasmi̍nsujā̱tā i̱ṣaya̍nta sū̱raya̍ḥ |
yama̍gne ya̱jñamu̍pa̱yanti̍ vā̱jino̱ nitye̍ to̱ke dī̍di̱vāṁsa̱ṁ sve dame̍ || 2.002.11
u̱bhayā̍so jātavedaḥ syāma te sto̱tāro̍ agne sū̱raya̍śca̱ śarma̍ṇi |
vasvo̍ rā̱yaḥ pu̍ruśca̱ndrasya̱ bhūya̍saḥ pra̱jāva̍taḥ svapa̱tyasya̍ śagdhi naḥ || 2.002.12
ye sto̱tṛbhyo̱ goa̍grā̱maśva̍peśasa̱magne̍ rā̱timu̍pasṛ̱janti̍ sū̱raya̍ḥ |
a̱smāñca̱ tāśca̱ pra hi neṣi̱ vasya̱ ā bṛ̱hadva̍dema vi̱dathe̍ su̱vīrā̍ḥ || 2.002.13
sami̍ddho a̱gnirnihi̍taḥ pṛthi̱vyāṁ pra̱tyaṅviśvā̍ni̱ bhuva̍nānyasthāt |
hotā̍ pāva̱kaḥ pra̱diva̍ḥ sume̱dhā de̱vo de̱vānya̍jatva̱gnirarha̍n || 2.003.01
narā̱śaṁsa̱ḥ prati̱ dhāmā̍nya̱ñjanti̱sro diva̱ḥ prati̍ ma̱hnā sva̱rciḥ |
ghṛ̱ta̱pruṣā̱ mana̍sā ha̱vyamu̱ndanmū̱rdhanya̱jñasya̱ sama̍naktu de̱vān || 2.003.02
ī̱ḻi̱to a̍gne̱ mana̍sā no̱ arha̍nde̱vānya̍kṣi̱ mānu̍ṣā̱tpūrvo̍ a̱dya |
sa ā va̍ha ma̱rutā̱ṁ śardho̱ acyu̍ta̱mindra̍ṁ naro barhi̱ṣada̍ṁ yajadhvam || 2.003.03
deva̍ barhi̱rvardha̍mānaṁ su̱vīra̍ṁ stī̱rṇaṁ rā̱ye su̱bhara̱ṁ vedya̱syām |
ghṛ̱tenā̱ktaṁ va̍savaḥ sīdate̱daṁ viśve̍ devā ādityā ya̱jñiyā̍saḥ || 2.003.04
vi śra̍yantāmurvi̱yā hū̱yamā̍nā̱ dvāro̍ de̱vīḥ su̍prāya̱ṇā namo̍bhiḥ |
vyaca̍svatī̱rvi pra̍thantāmaju̱ryā varṇa̍ṁ punā̱nā ya̱śasa̍ṁ su̱vīra̍m || 2.003.05
sā̱dhvapā̍ṁsi sa̱natā̍ na ukṣi̱te u̱ṣāsā̱naktā̍ va̱yye̍va raṇvi̱te |
tantu̍ṁ ta̱taṁ sa̱ṁvaya̍ntī samī̱cī ya̱jñasya̱ peśa̍ḥ su̱dughe̱ paya̍svatī || 2.003.06
daivyā̱ hotā̍rā pratha̱mā vi̱duṣṭa̍ra ṛ̱ju ya̍kṣata̱ḥ samṛ̱cā va̱puṣṭa̍rā |
de̱vānyaja̍ntāvṛtu̱thā sama̍ñjato̱ nābhā̍ pṛthi̱vyā adhi̱ sānu̍ṣu tri̱ṣu || 2.003.07
sara̍svatī sā̱dhaya̍ntī̱ dhiya̍ṁ na̱ iḻā̍ de̱vī bhāra̍tī vi̱śvatū̍rtiḥ |
ti̱sro de̱vīḥ sva̱dhayā̍ ba̱rhiredamacchi̍draṁ pāntu śara̱ṇaṁ ni̱ṣadya̍ || 2.003.08
pi̱śaṅga̍rūpaḥ su̱bharo̍ vayo̱dhāḥ śru̱ṣṭī vī̱ro jā̍yate de̱vakā̍maḥ |
pra̱jāṁ tvaṣṭā̱ vi ṣya̍tu̱ nābhi̍ma̱sme athā̍ de̱vānā̱mapye̍tu̱ pātha̍ḥ || 2.003.09
vana̱spati̍ravasṛ̱jannupa̍ sthāda̱gnirha̱viḥ sū̍dayāti̱ pra dhī̱bhiḥ |
tridhā̱ sama̍ktaṁ nayatu prajā̱nande̱vebhyo̱ daivya̍ḥ śami̱topa̍ ha̱vyam || 2.003.10
ghṛ̱taṁ mi̍mikṣe ghṛ̱tama̍sya̱ yoni̍rghṛ̱te śri̱to ghṛ̱tamva̍sya̱ dhāma̍ |
a̱nu̱ṣva̱dhamā va̍ha mā̱daya̍sva̱ svāhā̍kṛtaṁ vṛṣabha vakṣi ha̱vyam || 2.003.11
hu̱ve va̍ḥ su̱dyotmā̍naṁ suvṛ̱ktiṁ vi̱śāma̱gnimati̍thiṁ supra̱yasa̍m |
mi̱tra i̍va̱ yo di̍dhi̱ṣāyyo̱ bhūdde̱va āde̍ve̱ jane̍ jā̱tave̍dāḥ || 2.004.01
i̱maṁ vi̱dhanto̍ a̱pāṁ sa̱dhasthe̍ dvi̱tāda̍dhu̱rbhṛga̍vo vi̱kṣvā̱3̱̍yoḥ |
e̱ṣa viśvā̍nya̱bhya̍stu̱ bhūmā̍ de̱vānā̍ma̱gnira̍ra̱tirjī̱rāśva̍ḥ || 2.004.02
a̱gniṁ de̱vāso̱ mānu̍ṣīṣu vi̱kṣu pri̱yaṁ dhu̍ḥ kṣe̱ṣyanto̱ na mi̱tram |
sa dī̍dayaduśa̱tīrūrmyā̱ ā da̱kṣāyyo̱ yo dāsva̍te̱ dama̱ ā || 2.004.03
a̱sya ra̱ṇvā svasye̍va pu̱ṣṭiḥ saṁdṛ̍ṣṭirasya hiyā̱nasya̱ dakṣo̍ḥ |
vi yo bhari̍bhra̱doṣa̍dhīṣu ji̱hvāmatyo̱ na rathyo̍ dodhavīti̱ vārā̍n || 2.004.04
ā yanme̱ abhva̍ṁ va̱nada̱ḥ pana̍nto̱śigbhyo̱ nāmi̍mīta̱ varṇa̍m |
sa ci̱treṇa̍ cikite̱ raṁsu̍ bhā̱sā ju̍ju̱rvā yo muhu̱rā yuvā̱ bhūt || 2.004.05
ā yo vanā̍ tātṛṣā̱ṇo na bhāti̱ vārṇa pa̱thā rathye̍va svānīt |
kṛ̱ṣṇādhvā̱ tapū̍ ra̱ṇvaści̍keta̱ dyauri̍va̱ smaya̍māno̱ nabho̍bhiḥ || 2.004.06
sa yo vyasthā̍da̱bhi dakṣa̍du̱rvīṁ pa̱śurnaiti̍ sva̱yurago̍pāḥ |
a̱gniḥ śo̱ciṣmā̍ ata̱sānyu̱ṣṇankṛ̱ṣṇavya̍thirasvadaya̱nna bhūma̍ || 2.004.07
nū te̱ pūrva̱syāva̍so̱ adhī̍tau tṛ̱tīye̍ vi̱dathe̱ manma̍ śaṁsi |
a̱sme a̍gne sa̱ṁyadvī̍raṁ bṛ̱hanta̍ṁ kṣu̱manta̱ṁ vāja̍ṁ svapa̱tyaṁ ra̱yiṁ dā̍ḥ || 2.004.08
tvayā̱ yathā̍ gṛtsama̱dāso̍ agne̱ guhā̍ va̱nvanta̱ upa̍rā a̱bhi ṣyuḥ |
su̱vīrā̍so abhimāti̱ṣāha̱ḥ smatsū̱ribhyo̍ gṛṇa̱te tadvayo̍ dhāḥ || 2.004.09
hotā̍janiṣṭa̱ ceta̍naḥ pi̱tā pi̱tṛbhya̍ ū̱taye̍ |
pra̱yakṣa̱ñjenya̱ṁ vasu̍ śa̱kema̍ vā̱jino̱ yama̍m || 2.005.01
ā yasmi̍nsa̱pta ra̱śmaya̍sta̱tā ya̱jñasya̍ ne̱tari̍ |
ma̱nu̱ṣvaddaivya̍maṣṭa̱maṁ potā̱ viśva̱ṁ tadi̍nvati || 2.005.02
da̱dha̱nve vā̱ yadī̱manu̱ voca̱dbrahmā̍ṇi̱ veru̱ tat |
pari̱ viśvā̍ni̱ kāvyā̍ ne̱miśca̱krami̍vābhavat || 2.005.03
sā̱kaṁ hi śuci̍nā̱ śuci̍ḥ praśā̱stā kratu̱nāja̍ni |
vi̱dvā a̍sya vra̱tā dhru̱vā va̱yā i̱vānu̍ rohate || 2.005.04
tā a̍sya̱ varṇa̍mā̱yuvo̱ neṣṭu̍ḥ sacanta dhe̱nava̍ḥ |
ku̱vitti̱sṛbhya̱ ā vara̱ṁ svasā̍ro̱ yā i̱daṁ ya̱yuḥ || 2.005.05
yadī̍ mā̱turupa̱ svasā̍ ghṛ̱taṁ bhara̱ntyasthi̍ta |
tāsā̍madhva̱ryurāga̍tau̱ yavo̍ vṛ̱ṣṭīva̍ modate || 2.005.06
svaḥ svāya̱ dhāya̍se kṛṇu̱tāmṛ̱tvigṛ̱tvija̍m |
stoma̍ṁ ya̱jñaṁ cādara̍ṁ va̱nemā̍ rari̱mā va̱yam || 2.005.07
yathā̍ vi̱dvā ara̱ṁ kara̱dviśve̍bhyo yaja̱tebhya̍ḥ |
a̱yama̍gne̱ tve api̱ yaṁ ya̱jñaṁ ca̍kṛ̱mā va̱yam || 2.005.08
i̱māṁ me̍ agne sa̱midha̍mi̱māmu̍pa̱sada̍ṁ vaneḥ |
i̱mā u̱ ṣu śru̍dhī̱ gira̍ḥ || 2.006.01
a̱yā te̍ agne vidhe̱morjo̍ napā̱daśva̍miṣṭe |
e̱nā sū̱ktena̍ sujāta || 2.006.02
taṁ tvā̍ gī̱rbhirgirva̍ṇasaṁ draviṇa̱syuṁ dra̍viṇodaḥ |
sa̱pa̱ryema̍ sapa̱ryava̍ḥ || 2.006.03
sa bo̍dhi sū̱rirma̱ghavā̱ vasu̍pate̱ vasu̍dāvan |
yu̱yo̱dhya1̱̍smaddveṣā̍ṁsi || 2.006.04
sa no̍ vṛ̱ṣṭiṁ di̱vaspari̱ sa no̱ vāja̍mana̱rvāṇa̍m |
sa na̍ḥ saha̱sriṇī̱riṣa̍ḥ || 2.006.05
īḻā̍nāyāva̱syave̱ yavi̍ṣṭha dūta no gi̱rā |
yaji̍ṣṭha hota̱rā ga̍hi || 2.006.06
a̱ntarhya̍gna̱ īya̍se vi̱dvāñjanmo̱bhayā̍ kave |
dū̱to janye̍va̱ mitrya̍ḥ || 2.006.07
sa vi̱dvā ā ca̍ piprayo̱ yakṣi̍ cikitva ānu̱ṣak |
ā cā̱sminsa̍tsi ba̱rhiṣi̍ || 2.006.08
śreṣṭha̍ṁ yaviṣṭha bhāra̱tāgne̍ dyu̱manta̱mā bha̍ra |
vaso̍ puru̱spṛha̍ṁ ra̱yim || 2.007.01
mā no̱ arā̍tirīśata de̱vasya̱ martya̍sya ca |
parṣi̱ tasyā̍ u̱ta dvi̱ṣaḥ || 2.007.02
viśvā̍ u̱ta tvayā̍ va̱yaṁ dhārā̍ uda̱nyā̍ iva |
ati̍ gāhemahi̱ dviṣa̍ḥ || 2.007.03
śuci̍ḥ pāvaka̱ vandyo'gne̍ bṛ̱hadvi ro̍case |
tvaṁ ghṛ̱tebhi̱rāhu̍taḥ || 2.007.04
tvaṁ no̍ asi bhāra̱tāgne̍ va̱śābhi̍ru̱kṣabhi̍ḥ |
a̱ṣṭāpa̍dībhi̱rāhu̍taḥ || 2.007.05
drva̍nnaḥ sa̱rpirā̍sutiḥ pra̱tno hotā̱ vare̍ṇyaḥ |
saha̍saspu̱tro adbhu̍taḥ || 2.007.06
vā̱ja̱yanni̍va̱ nū rathā̱nyogā̍ a̱gnerupa̍ stuhi |
ya̱śasta̍masya mī̱ḻhuṣa̍ḥ || 2.008.01
yaḥ su̍nī̱tho da̍dā̱śuṣe̍'ju̱ryo ja̱raya̍nna̱rim |
cāru̍pratīka̱ āhu̍taḥ || 2.008.02
ya u̍ śri̱yā dame̱ṣvā do̱ṣoṣasi̍ praśa̱syate̍ |
yasya̍ vra̱taṁ na mīya̍te || 2.008.03
ā yaḥ sva1̱̍rṇa bhā̱nunā̍ ci̱tro vi̱bhātya̱rciṣā̍ |
a̱ñjā̱no a̱jarai̍ra̱bhi || 2.008.04
atri̱manu̍ sva̱rājya̍ma̱gnimu̱kthāni̍ vāvṛdhuḥ |
viśvā̱ adhi̱ śriyo̍ dadhe || 2.008.05
a̱gnerindra̍sya̱ soma̍sya de̱vānā̍mū̱tibhi̍rva̱yam |
ari̍ṣyantaḥ sacemahya̱bhi ṣyā̍ma pṛtanya̱taḥ || 2.008.06
ni hotā̍ hotṛ̱ṣada̍ne̱ vidā̍nastve̱ṣo dī̍di̱vā a̍sadatsu̱dakṣa̍ḥ |
ada̍bdhavratapramati̱rvasi̍ṣṭhaḥ sahasrambha̱raḥ śuci̍jihvo a̱gniḥ || 2.009.01
tvaṁ dū̱tastvamu̍ naḥ para̱spāstvaṁ vasya̱ ā vṛ̍ṣabha praṇe̱tā |
agne̍ to̱kasya̍ na̱stane̍ ta̱nūnā̱mapra̍yuccha̱ndīdya̍dbodhi go̱pāḥ || 2.009.02
vi̱dhema̍ te para̱me janma̍nnagne vi̱dhema̱ stomai̱rava̍re sa̱dhasthe̍ |
yasmā̱dyone̍ru̱dāri̍thā̱ yaje̱ taṁ pra tve ha̱vīṁṣi̍ juhure̱ sami̍ddhe || 2.009.03
agne̱ yaja̍sva ha̱viṣā̱ yajī̍yāñchru̱ṣṭī de̱ṣṇama̱bhi gṛ̍ṇīhi̱ rādha̍ḥ |
tvaṁ hyasi̍ rayi̱patī̍ rayī̱ṇāṁ tvaṁ śu̱krasya̱ vaca̍so ma̱notā̍ || 2.009.04
u̱bhaya̍ṁ te̱ na kṣī̍yate vasa̱vya̍ṁ di̱vedi̍ve̱ jāya̍mānasya dasma |
kṛ̱dhi kṣu̱manta̍ṁ jari̱tāra̍magne kṛ̱dhi pati̍ṁ svapa̱tyasya̍ rā̱yaḥ || 2.009.05
sainānī̍kena suvi̱datro̍ a̱sme yaṣṭā̍ de̱vā āya̍jiṣṭhaḥ sva̱sti |
ada̍bdho go̱pā u̱ta na̍ḥ para̱spā agne̍ dyu̱madu̱ta re̱vaddi̍dīhi || 2.009.06
jo̱hūtro̍ a̱gniḥ pra̍tha̱maḥ pi̱teve̱ḻaspa̱de manu̍ṣā̱ yatsami̍ddhaḥ |
śriya̱ṁ vasā̍no a̱mṛto̱ vice̍tā marmṛ̱jenya̍ḥ śrava̱sya1̱̍ḥ sa vā̱jī || 2.010.01
śrū̱yā a̱gniści̱trabhā̍nu̱rhava̍ṁ me̱ viśvā̍bhirgī̱rbhira̱mṛto̱ vice̍tāḥ |
śyā̱vā ratha̍ṁ vahato̱ rohi̍tā vo̱tāru̱ṣāha̍ cakre̱ vibhṛ̍traḥ || 2.010.02
u̱ttā̱nāyā̍majanaya̱nsuṣū̍ta̱ṁ bhuva̍da̱gniḥ pu̍ru̱peśā̍su̱ garbha̍ḥ |
śiri̍ṇāyāṁ cida̱ktunā̱ maho̍bhi̱rapa̍rīvṛto vasati̱ prace̍tāḥ || 2.010.03
jigha̍rmya̱gniṁ ha̱viṣā̍ ghṛ̱tena̍ pratikṣi̱yanta̱ṁ bhuva̍nāni̱ viśvā̍ |
pṛ̱thuṁ ti̍ra̱ścā vaya̍sā bṛ̱hanta̱ṁ vyaci̍ṣṭha̱mannai̍ rabha̱saṁ dṛśā̍nam || 2.010.04
ā vi̱śvata̍ḥ pra̱tyañca̍ṁ jigharmyara̱kṣasā̱ mana̍sā̱ tajju̍ṣeta |
marya̍śrīḥ spṛha̱yadva̍rṇo a̱gnirnābhi̱mṛśe̍ ta̱nvā̱3̱̍ jarbhu̍rāṇaḥ || 2.010.05
jñe̱yā bhā̱gaṁ sa̍hasā̱no vare̍ṇa̱ tvādū̍tāso manu̱vadva̍dema |
anū̍nama̱gniṁ ju̱hvā̍ vaca̱syā ma̍dhu̱pṛca̍ṁ dhana̱sā jo̍havīmi || 2.010.06
śru̱dhī hava̍mindra̱ mā ri̍ṣaṇya̱ḥ syāma̍ te dā̱vane̱ vasū̍nām |
i̱mā hi tvāmūrjo̍ va̱rdhaya̍nti vasū̱yava̱ḥ sindha̍vo̱ na kṣara̍ntaḥ || 2.011.01
sṛ̱jo ma̱hīri̍ndra̱ yā api̍nva̱ḥ pari̍ṣṭhitā̱ ahi̍nā śūra pū̱rvīḥ |
ama̍rtyaṁ ciddā̱saṁ manya̍māna̱mavā̍bhinadu̱kthairvā̍vṛdhā̱naḥ || 2.011.02
u̱ktheṣvinnu śū̍ra̱ yeṣu̍ cā̱kanstome̍ṣvindra ru̱driye̍ṣu ca |
tubhyede̱tā yāsu̍ mandasā̱naḥ pra vā̱yave̍ sisrate̱ na śu̱bhrāḥ || 2.011.03
śu̱bhraṁ nu te̱ śuṣma̍ṁ va̱rdhaya̍ntaḥ śu̱bhraṁ vajra̍ṁ bā̱hvordadhā̍nāḥ |
śu̱bhrastvami̍ndra vāvṛdhā̱no a̱sme dāsī̱rviśa̱ḥ sūrye̍ṇa sahyāḥ || 2.011.04
guhā̍ hi̱taṁ guhya̍ṁ gū̱ḻhama̱psvapī̍vṛtaṁ mā̱yina̍ṁ kṣi̱yanta̍m |
u̱to a̱po dyāṁ ta̍sta̱bhvāṁsa̱maha̱nnahi̍ṁ śūra vī̱rye̍ṇa || 2.011.05
stavā̱ nu ta̍ indra pū̱rvyā ma̱hānyu̱ta sta̍vāma̱ nūta̍nā kṛ̱tāni̍ |
stavā̱ vajra̍ṁ bā̱hvoru̱śanta̱ṁ stavā̱ harī̱ sūrya̍sya ke̱tū || 2.011.06
harī̱ nu ta̍ indra vā̱jaya̍ntā ghṛta̱ścuta̍ṁ svā̱rama̍svārṣṭām |
vi sa̍ma̱nā bhūmi̍raprathi̱ṣṭāra̍ṁsta̱ parva̍taścitsari̱ṣyan || 2.011.07
ni parva̍taḥ sā̱dyapra̍yuccha̱nsaṁ mā̱tṛbhi̍rvāvaśā̱no a̍krān |
dū̱re pā̱re vāṇī̍ṁ va̱rdhaya̍nta̱ indre̍ṣitāṁ dha̱mani̍ṁ papratha̱nni || 2.011.08
indro̍ ma̱hāṁ sindhu̍mā̱śayā̍naṁ māyā̱vina̍ṁ vṛ̱trama̍sphura̱nniḥ |
are̍jetā̱ṁ roda̍sī bhiyā̱ne kani̍kradato̱ vṛṣṇo̍ asya̱ vajrā̍t || 2.011.09
aro̍ravī̱dvṛṣṇo̍ asya̱ vajro'mā̍nuṣa̱ṁ yanmānu̍ṣo ni̱jūrvā̍t |
ni mā̱yino̍ dāna̱vasya̍ mā̱yā apā̍dayatpapi̱vānsu̱tasya̍ || 2.011.10
pibā̍pi̱bedi̍ndra śūra̱ soma̱ṁ manda̍ntu tvā ma̱ndina̍ḥ su̱tāsa̍ḥ |
pṛ̱ṇanta̍ste ku̱kṣī va̍rdhayantvi̱tthā su̱taḥ pau̱ra indra̍māva || 2.011.11
tve i̱ndrāpya̍bhūma̱ viprā̱ dhiya̍ṁ vanema ṛta̱yā sapa̍ntaḥ |
a̱va̱syavo̍ dhīmahi̱ praśa̍stiṁ sa̱dyaste̍ rā̱yo dā̱vane̍ syāma || 2.011.12
syāma̱ te ta̍ indra̱ ye ta̍ ū̱tī a̍va̱syava̱ ūrja̍ṁ va̱rdhaya̍ntaḥ |
śu̱ṣminta̍ma̱ṁ yaṁ cā̱kanā̍ma devā̱sme ra̱yiṁ rā̍si vī̱rava̍ntam || 2.011.13
rāsi̱ kṣaya̱ṁ rāsi̍ mi̱trama̱sme rāsi̱ śardha̍ indra̱ māru̍taṁ naḥ |
sa̱joṣa̍so̱ ye ca̍ mandasā̱nāḥ pra vā̱yava̍ḥ pā̱ntyagra̍ṇītim || 2.011.14
vyantvinnu yeṣu̍ mandasā̱nastṛ̱patsoma̍ṁ pāhi dra̱hyadi̍ndra |
a̱smānsu pṛ̱tsvā ta̍ru̱trāva̍rdhayo̱ dyāṁ bṛ̱hadbhi̍ra̱rkaiḥ || 2.011.15
bṛ̱hanta̱ innu ye te̍ tarutro̱kthebhi̍rvā su̱mnamā̱vivā̍sān |
stṛ̱ṇā̱nāso̍ ba̱rhiḥ pa̱styā̍va̱ttvotā̱ idi̍ndra̱ vāja̍magman || 2.011.16
u̱greṣvinnu śū̍ra mandasā̱nastrika̍drukeṣu pāhi̱ soma̍mindra |
pra̱dodhu̍va̱cchmaśru̍ṣu prīṇā̱no yā̱hi hari̍bhyāṁ su̱tasya̍ pī̱tim || 2.011.17
dhi̱ṣvā śava̍ḥ śūra̱ yena̍ vṛ̱trama̱vābhi̍na̱ddānu̍maurṇavā̱bham |
apā̍vṛṇo̱rjyoti̱rāryā̍ya̱ ni sa̍vya̱taḥ sā̍di̱ dasyu̍rindra || 2.011.18
sane̍ma̱ ye ta̍ ū̱tibhi̱stara̍nto̱ viśvā̱ḥ spṛdha̱ ārye̍ṇa̱ dasyū̍n |
a̱smabhya̱ṁ tattvā̱ṣṭraṁ vi̱śvarū̍pa̱mara̍ndhayaḥ sā̱khyasya̍ tri̱tāya̍ || 2.011.19
a̱sya su̍vā̱nasya̍ ma̱ndina̍stri̱tasya̱ nyarbu̍daṁ vāvṛdhā̱no a̍staḥ |
ava̍rtaya̱tsūryo̱ na ca̱kraṁ bhi̱nadva̱lamindro̱ aṅgi̍rasvān || 2.011.20
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.011.21
yo jā̱ta e̱va pra̍tha̱mo mana̍svānde̱vo de̱vānkratu̍nā pa̱ryabhū̍ṣat |
yasya̱ śuṣmā̱droda̍sī̱ abhya̍setāṁ nṛ̱mṇasya̍ ma̱hnā sa ja̍nāsa̱ indra̍ḥ || 2.012.01
yaḥ pṛ̍thi̱vīṁ vyatha̍mānā̱madṛ̍ṁha̱dyaḥ parva̍tā̱npraku̍pitā̱ ara̍mṇāt |
yo a̱ntari̍kṣaṁ vima̱me varī̍yo̱ yo dyāmasta̍bhnā̱tsa ja̍nāsa̱ indra̍ḥ || 2.012.02
yo ha̱tvāhi̱mari̍ṇātsa̱pta sindhū̱nyo gā u̱dāja̍dapa̱dhā va̱lasya̍ |
yo aśma̍nora̱ntara̱gniṁ ja̱jāna̍ sa̱ṁvṛksa̱matsu̱ sa ja̍nāsa̱ indra̍ḥ || 2.012.03
yene̱mā viśvā̱ cyava̍nā kṛ̱tāni̱ yo dāsa̱ṁ varṇa̱madha̍ra̱ṁ guhāka̍ḥ |
śva̱ghnīva̱ yo ji̍gī̱vālla̱kṣamāda̍da̱ryaḥ pu̱ṣṭāni̱ sa ja̍nāsa̱ indra̍ḥ || 2.012.04
yaṁ smā̍ pṛ̱cchanti̱ kuha̱ seti̍ gho̱ramu̱temā̍hu̱rnaiṣo a̱stītye̍nam |
so a̱ryaḥ pu̱ṣṭīrvija̍ i̱vā mi̍nāti̱ śrada̍smai dhatta̱ sa ja̍nāsa̱ indra̍ḥ || 2.012.05
yo ra̱dhrasya̍ codi̱tā yaḥ kṛ̱śasya̱ yo bra̱hmaṇo̱ nādha̍mānasya kī̱reḥ |
yu̱ktagrā̍vṇo̱ yo'vi̱tā su̍śi̱praḥ su̱taso̍masya̱ sa ja̍nāsa̱ indra̍ḥ || 2.012.06
yasyāśvā̍saḥ pra̱diśi̱ yasya̱ gāvo̱ yasya̱ grāmā̱ yasya̱ viśve̱ rathā̍saḥ |
yaḥ sūrya̱ṁ ya u̱ṣasa̍ṁ ja̱jāna̱ yo a̱pāṁ ne̱tā sa ja̍nāsa̱ indra̍ḥ || 2.012.07
yaṁ kranda̍sī saṁya̱tī vi̱hvaye̍te̱ pare'va̍ra u̱bhayā̍ a̱mitrā̍ḥ |
sa̱mā̱naṁ ci̱dratha̍mātasthi̱vāṁsā̱ nānā̍ havete̱ sa ja̍nāsa̱ indra̍ḥ || 2.012.08
yasmā̱nna ṛ̱te vi̱jaya̍nte̱ janā̍so̱ yaṁ yudhya̍mānā̱ ava̍se̱ hava̍nte |
yo viśva̍sya prati̱māna̍ṁ ba̱bhūva̱ yo a̍cyuta̱cyutsa ja̍nāsa̱ indra̍ḥ || 2.012.09
yaḥ śaśva̍to̱ mahyeno̱ dadhā̍nā̱nama̍nyamānā̱ñcharvā̍ ja̱ghāna̍ |
yaḥ śardha̍te̱ nānu̱dadā̍ti śṛ̱dhyāṁ yo dasyo̍rha̱ntā sa ja̍nāsa̱ indra̍ḥ || 2.012.10
yaḥ śamba̍ra̱ṁ parva̍teṣu kṣi̱yanta̍ṁ catvāri̱ṁśyāṁ śa̱radya̱nvavi̍ndat |
o̱jā̱yamā̍na̱ṁ yo ahi̍ṁ ja̱ghāna̱ dānu̱ṁ śayā̍na̱ṁ sa ja̍nāsa̱ indra̍ḥ || 2.012.11
yaḥ sa̱ptara̍śmirvṛṣa̱bhastuvi̍ṣmāna̱vāsṛ̍ja̱tsarta̍ve sa̱pta sindhū̍n |
yo rau̍hi̱ṇamasphu̍ra̱dvajra̍bāhu̱rdyāmā̱roha̍nta̱ṁ sa ja̍nāsa̱ indra̍ḥ || 2.012.12
dyāvā̍ cidasmai pṛthi̱vī na̍mete̱ śuṣmā̍ccidasya̱ parva̍tā bhayante |
yaḥ so̍ma̱pā ni̍ci̱to vajra̍bāhu̱ryo vajra̍hasta̱ḥ sa ja̍nāsa̱ indra̍ḥ || 2.012.13
yaḥ su̱nvanta̱mava̍ti̱ yaḥ paca̍nta̱ṁ yaḥ śaṁsa̍nta̱ṁ yaḥ śa̍śamā̱namū̱tī |
yasya̱ brahma̱ vardha̍na̱ṁ yasya̱ somo̱ yasye̱daṁ rādha̱ḥ sa ja̍nāsa̱ indra̍ḥ || 2.012.14
yaḥ su̍nva̱te paca̍te du̱dhra ā ci̱dvāja̱ṁ darda̍rṣi̱ sa kilā̍si sa̱tyaḥ |
va̱yaṁ ta̍ indra vi̱śvaha̍ pri̱yāsa̍ḥ su̱vīrā̍so vi̱datha̱mā va̍dema || 2.012.15
ṛ̱turjani̍trī̱ tasyā̍ a̱paspari̍ ma̱kṣū jā̱ta āvi̍śa̱dyāsu̱ vardha̍te |
tadā̍ha̱nā a̍bhavatpi̱pyuṣī̱ payo̱ṁ'śoḥ pī̱yūṣa̍ṁ pratha̱maṁ tadu̱kthya̍m || 2.013.01
sa̱dhrīmā ya̍nti̱ pari̱ bibhra̍tī̱ḥ payo̍ vi̱śvapsnyā̍ya̱ pra bha̍ranta̱ bhoja̍nam |
sa̱mā̱no adhvā̍ pra̱vatā̍manu̱ṣyade̱ yastākṛ̍ṇoḥ pratha̱maṁ sāsyu̱kthya̍ḥ || 2.013.02
anveko̍ vadati̱ yaddadā̍ti̱ tadrū̱pā mi̱nantada̍pā̱ eka̍ īyate |
viśvā̱ eka̍sya vi̱nuda̍stitikṣate̱ yastākṛ̍ṇoḥ pratha̱maṁ sāsyu̱kthya̍ḥ || 2.013.03
pra̱jābhya̍ḥ pu̱ṣṭiṁ vi̱bhaja̍nta āsate ra̱yimi̍va pṛ̱ṣṭhaṁ pra̱bhava̍ntamāya̱te |
asi̍nva̱ndaṁṣṭrai̍ḥ pi̱tura̍tti̱ bhoja̍na̱ṁ yastākṛ̍ṇoḥ pratha̱maṁ sāsyu̱kthya̍ḥ || 2.013.04
adhā̍kṛṇoḥ pṛthi̱vīṁ sa̱ṁdṛśe̍ di̱ve yo dhau̍tī̱nāma̍hiha̱nnāri̍ṇakpa̱thaḥ |
taṁ tvā̱ stome̍bhiru̱dabhi̱rna vā̱jina̍ṁ de̱vaṁ de̱vā a̍jana̱nsāsyu̱kthya̍ḥ || 2.013.05
yo bhoja̍naṁ ca̱ daya̍se ca̱ vardha̍namā̱rdrādā śuṣka̱ṁ madhu̍maddu̱dohi̍tha |
sa śe̍va̱dhiṁ ni da̍dhiṣe vi̱vasva̍ti̱ viśva̱syaika̍ īśiṣe̱ sāsyu̱kthya̍ḥ || 2.013.06
yaḥ pu̱ṣpiṇī̍śca pra̱sva̍śca̱ dharma̱ṇādhi̱ dāne̱ vya1̱̍vanī̱radhā̍rayaḥ |
yaścāsa̍mā̱ aja̍no di̱dyuto̍ di̱va u̱rurū̱rvā a̱bhita̱ḥ sāsyu̱kthya̍ḥ || 2.013.07
yo nā̍rma̱raṁ sa̱hava̍su̱ṁ niha̍ntave pṛ̱kṣāya̍ ca dā̱save̍śāya̱ cāva̍haḥ |
ū̱rjaya̍ntyā̱ apa̍riviṣṭamā̱sya̍mu̱taivādya pu̍rukṛ̱tsāsyu̱kthya̍ḥ || 2.013.08
śa̱taṁ vā̱ yasya̱ daśa̍ sā̱kamādya̱ eka̍sya śru̱ṣṭau yaddha̍ co̱damāvi̍tha |
a̱ra̱jjau dasyū̱nsamu̍nabda̱bhīta̍ye suprā̱vyo̍ abhava̱ḥ sāsyu̱kthya̍ḥ || 2.013.09
viśvedanu̍ rodha̱nā a̍sya̱ pauṁsya̍ṁ da̱dura̍smai dadhi̱re kṛ̱tnave̱ dhana̍m |
ṣaḻa̍stabhnā vi̱ṣṭira̱ḥ pañca̍ sa̱ṁdṛśa̱ḥ pari̍ pa̱ro a̍bhava̱ḥ sāsyu̱kthya̍ḥ || 2.013.10
su̱pra̱vā̱ca̱naṁ tava̍ vīra vī̱ryaṁ1̱̍ yadeke̍na̱ kratu̍nā vi̱ndase̱ vasu̍ |
jā̱tūṣṭhi̍rasya̱ pra vaya̱ḥ saha̍svato̱ yā ca̱kartha̱ sendra̱ viśvā̍syu̱kthya̍ḥ || 2.013.11
ara̍maya̱ḥ sara̍pasa̱starā̍ya̱ kaṁ tu̱rvīta̍ye ca va̱yyā̍ya ca sru̱tim |
nī̱cā santa̱muda̍nayaḥ parā̱vṛja̱ṁ prāndhaṁ śro̱ṇaṁ śra̱vaya̱nsāsyu̱kthya̍ḥ || 2.013.12
a̱smabhya̱ṁ tadva̍so dā̱nāya̱ rādha̱ḥ sama̍rthayasva ba̱hu te̍ vasa̱vya̍m |
indra̱ yacci̱traṁ śra̍va̱syā anu̱ dyūnbṛ̱hadva̍dema vi̱dathe̍ su̱vīrā̍ḥ || 2.013.13
adhva̍ryavo̱ bhara̱tendrā̍ya̱ soma̱māma̍trebhiḥ siñcatā̱ madya̱mandha̍ḥ |
kā̱mī hi vī̱raḥ sada̍masya pī̱tiṁ ju̱hota̱ vṛṣṇe̱ tadide̱ṣa va̍ṣṭi || 2.014.01
adhva̍ryavo̱ yo a̱po va̍vri̱vāṁsa̍ṁ vṛ̱traṁ ja̱ghānā̱śanye̍va vṛ̱kṣam |
tasmā̍ e̱taṁ bha̍rata tadva̱śāya̍ e̱ṣa indro̍ arhati pī̱tima̍sya || 2.014.02
adhva̍ryavo̱ yo dṛbhī̍kaṁ ja̱ghāna̱ yo gā u̱dāja̱dapa̱ hi va̱laṁ vaḥ |
tasmā̍ e̱tama̱ntari̍kṣe̱ na vāta̱mindra̱ṁ somai̱rorṇu̍ta̱ jūrna vastrai̍ḥ || 2.014.03
adhva̍ryavo̱ ya ura̍ṇaṁ ja̱ghāna̱ nava̍ ca̱khvāṁsa̍ṁ nava̱tiṁ ca̍ bā̱hūn |
yo arbu̍da̱mava̍ nī̱cā ba̍bā̱dhe tamindra̱ṁ soma̍sya bhṛ̱the hi̍nota || 2.014.04
adhva̍ryavo̱ yaḥ svaśna̍ṁ ja̱ghāna̱ yaḥ śuṣṇa̍ma̱śuṣa̱ṁ yo vya̍ṁsam |
yaḥ pipru̱ṁ namu̍ci̱ṁ yo ru̍dhi̱krāṁ tasmā̱ indrā̱yāndha̍so juhota || 2.014.05
adhva̍ryavo̱ yaḥ śa̱taṁ śamba̍rasya̱ puro̍ bi̱bhedāśma̍neva pū̱rvīḥ |
yo va̱rcina̍ḥ śa̱tamindra̍ḥ sa̱hasra̍ma̱pāva̍pa̱dbhara̍tā̱ soma̍masmai || 2.014.06
adhva̍ryavo̱ yaḥ śa̱tamā sa̱hasra̱ṁ bhūmyā̍ u̱pasthe'va̍pajjagha̱nvān |
kutsa̍syā̱yora̍tithi̱gvasya̍ vī̱rānnyāvṛ̍ṇa̱gbhara̍tā̱ soma̍masmai || 2.014.07
adhva̍ryavo̱ yanna̍raḥ kā̱mayā̍dhve śru̱ṣṭī vaha̍nto naśathā̱ tadindre̍ |
gabha̍stipūtaṁ bharata śru̱tāyendrā̍ya̱ soma̍ṁ yajyavo juhota || 2.014.08
adhva̍ryava̱ḥ karta̍nā śru̱ṣṭima̍smai̱ vane̱ nipū̍ta̱ṁ vana̱ unna̍yadhvam |
ju̱ṣā̱ṇo hastya̍ma̱bhi vā̍vaśe va̱ indrā̍ya̱ soma̍ṁ madi̱raṁ ju̍hota || 2.014.09
adhva̍ryava̱ḥ paya̱sodha̱ryathā̱ goḥ some̍bhirīṁ pṛṇatā bho̱jamindra̍m |
vedā̱hama̍sya̱ nibhṛ̍taṁ ma e̱tadditsa̍nta̱ṁ bhūyo̍ yaja̱taści̍keta || 2.014.10
adhva̍ryavo̱ yo di̱vyasya̱ vasvo̱ yaḥ pārthi̍vasya̱ kṣamya̍sya̱ rājā̍ |
tamūrda̍ra̱ṁ na pṛ̍ṇatā̱ yave̱nendra̱ṁ some̍bhi̱stadapo̍ vo astu || 2.014.11
a̱smabhya̱ṁ tadva̍so dā̱nāya̱ rādha̱ḥ sama̍rthayasva ba̱hu te̍ vasa̱vya̍m |
indra̱ yacci̱traṁ śra̍va̱syā anu̱ dyūnbṛ̱hadva̍dema vi̱dathe̍ su̱vīrā̍ḥ || 2.014.12
pra ghā̱ nva̍sya maha̱to ma̱hāni̍ sa̱tyā sa̱tyasya̱ kara̍ṇāni vocam |
trika̍drukeṣvapibatsu̱tasyā̱sya made̱ ahi̱mindro̍ jaghāna || 2.015.01
a̱va̱ṁśe dyāma̍stabhāyadbṛ̱hanta̱mā roda̍sī apṛṇada̱ntari̍kṣam |
sa dhā̍rayatpṛthi̱vīṁ pa̱pratha̍cca̱ soma̍sya̱ tā mada̱ indra̍ścakāra || 2.015.02
sadme̍va̱ prāco̱ vi mi̍māya̱ mānai̱rvajre̍ṇa̱ khānya̍tṛṇanna̱dīnā̍m |
vṛthā̍sṛjatpa̱thibhi̍rdīrghayā̱thaiḥ soma̍sya̱ tā mada̱ indra̍ścakāra || 2.015.03
sa pra̍vo̱ḻhṝnpa̍ri̱gatyā̍ da̱bhīte̱rviśva̍madhā̱gāyu̍dhami̱ddhe a̱gnau |
saṁ gobhi̱raśvai̍rasṛja̱drathe̍bhi̱ḥ soma̍sya̱ tā mada̱ indra̍ścakāra || 2.015.04
sa ī̍ṁ ma̱hīṁ dhuni̱meto̍raramṇā̱tso a̍snā̱tṝna̍pārayatsva̱sti |
ta u̱tsnāya̍ ra̱yima̱bhi pra ta̍sthu̱ḥ soma̍sya̱ tā mada̱ indra̍ścakāra || 2.015.05
soda̍ñca̱ṁ sindhu̍mariṇānmahi̱tvā vajre̱ṇāna̍ u̱ṣasa̱ḥ saṁ pi̍peṣa |
a̱ja̱vaso̍ ja̱vinī̍bhirvivṛ̱ścansoma̍sya̱ tā mada̱ indra̍ścakāra || 2.015.06
sa vi̱dvā a̍pago̱haṁ ka̱nīnā̍mā̱virbhava̱nnuda̍tiṣṭhatparā̱vṛk |
prati̍ śro̱ṇaḥ sthā̱dvya1̱̍naga̍caṣṭa̱ soma̍sya̱ tā mada̱ indra̍ścakāra || 2.015.07
bhi̱nadva̱lamaṅgi̍robhirgṛṇā̱no vi parva̍tasya dṛṁhi̱tānyai̍rat |
ri̱ṇagrodhā̍ṁsi kṛ̱trimā̍ṇyeṣā̱ṁ soma̍sya̱ tā mada̱ indra̍ścakāra || 2.015.08
svapne̍nā̱bhyupyā̱ cumu̍ri̱ṁ dhuni̍ṁ ca ja̱ghantha̱ dasyu̱ṁ pra da̱bhīti̍māvaḥ |
ra̱mbhī ci̱datra̍ vivide̱ hira̍ṇya̱ṁ soma̍sya̱ tā mada̱ indra̍ścakāra || 2.015.09
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.015.10
pra va̍ḥ sa̱tāṁ jyeṣṭha̍tamāya suṣṭu̱tima̱gnāvi̍va samidhā̱ne ha̱virbha̍re |
indra̍maju̱ryaṁ ja̱raya̍ntamukṣi̱taṁ sa̱nādyuvā̍na̱mava̍se havāmahe || 2.016.01
yasmā̱dindrā̍dbṛha̱taḥ kiṁ ca̱nemṛ̱te viśvā̍nyasmi̱nsambhṛ̱tādhi̍ vī̱ryā̍ |
ja̱ṭhare̱ soma̍ṁ ta̱nvī̱3̱̍ saho̱ maho̱ haste̱ vajra̱ṁ bhara̍ti śī̱rṣaṇi̱ kratu̍m || 2.016.02
na kṣo̱ṇībhyā̍ṁ pari̱bhve̍ ta indri̱yaṁ na sa̍mu̱draiḥ parva̍tairindra te̱ ratha̍ḥ |
na te̱ vajra̱manva̍śnoti̱ kaśca̱na yadā̱śubhi̱ḥ pata̍si̱ yoja̍nā pu̱ru || 2.016.03
viśve̱ hya̍smai yaja̱tāya̍ dhṛ̱ṣṇave̱ kratu̱ṁ bhara̍nti vṛṣa̱bhāya̱ saśca̍te |
vṛṣā̍ yajasva ha̱viṣā̍ vi̱duṣṭa̍ra̱ḥ pibe̍ndra̱ soma̍ṁ vṛṣa̱bheṇa̍ bhā̱nunā̍ || 2.016.04
vṛṣṇa̱ḥ kośa̍ḥ pavate̱ madhva̍ ū̱rmirvṛ̍ṣa̱bhānnā̍ya vṛṣa̱bhāya̱ pāta̍ve |
vṛṣa̍ṇādhva̱ryū vṛ̍ṣa̱bhāso̱ adra̍yo̱ vṛṣa̍ṇa̱ṁ soma̍ṁ vṛṣa̱bhāya̍ suṣvati || 2.016.05
vṛṣā̍ te̱ vajra̍ u̱ta te̱ vṛṣā̱ ratho̱ vṛṣa̍ṇā̱ harī̍ vṛṣa̱bhāṇyāyu̍dhā |
vṛṣṇo̱ mada̍sya vṛṣabha̱ tvamī̍śiṣa̱ indra̱ soma̍sya vṛṣa̱bhasya̍ tṛpṇuhi || 2.016.06
pra te̱ nāva̱ṁ na sama̍ne vaca̱syuva̱ṁ brahma̍ṇā yāmi̱ sava̍neṣu̱ dādhṛ̍ṣiḥ |
ku̱vinno̍ a̱sya vaca̍so ni̱bodhi̍ṣa̱dindra̱mutsa̱ṁ na vasu̍naḥ sicāmahe || 2.016.07
pu̱rā sa̍mbā̱dhāda̱bhyā va̍vṛtsva no dhe̱nurna va̱tsaṁ yava̍sasya pi̱pyuṣī̍ |
sa̱kṛtsu te̍ suma̱tibhi̍ḥ śatakrato̱ saṁ patnī̍bhi̱rna vṛṣa̍ṇo nasīmahi || 2.016.08
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.016.09
tada̍smai̱ navya̍maṅgira̱svada̍rcata̱ śuṣmā̱ yada̍sya pra̱tnatho̱dīra̍te |
viśvā̱ yadgo̱trā saha̍sā̱ parī̍vṛtā̱ made̱ soma̍sya dṛṁhi̱tānyaira̍yat || 2.017.01
sa bhū̍tu̱ yo ha̍ pratha̱māya̱ dhāya̍sa̱ ojo̱ mimā̍no mahi̱māna̱māti̍rat |
śūro̱ yo yu̱tsu ta̱nva̍ṁ pari̱vyata̍ śī̱rṣaṇi̱ dyāṁ ma̍hi̱nā pratya̍muñcata || 2.017.02
adhā̍kṛṇoḥ pratha̱maṁ vī̱rya̍ṁ ma̱hadyada̱syāgre̱ brahma̍ṇā̱ śuṣma̱maira̍yaḥ |
ra̱the̱ṣṭhena̱ harya̍śvena̱ vicyu̍tā̱ḥ pra jī̱raya̍ḥ sisrate sa̱dhrya1̱̍kpṛtha̍k || 2.017.03
adhā̱ yo viśvā̱ bhuva̍nā̱bhi ma̱jmane̍śāna̱kṛtprava̍yā a̱bhyava̍rdhata |
ādroda̍sī̱ jyoti̍ṣā̱ vahni̱rāta̍no̱tsīvya̱ntamā̍ṁsi̱ dudhi̍tā̱ sama̍vyayat || 2.017.04
sa prā̱cīnā̱nparva̍tāndṛṁha̱doja̍sādharā̱cīna̍makṛṇoda̱pāmapa̍ḥ |
adhā̍rayatpṛthi̱vīṁ vi̱śvadhā̍yasa̱masta̍bhnānmā̱yayā̱ dyāma̍va̱srasa̍ḥ || 2.017.05
sāsmā̱ ara̍ṁ bā̱hubhyā̱ṁ yaṁ pi̱tākṛ̍ṇo̱dviśva̍smā̱dā ja̱nuṣo̱ veda̍sa̱spari̍ |
yenā̍ pṛthi̱vyāṁ ni krivi̍ṁ śa̱yadhyai̱ vajre̍ṇa ha̱tvyavṛ̍ṇaktuvi̱ṣvaṇi̍ḥ || 2.017.06
a̱mā̱jūri̍va pi̱troḥ sacā̍ sa̱tī sa̍mā̱nādā sada̍sa̱stvāmi̍ye̱ bhaga̍m |
kṛ̱dhi pra̍ke̱tamupa̍ mā̱syā bha̍ra da̱ddhi bhā̱gaṁ ta̱nvo̱3̱̍ yena̍ mā̱maha̍ḥ || 2.017.07
bho̱jaṁ tvāmi̍ndra va̱yaṁ hu̍vema da̱diṣṭvami̱ndrāpā̍ṁsi̱ vājā̍n |
a̱vi̱ḍḍhī̍ndra ci̱trayā̍ na ū̱tī kṛ̱dhi vṛ̍ṣannindra̱ vasya̍so naḥ || 2.017.08
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.017.09
prā̱tā ratho̱ navo̍ yoji̱ sasni̱ścatu̍ryugastrika̱śaḥ sa̱ptara̍śmiḥ |
daśā̍ritro manu̱ṣya̍ḥ sva̱rṣāḥ sa i̱ṣṭibhi̍rma̱tibhī̱ raṁhyo̍ bhūt || 2.018.01
sāsmā̱ ara̍ṁ pratha̱maṁ sa dvi̱tīya̍mu̱to tṛ̱tīya̱ṁ manu̍ṣa̱ḥ sa hotā̍ |
a̱nyasyā̱ garbha̍ma̱nya ū̍ jananta̱ so a̱nyebhi̍ḥ sacate̱ jenyo̱ vṛṣā̍ || 2.018.02
harī̱ nu ka̱ṁ ratha̱ indra̍sya yojamā̱yai sū̱ktena̱ vaca̍sā̱ nave̍na |
mo ṣu tvāmatra̍ ba̱havo̱ hi viprā̱ ni rī̍rama̱nyaja̍mānāso a̱nye || 2.018.03
ā dvābhyā̱ṁ hari̍bhyāmindra yā̱hyā ca̱turbhi̱rā ṣa̱ḍbhirhū̱yamā̍naḥ |
āṣṭā̱bhirda̱śabhi̍ḥ soma̱peya̍ma̱yaṁ su̱taḥ su̍makha̱ mā mṛdha̍skaḥ || 2.018.04
ā vi̍ṁśa̱tyā tri̱ṁśatā̍ yāhya̱rvāṅā ca̍tvāri̱ṁśatā̱ hari̍bhiryujā̱naḥ |
ā pa̍ñcā̱śatā̍ su̱rathe̍bhiri̱ndrā ṣa̱ṣṭyā sa̍pta̱tyā so̍ma̱peya̍m || 2.018.05
āśī̱tyā na̍va̱tyā yā̍hya̱rvāṅā śa̱tena̱ hari̍bhiru̱hyamā̍naḥ |
a̱yaṁ hi te̍ śu̱naho̍treṣu̱ soma̱ indra̍ tvā̱yā pari̍ṣikto̱ madā̍ya || 2.018.06
mama̱ brahme̍ndra yā̱hyacchā̱ viśvā̱ harī̍ dhu̱ri dhi̍ṣvā̱ ratha̍sya |
pu̱ru̱trā hi vi̱havyo̍ ba̱bhūthā̱smiñchū̍ra̱ sava̍ne mādayasva || 2.018.07
na ma̱ indre̍ṇa sa̱khyaṁ vi yo̍ṣada̱smabhya̍masya̱ dakṣi̍ṇā duhīta |
upa̱ jyeṣṭhe̱ varū̍the̱ gabha̍stau prā̱yeprā̍ye jigī̱vāṁsa̍ḥ syāma || 2.018.08
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.018.09
apā̍yya̱syāndha̍so̱ madā̍ya̱ manī̍ṣiṇaḥ suvā̱nasya̱ praya̍saḥ |
yasmi̱nnindra̍ḥ pra̱divi̍ vāvṛdhā̱na oko̍ da̱dhe bra̍hma̱ṇyanta̍śca̱ nara̍ḥ || 2.019.01
a̱sya ma̍ndā̱no madhvo̱ vajra̍ha̱sto'hi̱mindro̍ arṇo̱vṛta̱ṁ vi vṛ̍ścat |
pra yadvayo̱ na svasa̍rā̱ṇyacchā̱ prayā̍ṁsi ca na̱dīnā̱ṁ cakra̍manta || 2.019.02
sa māhi̍na̱ indro̱ arṇo̍ a̱pāṁ praira̍yadahi̱hācchā̍ samu̱dram |
aja̍naya̱tsūrya̍ṁ vi̱dadgā a̱ktunāhnā̍ṁ va̱yunā̍ni sādhat || 2.019.03
so a̍pra̱tīni̱ mana̍ve pu̱rūṇīndro̍ dāśaddā̱śuṣe̱ hanti̍ vṛ̱tram |
sa̱dyo yo nṛbhyo̍ ata̱sāyyo̱ bhūtpa̍spṛdhā̱nebhya̱ḥ sūrya̍sya sā̱tau || 2.019.04
sa su̍nva̱ta indra̱ḥ sūrya̱mā de̱vo ri̍ṇa̱ṅmartyā̍ya sta̱vān |
ā yadra̱yiṁ gu̱hada̍vadyamasmai̱ bhara̱daṁśa̱ṁ naita̍śo daśa̱syan || 2.019.05
sa ra̍ndhayatsa̱diva̱ḥ sāra̍thaye̱ śuṣṇa̍ma̱śuṣa̱ṁ kuya̍va̱ṁ kutsā̍ya |
divo̍dāsāya nava̱tiṁ ca̱ navendra̱ḥ puro̱ vyai̍ra̱cchamba̍rasya || 2.019.06
e̱vā ta̍ indro̱catha̍mahema śrava̱syā na tmanā̍ vā̱jaya̍ntaḥ |
a̱śyāma̱ tatsāpta̍māśuṣā̱ṇā na̱namo̱ vadha̱rade̍vasya pī̱yoḥ || 2.019.07
e̱vā te̍ gṛtsama̱dāḥ śū̍ra̱ manmā̍va̱syavo̱ na va̱yunā̍ni takṣuḥ |
bra̱hma̱ṇyanta̍ indra te̱ navī̍ya̱ iṣa̱mūrja̍ṁ sukṣi̱tiṁ su̱mnama̍śyuḥ || 2.019.08
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.019.09
va̱yaṁ te̱ vaya̍ indra vi̱ddhi ṣu ṇa̱ḥ pra bha̍rāmahe vāja̱yurna ratha̍m |
vi̱pa̱nyavo̱ dīdhya̍to manī̱ṣā su̱mnamiya̍kṣanta̱stvāva̍to̱ nṝn || 2.020.01
tvaṁ na̍ indra̱ tvābhi̍rū̱tī tvā̍ya̱to a̍bhiṣṭi̱pāsi̱ janā̍n |
tvami̱no dā̱śuṣo̍ varū̱tetthādhī̍ra̱bhi yo nakṣa̍ti tvā || 2.020.02
sa no̱ yuvendro̍ jo̱hūtra̱ḥ sakhā̍ śi̱vo na̱rāma̍stu pā̱tā |
yaḥ śaṁsa̍nta̱ṁ yaḥ śa̍śamā̱namū̱tī paca̍ntaṁ ca stu̱vanta̍ṁ ca pra̱ṇeṣa̍t || 2.020.03
tamu̍ stuṣa̱ indra̱ṁ taṁ gṛ̍ṇīṣe̱ yasmi̍npu̱rā vā̍vṛ̱dhuḥ śā̍śa̱duśca̍ |
sa vasva̱ḥ kāma̍ṁ pīparadiyā̱no bra̍hmaṇya̱to nūta̍nasyā̱yoḥ || 2.020.04
so aṅgi̍rasāmu̱cathā̍ juju̱ṣvānbrahmā̍ tūto̱dindro̍ gā̱tumi̱ṣṇan |
mu̱ṣṇannu̱ṣasa̱ḥ sūrye̍ṇa sta̱vānaśna̍sya cicchiśnathatpū̱rvyāṇi̍ || 2.020.05
sa ha̍ śru̱ta indro̱ nāma̍ de̱va ū̱rdhvo bhu̍va̱nmanu̍ṣe da̱smata̍maḥ |
ava̍ pri̱yama̍rśasā̱nasya̍ sā̱hvāñchiro̍ bharaddā̱sasya̍ sva̱dhāvā̍n || 2.020.06
sa vṛ̍tra̱hendra̍ḥ kṛ̱ṣṇayo̍nīḥ puraṁda̱ro dāsī̍rairaya̱dvi |
aja̍naya̱nmana̍ve̱ kṣāma̱paśca̍ sa̱trā śaṁsa̱ṁ yaja̍mānasya tūtot || 2.020.07
tasmai̍ tava̱sya1̱̍manu̍ dāyi sa̱trendrā̍ya de̱vebhi̱rarṇa̍sātau |
prati̱ yada̍sya̱ vajra̍ṁ bā̱hvordhurha̱tvī dasyū̱npura̱ āya̍sī̱rni tā̍rīt || 2.020.08
nū̱naṁ sā te̱ prati̱ vara̍ṁ jari̱tre du̍hī̱yadi̍ndra̱ dakṣi̍ṇā ma̱ghonī̍ |
śikṣā̍ sto̱tṛbhyo̱ māti̍ dha̱gbhago̍ no bṛ̱hadva̍dema vi̱dathe̍ su̱vīrā̍ḥ || 2.020.09
vi̱śva̱jite̍ dhana̱jite̍ sva̱rjite̍ satrā̱jite̍ nṛ̱jita̍ urvarā̱jite̍ |
a̱śva̱jite̍ go̱jite̍ a̱bjite̍ bha̱rendrā̍ya̱ soma̍ṁ yaja̱tāya̍ harya̱tam || 2.021.01
a̱bhi̱bhuve̍'bhibha̱ṅgāya̍ vanva̱te'ṣā̍ḻhāya̱ saha̍mānāya ve̱dhase̍ |
tu̱vi̱graye̱ vahna̍ye du̱ṣṭarī̍tave satrā̱sāhe̱ nama̱ indrā̍ya vocata || 2.021.02
sa̱trā̱sā̱ho ja̍nabha̱kṣo ja̍naṁsa̱haścyava̍no yu̱dhmo anu̱ joṣa̍mukṣi̱taḥ |
vṛ̱ta̱ṁca̱yaḥ sahu̍rirvi̱kṣvā̍ri̱ta indra̍sya voca̱ṁ pra kṛ̱tāni̍ vī̱ryā̍ || 2.021.03
a̱nā̱nu̱do vṛ̍ṣa̱bho dodha̍to va̱dho ga̍mbhī̱ra ṛ̱ṣvo asa̍maṣṭakāvyaḥ |
ra̱dhra̱co̱daḥ śnatha̍no vīḻi̱taspṛ̱thurindra̍ḥ suya̱jña u̱ṣasa̱ḥ sva̍rjanat || 2.021.04
ya̱jñena̍ gā̱tuma̱pturo̍ vividrire̱ dhiyo̍ hinvā̱nā u̱śijo̍ manī̱ṣiṇa̍ḥ |
a̱bhi̱svarā̍ ni̱ṣadā̱ gā a̍va̱syava̱ indre̍ hinvā̱nā dravi̍ṇānyāśata || 2.021.05
indra̱ śreṣṭhā̍ni̱ dravi̍ṇāni dhehi̱ citti̱ṁ dakṣa̍sya subhaga̱tvama̱sme |
poṣa̍ṁ rayī̱ṇāmari̍ṣṭiṁ ta̱nūnā̍ṁ svā̱dmāna̍ṁ vā̱caḥ su̍dina̱tvamahnā̍m || 2.021.06
trika̍drukeṣu mahi̱ṣo yavā̍śiraṁ tuvi̱śuṣma̍stṛ̱patsoma̍mapiba̱dviṣṇu̍nā su̱taṁ yathāva̍śat |
sa ī̍ṁ mamāda̱ mahi̱ karma̱ karta̍ve ma̱hāmu̱ruṁ saina̍ṁ saścadde̱vo de̱vaṁ sa̱tyamindra̍ṁ sa̱tya indu̍ḥ || 2.022.01
adha̱ tviṣī̍mā a̱bhyoja̍sā̱ krivi̍ṁ yu̱dhābha̍va̱dā roda̍sī apṛṇadasya ma̱jmanā̱ pra vā̍vṛdhe |
adha̍ttā̱nyaṁ ja̱ṭhare̱ prema̍ricyata̱ saina̍ṁ saścadde̱vo de̱vaṁ sa̱tyamindra̍ṁ sa̱tya indu̍ḥ || 2.022.02
sā̱kaṁ jā̱taḥ kratu̍nā sā̱kamoja̍sā vavakṣitha sā̱kaṁ vṛ̱ddho vī̱ryai̍ḥ sāsa̱hirmṛdho̱ vica̍rṣaṇiḥ |
dātā̱ rādha̍ḥ stuva̱te kāmya̱ṁ vasu̱ saina̍ṁ saścadde̱vo de̱vaṁ sa̱tyamindra̍ṁ sa̱tya indu̍ḥ || 2.022.03
tava̱ tyannarya̍ṁ nṛ̱to'pa̍ indra pratha̱maṁ pū̱rvyaṁ di̱vi pra̱vācya̍ṁ kṛ̱tam |
yadde̱vasya̱ śava̍sā̱ prāri̍ṇā̱ asu̍ṁ ri̱ṇanna̱paḥ |
bhuva̱dviśva̍ma̱bhyāde̍va̱moja̍sā vi̱dādūrja̍ṁ śa̱takra̍turvi̱dādiṣa̍m || 2.022.04
ga̱ṇānā̍ṁ tvā ga̱ṇapa̍tiṁ havāmahe ka̱viṁ ka̍vī̱nāmu̍pa̱maśra̍vastamam |
jye̱ṣṭha̱rāja̱ṁ brahma̍ṇāṁ brahmaṇaspata̱ ā na̍ḥ śṛ̱ṇvannū̱tibhi̍ḥ sīda̱ sāda̍nam || 2.023.01
de̱vāści̍tte asurya̱ prace̍taso̱ bṛha̍spate ya̱jñiya̍ṁ bhā̱gamā̍naśuḥ |
u̱srā i̍va̱ sūryo̱ jyoti̍ṣā ma̱ho viśve̍ṣā̱mijja̍ni̱tā brahma̍ṇāmasi || 2.023.02
ā vi̱bādhyā̍ pari̱rāpa̱stamā̍ṁsi ca̱ jyoti̍ṣmanta̱ṁ ratha̍mṛ̱tasya̍ tiṣṭhasi |
bṛha̍spate bhī̱mama̍mitra̱dambha̍naṁ rakṣo̱haṇa̍ṁ gotra̱bhida̍ṁ sva̱rvida̍m || 2.023.03
su̱nī̱tibhi̍rnayasi̱ trāya̍se̱ jana̱ṁ yastubhya̱ṁ dāśā̱nna tamaṁho̍ aśnavat |
bra̱hma̱dviṣa̱stapa̍no manyu̱mīra̍si̱ bṛha̍spate̱ mahi̱ tatte̍ mahitva̱nam || 2.023.04
na tamaṁho̱ na du̍ri̱taṁ kuta̍śca̱na nārā̍tayastitiru̱rna dva̍yā̱vina̍ḥ |
viśvā̱ ida̍smāddhva̱raso̱ vi bā̍dhase̱ yaṁ su̍go̱pā rakṣa̍si brahmaṇaspate || 2.023.05
tvaṁ no̍ go̱pāḥ pa̍thi̱kṛdvi̍cakṣa̱ṇastava̍ vra̱tāya̍ ma̱tibhi̍rjarāmahe |
bṛha̍spate̱ yo no̍ a̱bhi hvaro̍ da̱dhe svā taṁ ma̍rmartu du̱cchunā̱ hara̍svatī || 2.023.06
u̱ta vā̱ yo no̍ ma̱rcayā̱danā̍gaso'rātī̱vā marta̍ḥ sānu̱ko vṛka̍ḥ |
bṛha̍spate̱ apa̱ taṁ va̍rtayā pa̱thaḥ su̱gaṁ no̍ a̱syai de̱vavī̍taye kṛdhi || 2.023.07
trā̱tāra̍ṁ tvā ta̱nūnā̍ṁ havāma̱he'va̍spartaradhiva̱ktāra̍masma̱yum |
bṛha̍spate deva̱nido̱ ni ba̍rhaya̱ mā du̱revā̱ utta̍raṁ su̱mnamunna̍śan || 2.023.08
tvayā̍ va̱yaṁ su̱vṛdhā̍ brahmaṇaspate spā̱rhā vasu̍ manu̱ṣyā da̍dīmahi |
yā no̍ dū̱re ta̱ḻito̱ yā arā̍tayo̱'bhi santi̍ ja̱mbhayā̱ tā a̍na̱pnasa̍ḥ || 2.023.09
tvayā̍ va̱yamu̍tta̱maṁ dhī̍mahe̱ vayo̱ bṛha̍spate̱ papri̍ṇā̱ sasni̍nā yu̱jā |
mā no̍ du̱ḥśaṁso̍ abhidi̱psurī̍śata̱ pra su̱śaṁsā̍ ma̱tibhi̍stāriṣīmahi || 2.023.10
a̱nā̱nu̱do vṛ̍ṣa̱bho jagmi̍rāha̱vaṁ niṣṭa̍ptā̱ śatru̱ṁ pṛta̍nāsu sāsa̱hiḥ |
asi̍ sa̱tya ṛ̍ṇa̱yā bra̍hmaṇaspata u̱grasya̍ ciddami̱tā vī̍ḻuha̱rṣiṇa̍ḥ || 2.023.11
ade̍vena̱ mana̍sā̱ yo ri̍ṣa̱ṇyati̍ śā̱sāmu̱gro manya̍māno̱ jighā̍ṁsati |
bṛha̍spate̱ mā praṇa̱ktasya̍ no va̱dho ni ka̍rma ma̱nyuṁ du̱reva̍sya̱ śardha̍taḥ || 2.023.12
bhare̍ṣu̱ havyo̱ nama̍sopa̱sadyo̱ gantā̱ vāje̍ṣu̱ sani̍tā̱ dhana̍ṁdhanam |
viśvā̱ ida̱ryo a̍bhidi̱psvo̱3̱̍ mṛdho̱ bṛha̱spati̱rvi va̍varhā̱ rathā̍ iva || 2.023.13
teji̍ṣṭhayā tapa̱nī ra̱kṣasa̍stapa̱ ye tvā̍ ni̱de da̍dhi̱re dṛ̱ṣṭavī̍ryam |
ā̱vistatkṛ̍ṣva̱ yadasa̍tta u̱kthyaṁ1̱̍ bṛha̍spate̱ vi pa̍ri̱rāpo̍ ardaya || 2.023.14
bṛha̍spate̱ ati̱ yada̱ryo arhā̍ddyu̱madvi̱bhāti̱ kratu̍ma̱jjane̍ṣu |
yaddī̱daya̱cchava̍sa ṛtaprajāta̱ tada̱smāsu̱ dravi̍ṇaṁ dhehi ci̱tram || 2.023.15
mā na̍ḥ ste̱nebhyo̱ ye a̱bhi dru̱haspa̱de ni̍rā̱miṇo̍ ri̱pavo'nne̍ṣu jāgṛ̱dhuḥ |
ā de̱vānā̱moha̍te̱ vi vrayo̍ hṛ̱di bṛha̍spate̱ na pa̱raḥ sāmno̍ viduḥ || 2.023.16
viśve̍bhyo̱ hi tvā̱ bhuva̍nebhya̱spari̱ tvaṣṭāja̍na̱tsāmna̍ḥsāmnaḥ ka̱viḥ |
sa ṛ̍ṇa̱cidṛ̍ṇa̱yā brahma̍ṇa̱spati̍rdru̱ho ha̱ntā ma̱ha ṛ̱tasya̍ dha̱rtari̍ || 2.023.17
tava̍ śri̱ye vya̍jihīta̱ parva̍to̱ gavā̍ṁ go̱tramu̱dasṛ̍jo̱ yada̍ṅgiraḥ |
indre̍ṇa yu̱jā tama̍sā̱ parī̍vṛta̱ṁ bṛha̍spate̱ nira̱pāmau̍bjo arṇa̱vam || 2.023.18
brahma̍ṇaspate̱ tvama̱sya ya̱ntā sū̱ktasya̍ bodhi̱ tana̍yaṁ ca jinva |
viśva̱ṁ tadbha̱draṁ yadava̍nti de̱vā bṛ̱hadva̍dema vi̱dathe̍ su̱vīrā̍ḥ || 2.023.19
semāma̍viḍḍhi̱ prabhṛ̍ti̱ṁ ya īśi̍ṣe̱'yā vi̍dhema̱ nava̍yā ma̱hā gi̱rā |
yathā̍ no mī̱ḍhvānstava̍te̱ sakhā̱ tava̱ bṛha̍spate̱ sīṣa̍dha̱ḥ sota no̍ ma̱tim || 2.024.01
yo nantvā̱nyana̍ma̱nnyoja̍so̱tāda̍rdarma̱nyunā̱ śamba̍rāṇi̱ vi |
prācyā̍vaya̱dacyu̍tā̱ brahma̍ṇa̱spati̱rā cāvi̍śa̱dvasu̍manta̱ṁ vi parva̍tam || 2.024.02
tadde̱vānā̍ṁ de̱vata̍māya̱ kartva̱maśra̍thnandṛ̱ḻhāvra̍danta vīḻi̱tā |
udgā ā̍ja̱dabhi̍na̱dbrahma̍ṇā va̱lamagū̍ha̱ttamo̱ vya̍cakṣaya̱tsva̍ḥ || 2.024.03
aśmā̍syamava̱taṁ brahma̍ṇa̱spati̱rmadhu̍dhārama̱bhi yamoja̱sātṛ̍ṇat |
tame̱va viśve̍ papire sva̱rdṛśo̍ ba̱hu sā̱kaṁ si̍sicu̱rutsa̍mu̱driṇa̍m || 2.024.04
sanā̱ tā kā ci̱dbhuva̍nā̱ bhavī̍tvā mā̱dbhiḥ śa̱radbhi̱rduro̍ varanta vaḥ |
aya̍tantā carato a̱nyada̍nya̱didyā ca̱kāra̍ va̱yunā̱ brahma̍ṇa̱spati̍ḥ || 2.024.05
a̱bhi̱nakṣa̍nto a̱bhi ye tamā̍na̱śurni̱dhiṁ pa̍ṇī̱nāṁ pa̍ra̱maṁ guhā̍ hi̱tam |
te vi̱dvāṁsa̍ḥ prati̱cakṣyānṛ̍tā̱ puna̱ryata̍ u̱ āya̱ntadudī̍yurā̱viśa̍m || 2.024.06
ṛ̱tāvā̍naḥ prati̱cakṣyānṛ̍tā̱ puna̱rāta̱ ā ta̍sthuḥ ka̱vayo̍ ma̱haspa̱thaḥ |
te bā̱hubhyā̍ṁ dhami̱tama̱gnimaśma̍ni̱ naki̱ḥ ṣo a̱styara̍ṇo ja̱hurhi tam || 2.024.07
ṛ̱tajye̍na kṣi̱preṇa̱ brahma̍ṇa̱spati̱ryatra̱ vaṣṭi̱ pra tada̍śnoti̱ dhanva̍nā |
tasya̍ sā̱dhvīriṣa̍vo̱ yābhi̱rasya̍ti nṛ̱cakṣa̍so dṛ̱śaye̱ karṇa̍yonayaḥ || 2.024.08
sa sa̍ṁna̱yaḥ sa vi̍na̱yaḥ pu̱rohi̍ta̱ḥ sa suṣṭu̍ta̱ḥ sa yu̱dhi brahma̍ṇa̱spati̍ḥ |
cā̱kṣmo yadvāja̱ṁ bhara̍te ma̱tī dhanāditsūrya̍stapati tapya̱turvṛthā̍ || 2.024.09
vi̱bhu pra̱bhu pra̍tha̱maṁ me̱hanā̍vato̱ bṛha̱spate̍ḥ suvi̱datrā̍ṇi̱ rādhyā̍ |
i̱mā sā̱tāni̍ ve̱nyasya̍ vā̱jino̱ yena̱ janā̍ u̱bhaye̍ bhuñja̱te viśa̍ḥ || 2.024.10
yo'va̍re vṛ̱jane̍ vi̱śvathā̍ vi̱bhurma̱hāmu̍ ra̱ṇvaḥ śava̍sā va̱vakṣi̍tha |
sa de̱vo de̱vānprati̍ paprathe pṛ̱thu viśvedu̱ tā pa̍ri̱bhūrbrahma̍ṇa̱spati̍ḥ || 2.024.11
viśva̍ṁ sa̱tyaṁ ma̍ghavānā yu̱voridāpa̍śca̱na pra mi̍nanti vra̱taṁ vā̍m |
acche̍ndrābrahmaṇaspatī ha̱virno'nna̱ṁ yuje̍va vā̱jinā̍ jigātam || 2.024.12
u̱tāśi̍ṣṭhā̱ anu̍ śṛṇvanti̱ vahna̍yaḥ sa̱bheyo̱ vipro̍ bharate ma̱tī dhanā̍ |
vī̱ḻu̱dveṣā̱ anu̱ vaśa̍ ṛ̱ṇamā̍da̱diḥ sa ha̍ vā̱jī sa̍mi̱the brahma̍ṇa̱spati̍ḥ || 2.024.13
brahma̍ṇa̱spate̍rabhavadyathāva̱śaṁ sa̱tyo ma̱nyurmahi̱ karmā̍ kariṣya̱taḥ |
yo gā u̱dāja̱tsa di̱ve vi cā̍bhajanma̱hīva̍ rī̱tiḥ śava̍sāsara̱tpṛtha̍k || 2.024.14
brahma̍ṇaspate su̱yama̍sya vi̱śvahā̍ rā̱yaḥ syā̍ma ra̱thyo̱3̱̍ vaya̍svataḥ |
vī̱reṣu̍ vī̱rā upa̍ pṛṅdhi na̱stvaṁ yadīśā̍no̱ brahma̍ṇā̱ veṣi̍ me̱ hava̍m || 2.024.15
brahma̍ṇaspate̱ tvama̱sya ya̱ntā sū̱ktasya̍ bodhi̱ tana̍yaṁ ca jinva |
viśva̱ṁ tadbha̱draṁ yadava̍nti de̱vā bṛ̱hadva̍dema vi̱dathe̍ su̱vīrā̍ḥ || 2.024.16
indhā̍no a̱gniṁ va̍navadvanuṣya̱taḥ kṛ̱tabra̍hmā śūśuvadrā̱taha̍vya̱ it |
jā̱tena̍ jā̱tamati̱ sa pra sa̍rsṛte̱ yaṁya̱ṁ yuja̍ṁ kṛṇu̱te brahma̍ṇa̱spati̍ḥ || 2.025.01
vī̱rebhi̍rvī̱rānva̍navadvanuṣya̱to gobhī̍ ra̱yiṁ pa̍pratha̱dbodha̍ti̱ tmanā̍ |
to̱kaṁ ca̱ tasya̱ tana̍yaṁ ca vardhate̱ yaṁya̱ṁ yuja̍ṁ kṛṇu̱te brahma̍ṇa̱spati̍ḥ || 2.025.02
sindhu̱rna kṣoda̱ḥ śimī̍vā ṛghāya̱to vṛṣe̍va̱ vadhrī̍ra̱bhi va̱ṣṭyoja̍sā |
a̱gneri̍va̱ prasi̍ti̱rnāha̱ varta̍ve̱ yaṁya̱ṁ yuja̍ṁ kṛṇu̱te brahma̍ṇa̱spati̍ḥ || 2.025.03
tasmā̍ arṣanti di̱vyā a̍sa̱ścata̱ḥ sa satva̍bhiḥ pratha̱mo goṣu̍ gacchati |
ani̍bhṛṣṭataviṣirha̱ntyoja̍sā̱ yaṁya̱ṁ yuja̍ṁ kṛṇu̱te brahma̍ṇa̱spati̍ḥ || 2.025.04
tasmā̱ idviśve̍ dhunayanta̱ sindha̱vo'cchi̍drā̱ śarma̍ dadhire pu̱rūṇi̍ |
de̱vānā̍ṁ su̱mne su̱bhaga̱ḥ sa e̍dhate̱ yaṁya̱ṁ yuja̍ṁ kṛṇu̱te brahma̍ṇa̱spati̍ḥ || 2.025.05
ṛ̱juricchaṁso̍ vanavadvanuṣya̱to de̍va̱yannidade̍vayantama̱bhya̍sat |
su̱prā̱vīridva̍navatpṛ̱tsu du̱ṣṭara̱ṁ yajvedaya̍jyo̱rvi bha̍jāti̱ bhoja̍nam || 2.026.01
yaja̍sva vīra̱ pra vi̍hi manāya̱to bha̱draṁ mana̍ḥ kṛṇuṣva vṛtra̱tūrye̍ |
ha̱viṣkṛ̍ṇuṣva su̱bhago̱ yathāsa̍si̱ brahma̍ṇa̱spate̱rava̱ ā vṛ̍ṇīmahe || 2.026.02
sa ijjane̍na̱ sa vi̱śā sa janma̍nā̱ sa pu̱trairvāja̍ṁ bharate̱ dhanā̱ nṛbhi̍ḥ |
de̱vānā̱ṁ yaḥ pi̱tara̍mā̱vivā̍sati śra̱ddhāma̍nā ha̱viṣā̱ brahma̍ṇa̱spati̍m || 2.026.03
yo a̍smai ha̱vyairghṛ̱tava̍dbhi̱ravi̍dha̱tpra taṁ prā̱cā na̍yati̱ brahma̍ṇa̱spati̍ḥ |
u̱ru̱ṣyatī̱maṁha̍so̱ rakṣa̍tī ri̱ṣo̱ṁ3̱̍'hości̍dasmā uru̱cakri̱radbhu̍taḥ || 2.026.04
i̱mā gira̍ ādi̱tyebhyo̍ ghṛ̱tasnū̍ḥ sa̱nādrāja̍bhyo ju̱hvā̍ juhomi |
śṛ̱ṇotu̍ mi̱tro a̍rya̱mā bhago̍ nastuvijā̱to varu̍ṇo̱ dakṣo̱ aṁśa̍ḥ || 2.027.01
i̱maṁ stoma̱ṁ sakra̍tavo me a̱dya mi̱tro a̍rya̱mā varu̍ṇo juṣanta |
ā̱di̱tyāsa̱ḥ śuca̍yo̱ dhāra̍pūtā̱ avṛ̍jinā anava̱dyā ari̍ṣṭāḥ || 2.027.02
ta ā̍di̱tyāsa̍ u̱ravo̍ gabhī̱rā ada̍bdhāso̱ dipsa̍nto bhūrya̱kṣāḥ |
a̱ntaḥ pa̍śyanti vṛji̱nota sā̱dhu sarva̱ṁ rāja̍bhyaḥ para̱mā ci̱danti̍ || 2.027.03
dhā̱raya̍nta ādi̱tyāso̱ jaga̱tsthā de̱vā viśva̍sya̱ bhuva̍nasya go̱pāḥ |
dī̱rghādhi̍yo̱ rakṣa̍māṇā asu̱rya̍mṛ̱tāvā̍na̱ścaya̍mānā ṛ̱ṇāni̍ || 2.027.04
vi̱dyāmā̍dityā̱ ava̍so vo a̱sya yada̍ryamanbha̱ya ā ci̍nmayo̱bhu |
yu̱ṣmāka̍ṁ mitrāvaruṇā̱ praṇī̍tau̱ pari̱ śvabhre̍va duri̱tāni̍ vṛjyām || 2.027.05
su̱go hi vo̍ aryamanmitra̱ panthā̍ anṛkṣa̱ro va̍ruṇa sā̱dhurasti̍ |
tenā̍dityā̱ adhi̍ vocatā no̱ yaccha̍tā no duṣpari̱hantu̱ śarma̍ || 2.027.06
pipa̍rtu no̱ adi̍tī̱ rāja̍pu̱trāti̱ dveṣā̍ṁsyarya̱mā su̱gebhi̍ḥ |
bṛ̱hanmi̱trasya̱ varu̍ṇasya̱ śarmopa̍ syāma puru̱vīrā̱ ari̍ṣṭāḥ || 2.027.07
ti̱sro bhūmī̍rdhāraya̱ntrīru̱ta dyūntrīṇi̍ vra̱tā vi̱dathe̍ a̱ntare̍ṣām |
ṛ̱tenā̍dityā̱ mahi̍ vo mahi̱tvaṁ tada̍ryamanvaruṇa mitra̱ cāru̍ || 2.027.08
trī ro̍ca̱nā di̱vyā dhā̍rayanta hira̱ṇyayā̱ḥ śuca̍yo̱ dhāra̍pūtāḥ |
asva̍pnajo animi̱ṣā ada̍bdhā uru̱śaṁsā̍ ṛ̱jave̱ martyā̍ya || 2.027.09
tvaṁ viśve̍ṣāṁ varuṇāsi̱ rājā̱ ye ca̍ de̱vā a̍sura̱ ye ca̱ martā̍ḥ |
śa̱taṁ no̍ rāsva śa̱rado̍ vi̱cakṣe̱'śyāmāyū̍ṁṣi̱ sudhi̍tāni̱ pūrvā̍ || 2.027.10
na da̍kṣi̱ṇā vi ci̍kite̱ na sa̱vyā na prā̱cīna̍mādityā̱ nota pa̱ścā |
pā̱kyā̍ cidvasavo dhī̱ryā̍ cidyu̱ṣmānī̍to̱ abha̍ya̱ṁ jyoti̍raśyām || 2.027.11
yo rāja̍bhya ṛta̱nibhyo̍ da̱dāśa̱ yaṁ va̱rdhaya̍nti pu̱ṣṭaya̍śca̱ nityā̍ḥ |
sa re̱vānyā̍ti pratha̱mo rathe̍na vasu̱dāvā̍ vi̱dathe̍ṣu praśa̱staḥ || 2.027.12
śuci̍ra̱paḥ sū̱yava̍sā̱ ada̍bdha̱ upa̍ kṣeti vṛ̱ddhava̍yāḥ su̱vīra̍ḥ |
naki̱ṣṭaṁ ghna̱ntyanti̍to̱ na dū̱rādya ā̍di̱tyānā̱ṁ bhava̍ti̱ praṇī̍tau || 2.027.13
adi̍te̱ mitra̱ varu̍ṇo̱ta mṛ̍ḻa̱ yadvo̍ va̱yaṁ ca̍kṛ̱mā kacci̱dāga̍ḥ |
u̱rva̍śyā̱mabha̍ya̱ṁ jyoti̍rindra̱ mā no̍ dī̱rghā a̱bhi na̍śa̱ntami̍srāḥ || 2.027.14
u̱bhe a̍smai pīpayataḥ samī̱cī di̱vo vṛ̱ṣṭiṁ su̱bhago̱ nāma̱ puṣya̍n |
u̱bhā kṣayā̍vā̱jaya̍nyāti pṛ̱tsūbhāvardhau̍ bhavataḥ sā̱dhū a̍smai || 2.027.15
yā vo̍ mā̱yā a̍bhi̱druhe̍ yajatrā̱ḥ pāśā̍ ādityā ri̱pave̱ vicṛ̍ttāḥ |
a̱śvīva̱ tā ati̍ yeṣa̱ṁ rathe̱nāri̍ṣṭā u̱rāvā śarma̍nsyāma || 2.027.16
māhaṁ ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍mā̱peḥ |
mā rā̱yo rā̍jansu̱yamā̱dava̍ sthāṁ bṛ̱hadva̍dema vi̱dathe̍ su̱vīrā̍ḥ || 2.027.17
i̱daṁ ka̱verā̍di̱tyasya̍ sva̱rājo̱ viśvā̍ni̱ sāntya̱bhya̍stu ma̱hnā |
ati̱ yo ma̱ndro ya̱jathā̍ya de̱vaḥ su̍kī̱rtiṁ bhi̍kṣe̱ varu̍ṇasya̱ bhūre̍ḥ || 2.028.01
tava̍ vra̱te su̱bhagā̍saḥ syāma svā̱dhyo̍ varuṇa tuṣṭu̱vāṁsa̍ḥ |
u̱pāya̍na u̱ṣasā̱ṁ goma̍tīnāma̱gnayo̱ na jara̍māṇā̱ anu̱ dyūn || 2.028.02
tava̍ syāma puru̱vīra̍sya̱ śarma̍nnuru̱śaṁsa̍sya varuṇa praṇetaḥ |
yū̱yaṁ na̍ḥ putrā aditeradabdhā a̱bhi kṣa̍madhva̱ṁ yujyā̍ya devāḥ || 2.028.03
pra sī̍mādi̱tyo a̍sṛjadvidha̱rtā ṛ̱taṁ sindha̍vo̱ varu̍ṇasya yanti |
na śrā̍myanti̱ na vi mu̍cantye̱te vayo̱ na pa̍ptū raghu̱yā pari̍jman || 2.028.04
vi macchra̍thāya raśa̱nāmi̱vāga̍ ṛ̱dhyāma̍ te varuṇa̱ khāmṛ̱tasya̍ |
mā tantu̍śchedi̱ vaya̍to̱ dhiya̍ṁ me̱ mā mātrā̍ śārya̱pasa̍ḥ pu̱ra ṛ̱toḥ || 2.028.05
apo̱ su mya̍kṣa varuṇa bhi̱yasa̱ṁ matsamrā̱ḻṛtā̱vo'nu̍ mā gṛbhāya |
dāme̍va va̱tsādvi mu̍mu̱gdhyaṁho̍ na̱hi tvadā̱re ni̱miṣa̍śca̱neśe̍ || 2.028.06
mā no̍ va̱dhairva̍ruṇa̱ ye ta̍ i̱ṣṭāvena̍ḥ kṛ̱ṇvanta̍masura bhrī̱ṇanti̍ |
mā jyoti̍ṣaḥ pravasa̱thāni̍ ganma̱ vi ṣū mṛdha̍ḥ śiśratho jī̱vase̍ naḥ || 2.028.07
nama̍ḥ pu̱rā te̍ varuṇo̱ta nū̱namu̱tāpa̱raṁ tu̍vijāta bravāma |
tve hi ka̱ṁ parva̍te̱ na śri̱tānyapra̍cyutāni dūḻabha vra̱tāni̍ || 2.028.08
para̍ ṛ̱ṇā sā̍vī̱radha̱ matkṛ̍tāni̱ māhaṁ rā̍janna̱nyakṛ̍tena bhojam |
avyu̍ṣṭā̱ innu bhūya̍sīru̱ṣāsa̱ ā no̍ jī̱vānva̍ruṇa̱ tāsu̍ śādhi || 2.028.09
yo me̍ rāja̱nyujyo̍ vā̱ sakhā̍ vā̱ svapne̍ bha̱yaṁ bhī̱rave̱ mahya̱māha̍ |
ste̱no vā̱ yo dipsa̍ti no̱ vṛko̍ vā̱ tvaṁ tasmā̍dvaruṇa pāhya̱smān || 2.028.10
māhaṁ ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍mā̱peḥ |
mā rā̱yo rā̍jansu̱yamā̱dava̍ sthāṁ bṛ̱hadva̍dema vi̱dathe̍ su̱vīrā̍ḥ || 2.028.11
dhṛta̍vratā̱ ādi̍tyā̱ iṣi̍rā ā̱re matka̍rta raha̱sūri̱vāga̍ḥ |
śṛ̱ṇva̱to vo̱ varu̍ṇa̱ mitra̱ devā̍ bha̱drasya̍ vi̱dvā ava̍se huve vaḥ || 2.029.01
yū̱yaṁ de̍vā̱ḥ prama̍tiryū̱yamojo̍ yū̱yaṁ dveṣā̍ṁsi sanu̱taryu̍yota |
a̱bhi̱kṣa̱ttāro̍ a̱bhi ca̱ kṣama̍dhvama̱dyā ca̍ no mṛ̱ḻaya̍tāpa̱raṁ ca̍ || 2.029.02
kimū̱ nu va̍ḥ kṛṇavā̱māpa̍reṇa̱ kiṁ sane̍na vasava̱ āpye̍na |
yū̱yaṁ no̍ mitrāvaruṇādite ca sva̱stimi̍ndrāmaruto dadhāta || 2.029.03
ha̱ye de̍vā yū̱yamidā̱paya̍ḥ stha̱ te mṛ̍ḻata̱ nādha̍mānāya̱ mahya̍m |
mā vo̱ ratho̍ madhyama̱vāḻṛ̱te bhū̱nmā yu̱ṣmāva̍tsvā̱piṣu̍ śramiṣma || 2.029.04
pra va̱ eko̍ mimaya̱ bhūryāgo̱ yanmā̍ pi̱teva̍ kita̱vaṁ śa̍śā̱sa |
ā̱re pāśā̍ ā̱re a̱ghāni̍ devā̱ mā mādhi̍ pu̱tre vimi̍va grabhīṣṭa || 2.029.05
a̱rvāñco̍ a̱dyā bha̍vatā yajatrā̱ ā vo̱ hārdi̱ bhaya̍māno vyayeyam |
trādhva̍ṁ no devā ni̱juro̱ vṛka̍sya̱ trādhva̍ṁ ka̱rtāda̍va̱pado̍ yajatrāḥ || 2.029.06
māhaṁ ma̱ghono̍ varuṇa pri̱yasya̍ bhūri̱dāvna̱ ā vi̍da̱ṁ śūna̍mā̱peḥ |
mā rā̱yo rā̍jansu̱yamā̱dava̍ sthāṁ bṛ̱hadva̍dema vi̱dathe̍ su̱vīrā̍ḥ || 2.029.07
ṛ̱taṁ de̱vāya̍ kṛṇva̱te sa̍vi̱tra indrā̍yāhi̱ghne na ra̍manta̱ āpa̍ḥ |
aha̍raharyātya̱ktura̱pāṁ kiyā̱tyā pra̍tha̱maḥ sarga̍ āsām || 2.030.01
yo vṛ̱trāya̱ sina̱matrābha̍riṣya̱tpra taṁ jani̍trī vi̱duṣa̍ uvāca |
pa̱tho rada̍ntī̱ranu̱ joṣa̍masmai di̱vedi̍ve̱ dhuna̍yo ya̱ntyartha̍m || 2.030.02
ū̱rdhvo hyasthā̱dadhya̱ntari̱kṣe'dhā̍ vṛ̱trāya̱ pra va̱dhaṁ ja̍bhāra |
miha̱ṁ vasā̍na̱ upa̱ hīmadu̍drotti̱gmāyu̍dho ajaya̱cchatru̱mindra̍ḥ || 2.030.03
bṛha̍spate̱ tapu̱ṣāśne̍va vidhya̱ vṛka̍dvaraso̱ asu̍rasya vī̱rān |
yathā̍ ja̱ghantha̍ dhṛṣa̱tā pu̱rā ci̍de̱vā ja̍hi̱ śatru̍ma̱smāka̍mindra || 2.030.04
ava̍ kṣipa di̱vo aśmā̍namu̱ccā yena̱ śatru̍ṁ mandasā̱no ni̱jūrvā̍ḥ |
to̱kasya̍ sā̱tau tana̍yasya̱ bhūre̍ra̱smā a̱rdhaṁ kṛ̍ṇutādindra̱ gonā̍m || 2.030.05
pra hi kratu̍ṁ vṛ̱hatho̱ yaṁ va̍nu̱tho ra̱dhrasya̍ stho̱ yaja̍mānasya co̱dau |
indrā̍somā yu̱vama̱smā a̍viṣṭama̱sminbha̱yasthe̍ kṛṇutamu lo̱kam || 2.030.06
na mā̍ tama̱nna śra̍ma̱nnota ta̍ndra̱nna vo̍cāma̱ mā su̍no̱teti̱ soma̍m |
yo me̍ pṛ̱ṇādyo dada̱dyo ni̱bodhā̱dyo mā̍ su̱nvanta̱mupa̱ gobhi̱rāya̍t || 2.030.07
sara̍svati̱ tvama̱smā a̍viḍḍhi ma̱rutva̍tī dhṛṣa̱tī je̍ṣi̱ śatrū̍n |
tyaṁ ci̱cchardha̍ntaṁ taviṣī̱yamā̍ṇa̱mindro̍ hanti vṛṣa̱bhaṁ śaṇḍi̍kānām || 2.030.08
yo na̱ḥ sanu̍tya u̱ta vā̍ jigha̱tnura̍bhi̱khyāya̱ taṁ ti̍gi̱tena̍ vidhya |
bṛha̍spata̱ āyu̍dhairjeṣi̱ śatrū̍ndru̱he rīṣa̍nta̱ṁ pari̍ dhehi rājan || 2.030.09
a̱smāke̍bhi̱ḥ satva̍bhiḥ śūra̱ śūrai̍rvī̱ryā̍ kṛdhi̱ yāni̍ te̱ kartvā̍ni |
jyoga̍bhūva̱nnanu̍dhūpitāso ha̱tvī teṣā̱mā bha̍rā no̱ vasū̍ni || 2.030.10
taṁ va̱ḥ śardha̱ṁ māru̍taṁ sumna̱yurgi̱ropa̍ bruve̱ nama̍sā̱ daivya̱ṁ jana̍m |
yathā̍ ra̱yiṁ sarva̍vīra̱ṁ naśā̍mahā apatya̱sāca̱ṁ śrutya̍ṁ di̱vedi̍ve || 2.030.11
a̱smāka̍ṁ mitrāvaruṇāvata̱ṁ ratha̍mādi̱tyai ru̱drairvasu̍bhiḥ sacā̱bhuvā̍ |
pra yadvayo̱ na papta̱nvasma̍na̱spari̍ śrava̱syavo̱ hṛṣī̍vanto vana̱rṣada̍ḥ || 2.031.01
adha̍ smā na̱ uda̍vatā sajoṣaso̱ ratha̍ṁ devāso a̱bhi vi̱kṣu vā̍ja̱yum |
yadā̱śava̱ḥ padyā̍bhi̱stitra̍to̱ raja̍ḥ pṛthi̱vyāḥ sānau̱ jaṅgha̍nanta pā̱ṇibhi̍ḥ || 2.031.02
u̱ta sya na̱ indro̍ vi̱śvaca̍rṣaṇirdi̱vaḥ śardhe̍na̱ māru̍tena su̱kratu̍ḥ |
anu̱ nu sthā̍tyavṛ̱kābhi̍rū̱tibhī̱ ratha̍ṁ ma̱he sa̱naye̱ vāja̍sātaye || 2.031.03
u̱ta sya de̱vo bhuva̍nasya sa̱kṣaṇi̱stvaṣṭā̱ gnābhi̍ḥ sa̱joṣā̍ jūjuva̱dratha̍m |
iḻā̱ bhago̍ bṛhaddi̱vota roda̍sī pū̱ṣā pura̍ṁdhira̱śvinā̱vadhā̱ patī̍ || 2.031.04
u̱ta tye de̱vī su̱bhage̍ mithū̱dṛśo̱ṣāsā̱naktā̱ jaga̍tāmapī̱juvā̍ |
stu̱ṣe yadvā̍ṁ pṛthivi̱ navya̍sā̱ vaca̍ḥ sthā̱tuśca̱ vaya̱striva̍yā upa̱stire̍ || 2.031.05
u̱ta va̱ḥ śaṁsa̍mu̱śijā̍miva śma̱syahi̍rbu̱dhnyo̱3̱̍'ja eka̍pādu̱ta |
tri̱ta ṛ̍bhu̱kṣāḥ sa̍vi̱tā cano̍ dadhe̱'pāṁ napā̍dāśu̱hemā̍ dhi̱yā śami̍ || 2.031.06
e̱tā vo̍ va̱śmyudya̍tā yajatrā̱ ata̍kṣannā̱yavo̱ navya̍se̱ sam |
śra̱va̱syavo̱ vāja̍ṁ cakā̱nāḥ sapti̱rna rathyo̱ aha̍ dhī̱tima̍śyāḥ || 2.031.07
a̱sya me̍ dyāvāpṛthivī ṛtāya̱to bhū̱tama̍vi̱trī vaca̍sa̱ḥ siṣā̍sataḥ |
yayo̱rāyu̍ḥ prata̱raṁ te i̱daṁ pu̱ra upa̍stute vasū̱yurvā̍ṁ ma̱ho da̍dhe || 2.032.01
mā no̱ guhyā̱ ripa̍ ā̱yoraha̍ndabha̱nmā na̍ ā̱bhyo rī̍radho du̱cchunā̍bhyaḥ |
mā no̱ vi yau̍ḥ sa̱khyā vi̱ddhi tasya̍ naḥ sumnāya̱tā mana̍sā̱ tattve̍mahe || 2.032.02
ahe̍ḻatā̱ mana̍sā śru̱ṣṭimā va̍ha̱ duhā̍nāṁ dhe̱nuṁ pi̱pyuṣī̍masa̱ścata̍m |
padyā̍bhirā̱śuṁ vaca̍sā ca vā̱jina̱ṁ tvāṁ hi̍nomi puruhūta vi̱śvahā̍ || 2.032.03
rā̱kāma̱haṁ su̱havā̍ṁ suṣṭu̱tī hu̍ve śṛ̱ṇotu̍ naḥ su̱bhagā̱ bodha̍tu̱ tmanā̍ |
sīvya̱tvapa̍ḥ sū̱cyācchi̍dyamānayā̱ dadā̍tu vī̱raṁ śa̱tadā̍yamu̱kthya̍m || 2.032.04
yāste̍ rāke suma̱taya̍ḥ su̱peśa̍so̱ yābhi̱rdadā̍si dā̱śuṣe̱ vasū̍ni |
tābhi̍rno a̱dya su̱manā̍ u̱pāga̍hi sahasrapo̱ṣaṁ su̍bhage̱ rarā̍ṇā || 2.032.05
sinī̍vāli̱ pṛthu̍ṣṭuke̱ yā de̱vānā̱masi̱ svasā̍ |
ju̱ṣasva̍ ha̱vyamāhu̍taṁ pra̱jāṁ de̍vi didiḍḍhi naḥ || 2.032.06
yā su̍bā̱huḥ sva̍ṅgu̱riḥ su̱ṣūmā̍ bahu̱sūva̍rī |
tasyai̍ vi̱śpatnyai̍ ha̱viḥ si̍nīvā̱lyai ju̍hotana || 2.032.07
yā gu̱ṅgūryā si̍nīvā̱lī yā rā̱kā yā sara̍svatī |
i̱ndrā̱ṇīma̍hva ū̱taye̍ varuṇā̱nīṁ sva̱staye̍ || 2.032.08
ā te̍ pitarmarutāṁ su̱mname̍tu̱ mā na̱ḥ sūrya̍sya sa̱ṁdṛśo̍ yuyothāḥ |
a̱bhi no̍ vī̱ro arva̍ti kṣameta̱ pra jā̍yemahi rudra pra̱jābhi̍ḥ || 2.033.01
tvāda̍ttebhī rudra̱ śaṁta̍mebhiḥ śa̱taṁ himā̍ aśīya bheṣa̱jebhi̍ḥ |
vya1̱̍smaddveṣo̍ vita̱raṁ vyaṁho̱ vyamī̍vāścātayasvā̱ viṣū̍cīḥ || 2.033.02
śreṣṭho̍ jā̱tasya̍ rudra śri̱yāsi̍ ta̱vasta̍masta̱vasā̍ṁ vajrabāho |
parṣi̍ ṇaḥ pā̱ramaṁha̍saḥ sva̱sti viśvā̍ a̱bhī̍tī̱ rapa̍so yuyodhi || 2.033.03
mā tvā̍ rudra cukrudhāmā̱ namo̍bhi̱rmā duṣṭu̍tī vṛṣabha̱ mā sahū̍tī |
unno̍ vī̱rā a̍rpaya bheṣa̱jebhi̍rbhi̱ṣakta̍maṁ tvā bhi̱ṣajā̍ṁ śṛṇomi || 2.033.04
havī̍mabhi̱rhava̍te̱ yo ha̱virbhi̱rava̱ stome̍bhī ru̱draṁ di̍ṣīya |
ṛ̱dū̱dara̍ḥ su̱havo̱ mā no̍ a̱syai ba̱bhruḥ su̱śipro̍ rīradhanma̱nāyai̍ || 2.033.05
unmā̍ mamanda vṛṣa̱bho ma̱rutvā̱ntvakṣī̍yasā̱ vaya̍sā̱ nādha̍mānam |
ghṛṇī̍va cchā̱yāma̍ra̱pā a̍śī̱yā vi̍vāseyaṁ ru̱drasya̍ su̱mnam || 2.033.06
kva1̱̍ sya te̍ rudra mṛḻa̱yāku̱rhasto̱ yo asti̍ bheṣa̱jo jalā̍ṣaḥ |
a̱pa̱bha̱rtā rapa̍so̱ daivya̍syā̱bhī nu mā̍ vṛṣabha cakṣamīthāḥ || 2.033.07
pra ba̱bhrave̍ vṛṣa̱bhāya̍ śvitī̱ce ma̱ho ma̱hīṁ su̍ṣṭu̱timī̍rayāmi |
na̱ma̱syā ka̍lmalī̱kina̱ṁ namo̍bhirgṛṇī̱masi̍ tve̱ṣaṁ ru̱drasya̱ nāma̍ || 2.033.08
sthi̱rebhi̱raṅgai̍ḥ puru̱rūpa̍ u̱gro ba̱bhruḥ śu̱krebhi̍ḥ pipiśe̱ hira̍ṇyaiḥ |
īśā̍nāda̱sya bhuva̍nasya̱ bhūre̱rna vā u̍ yoṣadru̱drāda̍su̱rya̍m || 2.033.09
arha̍nbibharṣi̱ sāya̍kāni̱ dhanvārha̍nni̱ṣkaṁ ya̍ja̱taṁ vi̱śvarū̍pam |
arha̍nni̱daṁ da̍yase̱ viśva̱mabhva̱ṁ na vā ojī̍yo rudra̱ tvada̍sti || 2.033.10
stu̱hi śru̱taṁ ga̍rta̱sada̱ṁ yuvā̍naṁ mṛ̱gaṁ na bhī̱mamu̍paha̱tnumu̱gram |
mṛ̱ḻā ja̍ri̱tre ru̍dra̱ stavā̍no̱'nyaṁ te̍ a̱smanni va̍pantu̱ senā̍ḥ || 2.033.11
ku̱mā̱raści̍tpi̱tara̱ṁ vanda̍māna̱ṁ prati̍ nānāma rudropa̱yanta̍m |
bhūre̍rdā̱tāra̱ṁ satpa̍tiṁ gṛṇīṣe stu̱tastvaṁ bhe̍ṣa̱jā rā̍sya̱sme || 2.033.12
yā vo̍ bheṣa̱jā ma̍ruta̱ḥ śucī̍ni̱ yā śaṁta̍mā vṛṣaṇo̱ yā ma̍yo̱bhu |
yāni̱ manu̱ravṛ̍ṇītā pi̱tā na̱stā śaṁ ca̱ yośca̍ ru̱drasya̍ vaśmi || 2.033.13
pari̍ ṇo he̱tī ru̱drasya̍ vṛjyā̱ḥ pari̍ tve̱ṣasya̍ durma̱tirma̱hī gā̍t |
ava̍ sthi̱rā ma̱ghava̍dbhyastanuṣva̱ mīḍhva̍sto̱kāya̱ tana̍yāya mṛḻa || 2.033.14
e̱vā ba̍bhro vṛṣabha cekitāna̱ yathā̍ deva̱ na hṛ̍ṇī̱ṣe na haṁsi̍ |
ha̱va̱na̱śrunno̍ rudre̱ha bo̍dhi bṛ̱hadva̍dema vi̱dathe̍ su̱vīrā̍ḥ || 2.033.15
dhā̱rā̱va̱rā ma̱ruto̍ dhṛ̱ṣṇvo̍jaso mṛ̱gā na bhī̱māstavi̍ṣībhira̱rcina̍ḥ |
a̱gnayo̱ na śu̍śucā̱nā ṛ̍jī̱ṣiṇo̱ bhṛmi̱ṁ dhama̍nto̱ apa̱ gā a̍vṛṇvata || 2.034.01
dyāvo̱ na stṛbhi̍ścitayanta khā̱dino̱ vya1̱̍bhriyā̱ na dyu̍tayanta vṛ̱ṣṭaya̍ḥ |
ru̱dro yadvo̍ maruto rukmavakṣaso̱ vṛṣāja̍ni̱ pṛśnyā̍ḥ śu̱kra ūdha̍ni || 2.034.02
u̱kṣante̱ aśvā̱ atyā̍ ivā̱jiṣu̍ na̱dasya̱ karṇai̍sturayanta ā̱śubhi̍ḥ |
hira̍ṇyaśiprā maruto̱ davi̍dhvataḥ pṛ̱kṣaṁ yā̍tha̱ pṛṣa̍tībhiḥ samanyavaḥ || 2.034.03
pṛ̱kṣe tā viśvā̱ bhuva̍nā vavakṣire mi̱trāya̍ vā̱ sada̱mā jī̱radā̍navaḥ |
pṛṣa̍daśvāso anava̱bhrarā̍dhasa ṛji̱pyāso̱ na va̱yune̍ṣu dhū̱rṣada̍ḥ || 2.034.04
indha̍nvabhirdhe̱nubhī̍ ra̱pśadū̍dhabhiradhva̱smabhi̍ḥ pa̱thibhi̍rbhrājadṛṣṭayaḥ |
ā ha̱ṁsāso̱ na svasa̍rāṇi gantana̱ madho̱rmadā̍ya marutaḥ samanyavaḥ || 2.034.05
ā no̱ brahmā̍ṇi marutaḥ samanyavo na̱rāṁ na śaṁsa̱ḥ sava̍nāni gantana |
aśvā̍miva pipyata dhe̱numūdha̍ni̱ kartā̱ dhiya̍ṁ jari̱tre vāja̍peśasam || 2.034.06
taṁ no̍ dāta maruto vā̱jina̱ṁ ratha̍ āpā̱naṁ brahma̍ ci̱taya̍ddi̱vedi̍ve |
iṣa̍ṁ sto̱tṛbhyo̍ vṛ̱jane̍ṣu kā̱rave̍ sa̱niṁ me̱dhāmari̍ṣṭaṁ du̱ṣṭara̱ṁ saha̍ḥ || 2.034.07
yadyu̱ñjate̍ ma̱ruto̍ ru̱kmava̍kṣa̱so'śvā̱nrathe̍ṣu̱ bhaga̱ ā su̱dāna̍vaḥ |
dhe̱nurna śiśve̱ svasa̍reṣu pinvate̱ janā̍ya rā̱taha̍viṣe ma̱hīmiṣa̍m || 2.034.08
yo no̍ maruto vṛ̱katā̍ti̱ martyo̍ ri̱purda̱dhe va̍savo̱ rakṣa̍tā ri̱ṣaḥ |
va̱rtaya̍ta̱ tapu̍ṣā ca̱kriyā̱bhi tamava̍ rudrā a̱śaso̍ hantanā̱ vadha̍ḥ || 2.034.09
ci̱traṁ tadvo̍ maruto̱ yāma̍ cekite̱ pṛśnyā̱ yadūdha̱rapyā̱payo̍ du̱huḥ |
yadvā̍ ni̱de nava̍mānasya rudriyāstri̱taṁ jarā̍ya jura̱tāma̍dābhyāḥ || 2.034.10
tānvo̍ ma̱ho ma̱ruta̍ eva̱yāvno̱ viṣṇo̍re̱ṣasya̍ prabhṛ̱the ha̍vāmahe |
hira̍ṇyavarṇānkaku̱hānya̱tasru̍co brahma̱ṇyanta̱ḥ śaṁsya̱ṁ rādha̍ īmahe || 2.034.11
te daśa̍gvāḥ pratha̱mā ya̱jñamū̍hire̱ te no̍ hinvantū̱ṣaso̱ vyu̍ṣṭiṣu |
u̱ṣā na rā̱mīra̍ru̱ṇairapo̍rṇute ma̱ho jyoti̍ṣā śuca̱tā goa̍rṇasā || 2.034.12
te kṣo̱ṇībhi̍raru̱ṇebhi̱rnāñjibhī̍ ru̱drā ṛ̱tasya̱ sada̍neṣu vāvṛdhuḥ |
ni̱megha̍mānā̱ atye̍na̱ pāja̍sā suśca̱ndraṁ varṇa̍ṁ dadhire su̱peśa̍sam || 2.034.13
tā i̍yā̱no mahi̱ varū̍thamū̱taya̱ upa̱ ghede̱nā nama̍sā gṛṇīmasi |
tri̱to na yānpañca̱ hotṝ̍na̱bhiṣṭa̍ya āva̱varta̱dava̍rāñca̱kriyāva̍se || 2.034.14
yayā̍ ra̱dhraṁ pā̱raya̱thātyaṁho̱ yayā̍ ni̱do mu̱ñcatha̍ vandi̱tāra̍m |
a̱rvācī̱ sā ma̍ruto̱ yā va̍ ū̱tiro ṣu vā̱śreva̍ suma̱tirji̍gātu || 2.034.15
upe̍masṛkṣi vāja̱yurva̍ca̱syāṁ cano̍ dadhīta nā̱dyo giro̍ me |
a̱pāṁ napā̍dāśu̱hemā̍ ku̱vitsa su̱peśa̍saskarati̱ joṣi̍ṣa̱ddhi || 2.035.01
i̱maṁ sva̍smai hṛ̱da ā suta̍ṣṭa̱ṁ mantra̍ṁ vocema ku̱vida̍sya̱ veda̍t |
a̱pāṁ napā̍dasu̱rya̍sya ma̱hnā viśvā̍nya̱ryo bhuva̍nā jajāna || 2.035.02
sama̱nyā yantyupa̍ yantya̱nyāḥ sa̍mā̱namū̱rvaṁ na̱dya̍ḥ pṛṇanti |
tamū̱ śuci̱ṁ śuca̍yo dīdi̱vāṁsa̍ma̱pāṁ napā̍ta̱ṁ pari̍ tasthu̱rāpa̍ḥ || 2.035.03
tamasme̍rā yuva̱tayo̱ yuvā̍naṁ marmṛ̱jyamā̍nā̱ḥ pari̍ ya̱ntyāpa̍ḥ |
sa śu̱krebhi̱ḥ śikva̍bhī re̱vada̱sme dī̱dāyā̍ni̱dhmo ghṛ̱tani̍rṇiga̱psu || 2.035.04
a̱smai ti̱sro a̍vya̱thyāya̱ nārī̍rde̱vāya̍ de̱vīrdi̍dhiṣa̱ntyanna̍m |
kṛtā̍ i̱vopa̱ hi pra̍sa̱rsre a̱psu sa pī̱yūṣa̍ṁ dhayati pūrva̱sūnā̍m || 2.035.05
aśva̱syātra̱ jani̍mā̱sya ca̱ sva̍rdru̱ho ri̱ṣaḥ sa̱mpṛca̍ḥ pāhi sū̱rīn |
ā̱māsu̍ pū̱rṣu pa̱ro a̍pramṛ̱ṣyaṁ nārā̍tayo̱ vi na̍śa̱nnānṛ̍tāni || 2.035.06
sva ā dame̍ su̱dughā̱ yasya̍ dhe̱nuḥ sva̱dhāṁ pī̍pāya su̱bhvanna̍matti |
so a̱pāṁ napā̍dū̱rjaya̍nna̱psva1̱̍ntarva̍su̱deyā̍ya vidha̱te vi bhā̍ti || 2.035.07
yo a̱psvā śuci̍nā̱ daivye̍na ṛ̱tāvāja̍sra urvi̱yā vi̱bhāti̍ |
va̱yā ida̱nyā bhuva̍nānyasya̱ pra jā̍yante vī̱rudha̍śca pra̱jābhi̍ḥ || 2.035.08
a̱pāṁ napā̱dā hyasthā̍du̱pastha̍ṁ ji̱hmānā̍mū̱rdhvo vi̱dyuta̱ṁ vasā̍naḥ |
tasya̱ jyeṣṭha̍ṁ mahi̱māna̱ṁ vaha̍ntī̱rhira̍ṇyavarṇā̱ḥ pari̍ yanti ya̱hvīḥ || 2.035.09
hira̍ṇyarūpa̱ḥ sa hira̍ṇyasaṁdṛga̱pāṁ napā̱tsedu̱ hira̍ṇyavarṇaḥ |
hi̱ra̱ṇyayā̱tpari̱ yone̍rni̱ṣadyā̍ hiraṇya̱dā da̍da̱tyanna̍masmai || 2.035.10
tada̱syānī̍kamu̱ta cāru̱ nāmā̍pī̱cya̍ṁ vardhate̱ naptu̍ra̱pām |
yami̱ndhate̍ yuva̱taya̱ḥ sami̱tthā hira̍ṇyavarṇaṁ ghṛ̱tamanna̍masya || 2.035.11
a̱smai ba̍hū̱nāma̍va̱māya̱ sakhye̍ ya̱jñairvi̍dhema̱ nama̍sā ha̱virbhi̍ḥ |
saṁ sānu̱ mārjmi̱ didhi̍ṣāmi̱ bilmai̱rdadhā̱myannai̱ḥ pari̍ vanda ṛ̱gbhiḥ || 2.035.12
sa ī̱ṁ vṛṣā̍janaya̱ttāsu̱ garbha̱ṁ sa ī̱ṁ śiśu̍rdhayati̱ taṁ ri̍hanti |
so a̱pāṁ napā̱dana̍bhimlātavarṇo̱'nyasye̍ve̱ha ta̱nvā̍ viveṣa || 2.035.13
a̱sminpa̱de pa̍ra̱me ta̍sthi̱vāṁsa̍madhva̱smabhi̍rvi̱śvahā̍ dīdi̱vāṁsa̍m |
āpo̱ naptre̍ ghṛ̱tamanna̱ṁ vaha̍ntīḥ sva̱yamatkai̱ḥ pari̍ dīyanti ya̱hvīḥ || 2.035.14
ayā̍ṁsamagne sukṣi̱tiṁ janā̱yāyā̍ṁsamu ma̱ghava̍dbhyaḥ suvṛ̱ktim |
viśva̱ṁ tadbha̱draṁ yadava̍nti de̱vā bṛ̱hadva̍dema vi̱dathe̍ su̱vīrā̍ḥ || 2.035.15
tubhya̍ṁ hinvā̱no va̍siṣṭa̱ gā a̱po'dhu̍kṣansī̱mavi̍bhi̱radri̍bhi̱rnara̍ḥ |
pibe̍ndra̱ svāhā̱ prahu̍ta̱ṁ vaṣa̍ṭkṛtaṁ ho̱trādā soma̍ṁ pratha̱mo ya īśi̍ṣe || 2.036.01
ya̱jñaiḥ sammi̍ślā̱ḥ pṛṣa̍tībhirṛ̱ṣṭibhi̱ryāma̍ñchu̱bhrāso̍ a̱ñjiṣu̍ pri̱yā u̱ta |
ā̱sadyā̍ ba̱rhirbha̍ratasya sūnavaḥ po̱trādā soma̍ṁ pibatā divo naraḥ || 2.036.02
a̱meva̍ naḥ suhavā̱ ā hi ganta̍na̱ ni ba̱rhiṣi̍ sadatanā̱ raṇi̍ṣṭana |
athā̍ mandasva jujuṣā̱ṇo andha̍sa̱stvaṣṭa̍rde̱vebhi̱rjani̍bhiḥ su̱madga̍ṇaḥ || 2.036.03
ā va̍kṣi de̱vā i̱ha vi̍pra̱ yakṣi̍ co̱śanho̍ta̱rni ṣa̍dā̱ yoni̍ṣu tri̱ṣu |
prati̍ vīhi̱ prasthi̍taṁ so̱myaṁ madhu̱ pibāgnī̍dhrā̱ttava̍ bhā̱gasya̍ tṛpṇuhi || 2.036.04
e̱ṣa sya te̍ ta̱nvo̍ nṛmṇa̱vardha̍na̱ḥ saha̱ oja̍ḥ pra̱divi̍ bā̱hvorhi̱taḥ |
tubhya̍ṁ su̱to ma̍ghava̱ntubhya̱mābhṛ̍ta̱stvama̍sya̱ brāhma̍ṇā̱dā tṛ̱patpi̍ba || 2.036.05
ju̱ṣethā̍ṁ ya̱jñaṁ bodha̍ta̱ṁ hava̍sya me sa̱tto hotā̍ ni̱vida̍ḥ pū̱rvyā anu̍ |
acchā̱ rājā̍nā̱ nama̍ etyā̱vṛta̍ṁ praśā̱strādā pi̍bataṁ so̱myaṁ madhu̍ || 2.036.06
manda̍sva ho̱trādanu̱ joṣa̱mandha̱so'dhva̍ryava̱ḥ sa pū̱rṇāṁ va̍ṣṭyā̱sica̍m |
tasmā̍ e̱taṁ bha̍rata tadva̱śo da̱dirho̱trātsoma̍ṁ draviṇoda̱ḥ piba̍ ṛ̱tubhi̍ḥ || 2.037.01
yamu̱ pūrva̱mahu̍ve̱ tami̱daṁ hu̍ve̱ sedu̱ havyo̍ da̱diryo nāma̱ patya̍te |
a̱dhva̱ryubhi̱ḥ prasthi̍taṁ so̱myaṁ madhu̍ po̱trātsoma̍ṁ draviṇoda̱ḥ piba̍ ṛ̱tubhi̍ḥ || 2.037.02
medya̍ntu te̱ vahna̍yo̱ yebhi̱rīya̱se'ri̍ṣaṇyanvīḻayasvā vanaspate |
ā̱yūyā̍ dhṛṣṇo abhi̱gūryā̱ tvaṁ ne̱ṣṭrātsoma̍ṁ draviṇoda̱ḥ piba̍ ṛ̱tubhi̍ḥ || 2.037.03
apā̍ddho̱trādu̱ta po̱trāda̍matto̱ta ne̱ṣṭrāda̍juṣata̱ prayo̍ hi̱tam |
tu̱rīya̱ṁ pātra̱mamṛ̍kta̱mama̍rtyaṁ draviṇo̱dāḥ pi̍batu drāviṇoda̱saḥ || 2.037.04
a̱rvāñca̍ma̱dya ya̱yya̍ṁ nṛ̱vāha̍ṇa̱ṁ ratha̍ṁ yuñjāthāmi̱ha vā̍ṁ vi̱moca̍nam |
pṛ̱ṅktaṁ ha̱vīṁṣi̱ madhu̱nā hi ka̍ṁ ga̱tamathā̱ soma̍ṁ pibataṁ vājinīvasū || 2.037.05
joṣya̍gne sa̱midha̱ṁ joṣyāhu̍ti̱ṁ joṣi̱ brahma̱ janya̱ṁ joṣi̍ suṣṭu̱tim |
viśve̍bhi̱rviśvā̍ ṛ̱tunā̍ vaso ma̱ha u̱śande̱vā u̍śa̱taḥ pā̍yayā ha̱viḥ || 2.037.06
udu̱ ṣya de̱vaḥ sa̍vi̱tā sa̱vāya̍ śaśvatta̱maṁ tada̍pā̱ vahni̍rasthāt |
nū̱naṁ de̱vebhyo̱ vi hi dhāti̱ ratna̱mathābha̍jadvī̱tiho̍traṁ sva̱stau || 2.038.01
viśva̍sya̱ hi śru̱ṣṭaye̍ de̱va ū̱rdhvaḥ pra bā̱havā̍ pṛ̱thupā̍ṇi̱ḥ sisa̍rti |
āpa̍ścidasya vra̱ta ā nimṛ̍grā a̱yaṁ ci̱dvāto̍ ramate̱ pari̍jman || 2.038.02
ā̱śubhi̍ści̱dyānvi mu̍cāti nū̱namarī̍rama̱data̍mānaṁ ci̱deto̍ḥ |
a̱hyarṣū̍ṇāṁ ci̱nnya̍yā avi̱ṣyāmanu̍ vra̱taṁ sa̍vi̱turmokyāgā̍t || 2.038.03
puna̱ḥ sama̍vya̱dvita̍ta̱ṁ vaya̍ntī ma̱dhyā karto̱rnya̍dhā̱cchakma̱ dhīra̍ḥ |
utsa̱ṁhāyā̍sthā̱dvyṛ1̱̍tūra̍dardhara̱rama̍tiḥ savi̱tā de̱va āgā̍t || 2.038.04
nānaukā̍ṁsi̱ duryo̱ viśva̱māyu̱rvi ti̍ṣṭhate prabha̱vaḥ śoko̍ a̱gneḥ |
jyeṣṭha̍ṁ mā̱tā sū̱nave̍ bhā̱gamādhā̱danva̍sya̱ keta̍miṣi̱taṁ sa̍vi̱trā || 2.038.05
sa̱māva̍varti̱ viṣṭhi̍to jigī̱ṣurviśve̍ṣā̱ṁ kāma̱ścara̍tāma̱mābhū̍t |
śaśvā̱ apo̱ vikṛ̍taṁ hi̱tvyāgā̱danu̍ vra̱taṁ sa̍vi̱turdaivya̍sya || 2.038.06
tvayā̍ hi̱tamapya̍ma̱psu bhā̱gaṁ dhanvānvā mṛ̍ga̱yaso̱ vi ta̍sthuḥ |
vanā̍ni̱ vibhyo̱ naki̍rasya̱ tāni̍ vra̱tā de̱vasya̍ savi̱turmi̍nanti || 2.038.07
yā̱drā̱dhyaṁ1̱̍ varu̍ṇo̱ yoni̱mapya̱mani̍śitaṁ ni̱miṣi̱ jarbhu̍rāṇaḥ |
viśvo̍ mārtā̱ṇḍo vra̱jamā pa̱śurgā̍tstha̱śo janmā̍ni savi̱tā vyāka̍ḥ || 2.038.08
na yasyendro̱ varu̍ṇo̱ na mi̱tro vra̱tama̍rya̱mā na mi̱nanti̍ ru̱draḥ |
nārā̍taya̱stami̱daṁ sva̱sti hu̱ve de̱vaṁ sa̍vi̱tāra̱ṁ namo̍bhiḥ || 2.038.09
bhaga̱ṁ dhiya̍ṁ vā̱jaya̍nta̱ḥ pura̍ṁdhi̱ṁ narā̱śaṁso̱ gnāspati̍rno avyāḥ |
ā̱ye vā̱masya̍ saṁga̱the ra̍yī̱ṇāṁ pri̱yā de̱vasya̍ savi̱tuḥ syā̍ma || 2.038.10
a̱smabhya̱ṁ taddi̱vo a̱dbhyaḥ pṛ̍thi̱vyāstvayā̍ da̱ttaṁ kāmya̱ṁ rādha̱ ā gā̍t |
śaṁ yatsto̱tṛbhya̍ ā̱paye̱ bhavā̍tyuru̱śaṁsā̍ya savitarjari̱tre || 2.038.11
grāvā̍ṇeva̱ tadidartha̍ṁ jarethe̱ gṛdhre̍va vṛ̱kṣaṁ ni̍dhi̱manta̱maccha̍ |
bra̱hmāṇe̍va vi̱datha̍ uktha̱śāsā̍ dū̱teva̱ havyā̱ janyā̍ puru̱trā || 2.039.01
prā̱ta̱ryāvā̍ṇā ra̱thye̍va vī̱rājeva̍ ya̱mā vara̱mā sa̍cethe |
mene̍ iva ta̱nvā̱3̱̍ śumbha̍māne̱ dampa̍tīva kratu̱vidā̱ jane̍ṣu || 2.039.02
śṛṅge̍va naḥ pratha̱mā ga̍ntama̱rvākcha̱phāvi̍va̱ jarbhu̍rāṇā̱ taro̍bhiḥ |
ca̱kra̱vā̱keva̱ prati̱ vasto̍rusrā̱rvāñcā̍ yātaṁ ra̱thye̍va śakrā || 2.039.03
nā̱veva̍ naḥ pārayataṁ yu̱geva̱ nabhye̍va na upa̱dhīva̍ pra̱dhīva̍ |
śvāne̍va no̱ ari̍ṣaṇyā ta̱nūnā̱ṁ khṛga̍leva vi̱srasa̍ḥ pātama̱smān || 2.039.04
vāte̍vāju̱ryā na̱dye̍va rī̱tira̱kṣī i̍va̱ cakṣu̱ṣā yā̍tama̱rvāk |
hastā̍viva ta̱nve̱3̱̍ śambha̍viṣṭhā̱ pāde̍va no nayata̱ṁ vasyo̱ accha̍ || 2.039.05
oṣṭhā̍viva̱ madhvā̱sne vada̍ntā̱ stanā̍viva pipyataṁ jī̱vase̍ naḥ |
nāse̍va nasta̱nvo̍ rakṣi̱tārā̱ karṇā̍viva su̱śrutā̍ bhūtama̱sme || 2.039.06
haste̍va śa̱ktima̱bhi sa̍ṁda̱dī na̱ḥ kṣāme̍va na̱ḥ sama̍jata̱ṁ rajā̍ṁsi |
i̱mā giro̍ aśvinā yuṣma̱yantī̱ḥ kṣṇotre̍ṇeva̱ svadhi̍ti̱ṁ saṁ śi̍śītam || 2.039.07
e̱tāni̍ vāmaśvinā̱ vardha̍nāni̱ brahma̱ stoma̍ṁ gṛtsama̱dāso̍ akran |
tāni̍ narā jujuṣā̱ṇopa̍ yātaṁ bṛ̱hadva̍dema vi̱dathe̍ su̱vīrā̍ḥ || 2.039.08
somā̍pūṣaṇā̱ jana̍nā rayī̱ṇāṁ jana̍nā di̱vo jana̍nā pṛthi̱vyāḥ |
jā̱tau viśva̍sya̱ bhuva̍nasya go̱pau de̱vā a̍kṛṇvanna̱mṛta̍sya̱ nābhi̍m || 2.040.01
i̱mau de̱vau jāya̍mānau juṣante̱mau tamā̍ṁsi gūhatā̱maju̍ṣṭā |
ā̱bhyāmindra̍ḥ pa̱kvamā̱māsva̱ntaḥ so̍māpū̱ṣabhyā̍ṁ janadu̱sriyā̍su || 2.040.02
somā̍pūṣaṇā̱ raja̍so vi̱māna̍ṁ sa̱ptaca̍kra̱ṁ ratha̱mavi̍śvaminvam |
vi̱ṣū̱vṛta̱ṁ mana̍sā yu̱jyamā̍na̱ṁ taṁ ji̍nvatho vṛṣaṇā̱ pañca̍raśmim || 2.040.03
di̱vya1̱̍nyaḥ sada̍naṁ ca̱kra u̱ccā pṛ̍thi̱vyāma̱nyo adhya̱ntari̍kṣe |
tāva̱smabhya̍ṁ puru̱vāra̍ṁ puru̱kṣuṁ rā̱yaspoṣa̱ṁ vi ṣya̍tā̱ṁ nābhi̍ma̱sme || 2.040.04
viśvā̍nya̱nyo bhuva̍nā ja̱jāna̱ viśva̍ma̱nyo a̍bhi̱cakṣā̍ṇa eti |
somā̍pūṣaṇā̱vava̍ta̱ṁ dhiya̍ṁ me yu̱vābhyā̱ṁ viśvā̱ḥ pṛta̍nā jayema || 2.040.05
dhiya̍ṁ pū̱ṣā ji̍nvatu viśvami̱nvo ra̱yiṁ somo̍ rayi̱pati̍rdadhātu |
ava̍tu de̱vyadi̍tirana̱rvā bṛ̱hadva̍dema vi̱dathe̍ su̱vīrā̍ḥ || 2.040.06
vāyo̱ ye te̍ saha̱sriṇo̱ rathā̍sa̱stebhi̱rā ga̍hi |
ni̱yutvā̱nsoma̍pītaye || 2.041.01
ni̱yutvā̍nvāya̱vā ga̍hya̱yaṁ śu̱kro a̍yāmi te |
gantā̍si sunva̱to gṛ̱ham || 2.041.02
śu̱krasyā̱dya gavā̍śira̱ indra̍vāyū ni̱yutva̍taḥ |
ā yā̍ta̱ṁ piba̍taṁ narā || 2.041.03
a̱yaṁ vā̍ṁ mitrāvaruṇā su̱taḥ soma̍ ṛtāvṛdhā |
mamedi̱ha śru̍ta̱ṁ hava̍m || 2.041.04
rājā̍nā̱vana̍bhidruhā dhru̱ve sada̍syutta̱me |
sa̱hasra̍sthūṇa āsāte || 2.041.05
tā sa̱mrājā̍ ghṛ̱tāsu̍tī ādi̱tyā dānu̍na̱spatī̍ |
sace̍te̱ ana̍vahvaram || 2.041.06
goma̍dū̱ ṣu nā̍sa̱tyāśvā̍vadyātamaśvinā |
va̱rtī ru̍drā nṛ̱pāyya̍m || 2.041.07
na yatparo̱ nānta̍ra āda̱dharṣa̍dvṛṣaṇvasū |
du̱ḥśaṁso̱ martyo̍ ri̱puḥ || 2.041.08
tā na̱ ā vo̍ḻhamaśvinā ra̱yiṁ pi̱śaṅga̍saṁdṛśam |
dhiṣṇyā̍ varivo̱vida̍m || 2.041.09
indro̍ a̱ṅga ma̱hadbha̱yama̱bhī ṣadapa̍ cucyavat |
sa hi sthi̱ro vica̍rṣaṇiḥ || 2.041.10
indra̍śca mṛ̱ḻayā̍ti no̱ na na̍ḥ pa̱ścāda̱ghaṁ na̍śat |
bha̱draṁ bha̍vāti naḥ pu̱raḥ || 2.041.11
indra̱ āśā̍bhya̱spari̱ sarvā̍bhyo̱ abha̍yaṁ karat |
jetā̱ śatrū̱nvica̍rṣaṇiḥ || 2.041.12
viśve̍ devāsa̱ ā ga̍ta śṛṇu̱tā ma̍ i̱maṁ hava̍m |
edaṁ ba̱rhirni ṣī̍data || 2.041.13
tī̱vro vo̱ madhu̍mā a̱yaṁ śu̱naho̍treṣu matsa̱raḥ |
e̱taṁ pi̍bata̱ kāmya̍m || 2.041.14
indra̍jyeṣṭhā̱ maru̍dgaṇā̱ devā̍sa̱ḥ pūṣa̍rātayaḥ |
viśve̱ mama̍ śrutā̱ hava̍m || 2.041.15
ambi̍tame̱ nadī̍tame̱ devi̍tame̱ sara̍svati |
a̱pra̱śa̱stā i̍va smasi̱ praśa̍stimamba naskṛdhi || 2.041.16
tve viśvā̍ sarasvati śri̱tāyū̍ṁṣi de̱vyām |
śu̱naho̍treṣu matsva pra̱jāṁ de̍vi didiḍḍhi naḥ || 2.041.17
i̱mā brahma̍ sarasvati ju̱ṣasva̍ vājinīvati |
yā te̱ manma̍ gṛtsama̱dā ṛ̍tāvari pri̱yā de̱veṣu̱ juhva̍ti || 2.041.18
pretā̍ṁ ya̱jñasya̍ śa̱mbhuvā̍ yu̱vāmidā vṛ̍ṇīmahe |
a̱gniṁ ca̍ havya̱vāha̍nam || 2.041.19
dyāvā̍ naḥ pṛthi̱vī i̱maṁ si̱dhrama̱dya di̍vi̱spṛśa̍m |
ya̱jñaṁ de̱veṣu̍ yacchatām || 2.041.20
ā vā̍mu̱pastha̍madruhā de̱vāḥ sī̍dantu ya̱jñiyā̍ḥ |
i̱hādya soma̍pītaye || 2.041.21
kani̍kradajja̱nuṣa̍ṁ prabruvā̱ṇa iya̍rti̱ vāca̍mari̱teva̱ nāva̍m |
su̱ma̱ṅgala̍śca śakune̱ bhavā̍si̱ mā tvā̱ kā ci̍dabhi̱bhā viśvyā̍ vidat || 2.042.01
mā tvā̍ śye̱na udva̍dhī̱nmā su̍pa̱rṇo mā tvā̍ vida̱diṣu̍mānvī̱ro astā̍ |
pitryā̱manu̍ pra̱diśa̱ṁ kani̍kradatsuma̱ṅgalo̍ bhadravā̱dī va̍de̱ha || 2.042.02
ava̍ kranda dakṣiṇa̱to gṛ̱hāṇā̍ṁ suma̱ṅgalo̍ bhadravā̱dī śa̍kunte |
mā na̍ḥ ste̱na ī̍śata̱ māghaśa̍ṁso bṛ̱hadva̍dema vi̱dathe̍ su̱vīrā̍ḥ || 2.042.03
pra̱da̱kṣi̱ṇida̱bhi gṛ̍ṇanti kā̱ravo̱ vayo̱ vada̍nta ṛtu̱thā śa̱kunta̍yaḥ |
u̱bhe vācau̍ vadati sāma̱gā i̍va gāya̱traṁ ca̱ traiṣṭu̍bha̱ṁ cānu̍ rājati || 2.043.01
u̱dgā̱teva̍ śakune̱ sāma̍ gāyasi brahmapu̱tra i̍va̱ sava̍neṣu śaṁsasi |
vṛṣe̍va vā̱jī śiśu̍matīra̱pītyā̍ sa̱rvato̍ naḥ śakune bha̱dramā va̍da vi̱śvato̍ naḥ śakune̱ puṇya̱mā va̍da || 2.043.02
ā̱vada̱stvaṁ śa̍kune bha̱dramā va̍da tū̱ṣṇīmāsī̍naḥ suma̱tiṁ ci̍kiddhi naḥ |
yadu̱tpata̱nvada̍si karka̱rirya̍thā bṛ̱hadva̍dema vi̱dathe̍ su̱vīrā̍ḥ || 2.043.03
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.