|| ṛgvedaḥ maṇḍalaṁ 3 ||
soma̍sya mā ta̱vasa̱ṁ vakṣya̍gne̱ vahni̍ṁ cakartha vi̱dathe̱ yaja̍dhyai |
de̱vā acchā̱ dīdya̍dyu̱ñje adri̍ṁ śamā̱ye a̍gne ta̱nva̍ṁ juṣasva || 3.001.01
prāñca̍ṁ ya̱jñaṁ ca̍kṛma̱ vardha̍tā̱ṁ gīḥ sa̱midbhi̍ra̱gniṁ nama̍sā duvasyan |
di̱vaḥ śa̍śāsurvi̱dathā̍ kavī̱nāṁ gṛtsā̍ya citta̱vase̍ gā̱tumī̍ṣuḥ || 3.001.02
mayo̍ dadhe̱ medhi̍raḥ pū̱tada̍kṣo di̱vaḥ su̱bandhu̍rja̱nuṣā̍ pṛthi̱vyāḥ |
avi̍ndannu darśa̱tama̱psva1̱̍ntarde̱vāso̍ a̱gnima̱pasi̱ svasṝ̍ṇām || 3.001.03
ava̍rdhayansu̱bhaga̍ṁ sa̱pta ya̱hvīḥ śve̱taṁ ja̍jñā̱nama̍ru̱ṣaṁ ma̍hi̱tvā |
śiśu̱ṁ na jā̱tama̱bhyā̍ru̱raśvā̍ de̱vāso̍ a̱gniṁ jani̍manvapuṣyan || 3.001.04
śu̱krebhi̱raṅgai̱ raja̍ ātata̱nvānkratu̍ṁ punā̱naḥ ka̱vibhi̍ḥ pa̱vitrai̍ḥ |
śo̱cirvasā̍na̱ḥ paryāyu̍ra̱pāṁ śriyo̍ mimīte bṛha̱tīranū̍nāḥ || 3.001.05
va̱vrājā̍ sī̱mana̍datī̱rada̍bdhā di̱vo ya̱hvīrava̍sānā̱ ana̍gnāḥ |
sanā̱ atra̍ yuva̱taya̱ḥ sayo̍nī̱reka̱ṁ garbha̍ṁ dadhire sa̱pta vāṇī̍ḥ || 3.001.06
stī̱rṇā a̍sya sa̱ṁhato̍ vi̱śvarū̍pā ghṛ̱tasya̱ yonau̍ sra̱vathe̱ madhū̍nām |
asthu̱ratra̍ dhe̱nava̱ḥ pinva̍mānā ma̱hī da̱smasya̍ mā̱tarā̍ samī̱cī || 3.001.07
ba̱bhrā̱ṇaḥ sū̍no sahaso̱ vya̍dyau̱ddadhā̍naḥ śu̱krā ra̍bha̱sā vapū̍ṁṣi |
ścota̍nti̱ dhārā̱ madhu̍no ghṛ̱tasya̱ vṛṣā̱ yatra̍ vāvṛ̱dhe kāvye̍na || 3.001.08
pi̱tuści̱dūdha̍rja̱nuṣā̍ viveda̱ vya̍sya̱ dhārā̍ asṛja̱dvi dhenā̍ḥ |
guhā̱ cara̍nta̱ṁ sakhi̍bhiḥ śi̱vebhi̍rdi̱vo ya̱hvībhi̱rna guhā̍ babhūva || 3.001.09
pi̱tuśca̱ garbha̍ṁ jani̱tuśca̍ babhre pū̱rvīreko̍ adhaya̱tpīpyā̍nāḥ |
vṛṣṇe̍ sa̱patnī̱ śuca̍ye̱ saba̍ndhū u̱bhe a̍smai manu̱ṣye̱3̱̍ ni pā̍hi || 3.001.10
u̱rau ma̱hā a̍nibā̱dhe va̍va̱rdhāpo̍ a̱gniṁ ya̱śasa̱ḥ saṁ hi pū̱rvīḥ |
ṛ̱tasya̱ yonā̍vaśaya̱ddamū̍nā jāmī̱nāma̱gnira̱pasi̱ svasṝ̍ṇām || 3.001.11
a̱kro na ba̱bhriḥ sa̍mi̱the ma̱hīnā̍ṁ didṛ̱kṣeya̍ḥ sū̱nave̱ bhāṛ̍jīkaḥ |
udu̱sriyā̱ jani̍tā̱ yo ja̱jānā̱pāṁ garbho̱ nṛta̍mo ya̱hvo a̱gniḥ || 3.001.12
a̱pāṁ garbha̍ṁ darśa̱tamoṣa̍dhīnā̱ṁ vanā̍ jajāna su̱bhagā̱ virū̍pam |
de̱vāsa̍ści̱nmana̍sā̱ saṁ hi ja̱gmuḥ pani̍ṣṭhaṁ jā̱taṁ ta̱vasa̍ṁ duvasyan || 3.001.13
bṛ̱hanta̱ idbhā̱navo̱ bhāṛ̍jīkama̱gniṁ sa̍canta vi̱dyuto̱ na śu̱krāḥ |
guhe̍va vṛ̱ddhaṁ sada̍si̱ sve a̱ntara̍pā̱ra ū̱rve a̱mṛta̱ṁ duhā̍nāḥ || 3.001.14
īḻe̍ ca tvā̱ yaja̍māno ha̱virbhi̱rīḻe̍ sakhi̱tvaṁ su̍ma̱tiṁ nikā̍maḥ |
de̱vairavo̍ mimīhi̱ saṁ ja̍ri̱tre rakṣā̍ ca no̱ damye̍bhi̱ranī̍kaiḥ || 3.001.15
u̱pa̱kṣe̱tāra̱stava̍ supraṇī̱te'gne̱ viśvā̍ni̱ dhanyā̱ dadhā̍nāḥ |
su̱reta̍sā̱ śrava̍sā̱ tuñja̍mānā a̱bhi ṣyā̍ma pṛtanā̱yūrade̍vān || 3.001.16
ā de̱vānā̍mabhavaḥ ke̱tura̍gne ma̱ndro viśvā̍ni̱ kāvyā̍ni vi̱dvān |
prati̱ martā̍ avāsayo̱ damū̍nā̱ anu̍ de̱vānra̍thi̱ro yā̍si̱ sādha̍n || 3.001.17
ni du̍ro̱ṇe a̱mṛto̱ martyā̍nā̱ṁ rājā̍ sasāda vi̱dathā̍ni̱ sādha̍n |
ghṛ̱tapra̍tīka urvi̱yā vya̍dyauda̱gnirviśvā̍ni̱ kāvyā̍ni vi̱dvān || 3.001.18
ā no̍ gahi sa̱khyebhi̍ḥ śi̱vebhi̍rma̱hānma̱hībhi̍rū̱tibhi̍ḥ sara̱ṇyan |
a̱sme ra̱yiṁ ba̍hu̱laṁ saṁta̍rutraṁ su̱vāca̍ṁ bhā̱gaṁ ya̱śasa̍ṁ kṛdhī naḥ || 3.001.19
e̱tā te̍ agne̱ jani̍mā̱ sanā̍ni̱ pra pū̱rvyāya̱ nūta̍nāni vocam |
ma̱hānti̱ vṛṣṇe̱ sava̍nā kṛ̱temā janma̍ñjanma̱nnihi̍to jā̱tave̍dāḥ || 3.001.20
janma̍ñjanma̱nnihi̍to jā̱tave̍dā vi̱śvāmi̍trebhiridhyate̱ aja̍sraḥ |
tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma || 3.001.21
i̱maṁ ya̱jñaṁ sa̍hasāva̱ntvaṁ no̍ deva̱trā dhe̍hi sukrato̱ rarā̍ṇaḥ |
pra ya̍ṁsi hotarbṛha̱tīriṣo̱ no'gne̱ mahi̱ dravi̍ṇa̱mā ya̍jasva || 3.001.22
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.001.23
vai̱śvā̱na̱rāya̍ dhi̱ṣaṇā̍mṛtā̱vṛdhe̍ ghṛ̱taṁ na pū̱tama̱gnaye̍ janāmasi |
dvi̱tā hotā̍ra̱ṁ manu̍ṣaśca vā̱ghato̍ dhi̱yā ratha̱ṁ na kuli̍śa̱ḥ samṛ̍ṇvati || 3.002.01
sa ro̍cayajja̱nuṣā̱ roda̍sī u̱bhe sa mā̱trora̍bhavatpu̱tra īḍya̍ḥ |
ha̱vya̱vāḻa̱gnira̱jara̱ścano̍hito dū̱ḻabho̍ vi̱śāmati̍thirvi̱bhāva̍suḥ || 3.002.02
kratvā̱ dakṣa̍sya̱ taru̍ṣo̱ vidha̍rmaṇi de̱vāso̍ a̱gniṁ ja̍nayanta̱ citti̍bhiḥ |
ru̱ru̱cā̱naṁ bhā̱nunā̱ jyoti̍ṣā ma̱hāmatya̱ṁ na vāja̍ṁ sani̱ṣyannupa̍ bruve || 3.002.03
ā ma̱ndrasya̍ sani̱ṣyanto̱ vare̍ṇyaṁ vṛṇī̱mahe̱ ahra̍ya̱ṁ vāja̍mṛ̱gmiya̍m |
rā̱tiṁ bhṛgū̍ṇāmu̱śija̍ṁ ka̱vikra̍tuma̱gniṁ rāja̍ntaṁ di̱vyena̍ śo̱ciṣā̍ || 3.002.04
a̱gniṁ su̱mnāya̍ dadhire pu̱ro janā̱ vāja̍śravasami̱ha vṛ̱ktaba̍rhiṣaḥ |
ya̱tasru̍caḥ su̱ruca̍ṁ vi̱śvade̍vyaṁ ru̱draṁ ya̱jñānā̱ṁ sādha̍diṣṭima̱pasā̍m || 3.002.05
pāva̍kaśoce̱ tava̱ hi kṣaya̱ṁ pari̱ hota̍rya̱jñeṣu̍ vṛ̱ktaba̍rhiṣo̱ nara̍ḥ |
agne̱ duva̍ i̱cchamā̍nāsa̱ āpya̱mupā̍sate̱ dravi̍ṇaṁ dhehi̱ tebhya̍ḥ || 3.002.06
ā roda̍sī apṛṇa̱dā sva̍rma̱hajjā̱taṁ yade̍nama̱paso̱ adhā̍rayan |
so a̍dhva̱rāya̱ pari̍ ṇīyate ka̱viratyo̱ na vāja̍sātaye̱ cano̍hitaḥ || 3.002.07
na̱ma̱syata̍ ha̱vyadā̍tiṁ svadhva̱raṁ du̍va̱syata̱ damya̍ṁ jā̱tave̍dasam |
ra̱thīrṛ̱tasya̍ bṛha̱to vica̍rṣaṇira̱gnirde̱vānā̍mabhavatpu̱rohi̍taḥ || 3.002.08
ti̱sro ya̱hvasya̍ sa̱midha̱ḥ pari̍jmano̱'gnera̍punannu̱śijo̱ amṛ̍tyavaḥ |
tāsā̱mekā̱mada̍dhu̱rmartye̱ bhuja̍mu lo̱kamu̱ dve upa̍ jā̱mimī̍yatuḥ || 3.002.09
vi̱śāṁ ka̱viṁ vi̱śpati̱ṁ mānu̍ṣī̱riṣa̱ḥ saṁ sī̍makṛṇva̱nsvadhi̍ti̱ṁ na teja̍se |
sa u̱dvato̍ ni̱vato̍ yāti̱ vevi̍ṣa̱tsa garbha̍me̱ṣu bhuva̍neṣu dīdharat || 3.002.10
sa ji̍nvate ja̱ṭhare̍ṣu prajajñi̱vānvṛṣā̍ ci̱treṣu̱ nāna̍da̱nna si̱ṁhaḥ |
vai̱śvā̱na̱raḥ pṛ̍thu̱pājā̱ ama̍rtyo̱ vasu̱ ratnā̱ daya̍māno̱ vi dā̱śuṣe̍ || 3.002.11
vai̱śvā̱na̱raḥ pra̱tnathā̱ nāka̱māru̍haddi̱vaspṛ̱ṣṭhaṁ bhanda̍mānaḥ su̱manma̍bhiḥ |
sa pū̍rva̱vajja̱naya̍ñja̱ntave̱ dhana̍ṁ samā̱namajma̱ṁ parye̍ti̱ jāgṛ̍viḥ || 3.002.12
ṛ̱tāvā̍naṁ ya̱jñiya̱ṁ vipra̍mu̱kthya1̱̍mā yaṁ da̱dhe mā̍ta̱riśvā̍ di̱vi kṣaya̍m |
taṁ ci̱trayā̍ma̱ṁ hari̍keśamīmahe sudī̱tima̱gniṁ su̍vi̱tāya̱ navya̍se || 3.002.13
śuci̱ṁ na yāma̍nniṣi̱raṁ sva̱rdṛśa̍ṁ ke̱tuṁ di̱vo ro̍cana̱sthāmu̍ṣa̱rbudha̍m |
a̱gniṁ mū̱rdhāna̍ṁ di̱vo apra̍tiṣkuta̱ṁ tamī̍mahe̱ nama̍sā vā̱jina̍ṁ bṛ̱hat || 3.002.14
ma̱ndraṁ hotā̍ra̱ṁ śuci̱madva̍yāvina̱ṁ damū̍nasamu̱kthya̍ṁ vi̱śvaca̍rṣaṇim |
ratha̱ṁ na ci̱traṁ vapu̍ṣāya darśa̱taṁ manu̍rhita̱ṁ sada̱midrā̱ya ī̍mahe || 3.002.15
vai̱śvā̱na̱rāya̍ pṛthu̱pāja̍se̱ vipo̱ ratnā̍ vidhanta dha̱ruṇe̍ṣu̱ gāta̍ve |
a̱gnirhi de̱vā a̱mṛto̍ duva̱syatyathā̱ dharmā̍ṇi sa̱natā̱ na dū̍duṣat || 3.003.01
a̱ntardū̱to roda̍sī da̱sma ī̍yate̱ hotā̱ niṣa̍tto̱ manu̍ṣaḥ pu̱rohi̍taḥ |
kṣaya̍ṁ bṛ̱hanta̱ṁ pari̍ bhūṣati̱ dyubhi̍rde̱vebhi̍ra̱gniri̍ṣi̱to dhi̱yāva̍suḥ || 3.003.02
ke̱tuṁ ya̱jñānā̍ṁ vi̱datha̍sya̱ sādha̍na̱ṁ viprā̍so a̱gniṁ ma̍hayanta̱ citti̍bhiḥ |
apā̍ṁsi̱ yasmi̱nnadhi̍ saṁda̱dhurgira̱stasmi̍nsu̱mnāni̱ yaja̍māna̱ ā ca̍ke || 3.003.03
pi̱tā ya̱jñānā̱masu̍ro vipa̱ścitā̍ṁ vi̱māna̍ma̱gnirva̱yuna̍ṁ ca vā̱ghatā̍m |
ā vi̍veśa̱ roda̍sī̱ bhūri̍varpasā purupri̱yo bha̍ndate̱ dhāma̍bhiḥ ka̱viḥ || 3.003.04
ca̱ndrama̱gniṁ ca̱ndrara̍tha̱ṁ hari̍vrataṁ vaiśvāna̱rama̍psu̱ṣada̍ṁ sva̱rvida̍m |
vi̱gā̱haṁ tūrṇi̱ṁ tavi̍ṣībhi̱rāvṛ̍ta̱ṁ bhūrṇi̍ṁ de̱vāsa̍ i̱ha su̱śriya̍ṁ dadhuḥ || 3.003.05
a̱gnirde̱vebhi̱rmanu̍ṣaśca ja̱ntubhi̍stanvā̱no ya̱jñaṁ pu̍ru̱peśa̍saṁ dhi̱yā |
ra̱thīra̱ntarī̍yate̱ sādha̍diṣṭibhirjī̱ro damū̍nā abhiśasti̱cāta̍naḥ || 3.003.06
agne̱ jara̍sva svapa̱tya āyu̍nyū̱rjā pi̍nvasva̱ samiṣo̍ didīhi naḥ |
vayā̍ṁsi jinva bṛha̱taśca̍ jāgṛva u̱śigde̱vānā̱masi̍ su̱kratu̍rvi̱pām || 3.003.07
vi̱śpati̍ṁ ya̱hvamati̍thi̱ṁ nara̱ḥ sadā̍ ya̱ntāra̍ṁ dhī̱nāmu̱śija̍ṁ ca vā̱ghatā̍m |
a̱dhva̱rāṇā̱ṁ ceta̍naṁ jā̱tave̍dasa̱ṁ pra śa̍ṁsanti̱ nama̍sā jū̱tibhi̍rvṛ̱dhe || 3.003.08
vi̱bhāvā̍ de̱vaḥ su̱raṇa̱ḥ pari̍ kṣi̱tīra̱gnirba̍bhūva̱ śava̍sā su̱madra̍thaḥ |
tasya̍ vra̱tāni̍ bhūripo̱ṣiṇo̍ va̱yamupa̍ bhūṣema̱ dama̱ ā su̍vṛ̱ktibhi̍ḥ || 3.003.09
vaiśvā̍nara̱ tava̱ dhāmā̱nyā ca̍ke̱ yebhi̍ḥ sva̱rvidabha̍vo vicakṣaṇa |
jā̱ta āpṛ̍ṇo̱ bhuva̍nāni̱ roda̍sī̱ agne̱ tā viśvā̍ pari̱bhūra̍si̱ tmanā̍ || 3.003.10
vai̱śvā̱na̱rasya̍ da̱ṁsanā̍bhyo bṛ̱hadari̍ṇā̱deka̍ḥ svapa̱syayā̍ ka̱viḥ |
u̱bhā pi̱tarā̍ ma̱haya̍nnajāyatā̱gnirdyāvā̍pṛthi̱vī bhūri̍retasā || 3.003.11
sa̱mitsa̍mitsu̱manā̍ bodhya̱sme śu̱cāśu̍cā suma̱tiṁ rā̍si̱ vasva̍ḥ |
ā de̍va de̱vānya̱jathā̍ya vakṣi̱ sakhā̱ sakhī̍nsu̱manā̍ yakṣyagne || 3.004.01
yaṁ de̱vāsa̱striraha̍nnā̱yaja̍nte di̱vedi̍ve̱ varu̍ṇo mi̱tro a̱gniḥ |
semaṁ ya̱jñaṁ madhu̍mantaṁ kṛdhī na̱stanū̍napādghṛ̱tayo̍niṁ vi̱dhanta̍m || 3.004.02
pra dīdhi̍tirvi̱śvavā̍rā jigāti̱ hotā̍rami̱ḻaḥ pra̍tha̱maṁ yaja̍dhyai |
acchā̱ namo̍bhirvṛṣa̱bhaṁ va̱ndadhyai̱ sa de̱vānya̍kṣadiṣi̱to yajī̍yān || 3.004.03
ū̱rdhvo vā̍ṁ gā̱tura̍dhva̱re a̍kāryū̱rdhvā śo̱cīṁṣi̱ prasthi̍tā̱ rajā̍ṁsi |
di̱vo vā̱ nābhā̱ nya̍sādi̱ hotā̍ stṛṇī̱mahi̍ de̱vavya̍cā̱ vi ba̱rhiḥ || 3.004.04
sa̱pta ho̱trāṇi̱ mana̍sā vṛṇā̱nā inva̍nto̱ viśva̱ṁ prati̍ yannṛ̱tena̍ |
nṛ̱peśa̍so vi̱dathe̍ṣu̱ pra jā̱tā a̱bhī̱3̱̍maṁ ya̱jñaṁ vi ca̍ranta pū̱rvīḥ || 3.004.05
ā bhanda̍māne u̱ṣasā̱ upā̍ke u̱ta sma̍yete ta̱nvā̱3̱̍ virū̍pe |
yathā̍ no mi̱tro varu̍ṇo̱ jujo̍ṣa̱dindro̍ ma̱rutvā̍ u̱ta vā̱ maho̍bhiḥ || 3.004.06
daivyā̱ hotā̍rā pratha̱mā nyṛ̍ñje sa̱pta pṛ̱kṣāsa̍ḥ sva̱dhayā̍ madanti |
ṛ̱taṁ śaṁsa̍nta ṛ̱tamitta ā̍hu̱ranu̍ vra̱taṁ vra̍ta̱pā dīdhyā̍nāḥ || 3.004.07
ā bhāra̍tī̱ bhāra̍tībhiḥ sa̱joṣā̱ iḻā̍ de̱vairma̍nu̱ṣye̍bhira̱gniḥ |
sara̍svatī sārasva̱tebhi̍ra̱rvākti̱sro de̱vīrba̱rhiredaṁ sa̍dantu || 3.004.08
tanna̍stu̱rīpa̱madha̍ poṣayi̱tnu deva̍ tvaṣṭa̱rvi ra̍rā̱ṇaḥ sya̍sva |
yato̍ vī̱raḥ ka̍rma̱ṇya̍ḥ su̱dakṣo̍ yu̱ktagrā̍vā̱ jāya̍te de̱vakā̍maḥ || 3.004.09
vana̍spa̱te'va̍ sṛ̱jopa̍ de̱vāna̱gnirha̱viḥ śa̍mi̱tā sū̍dayāti |
sedu̱ hotā̍ sa̱tyata̍ro yajāti̱ yathā̍ de̱vānā̱ṁ jani̍māni̱ veda̍ || 3.004.10
ā yā̍hyagne samidhā̱no a̱rvāṅindre̍ṇa de̱vaiḥ sa̱ratha̍ṁ tu̱rebhi̍ḥ |
ba̱rhirna̍ āstā̱madi̍tiḥ supu̱trā svāhā̍ de̱vā a̱mṛtā̍ mādayantām || 3.004.11
pratya̱gniru̱ṣasa̱śceki̍tā̱no'bo̍dhi̱ vipra̍ḥ pada̱vīḥ ka̍vī̱nām |
pṛ̱thu̱pājā̍ deva̱yadbhi̱ḥ sami̱ddho'pa̱ dvārā̱ tama̍so̱ vahni̍rāvaḥ || 3.005.01
predva̱gnirvā̍vṛdhe̱ stome̍bhirgī̱rbhiḥ sto̍tṝ̱ṇāṁ na̍ma̱sya̍ u̱kthaiḥ |
pū̱rvīrṛ̱tasya̍ sa̱ṁdṛśa̍ścakā̱naḥ saṁ dū̱to a̍dyaudu̱ṣaso̍ viro̱ke || 3.005.02
adhā̍yya̱gnirmānu̍ṣīṣu vi̱kṣva1̱̍pāṁ garbho̍ mi̱tra ṛ̱tena̱ sādha̍n |
ā ha̍rya̱to ya̍ja̱taḥ sānva̍sthā̱dabhū̍du̱ vipro̱ havyo̍ matī̱nām || 3.005.03
mi̱tro a̱gnirbha̍vati̱ yatsami̍ddho mi̱tro hotā̱ varu̍ṇo jā̱tave̍dāḥ |
mi̱tro a̍dhva̱ryuri̍ṣi̱ro damū̍nā mi̱traḥ sindhū̍nāmu̱ta parva̍tānām || 3.005.04
pāti̍ pri̱yaṁ ri̱po agra̍ṁ pa̱daṁ veḥ pāti̍ ya̱hvaścara̍ṇa̱ṁ sūrya̍sya |
pāti̱ nābhā̍ sa̱ptaśī̍rṣāṇama̱gniḥ pāti̍ de̱vānā̍mupa̱māda̍mṛ̱ṣvaḥ || 3.005.05
ṛ̱bhuśca̍kra̱ īḍya̱ṁ cāru̱ nāma̱ viśvā̍ni de̱vo va̱yunā̍ni vi̱dvān |
sa̱sasya̱ carma̍ ghṛ̱tava̍tpa̱daṁ vestadida̱gnī ra̍kṣa̱tyapra̍yucchan || 3.005.06
ā yoni̍ma̱gnirghṛ̱tava̍ntamasthātpṛ̱thupra̍gāṇamu̱śanta̍muśā̱naḥ |
dīdyā̍na̱ḥ śuci̍rṛ̱ṣvaḥ pā̍va̱kaḥ puna̍ḥpunarmā̱tarā̱ navya̍sī kaḥ || 3.005.07
sa̱dyo jā̱ta oṣa̍dhībhirvavakṣe̱ yadī̱ vardha̍nti pra̱svo̍ ghṛ̱tena̍ |
āpa̍ iva pra̱vatā̱ śumbha̍mānā uru̱ṣyada̱gniḥ pi̱troru̱pasthe̍ || 3.005.08
udu̍ ṣṭu̱taḥ sa̱midhā̍ ya̱hvo a̍dyau̱dvarṣma̍ndi̱vo adhi̱ nābhā̍ pṛthi̱vyāḥ |
mi̱tro a̱gnirīḍyo̍ māta̱riśvā dū̱to va̍kṣadya̱jathā̍ya de̱vān || 3.005.09
uda̍stambhītsa̱midhā̱ nāka̍mṛ̱ṣvo̱3̱̍'gnirbhava̍nnutta̱mo ro̍ca̱nānā̍m |
yadī̱ bhṛgu̍bhya̱ḥ pari̍ māta̱riśvā̱ guhā̱ santa̍ṁ havya̱vāha̍ṁ samī̱dhe || 3.005.10
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.005.11
pra kā̍ravo mana̱nā va̱cyamā̍nā deva̱drīcī̍ṁ nayata deva̱yanta̍ḥ |
da̱kṣi̱ṇā̱vāḍvā̱jinī̱ prācye̍ti ha̱virbhara̍ntya̱gnaye̍ ghṛ̱tācī̍ || 3.006.01
ā roda̍sī apṛṇā̱ jāya̍māna u̱ta pra ri̍kthā̱ adha̱ nu pra̍yajyo |
di̱vaści̍dagne mahi̱nā pṛ̍thi̱vyā va̱cyantā̍ṁ te̱ vahna̍yaḥ sa̱ptaji̍hvāḥ || 3.006.02
dyauśca̍ tvā pṛthi̱vī ya̱jñiyā̍so̱ ni hotā̍raṁ sādayante̱ damā̍ya |
yadī̱ viśo̱ mānu̍ṣīrdeva̱yantī̱ḥ praya̍svatī̱rīḻa̍te śu̱krama̱rciḥ || 3.006.03
ma̱hānsa̱dhasthe̍ dhru̱va ā niṣa̍tto̱'ntardyāvā̱ māhi̍ne̱ harya̍māṇaḥ |
āskre̍ sa̱patnī̍ a̱jare̱ amṛ̍kte saba̱rdughe̍ urugā̱yasya̍ dhe̱nū || 3.006.04
vra̱tā te̍ agne maha̱to ma̱hāni̱ tava̱ kratvā̱ roda̍sī̱ ā ta̍tantha |
tvaṁ dū̱to a̍bhavo̱ jāya̍māna̱stvaṁ ne̱tā vṛ̍ṣabha carṣaṇī̱nām || 3.006.05
ṛ̱tasya̍ vā ke̱śinā̍ yo̱gyābhi̍rghṛta̱snuvā̱ rohi̍tā dhu̱ri dhi̍ṣva |
athā va̍ha de̱vānde̍va̱ viśvā̍nsvadhva̱rā kṛ̍ṇuhi jātavedaḥ || 3.006.06
di̱vaści̱dā te̍ rucayanta ro̱kā u̱ṣo vi̍bhā̱tīranu̍ bhāsi pū̱rvīḥ |
a̱po yada̍gna u̱śadha̱gvane̍ṣu̱ hotu̍rma̱ndrasya̍ pa̱naya̍nta de̱vāḥ || 3.006.07
u̱rau vā̱ ye a̱ntari̍kṣe̱ mada̍nti di̱vo vā̱ ye ro̍ca̱ne santi̍ de̱vāḥ |
ūmā̍ vā̱ ye su̱havā̍so̱ yaja̍trā āyemi̱re ra̱thyo̍ agne̱ aśvā̍ḥ || 3.006.08
aibhi̍ragne sa̱ratha̍ṁ yāhya̱rvāṅnā̍nāra̱thaṁ vā̍ vi̱bhavo̱ hyaśvā̍ḥ |
patnī̍vatastri̱ṁśata̱ṁ trīśca̍ de̱vāna̍nuṣva̱dhamā va̍ha mā̱daya̍sva || 3.006.09
sa hotā̱ yasya̱ roda̍sī cidu̱rvī ya̱jñaṁya̍jñama̱bhi vṛ̱dhe gṛ̍ṇī̱taḥ |
prācī̍ adhva̱reva̍ tasthatuḥ su̱meke̍ ṛ̱tāva̍rī ṛ̱tajā̍tasya sa̱tye || 3.006.10
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.006.11
pra ya ā̱ruḥ śi̍tipṛ̱ṣṭhasya̍ dhā̱serā mā̱tarā̍ viviśuḥ sa̱pta vāṇī̍ḥ |
pa̱ri̱kṣitā̍ pi̱tarā̱ saṁ ca̍rete̱ pra sa̍rsrāte dī̱rghamāyu̍ḥ pra̱yakṣe̍ || 3.007.01
di̱vakṣa̍so dhe̱navo̱ vṛṣṇo̱ aśvā̍ de̱vīrā ta̍sthau̱ madhu̍ma̱dvaha̍ntīḥ |
ṛ̱tasya̍ tvā̱ sada̍si kṣema̱yanta̱ṁ paryekā̍ carati varta̱niṁ gauḥ || 3.007.02
ā sī̍marohatsu̱yamā̱ bhava̍ntī̱ḥ pati̍ściki̱tvānra̍yi̱vidra̍yī̱ṇām |
pra nīla̍pṛṣṭho ata̱sasya̍ dhā̱sestā a̍vāsayatpuru̱dhapra̍tīkaḥ || 3.007.03
mahi̍ tvā̱ṣṭramū̱rjaya̍ntīraju̱ryaṁ sta̍bhū̱yamā̍naṁ va̱hato̍ vahanti |
vyaṅge̍bhirdidyutā̱naḥ sa̱dhastha̱ ekā̍miva̱ roda̍sī̱ ā vi̍veśa || 3.007.04
jā̱nanti̱ vṛṣṇo̍ aru̱ṣasya̱ śeva̍mu̱ta bra̱dhnasya̱ śāsa̍ne raṇanti |
di̱vo̱ruca̍ḥ su̱ruco̱ roca̍mānā̱ iḻā̱ yeṣā̱ṁ gaṇyā̱ māhi̍nā̱ gīḥ || 3.007.05
u̱to pi̱tṛbhyā̍ṁ pra̱vidānu̱ ghoṣa̍ṁ ma̱ho ma̱hadbhyā̍manayanta śū̱ṣam |
u̱kṣā ha̱ yatra̱ pari̱ dhāna̍ma̱ktoranu̱ svaṁ dhāma̍ jari̱turva̱vakṣa̍ || 3.007.06
a̱dhva̱ryubhi̍ḥ pa̱ñcabhi̍ḥ sa̱pta viprā̍ḥ pri̱yaṁ ra̍kṣante̱ nihi̍taṁ pa̱daṁ veḥ |
prāñco̍ madantyu̱kṣaṇo̍ aju̱ryā de̱vā de̱vānā̱manu̱ hi vra̱tā guḥ || 3.007.07
daivyā̱ hotā̍rā pratha̱mā nyṛ̍ñje sa̱pta pṛ̱kṣāsa̍ḥ sva̱dhayā̍ madanti |
ṛ̱taṁ śaṁsa̍nta ṛ̱tamitta ā̍hu̱ranu̍ vra̱taṁ vra̍ta̱pā dīdhyā̍nāḥ || 3.007.08
vṛ̱ṣā̱yante̍ ma̱he atyā̍ya pū̱rvīrvṛṣṇe̍ ci̱trāya̍ ra̱śmaya̍ḥ suyā̱māḥ |
deva̍ hotarma̱ndrata̍raściki̱tvānma̱ho de̱vānroda̍sī̱ eha va̍kṣi || 3.007.09
pṛ̱kṣapra̍yajo draviṇaḥ su̱vāca̍ḥ suke̱tava̍ u̱ṣaso̍ re̱vadū̍ṣuḥ |
u̱to ci̍dagne mahi̱nā pṛ̍thi̱vyāḥ kṛ̱taṁ ci̱dena̱ḥ saṁ ma̱he da̍śasya || 3.007.10
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.007.11
a̱ñjanti̱ tvāma̍dhva̱re de̍va̱yanto̱ vana̍spate̱ madhu̍nā̱ daivye̍na |
yadū̱rdhvastiṣṭhā̱ dravi̍ṇe̱ha dha̍ttā̱dyadvā̱ kṣayo̍ mā̱tura̱syā u̱pasthe̍ || 3.008.01
sami̍ddhasya̱ śraya̍māṇaḥ pu̱rastā̱dbrahma̍ vanvā̱no a̱jara̍ṁ su̱vīra̍m |
ā̱re a̱smadama̍ti̱ṁ bādha̍māna̱ ucchra̍yasva maha̱te saubha̍gāya || 3.008.02
ucchra̍yasva vanaspate̱ varṣma̍npṛthi̱vyā adhi̍ |
sumi̍tī mī̱yamā̍no̱ varco̍ dhā ya̱jñavā̍hase || 3.008.03
yuvā̍ su̱vāsā̱ḥ pari̍vīta̱ āgā̱tsa u̱ śreyā̍nbhavati̱ jāya̍mānaḥ |
taṁ dhīrā̍saḥ ka̱vaya̱ unna̍yanti svā̱dhyo̱3̱̍ mana̍sā deva̱yanta̍ḥ || 3.008.04
jā̱to jā̍yate sudina̱tve ahnā̍ṁ sama̱rya ā vi̱dathe̱ vardha̍mānaḥ |
pu̱nanti̱ dhīrā̍ a̱paso̍ manī̱ṣā de̍va̱yā vipra̱ udi̍yarti̱ vāca̍m || 3.008.05
yānvo̱ naro̍ deva̱yanto̍ nimi̱myurvana̍spate̱ svadhi̍tirvā ta̱takṣa̍ |
te de̱vāsa̱ḥ svara̍vastasthi̱vāṁsa̍ḥ pra̱jāva̍da̱sme di̍dhiṣantu̱ ratna̍m || 3.008.06
ye vṛ̱kṇāso̱ adhi̱ kṣami̱ nimi̍tāso ya̱tasru̍caḥ |
te no̍ vyantu̱ vārya̍ṁ deva̱trā kṣe̍tra̱sādha̍saḥ || 3.008.07
ā̱di̱tyā ru̱drā vasa̍vaḥ sunī̱thā dyāvā̱kṣāmā̍ pṛthi̱vī a̱ntari̍kṣam |
sa̱joṣa̍so ya̱jñama̍vantu de̱vā ū̱rdhvaṁ kṛ̍ṇvantvadhva̱rasya̍ ke̱tum || 3.008.08
ha̱ṁsā i̍va śreṇi̱śo yatā̍nāḥ śu̱krā vasā̍nā̱ḥ svara̍vo na̱ āgu̍ḥ |
u̱nnī̱yamā̍nāḥ ka̱vibhi̍ḥ pu̱rastā̍dde̱vā de̱vānā̱mapi̍ yanti̱ pātha̍ḥ || 3.008.09
śṛṅgā̍ṇī̱vecchṛ̱ṅgiṇā̱ṁ saṁ da̍dṛśre ca̱ṣāla̍vanta̱ḥ svara̍vaḥ pṛthi̱vyām |
vā̱ghadbhi̍rvā viha̱ve śroṣa̍māṇā a̱smā a̍vantu pṛta̱nājye̍ṣu || 3.008.10
vana̍spate śa̱tava̍lśo̱ vi ro̍ha sa̱hasra̍valśā̱ vi va̱yaṁ ru̍hema |
yaṁ tvāma̱yaṁ svadhi̍ti̱steja̍mānaḥ praṇi̱nāya̍ maha̱te saubha̍gāya || 3.008.11
sakhā̍yastvā vavṛmahe de̱vaṁ martā̍sa ū̱taye̍ |
a̱pāṁ napā̍taṁ su̱bhaga̍ṁ su̱dīdi̍tiṁ su̱pratū̍rtimane̱hasa̍m || 3.009.01
kāya̍māno va̱nā tvaṁ yanmā̱tṝraja̍ganna̱paḥ |
na tatte̍ agne pra̱mṛṣe̍ ni̱varta̍na̱ṁ yaddū̱re sanni̱hābha̍vaḥ || 3.009.02
ati̍ tṛ̱ṣṭaṁ va̍vakṣi̱thāthai̱va su̱manā̍ asi |
praprā̱nye yanti̱ parya̱nya ā̍sate̱ yeṣā̍ṁ sa̱khye asi̍ śri̱taḥ || 3.009.03
ī̱yi̱vāṁsa̱mati̱ sridha̱ḥ śaśva̍tī̱rati̍ sa̱ścata̍ḥ |
anvī̍mavindannici̱rāso̍ a̱druho̱'psu si̱ṁhami̍va śri̱tam || 3.009.04
sa̱sṛ̱vāṁsa̍miva̱ tmanā̱gnimi̱tthā ti̱rohi̍tam |
aina̍ṁ nayanmāta̱riśvā̍ parā̱vato̍ de̱vebhyo̍ mathi̱taṁ pari̍ || 3.009.05
taṁ tvā̱ martā̍ agṛbhṇata de̱vebhyo̍ havyavāhana |
viśvā̱nyadya̱jñā a̍bhi̱pāsi̍ mānuṣa̱ tava̱ kratvā̍ yaviṣṭhya || 3.009.06
tadbha̱draṁ tava̍ da̱ṁsanā̱ pākā̍ya cicchadayati |
tvāṁ yada̍gne pa̱śava̍ḥ sa̱māsa̍te̱ sami̍ddhamapiśarva̱re || 3.009.07
ā ju̍hotā svadhva̱raṁ śī̱raṁ pā̍va̱kaśo̍ciṣam |
ā̱śuṁ dū̱tama̍ji̱raṁ pra̱tnamīḍya̍ṁ śru̱ṣṭī de̱vaṁ sa̍paryata || 3.009.08
trīṇi̍ śa̱tā trī sa̱hasrā̍ṇya̱gniṁ tri̱ṁśacca̍ de̱vā nava̍ cāsaparyan |
aukṣa̍nghṛ̱tairastṛ̍ṇanba̱rhira̍smā̱ ādiddhotā̍ra̱ṁ nya̍sādayanta || 3.009.09
tvāma̍gne manī̱ṣiṇa̍ḥ sa̱mrāja̍ṁ carṣaṇī̱nām |
de̱vaṁ martā̍sa indhate̱ sama̍dhva̱re || 3.010.01
tvāṁ ya̱jñeṣvṛ̱tvija̱magne̱ hotā̍ramīḻate |
go̱pā ṛ̱tasya̍ dīdihi̱ sve dame̍ || 3.010.02
sa ghā̱ yaste̱ dadā̍śati sa̱midhā̍ jā̱tave̍dase |
so a̍gne dhatte su̱vīrya̱ṁ sa pu̍ṣyati || 3.010.03
sa ke̱tura̍dhva̱rāṇā̍ma̱gnirde̱vebhi̱rā ga̍mat |
a̱ñjā̱naḥ sa̱pta hotṛ̍bhirha̱viṣma̍te || 3.010.04
pra hotre̍ pū̱rvyaṁ vaco̱'gnaye̍ bharatā bṛ̱hat |
vi̱pāṁ jyotī̍ṁṣi̱ bibhra̍te̱ na ve̱dhase̍ || 3.010.05
a̱gniṁ va̍rdhantu no̱ giro̱ yato̱ jāya̍ta u̱kthya̍ḥ |
ma̱he vājā̍ya̱ dravi̍ṇāya darśa̱taḥ || 3.010.06
agne̱ yaji̍ṣṭho adhva̱re de̱vānde̍vaya̱te ya̍ja |
hotā̍ ma̱ndro vi rā̍ja̱syati̱ sridha̍ḥ || 3.010.07
sa na̍ḥ pāvaka dīdihi dyu̱mada̱sme su̱vīrya̍m |
bhavā̍ sto̱tṛbhyo̱ anta̍maḥ sva̱staye̍ || 3.010.08
taṁ tvā̱ viprā̍ vipa̱nyavo̍ jāgṛ̱vāṁsa̱ḥ sami̍ndhate |
ha̱vya̱vāha̱mama̍rtyaṁ saho̱vṛdha̍m || 3.010.09
a̱gnirhotā̍ pu̱rohi̍to'dhva̱rasya̱ vica̍rṣaṇiḥ |
sa ve̍da ya̱jñamā̍nu̱ṣak || 3.011.01
sa ha̍vya̱vāḻama̍rtya u̱śigdū̱taścano̍hitaḥ |
a̱gnirdhi̱yā samṛ̍ṇvati || 3.011.02
a̱gnirdhi̱yā sa ce̍tati ke̱turya̱jñasya̍ pū̱rvyaḥ |
artha̱ṁ hya̍sya ta̱raṇi̍ || 3.011.03
a̱gniṁ sū̱nuṁ sana̍śruta̱ṁ saha̍so jā̱tave̍dasam |
vahni̍ṁ de̱vā a̍kṛṇvata || 3.011.04
adā̍bhyaḥ purae̱tā vi̱śāma̱gnirmānu̍ṣīṇām |
tūrṇī̱ ratha̱ḥ sadā̱ nava̍ḥ || 3.011.05
sā̱hvānviśvā̍ abhi̱yuja̱ḥ kratu̍rde̱vānā̱mamṛ̍ktaḥ |
a̱gnistu̱viśra̍vastamaḥ || 3.011.06
a̱bhi prayā̍ṁsi̱ vāha̍sā dā̱śvā a̍śnoti̱ martya̍ḥ |
kṣaya̍ṁ pāva̱kaśo̍ciṣaḥ || 3.011.07
pari̱ viśvā̍ni̱ sudhi̍tā̱gnera̍śyāma̱ manma̍bhiḥ |
viprā̍so jā̱tave̍dasaḥ || 3.011.08
agne̱ viśvā̍ni̱ vāryā̱ vāje̍ṣu saniṣāmahe |
tve de̱vāsa̱ eri̍re || 3.011.09
indrā̍gnī̱ ā ga̍taṁ su̱taṁ gī̱rbhirnabho̱ vare̍ṇyam |
a̱sya pā̍taṁ dhi̱yeṣi̱tā || 3.012.01
indrā̍gnī jari̱tuḥ sacā̍ ya̱jño ji̍gāti̱ ceta̍naḥ |
a̱yā pā̍tami̱maṁ su̱tam || 3.012.02
indra̍ma̱gniṁ ka̍vi̱cchadā̍ ya̱jñasya̍ jū̱tyā vṛ̍ṇe |
tā soma̍sye̱ha tṛ̍mpatām || 3.012.03
to̱śā vṛ̍tra̱haṇā̍ huve sa̱jitvā̱nāpa̍rājitā |
i̱ndrā̱gnī vā̍ja̱sāta̍mā || 3.012.04
pra vā̍marcantyu̱kthino̍ nīthā̱vido̍ jari̱tāra̍ḥ |
indrā̍gnī̱ iṣa̱ ā vṛ̍ṇe || 3.012.05
indrā̍gnī nava̱tiṁ puro̍ dā̱sapa̍tnīradhūnutam |
sā̱kameke̍na̱ karma̍ṇā || 3.012.06
indrā̍gnī̱ apa̍sa̱sparyupa̱ pra ya̍nti dhī̱taya̍ḥ |
ṛ̱tasya̍ pa̱thyā̱3̱̍ anu̍ || 3.012.07
indrā̍gnī tavi̱ṣāṇi̍ vāṁ sa̱dhasthā̍ni̱ prayā̍ṁsi ca |
yu̱vora̱ptūrya̍ṁ hi̱tam || 3.012.08
indrā̍gnī roca̱nā di̱vaḥ pari̱ vāje̍ṣu bhūṣathaḥ |
tadvā̍ṁ ceti̱ pra vī̱rya̍m || 3.012.09
pra vo̍ de̱vāyā̱gnaye̱ barhi̍ṣṭhamarcāsmai |
gama̍dde̱vebhi̱rā sa no̱ yaji̍ṣṭho ba̱rhirā sa̍dat || 3.013.01
ṛ̱tāvā̱ yasya̱ roda̍sī̱ dakṣa̱ṁ saca̍nta ū̱taya̍ḥ |
ha̱viṣma̍nta̱stamī̍ḻate̱ taṁ sa̍ni̱ṣyanto'va̍se || 3.013.02
sa ya̱ntā vipra̍ eṣā̱ṁ sa ya̱jñānā̱mathā̱ hi ṣaḥ |
a̱gniṁ taṁ vo̍ duvasyata̱ dātā̱ yo vani̍tā ma̱gham || 3.013.03
sa na̱ḥ śarmā̍ṇi vī̱taye̱'gnirya̍cchatu̱ śaṁta̍mā |
yato̍ naḥ pru̱ṣṇava̱dvasu̍ di̱vi kṣi̱tibhyo̍ a̱psvā || 3.013.04
dī̱di̱vāṁsa̱mapū̍rvya̱ṁ vasvī̍bhirasya dhī̱tibhi̍ḥ |
ṛkvā̍ṇo a̱gnimi̍ndhate̱ hotā̍raṁ vi̱śpati̍ṁ vi̱śām || 3.013.05
u̱ta no̱ brahma̍nnaviṣa u̱ktheṣu̍ deva̱hūta̍maḥ |
śaṁ na̍ḥ śocā ma̱rudvṛ̱dho'gne̍ sahasra̱sāta̍maḥ || 3.013.06
nū no̍ rāsva sa̱hasra̍vatto̱kava̍tpuṣṭi̱madvasu̍ |
dyu̱mada̍gne su̱vīrya̱ṁ varṣi̍ṣṭha̱manu̍pakṣitam || 3.013.07
ā hotā̍ ma̱ndro vi̱dathā̍nyasthātsa̱tyo yajvā̍ ka̱vita̍ma̱ḥ sa ve̱dhāḥ |
vi̱dyudra̍tha̱ḥ saha̍saspu̱tro a̱gniḥ śo̱ciṣke̍śaḥ pṛthi̱vyāṁ pājo̍ aśret || 3.014.01
ayā̍mi te̱ nama̍uktiṁ juṣasva̱ ṛtā̍va̱stubhya̱ṁ ceta̍te sahasvaḥ |
vi̱dvā ā va̍kṣi vi̱duṣo̱ ni ṣa̍tsi̱ madhya̱ ā ba̱rhirū̱taye̍ yajatra || 3.014.02
drava̍tāṁ ta u̱ṣasā̍ vā̱jaya̍ntī̱ agne̱ vāta̍sya pa̱thyā̍bhi̱raccha̍ |
yatsī̍ma̱ñjanti̍ pū̱rvyaṁ ha̱virbhi̱rā va̱ndhure̍va tasthaturduro̱ṇe || 3.014.03
mi̱traśca̱ tubhya̱ṁ varu̍ṇaḥ saha̱svo'gne̱ viśve̍ ma̱ruta̍ḥ su̱mnama̍rcan |
yaccho̱ciṣā̍ sahasasputra̱ tiṣṭhā̍ a̱bhi kṣi̱tīḥ pra̱thaya̱nsūryo̱ nṝn || 3.014.04
va̱yaṁ te̍ a̱dya ra̍ri̱mā hi kāma̍muttā̱naha̍stā̱ nama̍sopa̱sadya̍ |
yaji̍ṣṭhena̱ mana̍sā yakṣi de̱vānasre̍dhatā̱ manma̍nā̱ vipro̍ agne || 3.014.05
tvaddhi pu̍tra sahaso̱ vi pū̱rvīrde̱vasya̱ yantyū̱tayo̱ vi vājā̍ḥ |
tvaṁ de̍hi saha̱sriṇa̍ṁ ra̱yiṁ no̍'dro̱gheṇa̱ vaca̍sā sa̱tyama̍gne || 3.014.06
tubhya̍ṁ dakṣa kavikrato̱ yānī̱mā deva̱ martā̍so adhva̱re aka̍rma |
tvaṁ viśva̍sya su̱ratha̍sya bodhi̱ sarva̱ṁ tada̍gne amṛta svade̱ha || 3.014.07
vi pāja̍sā pṛ̱thunā̱ śośu̍cāno̱ bādha̍sva dvi̱ṣo ra̱kṣaso̱ amī̍vāḥ |
su̱śarma̍ṇo bṛha̱taḥ śarma̍ṇi syāma̱gnera̱haṁ su̱hava̍sya̱ praṇī̍tau || 3.015.01
tvaṁ no̍ a̱syā u̱ṣaso̱ vyu̍ṣṭau̱ tvaṁ sūra̱ udi̍te bodhi go̱pāḥ |
janme̍va̱ nitya̱ṁ tana̍yaṁ juṣasva̱ stoma̍ṁ me agne ta̱nvā̍ sujāta || 3.015.02
tvaṁ nṛ̱cakṣā̍ vṛṣa̱bhānu̍ pū̱rvīḥ kṛ̱ṣṇāsva̍gne aru̱ṣo vi bhā̍hi |
vaso̱ neṣi̍ ca̱ parṣi̱ cātyaṁha̍ḥ kṛ̱dhī no̍ rā̱ya u̱śijo̍ yaviṣṭha || 3.015.03
aṣā̍ḻho agne vṛṣa̱bho di̍dīhi̱ puro̱ viśvā̱ḥ saubha̍gā saṁjigī̱vān |
ya̱jñasya̍ ne̱tā pra̍tha̱masya̍ pā̱yorjāta̍vedo bṛha̱taḥ su̍praṇīte || 3.015.04
acchi̍drā̱ śarma̍ jaritaḥ pu̱rūṇi̍ de̱vā acchā̱ dīdyā̍naḥ sume̱dhāḥ |
ratho̱ na sasni̍ra̱bhi va̍kṣi̱ vāja̱magne̱ tvaṁ roda̍sī naḥ su̱meke̍ || 3.015.05
pra pī̍paya vṛṣabha̱ jinva̱ vājā̱nagne̱ tvaṁ roda̍sī naḥ su̱doghe̍ |
de̱vebhi̍rdeva su̱rucā̍ rucā̱no mā no̱ marta̍sya durma̱tiḥ pari̍ ṣṭhāt || 3.015.06
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.015.07
a̱yama̱gniḥ su̱vīrya̱syeśe̍ ma̱haḥ saubha̍gasya |
rā̱ya ī̍śe svapa̱tyasya̱ goma̍ta̱ īśe̍ vṛtra̱hathā̍nām || 3.016.01
i̱maṁ na̍ro marutaḥ saścatā̱ vṛdha̱ṁ yasmi̱nrāya̱ḥ śevṛ̍dhāsaḥ |
a̱bhi ye santi̱ pṛta̍nāsu dū̱ḍhyo̍ vi̱śvāhā̱ śatru̍māda̱bhuḥ || 3.016.02
sa tvaṁ no̍ rā̱yaḥ śi̍śīhi̱ mīḍhvo̍ agne su̱vīrya̍sya |
tuvi̍dyumna̱ varṣi̍ṣṭhasya pra̱jāva̍to'namī̱vasya̍ śu̱ṣmiṇa̍ḥ || 3.016.03
cakri̱ryo viśvā̱ bhuva̍nā̱bhi sā̍sa̱hiścakri̍rde̱veṣvā duva̍ḥ |
ā de̱veṣu̱ yata̍ta̱ ā su̱vīrya̱ ā śaṁsa̍ u̱ta nṛ̱ṇām || 3.016.04
mā no̍ a̱gne'ma̍taye̱ māvīra̍tāyai rīradhaḥ |
māgotā̍yai sahasasputra̱ mā ni̱de'pa̱ dveṣā̱ṁsyā kṛ̍dhi || 3.016.05
śa̱gdhi vāja̍sya subhaga pra̱jāva̱to'gne̍ bṛha̱to a̍dhva̱re |
saṁ rā̱yā bhūya̍sā sṛja mayo̱bhunā̱ tuvi̍dyumna̱ yaśa̍svatā || 3.016.06
sa̱mi̱dhyamā̍naḥ pratha̱mānu̱ dharmā̱ sama̱ktubhi̍rajyate vi̱śvavā̍raḥ |
śo̱ciṣke̍śo ghṛ̱tani̍rṇikpāva̱kaḥ su̍ya̱jño a̱gnirya̱jathā̍ya de̱vān || 3.017.01
yathāya̍jo ho̱trama̍gne pṛthi̱vyā yathā̍ di̱vo jā̍tavedaściki̱tvān |
e̱vānena̍ ha̱viṣā̍ yakṣi de̱vānma̍nu̱ṣvadya̱jñaṁ pra ti̍re̱mama̱dya || 3.017.02
trīṇyāyū̍ṁṣi̱ tava̍ jātavedasti̱sra ā̱jānī̍ru̱ṣasa̍ste agne |
tābhi̍rde̱vānā̱mavo̍ yakṣi vi̱dvānathā̍ bhava̱ yaja̍mānāya̱ śaṁ yoḥ || 3.017.03
a̱gniṁ su̍dī̱tiṁ su̱dṛśa̍ṁ gṛ̱ṇanto̍ nama̱syāma̱stveḍya̍ṁ jātavedaḥ |
tvāṁ dū̱tama̍ra̱tiṁ ha̍vya̱vāha̍ṁ de̱vā a̍kṛṇvanna̱mṛta̍sya̱ nābhi̍m || 3.017.04
yastvaddhotā̱ pūrvo̍ agne̱ yajī̍yāndvi̱tā ca̱ sattā̍ sva̱dhayā̍ ca śa̱mbhuḥ |
tasyānu̱ dharma̱ pra ya̍jā ciki̱tvo'tha̍ no dhā adhva̱raṁ de̱vavī̍tau || 3.017.05
bhavā̍ no agne su̱manā̱ upe̍tau̱ sakhe̍va̱ sakhye̍ pi̱tare̍va sā̱dhuḥ |
pu̱ru̱druho̱ hi kṣi̱tayo̱ janā̍nā̱ṁ prati̍ pratī̱cīrda̍hatā̱darā̍tīḥ || 3.018.01
tapo̱ ṣva̍gne̱ anta̍rā a̱mitrā̱ntapā̱ śaṁsa̱mara̍ruṣa̱ḥ para̍sya |
tapo̍ vaso cikitā̱no a̱cittā̱nvi te̍ tiṣṭhantāma̱jarā̍ a̱yāsa̍ḥ || 3.018.02
i̱dhmenā̍gna i̱cchamā̍no ghṛ̱tena̍ ju̱homi̍ ha̱vyaṁ tara̍se̱ balā̍ya |
yāva̱dīśe̱ brahma̍ṇā̱ vanda̍māna i̱māṁ dhiya̍ṁ śata̱seyā̍ya de̱vīm || 3.018.03
uccho̱ciṣā̍ sahasasputra stu̱to bṛ̱hadvaya̍ḥ śaśamā̱neṣu̍ dhehi |
re̱vada̍gne vi̱śvāmi̍treṣu̱ śaṁ yorma̍rmṛ̱jmā te̍ ta̱nvaṁ1̱̍ bhūri̱ kṛtva̍ḥ || 3.018.04
kṛ̱dhi ratna̍ṁ susanita̱rdhanā̍nā̱ṁ sa gheda̍gne bhavasi̱ yatsami̍ddhaḥ |
sto̱turdu̍ro̱ṇe su̱bhaga̍sya re̱vatsṛ̱prā ka̱rasnā̍ dadhiṣe̱ vapū̍ṁṣi || 3.018.05
a̱gniṁ hotā̍ra̱ṁ pra vṛ̍ṇe mi̱yedhe̱ gṛtsa̍ṁ ka̱viṁ vi̍śva̱vida̱mamū̍ram |
sa no̍ yakṣadde̱vatā̍tā̱ yajī̍yānrā̱ye vājā̍ya vanate ma̱ghāni̍ || 3.019.01
pra te̍ agne ha̱viṣma̍tīmiya̱rmyacchā̍ sudyu̱mnāṁ rā̱tinī̍ṁ ghṛ̱tācī̍m |
pra̱da̱kṣi̱ṇidde̱vatā̍timurā̱ṇaḥ saṁ rā̱tibhi̱rvasu̍bhirya̱jñama̍śret || 3.019.02
sa tejī̍yasā̱ mana̍sā̱ tvota̍ u̱ta śi̍kṣa svapa̱tyasya̍ śi̱kṣoḥ |
agne̍ rā̱yo nṛta̍masya̱ prabhū̍tau bhū̱yāma̍ te suṣṭu̱taya̍śca̱ vasva̍ḥ || 3.019.03
bhūrī̍ṇi̱ hi tve da̍dhi̱re anī̱kāgne̍ de̱vasya̱ yajya̍vo̱ janā̍saḥ |
sa ā va̍ha de̱vatā̍tiṁ yaviṣṭha̱ śardho̱ yada̱dya di̱vyaṁ yajā̍si || 3.019.04
yattvā̱ hotā̍rama̱naja̍nmi̱yedhe̍ niṣā̱daya̍nto ya̱jathā̍ya de̱vāḥ |
sa tvaṁ no̍ agne'vi̱teha bo̱dhyadhi̱ śravā̍ṁsi dhehi nasta̱nūṣu̍ || 3.019.05
a̱gnimu̱ṣasa̍ma̱śvinā̍ dadhi̱krāṁ vyu̍ṣṭiṣu havate̱ vahni̍ru̱kthaiḥ |
su̱jyoti̍ṣo naḥ śṛṇvantu de̱vāḥ sa̱joṣa̍so adhva̱raṁ vā̍vaśā̱nāḥ || 3.020.01
agne̱ trī te̱ vāji̍nā̱ trī ṣa̱dhasthā̍ ti̱sraste̍ ji̱hvā ṛ̍tajāta pū̱rvīḥ |
ti̱sra u̍ te ta̱nvo̍ de̱vavā̍tā̱stābhi̍rnaḥ pāhi̱ giro̱ apra̍yucchan || 3.020.02
agne̱ bhūrī̍ṇi̱ tava̍ jātavedo̱ deva̍ svadhāvo̱'mṛta̍sya̱ nāma̍ |
yāśca̍ mā̱yā mā̱yinā̍ṁ viśvaminva̱ tve pū̱rvīḥ sa̍ṁda̱dhuḥ pṛ̍ṣṭabandho || 3.020.03
a̱gnirne̱tā bhaga̍ iva kṣitī̱nāṁ daivī̍nāṁ de̱va ṛ̍tu̱pā ṛ̱tāvā̍ |
sa vṛ̍tra̱hā sa̱nayo̍ vi̱śvave̍dā̱ḥ parṣa̱dviśvāti̍ duri̱tā gṛ̱ṇanta̍m || 3.020.04
da̱dhi̱krāma̱gnimu̱ṣasa̍ṁ ca de̱vīṁ bṛha̱spati̍ṁ savi̱tāra̍ṁ ca de̱vam |
a̱śvinā̍ mi̱trāvaru̍ṇā̱ bhaga̍ṁ ca̱ vasū̍nru̱drā ā̍di̱tyā i̱ha hu̍ve || 3.020.05
i̱maṁ no̍ ya̱jñama̱mṛte̍ṣu dhehī̱mā ha̱vyā jā̍tavedo juṣasva |
sto̱kānā̍magne̱ meda̍so ghṛ̱tasya̱ hota̱ḥ prāśā̍na pratha̱mo ni̱ṣadya̍ || 3.021.01
ghṛ̱tava̍ntaḥ pāvaka te sto̱kāḥ śco̍tanti̱ meda̍saḥ |
svadha̍rmande̱vavī̍taye̱ śreṣṭha̍ṁ no dhehi̱ vārya̍m || 3.021.02
tubhya̍ṁ sto̱kā ghṛ̍ta̱ścuto'gne̱ viprā̍ya santya |
ṛṣi̱ḥ śreṣṭha̱ḥ sami̍dhyase ya̱jñasya̍ prāvi̱tā bha̍va || 3.021.03
tubhya̍ṁ ścotantyadhrigo śacīvaḥ sto̱kāso̍ agne̱ meda̍so ghṛ̱tasya̍ |
ka̱vi̱śa̱sto bṛ̍ha̱tā bhā̱nunāgā̍ ha̱vyā ju̍ṣasva medhira || 3.021.04
oji̍ṣṭhaṁ te madhya̱to meda̱ udbhṛ̍ta̱ṁ pra te̍ va̱yaṁ da̍dāmahe |
ścota̍nti te vaso sto̱kā adhi̍ tva̱ci prati̱ tānde̍va̱śo vi̍hi || 3.021.05
a̱yaṁ so a̱gniryasmi̱nsoma̱mindra̍ḥ su̱taṁ da̱dhe ja̱ṭhare̍ vāvaśā̱naḥ |
sa̱ha̱sriṇa̱ṁ vāja̱matya̱ṁ na sapti̍ṁ sasa̱vānsanstū̍yase jātavedaḥ || 3.022.01
agne̱ yatte̍ di̱vi varca̍ḥ pṛthi̱vyāṁ yadoṣa̍dhīṣva̱psvā ya̍jatra |
yenā̱ntari̍kṣamu̱rvā̍ta̱tantha̍ tve̱ṣaḥ sa bhā̱nura̍rṇa̱vo nṛ̱cakṣā̍ḥ || 3.022.02
agne̍ di̱vo arṇa̱macchā̍ jigā̱syacchā̍ de̱vā ū̍ciṣe̱ dhiṣṇyā̱ ye |
yā ro̍ca̱ne pa̱rastā̱tsūrya̍sya̱ yāścā̱vastā̍dupa̱tiṣṭha̍nta̱ āpa̍ḥ || 3.022.03
pu̱rī̱ṣyā̍so a̱gnaya̍ḥ prāva̱ṇebhi̍ḥ sa̱joṣa̍saḥ |
ju̱ṣantā̍ṁ ya̱jñama̱druho̍'namī̱vā iṣo̍ ma̱hīḥ || 3.022.04
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.022.05
nirma̍thita̱ḥ sudhi̍ta̱ ā sa̱dhasthe̱ yuvā̍ ka̱vira̍dhva̱rasya̍ praṇe̱tā |
jūrya̍tsva̱gnira̱jaro̱ vane̱ṣvatrā̍ dadhe a̱mṛta̍ṁ jā̱tave̍dāḥ || 3.023.01
ama̍nthiṣṭā̱ṁ bhāra̍tā re̱vada̱gniṁ de̱vaśra̍vā de̱vavā̍taḥ su̱dakṣa̍m |
agne̱ vi pa̍śya bṛha̱tābhi rā̱yeṣāṁ no̍ ne̱tā bha̍vatā̱danu̱ dyūn || 3.023.02
daśa̱ kṣipa̍ḥ pū̱rvyaṁ sī̍majījana̱nsujā̍taṁ mā̱tṛṣu̍ pri̱yam |
a̱gniṁ stu̍hi daivavā̱taṁ de̍vaśravo̱ yo janā̍nā̱masa̍dva̱śī || 3.023.03
ni tvā̍ dadhe̱ vara̱ ā pṛ̍thi̱vyā iḻā̍yāspa̱de su̍dina̱tve ahnā̍m |
dṛ̱ṣadva̍tyā̱ṁ mānu̍ṣa āpa̱yāyā̱ṁ sara̍svatyāṁ re̱vada̍gne didīhi || 3.023.04
iḻā̍magne puru̱daṁsa̍ṁ sa̱niṁ goḥ śa̍śvatta̱maṁ hava̍mānāya sādha |
syānna̍ḥ sū̱nustana̍yo vi̱jāvāgne̱ sā te̍ suma̱tirbhū̍tva̱sme || 3.023.05
agne̱ saha̍sva̱ pṛta̍nā a̱bhimā̍tī̱rapā̍sya |
du̱ṣṭara̱stara̱nnarā̍tī̱rvarco̍ dhā ya̱jñavā̍hase || 3.024.01
agna̍ i̱ḻā sami̍dhyase vī̱tiho̍tro̱ ama̍rtyaḥ |
ju̱ṣasva̱ sū no̍ adhva̱ram || 3.024.02
agne̍ dyu̱mnena̍ jāgṛve̱ saha̍saḥ sūnavāhuta |
edaṁ ba̱rhiḥ sa̍do̱ mama̍ || 3.024.03
agne̱ viśve̍bhira̱gnibhi̍rde̱vebhi̍rmahayā̱ gira̍ḥ |
ya̱jñeṣu̱ ya u̍ cā̱yava̍ḥ || 3.024.04
agne̱ dā dā̱śuṣe̍ ra̱yiṁ vī̱rava̍nta̱ṁ parī̍ṇasam |
śi̱śī̱hi na̍ḥ sūnu̱mata̍ḥ || 3.024.05
agne̍ di̱vaḥ sū̱nura̍si̱ prace̍tā̱stanā̍ pṛthi̱vyā u̱ta vi̱śvave̍dāḥ |
ṛdha̍gde̱vā i̱ha ya̍jā cikitvaḥ || 3.025.01
a̱gniḥ sa̍noti vī̱ryā̍ṇi vi̱dvānsa̱noti̱ vāja̍ma̱mṛtā̍ya̱ bhūṣa̍n |
sa no̍ de̱vā eha va̍hā purukṣo || 3.025.02
a̱gnirdyāvā̍pṛthi̱vī vi̱śvaja̍nye̱ ā bhā̍ti de̱vī a̱mṛte̱ amū̍raḥ |
kṣaya̱nvājai̍ḥ puruśca̱ndro namo̍bhiḥ || 3.025.03
agna̱ indra̍śca dā̱śuṣo̍ duro̱ṇe su̱tāva̍to ya̱jñami̱hopa̍ yātam |
ama̍rdhantā soma̱peyā̍ya devā || 3.025.04
agne̍ a̱pāṁ sami̍dhyase duro̱ṇe nitya̍ḥ sūno sahaso jātavedaḥ |
sa̱dhasthā̍ni ma̱haya̍māna ū̱tī || 3.025.05
vai̱śvā̱na̱raṁ mana̍sā̱gniṁ ni̱cāyyā̍ ha̱viṣma̍nto anuṣa̱tyaṁ sva̱rvida̍m |
su̱dānu̍ṁ de̱vaṁ ra̍thi̱raṁ va̍sū̱yavo̍ gī̱rbhī ra̱ṇvaṁ ku̍śi̱kāso̍ havāmahe || 3.026.01
taṁ śu̱bhrama̱gnimava̍se havāmahe vaiśvāna̱raṁ mā̍ta̱riśvā̍namu̱kthya̍m |
bṛha̱spati̱ṁ manu̍ṣo de̱vatā̍taye̱ vipra̱ṁ śrotā̍ra̱mati̍thiṁ raghu̱ṣyada̍m || 3.026.02
aśvo̱ na kranda̱ñjani̍bhi̱ḥ sami̍dhyate vaiśvāna̱raḥ ku̍śi̱kebhi̍ryu̱geyu̍ge |
sa no̍ a̱gniḥ su̱vīrya̱ṁ svaśvya̱ṁ dadhā̍tu̱ ratna̍ma̱mṛte̍ṣu̱ jāgṛ̍viḥ || 3.026.03
pra ya̍ntu̱ vājā̱stavi̍ṣībhira̱gnaya̍ḥ śu̱bhe sammi̍ślā̱ḥ pṛṣa̍tīrayukṣata |
bṛ̱ha̱dukṣo̍ ma̱ruto̍ vi̱śvave̍dasa̱ḥ pra ve̍payanti̱ parva̍tā̱ adā̍bhyāḥ || 3.026.04
a̱gni̱śriyo̍ ma̱ruto̍ vi̱śvakṛ̍ṣṭaya̱ ā tve̱ṣamu̱gramava̍ īmahe va̱yam |
te svā̱nino̍ ru̱driyā̍ va̱rṣani̍rṇijaḥ si̱ṁhā na he̱ṣakra̍tavaḥ su̱dāna̍vaḥ || 3.026.05
vrāta̍ṁvrātaṁ ga̱ṇaṁga̍ṇaṁ suśa̱stibhi̍ra̱gnerbhāma̍ṁ ma̱rutā̱moja̍ īmahe |
pṛṣa̍daśvāso anava̱bhrarā̍dhaso̱ gantā̍ro ya̱jñaṁ vi̱dathe̍ṣu̱ dhīrā̍ḥ || 3.026.06
a̱gnira̍smi̱ janma̍nā jā̱tave̍dā ghṛ̱taṁ me̱ cakṣu̍ra̱mṛta̍ṁ ma ā̱san |
a̱rkastri̱dhātū̱ raja̍so vi̱māno'ja̍sro gha̱rmo ha̱vira̍smi̱ nāma̍ || 3.026.07
tri̱bhiḥ pa̱vitrai̱rapu̍po̱ddhya1̱̍rkaṁ hṛ̱dā ma̱tiṁ jyoti̱ranu̍ prajā̱nan |
varṣi̍ṣṭha̱ṁ ratna̍makṛta sva̱dhābhi̱rādiddyāvā̍pṛthi̱vī parya̍paśyat || 3.026.08
śa̱tadhā̍ra̱mutsa̱makṣī̍yamāṇaṁ vipa̱ścita̍ṁ pi̱tara̱ṁ vaktvā̍nām |
me̱ḻiṁ mada̍ntaṁ pi̱troru̱pasthe̱ taṁ ro̍dasī pipṛtaṁ satya̱vāca̍m || 3.026.09
pra vo̱ vājā̍ a̱bhidya̍vo ha̱viṣma̍nto ghṛ̱tācyā̍ |
de̱vāñji̍gāti sumna̱yuḥ || 3.027.01
īḻe̍ a̱gniṁ vi̍pa̱ścita̍ṁ gi̱rā ya̱jñasya̱ sādha̍nam |
śru̱ṣṭī̱vāna̍ṁ dhi̱tāvā̍nam || 3.027.02
agne̍ śa̱kema̍ te va̱yaṁ yama̍ṁ de̱vasya̍ vā̱jina̍ḥ |
ati̱ dveṣā̍ṁsi tarema || 3.027.03
sa̱mi̱dhyamā̍no adhva̱re̱3̱̍'gniḥ pā̍va̱ka īḍya̍ḥ |
śo̱ciṣke̍śa̱stamī̍mahe || 3.027.04
pṛ̱thu̱pājā̱ ama̍rtyo ghṛ̱tani̍rṇi̱ksvā̍hutaḥ |
a̱gnirya̱jñasya̍ havya̱vāṭ || 3.027.05
taṁ sa̱bādho̍ ya̱tasru̍ca i̱tthā dhi̱yā ya̱jñava̍ntaḥ |
ā ca̍krura̱gnimū̱taye̍ || 3.027.06
hotā̍ de̱vo ama̍rtyaḥ pu̱rastā̍deti mā̱yayā̍ |
vi̱dathā̍ni praco̱daya̍n || 3.027.07
vā̱jī vāje̍ṣu dhīyate'dhva̱reṣu̱ pra ṇī̍yate |
vipro̍ ya̱jñasya̱ sādha̍naḥ || 3.027.08
dhi̱yā ca̍kre̱ vare̍ṇyo bhū̱tānā̱ṁ garbha̱mā da̍dhe |
dakṣa̍sya pi̱tara̱ṁ tanā̍ || 3.027.09
ni tvā̍ dadhe̱ vare̍ṇya̱ṁ dakṣa̍sye̱ḻā sa̍haskṛta |
agne̍ sudī̱timu̱śija̍m || 3.027.10
a̱gniṁ ya̱ntura̍ma̱ptura̍mṛ̱tasya̱ yoge̍ va̱nuṣa̍ḥ |
viprā̱ vājai̱ḥ sami̍ndhate || 3.027.11
ū̱rjo napā̍tamadhva̱re dī̍di̱vāṁsa̱mupa̱ dyavi̍ |
a̱gnimī̍ḻe ka̱vikra̍tum || 3.027.12
ī̱ḻenyo̍ nama̱sya̍sti̱rastamā̍ṁsi darśa̱taḥ |
sama̱gniri̍dhyate̱ vṛṣā̍ || 3.027.13
vṛṣo̍ a̱gniḥ sami̍dhya̱te'śvo̱ na de̍va̱vāha̍naḥ |
taṁ ha̱viṣma̍nta īḻate || 3.027.14
vṛṣa̍ṇaṁ tvā va̱yaṁ vṛ̍ṣa̱nvṛṣa̍ṇa̱ḥ sami̍dhīmahi |
agne̱ dīdya̍taṁ bṛ̱hat || 3.027.15
agne̍ ju̱ṣasva̍ no ha̱viḥ pu̍ro̱ḻāśa̍ṁ jātavedaḥ |
prā̱ta̱ḥsā̱ve dhi̍yāvaso || 3.028.01
pu̱ro̱ḻā a̍gne paca̱tastubhya̍ṁ vā ghā̱ pari̍ṣkṛtaḥ |
taṁ ju̍ṣasva yaviṣṭhya || 3.028.02
agne̍ vī̱hi pu̍ro̱ḻāśa̱māhu̍taṁ ti̱roa̍hnyam |
saha̍saḥ sū̱nura̍syadhva̱re hi̱taḥ || 3.028.03
mādhya̍ṁdine̱ sava̍ne jātavedaḥ puro̱ḻāśa̍mi̱ha ka̍ve juṣasva |
agne̍ ya̱hvasya̱ tava̍ bhāga̱dheya̱ṁ na pra mi̍nanti vi̱dathe̍ṣu̱ dhīrā̍ḥ || 3.028.04
agne̍ tṛ̱tīye̱ sava̍ne̱ hi kāni̍ṣaḥ puro̱ḻāśa̍ṁ sahasaḥ sūna̱vāhu̍tam |
athā̍ de̱veṣva̍dhva̱raṁ vi̍pa̱nyayā̱ dhā ratna̍vantama̱mṛte̍ṣu̱ jāgṛ̍vim || 3.028.05
agne̍ vṛdhā̱na āhu̍tiṁ puro̱ḻāśa̍ṁ jātavedaḥ |
ju̱ṣasva̍ ti̱roa̍hnyam || 3.028.06
astī̱dama̍dhi̱mantha̍na̱masti̍ pra̱jana̍naṁ kṛ̱tam |
e̱tāṁ vi̱śpatnī̱mā bha̍rā̱gniṁ ma̍nthāma pū̱rvathā̍ || 3.029.01
a̱raṇyo̱rnihi̍to jā̱tave̍dā̱ garbha̍ iva̱ sudhi̍to ga̱rbhiṇī̍ṣu |
di̱vedi̍va̱ īḍyo̍ jāgṛ̱vadbhi̍rha̱viṣma̍dbhirmanu̱ṣye̍bhira̱gniḥ || 3.029.02
u̱ttā̱nāyā̱mava̍ bharā ciki̱tvānsa̱dyaḥ pravī̍tā̱ vṛṣa̍ṇaṁ jajāna |
a̱ru̱ṣastū̍po̱ ruśa̍dasya̱ pāja̱ iḻā̍yāspu̱tro va̱yune̍'janiṣṭa || 3.029.03
iḻā̍yāstvā pa̱de va̱yaṁ nābhā̍ pṛthi̱vyā adhi̍ |
jāta̍vedo̱ ni dhī̍ma̱hyagne̍ ha̱vyāya̱ voḻha̍ve || 3.029.04
mantha̍tā naraḥ ka̱vimadva̍yanta̱ṁ prace̍tasama̱mṛta̍ṁ su̱pratī̍kam |
ya̱jñasya̍ ke̱tuṁ pra̍tha̱maṁ pu̱rastā̍da̱gniṁ na̍ro janayatā su̱śeva̍m || 3.029.05
yadī̱ mantha̍nti bā̱hubhi̱rvi ro̍ca̱te'śvo̱ na vā̱jya̍ru̱ṣo vane̱ṣvā |
ci̱tro na yāma̍nna̱śvino̱rani̍vṛta̱ḥ pari̍ vṛṇa̱ktyaśma̍na̱stṛṇā̱ daha̍n || 3.029.06
jā̱to a̱gnī ro̍cate̱ ceki̍tāno vā̱jī vipra̍ḥ kaviśa̱staḥ su̱dānu̍ḥ |
yaṁ de̱vāsa̱ īḍya̍ṁ viśva̱vida̍ṁ havya̱vāha̱mada̍dhuradhva̱reṣu̍ || 3.029.07
sīda̍ hota̱ḥ sva u̍ lo̱ke ci̍ki̱tvānsā̱dayā̍ ya̱jñaṁ su̍kṛ̱tasya̱ yonau̍ |
de̱vā̱vīrde̱vānha̱viṣā̍ yajā̱syagne̍ bṛ̱hadyaja̍māne̱ vayo̍ dhāḥ || 3.029.08
kṛ̱ṇota̍ dhū̱maṁ vṛṣa̍ṇaṁ sakhā̱yo'sre̍dhanta itana̱ vāja̱maccha̍ |
a̱yama̱gniḥ pṛ̍tanā̱ṣāṭ su̱vīro̱ yena̍ de̱vāso̱ asa̍hanta̱ dasyū̍n || 3.029.09
a̱yaṁ te̱ yoni̍rṛ̱tviyo̱ yato̍ jā̱to aro̍cathāḥ |
taṁ jā̱nanna̍gna̱ ā sī̱dāthā̍ no vardhayā̱ gira̍ḥ || 3.029.10
tanū̱napā̍ducyate̱ garbha̍ āsu̱ro narā̱śaṁso̍ bhavati̱ yadvi̱jāya̍te |
mā̱ta̱riśvā̱ yadami̍mīta mā̱tari̱ vāta̍sya̱ sargo̍ abhava̱tsarī̍maṇi || 3.029.11
su̱ni̱rmathā̱ nirma̍thitaḥ suni̱dhā nihi̍taḥ ka̱viḥ |
agne̍ svadhva̱rā kṛ̍ṇu de̱vānde̍vaya̱te ya̍ja || 3.029.12
ajī̍jananna̱mṛta̱ṁ martyā̍so'sre̱māṇa̍ṁ ta̱raṇi̍ṁ vī̱ḻuja̍mbham |
daśa̱ svasā̍ro a̱gruva̍ḥ samī̱cīḥ pumā̍ṁsaṁ jā̱tama̱bhi saṁ ra̍bhante || 3.029.13
pra sa̱ptaho̍tā sana̱kāda̍rocata mā̱turu̱pasthe̱ yadaśo̍ca̱dūdha̍ni |
na ni mi̍ṣati su̱raṇo̍ di̱vedi̍ve̱ yadasu̍rasya ja̱ṭharā̱dajā̍yata || 3.029.14
a̱mi̱trā̱yudho̍ ma̱rutā̍miva pra̱yāḥ pra̍thama̱jā brahma̍ṇo̱ viśva̱midvi̍duḥ |
dyu̱mnava̱dbrahma̍ kuśi̱kāsa̱ eri̍ra̱ eka̍eko̱ dame̍ a̱gniṁ samī̍dhire || 3.029.15
yada̱dya tvā̍ praya̱ti ya̱jñe a̱sminhota̍ściki̱tvo'vṛ̍ṇīmahī̱ha |
dhru̱vama̍yā dhru̱vamu̱tāśa̍miṣṭhāḥ prajā̱nanvi̱dvā upa̍ yāhi̱ soma̍m || 3.029.16
i̱cchanti̍ tvā so̱myāsa̱ḥ sakhā̍yaḥ su̱nvanti̱ soma̱ṁ dadha̍ti̱ prayā̍ṁsi |
titi̍kṣante a̱bhiśa̍sti̱ṁ janā̍nā̱mindra̱ tvadā kaśca̱na hi pra̍ke̱taḥ || 3.030.01
na te̍ dū̱re pa̍ra̱mā ci̱drajā̱ṁsyā tu pra yā̍hi harivo̱ hari̍bhyām |
sthi̱rāya̱ vṛṣṇe̱ sava̍nā kṛ̱temā yu̱ktā grāvā̍ṇaḥ samidhā̱ne a̱gnau || 3.030.02
indra̍ḥ su̱śipro̍ ma̱ghavā̱ taru̍tro ma̱hāvrā̍tastuvikū̱rmirṛghā̍vān |
yadu̱gro dhā bā̍dhi̱to martye̍ṣu̱ kva1̱̍ tyā te̍ vṛṣabha vī̱ryā̍ṇi || 3.030.03
tvaṁ hi ṣmā̍ cyā̱vaya̱nnacyu̍tā̱nyeko̍ vṛ̱trā cara̍si̱ jighna̍mānaḥ |
tava̱ dyāvā̍pṛthi̱vī parva̍tā̱so'nu̍ vra̱tāya̱ nimi̍teva tasthuḥ || 3.030.04
u̱tābha̍ye puruhūta̱ śravo̍bhi̱reko̍ dṛ̱ḻhama̍vado vṛtra̱hā san |
i̱me ci̍dindra̱ roda̍sī apā̱re yatsa̍ṁgṛ̱bhṇā ma̍ghavankā̱śiritte̍ || 3.030.05
pra sū ta̍ indra pra̱vatā̱ hari̍bhyā̱ṁ pra te̱ vajra̍ḥ pramṛ̱ṇanne̍tu̱ śatrū̍n |
ja̱hi pra̍tī̱co a̍nū̱caḥ parā̍co̱ viśva̍ṁ sa̱tyaṁ kṛ̍ṇuhi vi̱ṣṭama̍stu || 3.030.06
yasmai̱ dhāyu̱rada̍dhā̱ martyā̱yābha̍ktaṁ cidbhajate ge̱hyaṁ1̱̍ saḥ |
bha̱drā ta̍ indra suma̱tirghṛ̱tācī̍ sa̱hasra̍dānā puruhūta rā̱tiḥ || 3.030.07
sa̱hadā̍nuṁ puruhūta kṣi̱yanta̍maha̱stami̍ndra̱ saṁ pi̍ṇa̱kkuṇā̍rum |
a̱bhi vṛ̱traṁ vardha̍māna̱ṁ piyā̍ruma̱pāda̍mindra ta̱vasā̍ jaghantha || 3.030.08
ni sā̍ma̱nāmi̍ṣi̱rāmi̍ndra̱ bhūmi̍ṁ ma̱hīma̍pā̱rāṁ sada̍ne sasattha |
asta̍bhnā̱ddyāṁ vṛ̍ṣa̱bho a̱ntari̍kṣa̱marṣa̱ntvāpa̱stvaye̱ha prasū̍tāḥ || 3.030.09
a̱lā̱tṛ̱ṇo va̱la i̍ndra vra̱jo goḥ pu̱rā hanto̱rbhaya̍māno̱ vyā̍ra |
su̱gānpa̱tho a̍kṛṇonni̱raje̱ gāḥ prāva̱nvāṇī̍ḥ puruhū̱taṁ dhama̍ntīḥ || 3.030.10
eko̱ dve vasu̍matī samī̱cī indra̱ ā pa̍prau pṛthi̱vīmu̱ta dyām |
u̱tāntari̍kṣāda̱bhi na̍ḥ samī̱ka i̱ṣo ra̱thīḥ sa̱yuja̍ḥ śūra̱ vājā̍n || 3.030.11
diśa̱ḥ sūryo̱ na mi̍nāti̱ pradi̍ṣṭā di̱vedi̍ve̱ harya̍śvaprasūtāḥ |
saṁ yadāna̱ḻadhva̍na̱ ādidaśvai̍rvi̱moca̍naṁ kṛṇute̱ tattva̍sya || 3.030.12
didṛ̍kṣanta u̱ṣaso̱ yāma̍nna̱ktorvi̱vasva̍tyā̱ mahi̍ ci̱tramanī̍kam |
viśve̍ jānanti mahi̱nā yadāgā̱dindra̍sya̱ karma̱ sukṛ̍tā pu̱rūṇi̍ || 3.030.13
mahi̱ jyoti̱rnihi̍taṁ va̱kṣaṇā̍svā̱mā pa̱kvaṁ ca̍rati̱ bibhra̍tī̱ gauḥ |
viśva̱ṁ svādma̱ sambhṛ̍tamu̱sriyā̍yā̱ṁ yatsī̱mindro̱ ada̍dhā̱dbhoja̍nāya || 3.030.14
indra̱ dṛhya̍ yāmako̱śā a̍bhūvanya̱jñāya̍ śikṣa gṛṇa̱te sakhi̍bhyaḥ |
du̱rmā̱yavo̍ du̱revā̱ martyā̍so niṣa̱ṅgiṇo̍ ri̱pavo̱ hantvā̍saḥ || 3.030.15
saṁ ghoṣa̍ḥ śṛṇve'va̱maira̱mitrai̍rja̱hī nye̍ṣva̱śani̱ṁ tapi̍ṣṭhām |
vṛ̱ścema̱dhastā̱dvi ru̍jā̱ saha̍sva ja̱hi rakṣo̍ maghavanra̱ndhaya̍sva || 3.030.16
udvṛ̍ha̱ rakṣa̍ḥ sa̱hamū̍lamindra vṛ̱ścā madhya̱ṁ pratyagra̍ṁ śṛṇīhi |
ā kīva̍taḥ sala̱lūka̍ṁ cakartha brahma̱dviṣe̱ tapu̍ṣiṁ he̱tima̍sya || 3.030.17
sva̱staye̍ vā̱jibhi̍śca praṇeta̱ḥ saṁ yanma̱hīriṣa̍ ā̱satsi̍ pū̱rvīḥ |
rā̱yo va̱ntāro̍ bṛha̱taḥ syā̍mā̱sme a̍stu̱ bhaga̍ indra pra̱jāvā̍n || 3.030.18
ā no̍ bhara̱ bhaga̍mindra dyu̱manta̱ṁ ni te̍ de̱ṣṇasya̍ dhīmahi prare̱ke |
ū̱rva i̍va paprathe̱ kāmo̍ a̱sme tamā pṛ̍ṇa vasupate̱ vasū̍nām || 3.030.19
i̱maṁ kāma̍ṁ mandayā̱ gobhi̱raśvai̍śca̱ndrava̍tā̱ rādha̍sā pa̱pratha̍śca |
sva̱ryavo̍ ma̱tibhi̱stubhya̱ṁ viprā̱ indrā̍ya̱ vāha̍ḥ kuśi̱kāso̍ akran || 3.030.20
ā no̍ go̱trā da̍rdṛhi gopate̱ gāḥ sama̱smabhya̍ṁ sa̱nayo̍ yantu̱ vājā̍ḥ |
di̱vakṣā̍ asi vṛṣabha sa̱tyaśu̍ṣmo̱'smabhya̱ṁ su ma̍ghavanbodhi go̱dāḥ || 3.030.21
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.030.22
śāsa̱dvahni̍rduhi̱turna̱ptya̍ṁ gādvi̱dvā ṛ̱tasya̱ dīdhi̍tiṁ sapa̱ryan |
pi̱tā yatra̍ duhi̱tuḥ seka̍mṛ̱ñjansaṁ śa̱gmye̍na̱ mana̍sā dadha̱nve || 3.031.01
na jā̱maye̱ tānvo̍ ri̱kthamā̍raikca̱kāra̱ garbha̍ṁ sani̱turni̱dhāna̍m |
yadī̍ mā̱taro̍ ja̱naya̍nta̱ vahni̍ma̱nyaḥ ka̱rtā su̱kṛto̍ra̱nya ṛ̱ndhan || 3.031.02
a̱gnirja̍jñe ju̱hvā̱3̱̍ reja̍māno ma̱haspu̱trā a̍ru̱ṣasya̍ pra̱yakṣe̍ |
ma̱hāngarbho̱ mahyā jā̱tame̍ṣāṁ ma̱hī pra̱vṛddharya̍śvasya ya̱jñaiḥ || 3.031.03
a̱bhi jaitrī̍rasacanta spṛdhā̱naṁ mahi̱ jyoti̱stama̍so̱ nira̍jānan |
taṁ jā̍na̱tīḥ pratyudā̍yannu̱ṣāsa̱ḥ pati̱rgavā̍mabhava̱deka̱ indra̍ḥ || 3.031.04
vī̱ḻau sa̱tīra̱bhi dhīrā̍ atṛndanprā̱cāhi̍nva̱nmana̍sā sa̱pta viprā̍ḥ |
viśvā̍mavindanpa̱thyā̍mṛ̱tasya̍ prajā̱nannittā nama̱sā vi̍veśa || 3.031.05
vi̱dadyadī̍ sa̱ramā̍ ru̱gṇamadre̱rmahi̱ pātha̍ḥ pū̱rvyaṁ sa̱dhrya̍kkaḥ |
agra̍ṁ nayatsu̱padyakṣa̍rāṇā̱macchā̱ rava̍ṁ pratha̱mā jā̍na̱tī gā̍t || 3.031.06
aga̍cchadu̱ vipra̍tamaḥ sakhī̱yannasū̍dayatsu̱kṛte̱ garbha̱madri̍ḥ |
sa̱sāna̱ maryo̱ yuva̍bhirmakha̱syannathā̍bhava̱daṅgi̍rāḥ sa̱dyo arca̍n || 3.031.07
sa̱taḥsa̍taḥ prati̱māna̍ṁ puro̱bhūrviśvā̍ veda̱ jani̍mā̱ hanti̱ śuṣṇa̍m |
pra ṇo̍ di̱vaḥ pa̍da̱vīrga̱vyurarca̱nsakhā̱ sakhī̍ramuñca̱nnira̍va̱dyāt || 3.031.08
ni ga̍vya̱tā mana̍sā sedura̱rkaiḥ kṛ̍ṇvā̱nāso̍ amṛta̱tvāya̍ gā̱tum |
i̱daṁ ci̱nnu sada̍na̱ṁ bhūrye̍ṣā̱ṁ yena̱ māsā̱ asi̍ṣāsannṛ̱tena̍ || 3.031.09
sa̱mpaśya̍mānā amadanna̱bhi svaṁ paya̍ḥ pra̱tnasya̱ reta̍so̱ dughā̍nāḥ |
vi roda̍sī atapa̱dghoṣa̍ eṣāṁ jā̱te ni̱ṣṭhāmada̍dhu̱rgoṣu̍ vī̱rān || 3.031.10
sa jā̱tebhi̍rvṛtra̱hā sedu̍ ha̱vyairudu̱sriyā̍ asṛja̱dindro̍ a̱rkaiḥ |
u̱rū̱cya̍smai ghṛ̱tava̱dbhara̍ntī̱ madhu̱ svādma̍ duduhe̱ jenyā̱ gauḥ || 3.031.11
pi̱tre ci̍ccakru̱ḥ sada̍na̱ṁ sama̍smai̱ mahi̱ tviṣī̍matsu̱kṛto̱ vi hi khyan |
vi̱ṣka̱bhnanta̱ḥ skambha̍nenā̱ jani̍trī̱ āsī̍nā ū̱rdhvaṁ ra̍bha̱saṁ vi mi̍nvan || 3.031.12
ma̱hī yadi̍ dhi̱ṣaṇā̍ śi̱śnathe̱ dhātsa̍dyo̱vṛdha̍ṁ vi̱bhvaṁ1̱̍ roda̍syoḥ |
giro̱ yasmi̍nnanava̱dyāḥ sa̍mī̱cīrviśvā̱ indrā̍ya̱ tavi̍ṣī̱ranu̍ttāḥ || 3.031.13
mahyā te̍ sa̱khyaṁ va̍śmi śa̱ktīrā vṛ̍tra̱ghne ni̱yuto̍ yanti pū̱rvīḥ |
mahi̍ sto̱tramava̱ āga̍nma sū̱rera̱smāka̱ṁ su ma̍ghavanbodhi go̱pāḥ || 3.031.14
mahi̱ kṣetra̍ṁ pu̱ru śca̱ndraṁ vi̍vi̱dvānāditsakhi̍bhyaśca̱ratha̱ṁ samai̍rat |
indro̱ nṛbhi̍rajana̱ddīdyā̍naḥ sā̱kaṁ sūrya̍mu̱ṣasa̍ṁ gā̱tuma̱gnim || 3.031.15
a̱paści̍de̱ṣa vi̱bhvo̱3̱̍ damū̍nā̱ḥ pra sa̱dhrīcī̍rasṛjadvi̱śvaśca̍ndrāḥ |
madhva̍ḥ punā̱nāḥ ka̱vibhi̍ḥ pa̱vitrai̱rdyubhi̍rhinvantya̱ktubhi̱rdhanu̍trīḥ || 3.031.16
anu̍ kṛ̱ṣṇe vasu̍dhitī jihāte u̱bhe sūrya̍sya ma̱ṁhanā̱ yaja̍tre |
pari̱ yatte̍ mahi̱māna̍ṁ vṛ̱jadhyai̱ sakhā̍ya indra̱ kāmyā̍ ṛji̱pyāḥ || 3.031.17
pati̍rbhava vṛtrahansū̱nṛtā̍nāṁ gi̱rāṁ vi̱śvāyu̍rvṛṣa̱bho va̍yo̱dhāḥ |
ā no̍ gahi sa̱khyebhi̍ḥ śi̱vebhi̍rma̱hānma̱hībhi̍rū̱tibhi̍ḥ sara̱ṇyan || 3.031.18
tama̍ṅgira̱svannama̍sā sapa̱ryannavya̍ṁ kṛṇomi̱ sanya̍se purā̱jām |
druho̱ vi yā̍hi bahu̱lā ade̍vī̱ḥ sva̍śca no maghavansā̱taye̍ dhāḥ || 3.031.19
miha̍ḥ pāva̱kāḥ prata̍tā abhūvansva̱sti na̍ḥ pipṛhi pā̱ramā̍sām |
indra̱ tvaṁ ra̍thi̱raḥ pā̍hi no ri̱ṣo ma̱kṣūma̍kṣū kṛṇuhi go̱jito̍ naḥ || 3.031.20
ade̍diṣṭa vṛtra̱hā gopa̍ti̱rgā a̱ntaḥ kṛ̱ṣṇā a̍ru̱ṣairdhāma̍bhirgāt |
pra sū̱nṛtā̍ di̱śamā̍na ṛ̱tena̱ dura̍śca̱ viśvā̍ avṛṇo̱dapa̱ svāḥ || 3.031.21
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.031.22
indra̱ soma̍ṁ somapate̱ pibe̱maṁ mādhya̍ṁdina̱ṁ sava̍na̱ṁ cāru̱ yatte̍ |
pra̱pruthyā̱ śipre̍ maghavannṛjīṣinvi̱mucyā̱ harī̍ i̱ha mā̍dayasva || 3.032.01
gavā̍śiraṁ ma̱nthina̍mindra śu̱kraṁ pibā̱ soma̍ṁ rari̱mā te̱ madā̍ya |
bra̱hma̱kṛtā̱ māru̍tenā ga̱ṇena̍ sa̱joṣā̍ ru̱draistṛ̱padā vṛ̍ṣasva || 3.032.02
ye te̱ śuṣma̱ṁ ye tavi̍ṣī̱mava̍rdha̱nnarca̍nta indra ma̱ruta̍sta̱ oja̍ḥ |
mādhya̍ṁdine̱ sava̍ne vajrahasta̱ pibā̍ ru̱drebhi̱ḥ saga̍ṇaḥ suśipra || 3.032.03
ta innva̍sya̱ madhu̍madvivipra̱ indra̍sya̱ śardho̍ ma̱ruto̱ ya āsa̍n |
yebhi̍rvṛ̱trasye̍ṣi̱to vi̱vedā̍ma̱rmaṇo̱ manya̍mānasya̱ marma̍ || 3.032.04
ma̱nu̱ṣvadi̍ndra̱ sava̍naṁ juṣā̱ṇaḥ pibā̱ soma̱ṁ śaśva̍te vī̱ryā̍ya |
sa ā va̍vṛtsva haryaśva ya̱jñaiḥ sa̍ra̱ṇyubhi̍ra̱po arṇā̍ sisarṣi || 3.032.05
tvama̱po yaddha̍ vṛ̱traṁ ja̍gha̱nvā atyā̍ iva̱ prāsṛ̍ja̱ḥ sarta̱vājau |
śayā̍namindra̱ cara̍tā va̱dhena̍ vavri̱vāṁsa̱ṁ pari̍ de̱vīrade̍vam || 3.032.06
yajā̍ma̱ innama̍sā vṛ̱ddhamindra̍ṁ bṛ̱hanta̍mṛ̱ṣvama̱jara̱ṁ yuvā̍nam |
yasya̍ pri̱ye ma̱matu̍rya̱jñiya̍sya̱ na roda̍sī mahi̱māna̍ṁ ma̱māte̍ || 3.032.07
indra̍sya̱ karma̱ sukṛ̍tā pu̱rūṇi̍ vra̱tāni̍ de̱vā na mi̍nanti̱ viśve̍ |
dā̱dhāra̱ yaḥ pṛ̍thi̱vīṁ dyāmu̱temāṁ ja̱jāna̱ sūrya̍mu̱ṣasa̍ṁ su̱daṁsā̍ḥ || 3.032.08
adro̍gha sa̱tyaṁ tava̱ tanma̍hi̱tvaṁ sa̱dyo yajjā̱to api̍bo ha̱ soma̍m |
na dyāva̍ indra ta̱vasa̍sta̱ ojo̱ nāhā̱ na māsā̍ḥ śa̱rado̍ varanta || 3.032.09
tvaṁ sa̱dyo a̍pibo jā̱ta i̍ndra̱ madā̍ya̱ soma̍ṁ para̱me vyo̍man |
yaddha̱ dyāvā̍pṛthi̱vī āvi̍veśī̱rathā̍bhavaḥ pū̱rvyaḥ kā̱rudhā̍yāḥ || 3.032.10
aha̱nnahi̍ṁ pari̱śayā̍na̱marṇa̍ ojā̱yamā̍naṁ tuvijāta̱ tavyā̍n |
na te̍ mahi̱tvamanu̍ bhū̱dadha̱ dyauryada̱nyayā̍ sphi̱gyā̱3̱̍ kṣāmava̍sthāḥ || 3.032.11
ya̱jño hi ta̍ indra̱ vardha̍no̱ bhūdu̱ta pri̱yaḥ su̱taso̍mo mi̱yedha̍ḥ |
ya̱jñena̍ ya̱jñama̍va ya̱jñiya̱ḥ sanya̱jñaste̱ vajra̍mahi̱hatya̍ āvat || 3.032.12
ya̱jñenendra̱mava̱sā ca̍kre a̱rvāgaina̍ṁ su̱mnāya̱ navya̍se vavṛtyām |
yaḥ stome̍bhirvāvṛ̱dhe pū̱rvyebhi̱ryo ma̍dhya̱mebhi̍ru̱ta nūta̍nebhiḥ || 3.032.13
vi̱veṣa̱ yanmā̍ dhi̱ṣaṇā̍ ja̱jāna̱ stavai̍ pu̱rā pāryā̱dindra̱mahna̍ḥ |
aṁha̍so̱ yatra̍ pī̱para̱dyathā̍ no nā̱veva̱ yānta̍mu̱bhaye̍ havante || 3.032.14
āpū̍rṇo asya ka̱laśa̱ḥ svāhā̱ sekte̍va̱ kośa̍ṁ sisice̱ piba̍dhyai |
samu̍ pri̱yā āva̍vṛtra̱nmadā̍ya pradakṣi̱ṇida̱bhi somā̍sa̱ indra̍m || 3.032.15
na tvā̍ gabhī̱raḥ pu̍ruhūta̱ sindhu̱rnādra̍ya̱ḥ pari̱ ṣanto̍ varanta |
i̱tthā sakhi̍bhya iṣi̱to yadi̱ndrā dṛ̱ḻhaṁ ci̱daru̍jo̱ gavya̍mū̱rvam || 3.032.16
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.032.17
pra parva̍tānāmuśa̱tī u̱pasthā̱daśve̍ iva̱ viṣi̍te̱ hāsa̍māne |
gāve̍va śu̱bhre mā̱tarā̍ rihā̱ṇe vipā̍ṭ chutu̱drī paya̍sā javete || 3.033.01
indre̍ṣite prasa̱vaṁ bhikṣa̍māṇe̱ acchā̍ samu̱draṁ ra̱thye̍va yāthaḥ |
sa̱mā̱rā̱ṇe ū̱rmibhi̱ḥ pinva̍māne a̱nyā vā̍ma̱nyāmapye̍ti śubhre || 3.033.02
acchā̱ sindhu̍ṁ mā̱tṛta̍māmayāsa̱ṁ vipā̍śamu̱rvīṁ su̱bhagā̍maganma |
va̱tsami̍va mā̱tarā̍ saṁrihā̱ṇe sa̍mā̱naṁ yoni̱manu̍ sa̱ṁcara̍ntī || 3.033.03
e̱nā va̱yaṁ paya̍sā̱ pinva̍mānā̱ anu̱ yoni̍ṁ de̱vakṛ̍ta̱ṁ cara̍ntīḥ |
na varta̍ve prasa̱vaḥ sarga̍taktaḥ ki̱ṁyurvipro̍ na̱dyo̍ johavīti || 3.033.04
rama̍dhvaṁ me̱ vaca̍se so̱myāya̱ ṛtā̍varī̱rupa̍ muhū̱rtamevai̍ḥ |
pra sindhu̱macchā̍ bṛha̱tī ma̍nī̱ṣāva̱syura̍hve kuśi̱kasya̍ sū̱nuḥ || 3.033.05
indro̍ a̱smā a̍rada̱dvajra̍bāhu̱rapā̍hanvṛ̱traṁ pa̍ri̱dhiṁ na̱dīnā̍m |
de̱vo̍'nayatsavi̱tā su̍pā̱ṇistasya̍ va̱yaṁ pra̍sa̱ve yā̍ma u̱rvīḥ || 3.033.06
pra̱vācya̍ṁ śaśva̱dhā vī̱ryaṁ1̱̍ tadindra̍sya̱ karma̱ yadahi̍ṁ vivṛ̱ścat |
vi vajre̍ṇa pari̱ṣado̍ jaghā̱nāya̱nnāpo'ya̍nami̱cchamā̍nāḥ || 3.033.07
e̱tadvaco̍ jarita̱rmāpi̍ mṛṣṭhā̱ ā yatte̱ ghoṣā̱nutta̍rā yu̱gāni̍ |
u̱ktheṣu̍ kāro̱ prati̍ no juṣasva̱ mā no̱ ni ka̍ḥ puruṣa̱trā nama̍ste || 3.033.08
o ṣu sva̍sāraḥ kā̱rave̍ śṛṇota ya̱yau vo̍ dū̱rādana̍sā̱ rathe̍na |
ni ṣū na̍madhva̱ṁ bhava̍tā supā̱rā a̍dhoa̱kṣāḥ si̍ndhavaḥ sro̱tyābhi̍ḥ || 3.033.09
ā te̍ kāro śṛṇavāmā̱ vacā̍ṁsi ya̱yātha̍ dū̱rādana̍sā̱ rathe̍na |
ni te̍ naṁsai pīpyā̱neva̱ yoṣā̱ maryā̍yeva ka̱nyā̍ śaśva̱cai te̍ || 3.033.10
yada̱ṅga tvā̍ bhara̱tāḥ sa̱ṁtare̍yurga̱vyangrāma̍ iṣi̱ta indra̍jūtaḥ |
arṣā̱daha̍ prasa̱vaḥ sarga̍takta̱ ā vo̍ vṛṇe suma̱tiṁ ya̱jñiyā̍nām || 3.033.11
atā̍riṣurbhara̱tā ga̱vyava̱ḥ samabha̍kta̱ vipra̍ḥ suma̱tiṁ na̱dīnā̍m |
pra pi̍nvadhvami̱ṣaya̍ntīḥ su̱rādhā̱ ā va̱kṣaṇā̍ḥ pṛ̱ṇadhva̍ṁ yā̱ta śībha̍m || 3.033.12
udva̍ ū̱rmiḥ śamyā̍ ha̱ntvāpo̱ yoktrā̍ṇi muñcata |
mādu̍ṣkṛtau̱ vye̍nasā̱ghnyau śūna̱māra̍tām || 3.033.13
indra̍ḥ pū̱rbhidāti̍ra̱ddāsa̍ma̱rkairvi̱dadva̍su̱rdaya̍māno̱ vi śatrū̍n |
brahma̍jūtasta̱nvā̍ vāvṛdhā̱no bhūri̍dātra̱ āpṛ̍ṇa̱droda̍sī u̱bhe || 3.034.01
ma̱khasya̍ te tavi̱ṣasya̱ pra jū̱timiya̍rmi̱ vāca̍ma̱mṛtā̍ya̱ bhūṣa̍n |
indra̍ kṣitī̱nāma̍si̱ mānu̍ṣīṇāṁ vi̱śāṁ daivī̍nāmu̱ta pū̍rva̱yāvā̍ || 3.034.02
indro̍ vṛ̱trama̍vṛṇo̱cchardha̍nīti̱ḥ pra mā̱yinā̍maminā̱dvarpa̍ṇītiḥ |
aha̱nvya̍ṁsamu̱śadha̱gvane̍ṣvā̱virdhenā̍ akṛṇodrā̱myāṇā̍m || 3.034.03
indra̍ḥ sva̱rṣā ja̱naya̱nnahā̍ni ji̱gāyo̱śigbhi̱ḥ pṛta̍nā abhi̱ṣṭiḥ |
prāro̍caya̱nmana̍ve ke̱tumahnā̱mavi̍nda̱jjyoti̍rbṛha̱te raṇā̍ya || 3.034.04
indra̱stujo̍ ba̱rhaṇā̱ ā vi̍veśa nṛ̱vaddadhā̍no̱ naryā̍ pu̱rūṇi̍ |
ace̍taya̱ddhiya̍ i̱mā ja̍ri̱tre premaṁ varṇa̍matiracchu̱kramā̍sām || 3.034.05
ma̱ho ma̱hāni̍ panayantya̱syendra̍sya̱ karma̱ sukṛ̍tā pu̱rūṇi̍ |
vṛ̱jane̍na vṛji̱nānsaṁ pi̍peṣa mā̱yābhi̱rdasyū̍ra̱bhibhū̍tyojāḥ || 3.034.06
yu̱dhendro̍ ma̱hnā vari̍vaścakāra de̱vebhya̱ḥ satpa̍tiścarṣaṇi̱prāḥ |
vi̱vasva̍ta̱ḥ sada̍ne asya̱ tāni̱ viprā̍ u̱kthebhi̍ḥ ka̱vayo̍ gṛṇanti || 3.034.07
sa̱trā̱sāha̱ṁ vare̍ṇyaṁ saho̱dāṁ sa̍sa̱vāṁsa̱ṁ sva̍ra̱paśca̍ de̱vīḥ |
sa̱sāna̱ yaḥ pṛ̍thi̱vīṁ dyāmu̱temāmindra̍ṁ mada̱ntyanu̱ dhīra̍ṇāsaḥ || 3.034.08
sa̱sānātyā̍ u̱ta sūrya̍ṁ sasā̱nendra̍ḥ sasāna puru̱bhoja̍sa̱ṁ gām |
hi̱ra̱ṇyaya̍mu̱ta bhoga̍ṁ sasāna ha̱tvī dasyū̱nprārya̱ṁ varṇa̍māvat || 3.034.09
indra̱ oṣa̍dhīrasano̱dahā̍ni̱ vana̱spatī̍rasanoda̱ntari̍kṣam |
bi̱bheda̍ va̱laṁ nu̍nu̱de vivā̱co'thā̍bhavaddami̱tābhikra̍tūnām || 3.034.10
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.034.11
tiṣṭhā̱ harī̱ ratha̱ ā yu̱jyamā̍nā yā̱hi vā̱yurna ni̱yuto̍ no̱ accha̍ |
pibā̱syandho̍ a̱bhisṛ̍ṣṭo a̱sme indra̱ svāhā̍ rari̱mā te̱ madā̍ya || 3.035.01
upā̍ji̱rā pu̍ruhū̱tāya̱ saptī̱ harī̱ ratha̍sya dhū̱rṣvā yu̍najmi |
dra̱vadyathā̱ sambhṛ̍taṁ vi̱śvata̍ści̱dupe̱maṁ ya̱jñamā va̍hāta̱ indra̍m || 3.035.02
upo̍ nayasva̱ vṛṣa̍ṇā tapu̱ṣpotema̍va̱ tvaṁ vṛ̍ṣabha svadhāvaḥ |
grase̍tā̱maśvā̱ vi mu̍ce̱ha śoṇā̍ di̱vedi̍ve sa̱dṛśī̍raddhi dhā̱nāḥ || 3.035.03
brahma̍ṇā te brahma̱yujā̍ yunajmi̱ harī̱ sakhā̍yā sadha̱māda̍ ā̱śū |
sthi̱raṁ ratha̍ṁ su̱khami̍ndrādhi̱tiṣṭha̍nprajā̱nanvi̱dvā upa̍ yāhi̱ soma̍m || 3.035.04
mā te̱ harī̱ vṛṣa̍ṇā vī̱tapṛ̍ṣṭhā̱ ni rī̍rama̱nyaja̍mānāso a̱nye |
a̱tyāyā̍hi̱ śaśva̍to va̱yaṁ te'ra̍ṁ su̱tebhi̍ḥ kṛṇavāma̱ somai̍ḥ || 3.035.05
tavā̱yaṁ soma̱stvamehya̱rvāṅcha̍śvatta̱maṁ su̱manā̍ a̱sya pā̍hi |
a̱sminya̱jñe ba̱rhiṣyā ni̱ṣadyā̍ dadhi̱ṣvemaṁ ja̱ṭhara̱ indu̍mindra || 3.035.06
stī̱rṇaṁ te̍ ba̱rhiḥ su̱ta i̍ndra̱ soma̍ḥ kṛ̱tā dhā̱nā atta̍ve te̱ hari̍bhyām |
tado̍kase puru̱śākā̍ya̱ vṛṣṇe̍ ma̱rutva̍te̱ tubhya̍ṁ rā̱tā ha̱vīṁṣi̍ || 3.035.07
i̱maṁ nara̱ḥ parva̍tā̱stubhya̱māpa̱ḥ sami̍ndra̱ gobhi̱rmadhu̍mantamakran |
tasyā̱gatyā̍ su̱manā̍ ṛṣva pāhi prajā̱nanvi̱dvānpa̱thyā̱3̱̍ anu̱ svāḥ || 3.035.08
yā ābha̍jo ma̱ruta̍ indra̱ some̱ ye tvāmava̍rdha̱nnabha̍vanga̱ṇaste̍ |
tebhi̍re̱taṁ sa̱joṣā̍ vāvaśā̱no̱3̱̍'gneḥ pi̍ba ji̱hvayā̱ soma̍mindra || 3.035.09
indra̱ piba̍ sva̱dhayā̍ citsu̱tasyā̱gnervā̍ pāhi ji̱hvayā̍ yajatra |
a̱dhva̱ryorvā̱ praya̍taṁ śakra̱ hastā̱ddhotu̍rvā ya̱jñaṁ ha̱viṣo̍ juṣasva || 3.035.10
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.035.11
i̱māmū̱ ṣu prabhṛ̍tiṁ sā̱taye̍ dhā̱ḥ śaśva̍cchaśvadū̱tibhi̱ryāda̍mānaḥ |
su̱tesu̍te vāvṛdhe̱ vardha̍nebhi̱ryaḥ karma̍bhirma̱hadbhi̱ḥ suśru̍to̱ bhūt || 3.036.01
indrā̍ya̱ somā̍ḥ pra̱divo̱ vidā̍nā ṛ̱bhuryebhi̱rvṛṣa̍parvā̱ vihā̍yāḥ |
pra̱ya̱myamā̍nā̱nprati̱ ṣū gṛ̍bhā̱yendra̱ piba̱ vṛṣa̍dhūtasya̱ vṛṣṇa̍ḥ || 3.036.02
pibā̱ vardha̍sva̱ tava̍ ghā su̱tāsa̱ indra̱ somā̍saḥ pratha̱mā u̱teme |
yathāpi̍baḥ pū̱rvyā i̍ndra̱ somā̍ e̱vā pā̍hi̱ panyo̍ a̱dyā navī̍yān || 3.036.03
ma̱hā ama̍tro vṛ̱jane̍ vira̱pśyu1̱̍graṁ śava̍ḥ patyate dhṛ̱ṣṇvoja̍ḥ |
nāha̍ vivyāca pṛthi̱vī ca̱naina̱ṁ yatsomā̍so̱ harya̍śva̱mama̍ndan || 3.036.04
ma̱hā u̱gro vā̍vṛdhe vī̱ryā̍ya sa̱māca̍kre vṛṣa̱bhaḥ kāvye̍na |
indro̱ bhago̍ vāja̱dā a̍sya̱ gāva̱ḥ pra jā̍yante̱ dakṣi̍ṇā asya pū̱rvīḥ || 3.036.05
pra yatsindha̍vaḥ prasa̱vaṁ yathāya̱nnāpa̍ḥ samu̱draṁ ra̱thye̍va jagmuḥ |
ata̍ści̱dindra̱ḥ sada̍so̱ varī̍yā̱nyadī̱ṁ soma̍ḥ pṛ̱ṇati̍ du̱gdho a̱ṁśuḥ || 3.036.06
sa̱mu̱dreṇa̱ sindha̍vo̱ yāda̍mānā̱ indrā̍ya̱ soma̱ṁ suṣu̍ta̱ṁ bhara̍ntaḥ |
a̱ṁśuṁ du̍hanti ha̱stino̍ bha̱ritrai̱rmadhva̍ḥ punanti̱ dhāra̍yā pa̱vitrai̍ḥ || 3.036.07
hra̱dā i̍va ku̱kṣaya̍ḥ soma̱dhānā̱ḥ samī̍ vivyāca̱ sava̍nā pu̱rūṇi̍ |
annā̱ yadindra̍ḥ pratha̱mā vyāśa̍ vṛ̱traṁ ja̍gha̱nvā a̍vṛṇīta̱ soma̍m || 3.036.08
ā tū bha̍ra̱ māki̍re̱tatpari̍ ṣṭhādvi̱dmā hi tvā̱ vasu̍pati̱ṁ vasū̍nām |
indra̱ yatte̱ māhi̍na̱ṁ datra̱mastya̱smabhya̱ṁ taddha̍ryaśva̱ pra ya̍ndhi || 3.036.09
a̱sme pra ya̍ndhi maghavannṛjīṣi̱nnindra̍ rā̱yo vi̱śvavā̍rasya̱ bhūre̍ḥ |
a̱sme śa̱taṁ śa̱rado̍ jī̱vase̍ dhā a̱sme vī̱rāñchaśva̍ta indra śiprin || 3.036.10
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.036.11
vārtra̍hatyāya̱ śava̍se pṛtanā̱ṣāhyā̍ya ca |
indra̱ tvā va̍rtayāmasi || 3.037.01
a̱rvā̱cīna̱ṁ su te̱ mana̍ u̱ta cakṣu̍ḥ śatakrato |
indra̍ kṛ̱ṇvantu̍ vā̱ghata̍ḥ || 3.037.02
nāmā̍ni te śatakrato̱ viśvā̍bhirgī̱rbhirī̍mahe |
indrā̍bhimāti̱ṣāhye̍ || 3.037.03
pu̱ru̱ṣṭu̱tasya̱ dhāma̍bhiḥ śa̱tena̍ mahayāmasi |
indra̍sya carṣaṇī̱dhṛta̍ḥ || 3.037.04
indra̍ṁ vṛ̱trāya̱ hanta̍ve puruhū̱tamupa̍ bruve |
bhare̍ṣu̱ vāja̍sātaye || 3.037.05
vāje̍ṣu sāsa̱hirbha̍va̱ tvāmī̍mahe śatakrato |
indra̍ vṛ̱trāya̱ hanta̍ve || 3.037.06
dyu̱mneṣu̍ pṛta̱nājye̍ pṛtsu̱tūrṣu̱ śrava̍ssu ca |
indra̱ sākṣvā̱bhimā̍tiṣu || 3.037.07
śu̱ṣminta̍maṁ na ū̱taye̍ dyu̱mnina̍ṁ pāhi̱ jāgṛ̍vim |
indra̱ soma̍ṁ śatakrato || 3.037.08
i̱ndri̱yāṇi̍ śatakrato̱ yā te̱ jane̍ṣu pa̱ñcasu̍ |
indra̱ tāni̍ ta̱ ā vṛ̍ṇe || 3.037.09
aga̍nnindra̱ śravo̍ bṛ̱haddyu̱mnaṁ da̍dhiṣva du̱ṣṭara̍m |
utte̱ śuṣma̍ṁ tirāmasi || 3.037.10
a̱rvā̱vato̍ na̱ ā ga̱hyatho̍ śakra parā̱vata̍ḥ |
u̱ lo̱ko yaste̍ adriva̱ indre̱ha tata̱ ā ga̍hi || 3.037.11
a̱bhi taṣṭe̍va dīdhayā manī̱ṣāmatyo̱ na vā̱jī su̱dhuro̱ jihā̍naḥ |
a̱bhi pri̱yāṇi̱ marmṛ̍śa̱tparā̍ṇi ka̱vīri̍cchāmi sa̱ṁdṛśe̍ sume̱dhāḥ || 3.038.01
i̱nota pṛ̍ccha̱ jani̍mā kavī̱nāṁ ma̍no̱dhṛta̍ḥ su̱kṛta̍stakṣata̱ dyām |
i̱mā u̍ te pra̱ṇyo̱3̱̍ vardha̍mānā̱ mano̍vātā̱ adha̱ nu dharma̍ṇi gman || 3.038.02
ni ṣī̱midatra̱ guhyā̱ dadhā̍nā u̱ta kṣa̱trāya̱ roda̍sī̱ sama̍ñjan |
saṁ mātrā̍bhirmami̱re ye̱muru̱rvī a̱ntarma̱hī samṛ̍te̱ dhāya̍se dhuḥ || 3.038.03
ā̱tiṣṭha̍nta̱ṁ pari̱ viśve̍ abhūṣa̱ñchriyo̱ vasā̍naścarati̱ svaro̍ciḥ |
ma̱hattadvṛṣṇo̱ asu̍rasya̱ nāmā vi̱śvarū̍po a̱mṛtā̍ni tasthau || 3.038.04
asū̍ta̱ pūrvo̍ vṛṣa̱bho jyāyā̍ni̱mā a̍sya śu̱rudha̍ḥ santi pū̱rvīḥ |
divo̍ napātā vi̱datha̍sya dhī̱bhiḥ kṣa̱traṁ rā̍jānā pra̱divo̍ dadhāthe || 3.038.05
trīṇi̍ rājānā vi̱dathe̍ pu̱rūṇi̱ pari̱ viśvā̍ni bhūṣatha̱ḥ sadā̍ṁsi |
apa̍śya̱matra̱ mana̍sā jaga̱nvānvra̱te ga̍ndha̱rvā api̍ vā̱yuke̍śān || 3.038.06
tadinnva̍sya vṛṣa̱bhasya̍ dhe̱norā nāma̍bhirmamire̱ sakmya̱ṁ goḥ |
a̱nyada̍nyadasu̱ryaṁ1̱̍ vasā̍nā̱ ni mā̱yino̍ mamire rū̱pama̍smin || 3.038.07
tadinnva̍sya savi̱turnaki̍rme hira̱ṇyayī̍ma̱mati̱ṁ yāmaśi̍śret |
ā su̍ṣṭu̱tī roda̍sī viśvami̱nve apī̍va̱ yoṣā̱ jani̍māni vavre || 3.038.08
yu̱vaṁ pra̱tnasya̍ sādhatho ma̱ho yaddaivī̍ sva̱stiḥ pari̍ ṇaḥ syātam |
go̱pāji̍hvasya ta̱sthuṣo̱ virū̍pā̱ viśve̍ paśyanti mā̱yina̍ḥ kṛ̱tāni̍ || 3.038.09
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.038.10
indra̍ṁ ma̱tirhṛ̱da ā va̱cyamā̱nācchā̱ pati̱ṁ stoma̍taṣṭā jigāti |
yā jāgṛ̍virvi̱dathe̍ śa̱syamā̱nendra̱ yatte̱ jāya̍te vi̱ddhi tasya̍ || 3.039.01
di̱vaści̱dā pū̱rvyā jāya̍mānā̱ vi jāgṛ̍virvi̱dathe̍ śa̱syamā̍nā |
bha̱drā vastrā̱ṇyarju̍nā̱ vasā̍nā̱ seyama̱sme sa̍na̱jā pitryā̱ dhīḥ || 3.039.02
ya̱mā ci̱datra̍ yama̱sūra̍sūta ji̱hvāyā̱ agra̱ṁ pata̱dā hyasthā̍t |
vapū̍ṁṣi jā̱tā mi̍thu̱nā sa̍cete tamo̱hanā̱ tapu̍ṣo bu̱dhna etā̍ || 3.039.03
naki̍reṣāṁ nindi̱tā martye̍ṣu̱ ye a̱smāka̍ṁ pi̱taro̱ goṣu̍ yo̱dhāḥ |
indra̍ eṣāṁ dṛṁhi̱tā māhi̍nāvā̱nudgo̱trāṇi̍ sasṛje da̱ṁsanā̍vān || 3.039.04
sakhā̍ ha̱ yatra̱ sakhi̍bhi̱rnava̍gvairabhi̱jñvā satva̍bhi̱rgā a̍nu̱gman |
sa̱tyaṁ tadindro̍ da̱śabhi̱rdaśa̍gvai̱ḥ sūrya̍ṁ viveda̱ tama̍si kṣi̱yanta̍m || 3.039.05
indro̱ madhu̱ sambhṛ̍tamu̱sriyā̍yāṁ pa̱dvadvi̍veda śa̱phava̱nname̱ goḥ |
guhā̍ hi̱taṁ guhya̍ṁ gū̱ḻhama̱psu haste̍ dadhe̱ dakṣi̍ṇe̱ dakṣi̍ṇāvān || 3.039.06
jyoti̍rvṛṇīta̱ tama̍so vijā̱nannā̱re syā̍ma duri̱tāda̱bhīke̍ |
i̱mā gira̍ḥ somapāḥ somavṛddha ju̱ṣasve̍ndra puru̱tama̍sya kā̱roḥ || 3.039.07
jyoti̍rya̱jñāya̱ roda̍sī̱ anu̍ ṣyādā̱re syā̍ma duri̱tasya̱ bhūre̍ḥ |
bhūri̍ ci̱ddhi tu̍ja̱to martya̍sya supā̱rāso̍ vasavo ba̱rhaṇā̍vat || 3.039.08
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.039.09
indra̍ tvā vṛṣa̱bhaṁ va̱yaṁ su̱te some̍ havāmahe |
sa pā̍hi̱ madhvo̱ andha̍saḥ || 3.040.01
indra̍ kratu̱vida̍ṁ su̱taṁ soma̍ṁ harya puruṣṭuta |
pibā vṛ̍ṣasva̱ tātṛ̍pim || 3.040.02
indra̱ pra ṇo̍ dhi̱tāvā̍naṁ ya̱jñaṁ viśve̍bhirde̱vebhi̍ḥ |
ti̱ra sta̍vāna viśpate || 3.040.03
indra̱ somā̍ḥ su̱tā i̱me tava̱ pra ya̍nti satpate |
kṣaya̍ṁ ca̱ndrāsa̱ inda̍vaḥ || 3.040.04
da̱dhi̱ṣvā ja̱ṭhare̍ su̱taṁ soma̍mindra̱ vare̍ṇyam |
tava̍ dyu̱kṣāsa̱ inda̍vaḥ || 3.040.05
girva̍ṇaḥ pā̱hi na̍ḥ su̱taṁ madho̱rdhārā̍bhirajyase |
indra̱ tvādā̍ta̱midyaśa̍ḥ || 3.040.06
a̱bhi dyu̱mnāni̍ va̱nina̱ indra̍ṁ sacante̱ akṣi̍tā |
pī̱tvī soma̍sya vāvṛdhe || 3.040.07
a̱rvā̱vato̍ na̱ ā ga̍hi parā̱vata̍śca vṛtrahan |
i̱mā ju̍ṣasva no̱ gira̍ḥ || 3.040.08
yada̍nta̱rā pa̍rā̱vata̍marvā̱vata̍ṁ ca hū̱yase̍ |
indre̱ha tata̱ ā ga̍hi || 3.040.09
ā tū na̍ indra ma̱drya̍gghuvā̱naḥ soma̍pītaye |
hari̍bhyāṁ yāhyadrivaḥ || 3.041.01
sa̱tto hotā̍ na ṛ̱tviya̍stisti̱re ba̱rhirā̍nu̱ṣak |
ayu̍jranprā̱taradra̍yaḥ || 3.041.02
i̱mā brahma̍ brahmavāhaḥ kri̱yanta̱ ā ba̱rhiḥ sī̍da |
vī̱hi śū̍ra puro̱ḻāśa̍m || 3.041.03
rā̱ra̱ndhi sava̍neṣu ṇa e̱ṣu stome̍ṣu vṛtrahan |
u̱ktheṣvi̍ndra girvaṇaḥ || 3.041.04
ma̱taya̍ḥ soma̱pāmu̱ruṁ ri̱hanti̱ śava̍sa̱spati̍m |
indra̍ṁ va̱tsaṁ na mā̱tara̍ḥ || 3.041.05
sa ma̍ndasvā̱ hyandha̍so̱ rādha̍se ta̱nvā̍ ma̱he |
na sto̱tāra̍ṁ ni̱de ka̍raḥ || 3.041.06
va̱yami̍ndra tvā̱yavo̍ ha̱viṣma̍nto jarāmahe |
u̱ta tvama̍sma̱yurva̍so || 3.041.07
māre a̱smadvi mu̍muco̱ hari̍priyā̱rvāṅyā̍hi |
indra̍ svadhāvo̱ matsve̱ha || 3.041.08
a̱rvāñca̍ṁ tvā su̱khe rathe̱ vaha̍tāmindra ke̱śinā̍ |
ghṛ̱tasnū̍ ba̱rhirā̱sade̍ || 3.041.09
upa̍ naḥ su̱tamā ga̍hi̱ soma̍mindra̱ gavā̍śiram |
hari̍bhyā̱ṁ yaste̍ asma̱yuḥ || 3.042.01
tami̍ndra̱ mada̱mā ga̍hi barhi̱ḥṣṭhāṁ grāva̍bhiḥ su̱tam |
ku̱vinnva̍sya tṛ̱pṇava̍ḥ || 3.042.02
indra̍mi̱tthā giro̱ mamācchā̍guriṣi̱tā i̱taḥ |
ā̱vṛte̱ soma̍pītaye || 3.042.03
indra̱ṁ soma̍sya pī̱taye̱ stomai̍ri̱ha ha̍vāmahe |
u̱kthebhi̍ḥ ku̱vidā̱gama̍t || 3.042.04
indra̱ somā̍ḥ su̱tā i̱me tānda̍dhiṣva śatakrato |
ja̱ṭhare̍ vājinīvaso || 3.042.05
vi̱dmā hi tvā̍ dhanaṁja̱yaṁ vāje̍ṣu dadhṛ̱ṣaṁ ka̍ve |
adhā̍ te su̱mnamī̍mahe || 3.042.06
i̱mami̍ndra̱ gavā̍śira̱ṁ yavā̍śiraṁ ca naḥ piba |
ā̱gatyā̱ vṛṣa̍bhiḥ su̱tam || 3.042.07
tubhyedi̍ndra̱ sva o̱kye̱3̱̍ soma̍ṁ codāmi pī̱taye̍ |
e̱ṣa rā̍rantu te hṛ̱di || 3.042.08
tvāṁ su̱tasya̍ pī̱taye̍ pra̱tnami̍ndra havāmahe |
ku̱śi̱kāso̍ ava̱syava̍ḥ || 3.042.09
ā yā̍hya̱rvāṅupa̍ vandhure̱ṣṭhāstavedanu̍ pra̱diva̍ḥ soma̱peya̍m |
pri̱yā sakhā̍yā̱ vi mu̱copa̍ ba̱rhistvāmi̱me ha̍vya̱vāho̍ havante || 3.043.01
ā yā̍hi pū̱rvīrati̍ carṣa̱ṇīrā a̱rya ā̱śiṣa̱ upa̍ no̱ hari̍bhyām |
i̱mā hi tvā̍ ma̱taya̱ḥ stoma̍taṣṭā̱ indra̱ hava̍nte sa̱khyaṁ ju̍ṣā̱ṇāḥ || 3.043.02
ā no̍ ya̱jñaṁ na̍mo̱vṛdha̍ṁ sa̱joṣā̱ indra̍ deva̱ hari̍bhiryāhi̱ tūya̍m |
a̱haṁ hi tvā̍ ma̱tibhi̱rjoha̍vīmi ghṛ̱tapra̍yāḥ sadha̱māde̱ madhū̍nām || 3.043.03
ā ca̱ tvāme̱tā vṛṣa̍ṇā̱ vahā̍to̱ harī̱ sakhā̍yā su̱dhurā̱ svaṅgā̍ |
dhā̱nāva̱dindra̱ḥ sava̍naṁ juṣā̱ṇaḥ sakhā̱ sakhyu̍ḥ śṛṇava̱dvanda̍nāni || 3.043.04
ku̱vinmā̍ go̱pāṁ kara̍se̱ jana̍sya ku̱vidrājā̍naṁ maghavannṛjīṣin |
ku̱vinma̱ ṛṣi̍ṁ papi̱vāṁsa̍ṁ su̱tasya̍ ku̱vinme̱ vasvo̍ a̱mṛta̍sya̱ śikṣā̍ḥ || 3.043.05
ā tvā̍ bṛ̱hanto̱ hara̍yo yujā̱nā a̱rvāgi̍ndra sadha̱mādo̍ vahantu |
pra ye dvi̱tā di̱va ṛ̱ñjantyātā̱ḥ susa̍mmṛṣṭāso vṛṣa̱bhasya̍ mū̱rāḥ || 3.043.06
indra̱ piba̱ vṛṣa̍dhūtasya̱ vṛṣṇa̱ ā yaṁ te̍ śye̱na u̍śa̱te ja̱bhāra̍ |
yasya̱ made̍ cyā̱vaya̍si̱ pra kṛ̱ṣṭīryasya̱ made̱ apa̍ go̱trā va̱vartha̍ || 3.043.07
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.043.08
a̱yaṁ te̍ astu harya̱taḥ soma̱ ā hari̍bhiḥ su̱taḥ |
ju̱ṣā̱ṇa i̍ndra̱ hari̍bhirna̱ ā ga̱hyā ti̍ṣṭha̱ hari̍ta̱ṁ ratha̍m || 3.044.01
ha̱ryannu̱ṣasa̍marcaya̱ḥ sūrya̍ṁ ha̱ryanna̍rocayaḥ |
vi̱dvāści̍ki̱tvānha̍ryaśva vardhasa̱ indra̱ viśvā̍ a̱bhi śriya̍ḥ || 3.044.02
dyāmindro̱ hari̍dhāyasaṁ pṛthi̱vīṁ hari̍varpasam |
adhā̍rayaddha̱rito̱rbhūri̱ bhoja̍na̱ṁ yayo̍ra̱ntarhari̱ścara̍t || 3.044.03
ja̱jñā̱no hari̍to̱ vṛṣā̱ viśva̱mā bhā̍ti roca̱nam |
harya̍śvo̱ hari̍taṁ dhatta̱ āyu̍dha̱mā vajra̍ṁ bā̱hvorhari̍m || 3.044.04
indro̍ ha̱ryanta̱marju̍na̱ṁ vajra̍ṁ śu̱kraira̱bhīvṛ̍tam |
apā̍vṛṇo̱ddhari̍bhi̱radri̍bhiḥ su̱tamudgā hari̍bhirājata || 3.044.05
ā ma̱ndrairi̍ndra̱ hari̍bhiryā̱hi ma̱yūra̍romabhiḥ |
mā tvā̱ ke ci̱nni ya̍ma̱nviṁ na pā̱śino'ti̱ dhanve̍va̱ tā i̍hi || 3.045.01
vṛ̱tra̱khā̱do va̍laṁru̱jaḥ pu̱rāṁ da̱rmo a̱pāma̱jaḥ |
sthātā̱ ratha̍sya̱ haryo̍rabhisva̱ra indro̍ dṛ̱ḻhā ci̍dāru̱jaḥ || 3.045.02
ga̱mbhī̱rā u̍da̱dhīri̍va̱ kratu̍ṁ puṣyasi̱ gā i̍va |
pra su̍go̱pā yava̍saṁ dhe̱navo̍ yathā hra̱daṁ ku̱lyā i̍vāśata || 3.045.03
ā na̱stuja̍ṁ ra̱yiṁ bha̱rāṁśa̱ṁ na pra̍tijāna̱te |
vṛ̱kṣaṁ pa̱kvaṁ phala̍ma̱ṅkīva̍ dhūnu̱hīndra̍ sa̱mpāra̍ṇa̱ṁ vasu̍ || 3.045.04
sva̱yuri̍ndra sva̱rāḻa̍si̱ smaddi̍ṣṭi̱ḥ svaya̍śastaraḥ |
sa vā̍vṛdhā̱na oja̍sā puruṣṭuta̱ bhavā̍ naḥ su̱śrava̍stamaḥ || 3.045.05
yu̱dhmasya̍ te vṛṣa̱bhasya̍ sva̱rāja̍ u̱grasya̱ yūna̱ḥ sthavi̍rasya̱ ghṛṣve̍ḥ |
ajū̍ryato va̱jriṇo̍ vī̱ryā̱3̱̍ṇīndra̍ śru̱tasya̍ maha̱to ma̱hāni̍ || 3.046.01
ma̱hā a̍si mahiṣa̱ vṛṣṇye̍bhirdhana̱spṛdu̍gra̱ saha̍māno a̱nyān |
eko̱ viśva̍sya̱ bhuva̍nasya̱ rājā̱ sa yo̱dhayā̍ ca kṣa̱yayā̍ ca̱ janā̍n || 3.046.02
pra mātrā̍bhī ririce̱ roca̍māna̱ḥ pra de̱vebhi̍rvi̱śvato̱ apra̍tītaḥ |
pra ma̱jmanā̍ di̱va indra̍ḥ pṛthi̱vyāḥ prororma̱ho a̱ntari̍kṣādṛjī̱ṣī || 3.046.03
u̱ruṁ ga̍bhī̱raṁ ja̱nuṣā̱bhyu1̱̍graṁ vi̱śvavya̍casamava̱taṁ ma̍tī̱nām |
indra̱ṁ somā̍saḥ pra̱divi̍ su̱tāsa̍ḥ samu̱draṁ na sra̱vata̱ ā vi̍śanti || 3.046.04
yaṁ soma̍mindra pṛthi̱vīdyāvā̱ garbha̱ṁ na mā̱tā bi̍bhṛ̱tastvā̱yā |
taṁ te̍ hinvanti̱ tamu̍ te mṛjantyadhva̱ryavo̍ vṛṣabha̱ pāta̱vā u̍ || 3.046.05
ma̱rutvā̍ indra vṛṣa̱bho raṇā̍ya̱ pibā̱ soma̍manuṣva̱dhaṁ madā̍ya |
ā si̍ñcasva ja̱ṭhare̱ madhva̍ ū̱rmiṁ tvaṁ rājā̍si pra̱diva̍ḥ su̱tānā̍m || 3.047.01
sa̱joṣā̍ indra̱ saga̍ṇo ma̱rudbhi̱ḥ soma̍ṁ piba vṛtra̱hā śū̍ra vi̱dvān |
ja̱hi śatrū̱rapa̱ mṛdho̍ nuda̱svāthābha̍yaṁ kṛṇuhi vi̱śvato̍ naḥ || 3.047.02
u̱ta ṛ̱tubhi̍rṛtupāḥ pāhi̱ soma̱mindra̍ de̱vebhi̱ḥ sakhi̍bhiḥ su̱taṁ na̍ḥ |
yā ābha̍jo ma̱ruto̱ ye tvānvaha̍nvṛ̱tramada̍dhu̱stubhya̱moja̍ḥ || 3.047.03
ye tvā̍hi̱hatye̍ maghava̱nnava̍rdha̱nye śā̍mba̱re ha̍rivo̱ ye gavi̍ṣṭau |
ye tvā̍ nū̱nama̍nu̱mada̍nti̱ viprā̱ḥ pibe̍ndra̱ soma̱ṁ saga̍ṇo ma̱rudbhi̍ḥ || 3.047.04
ma̱rutva̍ntaṁ vṛṣa̱bhaṁ vā̍vṛdhā̱namaka̍vāriṁ di̱vyaṁ śā̱samindra̍m |
vi̱śvā̱sāha̱mava̍se̱ nūta̍nāyo̱graṁ sa̍ho̱dāmi̱ha taṁ hu̍vema || 3.047.05
sa̱dyo ha̍ jā̱to vṛ̍ṣa̱bhaḥ ka̱nīna̱ḥ prabha̍rtumāva̱dandha̍saḥ su̱tasya̍ |
sā̱dhoḥ pi̍ba pratikā̱maṁ yathā̍ te̱ rasā̍śiraḥ pratha̱maṁ so̱myasya̍ || 3.048.01
yajjāya̍thā̱stadaha̍rasya̱ kāme̱ṁ'śoḥ pī̱yūṣa̍mapibo giri̱ṣṭhām |
taṁ te̍ mā̱tā pari̱ yoṣā̱ jani̍trī ma̱haḥ pi̱turdama̱ āsi̍ñca̱dagre̍ || 3.048.02
u̱pa̱sthāya̍ mā̱tara̱manna̍maiṭṭa ti̱gmama̍paśyada̱bhi soma̱mūdha̍ḥ |
pra̱yā̱vaya̍nnacara̱dgṛtso̍ a̱nyānma̱hāni̍ cakre puru̱dhapra̍tīkaḥ || 3.048.03
u̱grastu̍rā̱ṣāḻa̱bhibhū̍tyojā yathāva̱śaṁ ta̱nva̍ṁ cakra e̱ṣaḥ |
tvaṣṭā̍ra̱mindro̍ ja̱nuṣā̍bhi̱bhūyā̱muṣyā̱ soma̍mapibacca̱mūṣu̍ || 3.048.04
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.048.05
śaṁsā̍ ma̱hāmindra̱ṁ yasmi̱nviśvā̱ ā kṛ̱ṣṭaya̍ḥ soma̱pāḥ kāma̱mavya̍n |
yaṁ su̱kratu̍ṁ dhi̱ṣaṇe̍ vibhvata̱ṣṭaṁ gha̱naṁ vṛ̱trāṇā̍ṁ ja̱naya̍nta de̱vāḥ || 3.049.01
yaṁ nu naki̱ḥ pṛta̍nāsu sva̱rāja̍ṁ dvi̱tā tara̍ti̱ nṛta̍maṁ hari̱ṣṭhām |
i̱nata̍ma̱ḥ satva̍bhi̱ryo ha̍ śū̱ṣaiḥ pṛ̍thu̱jrayā̍ aminā̱dāyu̱rdasyo̍ḥ || 3.049.02
sa̱hāvā̍ pṛ̱tsu ta̱raṇi̱rnārvā̍ vyāna̱śī roda̍sī me̱hanā̍vān |
bhago̱ na kā̱re havyo̍ matī̱nāṁ pi̱teva̱ cāru̍ḥ su̱havo̍ vayo̱dhāḥ || 3.049.03
dha̱rtā di̱vo raja̍saspṛ̱ṣṭa ū̱rdhvo ratho̱ na vā̱yurvasu̍bhirni̱yutvā̍n |
kṣa̱pāṁ va̱stā ja̍ni̱tā sūrya̍sya̱ vibha̍ktā bhā̱gaṁ dhi̱ṣaṇe̍va̱ vāja̍m || 3.049.04
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.049.05
indra̱ḥ svāhā̍ pibatu̱ yasya̱ soma̍ ā̱gatyā̱ tumro̍ vṛṣa̱bho ma̱rutvā̍n |
oru̱vyacā̍ḥ pṛṇatāme̱bhirannai̱rāsya̍ ha̱vista̱nva1̱̍ḥ kāma̍mṛdhyāḥ || 3.050.01
ā te̍ sapa̱ryū ja̱vase̍ yunajmi̱ yayo̱ranu̍ pra̱diva̍ḥ śru̱ṣṭimāva̍ḥ |
i̱ha tvā̍ dheyu̱rhara̍yaḥ suśipra̱ pibā̱ tva1̱̍sya suṣu̍tasya̱ cāro̍ḥ || 3.050.02
gobhi̍rmimi̱kṣuṁ da̍dhire supā̱ramindra̱ṁ jyaiṣṭhyā̍ya̱ dhāya̍se gṛṇā̱nāḥ |
ma̱ndā̱naḥ soma̍ṁ papi̱vā ṛ̍jīṣi̱nsama̱smabhya̍ṁ puru̱dhā gā i̍ṣaṇya || 3.050.03
i̱maṁ kāma̍ṁ mandayā̱ gobhi̱raśvai̍śca̱ndrava̍tā̱ rādha̍sā pa̱pratha̍śca |
sva̱ryavo̍ ma̱tibhi̱stubhya̱ṁ viprā̱ indrā̍ya̱ vāha̍ḥ kuśi̱kāso̍ akran || 3.050.04
śu̱naṁ hu̍vema ma̱ghavā̍na̱mindra̍ma̱sminbhare̱ nṛta̍ma̱ṁ vāja̍sātau |
śṛ̱ṇvanta̍mu̱gramū̱taye̍ sa̱matsu̱ ghnanta̍ṁ vṛ̱trāṇi̍ sa̱ṁjita̱ṁ dhanā̍nām || 3.050.05
ca̱rṣa̱ṇī̱dhṛta̍ṁ ma̱ghavā̍namu̱kthya1̱̍mindra̱ṁ giro̍ bṛha̱tīra̱bhya̍nūṣata |
vā̱vṛ̱dhā̱naṁ pu̍ruhū̱taṁ su̍vṛ̱ktibhi̱rama̍rtya̱ṁ jara̍māṇaṁ di̱vedi̍ve || 3.051.01
śa̱takra̍tumarṇa̱vaṁ śā̱kina̱ṁ nara̱ṁ giro̍ ma̱ indra̱mupa̍ yanti vi̱śvata̍ḥ |
vā̱ja̱sani̍ṁ pū̱rbhida̱ṁ tūrṇi̍ma̱ptura̍ṁ dhāma̱sāca̍mabhi̱ṣāca̍ṁ sva̱rvida̍m || 3.051.02
ā̱ka̱re vaso̍rjari̱tā pa̍nasyate'ne̱hasa̱ḥ stubha̱ indro̍ duvasyati |
vi̱vasva̍ta̱ḥ sada̍na̱ ā hi pi̍pri̱ye sa̍trā̱sāha̍mabhimāti̱hana̍ṁ stuhi || 3.051.03
nṛ̱ṇāmu̍ tvā̱ nṛta̍maṁ gī̱rbhiru̱kthaira̱bhi pra vī̱rama̍rcatā sa̱bādha̍ḥ |
saṁ saha̍se purumā̱yo ji̍hīte̱ namo̍ asya pra̱diva̱ eka̍ īśe || 3.051.04
pū̱rvīra̍sya ni̱ṣṣidho̱ martye̍ṣu pu̱rū vasū̍ni pṛthi̱vī bi̍bharti |
indrā̍ya̱ dyāva̱ oṣa̍dhīru̱tāpo̍ ra̱yiṁ ra̍kṣanti jī̱rayo̱ vanā̍ni || 3.051.05
tubhya̱ṁ brahmā̍ṇi̱ gira̍ indra̱ tubhya̍ṁ sa̱trā da̍dhire harivo ju̱ṣasva̍ |
bo̱dhyā̱3̱̍pirava̍so̱ nūta̍nasya̱ sakhe̍ vaso jari̱tṛbhyo̱ vayo̍ dhāḥ || 3.051.06
indra̍ marutva i̱ha pā̍hi̱ soma̱ṁ yathā̍ śāryā̱te api̍baḥ su̱tasya̍ |
tava̱ praṇī̍tī̱ tava̍ śūra̱ śarma̱nnā vi̍vāsanti ka̱vaya̍ḥ suya̱jñāḥ || 3.051.07
sa vā̍vaśā̱na i̱ha pā̍hi̱ soma̍ṁ ma̱rudbhi̍rindra̱ sakhi̍bhiḥ su̱taṁ na̍ḥ |
jā̱taṁ yattvā̱ pari̍ de̱vā abhū̍ṣanma̱he bharā̍ya puruhūta̱ viśve̍ || 3.051.08
a̱ptūrye̍ maruta ā̱pire̱ṣo'ma̍nda̱nnindra̱manu̱ dāti̍vārāḥ |
tebhi̍ḥ sā̱kaṁ pi̍batu vṛtrakhā̱daḥ su̱taṁ soma̍ṁ dā̱śuṣa̱ḥ sve sa̱dhasthe̍ || 3.051.09
i̱daṁ hyanvoja̍sā su̱taṁ rā̍dhānāṁ pate |
pibā̱ tva1̱̍sya gi̍rvaṇaḥ || 3.051.10
yaste̱ anu̍ sva̱dhāmasa̍tsu̱te ni ya̍ccha ta̱nva̍m |
sa tvā̍ mamattu so̱myam || 3.051.11
pra te̍ aśnotu ku̱kṣyoḥ prendra̱ brahma̍ṇā̱ śira̍ḥ |
pra bā̱hū śū̍ra̱ rādha̍se || 3.051.12
dhā̱nāva̍ntaṁ kara̱mbhiṇa̍mapū̱pava̍ntamu̱kthina̍m |
indra̍ prā̱tarju̍ṣasva naḥ || 3.052.01
pu̱ro̱ḻāśa̍ṁ paca̱tya̍ṁ ju̱ṣasve̱ndrā gu̍rasva ca |
tubhya̍ṁ ha̱vyāni̍ sisrate || 3.052.02
pu̱ro̱ḻāśa̍ṁ ca no̱ ghaso̍ jo̱ṣayā̍se̱ gira̍śca naḥ |
va̱dhū̱yuri̍va̱ yoṣa̍ṇām || 3.052.03
pu̱ro̱ḻāśa̍ṁ sanaśruta prātaḥsā̱ve ju̍ṣasva naḥ |
indra̱ kratu̱rhi te̍ bṛ̱han || 3.052.04
mādhya̍ṁdinasya̱ sava̍nasya dhā̱nāḥ pu̍ro̱ḻāśa̍mindra kṛṣve̱ha cāru̍m |
pra yatsto̱tā ja̍ri̱tā tūrṇya̍rtho vṛṣā̱yamā̍ṇa̱ upa̍ gī̱rbhirīṭṭe̍ || 3.052.05
tṛ̱tīye̍ dhā̱nāḥ sava̍ne puruṣṭuta puro̱ḻāśa̱māhu̍taṁ māmahasva naḥ |
ṛ̱bhu̱manta̱ṁ vāja̍vantaṁ tvā kave̱ praya̍svanta̱ upa̍ śikṣema dhī̱tibhi̍ḥ || 3.052.06
pū̱ṣa̱ṇvate̍ te cakṛmā kara̱mbhaṁ hari̍vate̱ harya̍śvāya dhā̱nāḥ |
a̱pū̱pama̍ddhi̱ saga̍ṇo ma̱rudbhi̱ḥ soma̍ṁ piba vṛtra̱hā śū̍ra vi̱dvān || 3.052.07
prati̍ dhā̱nā bha̍rata̱ tūya̍masmai puro̱ḻāśa̍ṁ vī̱rata̍māya nṛ̱ṇām |
di̱vedi̍ve sa̱dṛśī̍rindra̱ tubhya̱ṁ vardha̍ntu tvā soma̱peyā̍ya dhṛṣṇo || 3.052.08
indrā̍parvatā bṛha̱tā rathe̍na vā̱mīriṣa̱ ā va̍hataṁ su̱vīrā̍ḥ |
vī̱taṁ ha̱vyānya̍dhva̱reṣu̍ devā̱ vardhe̍thāṁ gī̱rbhiriḻa̍yā̱ mada̍ntā || 3.053.01
tiṣṭhā̱ su ka̍ṁ maghava̱nmā parā̍ gā̱ḥ soma̍sya̱ nu tvā̱ suṣu̍tasya yakṣi |
pi̱turna pu̱traḥ sica̱mā ra̍bhe ta̱ indra̱ svādi̍ṣṭhayā gi̱rā śa̍cīvaḥ || 3.053.02
śaṁsā̍vādhvaryo̱ prati̍ me gṛṇī̱hīndrā̍ya̱ vāha̍ḥ kṛṇavāva̱ juṣṭa̍m |
edaṁ ba̱rhiryaja̍mānasya sī̱dāthā̍ ca bhūdu̱kthamindrā̍ya śa̱stam || 3.053.03
jā̱yedasta̍ṁ maghava̱nsedu̱ yoni̱stadittvā̍ yu̱ktā hara̍yo vahantu |
ya̱dā ka̱dā ca̍ su̱navā̍ma̱ soma̍ma̱gniṣṭvā̍ dū̱to dha̍nvā̱tyaccha̍ || 3.053.04
parā̍ yāhi maghava̱nnā ca̍ yā̱hīndra̍ bhrātarubha̱yatrā̍ te̱ artha̍m |
yatrā̱ ratha̍sya bṛha̱to ni̱dhāna̍ṁ vi̱moca̍naṁ vā̱jino̱ rāsa̍bhasya || 3.053.05
apā̱ḥ soma̱masta̍mindra̱ pra yā̍hi kalyā̱ṇīrjā̱yā su̱raṇa̍ṁ gṛ̱he te̍ |
yatrā̱ ratha̍sya bṛha̱to ni̱dhāna̍ṁ vi̱moca̍naṁ vā̱jino̱ dakṣi̍ṇāvat || 3.053.06
i̱me bho̱jā aṅgi̍raso̱ virū̍pā di̱vaspu̱trāso̱ asu̍rasya vī̱rāḥ |
vi̱śvāmi̍trāya̱ dada̍to ma̱ghāni̍ sahasrasā̱ve pra ti̍ranta̱ āyu̍ḥ || 3.053.07
rū̱paṁrū̍paṁ ma̱ghavā̍ bobhavīti mā̱yāḥ kṛ̍ṇvā̱nasta̱nvaṁ1̱̍ pari̱ svām |
triryaddi̱vaḥ pari̍ muhū̱rtamāgā̱tsvairmantrai̱ranṛ̍tupā ṛ̱tāvā̍ || 3.053.08
ma̱hā ṛṣi̍rdeva̱jā de̱vajū̱to'sta̍bhnā̱tsindhu̍marṇa̱vaṁ nṛ̱cakṣā̍ḥ |
vi̱śvāmi̍tro̱ yadava̍hatsu̱dāsa̱mapri̍yāyata kuśi̱kebhi̱rindra̍ḥ || 3.053.09
ha̱ṁsā i̍va kṛṇutha̱ śloka̱madri̍bhi̱rmada̍nto gī̱rbhira̍dhva̱re su̱te sacā̍ |
de̱vebhi̍rviprā ṛṣayo nṛcakṣaso̱ vi pi̍badhvaṁ kuśikāḥ so̱myaṁ madhu̍ || 3.053.10
upa̱ preta̍ kuśikāśce̱taya̍dhva̱maśva̍ṁ rā̱ye pra mu̍ñcatā su̱dāsa̍ḥ |
rājā̍ vṛ̱traṁ ja̍ṅghana̱tprāgapā̱guda̱gathā̍ yajāte̱ vara̱ ā pṛ̍thi̱vyāḥ || 3.053.11
ya i̱me roda̍sī u̱bhe a̱hamindra̱matu̍ṣṭavam |
vi̱śvāmi̍trasya rakṣati̱ brahme̱daṁ bhāra̍ta̱ṁ jana̍m || 3.053.12
vi̱śvāmi̍trā arāsata̱ brahmendrā̍ya va̱jriṇe̍ |
kara̱dinna̍ḥ su̱rādha̍saḥ || 3.053.13
kiṁ te̍ kṛṇvanti̱ kīka̍ṭeṣu̱ gāvo̱ nāśira̍ṁ du̱hre na ta̍panti gha̱rmam |
ā no̍ bhara̱ prama̍gandasya̱ vedo̍ naicāśā̱khaṁ ma̍ghavanrandhayā naḥ || 3.053.14
sa̱sa̱rpa̱rīrama̍ti̱ṁ bādha̍mānā bṛ̱hanmi̍māya ja̱mada̍gnidattā |
ā sūrya̍sya duhi̱tā ta̍tāna̱ śravo̍ de̱veṣva̱mṛta̍maju̱ryam || 3.053.15
sa̱sa̱rpa̱rīra̍bhara̱ttūya̍me̱bhyo'dhi̱ śrava̱ḥ pāñca̍janyāsu kṛ̱ṣṭiṣu̍ |
sā pa̱kṣyā̱3̱̍ navya̱māyu̱rdadhā̍nā̱ yāṁ me̍ palastijamada̱gnayo̍ da̱duḥ || 3.053.16
sthi̱rau gāvau̍ bhavatāṁ vī̱ḻurakṣo̱ meṣā vi va̍rhi̱ mā yu̱gaṁ vi śā̍ri |
indra̍ḥ pāta̱lye̍ dadatā̱ṁ śarī̍to̱rari̍ṣṭaneme a̱bhi na̍ḥ sacasva || 3.053.17
bala̍ṁ dhehi ta̱nūṣu̍ no̱ bala̍mindrāna̱ḻutsu̍ naḥ |
bala̍ṁ to̱kāya̱ tana̍yāya jī̱vase̱ tvaṁ hi ba̍la̱dā asi̍ || 3.053.18
a̱bhi vya̍yasva khadi̱rasya̱ sāra̱mojo̍ dhehi spanda̱ne śi̱ṁśapā̍yām |
akṣa̍ vīḻo vīḻita vī̱ḻaya̍sva̱ mā yāmā̍da̱smādava̍ jīhipo naḥ || 3.053.19
a̱yama̱smānvana̱spati̱rmā ca̱ hā mā ca̍ rīriṣat |
sva̱styā gṛ̱hebhya̱ āva̱sā ā vi̱moca̍nāt || 3.053.20
indro̱tibhi̍rbahu̱lābhi̍rno a̱dya yā̍cchre̱ṣṭhābhi̍rmaghavañchūra jinva |
yo no̱ dveṣṭyadha̍ra̱ḥ saspa̍dīṣṭa̱ yamu̍ dvi̱ṣmastamu̍ prā̱ṇo ja̍hātu || 3.053.21
pa̱ra̱śuṁ ci̱dvi ta̍pati śimba̱laṁ ci̱dvi vṛ̍ścati |
u̱khā ci̍dindra̱ yeṣa̍ntī̱ praya̍stā̱ phena̍masyati || 3.053.22
na sāya̍kasya cikite janāso lo̱dhaṁ na̍yanti̱ paśu̱ manya̍mānāḥ |
nāvā̍jinaṁ vā̱jinā̍ hāsayanti̱ na ga̍rda̱bhaṁ pu̱ro aśvā̍nnayanti || 3.053.23
i̱ma i̍ndra bhara̱tasya̍ pu̱trā a̍papi̱tvaṁ ci̍kitu̱rna pra̍pi̱tvam |
hi̱nvantyaśva̱mara̍ṇa̱ṁ na nitya̱ṁ jyā̍vāja̱ṁ pari̍ ṇayantyā̱jau || 3.053.24
i̱maṁ ma̱he vi̍da̱thyā̍ya śū̱ṣaṁ śaśva̱tkṛtva̱ īḍyā̍ya̱ pra ja̍bhruḥ |
śṛ̱ṇotu̍ no̱ damye̍bhi̱ranī̍kaiḥ śṛ̱ṇotva̱gnirdi̱vyairaja̍sraḥ || 3.054.01
mahi̍ ma̱he di̱ve a̍rcā pṛthi̱vyai kāmo̍ ma i̱cchañca̍rati prajā̱nan |
yayo̍rha̱ stome̍ vi̱dathe̍ṣu de̱vāḥ sa̍pa̱ryavo̍ mā̱daya̍nte̱ sacā̱yoḥ || 3.054.02
yu̱vorṛ̱taṁ ro̍dasī sa̱tyama̍stu ma̱he ṣu ṇa̍ḥ suvi̱tāya̱ pra bhū̍tam |
i̱daṁ di̱ve namo̍ agne pṛthi̱vyai sa̍pa̱ryāmi̱ praya̍sā̱ yāmi̱ ratna̍m || 3.054.03
u̱to hi vā̍ṁ pū̱rvyā ā̍vivi̱dra ṛtā̍varī rodasī satya̱vāca̍ḥ |
nara̍ścidvāṁ sami̱the śūra̍sātau vavandi̱re pṛ̍thivi̱ vevi̍dānāḥ || 3.054.04
ko a̱ddhā ve̍da̱ ka i̱ha pra vo̍cadde̱vā acchā̍ pa̱thyā̱3̱̍ kā same̍ti |
dadṛ̍śra eṣāmava̱mā sadā̍ṁsi̱ pare̍ṣu̱ yā guhye̍ṣu vra̱teṣu̍ || 3.054.05
ka̱virnṛ̱cakṣā̍ a̱bhi ṣī̍macaṣṭa ṛ̱tasya̱ yonā̱ vighṛ̍te̱ mada̍ntī |
nānā̍ cakrāte̱ sada̍na̱ṁ yathā̱ veḥ sa̍mā̱nena̱ kratu̍nā saṁvidā̱ne || 3.054.06
sa̱mā̱nyā viyu̍te dū̱rea̍nte dhru̱ve pa̱de ta̍sthaturjāga̱rūke̍ |
u̱ta svasā̍rā yuva̱tī bhava̍ntī̱ ādu̍ bruvāte mithu̱nāni̱ nāma̍ || 3.054.07
viśvede̱te jani̍mā̱ saṁ vi̍vikto ma̱ho de̱vānbibhra̍tī̱ na vya̍thete |
eja̍ddhru̱vaṁ pa̍tyate̱ viśva̱meka̱ṁ cara̍tpata̱tri viṣu̍ṇa̱ṁ vi jā̱tam || 3.054.08
sanā̍ purā̱ṇamadhye̍myā̱rānma̱haḥ pi̱turja̍ni̱turjā̱mi tanna̍ḥ |
de̱vāso̱ yatra̍ pani̱tāra̱ evai̍ru̱rau pa̱thi vyu̍te ta̱sthura̱ntaḥ || 3.054.09
i̱maṁ stoma̍ṁ rodasī̱ pra bra̍vīmyṛdū̱darā̍ḥ śṛṇavannagniji̱hvāḥ |
mi̱traḥ sa̱mrājo̱ varu̍ṇo̱ yuvā̍na ādi̱tyāsa̍ḥ ka̱vaya̍ḥ paprathā̱nāḥ || 3.054.10
hira̍ṇyapāṇiḥ savi̱tā su̍ji̱hvastrirā di̱vo vi̱dathe̱ patya̍mānaḥ |
de̱veṣu̍ ca savita̱ḥ śloka̱maśre̱rāda̱smabhya̱mā su̍va sa̱rvatā̍tim || 3.054.11
su̱kṛtsu̍pā̱ṇiḥ svavā̍ ṛ̱tāvā̍ de̱vastvaṣṭāva̍se̱ tāni̍ no dhāt |
pū̱ṣa̱ṇvanta̍ ṛbhavo mādayadhvamū̱rdhvagrā̍vāṇo adhva̱rama̍taṣṭa || 3.054.12
vi̱dyudra̍thā ma̱ruta̍ ṛṣṭi̱manto̍ di̱vo maryā̍ ṛ̱tajā̍tā a̱yāsa̍ḥ |
sara̍svatī śṛṇavanya̱jñiyā̍so̱ dhātā̍ ra̱yiṁ sa̱havī̍raṁ turāsaḥ || 3.054.13
viṣṇu̱ṁ stomā̍saḥ puruda̱smama̱rkā bhaga̍syeva kā̱riṇo̱ yāma̍ni gman |
u̱ru̱kra̱maḥ ka̍ku̱ho yasya̍ pū̱rvīrna ma̍rdhanti yuva̱tayo̱ jani̍trīḥ || 3.054.14
indro̱ viśvai̍rvī̱ryai̱3̱̍ḥ patya̍māna u̱bhe ā pa̍prau̱ roda̍sī mahi̱tvā |
pu̱ra̱ṁda̱ro vṛ̍tra̱hā dhṛ̱ṣṇuṣe̍ṇaḥ sa̱ṁgṛbhyā̍ na̱ ā bha̍rā̱ bhūri̍ pa̱śvaḥ || 3.054.15
nāsa̍tyā me pi̱tarā̍ bandhu̱pṛcchā̍ sajā̱tya̍ma̱śvino̱ścāru̱ nāma̍ |
yu̱vaṁ hi stho ra̍yi̱dau no̍ rayī̱ṇāṁ dā̱traṁ ra̍kṣethe̱ aka̍vai̱rada̍bdhā || 3.054.16
ma̱hattadva̍ḥ kavaya̱ścāru̱ nāma̱ yaddha̍ devā̱ bhava̍tha̱ viśva̱ indre̍ |
sakha̍ ṛ̱bhubhi̍ḥ puruhūta pri̱yebhi̍ri̱māṁ dhiya̍ṁ sā̱taye̍ takṣatā naḥ || 3.054.17
a̱rya̱mā ṇo̱ adi̍tirya̱jñiyā̱so'da̍bdhāni̱ varu̍ṇasya vra̱tāni̍ |
yu̱yota̍ no anapa̱tyāni̱ ganto̍ḥ pra̱jāvā̍nnaḥ paśu̱mā a̍stu gā̱tuḥ || 3.054.18
de̱vānā̍ṁ dū̱taḥ pu̍ru̱dha prasū̱to'nā̍gānno vocatu sa̱rvatā̍tā |
śṛ̱ṇotu̍ naḥ pṛthi̱vī dyauru̱tāpa̱ḥ sūryo̱ nakṣa̍trairu̱rva1̱̍ntari̍kṣam || 3.054.19
śṛ̱ṇvantu̍ no̱ vṛṣa̍ṇa̱ḥ parva̍tāso dhru̱vakṣe̍māsa̱ iḻa̍yā̱ mada̍ntaḥ |
ā̱di̱tyairno̱ adi̍tiḥ śṛṇotu̱ yaccha̍ntu no ma̱ruta̱ḥ śarma̍ bha̱dram || 3.054.20
sadā̍ su̱gaḥ pi̍tu̱mā a̍stu̱ panthā̱ madhvā̍ devā̱ oṣa̍dhī̱ḥ saṁ pi̍pṛkta |
bhago̍ me agne sa̱khye na mṛ̍dhyā̱ udrā̱yo a̍śyā̱ṁ sada̍naṁ puru̱kṣoḥ || 3.054.21
svada̍sva ha̱vyā samiṣo̍ didīhyasma̱drya1̱̍ksaṁ mi̍mīhi̱ śravā̍ṁsi |
viśvā̍ agne pṛ̱tsu tāñje̍ṣi̱ śatrū̱nahā̱ viśvā̍ su̱manā̍ dīdihī naḥ || 3.054.22
u̱ṣasa̱ḥ pūrvā̱ adha̱ yadvyū̱ṣurma̱hadvi ja̍jñe a̱kṣara̍ṁ pa̱de goḥ |
vra̱tā de̱vānā̱mupa̱ nu pra̱bhūṣa̍nma̱hadde̱vānā̍masura̱tvameka̍m || 3.055.01
mo ṣū ṇo̱ atra̍ juhuranta de̱vā mā pūrve̍ agne pi̱tara̍ḥ pada̱jñāḥ |
pu̱rā̱ṇyoḥ sadma̍noḥ ke̱tura̱ntarma̱hadde̱vānā̍masura̱tvameka̍m || 3.055.02
vi me̍ puru̱trā pa̍tayanti̱ kāmā̱ḥ śamyacchā̍ dīdye pū̱rvyāṇi̍ |
sami̍ddhe a̱gnāvṛ̱tamidva̍dema ma̱hadde̱vānā̍masura̱tvameka̍m || 3.055.03
sa̱mā̱no rājā̱ vibhṛ̍taḥ puru̱trā śaye̍ śa̱yāsu̱ prayu̍to̱ vanānu̍ |
a̱nyā va̱tsaṁ bhara̍ti̱ kṣeti̍ mā̱tā ma̱hadde̱vānā̍masura̱tvameka̍m || 3.055.04
ā̱kṣitpūrvā̱svapa̍rā anū̱rutsa̱dyo jā̱tāsu̱ taru̍ṇīṣva̱ntaḥ |
a̱ntarva̍tīḥ suvate̱ apra̍vītā ma̱hadde̱vānā̍masura̱tvameka̍m || 3.055.05
śa̱yuḥ pa̱rastā̱dadha̱ nu dvi̍mā̱tāba̍ndha̱naśca̍rati va̱tsa eka̍ḥ |
mi̱trasya̱ tā varu̍ṇasya vra̱tāni̍ ma̱hadde̱vānā̍masura̱tvameka̍m || 3.055.06
dvi̱mā̱tā hotā̍ vi̱dathe̍ṣu sa̱mrāḻanvagra̱ṁ cara̍ti̱ kṣeti̍ bu̱dhnaḥ |
pra raṇyā̍ni raṇya̱vāco̍ bharante ma̱hadde̱vānā̍masura̱tvameka̍m || 3.055.07
śūra̍syeva̱ yudhya̍to anta̱masya̍ pratī̱cīna̍ṁ dadṛśe̱ viśva̍mā̱yat |
a̱ntarma̱tiśca̍rati ni̱ṣṣidha̱ṁ gorma̱hadde̱vānā̍masura̱tvameka̍m || 3.055.08
ni ve̍veti pali̱to dū̱ta ā̍sva̱ntarma̱hāśca̍rati roca̱nena̍ |
vapū̍ṁṣi̱ bibhra̍da̱bhi no̱ vi ca̍ṣṭe ma̱hadde̱vānā̍masura̱tvameka̍m || 3.055.09
viṣṇu̍rgo̱pāḥ pa̍ra̱maṁ pā̍ti̱ pātha̍ḥ pri̱yā dhāmā̍nya̱mṛtā̱ dadhā̍naḥ |
a̱gniṣṭā viśvā̱ bhuva̍nāni veda ma̱hadde̱vānā̍masura̱tvameka̍m || 3.055.10
nānā̍ cakrāte ya̱myā̱3̱̍ vapū̍ṁṣi̱ tayo̍ra̱nyadroca̍te kṛ̱ṣṇama̱nyat |
śyāvī̍ ca̱ yadaru̍ṣī ca̱ svasā̍rau ma̱hadde̱vānā̍masura̱tvameka̍m || 3.055.11
mā̱tā ca̱ yatra̍ duhi̱tā ca̍ dhe̱nū sa̍ba̱rdughe̍ dhā̱paye̍te samī̱cī |
ṛ̱tasya̱ te sada̍sīḻe a̱ntarma̱hadde̱vānā̍masura̱tvameka̍m || 3.055.12
a̱nyasyā̍ va̱tsaṁ ri̍ha̱tī mi̍māya̱ kayā̍ bhu̱vā ni da̍dhe dhe̱nurūdha̍ḥ |
ṛ̱tasya̱ sā paya̍sāpinva̱teḻā̍ ma̱hadde̱vānā̍masura̱tvameka̍m || 3.055.13
padyā̍ vaste puru̱rūpā̱ vapū̍ṁṣyū̱rdhvā ta̍sthau̱ tryavi̱ṁ reri̍hāṇā |
ṛ̱tasya̱ sadma̱ vi ca̍rāmi vi̱dvānma̱hadde̱vānā̍masura̱tvameka̍m || 3.055.14
pa̱de i̍va̱ nihi̍te da̱sme a̱ntastayo̍ra̱nyadguhya̍mā̱vira̱nyat |
sa̱dhrī̱cī̱nā pa̱thyā̱3̱̍ sā viṣū̍cī ma̱hadde̱vānā̍masura̱tvameka̍m || 3.055.15
ā dhe̱navo̍ dhunayantā̱maśi̍śvīḥ saba̱rdughā̍ḥ śaśa̱yā apra̍dugdhāḥ |
navyā̍navyā yuva̱tayo̱ bhava̍ntīrma̱hadde̱vānā̍masura̱tvameka̍m || 3.055.16
yada̱nyāsu̍ vṛṣa̱bho rora̍vīti̱ so a̱nyasmi̍nyū̱the ni da̍dhāti̱ reta̍ḥ |
sa hi kṣapā̍vā̱nsa bhaga̱ḥ sa rājā̍ ma̱hadde̱vānā̍masura̱tvameka̍m || 3.055.17
vī̱rasya̱ nu svaśvya̍ṁ janāsa̱ḥ pra nu vo̍cāma vi̱dura̍sya de̱vāḥ |
ṣo̱ḻhā yu̱ktāḥ pañca̍pa̱ñcā va̍hanti ma̱hadde̱vānā̍masura̱tvameka̍m || 3.055.18
de̱vastvaṣṭā̍ savi̱tā vi̱śvarū̍paḥ pu̱poṣa̍ pra̱jāḥ pu̍ru̱dhā ja̍jāna |
i̱mā ca̱ viśvā̱ bhuva̍nānyasya ma̱hadde̱vānā̍masura̱tvameka̍m || 3.055.19
ma̱hī samai̍racca̱mvā̍ samī̱cī u̱bhe te a̍sya̱ vasu̍nā̱ nyṛ̍ṣṭe |
śṛ̱ṇve vī̱ro vi̱ndamā̍no̱ vasū̍ni ma̱hadde̱vānā̍masura̱tvameka̍m || 3.055.20
i̱māṁ ca̍ naḥ pṛthi̱vīṁ vi̱śvadhā̍yā̱ upa̍ kṣeti hi̱tami̍tro̱ na rājā̍ |
pu̱ra̱ḥsada̍ḥ śarma̱sado̱ na vī̱rā ma̱hadde̱vānā̍masura̱tvameka̍m || 3.055.21
ni̱ṣṣidhva̍rīsta̱ oṣa̍dhīru̱tāpo̍ ra̱yiṁ ta̍ indra pṛthi̱vī bi̍bharti |
sakhā̍yaste vāma̱bhāja̍ḥ syāma ma̱hadde̱vānā̍masura̱tvameka̍m || 3.055.22
na tā mi̍nanti mā̱yino̱ na dhīrā̍ vra̱tā de̱vānā̍ṁ pratha̱mā dhru̱vāṇi̍ |
na roda̍sī a̱druhā̍ ve̱dyābhi̱rna parva̍tā ni̱name̍ tasthi̱vāṁsa̍ḥ || 3.056.01
ṣaḍbhā̱rā eko̱ aca̍ranbibhartyṛ̱taṁ varṣi̍ṣṭha̱mupa̱ gāva̱ āgu̍ḥ |
ti̱sro ma̱hīrupa̍rāstasthu̱ratyā̱ guhā̱ dve nihi̍te̱ darśyekā̍ || 3.056.02
tri̱pā̱ja̱syo vṛ̍ṣa̱bho vi̱śvarū̍pa u̱ta tryu̱dhā pu̍ru̱dha pra̱jāvā̍n |
trya̱nī̱kaḥ pa̍tyate̱ māhi̍nāvā̱nsa re̍to̱dhā vṛ̍ṣa̱bhaḥ śaśva̍tīnām || 3.056.03
a̱bhīka̍ āsāṁ pada̱vīra̍bodhyādi̱tyānā̍mahve̱ cāru̱ nāma̍ |
āpa̍ścidasmā aramanta de̱vīḥ pṛtha̱gvraja̍ntī̱ḥ pari̍ ṣīmavṛñjan || 3.056.04
trī ṣa̱dhasthā̍ sindhava̱striḥ ka̍vī̱nāmu̱ta tri̍mā̱tā vi̱dathe̍ṣu sa̱mrāṭ |
ṛ̱tāva̍rī̱ryoṣa̍ṇāsti̱sro apyā̱strirā di̱vo vi̱dathe̱ patya̍mānāḥ || 3.056.05
trirā di̱vaḥ sa̍vita̱rvāryā̍ṇi di̱vedi̍va̱ ā su̍va̱ trirno̱ ahna̍ḥ |
tri̱dhātu̍ rā̱ya ā su̍vā̱ vasū̍ni̱ bhaga̍ trātardhiṣaṇe sā̱taye̍ dhāḥ || 3.056.06
trirā di̱vaḥ sa̍vi̱tā so̍ṣavīti̱ rājā̍nā mi̱trāvaru̍ṇā supā̱ṇī |
āpa̍ścidasya̱ roda̍sī cidu̱rvī ratna̍ṁ bhikṣanta savi̱tuḥ sa̱vāya̍ || 3.056.07
triru̍tta̱mā dū̱ṇaśā̍ roca̱nāni̱ trayo̍ rāja̱ntyasu̍rasya vī̱rāḥ |
ṛ̱tāvā̍na iṣi̱rā dū̱ḻabhā̍sa̱strirā di̱vo vi̱dathe̍ santu de̱vāḥ || 3.056.08
pra me̍ vivi̱kvā a̍vidanmanī̱ṣāṁ dhe̱nuṁ cara̍ntī̱ṁ prayu̍tā̱mago̍pām |
sa̱dyaści̱dyā du̍du̱he bhūri̍ dhā̱serindra̱stada̱gniḥ pa̍ni̱tāro̍ asyāḥ || 3.057.01
indra̱ḥ su pū̱ṣā vṛṣa̍ṇā su̱hastā̍ di̱vo na prī̱tāḥ śa̍śa̱yaṁ du̍duhre |
viśve̱ yada̍syāṁ ra̱ṇaya̍nta de̱vāḥ pra vo'tra̍ vasavaḥ su̱mnama̍śyām || 3.057.02
yā jā̱mayo̱ vṛṣṇa̍ i̱cchanti̍ śa̱ktiṁ na̍ma̱syantī̍rjānate̱ garbha̍masmin |
acchā̍ pu̱traṁ dhe̱navo̍ vāvaśā̱nā ma̱haśca̍ranti̱ bibhra̍ta̱ṁ vapū̍ṁṣi || 3.057.03
acchā̍ vivakmi̱ roda̍sī su̱meke̱ grāvṇo̍ yujā̱no a̍dhva̱re ma̍nī̱ṣā |
i̱mā u̍ te̱ mana̍ve̱ bhūri̍vārā ū̱rdhvā bha̍vanti darśa̱tā yaja̍trāḥ || 3.057.04
yā te̍ ji̱hvā madhu̍matī sume̱dhā agne̍ de̱veṣū̱cyata̍ urū̱cī |
taye̱ha viśvā̱ ava̍se̱ yaja̍trā̱nā sā̍daya pā̱yayā̍ cā̱ madhū̍ni || 3.057.05
yā te̍ agne̱ parva̍tasyeva̱ dhārāsa̍ścantī pī̱paya̍ddeva ci̱trā |
tāma̱smabhya̱ṁ prama̍tiṁ jātavedo̱ vaso̱ rāsva̍ suma̱tiṁ vi̱śvaja̍nyām || 3.057.06
dhe̱nuḥ pra̱tnasya̱ kāmya̱ṁ duhā̍nā̱ntaḥ pu̱traśca̍rati̱ dakṣi̍ṇāyāḥ |
ā dyo̍ta̱niṁ va̍hati śu̱bhrayā̍mo̱ṣasa̱ḥ stomo̍ a̱śvinā̍vajīgaḥ || 3.058.01
su̱yugva̍hanti̱ prati̍ vāmṛ̱teno̱rdhvā bha̍vanti pi̱tare̍va̱ medhā̍ḥ |
jare̍thāma̱smadvi pa̱ṇerma̍nī̱ṣāṁ yu̱vorava̍ścakṛ̱mā yā̍tama̱rvāk || 3.058.02
su̱yugbhi̱raśvai̍ḥ su̱vṛtā̱ rathe̍na̱ dasrā̍vi̱maṁ śṛ̍ṇuta̱ṁ śloka̱madre̍ḥ |
kima̱ṅga vā̱ṁ pratyava̍rti̱ṁ gami̍ṣṭhā̱hurviprā̍so aśvinā purā̱jāḥ || 3.058.03
ā ma̍nyethā̱mā ga̍ta̱ṁ kacci̱devai̱rviśve̱ janā̍so a̱śvinā̍ havante |
i̱mā hi vā̱ṁ goṛ̍jīkā̱ madhū̍ni̱ pra mi̱trāso̱ na da̱duru̱sro agre̍ || 3.058.04
ti̱raḥ pu̱rū ci̍daśvinā̱ rajā̍ṁsyāṅgū̱ṣo vā̍ṁ maghavānā̱ jane̍ṣu |
eha yā̍taṁ pa̱thibhi̍rdeva̱yānai̱rdasrā̍vi̱me vā̍ṁ ni̱dhayo̱ madhū̍nām || 3.058.05
pu̱rā̱ṇamoka̍ḥ sa̱khyaṁ śi̱vaṁ vā̍ṁ yu̱vorna̍rā̱ dravi̍ṇaṁ ja̱hnāvyā̍m |
puna̍ḥ kṛṇvā̱nāḥ sa̱khyā śi̱vāni̱ madhvā̍ madema sa̱ha nū sa̍mā̱nāḥ || 3.058.06
aśvi̍nā vā̱yunā̍ yu̱vaṁ su̍dakṣā ni̱yudbhi̍ṣca sa̱joṣa̍sā yuvānā |
nāsa̍tyā ti̱roa̍hnyaṁ juṣā̱ṇā soma̍ṁ pibatama̱sridhā̍ sudānū || 3.058.07
aśvi̍nā̱ pari̍ vā̱miṣa̍ḥ purū̱cīrī̱yurgī̱rbhiryata̍mānā̱ amṛ̍dhrāḥ |
ratho̍ ha vāmṛta̱jā adri̍jūta̱ḥ pari̱ dyāvā̍pṛthi̱vī yā̍ti sa̱dyaḥ || 3.058.08
aśvi̍nā madhu̱ṣutta̍mo yu̱vāku̱ḥ soma̱staṁ pā̍ta̱mā ga̍taṁ duro̱ṇe |
ratho̍ ha vā̱ṁ bhūri̱ varpa̱ḥ kari̍kratsu̱tāva̍to niṣkṛ̱tamāga̍miṣṭhaḥ || 3.058.09
mi̱tro janā̍nyātayati bruvā̱ṇo mi̱tro dā̍dhāra pṛthi̱vīmu̱ta dyām |
mi̱traḥ kṛ̱ṣṭīrani̍miṣā̱bhi ca̍ṣṭe mi̱trāya̍ ha̱vyaṁ ghṛ̱tava̍jjuhota || 3.059.01
pra sa mi̍tra̱ marto̍ astu̱ praya̍svā̱nyasta̍ āditya̱ śikṣa̍ti vra̱tena̍ |
na ha̍nyate̱ na jī̍yate̱ tvoto̱ naina̱maṁho̍ aśno̱tyanti̍to̱ na dū̱rāt || 3.059.02
a̱na̱mī̱vāsa̱ iḻa̍yā̱ mada̍nto mi̱tajña̍vo̱ vari̍ma̱nnā pṛ̍thi̱vyāḥ |
ā̱di̱tyasya̍ vra̱tamu̍pakṣi̱yanto̍ va̱yaṁ mi̱trasya̍ suma̱tau syā̍ma || 3.059.03
a̱yaṁ mi̱tro na̍ma̱sya̍ḥ su̱śevo̱ rājā̍ sukṣa̱tro a̍janiṣṭa ve̱dhāḥ |
tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma || 3.059.04
ma̱hā ā̍di̱tyo nama̍sopa̱sadyo̍ yāta̱yajja̍no gṛṇa̱te su̱śeva̍ḥ |
tasmā̍ e̱tatpanya̍tamāya̱ juṣṭa̍ma̱gnau mi̱trāya̍ ha̱virā ju̍hota || 3.059.05
mi̱trasya̍ carṣaṇī̱dhṛto'vo̍ de̱vasya̍ sāna̱si |
dyu̱mnaṁ ci̱traśra̍vastamam || 3.059.06
a̱bhi yo ma̍hi̱nā diva̍ṁ mi̱tro ba̱bhūva̍ sa̱prathā̍ḥ |
a̱bhi śravo̍bhiḥ pṛthi̱vīm || 3.059.07
mi̱trāya̱ pañca̍ yemire̱ janā̍ a̱bhiṣṭi̍śavase |
sa de̱vānviśvā̍nbibharti || 3.059.08
mi̱tro de̱veṣvā̱yuṣu̱ janā̍ya vṛ̱ktaba̍rhiṣe |
iṣa̍ i̱ṣṭavra̍tā akaḥ || 3.059.09
i̱heha̍ vo̱ mana̍sā ba̱ndhutā̍ nara u̱śijo̍ jagmura̱bhi tāni̱ veda̍sā |
yābhi̍rmā̱yābhi̱ḥ prati̍jūtivarpasa̱ḥ saudha̍nvanā ya̱jñiya̍ṁ bhā̱gamā̍na̱śa || 3.060.01
yābhi̱ḥ śacī̍bhiścama̱sā api̍ṁśata̱ yayā̍ dhi̱yā gāmari̍ṇīta̱ carma̍ṇaḥ |
yena̱ harī̱ mana̍sā ni̱rata̍kṣata̱ tena̍ deva̱tvamṛ̍bhava̱ḥ samā̍naśa || 3.060.02
indra̍sya sa̱khyamṛ̱bhava̱ḥ samā̍naśu̱rmano̱rnapā̍to a̱paso̍ dadhanvire |
sau̱dha̱nva̱nāso̍ amṛta̱tvameri̍re vi̱ṣṭvī śamī̍bhiḥ su̱kṛta̍ḥ sukṛ̱tyayā̍ || 3.060.03
indre̍ṇa yātha sa̱ratha̍ṁ su̱te sacā̱ atho̱ vaśā̍nāṁ bhavathā sa̱ha śri̱yā |
na va̍ḥ prati̱mai su̍kṛ̱tāni̍ vāghata̱ḥ saudha̍nvanā ṛbhavo vī̱ryā̍ṇi ca || 3.060.04
indra̍ ṛ̱bhubhi̱rvāja̍vadbhi̱ḥ samu̍kṣitaṁ su̱taṁ soma̱mā vṛ̍ṣasvā̱ gabha̍styoḥ |
dhi̱yeṣi̱to ma̍ghavandā̱śuṣo̍ gṛ̱he sau̍dhanva̱nebhi̍ḥ sa̱ha ma̍tsvā̱ nṛbhi̍ḥ || 3.060.05
indra̍ ṛbhu̱mānvāja̍vānmatsve̱ha no̱'sminsava̍ne̱ śacyā̍ puruṣṭuta |
i̱māni̱ tubhya̱ṁ svasa̍rāṇi yemire vra̱tā de̱vānā̱ṁ manu̍ṣaśca̱ dharma̍bhiḥ || 3.060.06
indra̍ ṛ̱bhubhi̍rvā̱jibhi̍rvā̱jaya̍nni̱ha stoma̍ṁ jari̱turupa̍ yāhi ya̱jñiya̍m |
śa̱taṁ kete̍bhiriṣi̱rebhi̍rā̱yave̍ sa̱hasra̍ṇītho adhva̱rasya̱ homa̍ni || 3.060.07
uṣo̱ vāje̍na vājini̱ prace̍tā̱ḥ stoma̍ṁ juṣasva gṛṇa̱to ma̍ghoni |
pu̱rā̱ṇī de̍vi yuva̱tiḥ pura̍ṁdhi̱ranu̍ vra̱taṁ ca̍rasi viśvavāre || 3.061.01
uṣo̍ de̱vyama̍rtyā̱ vi bhā̍hi ca̱ndrara̍thā sū̱nṛtā̍ ī̱raya̍ntī |
ā tvā̍ vahantu su̱yamā̍so̱ aśvā̱ hira̍ṇyavarṇāṁ pṛthu̱pāja̍so̱ ye || 3.061.02
uṣa̍ḥ pratī̱cī bhuva̍nāni̱ viśvo̱rdhvā ti̍ṣṭhasya̱mṛta̍sya ke̱tuḥ |
sa̱mā̱namartha̍ṁ caraṇī̱yamā̍nā ca̱krami̍va navya̱syā va̍vṛtsva || 3.061.03
ava̱ syūme̍va cinva̱tī ma̱ghonyu̱ṣā yā̍ti̱ svasa̍rasya̱ patnī̍ |
sva1̱̍rjana̍ntī su̱bhagā̍ su̱daṁsā̱ āntā̍ddi̱vaḥ pa̍pratha̱ ā pṛ̍thi̱vyāḥ || 3.061.04
acchā̍ vo de̱vīmu̱ṣasa̍ṁ vibhā̱tīṁ pra vo̍ bharadhva̱ṁ nama̍sā suvṛ̱ktim |
ū̱rdhvaṁ ma̍dhu̱dhā di̱vi pājo̍ aśre̱tpra ro̍ca̱nā ru̍ruce ra̱ṇvasa̍ṁdṛk || 3.061.05
ṛ̱tāva̍rī di̱vo a̱rkaira̍bo̱dhyā re̱vatī̱ roda̍sī ci̱trama̍sthāt |
ā̱ya̱tīma̍gna u̱ṣasa̍ṁ vibhā̱tīṁ vā̱mame̍ṣi̱ dravi̍ṇa̱ṁ bhikṣa̍māṇaḥ || 3.061.06
ṛ̱tasya̍ bu̱dhna u̱ṣasā̍miṣa̱ṇyanvṛṣā̍ ma̱hī roda̍sī̱ ā vi̍veśa |
ma̱hī mi̱trasya̱ varu̍ṇasya mā̱yā ca̱ndreva̍ bhā̱nuṁ vi da̍dhe puru̱trā || 3.061.07
i̱mā u̍ vāṁ bhṛ̱mayo̱ manya̍mānā yu̱vāva̍te̱ na tujyā̍ abhūvan |
kva1̱̍ tyadi̍ndrāvaruṇā̱ yaśo̍ vā̱ṁ yena̍ smā̱ sina̱ṁ bhara̍tha̱ḥ sakhi̍bhyaḥ || 3.062.01
a̱yamu̍ vāṁ puru̱tamo̍ rayī̱yañcha̍śvatta̱mamava̍se johavīti |
sa̱joṣā̍vindrāvaruṇā ma̱rudbhi̍rdi̱vā pṛ̍thi̱vyā śṛ̍ṇuta̱ṁ hava̍ṁ me || 3.062.02
a̱sme tadi̍ndrāvaruṇā̱ vasu̍ ṣyāda̱sme ra̱yirma̍ruta̱ḥ sarva̍vīraḥ |
a̱smānvarū̍trīḥ śara̱ṇaira̍vantva̱smānhotrā̱ bhāra̍tī̱ dakṣi̍ṇābhiḥ || 3.062.03
bṛha̍spate ju̱ṣasva̍ no ha̱vyāni̍ viśvadevya |
rāsva̱ ratnā̍ni dā̱śuṣe̍ || 3.062.04
śuci̍ma̱rkairbṛha̱spati̍madhva̱reṣu̍ namasyata |
anā̱myoja̱ ā ca̍ke || 3.062.05
vṛ̱ṣa̱bhaṁ ca̍rṣaṇī̱nāṁ vi̱śvarū̍pa̱madā̍bhyam |
bṛha̱spati̱ṁ vare̍ṇyam || 3.062.06
i̱yaṁ te̍ pūṣannāghṛṇe suṣṭu̱tirde̍va̱ navya̍sī |
a̱smābhi̱stubhya̍ṁ śasyate || 3.062.07
tāṁ ju̍ṣasva̱ gira̱ṁ mama̍ vāja̱yantī̍mavā̱ dhiya̍m |
va̱dhū̱yuri̍va̱ yoṣa̍ṇām || 3.062.08
yo viśvā̱bhi vi̱paśya̍ti̱ bhuva̍nā̱ saṁ ca̱ paśya̍ti |
sa na̍ḥ pū̱ṣāvi̱tā bhu̍vat || 3.062.09
tatsa̍vi̱turvare̍ṇya̱ṁ bhargo̍ de̱vasya̍ dhīmahi |
dhiyo̱ yo na̍ḥ praco̱dayā̍t || 3.062.10
de̱vasya̍ savi̱turva̱yaṁ vā̍ja̱yanta̱ḥ pura̍ṁdhyā |
bhaga̍sya rā̱timī̍mahe || 3.062.11
de̱vaṁ nara̍ḥ savi̱tāra̱ṁ viprā̍ ya̱jñaiḥ su̍vṛ̱ktibhi̍ḥ |
na̱ma̱syanti̍ dhi̱yeṣi̱tāḥ || 3.062.12
somo̍ jigāti gātu̱vidde̱vānā̍meti niṣkṛ̱tam |
ṛ̱tasya̱ yoni̍mā̱sada̍m || 3.062.13
somo̍ a̱smabhya̍ṁ dvi̱pade̱ catu̍ṣpade ca pa̱śave̍ |
a̱na̱mī̱vā iṣa̍skarat || 3.062.14
a̱smāka̱māyu̍rva̱rdhaya̍nna̱bhimā̍tī̱ḥ saha̍mānaḥ |
soma̍ḥ sa̱dhastha̱māsa̍dat || 3.062.15
ā no̍ mitrāvaruṇā ghṛ̱tairgavyū̍timukṣatam |
madhvā̱ rajā̍ṁsi sukratū || 3.062.16
u̱ru̱śaṁsā̍ namo̱vṛdhā̍ ma̱hnā dakṣa̍sya rājathaḥ |
drāghi̍ṣṭhābhiḥ śucivratā || 3.062.17
gṛ̱ṇā̱nā ja̱mada̍gninā̱ yonā̍vṛ̱tasya̍ sīdatam |
pā̱taṁ soma̍mṛtāvṛdhā || 3.062.18
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.