|| ṛgvedaḥ maṇḍalaṁ 6 ||
tvaṁ hya̍gne pratha̱mo ma̱notā̱syā dhi̱yo abha̍vo dasma̱ hotā̍ |
tvaṁ sī̍ṁ vṛṣannakṛṇordu̱ṣṭarī̍tu̱ saho̱ viśva̍smai̱ saha̍se̱ saha̍dhyai || 6.001.01
adhā̱ hotā̱ nya̍sīdo̱ yajī̍yāni̱ḻaspa̱da i̱ṣaya̱nnīḍya̱ḥ san |
taṁ tvā̱ nara̍ḥ pratha̱maṁ de̍va̱yanto̍ ma̱ho rā̱ye ci̱taya̍nto̱ anu̍ gman || 6.001.02
vṛ̱teva̱ yanta̍ṁ ba̱hubhi̍rvasa̱vyai̱3̱̍stve ra̱yiṁ jā̍gṛ̱vāṁso̱ anu̍ gman |
ruśa̍ntama̱gniṁ da̍rśa̱taṁ bṛ̱hanta̍ṁ va̱pāva̍ntaṁ vi̱śvahā̍ dīdi̱vāṁsa̍m || 6.001.03
pa̱daṁ de̱vasya̱ nama̍sā̱ vyanta̍ḥ śrava̱syava̱ḥ śrava̍ āpa̱nnamṛ̍ktam |
nāmā̍ni ciddadhire ya̱jñiyā̍ni bha̱drāyā̍ṁ te raṇayanta̱ saṁdṛ̍ṣṭau || 6.001.04
tvāṁ va̍rdhanti kṣi̱taya̍ḥ pṛthi̱vyāṁ tvāṁ rāya̍ u̱bhayā̍so̱ janā̍nām |
tvaṁ trā̱tā ta̍raṇe̱ cetyo̍ bhūḥ pi̱tā mā̱tā sada̱minmānu̍ṣāṇām || 6.001.05
sa̱pa̱ryeṇya̱ḥ sa pri̱yo vi̱kṣva1̱̍gnirhotā̍ ma̱ndro ni ṣa̍sādā̱ yajī̍yān |
taṁ tvā̍ va̱yaṁ dama̱ ā dī̍di̱vāṁsa̱mupa̍ jñu̱bādho̱ nama̍sā sadema || 6.001.06
taṁ tvā̍ va̱yaṁ su̱dhyo̱3̱̍ navya̍magne sumnā̱yava̍ īmahe deva̱yanta̍ḥ |
tvaṁ viśo̍ anayo̱ dīdyā̍no di̱vo a̍gne bṛha̱tā ro̍ca̱nena̍ || 6.001.07
vi̱śāṁ ka̱viṁ vi̱śpati̱ṁ śaśva̍tīnāṁ ni̱tośa̍naṁ vṛṣa̱bhaṁ ca̍rṣaṇī̱nām |
pretī̍ṣaṇimi̱ṣaya̍ntaṁ pāva̱kaṁ rāja̍ntama̱gniṁ ya̍ja̱taṁ ra̍yī̱ṇām || 6.001.08
so a̍gna īje śaśa̱me ca̱ marto̱ yasta̱ āna̍ṭ sa̱midhā̍ ha̱vyadā̍tim |
ya āhu̍ti̱ṁ pari̱ vedā̱ namo̍bhi̱rviśvetsa vā̱mā da̍dhate̱ tvota̍ḥ || 6.001.09
a̱smā u̍ te̱ mahi̍ ma̱he vi̍dhema̱ namo̍bhiragne sa̱midho̱ta ha̱vyaiḥ |
vedī̍ sūno sahaso gī̱rbhiru̱kthairā te̍ bha̱drāyā̍ṁ suma̱tau ya̍tema || 6.001.10
ā yasta̱tantha̱ roda̍sī̱ vi bhā̱sā śravo̍bhiśca śrava̱sya1̱̍staru̍traḥ |
bṛ̱hadbhi̱rvājai̱ḥ sthavi̍rebhira̱sme re̱vadbhi̍ragne vita̱raṁ vi bhā̍hi || 6.001.11
nṛ̱vadva̍so̱ sada̱middhe̍hya̱sme bhūri̍ to̱kāya̱ tana̍yāya pa̱śvaḥ |
pū̱rvīriṣo̍ bṛha̱tīrā̱rea̍ghā a̱sme bha̱drā sau̍śrava̱sāni̍ santu || 6.001.12
pu̱rūṇya̍gne puru̱dhā tvā̱yā vasū̍ni rājanva̱sutā̍ te aśyām |
pu̱rūṇi̱ hi tve pu̍ruvāra̱ santyagne̱ vasu̍ vidha̱te rāja̍ni̱ tve || 6.001.13
tvaṁ hi kṣaita̍va̱dyaśo'gne̍ mi̱tro na patya̍se |
tvaṁ vi̍carṣaṇe̱ śravo̱ vaso̍ pu̱ṣṭiṁ na pu̍ṣyasi || 6.002.01
tvāṁ hi ṣmā̍ carṣa̱ṇayo̍ ya̱jñebhi̍rgī̱rbhirīḻa̍te |
tvāṁ vā̱jī yā̍tyavṛ̱ko ra̍ja̱stūrvi̱śvaca̍rṣaṇiḥ || 6.002.02
sa̱joṣa̍stvā di̱vo naro̍ ya̱jñasya̍ ke̱tumi̍ndhate |
yaddha̱ sya mānu̍ṣo̱ jana̍ḥ sumnā̱yurju̱hve a̍dhva̱re || 6.002.03
ṛdha̱dyaste̍ su̱dāna̍ve dhi̱yā marta̍ḥ śa̱śama̍te |
ū̱tī ṣa bṛ̍ha̱to di̱vo dvi̱ṣo aṁho̱ na ta̍rati || 6.002.04
sa̱midhā̱ yasta̱ āhu̍ti̱ṁ niśi̍ti̱ṁ martyo̱ naśa̍t |
va̱yāva̍nta̱ṁ sa pu̍ṣyati̱ kṣaya̍magne śa̱tāyu̍ṣam || 6.002.05
tve̱ṣaste̍ dhū̱ma ṛ̍ṇvati di̱vi ṣañchu̱kra āta̍taḥ |
sūro̱ na hi dyu̱tā tvaṁ kṛ̱pā pā̍vaka̱ roca̍se || 6.002.06
adhā̱ hi vi̱kṣvīḍyo'si̍ pri̱yo no̱ ati̍thiḥ |
ra̱ṇvaḥ pu̱rī̍va̱ jūrya̍ḥ sū̱nurna tra̍ya̱yāyya̍ḥ || 6.002.07
kratvā̱ hi droṇe̍ a̱jyase'gne̍ vā̱jī na kṛtvya̍ḥ |
pari̍jmeva sva̱dhā gayo'tyo̱ na hvā̱ryaḥ śiśu̍ḥ || 6.002.08
tvaṁ tyā ci̱dacyu̱tāgne̍ pa̱śurna yava̍se |
dhāmā̍ ha̱ yatte̍ ajara̱ vanā̍ vṛ̱ścanti̱ śikva̍saḥ || 6.002.09
veṣi̱ hya̍dhvarīya̱tāmagne̱ hotā̱ dame̍ vi̱śām |
sa̱mṛdho̍ viśpate kṛṇu ju̱ṣasva̍ ha̱vyama̍ṅgiraḥ || 6.002.10
acchā̍ no mitramaho deva de̱vānagne̱ voca̍ḥ suma̱tiṁ roda̍syoḥ |
vī̱hi sva̱stiṁ su̍kṣi̱tiṁ di̱vo nṝndvi̱ṣo aṁhā̍ṁsi duri̱tā ta̍rema̱ tā ta̍rema̱ tavāva̍sā tarema || 6.002.11
agne̱ sa kṣe̍ṣadṛta̱pā ṛ̍te̱jā u̱ru jyoti̍rnaśate deva̱yuṣṭe̍ |
yaṁ tvaṁ mi̱treṇa̱ varu̍ṇaḥ sa̱joṣā̱ deva̱ pāsi̱ tyaja̍sā̱ marta̱maṁha̍ḥ || 6.003.01
ī̱je ya̱jñebhi̍ḥ śaśa̱me śamī̍bhirṛ̱dhadvā̍rāyā̱gnaye̍ dadāśa |
e̱vā ca̱na taṁ ya̱śasā̱maju̍ṣṭi̱rnāṁho̱ marta̍ṁ naśate̱ na pradṛ̍ptiḥ || 6.003.02
sūro̱ na yasya̍ dṛśa̱tira̍re̱pā bhī̱mā yadeti̍ śuca̱tasta̱ ā dhīḥ |
heṣa̍svataḥ śu̱rudho̱ nāyama̱ktoḥ kutrā̍ cidra̱ṇvo va̍sa̱tirva̍ne̱jāḥ || 6.003.03
ti̱gmaṁ ci̱dema̱ mahi̱ varpo̍ asya̱ bhasa̱daśvo̱ na ya̍masā̱na ā̱sā |
vi̱jeha̍mānaḥ para̱śurna ji̱hvāṁ dra̱virna drā̍vayati̱ dāru̱ dhakṣa̍t || 6.003.04
sa idaste̍va̱ prati̍ dhādasi̱ṣyañchiśī̍ta̱ tejo'ya̍so̱ na dhārā̍m |
ci̱tradhra̍jatirara̱tiryo a̱ktorverna dru̱ṣadvā̍ raghu̱patma̍jaṁhāḥ || 6.003.05
sa ī̍ṁ re̱bho na prati̍ vasta u̱srāḥ śo̱ciṣā̍ rārapīti mi̱trama̍hāḥ |
nakta̱ṁ ya ī̍maru̱ṣo yo divā̱ nṝnama̍rtyo aru̱ṣo yo divā̱ nṝn || 6.003.06
di̱vo na yasya̍ vidha̱to navī̍no̱dvṛṣā̍ ru̱kṣa oṣa̍dhīṣu nūnot |
ghṛṇā̱ na yo dhraja̍sā̱ patma̍nā̱ yannā roda̍sī̱ vasu̍nā̱ daṁ su̱patnī̍ || 6.003.07
dhāyo̍bhirvā̱ yo yujye̍bhira̱rkairvi̱dyunna da̍vidyo̱tsvebhi̱ḥ śuṣmai̍ḥ |
śardho̍ vā̱ yo ma̱rutā̍ṁ ta̱takṣa̍ ṛ̱bhurna tve̱ṣo ra̍bhasā̱no a̍dyaut || 6.003.08
yathā̍ hota̱rmanu̍ṣo de̱vatā̍tā ya̱jñebhi̍ḥ sūno sahaso̱ yajā̍si |
e̱vā no̍ a̱dya sa̍ma̱nā sa̍mā̱nānu̱śanna̍gna uśa̱to ya̍kṣi de̱vān || 6.004.01
sa no̍ vi̱bhāvā̍ ca̱kṣaṇi̱rna vasto̍ra̱gnirva̱ndāru̱ vedya̱ścano̍ dhāt |
vi̱śvāyu̱ryo a̱mṛto̱ martye̍ṣūṣa̱rbhudbhūdati̍thirjā̱tave̍dāḥ || 6.004.02
dyāvo̱ na yasya̍ pa̱naya̱ntyabhva̱ṁ bhāsā̍ṁsi vaste̱ sūryo̱ na śu̱kraḥ |
vi ya i̱notya̱jara̍ḥ pāva̱ko'śna̍sya cicchiśnathatpū̱rvyāṇi̍ || 6.004.03
va̱dmā hi sū̍no̱ asya̍dma̱sadvā̍ ca̱kre a̱gnirja̱nuṣājmānna̍m |
sa tvaṁ na̍ ūrjasana̱ ūrja̍ṁ dhā̱ rāje̍va jeravṛ̱ke kṣe̍ṣya̱ntaḥ || 6.004.04
niti̍kti̱ yo vā̍ra̱ṇamanna̱matti̍ vā̱yurna rāṣṭryatye̍tya̱ktūn |
tu̱ryāma̱ yasta̍ ā̱diśā̱marā̍tī̱ratyo̱ na hruta̱ḥ pata̍taḥ pari̱hrut || 6.004.05
ā sūryo̱ na bhā̍nu̱madbhi̍ra̱rkairagne̍ ta̱tantha̱ roda̍sī̱ vi bhā̱sā |
ci̱tro na̍ya̱tpari̱ tamā̍ṁsya̱ktaḥ śo̱ciṣā̱ patma̍nnauśi̱jo na dīya̍n || 6.004.06
tvāṁ hi ma̱ndrata̍mamarkaśo̱kairva̍vṛ̱mahe̱ mahi̍ na̱ḥ śroṣya̍gne |
indra̱ṁ na tvā̱ śava̍sā de̱vatā̍ vā̱yuṁ pṛ̍ṇanti̱ rādha̍sā̱ nṛta̍māḥ || 6.004.07
nū no̍ agne'vṛ̱kebhi̍ḥ sva̱sti veṣi̍ rā̱yaḥ pa̱thibhi̱ḥ parṣyaṁha̍ḥ |
tā sū̱ribhyo̍ gṛṇa̱te rā̍si su̱mnaṁ made̍ma śa̱tahi̍māḥ su̱vīrā̍ḥ || 6.004.08
hu̱ve va̍ḥ sū̱nuṁ saha̍so̱ yuvā̍na̱madro̍ghavācaṁ ma̱tibhi̱ryavi̍ṣṭham |
ya inva̍ti̱ dravi̍ṇāni̱ prace̍tā vi̱śvavā̍rāṇi puru̱vāro̍ a̱dhruk || 6.005.01
tve vasū̍ni purvaṇīka hotardo̱ṣā vasto̱reri̍re ya̱jñiyā̍saḥ |
kṣāme̍va̱ viśvā̱ bhuva̍nāni̱ yasmi̱nsaṁ saubha̍gāni dadhi̱re pā̍va̱ke || 6.005.02
tvaṁ vi̱kṣu pra̱diva̍ḥ sīda ā̱su kratvā̍ ra̱thīra̍bhavo̱ vāryā̍ṇām |
ata̍ inoṣi vidha̱te ci̍kitvo̱ vyā̍nu̱ṣagjā̍tavedo̱ vasū̍ni || 6.005.03
yo na̱ḥ sanu̍tyo abhi̱dāsa̍dagne̱ yo anta̍ro mitramaho vanu̱ṣyāt |
tama̱jare̍bhi̱rvṛṣa̍bhi̱stava̱ svaistapā̍ tapiṣṭha̱ tapa̍sā̱ tapa̍svān || 6.005.04
yaste̍ ya̱jñena̍ sa̱midhā̱ ya u̱kthaira̱rkebhi̍ḥ sūno sahaso̱ dadā̍śat |
sa martye̍ṣvamṛta̱ prace̍tā rā̱yā dyu̱mnena̱ śrava̍sā̱ vi bhā̍ti || 6.005.05
sa tatkṛ̍dhīṣi̱tastūya̍magne̱ spṛdho̍ bādhasva̱ saha̍sā̱ saha̍svān |
yaccha̱syase̱ dyubhi̍ra̱kto vaco̍bhi̱stajju̍ṣasva jari̱turghoṣi̱ manma̍ || 6.005.06
a̱śyāma̱ taṁ kāma̍magne̱ tavo̱tī a̱śyāma̍ ra̱yiṁ ra̍yivaḥ su̱vīra̍m |
a̱śyāma̱ vāja̍ma̱bhi vā̱jaya̍nto̱'śyāma̍ dyu̱mnama̍jarā̱jara̍ṁ te || 6.005.07
pra navya̍sā̱ saha̍saḥ sū̱numacchā̍ ya̱jñena̍ gā̱tumava̍ i̱cchamā̍naḥ |
vṛ̱ścadva̍naṁ kṛ̱ṣṇayā̍ma̱ṁ ruśa̍ntaṁ vī̱tī hotā̍raṁ di̱vyaṁ ji̍gāti || 6.006.01
sa śvi̍tā̱nasta̍nya̱tū ro̍cana̱sthā a̱jare̍bhi̱rnāna̍dadbhi̱ryavi̍ṣṭhaḥ |
yaḥ pā̍va̱kaḥ pu̍ru̱tama̍ḥ pu̱rūṇi̍ pṛ̱thūnya̱gnira̍nu̱yāti̱ bharva̍n || 6.006.02
vi te̱ viṣva̱gvāta̍jūtāso agne̱ bhāmā̍saḥ śuce̱ śuca̍yaścaranti |
tu̱vi̱mra̱kṣāso̍ di̱vyā nava̍gvā̱ vanā̍ vananti dhṛṣa̱tā ru̱janta̍ḥ || 6.006.03
ye te̍ śu̱krāsa̱ḥ śuca̍yaḥ śuciṣma̱ḥ kṣāṁ vapa̍nti̱ viṣi̍tāso̱ aśvā̍ḥ |
adha̍ bhra̱masta̍ urvi̱yā vi bhā̍ti yā̱taya̍māno̱ adhi̱ sānu̱ pṛśne̍ḥ || 6.006.04
adha̍ ji̱hvā pā̍patīti̱ pra vṛṣṇo̍ goṣu̱yudho̱ nāśani̍ḥ sṛjā̱nā |
śūra̍syeva̱ prasi̍tiḥ kṣā̱tira̱gnerdu̱rvartu̍rbhī̱mo da̍yate̱ vanā̍ni || 6.006.05
ā bhā̱nunā̱ pārthi̍vāni̱ jrayā̍ṁsi ma̱hasto̱dasya̍ dhṛṣa̱tā ta̍tantha |
sa bā̍dha̱svāpa̍ bha̱yā saho̍bhi̱ḥ spṛdho̍ vanu̱ṣyanva̱nuṣo̱ ni jū̍rva || 6.006.06
sa ci̍tra ci̱traṁ ci̱taya̍ntama̱sme citra̍kṣatra ci̱trata̍maṁ vayo̱dhām |
ca̱ndraṁ ra̱yiṁ pu̍ru̱vīra̍ṁ bṛ̱hanta̱ṁ candra̍ ca̱ndrābhi̍rgṛṇa̱te yu̍vasva || 6.006.07
mū̱rdhāna̍ṁ di̱vo a̍ra̱tiṁ pṛ̍thi̱vyā vai̍śvāna̱ramṛ̱ta ā jā̱tama̱gnim |
ka̱viṁ sa̱mrāja̱mati̍thi̱ṁ janā̍nāmā̱sannā pātra̍ṁ janayanta de̱vāḥ || 6.007.01
nābhi̍ṁ ya̱jñānā̱ṁ sada̍naṁ rayī̱ṇāṁ ma̱hāmā̍hā̱vama̱bhi saṁ na̍vanta |
vai̱śvā̱na̱raṁ ra̱thya̍madhva̱rāṇā̍ṁ ya̱jñasya̍ ke̱tuṁ ja̍nayanta de̱vāḥ || 6.007.02
tvadvipro̍ jāyate vā̱jya̍gne̱ tvadvī̱rāso̍ abhimāti̱ṣāha̍ḥ |
vaiśvā̍nara̱ tvama̱smāsu̍ dhehi̱ vasū̍ni rājanspṛha̱yāyyā̍ṇi || 6.007.03
tvāṁ viśve̍ amṛta̱ jāya̍māna̱ṁ śiśu̱ṁ na de̱vā a̱bhi saṁ na̍vante |
tava̱ kratu̍bhiramṛta̱tvamā̍ya̱nvaiśvā̍nara̱ yatpi̱troradī̍deḥ || 6.007.04
vaiśvā̍nara̱ tava̱ tāni̍ vra̱tāni̍ ma̱hānya̍gne̱ naki̱rā da̍dharṣa |
yajjāya̍mānaḥ pi̱troru̱pasthe'vi̍ndaḥ ke̱tuṁ va̱yune̱ṣvahnā̍m || 6.007.05
vai̱śvā̱na̱rasya̱ vimi̍tāni̱ cakṣa̍sā̱ sānū̍ni di̱vo a̱mṛta̍sya ke̱tunā̍ |
tasyedu̱ viśvā̱ bhuva̱nādhi̍ mū̱rdhani̍ va̱yā i̍va ruruhuḥ sa̱pta vi̱sruha̍ḥ || 6.007.06
vi yo rajā̱ṁsyami̍mīta su̱kratu̍rvaiśvāna̱ro vi di̱vo ro̍ca̱nā ka̱viḥ |
pari̱ yo viśvā̱ bhuva̍nāni papra̱the'da̍bdho go̱pā a̱mṛta̍sya rakṣi̱tā || 6.007.07
pṛ̱kṣasya̱ vṛṣṇo̍ aru̱ṣasya̱ nū saha̱ḥ pra nu vo̍caṁ vi̱dathā̍ jā̱tave̍dasaḥ |
vai̱śvā̱na̱rāya̍ ma̱tirnavya̍sī̱ śuci̱ḥ soma̍ iva pavate̱ cāru̍ra̱gnaye̍ || 6.008.01
sa jāya̍mānaḥ para̱me vyo̍mani vra̱tānya̱gnirvra̍ta̱pā a̍rakṣata |
vya1̱̍ntari̍kṣamamimīta su̱kratu̍rvaiśvāna̱ro ma̍hi̱nā nāka̍maspṛśat || 6.008.02
vya̍stabhnā̱droda̍sī mi̱tro adbhu̍to'nta̱rvāva̍dakṛṇo̱jjyoti̍ṣā̱ tama̍ḥ |
vi carma̍ṇīva dhi̱ṣaṇe̍ avartayadvaiśvāna̱ro viśva̍madhatta̱ vṛṣṇya̍m || 6.008.03
a̱pāmu̱pasthe̍ mahi̱ṣā a̍gṛbhṇata̱ viśo̱ rājā̍na̱mupa̍ tasthurṛ̱gmiya̍m |
ā dū̱to a̱gnima̍bharadvi̱vasva̍to vaiśvāna̱raṁ mā̍ta̱riśvā̍ parā̱vata̍ḥ || 6.008.04
yu̱geyu̍ge vida̱thya̍ṁ gṛ̱ṇadbhyo'gne̍ ra̱yiṁ ya̱śasa̍ṁ dhehi̱ navya̍sīm |
pa̱vyeva̍ rājanna̱ghaśa̍ṁsamajara nī̱cā ni vṛ̍śca va̱nina̱ṁ na teja̍sā || 6.008.05
a̱smāka̍magne ma̱ghava̍tsu dhāra̱yānā̍mi kṣa̱trama̱jara̍ṁ su̱vīrya̍m |
va̱yaṁ ja̍yema śa̱tina̍ṁ saha̱sriṇa̱ṁ vaiśvā̍nara̱ vāja̍magne̱ tavo̱tibhi̍ḥ || 6.008.06
ada̍bdhebhi̱stava̍ go̱pābhi̍riṣṭe̱'smāka̍ṁ pāhi triṣadhastha sū̱rīn |
rakṣā̍ ca no da̱duṣā̱ṁ śardho̍ agne̱ vaiśvā̍nara̱ pra ca̍ tārī̱ḥ stavā̍naḥ || 6.008.07
aha̍śca kṛ̱ṣṇamaha̱rarju̍naṁ ca̱ vi va̍rtete̱ raja̍sī ve̱dyābhi̍ḥ |
vai̱śvā̱na̱ro jāya̍māno̱ na rājāvā̍tira̱jjyoti̍ṣā̱gnistamā̍ṁsi || 6.009.01
nāhaṁ tantu̱ṁ na vi jā̍nā̱myotu̱ṁ na yaṁ vaya̍nti sama̱re'ta̍mānāḥ |
kasya̍ svitpu̱tra i̱ha vaktvā̍ni pa̱ro va̍dā̱tyava̍reṇa pi̱trā || 6.009.02
sa ittantu̱ṁ sa vi jā̍nā̱tyotu̱ṁ sa vaktvā̍nyṛtu̱thā va̍dāti |
ya ī̱ṁ cike̍tada̱mṛta̍sya go̱pā a̱vaścara̍npa̱ro a̱nyena̱ paśya̍n || 6.009.03
a̱yaṁ hotā̍ pratha̱maḥ paśya̍te̱mami̱daṁ jyoti̍ra̱mṛta̱ṁ martye̍ṣu |
a̱yaṁ sa ja̍jñe dhru̱va ā niṣa̱tto'ma̍rtyasta̱nvā̱3̱̍ vardha̍mānaḥ || 6.009.04
dhru̱vaṁ jyoti̱rnihi̍taṁ dṛ̱śaye̱ kaṁ mano̱ javi̍ṣṭhaṁ pa̱taya̍tsva̱ntaḥ |
viśve̍ de̱vāḥ sama̍nasa̱ḥ sake̍tā̱ eka̱ṁ kratu̍ma̱bhi vi ya̍nti sā̱dhu || 6.009.05
vi me̱ karṇā̍ patayato̱ vi cakṣu̱rvī̱3̱̍daṁ jyoti̱rhṛda̍ya̱ āhi̍ta̱ṁ yat |
vi me̱ mana̍ścarati dū̱raā̍dhī̱ḥ kiṁ svi̍dva̱kṣyāmi̱ kimu̱ nū ma̍niṣye || 6.009.06
viśve̍ de̱vā a̍namasyanbhiyā̱nāstvāma̍gne̱ tama̍si tasthi̱vāṁsa̍m |
vai̱śvā̱na̱ro̍'vatū̱taye̱ no'ma̍rtyo'vatū̱taye̍ naḥ || 6.009.07
pu̱ro vo̍ ma̱ndraṁ di̱vyaṁ su̍vṛ̱ktiṁ pra̍ya̱ti ya̱jñe a̱gnima̍dhva̱re da̍dhidhvam |
pu̱ra u̱kthebhi̱ḥ sa hi no̍ vi̱bhāvā̍ svadhva̱rā ka̍rati jā̱tave̍dāḥ || 6.010.01
tamu̍ dyumaḥ purvaṇīka hota̱ragne̍ a̱gnibhi̱rmanu̍ṣa idhā̱naḥ |
stoma̱ṁ yama̍smai ma̱mate̍va śū̱ṣaṁ ghṛ̱taṁ na śuci̍ ma̱taya̍ḥ pavante || 6.010.02
pī̱pāya̱ sa śrava̍sā̱ martye̍ṣu̱ yo a̱gnaye̍ da̱dāśa̱ vipra̍ u̱kthaiḥ |
ci̱trābhi̱stamū̱tibhi̍ści̱traśo̍cirvra̱jasya̍ sā̱tā goma̍to dadhāti || 6.010.03
ā yaḥ pa̱prau jāya̍māna u̱rvī dū̍re̱dṛśā̍ bhā̱sā kṛ̱ṣṇādhvā̍ |
adha̍ ba̱hu ci̱ttama̱ ūrmyā̍yāsti̱raḥ śo̱ciṣā̍ dadṛśe pāva̱kaḥ || 6.010.04
nū na̍ści̱traṁ pu̍ru̱vājā̍bhirū̱tī agne̍ ra̱yiṁ ma̱ghava̍dbhyaśca dhehi |
ye rādha̍sā̱ śrava̍sā̱ cātya̱nyānsu̱vīrye̍bhiścā̱bhi santi̱ janā̍n || 6.010.05
i̱maṁ ya̱jñaṁ cano̍ dhā agna u̱śanyaṁ ta̍ āsā̱no ju̍hu̱te ha̱viṣmā̍n |
bha̱radvā̍jeṣu dadhiṣe suvṛ̱ktimavī̱rvāja̍sya̱ gadhya̍sya sā̱tau || 6.010.06
vi dveṣā̍ṁsīnu̱hi va̱rdhayeḻā̱ṁ made̍ma śa̱tahi̍māḥ su̱vīrā̍ḥ || 6.010.07
yaja̍sva hotariṣi̱to yajī̍yā̱nagne̱ bādho̍ ma̱rutā̱ṁ na prayu̍kti |
ā no̍ mi̱trāvaru̍ṇā̱ nāsa̍tyā̱ dyāvā̍ ho̱trāya̍ pṛthi̱vī va̍vṛtyāḥ || 6.011.01
tvaṁ hotā̍ ma̱ndrata̍mo no a̱dhruga̱ntarde̱vo vi̱dathā̱ martye̍ṣu |
pā̱va̱kayā̍ ju̱hvā̱3̱̍ vahni̍rā̱sāgne̱ yaja̍sva ta̱nvaṁ1̱̍ tava̱ svām || 6.011.02
dhanyā̍ ci̱ddhi tve dhi̱ṣaṇā̱ vaṣṭi̱ pra de̱vāñjanma̍ gṛṇa̱te yaja̍dhyai |
vepi̍ṣṭho̱ aṅgi̍rasā̱ṁ yaddha̱ vipro̱ madhu̍ ccha̱ndo bhana̍ti re̱bha i̱ṣṭau || 6.011.03
adi̍dyuta̱tsvapā̍ko vi̱bhāvāgne̱ yaja̍sva̱ roda̍sī urū̱cī |
ā̱yuṁ na yaṁ nama̍sā rā̱taha̍vyā a̱ñjanti̍ supra̱yasa̱ṁ pañca̱ janā̍ḥ || 6.011.04
vṛ̱ñje ha̱ yannama̍sā ba̱rhira̱gnāvayā̍mi̱ srugghṛ̱tava̍tī suvṛ̱ktiḥ |
amya̍kṣi̱ sadma̱ sada̍ne pṛthi̱vyā aśrā̍yi ya̱jñaḥ sūrye̱ na cakṣu̍ḥ || 6.011.05
da̱śa̱syā na̍ḥ purvaṇīka hotarde̱vebhi̍ragne a̱gnibhi̍ridhā̱naḥ |
rā̱yaḥ sū̍no sahaso vāvasā̱nā ati̍ srasema vṛ̱jana̱ṁ nāṁha̍ḥ || 6.011.06
madhye̱ hotā̍ duro̱ṇe ba̱rhiṣo̱ rāḻa̱gnisto̱dasya̱ roda̍sī̱ yaja̍dhyai |
a̱yaṁ sa sū̱nuḥ saha̍sa ṛ̱tāvā̍ dū̱rātsūryo̱ na śo̱ciṣā̍ tatāna || 6.012.01
ā yasmi̱ntve svapā̍ke yajatra̱ yakṣa̍drājansa̱rvatā̍teva̱ nu dyauḥ |
tri̱ṣa̱dhastha̍stata̱ruṣo̱ na jaṁho̍ ha̱vyā ma̱ghāni̱ mānu̍ṣā̱ yaja̍dhyai || 6.012.02
teji̍ṣṭhā̱ yasyā̍ra̱tirva̍ne̱rāṭ to̱do adhva̱nna vṛ̍dhasā̱no a̍dyaut |
a̱dro̱gho na dra̍vi̱tā ce̍tati̱ tmannama̍rtyo'va̱rtra oṣa̍dhīṣu || 6.012.03
sāsmāke̍bhire̱tarī̱ na śū̱ṣaira̱gniḥ ṣṭa̍ve̱ dama̱ ā jā̱tave̍dāḥ |
drva̍nno va̱nvankratvā̱ nārvo̱sraḥ pi̱teva̍ jāra̱yāyi̍ ya̱jñaiḥ || 6.012.04
adha̍ smāsya panayanti̱ bhāso̱ vṛthā̱ yattakṣa̍danu̱yāti̍ pṛ̱thvīm |
sa̱dyo yaḥ sya̱ndro viṣi̍to̱ dhavī̍yānṛ̱ṇo na tā̱yurati̱ dhanvā̍ rāṭ || 6.012.05
sa tvaṁ no̍ arva̱nnidā̍yā̱ viśve̍bhiragne a̱gnibhi̍ridhā̱naḥ |
veṣi̍ rā̱yo vi yā̍si du̱cchunā̱ made̍ma śa̱tahi̍māḥ su̱vīrā̍ḥ || 6.012.06
tvadviśvā̍ subhaga̱ saubha̍gā̱nyagne̱ vi ya̍nti va̱nino̱ na va̱yāḥ |
śru̱ṣṭī ra̱yirvājo̍ vṛtra̱tūrye̍ di̱vo vṛ̱ṣṭirīḍyo̍ rī̱tira̱pām || 6.013.01
tvaṁ bhago̍ na̱ ā hi ratna̍mi̱ṣe pari̍jmeva kṣayasi da̱smava̍rcāḥ |
agne̍ mi̱tro na bṛ̍ha̱ta ṛ̱tasyāsi̍ kṣa̱ttā vā̱masya̍ deva̱ bhūre̍ḥ || 6.013.02
sa satpa̍ti̱ḥ śava̍sā hanti vṛ̱tramagne̱ vipro̱ vi pa̱ṇerbha̍rti̱ vāja̍m |
yaṁ tvaṁ pra̍ceta ṛtajāta rā̱yā sa̱joṣā̱ naptrā̱pāṁ hi̱noṣi̍ || 6.013.03
yaste̍ sūno sahaso gī̱rbhiru̱kthairya̱jñairmarto̱ niśi̍tiṁ ve̱dyāna̍ṭ |
viśva̱ṁ sa de̍va̱ prati̱ vāra̍magne dha̱tte dhā̱nyaṁ1̱̍ patya̍te vasa̱vyai̍ḥ || 6.013.04
tā nṛbhya̱ ā sau̍śrava̱sā su̱vīrāgne̍ sūno sahasaḥ pu̱ṣyase̍ dhāḥ |
kṛ̱ṇoṣi̱ yacchava̍sā̱ bhūri̍ pa̱śvo vayo̱ vṛkā̍yā̱raye̱ jasu̍raye || 6.013.05
va̱dmā sū̍no sahaso no̱ vihā̍yā̱ agne̍ to̱kaṁ tana̍yaṁ vā̱ji no̍ dāḥ |
viśvā̍bhirgī̱rbhira̱bhi pū̱rtima̍śyā̱ṁ made̍ma śa̱tahi̍māḥ su̱vīrā̍ḥ || 6.013.06
a̱gnā yo martyo̱ duvo̱ dhiya̍ṁ ju̱joṣa̍ dhī̱tibhi̍ḥ |
bhasa̱nnu ṣa pra pū̱rvya iṣa̍ṁ vurī̱tāva̍se || 6.014.01
a̱gniriddhi prace̍tā a̱gnirve̱dhasta̍ma̱ ṛṣi̍ḥ |
a̱gniṁ hotā̍ramīḻate ya̱jñeṣu̱ manu̍ṣo̱ viśa̍ḥ || 6.014.02
nānā̱ hya1̱̍gne'va̍se̱ spardha̍nte̱ rāyo̍ a̱ryaḥ |
tūrva̍nto̱ dasyu̍mā̱yavo̍ vra̱taiḥ sīkṣa̍nto avra̱tam || 6.014.03
a̱gnira̱psāmṛ̍tī̱ṣaha̍ṁ vī̱raṁ da̍dāti̱ satpa̍tim |
yasya̱ trasa̍nti̱ śava̍saḥ sa̱ṁcakṣi̱ śatra̍vo bhi̱yā || 6.014.04
a̱gnirhi vi̱dmanā̍ ni̱do de̱vo marta̍muru̱ṣyati̍ |
sa̱hāvā̱ yasyāvṛ̍to ra̱yirvāje̱ṣvavṛ̍taḥ || 6.014.05
acchā̍ no mitramaho deva de̱vānagne̱ voca̍ḥ suma̱tiṁ roda̍syoḥ |
vī̱hi sva̱stiṁ su̍kṣi̱tiṁ di̱vo nṝndvi̱ṣo aṁhā̍ṁsi duri̱tā ta̍rema̱ tā ta̍rema̱ tavāva̍sā tarema || 6.014.06
i̱mamū̱ ṣu vo̱ ati̍thimuṣa̱rbudha̱ṁ viśvā̍sāṁ vi̱śāṁ pati̍mṛñjase gi̱rā |
vetīddi̱vo ja̱nuṣā̱ kacci̱dā śuci̱rjyokci̍datti̱ garbho̱ yadacyu̍tam || 6.015.01
mi̱traṁ na yaṁ sudhi̍ta̱ṁ bhṛga̍vo da̱dhurvana̱spatā̱vīḍya̍mū̱rdhvaśo̍ciṣam |
sa tvaṁ suprī̍to vī̱taha̍vye adbhuta̱ praśa̍stibhirmahayase di̱vedi̍ve || 6.015.02
sa tvaṁ dakṣa̍syāvṛ̱ko vṛ̱dho bhū̍ra̱ryaḥ para̱syānta̍rasya̱ taru̍ṣaḥ |
rā̱yaḥ sū̍no sahaso̱ martye̱ṣvā cha̱rdirya̍ccha vī̱taha̍vyāya sa̱pratho̍ bha̱radvā̍jāya sa̱pratha̍ḥ || 6.015.03
dyu̱tā̱naṁ vo̱ ati̍thi̱ṁ sva̍rṇarama̱gniṁ hotā̍ra̱ṁ manu̍ṣaḥ svadhva̱ram |
vipra̱ṁ na dyu̱kṣava̍casaṁ suvṛ̱ktibhi̍rhavya̱vāha̍mara̱tiṁ de̱vamṛ̍ñjase || 6.015.04
pā̱va̱kayā̱ yaści̱taya̍ntyā kṛ̱pā kṣāma̍nruru̱ca u̱ṣaso̱ na bhā̱nunā̍ |
tūrva̱nna yāma̱nneta̍śasya̱ nū raṇa̱ ā yo ghṛ̱ṇe na ta̍tṛṣā̱ṇo a̱jara̍ḥ || 6.015.05
a̱gnima̍gniṁ vaḥ sa̱midhā̍ duvasyata pri̱yampri̍yaṁ vo̱ ati̍thiṁ gṛṇī̱ṣaṇi̍ |
upa̍ vo gī̱rbhira̱mṛta̍ṁ vivāsata de̱vo de̱veṣu̱ vana̍te̱ hi vārya̍ṁ de̱vo de̱veṣu̱ vana̍te̱ hi no̱ duva̍ḥ || 6.015.06
sami̍ddhama̱gniṁ sa̱midhā̍ gi̱rā gṛ̍ṇe̱ śuci̍ṁ pāva̱kaṁ pu̱ro a̍dhva̱re dhru̱vam |
vipra̱ṁ hotā̍raṁ puru̱vāra̍ma̱druha̍ṁ ka̱viṁ su̱mnairī̍mahe jā̱tave̍dasam || 6.015.07
tvāṁ dū̱tama̍gne a̱mṛta̍ṁ yu̱geyu̍ge havya̱vāha̍ṁ dadhire pā̱yumīḍya̍m |
de̱vāsa̍śca̱ martā̍saśca̱ jāgṛ̍viṁ vi̱bhuṁ vi̱śpati̱ṁ nama̍sā̱ ni ṣe̍dire || 6.015.08
vi̱bhūṣa̍nnagna u̱bhayā̱ anu̍ vra̱tā dū̱to de̱vānā̱ṁ raja̍sī̱ samī̍yase |
yatte̍ dhī̱tiṁ su̍ma̱timā̍vṛṇī̱mahe'dha̍ smā nastri̱varū̍thaḥ śi̱vo bha̍va || 6.015.09
taṁ su̱pratī̍kaṁ su̱dṛśa̱ṁ svañca̱mavi̍dvāṁso vi̱duṣṭa̍raṁ sapema |
sa ya̍kṣa̱dviśvā̍ va̱yunā̍ni vi̱dvānpra ha̱vyama̱gnira̱mṛte̍ṣu vocat || 6.015.10
tama̍gne pāsyu̱ta taṁ pi̍parṣi̱ yasta̱ āna̍ṭ ka̱vaye̍ śūra dhī̱tim |
ya̱jñasya̍ vā̱ niśi̍ti̱ṁ vodi̍tiṁ vā̱ tamitpṛ̍ṇakṣi̱ śava̍so̱ta rā̱yā || 6.015.11
tvama̍gne vanuṣya̱to ni pā̍hi̱ tvamu̍ naḥ sahasāvannava̱dyāt |
saṁ tvā̍ dhvasma̱nvada̱bhye̍tu̱ pātha̱ḥ saṁ ra̱yiḥ spṛ̍ha̱yāyya̍ḥ saha̱srī || 6.015.12
a̱gnirhotā̍ gṛ̱hapa̍ti̱ḥ sa rājā̱ viśvā̍ veda̱ jani̍mā jā̱tave̍dāḥ |
de̱vānā̍mu̱ta yo martyā̍nā̱ṁ yaji̍ṣṭha̱ḥ sa pra ya̍jatāmṛ̱tāvā̍ || 6.015.13
agne̱ yada̱dya vi̱śo a̍dhvarasya hota̱ḥ pāva̍kaśoce̱ veṣṭvaṁ hi yajvā̍ |
ṛ̱tā ya̍jāsi mahi̱nā vi yadbhūrha̱vyā va̍ha yaviṣṭha̱ yā te̍ a̱dya || 6.015.14
a̱bhi prayā̍ṁsi̱ sudhi̍tāni̱ hi khyo ni tvā̍ dadhīta̱ roda̍sī̱ yaja̍dhyai |
avā̍ no maghava̱nvāja̍sātā̱vagne̱ viśvā̍ni duri̱tā ta̍rema̱ tā ta̍rema̱ tavāva̍sā tarema || 6.015.15
agne̱ viśve̍bhiḥ svanīka de̱vairūrṇā̍vantaṁ pratha̱maḥ sī̍da̱ yoni̍m |
ku̱lā̱yina̍ṁ ghṛ̱tava̍ntaṁ savi̱tre ya̱jñaṁ na̍ya̱ yaja̍mānāya sā̱dhu || 6.015.16
i̱mamu̱ tyama̍tharva̱vada̱gniṁ ma̍nthanti ve̱dhasa̍ḥ |
yama̍ṅkū̱yanta̱māna̍ya̱nnamū̍raṁ śyā̱vyā̍bhyaḥ || 6.015.17
jani̍ṣvā de̱vavī̍taye sa̱rvatā̍tā sva̱staye̍ |
ā de̱vānva̍kṣya̱mṛtā̍ ṛtā̱vṛdho̍ ya̱jñaṁ de̱veṣu̍ pispṛśaḥ || 6.015.18
va̱yamu̍ tvā gṛhapate janānā̱magne̱ aka̍rma sa̱midhā̍ bṛ̱hanta̍m |
a̱sthū̱ri no̱ gārha̍patyāni santu ti̱gmena̍ na̱steja̍sā̱ saṁ śi̍śādhi || 6.015.19
tvama̍gne ya̱jñānā̱ṁ hotā̱ viśve̍ṣāṁ hi̱taḥ |
de̱vebhi̱rmānu̍ṣe̱ jane̍ || 6.016.01
sa no̍ ma̱ndrābhi̍radhva̱re ji̱hvābhi̍ryajā ma̱haḥ |
ā de̱vānva̍kṣi̱ yakṣi̍ ca || 6.016.02
vetthā̱ hi ve̍dho̱ adhva̍naḥ pa̱thaśca̍ de̱vāñja̍sā |
agne̍ ya̱jñeṣu̍ sukrato || 6.016.03
tvāmī̍ḻe̱ adha̍ dvi̱tā bha̍ra̱to vā̱jibhi̍ḥ śu̱nam |
ī̱je ya̱jñeṣu̍ ya̱jñiya̍m || 6.016.04
tvami̱mā vāryā̍ pu̱ru divo̍dāsāya sunva̱te |
bha̱radvā̍jāya dā̱śuṣe̍ || 6.016.05
tvaṁ dū̱to ama̍rtya̱ ā va̍hā̱ daivya̱ṁ jana̍m |
śṛ̱ṇvanvipra̍sya suṣṭu̱tim || 6.016.06
tvāma̍gne svā̱dhyo̱3̱̍ martā̍so de̱vavī̍taye |
ya̱jñeṣu̍ de̱vamī̍ḻate || 6.016.07
tava̱ pra ya̍kṣi sa̱ṁdṛśa̍mu̱ta kratu̍ṁ su̱dāna̍vaḥ |
viśve̍ juṣanta kā̱mina̍ḥ || 6.016.08
tvaṁ hotā̱ manu̍rhito̱ vahni̍rā̱sā vi̱duṣṭa̍raḥ |
agne̱ yakṣi̍ di̱vo viśa̍ḥ || 6.016.09
agna̱ ā yā̍hi vī̱taye̍ gṛṇā̱no ha̱vyadā̍taye |
ni hotā̍ satsi ba̱rhiṣi̍ || 6.016.10
taṁ tvā̍ sa̱midbhi̍raṅgiro ghṛ̱tena̍ vardhayāmasi |
bṛ̱haccho̍cā yaviṣṭhya || 6.016.11
sa na̍ḥ pṛ̱thu śra̱vāyya̱macchā̍ deva vivāsasi |
bṛ̱hada̍gne su̱vīrya̍m || 6.016.12
tvāma̍gne̱ puṣka̍rā̱dadhyatha̍rvā̱ nira̍manthata |
mū̱rdhno viśva̍sya vā̱ghata̍ḥ || 6.016.13
tamu̍ tvā da̱dhyaṅṅṛṣi̍ḥ pu̱tra ī̍dhe̱ atha̍rvaṇaḥ |
vṛ̱tra̱haṇa̍ṁ puraṁda̱ram || 6.016.14
tamu̍ tvā pā̱thyo vṛṣā̱ samī̍dhe dasyu̱hanta̍mam |
dha̱na̱ṁja̱yaṁ raṇe̍raṇe || 6.016.15
ehyū̱ ṣu bravā̍ṇi̱ te'gna̍ i̱ttheta̍rā̱ gira̍ḥ |
e̱bhirva̍rdhāsa̱ indu̍bhiḥ || 6.016.16
yatra̱ kva̍ ca te̱ mano̱ dakṣa̍ṁ dadhasa̱ utta̍ram |
tatrā̱ sada̍ḥ kṛṇavase || 6.016.17
na̱hi te̍ pū̱rtama̍kṣi̱padbhuva̍nnemānāṁ vaso |
athā̱ duvo̍ vanavase || 6.016.18
āgnira̍gāmi̱ bhāra̍to vṛtra̱hā pu̍ru̱ceta̍naḥ |
divo̍dāsasya̱ satpa̍tiḥ || 6.016.19
sa hi viśvāti̱ pārthi̍vā ra̱yiṁ dāśa̍nmahitva̱nā |
va̱nvannavā̍to̱ astṛ̍taḥ || 6.016.20
sa pra̍tna̱vannavī̍ya̱sāgne̍ dyu̱mnena̍ sa̱ṁyatā̍ |
bṛ̱hatta̍tantha bhā̱nunā̍ || 6.016.21
pra va̍ḥ sakhāyo a̱gnaye̱ stoma̍ṁ ya̱jñaṁ ca̍ dhṛṣṇu̱yā |
arca̱ gāya̍ ca ve̱dhase̍ || 6.016.22
sa hi yo mānu̍ṣā yu̱gā sīda̱ddhotā̍ ka̱vikra̍tuḥ |
dū̱taśca̍ havya̱vāha̍naḥ || 6.016.23
tā rājā̍nā̱ śuci̍vratādi̱tyānmāru̍taṁ ga̱ṇam |
vaso̱ yakṣī̱ha roda̍sī || 6.016.24
vasvī̍ te agne̱ saṁdṛ̍ṣṭiriṣaya̱te martyā̍ya |
ūrjo̍ napāda̱mṛta̍sya || 6.016.25
kratvā̱ dā a̍stu̱ śreṣṭho̱'dya tvā̍ va̱nvansu̱rekṇā̍ḥ |
marta̍ ānāśa suvṛ̱ktim || 6.016.26
te te̍ agne̱ tvotā̍ i̱ṣaya̍nto̱ viśva̱māyu̍ḥ |
tara̍nto a̱ryo arā̍tīrva̱nvanto̍ a̱ryo arā̍tīḥ || 6.016.27
a̱gnisti̱gmena̍ śo̱ciṣā̱ yāsa̱dviśva̱ṁ nya1̱̍triṇa̍m |
a̱gnirno̍ vanate ra̱yim || 6.016.28
su̱vīra̍ṁ ra̱yimā bha̍ra̱ jāta̍vedo̱ vica̍rṣaṇe |
ja̱hi rakṣā̍ṁsi sukrato || 6.016.29
tvaṁ na̍ḥ pā̱hyaṁha̍so̱ jāta̍vedo aghāya̱taḥ |
rakṣā̍ ṇo brahmaṇaskave || 6.016.30
yo no̍ agne du̱reva̱ ā marto̍ va̱dhāya̱ dāśa̍ti |
tasmā̍nnaḥ pā̱hyaṁha̍saḥ || 6.016.31
tvaṁ taṁ de̍va ji̱hvayā̱ pari̍ bādhasva du̱ṣkṛta̍m |
marto̱ yo no̱ jighā̍ṁsati || 6.016.32
bha̱radvā̍jāya sa̱pratha̱ḥ śarma̍ yaccha sahantya |
agne̱ vare̍ṇya̱ṁ vasu̍ || 6.016.33
a̱gnirvṛ̱trāṇi̍ jaṅghanaddraviṇa̱syurvi̍pa̱nyayā̍ |
sami̍ddhaḥ śu̱kra āhu̍taḥ || 6.016.34
garbhe̍ mā̱tuḥ pi̱tuṣpi̱tā vi̍didyutā̱no a̱kṣare̍ |
sīda̍nnṛ̱tasya̱ yoni̱mā || 6.016.35
brahma̍ pra̱jāva̱dā bha̍ra̱ jāta̍vedo̱ vica̍rṣaṇe |
agne̱ yaddī̱daya̍ddi̱vi || 6.016.36
upa̍ tvā ra̱ṇvasa̍ṁdṛśa̱ṁ praya̍svantaḥ sahaskṛta |
agne̍ sasṛ̱jmahe̱ gira̍ḥ || 6.016.37
upa̍ cchā̱yāmi̍va̱ ghṛṇe̱raga̍nma̱ śarma̍ te va̱yam |
agne̱ hira̍ṇyasaṁdṛśaḥ || 6.016.38
ya u̱gra i̍va śarya̱hā ti̱gmaśṛ̍ṅgo̱ na vaṁsa̍gaḥ |
agne̱ puro̍ ru̱roji̍tha || 6.016.39
ā yaṁ haste̱ na khā̱dina̱ṁ śiśu̍ṁ jā̱taṁ na bibhra̍ti |
vi̱śāma̱gniṁ sva̍dhva̱ram || 6.016.40
pra de̱vaṁ de̱vavī̍taye̱ bhara̍tā vasu̱vitta̍mam |
ā sve yonau̱ ni ṣī̍datu || 6.016.41
ā jā̱taṁ jā̱tave̍dasi pri̱yaṁ śi̍śī̱tāti̍thim |
syo̱na ā gṛ̱hapa̍tim || 6.016.42
agne̍ yu̱kṣvā hi ye tavāśvā̍so deva sā̱dhava̍ḥ |
ara̱ṁ vaha̍nti ma̱nyave̍ || 6.016.43
acchā̍ no yā̱hyā va̍hā̱bhi prayā̍ṁsi vī̱taye̍ |
ā de̱vānsoma̍pītaye || 6.016.44
uda̍gne bhārata dyu̱madaja̍sreṇa̱ davi̍dyutat |
śocā̱ vi bhā̍hyajara || 6.016.45
vī̱tī yo de̱vaṁ marto̍ duva̱syeda̱gnimī̍ḻītādhva̱re ha̱viṣmā̍n |
hotā̍raṁ satya̱yaja̱ṁ roda̍syoruttā̱naha̍sto̱ nama̱sā vi̍vāset || 6.016.46
ā te̍ agna ṛ̱cā ha̱virhṛ̱dā ta̱ṣṭaṁ bha̍rāmasi |
te te̍ bhavantū̱kṣaṇa̍ ṛṣa̱bhāso̍ va̱śā u̱ta || 6.016.47
a̱gniṁ de̱vāso̍ agri̱yami̱ndhate̍ vṛtra̱hanta̍mam |
yenā̱ vasū̱nyābhṛ̍tā tṛ̱ḻhā rakṣā̍ṁsi vā̱jinā̍ || 6.016.48
pibā̱ soma̍ma̱bhi yamu̍gra̱ tarda̍ ū̱rvaṁ gavya̱ṁ mahi̍ gṛṇā̱na i̍ndra |
vi yo dhṛ̍ṣṇo̱ vadhi̍ṣo vajrahasta̱ viśvā̍ vṛ̱trama̍mi̱triyā̱ śavo̍bhiḥ || 6.017.01
sa ī̍ṁ pāhi̱ ya ṛ̍jī̱ṣī taru̍tro̱ yaḥ śipra̍vānvṛṣa̱bho yo ma̍tī̱nām |
yo go̍tra̱bhidva̍jra̱bhṛdyo ha̍ri̱ṣṭhāḥ sa i̍ndra ci̱trā a̱bhi tṛ̍ndhi̱ vājā̍n || 6.017.02
e̱vā pā̍hi pra̱tnathā̱ manda̍tu tvā śru̱dhi brahma̍ vāvṛ̱dhasvo̱ta gī̱rbhiḥ |
ā̱viḥ sūrya̍ṁ kṛṇu̱hi pī̍pi̱hīṣo̍ ja̱hi śatrū̍ra̱bhi gā i̍ndra tṛndhi || 6.017.03
te tvā̱ madā̍ bṛ̱hadi̍ndra svadhāva i̱me pī̱tā u̍kṣayanta dyu̱manta̍m |
ma̱hāmanū̍naṁ ta̱vasa̱ṁ vibhū̍tiṁ matsa̱rāso̍ jarhṛṣanta pra̱sāha̍m || 6.017.04
yebhi̱ḥ sūrya̍mu̱ṣasa̍ṁ mandasā̱no'vā̍sa̱yo'pa̍ dṛ̱ḻhāni̱ dardra̍t |
ma̱hāmadri̱ṁ pari̱ gā i̍ndra̱ santa̍ṁ nu̱tthā acyu̍ta̱ṁ sada̍sa̱spari̱ svāt || 6.017.05
tava̱ kratvā̱ tava̱ tadda̱ṁsanā̍bhirā̱māsu̍ pa̱kvaṁ śacyā̱ ni dī̍dhaḥ |
aurṇo̱rdura̍ u̱sriyā̍bhyo̱ vi dṛ̱ḻhodū̱rvādgā a̍sṛjo̱ aṅgi̍rasvān || 6.017.06
pa̱prātha̱ kṣāṁ mahi̱ daṁso̱ vyu1̱̍rvīmupa̱ dyāmṛ̱ṣvo bṛ̱hadi̍ndra stabhāyaḥ |
adhā̍rayo̱ roda̍sī de̱vapu̍tre pra̱tne mā̱tarā̍ ya̱hvī ṛ̱tasya̍ || 6.017.07
adha̍ tvā̱ viśve̍ pu̱ra i̍ndra de̱vā eka̍ṁ ta̱vasa̍ṁ dadhire̱ bharā̍ya |
ade̍vo̱ yada̱bhyauhi̍ṣṭa de̱vānsva̍rṣātā vṛṇata̱ indra̱matra̍ || 6.017.08
adha̱ dyauści̍tte̱ apa̱ sā nu vajrā̍ddvi̱tāna̍madbhi̱yasā̱ svasya̍ ma̱nyoḥ |
ahi̱ṁ yadindro̍ a̱bhyoha̍sāna̱ṁ ni ci̍dvi̱śvāyu̍ḥ śa̱yathe̍ ja̱ghāna̍ || 6.017.09
adha̱ tvaṣṭā̍ te ma̱ha u̍gra̱ vajra̍ṁ sa̱hasra̍bhṛṣṭiṁ vavṛtaccha̱tāśri̍m |
nikā̍mama̱rama̍ṇasa̱ṁ yena̱ nava̍nta̱mahi̱ṁ saṁ pi̍ṇagṛjīṣin || 6.017.10
vardhā̱nyaṁ viśve̍ ma̱ruta̍ḥ sa̱joṣā̱ḥ paca̍ccha̱taṁ ma̍hi̱ṣā i̍ndra̱ tubhya̍m |
pū̱ṣā viṣṇu̱strīṇi̱ sarā̍ṁsi dhāvanvṛtra̱haṇa̍ṁ madi̱rama̱ṁśuma̍smai || 6.017.11
ā kṣodo̱ mahi̍ vṛ̱taṁ na̱dīnā̱ṁ pari̍ṣṭhitamasṛja ū̱rmima̱pām |
tāsā̱manu̍ pra̱vata̍ indra̱ panthā̱ṁ prārda̍yo̱ nīcī̍ra̱pasa̍ḥ samu̱dram || 6.017.12
e̱vā tā viśvā̍ cakṛ̱vāṁsa̱mindra̍ṁ ma̱hāmu̱grama̍ju̱ryaṁ sa̍ho̱dām |
su̱vīra̍ṁ tvā svāyu̱dhaṁ su̱vajra̱mā brahma̱ navya̱mava̍se vavṛtyāt || 6.017.13
sa no̱ vājā̍ya̱ śrava̍sa i̱ṣe ca̍ rā̱ye dhe̍hi dyu̱mata̍ indra̱ viprā̍n |
bha̱radvā̍je nṛ̱vata̍ indra sū̱rīndi̱vi ca̍ smaidhi̱ pārye̍ na indra || 6.017.14
a̱yā vāja̍ṁ de̱vahi̍taṁ sanema̱ made̍ma śa̱tahi̍māḥ su̱vīrā̍ḥ || 6.017.15
tamu̍ ṣṭuhi̱ yo a̱bhibhū̍tyojā va̱nvannavā̍taḥ puruhū̱ta indra̍ḥ |
aṣā̍ḻhamu̱graṁ saha̍mānamā̱bhirgī̱rbhirva̍rdha vṛṣa̱bhaṁ ca̍rṣaṇī̱nām || 6.018.01
sa yu̱dhmaḥ satvā̍ khaja̱kṛtsa̱madvā̍ tuvimra̱kṣo na̍danu̱mā ṛ̍jī̱ṣī |
bṛ̱hadre̍ṇu̱ścyava̍no̱ mānu̍ṣīṇā̱meka̍ḥ kṛṣṭī̱nāma̍bhavatsa̱hāvā̍ || 6.018.02
tvaṁ ha̱ nu tyada̍damāyo̱ dasyū̱reka̍ḥ kṛ̱ṣṭīra̍vano̱rāryā̍ya |
asti̍ svi̱nnu vī̱ryaṁ1̱̍ tatta̍ indra̱ na svi̍dasti̱ tadṛ̍tu̱thā vi vo̍caḥ || 6.018.03
sadiddhi te̍ tuvijā̱tasya̱ manye̱ saha̍ḥ sahiṣṭha tura̱tastu̱rasya̍ |
u̱gramu̱grasya̍ ta̱vasa̱stavī̱yo'ra̍dhrasya radhra̱turo̍ babhūva || 6.018.04
tanna̍ḥ pra̱tnaṁ sa̱khyama̍stu yu̱ṣme i̱tthā vada̍dbhirva̱lamaṅgi̍robhiḥ |
hanna̍cyutacyuddasme̱ṣaya̍ntamṛ̱ṇoḥ puro̱ vi duro̍ asya̱ viśvā̍ḥ || 6.018.05
sa hi dhī̱bhirhavyo̱ astyu̱gra ī̍śāna̱kṛnma̍ha̱ti vṛ̍tra̱tūrye̍ |
sa to̱kasā̍tā̱ tana̍ye̱ sa va̱jrī vi̍tanta̱sāyyo̍ abhavatsa̱matsu̍ || 6.018.06
sa ma̱jmanā̱ jani̍ma̱ mānu̍ṣāṇā̱mama̍rtyena̱ nāmnāti̱ pra sa̍rsre |
sa dyu̱mnena̱ sa śava̍so̱ta rā̱yā sa vī̱rye̍ṇa̱ nṛta̍ma̱ḥ samo̍kāḥ || 6.018.07
sa yo na mu̱he na mithū̱ jano̱ bhūtsu̱mantu̍nāmā̱ cumu̍ri̱ṁ dhuni̍ṁ ca |
vṛ̱ṇakpipru̱ṁ śamba̍ra̱ṁ śuṣṇa̱mindra̍ḥ pu̱rāṁ cyau̱tnāya̍ śa̱yathā̍ya̱ nū ci̍t || 6.018.08
u̱dāva̍tā̱ tvakṣa̍sā̱ panya̍sā ca vṛtra̱hatyā̍ya̱ ratha̍mindra tiṣṭha |
dhi̱ṣva vajra̱ṁ hasta̱ ā da̍kṣiṇa̱trābhi pra ma̍nda purudatra mā̱yāḥ || 6.018.09
a̱gnirna śuṣka̱ṁ vana̍mindra he̱tī rakṣo̱ ni dha̍kṣya̱śani̱rna bhī̱mā |
ga̱mbhī̱raya̍ ṛ̱ṣvayā̱ yo ru̱rojādhvā̍nayadduri̱tā da̱mbhaya̍cca || 6.018.10
ā sa̱hasra̍ṁ pa̱thibhi̍rindra rā̱yā tuvi̍dyumna tuvi̱vāje̍bhira̱rvāk |
yā̱hi sū̍no sahaso̱ yasya̱ nū ci̱dade̍va̱ īśe̍ puruhūta̱ yoto̍ḥ || 6.018.11
pra tu̍vidyu̱mnasya̱ sthavi̍rasya̱ ghṛṣve̍rdi̱vo ra̍rapśe mahi̱mā pṛ̍thi̱vyāḥ |
nāsya̱ śatru̱rna pra̍ti̱māna̍masti̱ na pra̍ti̱ṣṭhiḥ pu̍rumā̱yasya̱ sahyo̍ḥ || 6.018.12
pra tatte̍ a̱dyā kara̍ṇaṁ kṛ̱taṁ bhū̱tkutsa̱ṁ yadā̱yuma̍tithi̱gvama̍smai |
pu̱rū sa̱hasrā̱ ni śi̍śā a̱bhi kṣāmuttūrva̍yāṇaṁ dhṛṣa̱tā ni̍netha || 6.018.13
anu̱ tvāhi̍ghne̱ adha̍ deva de̱vā mada̱nviśve̍ ka̱vita̍maṁ kavī̱nām |
karo̱ yatra̱ vari̍vo bādhi̱tāya̍ di̱ve janā̍ya ta̱nve̍ gṛṇā̱naḥ || 6.018.14
anu̱ dyāvā̍pṛthi̱vī tatta̱ ojo'ma̍rtyā jihata indra de̱vāḥ |
kṛ̱ṣvā kṛ̍tno̱ akṛ̍ta̱ṁ yatte̱ astyu̱kthaṁ navī̍yo janayasva ya̱jñaiḥ || 6.018.15
ma̱hā indro̍ nṛ̱vadā ca̍rṣaṇi̱prā u̱ta dvi̱barhā̍ ami̱naḥ saho̍bhiḥ |
a̱sma̱drya̍gvāvṛdhe vī̱ryā̍yo̱ruḥ pṛ̱thuḥ sukṛ̍taḥ ka̱rtṛbhi̍rbhūt || 6.019.01
indra̍me̱va dhi̱ṣaṇā̍ sā̱taye̍ dhādbṛ̱hanta̍mṛ̱ṣvama̱jara̱ṁ yuvā̍nam |
aṣā̍ḻhena̱ śava̍sā śūśu̱vāṁsa̍ṁ sa̱dyaści̱dyo vā̍vṛ̱dhe asā̍mi || 6.019.02
pṛ̱thū ka̱rasnā̍ bahu̱lā gabha̍stī asma̱drya1̱̍ksaṁ mi̍mīhi̱ śravā̍ṁsi |
yū̱theva̍ pa̱śvaḥ pa̍śu̱pā damū̍nā a̱smā i̍ndrā̱bhyā va̍vṛtsvā̱jau || 6.019.03
taṁ va̱ indra̍ṁ ca̱tina̍masya śā̱kairi̱ha nū̱naṁ vā̍ja̱yanto̍ huvema |
yathā̍ ci̱tpūrve̍ jari̱tāra̍ ā̱surane̍dyā anava̱dyā ari̍ṣṭāḥ || 6.019.04
dhṛ̱tavra̍to dhana̱dāḥ soma̍vṛddha̱ḥ sa hi vā̱masya̱ vasu̍naḥ puru̱kṣuḥ |
saṁ ja̍gmire pa̱thyā̱3̱̍ rāyo̍ asminsamu̱dre na sindha̍vo̱ yāda̍mānāḥ || 6.019.05
śavi̍ṣṭhaṁ na̱ ā bha̍ra śūra̱ śava̱ oji̍ṣṭha̱mojo̍ abhibhūta u̱gram |
viśvā̍ dyu̱mnā vṛṣṇyā̱ mānu̍ṣāṇāma̱smabhya̍ṁ dā harivo māda̱yadhyai̍ || 6.019.06
yaste̱ mada̍ḥ pṛtanā̱ṣāḻamṛ̍dhra̱ indra̱ taṁ na̱ ā bha̍ra śūśu̱vāṁsa̍m |
yena̍ to̱kasya̱ tana̍yasya sā̱tau ma̍ṁsī̱mahi̍ jigī̱vāṁsa̱stvotā̍ḥ || 6.019.07
ā no̍ bhara̱ vṛṣa̍ṇa̱ṁ śuṣma̍mindra dhana̱spṛta̍ṁ śūśu̱vāṁsa̍ṁ su̱dakṣa̍m |
yena̱ vaṁsā̍ma̱ pṛta̍nāsu̱ śatrū̱ntavo̱tibhi̍ru̱ta jā̱mīrajā̍mīn || 6.019.08
ā te̱ śuṣmo̍ vṛṣa̱bha e̍tu pa̱ścādotta̱rāda̍dha̱rādā pu̱rastā̍t |
ā vi̱śvato̍ a̱bhi same̍tva̱rvāṅindra̍ dyu̱mnaṁ sva̍rvaddhehya̱sme || 6.019.09
nṛ̱vatta̍ indra̱ nṛta̍mābhirū̱tī va̍ṁsī̱mahi̍ vā̱maṁ śroma̍tebhiḥ |
īkṣe̱ hi vasva̍ u̱bhaya̍sya rāja̱ndhā ratna̱ṁ mahi̍ sthū̱raṁ bṛ̱hanta̍m || 6.019.10
ma̱rutva̍ntaṁ vṛṣa̱bhaṁ vā̍vṛdhā̱namaka̍vāriṁ di̱vyaṁ śā̱samindra̍m |
vi̱śvā̱sāha̱mava̍se̱ nūta̍nāyo̱graṁ sa̍ho̱dāmi̱ha taṁ hu̍vema || 6.019.11
jana̍ṁ vajri̱nmahi̍ ci̱nmanya̍māname̱bhyo nṛbhyo̍ randhayā̱ yeṣvasmi̍ |
adhā̱ hi tvā̍ pṛthi̱vyāṁ śūra̍sātau̱ havā̍mahe̱ tana̍ye̱ goṣva̱psu || 6.019.12
va̱yaṁ ta̍ e̱bhiḥ pu̍ruhūta sa̱khyaiḥ śatro̍ḥśatro̱rutta̍ra̱ itsyā̍ma |
ghnanto̍ vṛ̱trāṇyu̱bhayā̍ni śūra rā̱yā ma̍dema bṛha̱tā tvotā̍ḥ || 6.019.13
dyaurna ya i̍ndrā̱bhi bhūmā̱ryasta̱sthau ra̱yiḥ śava̍sā pṛ̱tsu janā̍n |
taṁ na̍ḥ sa̱hasra̍bharamurvarā̱sāṁ da̱ddhi sū̍no sahaso vṛtra̱tura̍m || 6.020.01
di̱vo na tubhya̱manvi̍ndra sa̱trāsu̱rya̍ṁ de̱vebhi̍rdhāyi̱ viśva̍m |
ahi̱ṁ yadvṛ̱trama̱po va̍vri̱vāṁsa̱ṁ hannṛ̍jīṣi̱nviṣṇu̍nā sacā̱naḥ || 6.020.02
tūrva̱nnojī̍yānta̱vasa̱stavī̍yānkṛ̱tabra̱hmendro̍ vṛ̱ddhama̍hāḥ |
rājā̍bhava̱nmadhu̍naḥ so̱myasya̱ viśvā̍sā̱ṁ yatpu̱rāṁ da̱rtnumāva̍t || 6.020.03
śa̱taira̍padranpa̱ṇaya̍ i̱ndrātra̱ daśo̍ṇaye ka̱vaye̱'rkasā̍tau |
va̱dhaiḥ śuṣṇa̍syā̱śuṣa̍sya mā̱yāḥ pi̱tvo nāri̍recī̱tkiṁ ca̱na pra || 6.020.04
ma̱ho dru̱ho apa̍ vi̱śvāyu̍ dhāyi̱ vajra̍sya̱ yatpata̍ne̱ pādi̱ śuṣṇa̍ḥ |
u̱ru ṣa sa̱ratha̱ṁ sāra̍thaye ka̱rindra̱ḥ kutsā̍ya̱ sūrya̍sya sā̱tau || 6.020.05
pra śye̱no na ma̍di̱rama̱ṁśuma̍smai̱ śiro̍ dā̱sasya̱ namu̍cermathā̱yan |
prāva̱nnamī̍ṁ sā̱pyaṁ sa̱santa̍ṁ pṛ̱ṇagrā̱yā sami̱ṣā saṁ sva̱sti || 6.020.06
vi pipro̱rahi̍māyasya dṛ̱ḻhāḥ puro̍ vajri̱ñchava̍sā̱ na da̍rdaḥ |
sudā̍ma̱ntadrekṇo̍ apramṛ̱ṣyamṛ̱jiśva̍ne dā̱traṁ dā̱śuṣe̍ dāḥ || 6.020.07
sa ve̍ta̱suṁ daśa̍māya̱ṁ daśo̍ṇi̱ṁ tūtu̍ji̱mindra̍ḥ svabhi̱ṣṭisu̍mnaḥ |
ā tugra̱ṁ śaśva̱dibha̱ṁ dyota̍nāya mā̱turna sī̱mupa̍ sṛjā i̱yadhyai̍ || 6.020.08
sa ī̱ṁ spṛdho̍ vanate̱ apra̍tīto̱ bibhra̱dvajra̍ṁ vṛtra̱haṇa̱ṁ gabha̍stau |
tiṣṭha̱ddharī̱ adhyaste̍va̱ garte̍ vaco̱yujā̍ vahata̱ indra̍mṛ̱ṣvam || 6.020.09
sa̱nema̱ te'va̍sā̱ navya̍ indra̱ pra pū̱rava̍ḥ stavanta e̱nā ya̱jñaiḥ |
sa̱pta yatpura̱ḥ śarma̱ śāra̍dī̱rdarddhandāsī̍ḥ puru̱kutsā̍ya̱ śikṣa̍n || 6.020.10
tvaṁ vṛ̱dha i̍ndra pū̱rvyo bhū̍rvariva̱syannu̱śane̍ kā̱vyāya̍ |
parā̱ nava̍vāstvamanu̱deya̍ṁ ma̱he pi̱tre da̍dātha̱ svaṁ napā̍tam || 6.020.11
tvaṁ dhuni̍rindra̱ dhuni̍matīrṛ̱ṇora̱paḥ sī̱rā na srava̍ntīḥ |
pra yatsa̍mu̱dramati̍ śūra̱ parṣi̍ pā̱rayā̍ tu̱rvaśa̱ṁ yadu̍ṁ sva̱sti || 6.020.12
tava̍ ha̱ tyadi̍ndra̱ viśva̍mā̱jau sa̱sto dhunī̱cumu̍rī̱ yā ha̱ siṣva̍p |
dī̱daya̱dittubhya̱ṁ some̍bhiḥ su̱nvanda̱bhīti̍ri̱dhmabhṛ̍tiḥ pa̱kthya1̱̍rkaiḥ || 6.020.13
i̱mā u̍ tvā puru̱tama̍sya kā̱rorhavya̍ṁ vīra̱ havyā̍ havante |
dhiyo̍ rathe̱ṣṭhāma̱jara̱ṁ navī̍yo ra̱yirvibhū̍tirīyate vaca̱syā || 6.021.01
tamu̍ stuṣa̱ indra̱ṁ yo vidā̍no̱ girvā̍hasaṁ gī̱rbhirya̱jñavṛ̍ddham |
yasya̱ diva̱mati̍ ma̱hnā pṛ̍thi̱vyāḥ pu̍rumā̱yasya̍ riri̱ce ma̍hi̱tvam || 6.021.02
sa ittamo̍'vayu̱naṁ ta̍ta̱nvatsūrye̍ṇa va̱yuna̍vaccakāra |
ka̱dā te̱ martā̍ a̱mṛta̍sya̱ dhāmeya̍kṣanto̱ na mi̍nanti svadhāvaḥ || 6.021.03
yastā ca̱kāra̱ sa kuha̍ svi̱dindra̱ḥ kamā jana̍ṁ carati̱ kāsu̍ vi̱kṣu |
kaste̍ ya̱jño mana̍se̱ śaṁ varā̍ya̱ ko a̱rka i̍ndra kata̱maḥ sa hotā̍ || 6.021.04
i̱dā hi te̱ vevi̍ṣataḥ purā̱jāḥ pra̱tnāsa̍ ā̱suḥ pu̍rukṛ̱tsakhā̍yaḥ |
ye ma̍dhya̱māsa̍ u̱ta nūta̍nāsa u̱tāva̱masya̍ puruhūta bodhi || 6.021.05
taṁ pṛ̱cchanto'va̍rāsa̱ḥ parā̍ṇi pra̱tnā ta̍ indra̱ śrutyānu̍ yemuḥ |
arcā̍masi vīra brahmavāho̱ yāde̱va vi̱dma tāttvā̍ ma̱hānta̍m || 6.021.06
a̱bhi tvā̱ pājo̍ ra̱kṣaso̱ vi ta̍sthe̱ mahi̍ jajñā̱nama̱bhi tatsu ti̍ṣṭha |
tava̍ pra̱tnena̱ yujye̍na̱ sakhyā̱ vajre̍ṇa dhṛṣṇo̱ apa̱ tā nu̍dasva || 6.021.07
sa tu śru̍dhīndra̱ nūta̍nasya brahmaṇya̱to vī̍ra kārudhāyaḥ |
tvaṁ hyā̱3̱̍piḥ pra̱divi̍ pitṝ̱ṇāṁ śaśva̍dba̱bhūtha̍ su̱hava̱ eṣṭau̍ || 6.021.08
protaye̱ varu̍ṇaṁ mi̱tramindra̍ṁ ma̱ruta̍ḥ kṛ̱ṣvāva̍se no a̱dya |
pra pū̱ṣaṇa̱ṁ viṣṇu̍ma̱gniṁ pura̍ṁdhiṁ savi̱tāra̱moṣa̍dhī̱ḥ parva̍tāśca || 6.021.09
i̱ma u̍ tvā puruśāka prayajyo jari̱tāro̍ a̱bhya̍rcantya̱rkaiḥ |
śru̱dhī hava̱mā hu̍va̱to hu̍vā̱no na tvāvā̍ a̱nyo a̍mṛta̱ tvada̍sti || 6.021.10
nū ma̱ ā vāca̱mupa̍ yāhi vi̱dvānviśve̍bhiḥ sūno sahaso̱ yaja̍traiḥ |
ye a̍gniji̱hvā ṛ̍ta̱sāpa̍ ā̱surye manu̍ṁ ca̱krurupa̍ra̱ṁ dasā̍ya || 6.021.11
sa no̍ bodhi purae̱tā su̱geṣū̱ta du̱rgeṣu̍ pathi̱kṛdvidā̍naḥ |
ye aśra̍māsa u̱ravo̱ vahi̍ṣṭhā̱stebhi̍rna indrā̱bhi va̍kṣi̱ vāja̍m || 6.021.12
ya eka̱ iddhavya̍ścarṣaṇī̱nāmindra̱ṁ taṁ gī̱rbhira̱bhya̍rca ā̱bhiḥ |
yaḥ patya̍te vṛṣa̱bho vṛṣṇyā̍vānsa̱tyaḥ satvā̍ purumā̱yaḥ saha̍svān || 6.022.01
tamu̍ na̱ḥ pūrve̍ pi̱taro̱ nava̍gvāḥ sa̱pta viprā̍so a̱bhi vā̱jaya̍ntaḥ |
na̱kṣa̱ddā̱bhaṁ tatu̍riṁ parvate̱ṣṭhāmadro̍ghavācaṁ ma̱tibhi̱ḥ śavi̍ṣṭham || 6.022.02
tamī̍maha̱ indra̍masya rā̱yaḥ pu̍ru̱vīra̍sya nṛ̱vata̍ḥ puru̱kṣoḥ |
yo askṛ̍dhoyura̱jara̱ḥ sva̍rvā̱ntamā bha̍ra harivo māda̱yadhyai̍ || 6.022.03
tanno̱ vi vo̍co̱ yadi̍ te pu̱rā ci̍jjari̱tāra̍ āna̱śuḥ su̱mnami̍ndra |
kaste̍ bhā̱gaḥ kiṁ vayo̍ dudhra khidva̱ḥ puru̍hūta purūvaso'sura̱ghnaḥ || 6.022.04
taṁ pṛ̱cchantī̱ vajra̍hastaṁ rathe̱ṣṭhāmindra̱ṁ vepī̱ vakva̍rī̱ yasya̱ nū gīḥ |
tu̱vi̱grā̱bhaṁ tu̍vikū̱rmiṁ ra̍bho̱dāṁ gā̱tumi̍ṣe̱ nakṣa̍te̱ tumra̱maccha̍ || 6.022.05
a̱yā ha̱ tyaṁ mā̱yayā̍ vāvṛdhā̱naṁ ma̍no̱juvā̍ svatava̱ḥ parva̍tena |
acyu̍tā cidvīḻi̱tā svo̍jo ru̱jo vi dṛ̱ḻhā dhṛ̍ṣa̱tā vi̍rapśin || 6.022.06
taṁ vo̍ dhi̱yā navya̍syā̱ śavi̍ṣṭhaṁ pra̱tnaṁ pra̍tna̱vatpa̍ritaṁsa̱yadhyai̍ |
sa no̍ vakṣadanimā̱naḥ su̱vahmendro̱ viśvā̱nyati̍ du̱rgahā̍ṇi || 6.022.07
ā janā̍ya̱ druhva̍ṇe̱ pārthi̍vāni di̱vyāni̍ dīpayo̱'ntari̍kṣā |
tapā̍ vṛṣanvi̱śvata̍ḥ śo̱ciṣā̱ tānbra̍hma̱dviṣe̍ śocaya̱ kṣāma̱paśca̍ || 6.022.08
bhuvo̱ jana̍sya di̱vyasya̱ rājā̱ pārthi̍vasya̱ jaga̍tastveṣasaṁdṛk |
dhi̱ṣva vajra̱ṁ dakṣi̍ṇa indra̱ haste̱ viśvā̍ ajurya dayase̱ vi mā̱yāḥ || 6.022.09
ā sa̱ṁyata̍mindra ṇaḥ sva̱stiṁ śa̍tru̱tūryā̍ya bṛha̱tīmamṛ̍dhrām |
yayā̱ dāsā̱nyāryā̍ṇi vṛ̱trā karo̍ vajrinsu̱tukā̱ nāhu̍ṣāṇi || 6.022.10
sa no̍ ni̱yudbhi̍ḥ puruhūta vedho vi̱śvavā̍rābhi̱rā ga̍hi prayajyo |
na yā ade̍vo̱ vara̍te̱ na de̱va ābhi̍ryāhi̱ tūya̱mā ma̍drya̱drik || 6.022.11
su̱ta ittvaṁ nimi̍śla indra̱ some̱ stome̱ brahma̍ṇi śa̱syamā̍na u̱kthe |
yadvā̍ yu̱ktābhyā̍ṁ maghava̱nhari̍bhyā̱ṁ bibhra̱dvajra̍ṁ bā̱hvori̍ndra̱ yāsi̍ || 6.023.01
yadvā̍ di̱vi pārye̱ suṣvi̍mindra vṛtra̱hatye'va̍si̱ śūra̍sātau |
yadvā̱ dakṣa̍sya bi̱bhyuṣo̱ abi̍bhya̱dara̍ndhaya̱ḥ śardha̍ta indra̱ dasyū̍n || 6.023.02
pātā̍ su̱tamindro̍ astu̱ soma̍ṁ praṇe̱nīru̱gro ja̍ri̱tāra̍mū̱tī |
kartā̍ vī̱rāya̱ suṣva̍ya u lo̱kaṁ dātā̱ vasu̍ stuva̱te kī̱raye̍ cit || 6.023.03
ganteyā̍nti̱ sava̍nā̱ hari̍bhyāṁ ba̱bhrirvajra̍ṁ pa̱piḥ soma̍ṁ da̱dirgāḥ |
kartā̍ vī̱raṁ narya̱ṁ sarva̍vīra̱ṁ śrotā̱ hava̍ṁ gṛṇa̱taḥ stoma̍vāhāḥ || 6.023.04
asmai̍ va̱yaṁ yadvā̱vāna̱ tadvi̍viṣma̱ indrā̍ya̱ yo na̍ḥ pra̱divo̱ apa̱skaḥ |
su̱te some̍ stu̱masi̱ śaṁsa̍du̱kthendrā̍ya̱ brahma̱ vardha̍na̱ṁ yathāsa̍t || 6.023.05
brahmā̍ṇi̱ hi ca̍kṛ̱ṣe vardha̍nāni̱ tāva̍tta indra ma̱tibhi̍rviviṣmaḥ |
su̱te some̍ sutapā̱ḥ śaṁta̍māni̱ rāṇḍyā̍ kriyāsma̱ vakṣa̍ṇāni ya̱jñaiḥ || 6.023.06
sa no̍ bodhi puro̱ḻāśa̱ṁ rarā̍ṇa̱ḥ pibā̱ tu soma̱ṁ goṛ̍jīkamindra |
edaṁ ba̱rhiryaja̍mānasya sīdo̱ruṁ kṛ̍dhi tvāya̱ta u̍ lo̱kam || 6.023.07
sa ma̍ndasvā̱ hyanu̱ joṣa̍mugra̱ pra tvā̍ ya̱jñāsa̍ i̱me a̍śnuvantu |
preme havā̍saḥ puruhū̱tama̱sme ā tve̱yaṁ dhīrava̍sa indra yamyāḥ || 6.023.08
taṁ va̍ḥ sakhāya̱ḥ saṁ yathā̍ su̱teṣu̱ some̍bhirīṁ pṛṇatā bho̱jamindra̍m |
ku̱vittasmā̱ asa̍ti no̱ bharā̍ya̱ na suṣvi̱mindro'va̍se mṛdhāti || 6.023.09
e̱vedindra̍ḥ su̱te a̍stāvi̱ some̍ bha̱radvā̍jeṣu̱ kṣaya̱dinma̱ghona̍ḥ |
asa̱dyathā̍ jari̱tra u̱ta sū̱ririndro̍ rā̱yo vi̱śvavā̍rasya dā̱tā || 6.023.10
vṛṣā̱ mada̱ indre̱ śloka̍ u̱kthā sacā̱ some̍ṣu suta̱pā ṛ̍jī̱ṣī |
a̱rca̱tryo̍ ma̱ghavā̱ nṛbhya̍ u̱kthairdyu̱kṣo rājā̍ gi̱rāmakṣi̍totiḥ || 6.024.01
tatu̍rirvī̱ro naryo̱ vice̍tā̱ḥ śrotā̱ hava̍ṁ gṛṇa̱ta u̱rvyū̍tiḥ |
vasu̱ḥ śaṁso̍ na̱rāṁ kā̱rudhā̍yā vā̱jī stu̱to vi̱dathe̍ dāti̱ vāja̍m || 6.024.02
akṣo̱ na ca̱kryo̍ḥ śūra bṛ̱hanpra te̍ ma̱hnā ri̍rice̱ roda̍syoḥ |
vṛ̱kṣasya̱ nu te̍ puruhūta va̱yā vyū̱3̱̍tayo̍ ruruhurindra pū̱rvīḥ || 6.024.03
śacī̍vataste puruśāka̱ śākā̱ gavā̍miva sru̱taya̍ḥ sa̱ṁcara̍ṇīḥ |
va̱tsānā̱ṁ na ta̱ntaya̍sta indra̱ dāma̍nvanto adā̱māna̍ḥ sudāman || 6.024.04
a̱nyada̱dya karva̍rama̱nyadu̱ śvo'sa̍cca̱ sanmuhu̍rāca̱kririndra̍ḥ |
mi̱tro no̱ atra̱ varu̍ṇaśca pū̱ṣāryo vaśa̍sya parye̱tāsti̍ || 6.024.05
vi tvadāpo̱ na parva̍tasya pṛ̱ṣṭhādu̱kthebhi̍rindrānayanta ya̱jñaiḥ |
taṁ tvā̱bhiḥ su̍ṣṭu̱tibhi̍rvā̱jaya̍nta ā̱jiṁ na ja̍gmurgirvāho̱ aśvā̍ḥ || 6.024.06
na yaṁ jara̍nti śa̱rado̱ na māsā̱ na dyāva̱ indra̍mavaka̱rśaya̍nti |
vṛ̱ddhasya̍ cidvardhatāmasya ta̱nūḥ stome̍bhiru̱kthaiśca̍ śa̱syamā̍nā || 6.024.07
na vī̱ḻave̱ nama̍te̱ na sthi̱rāya̱ na śardha̍te̱ dasyu̍jūtāya sta̱vān |
ajrā̱ indra̍sya gi̱raya̍ścidṛ̱ṣvā ga̍mbhī̱re ci̍dbhavati gā̱dhama̍smai || 6.024.08
ga̱mbhī̱reṇa̍ na u̱ruṇā̍matri̱npreṣo ya̍ndhi sutapāva̱nvājā̍n |
sthā ū̱ ṣu ū̱rdhva ū̱tī ari̍ṣaṇyanna̱ktorvyu̍ṣṭau̱ pari̍takmyāyām || 6.024.09
saca̍sva nā̱yamava̍se a̱bhīka̍ i̱to vā̱ tami̍ndra pāhi ri̱ṣaḥ |
a̱mā cai̍na̱mara̍ṇye pāhi ri̱ṣo made̍ma śa̱tahi̍māḥ su̱vīrā̍ḥ || 6.024.10
yā ta̍ ū̱tira̍va̱mā yā pa̍ra̱mā yā ma̍dhya̱mendra̍ śuṣmi̱nnasti̍ |
tābhi̍rū̱ ṣu vṛ̍tra̱hatye̍'vīrna e̱bhiśca̱ vājai̍rma̱hānna̍ ugra || 6.025.01
ābhi̱ḥ spṛdho̍ mitha̱tīrari̍ṣaṇyanna̱mitra̍sya vyathayā ma̱nyumi̍ndra |
ābhi̱rviśvā̍ abhi̱yujo̱ viṣū̍cī̱rāryā̍ya̱ viśo'va̍ tārī̱rdāsī̍ḥ || 6.025.02
indra̍ jā̱maya̍ u̱ta ye'jā̍mayo'rvācī̱nāso̍ va̱nuṣo̍ yuyu̱jre |
tvame̍ṣāṁ vithu̱rā śavā̍ṁsi ja̱hi vṛṣṇyā̍ni kṛṇu̱hī parā̍caḥ || 6.025.03
śūro̍ vā̱ śūra̍ṁ vanate̱ śarī̍raistanū̱rucā̱ taru̍ṣi̱ yatkṛ̱ṇvaite̍ |
to̱ke vā̱ goṣu̱ tana̍ye̱ yada̱psu vi kranda̍sī u̱rvarā̍su̱ bravai̍te || 6.025.04
na̱hi tvā̱ śūro̱ na tu̱ro na dhṛ̱ṣṇurna tvā̍ yo̱dho manya̍māno yu̱yodha̍ |
indra̱ naki̍ṣṭvā̱ pratya̍styeṣā̱ṁ viśvā̍ jā̱tānya̱bhya̍si̱ tāni̍ || 6.025.05
sa pa̍tyata u̱bhayo̍rnṛ̱mṇama̱yoryadī̍ ve̱dhasa̍ḥ sami̱the hava̍nte |
vṛ̱tre vā̍ ma̱ho nṛ̱vati̱ kṣaye̍ vā̱ vyaca̍svantā̱ yadi̍ vitanta̱saite̍ || 6.025.06
adha̍ smā te carṣa̱ṇayo̱ yadejā̱nindra̍ trā̱tota bha̍vā varū̱tā |
a̱smākā̍so̱ ye nṛta̍māso a̱rya indra̍ sū̱rayo̍ dadhi̱re pu̱ro na̍ḥ || 6.025.07
anu̍ te dāyi ma̱ha i̍ndri̱yāya̍ sa̱trā te̱ viśva̱manu̍ vṛtra̱hatye̍ |
anu̍ kṣa̱tramanu̱ saho̍ yaja̱trendra̍ de̱vebhi̱ranu̍ te nṛ̱ṣahye̍ || 6.025.08
e̱vā na̱ḥ spṛdha̱ḥ sama̍jā sa̱matsvindra̍ rāra̱ndhi mi̍tha̱tīrade̍vīḥ |
vi̱dyāma̱ vasto̱rava̍sā gṛ̱ṇanto̍ bha̱radvā̍jā u̱ta ta̍ indra nū̱nam || 6.025.09
śru̱dhī na̍ indra̱ hvayā̍masi tvā ma̱ho vāja̍sya sā̱tau vā̍vṛṣā̱ṇāḥ |
saṁ yadviśo'ya̍nta̱ śūra̍sātā u̱graṁ no'va̱ḥ pārye̱ aha̍ndāḥ || 6.026.01
tvāṁ vā̱jī ha̍vate vājine̱yo ma̱ho vāja̍sya̱ gadhya̍sya sā̱tau |
tvāṁ vṛ̱treṣvi̍ndra̱ satpa̍ti̱ṁ taru̍tra̱ṁ tvāṁ ca̍ṣṭe muṣṭi̱hā goṣu̱ yudhya̍n || 6.026.02
tvaṁ ka̱viṁ co̍dayo̱'rkasā̍tau̱ tvaṁ kutsā̍ya̱ śuṣṇa̍ṁ dā̱śuṣe̍ vark |
tvaṁ śiro̍ ama̱rmaṇa̱ḥ parā̍hannatithi̱gvāya̱ śaṁsya̍ṁ kari̱ṣyan || 6.026.03
tvaṁ ratha̱ṁ pra bha̍ro yo̱dhamṛ̱ṣvamāvo̱ yudhya̍ntaṁ vṛṣa̱bhaṁ daśa̍dyum |
tvaṁ tugra̍ṁ veta̱save̱ sacā̍ha̱ntvaṁ tuji̍ṁ gṛ̱ṇanta̍mindra tūtoḥ || 6.026.04
tvaṁ tadu̱kthami̍ndra ba̱rhaṇā̍ ka̱ḥ pra yaccha̱tā sa̱hasrā̍ śūra̱ darṣi̍ |
ava̍ gi̱rerdāsa̱ṁ śamba̍raṁ ha̱nprāvo̱ divo̍dāsaṁ ci̱trābhi̍rū̱tī || 6.026.05
tvaṁ śra̱ddhābhi̍rmandasā̱naḥ somai̍rda̱bhīta̍ye̱ cumu̍rimindra siṣvap |
tvaṁ ra̱jiṁ piṭhī̍nase daśa̱syanṣa̱ṣṭiṁ sa̱hasrā̱ śacyā̱ sacā̍han || 6.026.06
a̱haṁ ca̱na tatsū̱ribhi̍rānaśyā̱ṁ tava̱ jyāya̍ indra su̱mnamoja̍ḥ |
tvayā̱ yatstava̍nte sadhavīra vī̱rāstri̱varū̍thena̱ nahu̍ṣā śaviṣṭha || 6.026.07
va̱yaṁ te̍ a̱syāmi̍ndra dyu̱mnahū̍tau̱ sakhā̍yaḥ syāma mahina̱ preṣṭhā̍ḥ |
prāta̍rdaniḥ kṣatra̱śrīra̍stu̱ śreṣṭho̍ gha̱ne vṛ̱trāṇā̍ṁ sa̱naye̱ dhanā̍nām || 6.026.08
kima̍sya̱ made̱ kimva̍sya pī̱tāvindra̱ḥ kima̍sya sa̱khye ca̍kāra |
raṇā̍ vā̱ ye ni̱ṣadi̱ kiṁ te a̍sya pu̱rā vi̍vidre̱ kimu̱ nūta̍nāsaḥ || 6.027.01
sada̍sya̱ made̱ sadva̍sya pī̱tāvindra̱ḥ sada̍sya sa̱khye ca̍kāra |
raṇā̍ vā̱ ye ni̱ṣadi̱ satte a̍sya pu̱rā vi̍vidre̱ sadu̱ nūta̍nāsaḥ || 6.027.02
na̱hi nu te̍ mahi̱mana̍ḥ samasya̱ na ma̍ghavanmaghava̱ttvasya̍ vi̱dma |
na rādha̍sorādhaso̱ nūta̍na̱syendra̱ naki̍rdadṛśa indri̱yaṁ te̍ || 6.027.03
e̱tattyatta̍ indri̱yama̍ceti̱ yenāva̍dhīrva̱raśi̍khasya̱ śeṣa̍ḥ |
vajra̍sya̱ yatte̱ niha̍tasya̱ śuṣmā̍tsva̱nācci̍dindra para̱mo da̱dāra̍ || 6.027.04
vadhī̱dindro̍ va̱raśi̍khasya̱ śeṣo̍'bhyāva̱rtine̍ cāyamā̱nāya̱ śikṣa̍n |
vṛ̱cīva̍to̱ yaddha̍riyū̱pīyā̍yā̱ṁ hanpūrve̱ ardhe̍ bhi̱yasāpa̍ro̱ dart || 6.027.05
tri̱ṁśaccha̍taṁ va̱rmiṇa̍ indra sā̱kaṁ ya̱vyāva̍tyāṁ puruhūta śrava̱syā |
vṛ̱cīva̍nta̱ḥ śara̍ve̱ patya̍mānā̱ḥ pātrā̍ bhindā̱nā nya̱rthānyā̍yan || 6.027.06
yasya̱ gāvā̍varu̱ṣā sū̍yava̱syū a̱ntarū̱ ṣu cara̍to̱ reri̍hāṇā |
sa sṛñja̍yāya tu̱rvaśa̱ṁ parā̍dādvṛ̱cīva̍to daivavā̱tāya̱ śikṣa̍n || 6.027.07
dva̱yā a̍gne ra̱thino̍ viṁśa̱tiṁ gā va̱dhūma̍to ma̱ghavā̱ mahya̍ṁ sa̱mrāṭ |
a̱bhyā̱va̱rtī cā̍yamā̱no da̍dāti dū̱ṇāśe̱yaṁ dakṣi̍ṇā pārtha̱vānā̍m || 6.027.08
ā gāvo̍ agmannu̱ta bha̱drama̍kra̱nsīda̍ntu go̱ṣṭhe ra̱ṇaya̍ntva̱sme |
pra̱jāva̍tīḥ puru̱rūpā̍ i̱ha syu̱rindrā̍ya pū̱rvīru̱ṣaso̱ duhā̍nāḥ || 6.028.01
indro̱ yajva̍ne pṛṇa̱te ca̍ śikṣa̱tyupedda̍dāti̱ na svaṁ mu̍ṣāyati |
bhūyo̍bhūyo ra̱yimida̍sya va̱rdhaya̱nnabhi̍nne khi̱lye ni da̍dhāti deva̱yum || 6.028.02
na tā na̍śanti̱ na da̍bhāti̱ taska̍ro̱ nāsā̍māmi̱tro vyathi̱rā da̍dharṣati |
de̱vāśca̱ yābhi̱ryaja̍te̱ dadā̍ti ca̱ jyogittābhi̍ḥ sacate̱ gopa̍tiḥ sa̱ha || 6.028.03
na tā arvā̍ re̱ṇuka̍kāṭo aśnute̱ na sa̍ṁskṛta̱tramupa̍ yanti̱ tā a̱bhi |
u̱ru̱gā̱yamabha̍ya̱ṁ tasya̱ tā anu̱ gāvo̱ marta̍sya̱ vi ca̍ranti̱ yajva̍naḥ || 6.028.04
gāvo̱ bhago̱ gāva̱ indro̍ me acchā̱ngāva̱ḥ soma̍sya pratha̱masya̍ bha̱kṣaḥ |
i̱mā yā gāva̱ḥ sa ja̍nāsa̱ indra̍ i̱cchāmīddhṛ̱dā mana̍sā ci̱dindra̍m || 6.028.05
yū̱yaṁ gā̍vo medayathā kṛ̱śaṁ ci̍daśrī̱raṁ ci̍tkṛṇuthā su̱pratī̍kam |
bha̱draṁ gṛ̱haṁ kṛ̍ṇutha bhadravāco bṛ̱hadvo̱ vaya̍ ucyate sa̱bhāsu̍ || 6.028.06
pra̱jāva̍tīḥ sū̱yava̍saṁ ri̱śantī̍ḥ śu̱ddhā a̱paḥ su̍prapā̱ṇe piba̍ntīḥ |
mā va̍ḥ ste̱na ī̍śata̱ māghaśa̍ṁsa̱ḥ pari̍ vo he̱tī ru̱drasya̍ vṛjyāḥ || 6.028.07
upe̱damu̍pa̱parca̍namā̱su goṣūpa̍ pṛcyatām |
upa̍ ṛṣa̱bhasya̱ reta̱syupe̍ndra̱ tava̍ vī̱rye̍ || 6.028.08
indra̍ṁ vo̱ nara̍ḥ sa̱khyāya̍ sepurma̱ho yanta̍ḥ suma̱taye̍ cakā̱nāḥ |
ma̱ho hi dā̱tā vajra̍hasto̱ asti̍ ma̱hāmu̍ ra̱ṇvamava̍se yajadhvam || 6.029.01
ā yasmi̱nhaste̱ naryā̍ mimi̱kṣurā rathe̍ hira̱ṇyaye̍ rathe̱ṣṭhāḥ |
ā ra̱śmayo̱ gabha̍styoḥ sthū̱rayo̱rādhva̱nnaśvā̍so̱ vṛṣa̍ṇo yujā̱nāḥ || 6.029.02
śri̱ye te̱ pādā̱ duva̱ ā mi̍mikṣurdhṛ̱ṣṇurva̱jrī śava̍sā̱ dakṣi̍ṇāvān |
vasā̍no̱ atka̍ṁ sura̱bhiṁ dṛ̱śe kaṁ sva1̱̍rṇa nṛ̍taviṣi̱ro ba̍bhūtha || 6.029.03
sa soma̱ āmi̍ślatamaḥ su̱to bhū̱dyasmi̍npa̱ktiḥ pa̱cyate̱ santi̍ dhā̱nāḥ |
indra̱ṁ nara̍ḥ stu̱vanto̍ brahmakā̱rā u̱kthā śaṁsa̍nto de̱vavā̍tatamāḥ || 6.029.04
na te̱ anta̱ḥ śava̍so dhāyya̱sya vi tu bā̍badhe̱ roda̍sī mahi̱tvā |
ā tā sū̱riḥ pṛ̍ṇati̱ tūtu̍jāno yū̱thevā̱psu sa̱mīja̍māna ū̱tī || 6.029.05
e̱vedindra̍ḥ su̱hava̍ ṛ̱ṣvo a̍stū̱tī anū̍tī hiriśi̱praḥ satvā̍ |
e̱vā hi jā̱to asa̍mātyojāḥ pu̱rū ca̍ vṛ̱trā ha̍nati̱ ni dasyū̍n || 6.029.06
bhūya̱ idvā̍vṛdhe vī̱ryā̍ya̱ eko̍ aju̱ryo da̍yate̱ vasū̍ni |
pra ri̍rice di̱va indra̍ḥ pṛthi̱vyā a̱rdhamida̍sya̱ prati̱ roda̍sī u̱bhe || 6.030.01
adhā̍ manye bṛ̱hada̍su̱rya̍masya̱ yāni̍ dā̱dhāra̱ naki̱rā mi̍nāti |
di̱vedi̍ve̱ sūryo̍ darśa̱to bhū̱dvi sadmā̍nyurvi̱yā su̱kratu̍rdhāt || 6.030.02
a̱dyā ci̱nnū ci̱ttadapo̍ na̱dīnā̱ṁ yadā̍bhyo̱ ara̍do gā̱tumi̍ndra |
ni parva̍tā adma̱sado̱ na se̍du̱stvayā̍ dṛ̱ḻhāni̍ sukrato̱ rajā̍ṁsi || 6.030.03
sa̱tyamittanna tvāvā̍ a̱nyo a̱stīndra̍ de̱vo na martyo̱ jyāyā̍n |
aha̱nnahi̍ṁ pari̱śayā̍na̱marṇo'vā̍sṛjo a̱po acchā̍ samu̱dram || 6.030.04
tvama̱po vi duro̱ viṣū̍cī̱rindra̍ dṛ̱ḻhama̍ruja̱ḥ parva̍tasya |
rājā̍bhavo̱ jaga̍taścarṣaṇī̱nāṁ sā̱kaṁ sūrya̍ṁ ja̱naya̱ndyāmu̱ṣāsa̍m || 6.030.05
abhū̱reko̍ rayipate rayī̱ṇāmā hasta̍yoradhithā indra kṛ̱ṣṭīḥ |
vi to̱ke a̱psu tana̍ye ca̱ sūre'vo̍canta carṣa̱ṇayo̱ vivā̍caḥ || 6.031.01
tvadbhi̱yendra̱ pārthi̍vāni̱ viśvācyu̍tā ciccyāvayante̱ rajā̍ṁsi |
dyāvā̱kṣāmā̱ parva̍tāso̱ vanā̍ni̱ viśva̍ṁ dṛ̱ḻhaṁ bha̍yate̱ ajma̱nnā te̍ || 6.031.02
tvaṁ kutse̍nā̱bhi śuṣṇa̍mindrā̱śuṣa̍ṁ yudhya̱ kuya̍va̱ṁ gavi̍ṣṭau |
daśa̍ prapi̱tve adha̱ sūrya̍sya muṣā̱yaśca̱kramavi̍ve̱ rapā̍ṁsi || 6.031.03
tvaṁ śa̱tānyava̱ śamba̍rasya̱ puro̍ jaghanthāpra̱tīni̱ dasyo̍ḥ |
aśi̍kṣo̱ yatra̱ śacyā̍ śacīvo̱ divo̍dāsāya sunva̱te su̍takre bha̱radvā̍jāya gṛṇa̱te vasū̍ni || 6.031.04
sa sa̍tyasatvanmaha̱te raṇā̍ya̱ ratha̱mā ti̍ṣṭha tuvinṛmṇa bhī̱mam |
yā̱hi pra̍pathi̱nnava̱sopa̍ ma̱drikpra ca̍ śruta śrāvaya carṣa̱ṇibhya̍ḥ || 6.031.05
apū̍rvyā puru̱tamā̍nyasmai ma̱he vī̱rāya̍ ta̱vase̍ tu̱rāya̍ |
vi̱ra̱pśine̍ va̱jriṇe̱ śaṁta̍māni̱ vacā̍ṁsyā̱sā sthavi̍rāya takṣam || 6.032.01
sa mā̱tarā̱ sūrye̍ṇā kavī̱nāmavā̍sayadru̱jadadri̍ṁ gṛṇā̱naḥ |
svā̱dhībhi̱rṛkva̍bhirvāvaśā̱na udu̱sriyā̍ṇāmasṛjanni̱dāna̍m || 6.032.02
sa vahni̍bhi̱rṛkva̍bhi̱rgoṣu̱ śaśva̍nmi̱tajñu̍bhiḥ puru̱kṛtvā̍ jigāya |
pura̍ḥ puro̱hā sakhi̍bhiḥ sakhī̱yandṛ̱ḻhā ru̍roja ka̱vibhi̍ḥ ka̱viḥ san || 6.032.03
sa nī̱vyā̍bhirjari̱tāra̱macchā̍ ma̱ho vāje̍bhirma̱hadbhi̍śca̱ śuṣmai̍ḥ |
pu̱ru̱vīrā̍bhirvṛṣabha kṣitī̱nāmā gi̍rvaṇaḥ suvi̱tāya̱ pra yā̍hi || 6.032.04
sa sarge̍ṇa̱ śava̍sā ta̱kto atyai̍ra̱pa indro̍ dakṣiṇa̱tastu̍rā̱ṣāṭ |
i̱tthā sṛ̍jā̱nā ana̍pāvṛ̱dartha̍ṁ di̱vedi̍ve viviṣurapramṛ̱ṣyam || 6.032.05
ya oji̍ṣṭha indra̱ taṁ su no̍ dā̱ mado̍ vṛṣansvabhi̱ṣṭirdāsvā̍n |
sauva̍śvya̱ṁ yo va̱nava̱tsvaśvo̍ vṛ̱trā sa̱matsu̍ sā̱saha̍da̱mitrā̍n || 6.033.01
tvāṁ hī̱3̱̍ndrāva̍se̱ vivā̍co̱ hava̍nte carṣa̱ṇaya̱ḥ śūra̍sātau |
tvaṁ vipre̍bhi̱rvi pa̱ṇīra̍śāya̱stvota̱ itsani̍tā̱ vāja̱marvā̍ || 6.033.02
tvaṁ tā i̍ndro̱bhayā̍ a̱mitrā̱ndāsā̍ vṛ̱trāṇyāryā̍ ca śūra |
vadhī̱rvane̍va̱ sudhi̍tebhi̱ratkai̱rā pṛ̱tsu da̍rṣi nṛ̱ṇāṁ nṛ̍tama || 6.033.03
sa tvaṁ na̍ i̱ndrāka̍vābhirū̱tī sakhā̍ vi̱śvāyu̍ravi̱tā vṛ̱dhe bhū̍ḥ |
sva̍rṣātā̱ yaddhvayā̍masi tvā̱ yudhya̍nto ne̱madhi̍tā pṛ̱tsu śū̍ra || 6.033.04
nū̱naṁ na̍ indrāpa̱rāya̍ ca syā̱ bhavā̍ mṛḻī̱ka u̱ta no̍ a̱bhiṣṭau̍ |
i̱tthā gṛ̱ṇanto̍ ma̱hina̍sya̱ śarma̍ndi̱vi ṣyā̍ma̱ pārye̍ go̱ṣata̍māḥ || 6.033.05
saṁ ca̱ tve ja̱gmurgira̍ indra pū̱rvīrvi ca̱ tvadya̍nti vi̱bhvo̍ manī̱ṣāḥ |
pu̱rā nū̱naṁ ca̍ stu̱taya̱ ṛṣī̍ṇāṁ paspṛ̱dhra indre̱ adhyu̍kthā̱rkā || 6.034.01
pu̱ru̱hū̱to yaḥ pu̍rugū̱rta ṛbhvā̱ eka̍ḥ purupraśa̱sto asti̍ ya̱jñaiḥ |
ratho̱ na ma̱he śava̍se yujā̱no̱3̱̍'smābhi̱rindro̍ anu̱mādyo̍ bhūt || 6.034.02
na yaṁ hiṁsa̍nti dhī̱tayo̱ na vāṇī̱rindra̱ṁ nakṣa̱ntīda̱bhi va̱rdhaya̍ntīḥ |
yadi̍ sto̱tāra̍ḥ śa̱taṁ yatsa̱hasra̍ṁ gṛ̱ṇanti̱ girva̍ṇasa̱ṁ śaṁ tada̍smai || 6.034.03
asmā̍ e̱taddi̱vya1̱̍rceva̍ mā̱sā mi̍mi̱kṣa indre̱ nya̍yāmi̱ soma̍ḥ |
jana̱ṁ na dhanva̍nna̱bhi saṁ yadāpa̍ḥ sa̱trā vā̍vṛdhu̱rhava̍nāni ya̱jñaiḥ || 6.034.04
asmā̍ e̱tanmahyā̍ṅgū̱ṣama̍smā̱ indrā̍ya sto̱traṁ ma̱tibhi̍ravāci |
asa̱dyathā̍ maha̱ti vṛ̍tra̱tūrya̱ indro̍ vi̱śvāyu̍ravi̱tā vṛ̱dhaśca̍ || 6.034.05
ka̱dā bhu̍va̱nratha̍kṣayāṇi̱ brahma̍ ka̱dā sto̱tre sa̍hasrapo̱ṣya̍ṁ dāḥ |
ka̱dā stoma̍ṁ vāsayo'sya rā̱yā ka̱dā dhiya̍ḥ karasi̱ vāja̍ratnāḥ || 6.035.01
karhi̍ svi̱ttadi̍ndra̱ yannṛbhi̱rnṝnvī̱rairvī̱rānnī̱ḻayā̍se̱ jayā̱jīn |
tri̱dhātu̱ gā adhi̍ jayāsi̱ goṣvindra̍ dyu̱mnaṁ sva̍rvaddhehya̱sme || 6.035.02
karhi̍ svi̱ttadi̍ndra̱ yajja̍ri̱tre vi̱śvapsu̱ brahma̍ kṛ̱ṇava̍ḥ śaviṣṭha |
ka̱dā dhiyo̱ na ni̱yuto̍ yuvāse ka̱dā goma̍ghā̱ hava̍nāni gacchāḥ || 6.035.03
sa goma̍ghā jari̱tre aśva̍ścandrā̱ vāja̍śravaso̱ adhi̍ dhehi̱ pṛkṣa̍ḥ |
pī̱pi̱hīṣa̍ḥ su̱dughā̍mindra dhe̱nuṁ bha̱radvā̍jeṣu su̱ruco̍ rurucyāḥ || 6.035.04
tamā nū̱naṁ vṛ̱jana̍ma̱nyathā̍ ci̱cchūro̱ yaccha̍kra̱ vi duro̍ gṛṇī̱ṣe |
mā nira̍raṁ śukra̱dugha̍sya dhe̱norā̍ṅgira̱sānbrahma̍ṇā vipra jinva || 6.035.05
sa̱trā madā̍sa̱stava̍ vi̱śvaja̍nyāḥ sa̱trā rāyo'dha̱ ye pārthi̍vāsaḥ |
sa̱trā vājā̍nāmabhavo vibha̱ktā yadde̱veṣu̍ dhā̱raya̍thā asu̱rya̍m || 6.036.01
anu̱ pra ye̍je̱ jana̱ ojo̍ asya sa̱trā da̍dhire̱ anu̍ vī̱ryā̍ya |
syū̱ma̱gṛbhe̱ dudha̱ye'rva̍te ca̱ kratu̍ṁ vṛñja̱ntyapi̍ vṛtra̱hatye̍ || 6.036.02
taṁ sa̱dhrīcī̍rū̱tayo̱ vṛṣṇyā̍ni̱ pauṁsyā̍ni ni̱yuta̍ḥ saścu̱rindra̍m |
sa̱mu̱draṁ na sindha̍va u̱kthaśu̍ṣmā uru̱vyaca̍sa̱ṁ gira̱ ā vi̍śanti || 6.036.03
sa rā̱yaskhāmupa̍ sṛjā gṛṇā̱naḥ pu̍ruśca̱ndrasya̱ tvami̍ndra̱ vasva̍ḥ |
pati̍rbabhū̱thāsa̍mo̱ janā̍nā̱meko̱ viśva̍sya̱ bhuva̍nasya̱ rājā̍ || 6.036.04
sa tu śru̍dhi̱ śrutyā̱ yo du̍vo̱yurdyaurna bhūmā̱bhi rāyo̍ a̱ryaḥ |
aso̱ yathā̍ na̱ḥ śava̍sā cakā̱no yu̱geyu̍ge̱ vaya̍sā̱ ceki̍tānaḥ || 6.036.05
a̱rvāgratha̍ṁ vi̱śvavā̍raṁ ta u̱grendra̍ yu̱ktāso̱ hara̍yo vahantu |
kī̱riści̱ddhi tvā̱ hava̍te̱ sva̍rvānṛdhī̱mahi̍ sadha̱māda̍ste a̱dya || 6.037.01
pro droṇe̱ hara̍ya̱ḥ karmā̍gmanpunā̱nāsa̱ ṛjya̍nto abhūvan |
indro̍ no a̱sya pū̱rvyaḥ pa̍pīyāddyu̱kṣo mada̍sya so̱myasya̱ rājā̍ || 6.037.02
ā̱sa̱srā̱ṇāsa̍ḥ śavasā̱namacchendra̍ṁ suca̱kre ra̱thyā̍so̱ aśvā̍ḥ |
a̱bhi śrava̱ ṛjya̍nto vaheyu̱rnū ci̱nnu vā̱yora̱mṛta̱ṁ vi da̍syet || 6.037.03
vari̍ṣṭho asya̱ dakṣi̍ṇāmiya̱rtīndro̍ ma̱ghonā̍ṁ tuvikū̱rmita̍maḥ |
yayā̍ vajrivaḥ pari̱yāsyaṁho̍ ma̱ghā ca̍ dhṛṣṇo̱ daya̍se̱ vi sū̱rīn || 6.037.04
indro̱ vāja̍sya̱ sthavi̍rasya dā̱tendro̍ gī̱rbhirva̍rdhatāṁ vṛ̱ddhama̍hāḥ |
indro̍ vṛ̱traṁ hani̍ṣṭho astu̱ satvā tā sū̱riḥ pṛ̍ṇati̱ tūtu̍jānaḥ || 6.037.05
apā̍di̱ta udu̍ naści̱trata̍mo ma̱hīṁ bha̍rṣaddyu̱matī̱mindra̍hūtim |
panya̍sīṁ dhī̱tiṁ daivya̍sya̱ yāma̱ñjana̍sya rā̱tiṁ va̍nate su̱dānu̍ḥ || 6.038.01
dū̱rācci̱dā va̍sato asya̱ karṇā̱ ghoṣā̱dindra̍sya tanyati bruvā̱ṇaḥ |
eyame̍naṁ de̱vahū̍tirvavṛtyānma̱drya1̱̍gindra̍mi̱yamṛ̱cyamā̍nā || 6.038.02
taṁ vo̍ dhi̱yā pa̍ra̱mayā̍ purā̱jāma̱jara̱mindra̍ma̱bhya̍nūṣya̱rkaiḥ |
brahmā̍ ca̱ giro̍ dadhi̱re sama̍sminma̱hāśca̱ stomo̱ adhi̍ vardha̱dindre̍ || 6.038.03
vardhā̱dyaṁ ya̱jña u̱ta soma̱ indra̱ṁ vardhā̱dbrahma̱ gira̍ u̱kthā ca̱ manma̍ |
vardhāhai̍namu̱ṣaso̱ yāma̍nna̱ktorvardhā̱nmāsā̍ḥ śa̱rado̱ dyāva̱ indra̍m || 6.038.04
e̱vā ja̍jñā̱naṁ saha̍se̱ asā̍mi vāvṛdhā̱naṁ rādha̍se ca śru̱tāya̍ |
ma̱hāmu̱gramava̍se vipra nū̱namā vi̍vāsema vṛtra̱tūrye̍ṣu || 6.038.05
ma̱ndrasya̍ ka̱verdi̱vyasya̱ vahne̱rvipra̍manmano vaca̱nasya̱ madhva̍ḥ |
apā̍ na̱stasya̍ saca̱nasya̍ de̱veṣo̍ yuvasva gṛṇa̱te goa̍grāḥ || 6.039.01
a̱yamu̍śā̱naḥ paryadri̍mu̱srā ṛ̱tadhī̍tibhirṛta̱yugyu̍jā̱naḥ |
ru̱jadaru̍gṇa̱ṁ vi va̱lasya̱ sānu̍ṁ pa̱ṇīrvaco̍bhira̱bhi yo̍dha̱dindra̍ḥ || 6.039.02
a̱yaṁ dyo̍tayada̱dyuto̱ vya1̱̍ktūndo̱ṣā vasto̍ḥ śa̱rada̱ indu̍rindra |
i̱maṁ ke̱tuma̍dadhu̱rnū ci̱dahnā̱ṁ śuci̍janmana u̱ṣasa̍ścakāra || 6.039.03
a̱yaṁ ro̍cayada̱ruco̍ rucā̱no̱3̱̍'yaṁ vā̍saya̱dvyṛ1̱̍tena̍ pū̱rvīḥ |
a̱yamī̍yata ṛta̱yugbhi̱raśvai̍ḥ sva̱rvidā̱ nābhi̍nā carṣaṇi̱prāḥ || 6.039.04
nū gṛ̍ṇā̱no gṛ̍ṇa̱te pra̍tna rāja̱nniṣa̍ḥ pinva vasu̱deyā̍ya pū̱rvīḥ |
a̱pa oṣa̍dhīravi̱ṣā vanā̍ni̱ gā arva̍to̱ nṝnṛ̱case̍ rirīhi || 6.039.05
indra̱ piba̱ tubhya̍ṁ su̱to madā̱yāva̍ sya̱ harī̱ vi mu̍cā̱ sakhā̍yā |
u̱ta pra gā̍ya ga̱ṇa ā ni̱ṣadyāthā̍ ya̱jñāya̍ gṛṇa̱te vayo̍ dhāḥ || 6.040.01
asya̍ piba̱ yasya̍ jajñā̱na i̍ndra̱ madā̍ya̱ kratve̱ api̍bo virapśin |
tamu̍ te̱ gāvo̱ nara̱ āpo̱ adri̱rindu̱ṁ sama̍hyanpī̱taye̱ sama̍smai || 6.040.02
sami̍ddhe a̱gnau su̱ta i̍ndra̱ soma̱ ā tvā̍ vahantu̱ hara̍yo̱ vahi̍ṣṭhāḥ |
tvā̱ya̱tā mana̍sā johavī̱mīndrā yā̍hi suvi̱tāya̍ ma̱he na̍ḥ || 6.040.03
ā yā̍hi̱ śaśva̍duśa̱tā ya̍yā̱thendra̍ ma̱hā mana̍sā soma̱peya̍m |
upa̱ brahmā̍ṇi śṛṇava i̱mā no'thā̍ te ya̱jñasta̱nve̱3̱̍ vayo̍ dhāt || 6.040.04
yadi̍ndra di̱vi pārye̱ yadṛdha̱gyadvā̱ sve sada̍ne̱ yatra̱ vāsi̍ |
ato̍ no ya̱jñamava̍se ni̱yutvā̍nsa̱joṣā̍ḥ pāhi girvaṇo ma̱rudbhi̍ḥ || 6.040.05
ahe̍ḻamāna̱ upa̍ yāhi ya̱jñaṁ tubhya̍ṁ pavanta̱ inda̍vaḥ su̱tāsa̍ḥ |
gāvo̱ na va̍jri̱nsvamoko̱ acchendrā ga̍hi pratha̱mo ya̱jñiyā̍nām || 6.041.01
yā te̍ kā̱kutsukṛ̍tā̱ yā vari̍ṣṭhā̱ yayā̱ śaśva̱tpiba̍si̱ madhva̍ ū̱rmim |
tayā̍ pāhi̱ pra te̍ adhva̱ryura̍sthā̱tsaṁ te̱ vajro̍ vartatāmindra ga̱vyuḥ || 6.041.02
e̱ṣa dra̱pso vṛ̍ṣa̱bho vi̱śvarū̍pa̱ indrā̍ya̱ vṛṣṇe̱ sama̍kāri̱ soma̍ḥ |
e̱taṁ pi̍ba harivaḥ sthātarugra̱ yasyeśi̍ṣe pra̱divi̱ yaste̱ anna̍m || 6.041.03
su̱taḥ somo̱ asu̍tādindra̱ vasyā̍na̱yaṁ śreyā̍ñciki̱tuṣe̱ raṇā̍ya |
e̱taṁ ti̍tirva̱ upa̍ yāhi ya̱jñaṁ tena̱ viśvā̱stavi̍ṣī̱rā pṛ̍ṇasva || 6.041.04
hvayā̍masi̱ tvendra̍ yāhya̱rvāṅara̍ṁ te̱ soma̍sta̱nve̍ bhavāti |
śata̍krato mā̱daya̍svā su̱teṣu̱ prāsmā a̍va̱ pṛta̍nāsu̱ pra vi̱kṣu || 6.041.05
pratya̍smai̱ pipī̍ṣate̱ viśvā̍ni vi̱duṣe̍ bhara |
a̱ra̱ṁga̱māya̱ jagma̱ye'pa̍ścāddaghvane̱ nare̍ || 6.042.01
eme̍naṁ pra̱tyeta̍na̱ some̍bhiḥ soma̱pāta̍mam |
ama̍trebhirṛjī̱ṣiṇa̱mindra̍ṁ su̱tebhi̱rindu̍bhiḥ || 6.042.02
yadī̍ su̱tebhi̱rindu̍bhi̱ḥ some̍bhiḥ prati̱bhūṣa̍tha |
vedā̱ viśva̍sya̱ medhi̍ro dhṛ̱ṣattaṁta̱mideṣa̍te || 6.042.03
a̱smāa̍smā̱ idandha̱so'dhva̍ryo̱ pra bha̍rā su̱tam |
ku̱vitsa̍masya̱ jenya̍sya̱ śardha̍to̱'bhiśa̍sterava̱spara̍t || 6.042.04
yasya̱ tyacchamba̍ra̱ṁ made̱ divo̍dāsāya ra̱ndhaya̍ḥ |
a̱yaṁ sa soma̍ indra te su̱taḥ piba̍ || 6.043.01
yasya̍ tīvra̱suta̱ṁ mada̱ṁ madhya̱manta̍ṁ ca̱ rakṣa̍se |
a̱yaṁ sa soma̍ indra te su̱taḥ piba̍ || 6.043.02
yasya̱ gā a̱ntaraśma̍no̱ made̍ dṛ̱ḻhā a̱vāsṛ̍jaḥ |
a̱yaṁ sa soma̍ indra te su̱taḥ piba̍ || 6.043.03
yasya̍ mandā̱no andha̍so̱ māgho̍naṁ dadhi̱ṣe śava̍ḥ |
a̱yaṁ sa soma̍ indra te su̱taḥ piba̍ || 6.043.04
yo ra̍yivo ra̱yiṁta̍mo̱ yo dyu̱mnairdyu̱mnava̍ttamaḥ |
soma̍ḥ su̱taḥ sa i̍ndra̱ te'sti̍ svadhāpate̱ mada̍ḥ || 6.044.01
yaḥ śa̱gmastu̍viśagma te rā̱yo dā̱mā ma̍tī̱nām |
soma̍ḥ su̱taḥ sa i̍ndra̱ te'sti̍ svadhāpate̱ mada̍ḥ || 6.044.02
yena̍ vṛ̱ddho na śava̍sā tu̱ro na svābhi̍rū̱tibhi̍ḥ |
soma̍ḥ su̱taḥ sa i̍ndra̱ te'sti̍ svadhāpate̱ mada̍ḥ || 6.044.03
tyamu̍ vo̱ apra̍haṇaṁ gṛṇī̱ṣe śava̍sa̱spati̍m |
indra̍ṁ viśvā̱sāha̱ṁ nara̱ṁ maṁhi̍ṣṭhaṁ vi̱śvaca̍rṣaṇim || 6.044.04
yaṁ va̱rdhaya̱ntīdgira̱ḥ pati̍ṁ tu̱rasya̱ rādha̍saḥ |
taminnva̍sya̱ roda̍sī de̱vī śuṣma̍ṁ saparyataḥ || 6.044.05
tadva̍ u̱kthasya̍ ba̱rhaṇendrā̍yopastṛṇī̱ṣaṇi̍ |
vipo̱ na yasyo̱tayo̱ vi yadroha̍nti sa̱kṣita̍ḥ || 6.044.06
avi̍da̱ddakṣa̍ṁ mi̱tro navī̍yānpapā̱no de̱vebhyo̱ vasyo̍ acait |
sa̱sa̱vānstau̱lābhi̍rdhau̱tarī̍bhiruru̱ṣyā pā̱yura̍bhava̱tsakhi̍bhyaḥ || 6.044.07
ṛ̱tasya̍ pa̱thi ve̱dhā a̍pāyi śri̱ye manā̍ṁsi de̱vāso̍ akran |
dadhā̍no̱ nāma̍ ma̱ho vaco̍bhi̱rvapu̍rdṛ̱śaye̍ ve̱nyo vyā̍vaḥ || 6.044.08
dyu̱matta̍ma̱ṁ dakṣa̍ṁ dhehya̱sme sedhā̱ janā̍nāṁ pū̱rvīrarā̍tīḥ |
varṣī̍yo̱ vaya̍ḥ kṛṇuhi̱ śacī̍bhi̱rdhana̍sya sā̱tāva̱smā a̍viḍḍhi || 6.044.09
indra̱ tubhya̱minma̍ghavannabhūma va̱yaṁ dā̱tre ha̍rivo̱ mā vi ve̍naḥ |
naki̍rā̱pirda̍dṛśe martya̱trā kima̱ṅga ra̍dhra̱coda̍naṁ tvāhuḥ || 6.044.10
mā jasva̍ne vṛṣabha no rarīthā̱ mā te̍ re̱vata̍ḥ sa̱khye ri̍ṣāma |
pū̱rvīṣṭa̍ indra ni̱ṣṣidho̱ jane̍ṣu ja̱hyasu̍ṣvī̱npra vṛ̱hāpṛ̍ṇataḥ || 6.044.11
uda̱bhrāṇī̍va sta̱naya̍nniya̱rtīndro̱ rādhā̱ṁsyaśvyā̍ni̱ gavyā̍ |
tvama̍si pra̱diva̍ḥ kā̱rudhā̍yā̱ mā tvā̍dā̱māna̱ ā da̍bhanma̱ghona̍ḥ || 6.044.12
adhva̍ryo vīra̱ pra ma̱he su̱tānā̱mindrā̍ya bhara̱ sa hya̍sya̱ rājā̍ |
yaḥ pū̱rvyābhi̍ru̱ta nūta̍nābhirgī̱rbhirvā̍vṛ̱dhe gṛ̍ṇa̱tāmṛṣī̍ṇām || 6.044.13
a̱sya made̍ pu̱ru varpā̍ṁsi vi̱dvānindro̍ vṛ̱trāṇya̍pra̱tī ja̍ghāna |
tamu̱ pra ho̍ṣi̱ madhu̍mantamasmai̱ soma̍ṁ vī̱rāya̍ śi̱priṇe̱ piba̍dhyai || 6.044.14
pātā̍ su̱tamindro̍ astu̱ soma̱ṁ hantā̍ vṛ̱traṁ vajre̍ṇa mandasā̱naḥ |
gantā̍ ya̱jñaṁ pa̍rā̱vata̍ści̱dacchā̱ vasu̍rdhī̱nāma̍vi̱tā kā̱rudhā̍yāḥ || 6.044.15
i̱daṁ tyatpātra̍mindra̱pāna̱mindra̍sya pri̱yama̱mṛta̍mapāyi |
matsa̱dyathā̍ saumana̱sāya̍ de̱vaṁ vya1̱̍smaddveṣo̍ yu̱yava̱dvyaṁha̍ḥ || 6.044.16
e̱nā ma̍ndā̱no ja̱hi śū̍ra̱ śatrū̍ñjā̱mimajā̍miṁ maghavanna̱mitrā̍n |
a̱bhi̱ṣe̱ṇā a̱bhyā̱3̱̍dedi̍śānā̱nparā̍ca indra̱ pra mṛ̍ṇā ja̱hī ca̍ || 6.044.17
ā̱su ṣmā̍ ṇo maghavannindra pṛ̱tsva1̱̍smabhya̱ṁ mahi̱ vari̍vaḥ su̱gaṁ ka̍ḥ |
a̱pāṁ to̱kasya̱ tana̍yasya je̱ṣa indra̍ sū̱rīnkṛ̍ṇu̱hi smā̍ no a̱rdham || 6.044.18
ā tvā̱ hara̍yo̱ vṛṣa̍ṇo yujā̱nā vṛṣa̍rathāso̱ vṛṣa̍raśma̱yo'tyā̍ḥ |
a̱sma̱trāñco̱ vṛṣa̍ṇo vajra̱vāho̱ vṛṣṇe̱ madā̍ya su̱yujo̍ vahantu || 6.044.19
ā te̍ vṛṣa̱nvṛṣa̍ṇo̱ droṇa̍masthurghṛta̱pruṣo̱ normayo̱ mada̍ntaḥ |
indra̱ pra tubhya̱ṁ vṛṣa̍bhiḥ su̱tānā̱ṁ vṛṣṇe̍ bharanti vṛṣa̱bhāya̱ soma̍m || 6.044.20
vṛṣā̍si di̱vo vṛ̍ṣa̱bhaḥ pṛ̍thi̱vyā vṛṣā̱ sindhū̍nāṁ vṛṣa̱bhaḥ stiyā̍nām |
vṛṣṇe̍ ta̱ indu̍rvṛṣabha pīpāya svā̱dū raso̍ madhu̱peyo̱ varā̍ya || 6.044.21
a̱yaṁ de̱vaḥ saha̍sā̱ jāya̍māna̱ indre̍ṇa yu̱jā pa̱ṇima̍stabhāyat |
a̱yaṁ svasya̍ pi̱turāyu̍dhā̱nīndu̍ramuṣṇā̱daśi̍vasya mā̱yāḥ || 6.044.22
a̱yama̍kṛṇodu̱ṣasa̍ḥ su̱patnī̍ra̱yaṁ sūrye̍ adadhā̱jjyoti̍ra̱ntaḥ |
a̱yaṁ tri̱dhātu̍ di̱vi ro̍ca̱neṣu̍ tri̱teṣu̍ vindada̱mṛta̱ṁ nigū̍ḻham || 6.044.23
a̱yaṁ dyāvā̍pṛthi̱vī vi ṣka̍bhāyada̱yaṁ ratha̍mayunaksa̱ptara̍śmim |
a̱yaṁ goṣu̱ śacyā̍ pa̱kvama̱ntaḥ somo̍ dādhāra̱ daśa̍yantra̱mutsa̍m || 6.044.24
ya āna̍yatparā̱vata̱ḥ sunī̍tī tu̱rvaśa̱ṁ yadu̍m |
indra̱ḥ sa no̱ yuvā̱ sakhā̍ || 6.045.01
a̱vi̱pre ci̱dvayo̱ dadha̍danā̱śunā̍ ci̱darva̍tā |
indro̱ jetā̍ hi̱taṁ dhana̍m || 6.045.02
ma̱hīra̍sya̱ praṇī̍tayaḥ pū̱rvīru̱ta praśa̍stayaḥ |
nāsya̍ kṣīyanta ū̱taya̍ḥ || 6.045.03
sakhā̍yo̱ brahma̍vāha̱se'rca̍ta̱ pra ca̍ gāyata |
sa hi na̱ḥ prama̍tirma̱hī || 6.045.04
tvameka̍sya vṛtrahannavi̱tā dvayo̍rasi |
u̱tedṛśe̱ yathā̍ va̱yam || 6.045.05
naya̱sīdvati̱ dviṣa̍ḥ kṛ̱ṇoṣyu̍kthaśa̱ṁsina̍ḥ |
nṛbhi̍ḥ su̱vīra̍ ucyase || 6.045.06
bra̱hmāṇa̱ṁ brahma̍vāhasaṁ gī̱rbhiḥ sakhā̍yamṛ̱gmiya̍m |
gāṁ na do̱hase̍ huve || 6.045.07
yasya̱ viśvā̍ni̱ hasta̍yorū̱curvasū̍ni̱ ni dvi̱tā |
vī̱rasya̍ pṛtanā̱ṣaha̍ḥ || 6.045.08
vi dṛ̱ḻhāni̍ cidadrivo̱ janā̍nāṁ śacīpate |
vṛ̱ha mā̱yā a̍nānata || 6.045.09
tamu̍ tvā satya somapā̱ indra̍ vājānāṁ pate |
ahū̍mahi śrava̱syava̍ḥ || 6.045.10
tamu̍ tvā̱ yaḥ pu̱rāsi̍tha̱ yo vā̍ nū̱naṁ hi̱te dhane̍ |
havya̱ḥ sa śru̍dhī̱ hava̍m || 6.045.11
dhī̱bhirarva̍dbhi̱rarva̍to̱ vājā̍ indra śra̱vāyyā̍n |
tvayā̍ jeṣma hi̱taṁ dhana̍m || 6.045.12
abhū̍ru vīra girvaṇo ma̱hā i̍ndra̱ dhane̍ hi̱te |
bhare̍ vitanta̱sāyya̍ḥ || 6.045.13
yā ta̍ ū̱tira̍mitrahanma̱kṣūja̍vasta̱māsa̍ti |
tayā̍ no hinuhī̱ ratha̍m || 6.045.14
sa rathe̍na ra̱thīta̍mo̱'smāke̍nābhi̱yugva̍nā |
jeṣi̍ jiṣṇo hi̱taṁ dhana̍m || 6.045.15
ya eka̱ ittamu̍ ṣṭuhi kṛṣṭī̱nāṁ vica̍rṣaṇiḥ |
pati̍rja̱jñe vṛṣa̍kratuḥ || 6.045.16
yo gṛ̍ṇa̱tāmidāsi̍thā̱pirū̱tī śi̱vaḥ sakhā̍ |
sa tvaṁ na̍ indra mṛḻaya || 6.045.17
dhi̱ṣva vajra̱ṁ gabha̍styo rakṣo̱hatyā̍ya vajrivaḥ |
sā̱sa̱hī̱ṣṭhā a̱bhi spṛdha̍ḥ || 6.045.18
pra̱tnaṁ ra̍yī̱ṇāṁ yuja̱ṁ sakhā̍yaṁ kīri̱coda̍nam |
brahma̍vāhastamaṁ huve || 6.045.19
sa hi viśvā̍ni̱ pārthi̍vā̱ eko̱ vasū̍ni̱ patya̍te |
girva̍ṇastamo̱ adhri̍guḥ || 6.045.20
sa no̍ ni̱yudbhi̱rā pṛ̍ṇa̱ kāma̱ṁ vāje̍bhira̱śvibhi̍ḥ |
goma̍dbhirgopate dhṛ̱ṣat || 6.045.21
tadvo̍ gāya su̱te sacā̍ puruhū̱tāya̱ satva̍ne |
śaṁ yadgave̱ na śā̱kine̍ || 6.045.22
na ghā̱ vasu̱rni ya̍mate dā̱naṁ vāja̍sya̱ goma̍taḥ |
yatsī̱mupa̱ śrava̱dgira̍ḥ || 6.045.23
ku̱vitsa̍sya̱ pra hi vra̱jaṁ goma̍ntaṁ dasyu̱hā gama̍t |
śacī̍bhi̱rapa̍ no varat || 6.045.24
i̱mā u̍ tvā śatakrato̱'bhi pra ṇo̍nuvu̱rgira̍ḥ |
indra̍ va̱tsaṁ na mā̱tara̍ḥ || 6.045.25
dū̱ṇāśa̍ṁ sa̱khyaṁ tava̱ gaura̍si vīra gavya̱te |
aśvo̍ aśvāya̱te bha̍va || 6.045.26
sa ma̍ndasvā̱ hyandha̍so̱ rādha̍se ta̱nvā̍ ma̱he |
na sto̱tāra̍ṁ ni̱de ka̍raḥ || 6.045.27
i̱mā u̍ tvā su̱tesu̍te̱ nakṣa̍nte girvaṇo̱ gira̍ḥ |
va̱tsaṁ gāvo̱ na dhe̱nava̍ḥ || 6.045.28
pu̱rū̱tama̍ṁ purū̱ṇāṁ sto̍tṝ̱ṇāṁ vivā̍ci |
vāje̍bhirvājaya̱tām || 6.045.29
a̱smāka̍mindra bhūtu te̱ stomo̱ vāhi̍ṣṭho̱ anta̍maḥ |
a̱smānrā̱ye ma̱he hi̍nu || 6.045.30
adhi̍ bṛ̱buḥ pa̍ṇī̱nāṁ varṣi̍ṣṭhe mū̱rdhanna̍sthāt |
u̱ruḥ kakṣo̱ na gā̱ṅgyaḥ || 6.045.31
yasya̍ vā̱yori̍va dra̱vadbha̱drā rā̱tiḥ sa̍ha̱sriṇī̍ |
sa̱dyo dā̱nāya̱ maṁha̍te || 6.045.32
tatsu no̱ viśve̍ a̱rya ā sadā̍ gṛṇanti kā̱rava̍ḥ |
bṛ̱buṁ sa̍hasra̱dāta̍maṁ sū̱riṁ sa̍hasra̱sāta̍mam || 6.045.33
tvāmiddhi havā̍mahe sā̱tā vāja̍sya kā̱rava̍ḥ |
tvāṁ vṛ̱treṣvi̍ndra̱ satpa̍ti̱ṁ nara̱stvāṁ kāṣṭhā̱svarva̍taḥ || 6.046.01
sa tvaṁ na̍ścitra vajrahasta dhṛṣṇu̱yā ma̱haḥ sta̍vā̱no a̍drivaḥ |
gāmaśva̍ṁ ra̱thya̍mindra̱ saṁ ki̍ra sa̱trā vāja̱ṁ na ji̱gyuṣe̍ || 6.046.02
yaḥ sa̍trā̱hā vica̍rṣaṇi̱rindra̱ṁ taṁ hū̍mahe va̱yam |
saha̍sramuṣka̱ tuvi̍nṛmṇa̱ satpa̍te̱ bhavā̍ sa̱matsu̍ no vṛ̱dhe || 6.046.03
bādha̍se̱ janā̍nvṛṣa̱bheva̍ ma̱nyunā̱ ghṛṣau̍ mī̱ḻha ṛ̍cīṣama |
a̱smāka̍ṁ bodhyavi̱tā ma̍hādha̱ne ta̱nūṣva̱psu sūrye̍ || 6.046.04
indra̱ jyeṣṭha̍ṁ na̱ ā bha̍ra̱ oji̍ṣṭha̱ṁ papu̍ri̱ śrava̍ḥ |
yene̱me ci̍tra vajrahasta̱ roda̍sī̱ obhe su̍śipra̱ prāḥ || 6.046.05
tvāmu̱gramava̍se carṣaṇī̱saha̱ṁ rāja̍nde̱veṣu̍ hūmahe |
viśvā̱ su no̍ vithu̱rā pi̍bda̱nā va̍so̱'mitrā̍nsu̱ṣahā̍nkṛdhi || 6.046.06
yadi̍ndra̱ nāhu̍ṣī̱ṣvā ojo̍ nṛ̱mṇaṁ ca̍ kṛ̱ṣṭiṣu̍ |
yadvā̱ pañca̍ kṣitī̱nāṁ dyu̱mnamā bha̍ra sa̱trā viśvā̍ni̱ pauṁsyā̍ || 6.046.07
yadvā̍ tṛ̱kṣau ma̍ghavandru̱hyāvā jane̱ yatpū̱rau kacca̱ vṛṣṇya̍m |
a̱smabhya̱ṁ tadri̍rīhi̱ saṁ nṛ̱ṣāhye̱'mitrā̍npṛ̱tsu tu̱rvaṇe̍ || 6.046.08
indra̍ tri̱dhātu̍ śara̱ṇaṁ tri̱varū̍thaṁ svasti̱mat |
cha̱rdirya̍ccha ma̱ghava̍dbhyaśca̱ mahya̍ṁ ca yā̱vayā̍ di̱dyume̍bhyaḥ || 6.046.09
ye ga̍vya̱tā mana̍sā̱ śatru̍māda̱bhura̍bhipra̱ghnanti̍ dhṛṣṇu̱yā |
adha̍ smā no maghavannindra girvaṇastanū̱pā anta̍mo bhava || 6.046.10
adha̍ smā no vṛ̱dhe bha̱vendra̍ nā̱yama̍vā yu̱dhi |
yada̱ntari̍kṣe pa̱taya̍nti pa̱rṇino̍ di̱dyava̍sti̱gmamū̍rdhānaḥ || 6.046.11
yatra̱ śūrā̍sasta̱nvo̍ vitanva̱te pri̱yā śarma̍ pitṝ̱ṇām |
adha̍ smā yaccha ta̱nve̱3̱̍ tane̍ ca cha̱rdira̱citta̍ṁ yā̱vaya̱ dveṣa̍ḥ || 6.046.12
yadi̍ndra̱ sarge̱ arva̍taśco̱dayā̍se mahādha̱ne |
a̱sa̱ma̱ne adhva̍ni vṛji̱ne pa̱thi śye̱nā i̍va śravasya̱taḥ || 6.046.13
sindhū̍riva prava̱ṇa ā̍śu̱yā ya̱to yadi̱ klośa̱manu̱ ṣvaṇi̍ |
ā ye vayo̱ na varvṛ̍ta̱tyāmi̍ṣi gṛbhī̱tā bā̱hvorgavi̍ || 6.046.14
svā̱duṣkilā̱yaṁ madhu̍mā u̱tāyaṁ tī̱vraḥ kilā̱yaṁ rasa̍vā u̱tāyam |
u̱to nva1̱̍sya pa̍pi̱vāṁsa̱mindra̱ṁ na kaśca̱na sa̍hata āha̱veṣu̍ || 6.047.01
a̱yaṁ svā̱duri̱ha madi̍ṣṭha āsa̱ yasyendro̍ vṛtra̱hatye̍ ma̱māda̍ |
pu̱rūṇi̱ yaścyau̱tnā śamba̍rasya̱ vi na̍va̱tiṁ nava̍ ca de̱hyo̱3̱̍ han || 6.047.02
a̱yaṁ me̍ pī̱ta udi̍yarti̱ vāca̍ma̱yaṁ ma̍nī̱ṣāmu̍śa̱tīma̍jīgaḥ |
a̱yaṁ ṣaḻu̱rvīra̍mimīta̱ dhīro̱ na yābhyo̱ bhuva̍na̱ṁ kacca̱nāre || 6.047.03
a̱yaṁ sa yo va̍ri̱māṇa̍ṁ pṛthi̱vyā va̱rṣmāṇa̍ṁ di̱vo akṛ̍ṇoda̱yaṁ saḥ |
a̱yaṁ pī̱yūṣa̍ṁ ti̱sṛṣu̍ pra̱vatsu̱ somo̍ dādhāro̱rva1̱̍ntari̍kṣam || 6.047.04
a̱yaṁ vi̍daccitra̱dṛśī̍ka̱marṇa̍ḥ śu̱krasa̍dmanāmu̱ṣasā̱manī̍ke |
a̱yaṁ ma̱hānma̍ha̱tā skambha̍ne̱noddyāma̍stabhnādvṛṣa̱bho ma̱rutvā̍n || 6.047.05
dhṛ̱ṣatpi̍ba ka̱laśe̱ soma̍mindra vṛtra̱hā śū̍ra sama̱re vasū̍nām |
mādhya̍ṁdine̱ sava̍na̱ ā vṛ̍ṣasva rayi̱sthāno̍ ra̱yima̱smāsu̍ dhehi || 6.047.06
indra̱ pra ṇa̍ḥ purae̱teva̍ paśya̱ pra no̍ naya prata̱raṁ vasyo̱ accha̍ |
bhavā̍ supā̱ro a̍tipāra̱yo no̱ bhavā̱ sunī̍tiru̱ta vā̱manī̍tiḥ || 6.047.07
u̱ruṁ no̍ lo̱kamanu̍ neṣi vi̱dvānsva̍rva̱jjyoti̱rabha̍yaṁ sva̱sti |
ṛ̱ṣvā ta̍ indra̱ sthavi̍rasya bā̱hū upa̍ stheyāma śara̱ṇā bṛ̱hantā̍ || 6.047.08
vari̍ṣṭhe na indra va̱ndhure̍ dhā̱ vahi̍ṣṭhayoḥ śatāva̱nnaśva̍yo̱rā |
iṣa̱mā va̍kṣī̱ṣāṁ varṣi̍ṣṭhā̱ṁ mā na̍stārīnmaghava̱nrāyo̍ a̱ryaḥ || 6.047.09
indra̍ mṛ̱ḻa mahya̍ṁ jī̱vātu̍miccha co̱daya̱ dhiya̱maya̍so̱ na dhārā̍m |
yatkiṁ cā̱haṁ tvā̱yuri̱daṁ vadā̍mi̱ tajju̍ṣasva kṛ̱dhi mā̍ de̱vava̍ntam || 6.047.10
trā̱tāra̱mindra̍mavi̱tāra̱mindra̱ṁ have̍have su̱hava̱ṁ śūra̱mindra̍m |
hvayā̍mi śa̱kraṁ pu̍ruhū̱tamindra̍ṁ sva̱sti no̍ ma̱ghavā̍ dhā̱tvindra̍ḥ || 6.047.11
indra̍ḥ su̱trāmā̱ svavā̱ avo̍bhiḥ sumṛḻī̱ko bha̍vatu vi̱śvave̍dāḥ |
bādha̍tā̱ṁ dveṣo̱ abha̍yaṁ kṛṇotu su̱vīrya̍sya̱ pata̍yaḥ syāma || 6.047.12
tasya̍ va̱yaṁ su̍ma̱tau ya̱jñiya̱syāpi̍ bha̱dre sau̍mana̱se syā̍ma |
sa su̱trāmā̱ svavā̱ indro̍ a̱sme ā̱rācci̱ddveṣa̍ḥ sanu̱taryu̍yotu || 6.047.13
ava̱ tve i̍ndra pra̱vato̱ normirgiro̱ brahmā̍ṇi ni̱yuto̍ dhavante |
u̱rū na rādha̱ḥ sava̍nā pu̱rūṇya̱po gā va̍jrinyuvase̱ samindū̍n || 6.047.14
ka ī̍ṁ stava̱tkaḥ pṛ̍ṇā̱tko ya̍jāte̱ yadu̱graminma̱ghavā̍ vi̱śvahāve̍t |
pādā̍viva pra̱hara̍nna̱nyama̍nyaṁ kṛ̱ṇoti̱ pūrva̱mapa̍ra̱ṁ śacī̍bhiḥ || 6.047.15
śṛ̱ṇve vī̱ra u̱gramu̍graṁ damā̱yanna̱nyama̍nyamatinenī̱yamā̍naḥ |
e̱dha̱mā̱na̱dviḻu̱bhaya̍sya̱ rājā̍ coṣkū̱yate̱ viśa̱ indro̍ manu̱ṣyā̍n || 6.047.16
parā̱ pūrve̍ṣāṁ sa̱khyā vṛ̍ṇakti vi̱tartu̍rāṇo̱ apa̍rebhireti |
anā̍nubhūtīravadhūnvā̱naḥ pū̱rvīrindra̍ḥ śa̱rada̍startarīti || 6.047.17
rū̱paṁrū̍pa̱ṁ prati̍rūpo babhūva̱ tada̍sya rū̱paṁ pra̍ti̱cakṣa̍ṇāya |
indro̍ mā̱yābhi̍ḥ puru̱rūpa̍ īyate yu̱ktā hya̍sya̱ hara̍yaḥ śa̱tā daśa̍ || 6.047.18
yu̱jā̱no ha̱ritā̱ rathe̱ bhūri̱ tvaṣṭe̱ha rā̍jati |
ko vi̱śvāhā̍ dviṣa̱taḥ pakṣa̍ āsata u̱tāsī̍neṣu sū̱riṣu̍ || 6.047.19
a̱ga̱vyū̱ti kṣetra̱māga̍nma devā u̱rvī sa̱tī bhūmi̍raṁhūra̱ṇābhū̍t |
bṛha̍spate̱ pra ci̍kitsā̱ gavi̍ṣṭāvi̱tthā sa̱te ja̍ri̱tra i̍ndra̱ panthā̍m || 6.047.20
di̱vedi̍ve sa̱dṛśī̍ra̱nyamardha̍ṁ kṛ̱ṣṇā a̍sedha̱dapa̱ sadma̍no̱ jāḥ |
aha̍ndā̱sā vṛ̍ṣa̱bho va̍sna̱yanto̱davra̍je va̱rcina̱ṁ śamba̍raṁ ca || 6.047.21
pra̱sto̱ka innu rādha̍sasta indra̱ daśa̱ kośa̍yī̱rdaśa̍ vā̱jino̍'dāt |
divo̍dāsādatithi̱gvasya̱ rādha̍ḥ śāmba̱raṁ vasu̱ pratya̍grabhīṣma || 6.047.22
daśāśvā̱ndaśa̱ kośā̱ndaśa̱ vastrādhi̍bhojanā |
daśo̍ hiraṇyapi̱ṇḍāndivo̍dāsādasāniṣam || 6.047.23
daśa̱ rathā̱npraṣṭi̍mataḥ śa̱taṁ gā atha̍rvabhyaḥ |
a̱śva̱thaḥ pā̱yave̍'dāt || 6.047.24
mahi̱ rādho̍ vi̱śvaja̍nya̱ṁ dadhā̍nānbha̱radvā̍jānsārñja̱yo a̱bhya̍yaṣṭa || 6.047.25
vana̍spate vī̱ḍva̍ṅgo̱ hi bhū̱yā a̱smatsa̍khā pra̱tara̍ṇaḥ su̱vīra̍ḥ |
gobhi̱ḥ saṁna̍ddho asi vī̱ḻaya̍svāsthā̱tā te̍ jayatu̱ jetvā̍ni || 6.047.26
di̱vaspṛ̍thi̱vyāḥ paryoja̱ udbhṛ̍ta̱ṁ vana̱spati̍bhya̱ḥ paryābhṛ̍ta̱ṁ saha̍ḥ |
a̱pāmo̱jmāna̱ṁ pari̱ gobhi̱rāvṛ̍ta̱mindra̍sya̱ vajra̍ṁ ha̱viṣā̱ ratha̍ṁ yaja || 6.047.27
indra̍sya̱ vajro̍ ma̱rutā̱manī̍kaṁ mi̱trasya̱ garbho̱ varu̍ṇasya̱ nābhi̍ḥ |
semāṁ no̍ ha̱vyadā̍tiṁ juṣā̱ṇo deva̍ ratha̱ prati̍ ha̱vyā gṛ̍bhāya || 6.047.28
upa̍ śvāsaya pṛthi̱vīmu̱ta dyāṁ pu̍ru̱trā te̍ manutā̱ṁ viṣṭhi̍ta̱ṁ jaga̍t |
sa du̍ndubhe sa̱jūrindre̍ṇa de̱vairdū̱rāddavī̍yo̱ apa̍ sedha̱ śatrū̍n || 6.047.29
ā kra̍ndaya̱ bala̱mojo̍ na̱ ā dhā̱ niḥ ṣṭa̍nihi duri̱tā bādha̍mānaḥ |
apa̍ protha dundubhe du̱cchunā̍ i̱ta indra̍sya mu̱ṣṭira̍si vī̱ḻaya̍sva || 6.047.30
āmūra̍ja pra̱tyāva̍rtaye̱māḥ ke̍tu̱maddu̍ndu̱bhirvā̍vadīti |
samaśva̍parṇā̱ścara̍nti no̱ naro̱'smāka̍mindra ra̱thino̍ jayantu || 6.047.31
ya̱jñāya̍jñā vo a̱gnaye̍ gi̱rāgi̍rā ca̱ dakṣa̍se |
prapra̍ va̱yama̱mṛta̍ṁ jā̱tave̍dasaṁ pri̱yaṁ mi̱traṁ na śa̍ṁsiṣam || 6.048.01
ū̱rjo napā̍ta̱ṁ sa hi̱nāyama̍sma̱yurdāśe̍ma ha̱vyadā̍taye |
bhuva̱dvāje̍ṣvavi̱tā bhuva̍dvṛ̱dha u̱ta trā̱tā ta̱nūnā̍m || 6.048.02
vṛṣā̱ hya̍gne a̱jaro̍ ma̱hānvi̱bhāsya̱rciṣā̍ |
aja̍sreṇa śo̱ciṣā̱ śośu̍cacchuce sudī̱tibhi̱ḥ su dī̍dihi || 6.048.03
ma̱ho de̱vānyaja̍si̱ yakṣyā̍nu̱ṣaktava̱ kratvo̱ta da̱ṁsanā̍ |
a̱rvāca̍ḥ sīṁ kṛṇuhya̱gne'va̍se̱ rāsva̱ vājo̱ta va̍ṁsva || 6.048.04
yamāpo̱ adra̍yo̱ vanā̱ garbha̍mṛ̱tasya̱ pipra̍ti |
saha̍sā̱ yo ma̍thi̱to jāya̍te̱ nṛbhi̍ḥ pṛthi̱vyā adhi̱ sāna̍vi || 6.048.05
ā yaḥ pa̱prau bhā̱nunā̱ roda̍sī u̱bhe dhū̱mena̍ dhāvate di̱vi |
ti̱rastamo̍ dadṛśa̱ ūrmyā̱svā śyā̱vāsva̍ru̱ṣo vṛṣā śyā̱vā a̍ru̱ṣo vṛṣā̍ || 6.048.06
bṛ̱hadbhi̍ragne a̱rcibhi̍ḥ śu̱kreṇa̍ deva śo̱ciṣā̍ |
bha̱radvā̍je samidhā̱no ya̍viṣṭhya re̱vanna̍ḥ śukra dīdihi dyu̱matpā̍vaka dīdihi || 6.048.07
viśvā̍sāṁ gṛ̱hapa̍tirvi̱śāma̍si̱ tvama̍gne̱ mānu̍ṣīṇām |
śa̱taṁ pū̱rbhirya̍viṣṭha pā̱hyaṁha̍saḥ same̱ddhāra̍ṁ śa̱taṁ himā̍ḥ sto̱tṛbhyo̱ ye ca̱ dada̍ti || 6.048.08
tvaṁ na̍ści̱tra ū̱tyā vaso̱ rādhā̍ṁsi codaya |
a̱sya rā̱yastvama̍gne ra̱thīra̍si vi̱dā gā̱dhaṁ tu̱ce tu na̍ḥ || 6.048.09
parṣi̍ to̱kaṁ tana̍yaṁ pa̱rtṛbhi̱ṣṭvamada̍bdhai̱rapra̍yutvabhiḥ |
agne̱ heḻā̍ṁsi̱ daivyā̍ yuyodhi̱ no'de̍vāni̱ hvarā̍ṁsi ca || 6.048.10
ā sa̍khāyaḥ saba̱rdughā̍ṁ dhe̱numa̍jadhva̱mupa̱ navya̍sā̱ vaca̍ḥ |
sṛ̱jadhva̱mana̍pasphurām || 6.048.11
yā śardhā̍ya̱ māru̍tāya̱ svabhā̍nave̱ śravo'mṛ̍tyu̱ dhukṣa̍ta |
yā mṛ̍ḻī̱ke ma̱rutā̍ṁ tu̱rāṇā̱ṁ yā su̱mnaire̍va̱yāva̍rī || 6.048.12
bha̱radvā̍jā̱yāva̍ dhukṣata dvi̱tā |
dhe̱nuṁ ca̍ vi̱śvado̍hasa̱miṣa̍ṁ ca vi̱śvabho̍jasam || 6.048.13
taṁ va̱ indra̱ṁ na su̱kratu̱ṁ varu̍ṇamiva mā̱yina̍m |
a̱rya̱maṇa̱ṁ na ma̱ndraṁ sṛ̱prabho̍jasa̱ṁ viṣṇu̱ṁ na stu̍ṣa ā̱diśe̍ || 6.048.14
tve̱ṣaṁ śardho̱ na māru̍taṁ tuvi̱ṣvaṇya̍na̱rvāṇa̍ṁ pū̱ṣaṇa̱ṁ saṁ yathā̍ śa̱tā |
saṁ sa̱hasrā̱ kāri̍ṣaccarṣa̱ṇibhya̱ ā ā̱virgū̱ḻhā vasū̍ karatsu̱vedā̍ no̱ vasū̍ karat || 6.048.15
ā mā̍ pūṣa̱nnupa̍ drava̱ śaṁsi̍ṣa̱ṁ nu te̍ apika̱rṇa ā̍ghṛṇe |
a̱ghā a̱ryo arā̍tayaḥ || 6.048.16
mā kā̍ka̱mbīra̱mudvṛ̍ho̱ vana̱spati̱maśa̍stī̱rvi hi nīna̍śaḥ |
mota sūro̱ aha̍ e̱vā ca̱na grī̱vā ā̱dadha̍te̱ veḥ || 6.048.17
dṛte̍riva te'vṛ̱kama̍stu sa̱khyam |
acchi̍drasya dadha̱nvata̱ḥ supū̍rṇasya dadha̱nvata̍ḥ || 6.048.18
pa̱ro hi martyai̱rasi̍ sa̱mo de̱vairu̱ta śri̱yā |
a̱bhi khya̍ḥ pūṣa̱npṛta̍nāsu na̱stvamavā̍ nū̱naṁ yathā̍ pu̱rā || 6.048.19
vā̱mī vā̱masya̍ dhūtaya̱ḥ praṇī̍tirastu sū̱nṛtā̍ |
de̱vasya̍ vā maruto̱ martya̍sya vejā̱nasya̍ prayajyavaḥ || 6.048.20
sa̱dyaści̱dyasya̍ carkṛ̱tiḥ pari̱ dyāṁ de̱vo naiti̱ sūrya̍ḥ |
tve̱ṣaṁ śavo̍ dadhire̱ nāma̍ ya̱jñiya̍ṁ ma̱ruto̍ vṛtra̱haṁ śavo̱ jyeṣṭha̍ṁ vṛtra̱haṁ śava̍ḥ || 6.048.21
sa̱kṛddha̱ dyaura̍jāyata sa̱kṛdbhūmi̍rajāyata |
pṛśnyā̍ du̱gdhaṁ sa̱kṛtpaya̱stada̱nyo nānu̍ jāyate || 6.048.22
stu̱ṣe jana̍ṁ suvra̱taṁ navya̍sībhirgī̱rbhirmi̱trāvaru̍ṇā sumna̱yantā̍ |
ta ā ga̍mantu̱ ta i̱ha śru̍vantu sukṣa̱trāso̱ varu̍ṇo mi̱tro a̱gniḥ || 6.049.01
vi̱śovi̍śa̱ īḍya̍madhva̱reṣvadṛ̍ptakratumara̱tiṁ yu̍va̱tyoḥ |
di̱vaḥ śiśu̱ṁ saha̍saḥ sū̱numa̱gniṁ ya̱jñasya̍ ke̱tuma̍ru̱ṣaṁ yaja̍dhyai || 6.049.02
a̱ru̱ṣasya̍ duhi̱tarā̱ virū̍pe̱ stṛbhi̍ra̱nyā pi̍pi̱śe sūro̍ a̱nyā |
mi̱tha̱sturā̍ vi̱cara̍ntī pāva̱ke manma̍ śru̱taṁ na̍kṣata ṛ̱cyamā̍ne || 6.049.03
pra vā̱yumacchā̍ bṛha̱tī ma̍nī̱ṣā bṛ̱hadra̍yiṁ vi̱śvavā̍raṁ ratha̱prām |
dyu̱tadyā̍mā ni̱yuta̱ḥ patya̍mānaḥ ka̱viḥ ka̱vimi̍yakṣasi prayajyo || 6.049.04
sa me̱ vapu̍śchadayada̱śvino̱ryo ratho̍ vi̱rukmā̱nmana̍sā yujā̱naḥ |
yena̍ narā nāsatyeṣa̱yadhyai̍ va̱rtiryā̱thastana̍yāya̱ tmane̍ ca || 6.049.05
parja̍nyavātā vṛṣabhā pṛthi̱vyāḥ purī̍ṣāṇi jinvata̱mapyā̍ni |
satya̍śrutaḥ kavayo̱ yasya̍ gī̱rbhirjaga̍taḥ sthāta̱rjaga̱dā kṛ̍ṇudhvam || 6.049.06
pāvī̍ravī ka̱nyā̍ ci̱trāyu̱ḥ sara̍svatī vī̱rapa̍tnī̱ dhiya̍ṁ dhāt |
gnābhi̱racchi̍draṁ śara̱ṇaṁ sa̱joṣā̍ durā̱dharṣa̍ṁ gṛṇa̱te śarma̍ yaṁsat || 6.049.07
pa̱thaspa̍tha̱ḥ pari̍patiṁ vaca̱syā kāme̍na kṛ̱to a̱bhyā̍naḻa̱rkam |
sa no̍ rāsacchu̱rudha̍śca̱ndrāgrā̱ dhiya̍ṁdhiyaṁ sīṣadhāti̱ pra pū̱ṣā || 6.049.08
pra̱tha̱ma̱bhāja̍ṁ ya̱śasa̍ṁ vayo̱dhāṁ su̍pā̱ṇiṁ de̱vaṁ su̱gabha̍sti̱mṛbhva̍m |
hotā̍ yakṣadyaja̱taṁ pa̱styā̍nāma̱gnistvaṣṭā̍raṁ su̱hava̍ṁ vi̱bhāvā̍ || 6.049.09
bhuva̍nasya pi̱tara̍ṁ gī̱rbhirā̱bhī ru̱draṁ divā̍ va̱rdhayā̍ ru̱drama̱ktau |
bṛ̱hanta̍mṛ̱ṣvama̱jara̍ṁ suṣu̱mnamṛdha̍gghuvema ka̱vine̍ṣi̱tāsa̍ḥ || 6.049.10
ā yu̍vānaḥ kavayo yajñiyāso̱ maru̍to ga̱nta gṛ̍ṇa̱to va̍ra̱syām |
a̱ci̱traṁ ci̱ddhi jinva̍thā vṛ̱dhanta̍ i̱tthā nakṣa̍nto naro aṅgira̱svat || 6.049.11
pra vī̱rāya̱ pra ta̱vase̍ tu̱rāyājā̍ yū̱theva̍ paśu̱rakṣi̱rasta̍m |
sa pi̍spṛśati ta̱nvi̍ śru̱tasya̱ stṛbhi̱rna nāka̍ṁ vaca̱nasya̱ vipa̍ḥ || 6.049.12
yo rajā̍ṁsi vima̱me pārthi̍vāni̱ triści̱dviṣṇu̱rmana̍ve bādhi̱tāya̍ |
tasya̍ te̱ śarma̍nnupada̱dyamā̍ne rā̱yā ma̍dema ta̱nvā̱3̱̍ tanā̍ ca || 6.049.13
tanno'hi̍rbu̱dhnyo̍ a̱dbhira̱rkaistatparva̍ta̱statsa̍vi̱tā cano̍ dhāt |
tadoṣa̍dhībhira̱bhi rā̍ti̱ṣāco̱ bhaga̱ḥ pura̍ṁdhirjinvatu̱ pra rā̱ye || 6.049.14
nu no̍ ra̱yiṁ ra̱thya̍ṁ carṣaṇi̱prāṁ pu̍ru̱vīra̍ṁ ma̱ha ṛ̱tasya̍ go̱pām |
kṣaya̍ṁ dātā̱jara̱ṁ yena̱ janā̱nspṛdho̱ ade̍vīra̱bhi ca̱ kramā̍ma̱ viśa̱ āde̍vīra̱bhya1̱̍śnavā̍ma || 6.049.15
hu̱ve vo̍ de̱vīmadi̍ti̱ṁ namo̍bhirmṛḻī̱kāya̱ varu̍ṇaṁ mi̱trama̱gnim |
a̱bhi̱kṣa̱dāma̍rya̱maṇa̍ṁ su̱śeva̍ṁ trā̱tṝnde̱vānsa̍vi̱tāra̱ṁ bhaga̍ṁ ca || 6.050.01
su̱jyoti̍ṣaḥ sūrya̱ dakṣa̍pitṝnanāgā̱stve su̍maho vīhi de̱vān |
dvi̱janmā̍no̱ ya ṛ̍ta̱sāpa̍ḥ sa̱tyāḥ sva̍rvanto yaja̱tā a̍gniji̱hvāḥ || 6.050.02
u̱ta dyā̍vāpṛthivī kṣa̱tramu̱ru bṛ̱hadro̍dasī śara̱ṇaṁ su̍ṣumne |
ma̱haska̍ratho̱ vari̍vo̱ yathā̍ no̱'sme kṣayā̍ya dhiṣaṇe ane̱haḥ || 6.050.03
ā no̍ ru̱drasya̍ sū̱navo̍ namantāma̱dyā hū̱tāso̱ vasa̱vo'dhṛ̍ṣṭāḥ |
yadī̱marbhe̍ maha̱ti vā̍ hi̱tāso̍ bā̱dhe ma̱ruto̱ ahvā̍ma de̱vān || 6.050.04
mi̱myakṣa̱ yeṣu̍ roda̱sī nu de̱vī siṣa̍kti pū̱ṣā a̍bhyardha̱yajvā̍ |
śru̱tvā hava̍ṁ maruto̱ yaddha̍ yā̱tha bhūmā̍ rejante̱ adhva̍ni̱ pravi̍kte || 6.050.05
a̱bhi tyaṁ vī̱raṁ girva̍ṇasama̱rcendra̱ṁ brahma̍ṇā jarita̱rnave̍na |
śrava̱diddhava̱mupa̍ ca̱ stavā̍no̱ rāsa̱dvājā̱ upa̍ ma̱ho gṛ̍ṇā̱naḥ || 6.050.06
o̱māna̍māpo mānuṣī̱ramṛ̍kta̱ṁ dhāta̍ to̱kāya̱ tana̍yāya̱ śaṁ yoḥ |
yū̱yaṁ hi ṣṭhā bhi̱ṣajo̍ mā̱tṛta̍mā̱ viśva̍sya sthā̱turjaga̍to̱ jani̍trīḥ || 6.050.07
ā no̍ de̱vaḥ sa̍vi̱tā trāya̍māṇo̱ hira̍ṇyapāṇiryaja̱to ja̍gamyāt |
yo datra̍vā u̱ṣaso̱ na pratī̍kaṁ vyūrṇu̱te dā̱śuṣe̱ vāryā̍ṇi || 6.050.08
u̱ta tvaṁ sū̍no sahaso no a̱dyā de̱vā a̱sminna̍dhva̱re va̍vṛtyāḥ |
syāma̱haṁ te̱ sada̱midrā̱tau tava̍ syāma̱gne'va̍sā su̱vīra̍ḥ || 6.050.09
u̱ta tyā me̱ hava̱mā ja̍gmyāta̱ṁ nāsa̍tyā dhī̱bhiryu̱vama̱ṅga vi̍prā |
atri̱ṁ na ma̱hastama̍so'mumukta̱ṁ tūrva̍taṁ narā duri̱tāda̱bhīke̍ || 6.050.10
te no̍ rā̱yo dyu̱mato̱ vāja̍vato dā̱tāro̍ bhūta nṛ̱vata̍ḥ puru̱kṣoḥ |
da̱śa̱syanto̍ di̱vyāḥ pārthi̍vāso̱ gojā̍tā̱ apyā̍ mṛ̱ḻatā̍ ca devāḥ || 6.050.11
te no̍ ru̱draḥ sara̍svatī sa̱joṣā̍ mī̱ḻhuṣma̍nto̱ viṣṇu̍rmṛḻantu vā̱yuḥ |
ṛ̱bhu̱kṣā vājo̱ daivyo̍ vidhā̱tā pa̱rjanyā̱vātā̍ pipyatā̱miṣa̍ṁ naḥ || 6.050.12
u̱ta sya de̱vaḥ sa̍vi̱tā bhago̍ no̱'pāṁ napā̍davatu̱ dānu̱ papri̍ḥ |
tvaṣṭā̍ de̱vebhi̱rjani̍bhiḥ sa̱joṣā̱ dyaurde̱vebhi̍ḥ pṛthi̱vī sa̍mu̱draiḥ || 6.050.13
u̱ta no'hi̍rbu̱dhnya̍ḥ śṛṇotva̱ja eka̍pātpṛthi̱vī sa̍mu̱draḥ |
viśve̍ de̱vā ṛ̍tā̱vṛdho̍ huvā̱nāḥ stu̱tā mantrā̍ḥ kaviśa̱stā a̍vantu || 6.050.14
e̱vā napā̍to̱ mama̱ tasya̍ dhī̱bhirbha̱radvā̍jā a̱bhya̍rcantya̱rkaiḥ |
gnā hu̱tāso̱ vasa̱vo'dhṛ̍ṣṭā̱ viśve̍ stu̱tāso̍ bhūtā yajatrāḥ || 6.050.15
udu̱ tyaccakṣu̱rmahi̍ mi̱trayo̱rā eti̍ pri̱yaṁ varu̍ṇayo̱rada̍bdham |
ṛ̱tasya̱ śuci̍ darśa̱tamanī̍kaṁ ru̱kmo na di̱va udi̍tā̱ vya̍dyaut || 6.051.01
veda̱ yastrīṇi̍ vi̱dathā̍nyeṣāṁ de̱vānā̱ṁ janma̍ sanu̱tarā ca̱ vipra̍ḥ |
ṛ̱ju marte̍ṣu vṛji̱nā ca̱ paśya̍nna̱bhi ca̍ṣṭe̱ sūro̍ a̱rya evā̍n || 6.051.02
stu̱ṣa u̍ vo ma̱ha ṛ̱tasya̍ go̱pānadi̍tiṁ mi̱traṁ varu̍ṇaṁ sujā̱tān |
a̱rya̱maṇa̱ṁ bhaga̱mada̍bdhadhītī̱nacchā̍ voce sadha̱nya̍ḥ pāva̱kān || 6.051.03
ri̱śāda̍sa̱ḥ satpa̍tī̱rada̍bdhānma̱ho rājña̍ḥ suvasa̱nasya̍ dā̱tṝn |
yūna̍ḥ sukṣa̱trānkṣaya̍to di̱vo nṝnā̍di̱tyānyā̱myadi̍tiṁ duvo̱yu || 6.051.04
dyau̱3̱̍ṣpita̱ḥ pṛthi̍vi̱ māta̱radhru̱gagne̍ bhrātarvasavo mṛ̱ḻatā̍ naḥ |
viśva̍ ādityā adite sa̱joṣā̍ a̱smabhya̱ṁ śarma̍ bahu̱laṁ vi ya̍nta || 6.051.05
mā no̱ vṛkā̍ya vṛ̱kye̍ samasmā aghāya̱te rī̍radhatā yajatrāḥ |
yū̱yaṁ hi ṣṭhā ra̱thyo̍ nasta̱nūnā̍ṁ yū̱yaṁ dakṣa̍sya̱ vaca̍so babhū̱va || 6.051.06
mā va̱ eno̍ a̱nyakṛ̍taṁ bhujema̱ mā tatka̍rma vasavo̱ yaccaya̍dhve |
viśva̍sya̱ hi kṣaya̍tha viśvadevāḥ sva̱yaṁ ri̱pusta̱nva̍ṁ rīriṣīṣṭa || 6.051.07
nama̱ idu̱graṁ nama̱ ā vi̍vāse̱ namo̍ dādhāra pṛthi̱vīmu̱ta dyām |
namo̍ de̱vebhyo̱ nama̍ īśa eṣāṁ kṛ̱taṁ ci̱deno̱ nama̱sā vi̍vāse || 6.051.08
ṛ̱tasya̍ vo ra̱thya̍ḥ pū̱tada̍kṣānṛ̱tasya̍ pastya̱sado̱ ada̍bdhān |
tā ā namo̍bhiruru̱cakṣa̍so̱ nṝnviśvā̍nva̱ ā na̍me ma̱ho ya̍jatrāḥ || 6.051.09
te hi śreṣṭha̍varcasa̱sta u̍ nasti̱ro viśvā̍ni duri̱tā naya̍nti |
su̱kṣa̱trāso̱ varu̍ṇo mi̱tro a̱gnirṛ̱tadhī̍tayo vakma̱rāja̍satyāḥ || 6.051.10
te na̱ indra̍ḥ pṛthi̱vī kṣāma̍ vardhanpū̱ṣā bhago̱ adi̍ti̱ḥ pañca̱ janā̍ḥ |
su̱śarmā̍ṇa̱ḥ svava̍saḥ sunī̱thā bhava̍ntu naḥ sutrā̱trāsa̍ḥ sugo̱pāḥ || 6.051.11
nū sa̱dmāna̍ṁ di̱vyaṁ naṁśi̍ devā̱ bhāra̍dvājaḥ suma̱tiṁ yā̍ti̱ hotā̍ |
ā̱sā̱nebhi̱ryaja̍māno mi̱yedhai̍rde̱vānā̱ṁ janma̍ vasū̱yurva̍vanda || 6.051.12
apa̱ tyaṁ vṛ̍ji̱naṁ ri̱puṁ ste̱nama̍gne durā̱dhya̍m |
da̱vi̱ṣṭhama̍sya satpate kṛ̱dhī su̱gam || 6.051.13
grāvā̍ṇaḥ soma no̱ hi ka̍ṁ sakhitva̱nāya̍ vāva̱śuḥ |
ja̱hī nya1̱̍triṇa̍ṁ pa̱ṇiṁ vṛko̱ hi ṣaḥ || 6.051.14
yū̱yaṁ hi ṣṭhā su̍dānava̱ indra̍jyeṣṭhā a̱bhidya̍vaḥ |
kartā̍ no̱ adhva̱nnā su̱gaṁ go̱pā a̱mā || 6.051.15
api̱ panthā̍maganmahi svasti̱gāma̍ne̱hasa̍m |
yena̱ viśvā̱ḥ pari̱ dviṣo̍ vṛ̱ṇakti̍ vi̱ndate̱ vasu̍ || 6.051.16
na taddi̱vā na pṛ̍thi̱vyānu̍ manye̱ na ya̱jñena̱ nota śamī̍bhirā̱bhiḥ |
u̱bjantu̱ taṁ su̱bhva1̱̍ḥ parva̍tāso̱ ni hī̍yatāmatiyā̱jasya̍ ya̱ṣṭā || 6.052.01
ati̍ vā̱ yo ma̍ruto̱ manya̍te no̱ brahma̍ vā̱ yaḥ kri̱yamā̍ṇa̱ṁ nini̍tsāt |
tapū̍ṁṣi̱ tasmai̍ vṛji̱nāni̍ santu brahma̱dviṣa̍ma̱bhi taṁ śo̍catu̱ dyauḥ || 6.052.02
kima̱ṅga tvā̱ brahma̍ṇaḥ soma go̱pāṁ kima̱ṅga tvā̍hurabhiśasti̱pāṁ na̍ḥ |
kima̱ṅga na̍ḥ paśyasi ni̱dyamā̍nānbrahma̱dviṣe̱ tapu̍ṣiṁ he̱tima̍sya || 6.052.03
ava̍ntu̱ māmu̱ṣaso̱ jāya̍mānā̱ ava̍ntu mā̱ sindha̍va̱ḥ pinva̍mānāḥ |
ava̍ntu mā̱ parva̍tāso dhru̱vāso'va̍ntu mā pi̱taro̍ de̱vahū̍tau || 6.052.04
vi̱śva̱dānī̍ṁ su̱mana̍saḥ syāma̱ paśye̍ma̱ nu sūrya̍mu̱ccara̍ntam |
tathā̍ kara̱dvasu̍pati̱rvasū̍nāṁ de̱vā ohā̱no'va̱sāga̍miṣṭhaḥ || 6.052.05
indro̱ nedi̍ṣṭha̱mava̱sāga̍miṣṭha̱ḥ sara̍svatī̱ sindhu̍bhi̱ḥ pinva̍mānā |
pa̱rjanyo̍ na̱ oṣa̍dhībhirmayo̱bhura̱gniḥ su̱śaṁsa̍ḥ su̱hava̍ḥ pi̱teva̍ || 6.052.06
viśve̍ devāsa̱ ā ga̍ta śṛṇu̱tā ma̍ i̱maṁ hava̍m |
edaṁ ba̱rhirni ṣī̍data || 6.052.07
yo vo̍ devā ghṛ̱tasnu̍nā ha̱vyena̍ prati̱bhūṣa̍ti |
taṁ viśva̱ upa̍ gacchatha || 6.052.08
upa̍ naḥ sū̱navo̱ gira̍ḥ śṛ̱ṇvantva̱mṛta̍sya̱ ye |
su̱mṛ̱ḻī̱kā bha̍vantu naḥ || 6.052.09
viśve̍ de̱vā ṛ̍tā̱vṛdha̍ ṛ̱tubhi̍rhavana̱śruta̍ḥ |
ju̱ṣantā̱ṁ yujya̱ṁ paya̍ḥ || 6.052.10
sto̱tramindro̍ ma̱rudga̍ṇa̱stvaṣṭṛ̍mānmi̱tro a̍rya̱mā |
i̱mā ha̱vyā ju̍ṣanta naḥ || 6.052.11
i̱maṁ no̍ agne adhva̱raṁ hota̍rvayuna̱śo ya̍ja |
ci̱ki̱tvāndaivya̱ṁ jana̍m || 6.052.12
viśve̍ devāḥ śṛṇu̱temaṁ hava̍ṁ me̱ ye a̱ntari̍kṣe̱ ya upa̱ dyavi̱ ṣṭha |
ye a̍gniji̱hvā u̱ta vā̱ yaja̍trā ā̱sadyā̱sminba̱rhiṣi̍ mādayadhvam || 6.052.13
viśve̍ de̱vā mama̍ śṛṇvantu ya̱jñiyā̍ u̱bhe roda̍sī a̱pāṁ napā̍cca̱ manma̍ |
mā vo̱ vacā̍ṁsi pari̱cakṣyā̍ṇi vocaṁ su̱mneṣvidvo̱ anta̍mā madema || 6.052.14
ye ke ca̱ jmā ma̱hino̱ ahi̍māyā di̱vo ja̍jñi̱re a̱pāṁ sa̱dhasthe̍ |
te a̱smabhya̍mi̱ṣaye̱ viśva̱māyu̱ḥ kṣapa̍ u̱srā va̍rivasyantu de̱vāḥ || 6.052.15
agnī̍parjanyā̱vava̍ta̱ṁ dhiya̍ṁ me̱'sminhave̍ suhavā suṣṭu̱tiṁ na̍ḥ |
iḻā̍ma̱nyo ja̱naya̱dgarbha̍ma̱nyaḥ pra̱jāva̍tī̱riṣa̱ ā dha̍ttama̱sme || 6.052.16
stī̱rṇe ba̱rhiṣi̍ samidhā̱ne a̱gnau sū̱ktena̍ ma̱hā nama̱sā vi̍vāse |
a̱sminno̍ a̱dya vi̱dathe̍ yajatrā̱ viśve̍ devā ha̱viṣi̍ mādayadhvam || 6.052.17
va̱yamu̍ tvā pathaspate̱ ratha̱ṁ na vāja̍sātaye |
dhi̱ye pū̍ṣannayujmahi || 6.053.01
a̱bhi no̱ narya̱ṁ vasu̍ vī̱raṁ praya̍tadakṣiṇam |
vā̱maṁ gṛ̱hapa̍tiṁ naya || 6.053.02
adi̍tsantaṁ cidāghṛṇe̱ pūṣa̱ndānā̍ya codaya |
pa̱ṇeści̱dvi mra̍dā̱ mana̍ḥ || 6.053.03
vi pa̱tho vāja̍sātaye cinu̱hi vi mṛdho̍ jahi |
sādha̍ntāmugra no̱ dhiya̍ḥ || 6.053.04
pari̍ tṛndhi paṇī̱nāmāra̍yā̱ hṛda̍yā kave |
athe̍ma̱smabhya̍ṁ randhaya || 6.053.05
vi pū̍ṣa̱nnāra̍yā tuda pa̱ṇeri̍ccha hṛ̱di pri̱yam |
athe̍ma̱smabhya̍ṁ randhaya || 6.053.06
ā ri̍kha kiki̱rā kṛ̍ṇu paṇī̱nāṁ hṛda̍yā kave |
athe̍ma̱smabhya̍ṁ randhaya || 6.053.07
yāṁ pū̍ṣanbrahma̱coda̍nī̱mārā̱ṁ bibha̍rṣyāghṛṇe |
tayā̍ samasya̱ hṛda̍ya̱mā ri̍kha kiki̱rā kṛ̍ṇu || 6.053.08
yā te̱ aṣṭrā̱ goo̍pa̱śāghṛ̍ṇe paśu̱sādha̍nī |
tasyā̍ste su̱mnamī̍mahe || 6.053.09
u̱ta no̍ go̱ṣaṇi̱ṁ dhiya̍maśva̱sāṁ vā̍ja̱sāmu̱ta |
nṛ̱vatkṛ̍ṇuhi vī̱taye̍ || 6.053.10
saṁ pū̍ṣanvi̱duṣā̍ naya̱ yo añja̍sānu̱śāsa̍ti |
ya e̱vedamiti̱ brava̍t || 6.054.01
samu̍ pū̱ṣṇā ga̍memahi̱ yo gṛ̱hā a̍bhi̱śāsa̍ti |
i̱ma e̱veti̍ ca̱ brava̍t || 6.054.02
pū̱ṣṇaśca̱kraṁ na ri̍ṣyati̱ na kośo'va̍ padyate |
no a̍sya vyathate pa̱viḥ || 6.054.03
yo a̍smai ha̱viṣāvi̍dha̱nna taṁ pū̱ṣāpi̍ mṛṣyate |
pra̱tha̱mo vi̍ndate̱ vasu̍ || 6.054.04
pū̱ṣā gā anve̍tu naḥ pū̱ṣā ra̍kṣa̱tvarva̍taḥ |
pū̱ṣā vāja̍ṁ sanotu naḥ || 6.054.05
pūṣa̱nnanu̱ pra gā i̍hi̱ yaja̍mānasya sunva̱taḥ |
a̱smāka̍ṁ stuva̱tāmu̱ta || 6.054.06
māki̍rneśa̱nmākī̍ṁ riṣa̱nmākī̱ṁ saṁ śā̍ri̱ keva̍ṭe |
athāri̍ṣṭābhi̱rā ga̍hi || 6.054.07
śṛ̱ṇvanta̍ṁ pū̱ṣaṇa̍ṁ va̱yamirya̱mana̍ṣṭavedasam |
īśā̍naṁ rā̱ya ī̍mahe || 6.054.08
pūṣa̱ntava̍ vra̱te va̱yaṁ na ri̍ṣyema̱ kadā̍ ca̱na |
sto̱tāra̍sta i̱ha sma̍si || 6.054.09
pari̍ pū̱ṣā pa̱rastā̱ddhasta̍ṁ dadhātu̱ dakṣi̍ṇam |
puna̍rno na̱ṣṭamāja̍tu || 6.054.10
ehi̱ vāṁ vi̍muco napā̱dāghṛ̍ṇe̱ saṁ sa̍cāvahai |
ra̱thīrṛ̱tasya̍ no bhava || 6.055.01
ra̱thīta̍maṁ kapa̱rdina̱mīśā̍na̱ṁ rādha̍so ma̱haḥ |
rā̱yaḥ sakhā̍yamīmahe || 6.055.02
rā̱yo dhārā̍syāghṛṇe̱ vaso̍ rā̱śira̍jāśva |
dhīva̍todhīvata̱ḥ sakhā̍ || 6.055.03
pū̱ṣaṇa̱ṁ nva1̱̍jāśva̱mupa̍ stoṣāma vā̱jina̍m |
svasu̱ryo jā̱ra u̱cyate̍ || 6.055.04
mā̱turdi̍dhi̱ṣuma̍brava̱ṁ svasu̍rjā̱raḥ śṛ̍ṇotu naḥ |
bhrātendra̍sya̱ sakhā̱ mama̍ || 6.055.05
ājāsa̍ḥ pū̱ṣaṇa̱ṁ rathe̍ niśṛ̱mbhāste ja̍na̱śriya̍m |
de̱vaṁ va̍hantu̱ bibhra̍taḥ || 6.055.06
ya e̍namā̱dide̍śati kara̱mbhāditi̍ pū̱ṣaṇa̍m |
na tena̍ de̱va ā̱diśe̍ || 6.056.01
u̱ta ghā̱ sa ra̱thīta̍ma̱ḥ sakhyā̱ satpa̍tiryu̱jā |
indro̍ vṛ̱trāṇi̍ jighnate || 6.056.02
u̱tādaḥ pa̍ru̱ṣe gavi̱ sūra̍śca̱kraṁ hi̍ra̱ṇyaya̍m |
nyai̍rayadra̱thīta̍maḥ || 6.056.03
yada̱dya tvā̍ puruṣṭuta̱ bravā̍ma dasra mantumaḥ |
tatsu no̱ manma̍ sādhaya || 6.056.04
i̱maṁ ca̍ no ga̱veṣa̍ṇaṁ sā̱taye̍ sīṣadho ga̱ṇam |
ā̱rātpū̍ṣannasi śru̱taḥ || 6.056.05
ā te̍ sva̱stimī̍maha ā̱rea̍ghā̱mupā̍vasum |
a̱dyā ca̍ sa̱rvatā̍taye̱ śvaśca̍ sa̱rvatā̍taye || 6.056.06
indrā̱ nu pū̱ṣaṇā̍ va̱yaṁ sa̱khyāya̍ sva̱staye̍ |
hu̱vema̱ vāja̍sātaye || 6.057.01
soma̍ma̱nya upā̍sada̱tpāta̍ve ca̱mvo̍ḥ su̱tam |
ka̱ra̱mbhama̱nya i̍cchati || 6.057.02
a̱jā a̱nyasya̱ vahna̍yo̱ harī̍ a̱nyasya̱ sambhṛ̍tā |
tābhyā̍ṁ vṛ̱trāṇi̍ jighnate || 6.057.03
yadindro̱ ana̍ya̱drito̍ ma̱hīra̱po vṛṣa̍ntamaḥ |
tatra̍ pū̱ṣābha̍va̱tsacā̍ || 6.057.04
tāṁ pū̱ṣṇaḥ su̍ma̱tiṁ va̱yaṁ vṛ̱kṣasya̱ pra va̱yāmi̍va |
indra̍sya̱ cā ra̍bhāmahe || 6.057.05
utpū̱ṣaṇa̍ṁ yuvāmahe̱'bhīśū̍riva̱ sāra̍thiḥ |
ma̱hyā indra̍ṁ sva̱staye̍ || 6.057.06
śu̱kraṁ te̍ a̱nyadya̍ja̱taṁ te̍ a̱nyadviṣu̍rūpe̱ aha̍nī̱ dyauri̍vāsi |
viśvā̱ hi mā̱yā ava̍si svadhāvo bha̱drā te̍ pūṣanni̱ha rā̱tira̍stu || 6.058.01
a̱jāśva̍ḥ paśu̱pā vāja̍pastyo dhiyaṁji̱nvo bhuva̍ne̱ viśve̱ arpi̍taḥ |
aṣṭrā̍ṁ pū̱ṣā śi̍thi̱rāmu̱dvarī̍vṛjatsa̱ṁcakṣā̍ṇo̱ bhuva̍nā de̱va ī̍yate || 6.058.02
yāste̍ pūṣa̱nnāvo̍ a̱ntaḥ sa̍mu̱dre hi̍ra̱ṇyayī̍ra̱ntari̍kṣe̱ cara̍nti |
tābhi̍ryāsi dū̱tyāṁ sūrya̍sya̱ kāme̍na kṛta̱ śrava̍ i̱cchamā̍naḥ || 6.058.03
pū̱ṣā su̱bandhu̍rdi̱va ā pṛ̍thi̱vyā i̱ḻaspati̍rma̱ghavā̍ da̱smava̍rcāḥ |
yaṁ de̱vāso̱ ada̍duḥ sū̱ryāyai̱ kāme̍na kṛ̱taṁ ta̱vasa̱ṁ svañca̍m || 6.058.04
pra nu vo̍cā su̱teṣu̍ vāṁ vī̱ryā̱3̱̍ yāni̍ ca̱krathu̍ḥ |
ha̱tāso̍ vāṁ pi̱taro̍ de̱vaśa̍trava̱ indrā̍gnī̱ jīva̍tho yu̱vam || 6.059.01
baḻi̱tthā ma̍hi̱mā vā̱mindrā̍gnī̱ pani̍ṣṭha̱ ā |
sa̱mā̱no vā̍ṁ jani̱tā bhrāta̍rā yu̱vaṁ ya̱māvi̱heha̍mātarā || 6.059.02
o̱ki̱vāṁsā̍ su̱te sacā̱ aśvā̱ saptī̍ i̱vāda̍ne |
indrā̱ nva1̱̍gnī ava̍se̱ha va̱jriṇā̍ va̱yaṁ de̱vā ha̍vāmahe || 6.059.03
ya i̍ndrāgnī su̱teṣu̍ vā̱ṁ stava̱tteṣvṛ̍tāvṛdhā |
jo̱ṣa̱vā̱kaṁ vada̍taḥ pajrahoṣiṇā̱ na de̍vā bha̱satha̍śca̱na || 6.059.04
indrā̍gnī̱ ko a̱sya vā̱ṁ devau̱ marta̍ściketati |
viṣū̍co̱ aśvā̍nyuyujā̱na ī̍yata̱ eka̍ḥ samā̱na ā rathe̍ || 6.059.05
indrā̍gnī a̱pādi̱yaṁ pūrvāgā̍tpa̱dvatī̍bhyaḥ |
hi̱tvī śiro̍ ji̱hvayā̱ vāva̍da̱ccara̍ttri̱ṁśatpa̱dā nya̍kramīt || 6.059.06
indrā̍gnī̱ ā hi ta̍nva̱te naro̱ dhanvā̍ni bā̱hvoḥ |
mā no̍ a̱sminma̍hādha̱ne parā̍ varkta̱ṁ gavi̍ṣṭiṣu || 6.059.07
indrā̍gnī̱ tapa̍nti mā̱ghā a̱ryo arā̍tayaḥ |
apa̱ dveṣā̱ṁsyā kṛ̍taṁ yuyu̱taṁ sūryā̱dadhi̍ || 6.059.08
indrā̍gnī yu̱vorapi̱ vasu̍ di̱vyāni̱ pārthi̍vā |
ā na̍ i̱ha pra ya̍cchataṁ ra̱yiṁ vi̱śvāyu̍poṣasam || 6.059.09
indrā̍gnī ukthavāhasā̱ stome̍bhirhavanaśrutā |
viśvā̍bhirgī̱rbhirā ga̍tama̱sya soma̍sya pī̱taye̍ || 6.059.10
śnatha̍dvṛ̱tramu̱ta sa̍noti̱ vāja̱mindrā̱ yo a̱gnī sahu̍rī sapa̱ryāt |
i̱ra̱jyantā̍ vasa̱vya̍sya̱ bhūre̱ḥ saha̍stamā̱ saha̍sā vāja̱yantā̍ || 6.060.01
tā yo̍dhiṣṭama̱bhi gā i̍ndra nū̱nama̱paḥ sva̍ru̱ṣaso̍ agna ū̱ḻhāḥ |
diśa̱ḥ sva̍ru̱ṣasa̍ indra ci̱trā a̱po gā a̍gne yuvase ni̱yutvā̍n || 6.060.02
ā vṛ̍trahaṇā vṛtra̱habhi̱ḥ śuṣmai̱rindra̍ yā̱taṁ namo̍bhiragne a̱rvāk |
yu̱vaṁ rādho̍bhi̱raka̍vebhiri̱ndrāgne̍ a̱sme bha̍vatamutta̱mebhi̍ḥ || 6.060.03
tā hu̍ve̱ yayo̍ri̱daṁ pa̱pne viśva̍ṁ pu̱rā kṛ̱tam |
i̱ndrā̱gnī na ma̍rdhataḥ || 6.060.04
u̱grā vi̍gha̱ninā̱ mṛdha̍ indrā̱gnī ha̍vāmahe |
tā no̍ mṛḻāta ī̱dṛśe̍ || 6.060.05
ha̱to vṛ̱trāṇyāryā̍ ha̱to dāsā̍ni̱ satpa̍tī |
ha̱to viśvā̱ apa̱ dviṣa̍ḥ || 6.060.06
indrā̍gnī yu̱vāmi̱me̱3̱̍'bhi stomā̍ anūṣata |
piba̍taṁ śambhuvā su̱tam || 6.060.07
yā vā̱ṁ santi̍ puru̱spṛho̍ ni̱yuto̍ dā̱śuṣe̍ narā |
indrā̍gnī̱ tābhi̱rā ga̍tam || 6.060.08
tābhi̱rā ga̍cchataṁ na̱rope̱daṁ sava̍naṁ su̱tam |
indrā̍gnī̱ soma̍pītaye || 6.060.09
tamī̍ḻiṣva̱ yo a̱rciṣā̱ vanā̱ viśvā̍ pari̱ṣvaja̍t |
kṛ̱ṣṇā kṛ̱ṇoti̍ ji̱hvayā̍ || 6.060.10
ya i̱ddha ā̱vivā̍sati su̱mnamindra̍sya̱ martya̍ḥ |
dyu̱mnāya̍ su̱tarā̍ a̱paḥ || 6.060.11
tā no̱ vāja̍vatī̱riṣa̍ ā̱śūnpi̍pṛta̱marva̍taḥ |
indra̍ma̱gniṁ ca̱ voḻha̍ve || 6.060.12
u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |
u̱bhā dā̱tārā̍vi̱ṣāṁ ra̍yī̱ṇāmu̱bhā vāja̍sya sā̱taye̍ huve vām || 6.060.13
ā no̱ gavye̍bhi̱raśvyai̍rvasa̱vyai̱3̱̍rupa̍ gacchatam |
sakhā̍yau de̱vau sa̱khyāya̍ śa̱mbhuve̍ndrā̱gnī tā ha̍vāmahe || 6.060.14
indrā̍gnī śṛṇu̱taṁ hava̱ṁ yaja̍mānasya sunva̱taḥ |
vī̱taṁ ha̱vyānyā ga̍ta̱ṁ piba̍taṁ so̱myaṁ madhu̍ || 6.060.15
i̱yama̍dadādrabha̱samṛ̍ṇa̱cyuta̱ṁ divo̍dāsaṁ vadhrya̱śvāya̍ dā̱śuṣe̍ |
yā śaśva̍ntamāca̱khādā̍va̱saṁ pa̱ṇiṁ tā te̍ dā̱trāṇi̍ tavi̱ṣā sa̍rasvati || 6.061.01
i̱yaṁ śuṣme̍bhirbisa̱khā i̍vāruja̱tsānu̍ girī̱ṇāṁ ta̍vi̱ṣebhi̍rū̱rmibhi̍ḥ |
pā̱rā̱va̱ta̱ghnīmava̍se suvṛ̱ktibhi̱ḥ sara̍svatī̱mā vi̍vāsema dhī̱tibhi̍ḥ || 6.061.02
sara̍svati deva̱nido̱ ni ba̍rhaya pra̱jāṁ viśva̍sya̱ bṛsa̍yasya mā̱yina̍ḥ |
u̱ta kṣi̱tibhyo̱'vanī̍ravindo vi̱ṣame̍bhyo asravo vājinīvati || 6.061.03
pra ṇo̍ de̱vī sara̍svatī̱ vāje̍bhirvā̱jinī̍vatī |
dhī̱nāma̍vi̱trya̍vatu || 6.061.04
yastvā̍ devi sarasvatyupabrū̱te dhane̍ hi̱te |
indra̱ṁ na vṛ̍tra̱tūrye̍ || 6.061.05
tvaṁ de̍vi sarasva̱tyavā̱ vāje̍ṣu vājini |
radā̍ pū̱ṣeva̍ naḥ sa̱nim || 6.061.06
u̱ta syā na̱ḥ sara̍svatī gho̱rā hira̍ṇyavartaniḥ |
vṛ̱tra̱ghnī va̍ṣṭi suṣṭu̱tim || 6.061.07
yasyā̍ ana̱nto ahru̍tastve̱ṣaśca̍ri̱ṣṇura̍rṇa̱vaḥ |
ama̱ścara̍ti̱ roru̍vat || 6.061.08
sā no̱ viśvā̱ ati̱ dviṣa̱ḥ svasṝ̍ra̱nyā ṛ̱tāva̍rī |
ata̱nnahe̍va̱ sūrya̍ḥ || 6.061.09
u̱ta na̍ḥ pri̱yā pri̱yāsu̍ sa̱ptasva̍sā̱ suju̍ṣṭā |
sara̍svatī̱ stomyā̍ bhūt || 6.061.10
ā̱pa̱pruṣī̱ pārthi̍vānyu̱ru rajo̍ a̱ntari̍kṣam |
sara̍svatī ni̱daspā̍tu || 6.061.11
tri̱ṣa̱dhasthā̍ sa̱ptadhā̍tu̱ḥ pañca̍ jā̱tā va̱rdhaya̍ntī |
vāje̍vāje̱ havyā̍ bhūt || 6.061.12
pra yā ma̍hi̱mnā ma̱hinā̍su̱ ceki̍te dyu̱mnebhi̍ra̱nyā a̱pasā̍ma̱pasta̍mā |
ratha̍ iva bṛha̱tī vi̱bhvane̍ kṛ̱topa̱stutyā̍ ciki̱tuṣā̱ sara̍svatī || 6.061.13
sara̍svatya̱bhi no̍ neṣi̱ vasyo̱ māpa̍ spharī̱ḥ paya̍sā̱ mā na̱ ā dha̍k |
ju̱ṣasva̍ naḥ sa̱khyā ve̱śyā̍ ca̱ mā tvatkṣetrā̱ṇyara̍ṇāni ganma || 6.061.14
stu̱ṣe narā̍ di̱vo a̱sya pra̱santā̱śvinā̍ huve̱ jara̍māṇo a̱rkaiḥ |
yā sa̱dya u̱srā vyuṣi̱ jmo antā̱nyuyū̍ṣata̱ḥ paryu̱rū varā̍ṁsi || 6.062.01
tā ya̱jñamā śuci̍bhiścakramā̱ṇā ratha̍sya bhā̱nuṁ ru̍rucū̱ rajo̍bhiḥ |
pu̱rū varā̱ṁsyami̍tā̱ mimā̍nā̱po dhanvā̱nyati̍ yātho̱ ajrā̍n || 6.062.02
tā ha̱ tyadva̱rtiryadara̍dhramugre̱tthā dhiya̍ ūhathu̱ḥ śaśva̱daśvai̍ḥ |
mano̍javebhiriṣi̱raiḥ śa̱yadhyai̱ pari̱ vyathi̍rdā̱śuṣo̱ martya̍sya || 6.062.03
tā navya̍so̱ jara̍māṇasya̱ manmopa̍ bhūṣato yuyujā̱nasa̍ptī |
śubha̱ṁ pṛkṣa̱miṣa̱mūrja̱ṁ vaha̍ntā̱ hotā̍ yakṣatpra̱tno a̱dhrugyuvā̍nā || 6.062.04
tā va̱lgū da̱srā pu̍ru̱śāka̍tamā pra̱tnā navya̍sā̱ vaca̱sā vi̍vāse |
yā śaṁsa̍te stuva̱te śambha̍viṣṭhā babhū̱vatu̍rgṛṇa̱te ci̱trarā̍tī || 6.062.05
tā bhu̱jyuṁ vibhi̍ra̱dbhyaḥ sa̍mu̱drāttugra̍sya sū̱numū̍hathū̱ rajo̍bhiḥ |
a̱re̱ṇubhi̱ryoja̍nebhirbhu̱jantā̍ pata̱tribhi̱rarṇa̍so̱ niru̱pasthā̍t || 6.062.06
vi ja̱yuṣā̍ rathyā yāta̱madri̍ṁ śru̱taṁ hava̍ṁ vṛṣaṇā vadhrima̱tyāḥ |
da̱śa̱syantā̍ śa̱yave̍ pipyathu̱rgāmiti̍ cyavānā suma̱tiṁ bhu̍raṇyū || 6.062.07
yadro̍dasī pra̱divo̱ asti̱ bhūmā̱ heḻo̍ de̱vānā̍mu̱ta ma̍rtya̱trā |
tadā̍dityā vasavo rudriyāso rakṣo̱yuje̱ tapu̍ra̱ghaṁ da̍dhāta || 6.062.08
ya ī̱ṁ rājā̍nāvṛtu̱thā vi̱dadha̱draja̍so mi̱tro varu̍ṇa̱ścike̍tat |
ga̱mbhī̱rāya̱ rakṣa̍se he̱tima̍sya̱ droghā̍ya ci̱dvaca̍sa̱ āna̍vāya || 6.062.09
anta̍raiśca̱kraistana̍yāya va̱rtirdyu̱matā yā̍taṁ nṛ̱vatā̱ rathe̍na |
sanu̍tyena̱ tyaja̍sā̱ martya̍sya vanuṣya̱tāmapi̍ śī̱rṣā va̍vṛktam || 6.062.10
ā pa̍ra̱mābhi̍ru̱ta ma̍dhya̱mābhi̍rni̱yudbhi̍ryātamava̱mābhi̍ra̱rvāk |
dṛ̱ḻhasya̍ ci̱dgoma̍to̱ vi vra̱jasya̱ duro̍ vartaṁ gṛṇa̱te ci̍trarātī || 6.062.11
kva1̱̍ tyā va̱lgū pu̍ruhū̱tādya dū̱to na stomo̍'vida̱nnama̍svān |
ā yo a̱rvāṅnāsa̍tyā va̱varta̱ preṣṭhā̱ hyasa̍tho asya̱ manma̍n || 6.063.01
ara̍ṁ me ganta̱ṁ hava̍nāyā̱smai gṛ̍ṇā̱nā yathā̱ pibā̍tho̱ andha̍ḥ |
pari̍ ha̱ tyadva̱rtiryā̍tho ri̱ṣo na yatparo̱ nānta̍rastutu̱ryāt || 6.063.02
akā̍ri vā̱mandha̍so̱ varī̍ma̱nnastā̍ri ba̱rhiḥ su̍prāya̱ṇata̍mam |
u̱ttā̱naha̍sto yuva̱yurva̍va̱ndā vā̱ṁ nakṣa̍nto̱ adra̍ya āñjan || 6.063.03
ū̱rdhvo vā̍ma̱gnira̍dhva̱reṣva̍sthā̱tpra rā̱tire̍ti jū̱rṇinī̍ ghṛ̱tācī̍ |
pra hotā̍ gū̱rtama̍nā urā̱ṇo'yu̍kta̱ yo nāsa̍tyā̱ havī̍man || 6.063.04
adhi̍ śri̱ye du̍hi̱tā sūrya̍sya̱ ratha̍ṁ tasthau purubhujā śa̱toti̍m |
pra mā̱yābhi̍rmāyinā bhūta̱matra̱ narā̍ nṛtū̱ jani̍manya̱jñiyā̍nām || 6.063.05
yu̱vaṁ śrī̱bhirda̍rśa̱tābhi̍rā̱bhiḥ śu̱bhe pu̱ṣṭimū̍hathuḥ sū̱ryāyā̍ḥ |
pra vā̱ṁ vayo̱ vapu̱ṣe'nu̍ papta̱nnakṣa̱dvāṇī̱ suṣṭu̍tā dhiṣṇyā vām || 6.063.06
ā vā̱ṁ vayo'śvā̍so̱ vahi̍ṣṭhā a̱bhi prayo̍ nāsatyā vahantu |
pra vā̱ṁ ratho̱ mano̍javā asarjī̱ṣaḥ pṛ̱kṣa i̱ṣidho̱ anu̍ pū̱rvīḥ || 6.063.07
pu̱ru hi vā̍ṁ purubhujā de̱ṣṇaṁ dhe̱nuṁ na̱ iṣa̍ṁ pinvata̱masa̍krām |
stuta̍śca vāṁ mādhvī suṣṭu̱tiśca̱ rasā̍śca̱ ye vā̱manu̍ rā̱timagma̍n || 6.063.08
u̱ta ma̍ ṛ̱jre pura̍yasya ra̱ghvī su̍mī̱ḻhe śa̱taṁ pe̍ru̱ke ca̍ pa̱kvā |
śā̱ṇḍo dā̍ddhira̱ṇina̱ḥ smaddi̍ṣṭī̱ndaśa̍ va̱śāso̍ abhi̱ṣāca̍ ṛ̱ṣvān || 6.063.09
saṁ vā̍ṁ śa̱tā nā̍satyā sa̱hasrāśvā̍nāṁ puru̱panthā̍ gi̱re dā̍t |
bha̱radvā̍jāya vīra̱ nū gi̱re dā̍ddha̱tā rakṣā̍ṁsi purudaṁsasā syuḥ || 6.063.10
ā vā̍ṁ su̱mne vari̍mansū̱ribhi̍ḥ ṣyām || 6.063.11
udu̍ śri̱ya u̱ṣaso̱ roca̍mānā̱ asthu̍ra̱pāṁ normayo̱ ruśa̍ntaḥ |
kṛ̱ṇoti̱ viśvā̍ su̱pathā̍ su̱gānyabhū̍du̱ vasvī̱ dakṣi̍ṇā ma̱ghonī̍ || 6.064.01
bha̱drā da̍dṛkṣa urvi̱yā vi bhā̱syutte̍ śo̱cirbhā̱navo̱ dyāma̍paptan |
ā̱virvakṣa̍ḥ kṛṇuṣe śu̱mbhamā̱noṣo̍ devi̱ roca̍mānā̱ maho̍bhiḥ || 6.064.02
vaha̍nti sīmaru̱ṇāso̱ ruśa̍nto̱ gāva̍ḥ su̱bhagā̍murvi̱yā pra̍thā̱nām |
ape̍jate̱ śūro̱ aste̍va̱ śatrū̱nbādha̍te̱ tamo̍ aji̱ro na voḻhā̍ || 6.064.03
su̱gota te̍ su̱pathā̱ parva̍teṣvavā̱te a̱pasta̍rasi svabhāno |
sā na̱ ā va̍ha pṛthuyāmannṛṣve ra̱yiṁ di̍vo duhitariṣa̱yadhyai̍ || 6.064.04
sā va̍ha̱ yokṣabhi̱ravā̱toṣo̱ vara̱ṁ vaha̍si̱ joṣa̱manu̍ |
tvaṁ di̍vo duhita̱ryā ha̍ de̱vī pū̱rvahū̍tau ma̱ṁhanā̍ darśa̱tā bhū̍ḥ || 6.064.05
utte̱ vaya̍ścidvasa̱tera̍papta̱nnara̍śca̱ ye pi̍tu̱bhājo̱ vyu̍ṣṭau |
a̱mā sa̱te va̍hasi̱ bhūri̍ vā̱mamuṣo̍ devi dā̱śuṣe̱ martyā̍ya || 6.064.06
e̱ṣā syā no̍ duhi̱tā di̍vo̱jāḥ kṣi̱tīru̱cchantī̱ mānu̍ṣīrajīgaḥ |
yā bhā̱nunā̱ ruśa̍tā rā̱myāsvajñā̍yi ti̱rastama̍saścida̱ktūn || 6.065.01
vi tadya̍yuraruṇa̱yugbhi̱raśvai̍ści̱traṁ bhā̍ntyu̱ṣasa̍śca̱ndrara̍thāḥ |
agra̍ṁ ya̱jñasya̍ bṛha̱to naya̍ntī̱rvi tā bā̍dhante̱ tama̱ ūrmyā̍yāḥ || 6.065.02
śravo̱ vāja̱miṣa̱mūrja̱ṁ vaha̍ntī̱rni dā̱śuṣa̍ uṣaso̱ martyā̍ya |
ma̱ghonī̍rvī̱rava̱tpatya̍mānā̱ avo̍ dhāta vidha̱te ratna̍ma̱dya || 6.065.03
i̱dā hi vo̍ vidha̱te ratna̱mastī̱dā vī̱rāya̍ dā̱śuṣa̍ uṣāsaḥ |
i̱dā viprā̍ya̱ jara̍te̱ yadu̱kthā ni ṣma̱ māva̍te vahathā pu̱rā ci̍t || 6.065.04
i̱dā hi ta̍ uṣo adrisāno go̱trā gavā̱maṅgi̍raso gṛ̱ṇanti̍ |
vya1̱̍rkeṇa̍ bibhidu̱rbrahma̍ṇā ca sa̱tyā nṛ̱ṇāma̍bhavadde̱vahū̍tiḥ || 6.065.05
u̱cchā di̍vo duhitaḥ pratna̱vanno̍ bharadvāja̱vadvi̍dha̱te ma̍ghoni |
su̱vīra̍ṁ ra̱yiṁ gṛ̍ṇa̱te ri̍rīhyurugā̱yamadhi̍ dhehi̱ śravo̍ naḥ || 6.065.06
vapu̱rnu tacci̍ki̱tuṣe̍ cidastu samā̱naṁ nāma̍ dhe̱nu patya̍mānam |
marte̍ṣva̱nyaddo̱hase̍ pī̱pāya̍ sa̱kṛcchu̱kraṁ du̍duhe̱ pṛśni̱rūdha̍ḥ || 6.066.01
ye a̱gnayo̱ na śośu̍cannidhā̱nā dviryattrirma̱ruto̍ vāvṛ̱dhanta̍ |
a̱re̱ṇavo̍ hira̱ṇyayā̍sa eṣāṁ sā̱kaṁ nṛ̱mṇaiḥ pauṁsye̍bhiśca bhūvan || 6.066.02
ru̱drasya̱ ye mī̱ḻhuṣa̱ḥ santi̍ pu̱trā yāśco̱ nu dādhṛ̍vi̱rbhara̍dhyai |
vi̱de hi mā̱tā ma̱ho ma̱hī ṣā setpṛśni̍ḥ su̱bhve̱3̱̍ garbha̱mādhā̍t || 6.066.03
na ya īṣa̍nte ja̱nuṣo'yā̱ nva1̱̍ntaḥ santo̍'va̱dyāni̍ punā̱nāḥ |
niryaddu̱hre śuca̱yo'nu̱ joṣa̱manu̍ śri̱yā ta̱nva̍mu̱kṣamā̍ṇāḥ || 6.066.04
ma̱kṣū na yeṣu̍ do̱hase̍ cida̱yā ā nāma̍ dhṛ̱ṣṇu māru̍ta̱ṁ dadhā̍nāḥ |
na ye stau̱nā a̱yāso̍ ma̱hnā nū ci̍tsu̱dānu̱rava̍ yāsadu̱grān || 6.066.05
ta idu̱grāḥ śava̍sā dhṛ̱ṣṇuṣe̍ṇā u̱bhe yu̍janta̱ roda̍sī su̱meke̍ |
adha̍ smaiṣu roda̱sī svaśo̍ci̱rāma̍vatsu tasthau̱ na roka̍ḥ || 6.066.06
a̱ne̱no vo̍ maruto̱ yāmo̍ astvana̱śvaści̱dyamaja̱tyara̍thīḥ |
a̱na̱va̱so a̍nabhī̱śū ra̍ja̱stūrvi roda̍sī pa̱thyā̍ yāti̱ sādha̍n || 6.066.07
nāsya̍ va̱rtā na ta̍ru̱tā nva̍sti̱ maru̍to̱ yamava̍tha̱ vāja̍sātau |
to̱ke vā̱ goṣu̱ tana̍ye̱ yama̱psu sa vra̱jaṁ dartā̱ pārye̱ adha̱ dyoḥ || 6.066.08
pra ci̱trama̱rkaṁ gṛ̍ṇa̱te tu̱rāya̱ māru̍tāya̱ svata̍vase bharadhvam |
ye sahā̍ṁsi̱ saha̍sā̱ saha̍nte̱ reja̍te agne pṛthi̱vī ma̱khebhya̍ḥ || 6.066.09
tviṣī̍manto adhva̱rasye̍va di̱dyuttṛ̍ṣu̱cyava̍so ju̱hvo̱3̱̍ nāgneḥ |
a̱rcatra̍yo̱ dhuna̍yo̱ na vī̱rā bhrāja̍jjanmāno ma̱ruto̱ adhṛ̍ṣṭāḥ || 6.066.10
taṁ vṛ̱dhanta̱ṁ māru̍ta̱ṁ bhrāja̍dṛṣṭiṁ ru̱drasya̍ sū̱nuṁ ha̱vasā vi̍vāse |
di̱vaḥ śardhā̍ya̱ śuca̍yo manī̱ṣā gi̱rayo̱ nāpa̍ u̱grā a̍spṛdhran || 6.066.11
viśve̍ṣāṁ vaḥ sa̱tāṁ jyeṣṭha̍tamā gī̱rbhirmi̱trāvaru̍ṇā vāvṛ̱dhadhyai̍ |
saṁ yā ra̱śmeva̍ ya̱matu̱ryami̍ṣṭhā̱ dvā janā̱ asa̍mā bā̱hubhi̱ḥ svaiḥ || 6.067.01
i̱yaṁ madvā̱ṁ pra stṛ̍ṇīte manī̱ṣopa̍ pri̱yā nama̍sā ba̱rhiraccha̍ |
ya̱ntaṁ no̍ mitrāvaruṇā̱vadhṛ̍ṣṭaṁ cha̱rdiryadvā̍ṁ varū̱thya̍ṁ sudānū || 6.067.02
ā yā̍taṁ mitrāvaruṇā suśa̱styupa̍ pri̱yā nama̍sā hū̱yamā̍nā |
saṁ yāva̍pna̱ḥstho a̱pase̍va̱ janā̍ñchrudhīya̱taści̍dyatatho mahi̱tvā || 6.067.03
aśvā̱ na yā vā̱jinā̍ pū̱taba̍ndhū ṛ̱tā yadgarbha̱madi̍ti̱rbhara̍dhyai |
pra yā mahi̍ ma̱hāntā̱ jāya̍mānā gho̱rā martā̍ya ri̱pave̱ ni dī̍dhaḥ || 6.067.04
viśve̱ yadvā̍ṁ ma̱ṁhanā̱ manda̍mānāḥ kṣa̱traṁ de̱vāso̱ ada̍dhuḥ sa̱joṣā̍ḥ |
pari̱ yadbhū̱tho roda̍sī cidu̱rvī santi̱ spaśo̱ ada̍bdhāso̱ amū̍rāḥ || 6.067.05
tā hi kṣa̱traṁ dhā̱raye̍the̱ anu̱ dyūndṛ̱ṁhethe̱ sānu̍mupa̱mādi̍va̱ dyoḥ |
dṛ̱ḻho nakṣa̍tra u̱ta vi̱śvade̍vo̱ bhūmi̱mātā̱ndyāṁ dhā̱sinā̱yoḥ || 6.067.06
tā vi̱graṁ dhai̍the ja̱ṭhara̍ṁ pṛ̱ṇadhyā̱ ā yatsadma̱ sabhṛ̍tayaḥ pṛ̱ṇanti̍ |
na mṛ̍ṣyante yuva̱tayo'vā̍tā̱ vi yatpayo̍ viśvajinvā̱ bhara̍nte || 6.067.07
tā ji̱hvayā̱ sada̱medaṁ su̍me̱dhā ā yadvā̍ṁ sa̱tyo a̍ra̱tirṛ̱te bhūt |
tadvā̍ṁ mahi̱tvaṁ ghṛ̍tānnāvastu yu̱vaṁ dā̱śuṣe̱ vi ca̍yiṣṭa̱maṁha̍ḥ || 6.067.08
pra yadvā̍ṁ mitrāvaruṇā spū̱rdhanpri̱yā dhāma̍ yu̱vadhi̍tā mi̱nanti̍ |
na ye de̱vāsa̱ oha̍sā̱ na martā̱ aya̍jñasāco̱ apyo̱ na pu̱trāḥ || 6.067.09
vi yadvāca̍ṁ kī̱stāso̱ bhara̍nte̱ śaṁsa̍nti̱ ke ci̍nni̱vido̍ manā̱nāḥ |
ādvā̍ṁ bravāma sa̱tyānyu̱kthā naki̍rde̱vebhi̍ryatatho mahi̱tvā || 6.067.10
a̱vori̱tthā vā̍ṁ cha̱rdiṣo̍ a̱bhiṣṭau̍ yu̱vormi̍trāvaruṇā̱vaskṛ̍dhoyu |
anu̱ yadgāva̍ḥ sphu̱rānṛ̍ji̱pyaṁ dhṛ̱ṣṇuṁ yadraṇe̱ vṛṣa̍ṇaṁ yu̱naja̍n || 6.067.11
śru̱ṣṭī vā̍ṁ ya̱jña udya̍taḥ sa̱joṣā̍ manu̱ṣvadvṛ̱ktaba̍rhiṣo̱ yaja̍dhyai |
ā ya indrā̱varu̍ṇāvi̱ṣe a̱dya ma̱he su̱mnāya̍ ma̱ha ā̍va̱varta̍t || 6.068.01
tā hi śreṣṭhā̍ de̱vatā̍tā tu̱jā śūrā̍ṇā̱ṁ śavi̍ṣṭhā̱ tā hi bhū̱tam |
ma̱ghonā̱ṁ maṁhi̍ṣṭhā tuvi̱śuṣma̍ ṛ̱tena̍ vṛtra̱turā̱ sarva̍senā || 6.068.02
tā gṛ̍ṇīhi nama̱sye̍bhiḥ śū̱ṣaiḥ su̱mnebhi̱rindrā̱varu̍ṇā cakā̱nā |
vajre̍ṇā̱nyaḥ śava̍sā̱ hanti̍ vṛ̱traṁ siṣa̍ktya̱nyo vṛ̱jane̍ṣu̱ vipra̍ḥ || 6.068.03
gnāśca̱ yannara̍śca vāvṛ̱dhanta̱ viśve̍ de̱vāso̍ na̱rāṁ svagū̍rtāḥ |
praibhya̍ indrāvaruṇā mahi̱tvā dyauśca̍ pṛthivi bhūtamu̱rvī || 6.068.04
sa itsu̱dānu̱ḥ svavā̍ ṛ̱tāvendrā̱ yo vā̍ṁ varuṇa̱ dāśa̍ti̱ tman |
i̱ṣā sa dvi̱ṣasta̍re̱ddāsvā̱nvaṁsa̍dra̱yiṁ ra̍yi̱vata̍śca̱ janā̍n || 6.068.05
yaṁ yu̱vaṁ dā̱śva̍dhvarāya devā ra̱yiṁ dha̱ttho vasu̍mantaṁ puru̱kṣum |
a̱sme sa i̍ndrāvaruṇā̱vapi̍ ṣyā̱tpra yo bha̱nakti̍ va̱nuṣā̱maśa̍stīḥ || 6.068.06
u̱ta na̍ḥ sutrā̱tro de̱vago̍pāḥ sū̱ribhya̍ indrāvaruṇā ra̱yiḥ ṣyā̍t |
yeṣā̱ṁ śuṣma̱ḥ pṛta̍nāsu sā̱hvānpra sa̱dyo dyu̱mnā ti̱rate̱ tatu̍riḥ || 6.068.07
nū na̍ indrāvaruṇā gṛṇā̱nā pṛ̱ṅktaṁ ra̱yiṁ sau̍śrava̱sāya̍ devā |
i̱tthā gṛ̱ṇanto̍ ma̱hina̍sya̱ śardho̱'po na nā̱vā du̍ri̱tā ta̍rema || 6.068.08
pra sa̱mrāje̍ bṛha̱te manma̱ nu pri̱yamarca̍ de̱vāya̱ varu̍ṇāya sa̱pratha̍ḥ |
a̱yaṁ ya u̱rvī ma̍hi̱nā mahi̍vrata̱ḥ kratvā̍ vi̱bhātya̱jaro̱ na śo̱ciṣā̍ || 6.068.09
indrā̍varuṇā sutapāvi̱maṁ su̱taṁ soma̍ṁ pibata̱ṁ madya̍ṁ dhṛtavratā |
yu̱vo ratho̍ adhva̱raṁ de̱vavī̍taye̱ prati̱ svasa̍ra̱mupa̍ yāti pī̱taye̍ || 6.068.10
indrā̍varuṇā̱ madhu̍mattamasya̱ vṛṣṇa̱ḥ soma̍sya vṛṣa̱ṇā vṛ̍ṣethām |
i̱daṁ vā̱mandha̱ḥ pari̍ṣiktama̱sme ā̱sadyā̱sminba̱rhiṣi̍ mādayethām || 6.068.11
saṁ vā̱ṁ karma̍ṇā̱ sami̱ṣā hi̍no̱mīndrā̍viṣṇū̱ apa̍saspā̱re a̱sya |
ju̱ṣethā̍ṁ ya̱jñaṁ dravi̍ṇaṁ ca dhatta̱mari̍ṣṭairnaḥ pa̱thibhi̍ḥ pā̱raya̍ntā || 6.069.01
yā viśvā̍sāṁ jani̱tārā̍ matī̱nāmindrā̱viṣṇū̍ ka̱laśā̍ soma̱dhānā̍ |
pra vā̱ṁ gira̍ḥ śa̱syamā̍nā avantu̱ pra stomā̍so gī̱yamā̍nāso a̱rkaiḥ || 6.069.02
indrā̍viṣṇū madapatī madānā̱mā soma̍ṁ yāta̱ṁ dravi̍ṇo̱ dadhā̍nā |
saṁ vā̍mañjantva̱ktubhi̍rmatī̱nāṁ saṁ stomā̍saḥ śa̱syamā̍nāsa u̱kthaiḥ || 6.069.03
ā vā̱maśvā̍so abhimāti̱ṣāha̱ indrā̍viṣṇū sadha̱mādo̍ vahantu |
ju̱ṣethā̱ṁ viśvā̱ hava̍nā matī̱nāmupa̱ brahmā̍ṇi śṛṇuta̱ṁ giro̍ me || 6.069.04
indrā̍viṣṇū̱ tatpa̍na̱yāyya̍ṁ vā̱ṁ soma̍sya̱ mada̍ u̱ru ca̍kramāthe |
akṛ̍ṇutama̱ntari̍kṣa̱ṁ varī̱yo'pra̍thataṁ jī̱vase̍ no̱ rajā̍ṁsi || 6.069.05
indrā̍viṣṇū ha̱viṣā̍ vāvṛdhā̱nāgrā̍dvānā̱ nama̍sā rātahavyā |
ghṛtā̍sutī̱ dravi̍ṇaṁ dhattama̱sme sa̍mu̱draḥ stha̍ḥ ka̱laśa̍ḥ soma̱dhāna̍ḥ || 6.069.06
indrā̍viṣṇū̱ piba̍ta̱ṁ madhvo̍ a̱sya soma̍sya dasrā ja̱ṭhara̍ṁ pṛṇethām |
ā vā̱mandhā̍ṁsi madi̱rāṇya̍gma̱nnupa̱ brahmā̍ṇi śṛṇuta̱ṁ hava̍ṁ me || 6.069.07
u̱bhā ji̍gyathu̱rna parā̍ jayethe̱ na parā̍ jigye kata̱raśca̱naino̍ḥ |
indra̍śca viṣṇo̱ yadapa̍spṛdhethāṁ tre̱dhā sa̱hasra̱ṁ vi tadai̍rayethām || 6.069.08
ghṛ̱tava̍tī̱ bhuva̍nānāmabhi̱śriyo̱rvī pṛ̱thvī ma̍dhu̱dughe̍ su̱peśa̍sā |
dyāvā̍pṛthi̱vī varu̍ṇasya̱ dharma̍ṇā̱ viṣka̍bhite a̱jare̱ bhūri̍retasā || 6.070.01
asa̍ścantī̱ bhūri̍dhāre̱ paya̍svatī ghṛ̱taṁ du̍hāte su̱kṛte̱ śuci̍vrate |
rāja̍ntī a̱sya bhuva̍nasya rodasī a̱sme reta̍ḥ siñcata̱ṁ yanmanu̍rhitam || 6.070.02
yo vā̍mṛ̱jave̱ krama̍ṇāya rodasī̱ marto̍ da̱dāśa̍ dhiṣaṇe̱ sa sā̍dhati |
pra pra̱jābhi̍rjāyate̱ dharma̍ṇa̱spari̍ yu̱voḥ si̱ktā viṣu̍rūpāṇi̱ savra̍tā || 6.070.03
ghṛ̱tena̱ dyāvā̍pṛthi̱vī a̱bhīvṛ̍te ghṛta̱śriyā̍ ghṛta̱pṛcā̍ ghṛtā̱vṛdhā̍ |
u̱rvī pṛ̱thvī ho̍tṛ̱vūrye̍ pu̱rohi̍te̱ te idviprā̍ īḻate su̱mnami̱ṣṭaye̍ || 6.070.04
madhu̍ no̱ dyāvā̍pṛthi̱vī mi̍mikṣatāṁ madhu̱ścutā̍ madhu̱dughe̱ madhu̍vrate |
dadhā̍ne ya̱jñaṁ dravi̍ṇaṁ ca de̱vatā̱ mahi̱ śravo̱ vāja̍ma̱sme su̱vīrya̍m || 6.070.05
ūrja̍ṁ no̱ dyauśca̍ pṛthi̱vī ca̍ pinvatāṁ pi̱tā mā̱tā vi̍śva̱vidā̍ su̱daṁsa̍sā |
sa̱ṁra̱rā̱ṇe roda̍sī vi̱śvaśa̍mbhuvā sa̱niṁ vāja̍ṁ ra̱yima̱sme sami̍nvatām || 6.070.06
udu̱ ṣya de̱vaḥ sa̍vi̱tā hi̍ra̱ṇyayā̍ bā̱hū a̍yaṁsta̱ sava̍nāya su̱kratu̍ḥ |
ghṛ̱tena̍ pā̱ṇī a̱bhi pru̍ṣṇute ma̱kho yuvā̍ su̱dakṣo̱ raja̍so̱ vidha̍rmaṇi || 6.071.01
de̱vasya̍ va̱yaṁ sa̍vi̱tuḥ savī̍mani̱ śreṣṭhe̍ syāma̱ vasu̍naśca dā̱vane̍ |
yo viśva̍sya dvi̱pado̱ yaścatu̍ṣpado ni̱veśa̍ne prasa̱ve cāsi̱ bhūma̍naḥ || 6.071.02
ada̍bdhebhiḥ savitaḥ pā̱yubhi̱ṣṭvaṁ śi̱vebhi̍ra̱dya pari̍ pāhi no̱ gaya̍m |
hira̍ṇyajihvaḥ suvi̱tāya̱ navya̍se̱ rakṣā̱ māki̍rno a̱ghaśa̍ṁsa īśata || 6.071.03
udu̱ ṣya de̱vaḥ sa̍vi̱tā damū̍nā̱ hira̍ṇyapāṇiḥ pratido̱ṣama̍sthāt |
ayo̍hanuryaja̱to ma̱ndraji̍hva̱ ā dā̱śuṣe̍ suvati̱ bhūri̍ vā̱mam || 6.071.04
udū̍ ayā upava̱kteva̍ bā̱hū hi̍ra̱ṇyayā̍ savi̱tā su̱pratī̍kā |
di̱vo rohā̍ṁsyaruhatpṛthi̱vyā arī̍ramatpa̱taya̱tkacci̱dabhva̍m || 6.071.05
vā̱mama̱dya sa̍vitarvā̱mamu̱ śvo di̱vedi̍ve vā̱mama̱smabhya̍ṁ sāvīḥ |
vā̱masya̱ hi kṣaya̍sya deva̱ bhūre̍ra̱yā dhi̱yā vā̍ma̱bhāja̍ḥ syāma || 6.071.06
indrā̍somā̱ mahi̱ tadvā̍ṁ mahi̱tvaṁ yu̱vaṁ ma̱hāni̍ pratha̱māni̍ cakrathuḥ |
yu̱vaṁ sūrya̍ṁ vivi̱dathu̍ryu̱vaṁ sva1̱̍rviśvā̱ tamā̍ṁsyahataṁ ni̱daśca̍ || 6.072.01
indrā̍somā vā̱saya̍tha u̱ṣāsa̱mutsūrya̍ṁ nayatho̱ jyoti̍ṣā sa̱ha |
upa̱ dyāṁ ska̱mbhathu̱ḥ skambha̍ne̱nāpra̍thataṁ pṛthi̱vīṁ mā̱tara̱ṁ vi || 6.072.02
indrā̍somā̱vahi̍ma̱paḥ pa̍ri̱ṣṭhāṁ ha̱tho vṛ̱tramanu̍ vā̱ṁ dyaura̍manyata |
prārṇā̍ṁsyairayataṁ na̱dīnā̱mā sa̍mu̱drāṇi̍ paprathuḥ pu̱rūṇi̍ || 6.072.03
indrā̍somā pa̱kvamā̱māsva̱ntarni gavā̱midda̍dhathurva̱kṣaṇā̍su |
ja̱gṛ̱bhathu̱rana̍pinaddhamāsu̱ ruśa̍cci̱trāsu̱ jaga̍tīṣva̱ntaḥ || 6.072.04
indrā̍somā yu̱vama̱ṅga taru̍tramapatya̱sāca̱ṁ śrutya̍ṁ rarāthe |
yu̱vaṁ śuṣma̱ṁ narya̍ṁ carṣa̱ṇibhya̱ḥ saṁ vi̍vyathuḥ pṛtanā̱ṣāha̍mugrā || 6.072.05
yo a̍dri̱bhitpra̍thama̱jā ṛ̱tāvā̱ bṛha̱spati̍rāṅgira̱so ha̱viṣmā̍n |
dvi̱barha̍jmā prāgharma̱satpi̱tā na̱ ā roda̍sī vṛṣa̱bho ro̍ravīti || 6.073.01
janā̍ya ci̱dya īva̍ta u lo̱kaṁ bṛha̱spati̍rde̱vahū̍tau ca̱kāra̍ |
ghnanvṛ̱trāṇi̱ vi puro̍ dardarīti̱ jaya̱ñchatrū̍ra̱mitrā̍npṛ̱tsu sāha̍n || 6.073.02
bṛha̱spati̱ḥ sama̍jaya̱dvasū̍ni ma̱ho vra̱jāngoma̍to de̱va e̱ṣaḥ |
a̱paḥ siṣā̍sa̱nsva1̱̍rapra̍tīto̱ bṛha̱spati̱rhantya̱mitra̍ma̱rkaiḥ || 6.073.03
somā̍rudrā dhā̱raye̍thāmasu̱ryaṁ1̱̍ pra vā̍mi̱ṣṭayo'ra̍maśnuvantu |
dame̍dame sa̱pta ratnā̱ dadhā̍nā̱ śaṁ no̍ bhūtaṁ dvi̱pade̱ śaṁ catu̍ṣpade || 6.074.01
somā̍rudrā̱ vi vṛ̍hata̱ṁ viṣū̍cī̱mamī̍vā̱ yā no̱ gaya̍māvi̱veśa̍ |
ā̱re bā̍dhethā̱ṁ nirṛ̍tiṁ parā̱caira̱sme bha̱drā sau̍śrava̱sāni̍ santu || 6.074.02
somā̍rudrā yu̱vame̱tānya̱sme viśvā̍ ta̱nūṣu̍ bheṣa̱jāni̍ dhattam |
ava̍ syataṁ mu̱ñcata̱ṁ yanno̱ asti̍ ta̱nūṣu̍ ba̱ddhaṁ kṛ̱tameno̍ a̱smat || 6.074.03
ti̱gmāyu̍dhau ti̱gmahe̍tī su̱śevau̱ somā̍rudrāvi̱ha su mṛ̍ḻataṁ naḥ |
pra no̍ muñcata̱ṁ varu̍ṇasya̱ pāśā̍dgopā̱yata̍ṁ naḥ sumana̱syamā̍nā || 6.074.04
jī̱mūta̍syeva bhavati̱ pratī̍ka̱ṁ yadva̱rmī yāti̍ sa̱madā̍mu̱pasthe̍ |
anā̍viddhayā ta̱nvā̍ jaya̱ tvaṁ sa tvā̱ varma̍ṇo mahi̱mā pi̍partu || 6.075.01
dhanva̍nā̱ gā dhanva̍nā̱jiṁ ja̍yema̱ dhanva̍nā tī̱vrāḥ sa̱mado̍ jayema |
dhanu̱ḥ śatro̍rapakā̱maṁ kṛ̍ṇoti̱ dhanva̍nā̱ sarvā̍ḥ pra̱diśo̍ jayema || 6.075.02
va̱kṣyantī̱vedā ga̍nīganti̱ karṇa̍ṁ pri̱yaṁ sakhā̍yaṁ pariṣasvajā̱nā |
yoṣe̍va śiṅkte̱ vita̱tādhi̱ dhanva̱ñjyā i̱yaṁ sama̍ne pā̱raya̍ntī || 6.075.03
te ā̱cara̍ntī̱ sama̍neva̱ yoṣā̍ mā̱teva̍ pu̱traṁ bi̍bhṛtāmu̱pasthe̍ |
apa̱ śatrū̍nvidhyatāṁ saṁvidā̱ne ārtnī̍ i̱me vi̍ṣphu̱rantī̍ a̱mitrā̍n || 6.075.04
ba̱hvī̱nāṁ pi̱tā ba̱hura̍sya pu̱traści̱ścā kṛ̍ṇoti̱ sama̍nāva̱gatya̍ |
i̱ṣu̱dhiḥ saṅkā̱ḥ pṛta̍nāśca̱ sarvā̍ḥ pṛ̱ṣṭhe nina̍ddho jayati̱ prasū̍taḥ || 6.075.05
rathe̱ tiṣṭha̍nnayati vā̱jina̍ḥ pu̱ro yatra̍yatra kā̱maya̍te suṣāra̱thiḥ |
a̱bhīśū̍nāṁ mahi̱māna̍ṁ panāyata̱ mana̍ḥ pa̱ścādanu̍ yacchanti ra̱śmaya̍ḥ || 6.075.06
tī̱vrānghoṣā̍nkṛṇvate̱ vṛṣa̍pāṇa̱yo'śvā̱ rathe̍bhiḥ sa̱ha vā̱jaya̍ntaḥ |
a̱va̱krāma̍nta̱ḥ prapa̍daira̱mitrā̍nkṣi̱ṇanti̱ śatrū̱rana̍pavyayantaḥ || 6.075.07
ra̱tha̱vāha̍naṁ ha̱vira̍sya̱ nāma̱ yatrāyu̍dha̱ṁ nihi̍tamasya̱ varma̍ |
tatrā̱ ratha̱mupa̍ śa̱gmaṁ sa̍dema vi̱śvāhā̍ va̱yaṁ su̍mana̱syamā̍nāḥ || 6.075.08
svā̱du̱ṣa̱ṁsada̍ḥ pi̱taro̍ vayo̱dhāḥ kṛ̍cchre̱śrita̱ḥ śaktī̍vanto gabhī̱rāḥ |
ci̱trase̍nā̱ iṣu̍balā̱ amṛ̍dhrāḥ sa̱tovī̍rā u̱ravo̍ vrātasā̱hāḥ || 6.075.09
brāhma̍ṇāsa̱ḥ pita̍ra̱ḥ somyā̍saḥ śi̱ve no̱ dyāvā̍pṛthi̱vī a̍ne̱hasā̍ |
pū̱ṣā na̍ḥ pātu duri̱tādṛ̍tāvṛdho̱ rakṣā̱ māki̍rno a̱ghaśa̍ṁsa īśata || 6.075.10
su̱pa̱rṇaṁ va̍ste mṛ̱go a̍syā̱ danto̱ gobhi̱ḥ saṁna̍ddhā patati̱ prasū̍tā |
yatrā̱ nara̱ḥ saṁ ca̱ vi ca̱ drava̍nti̱ tatrā̱smabhya̱miṣa̍va̱ḥ śarma̍ yaṁsan || 6.075.11
ṛjī̍te̱ pari̍ vṛṅdhi̱ no'śmā̍ bhavatu nasta̱nūḥ |
somo̱ adhi̍ bravītu̱ no'di̍ti̱ḥ śarma̍ yacchatu || 6.075.12
ā ja̍ṅghanti̱ sānve̍ṣāṁ ja̱ghanā̱ upa̍ jighnate |
aśvā̍jani̱ prace̍ta̱so'śvā̍nsa̱matsu̍ codaya || 6.075.13
ahi̍riva bho̱gaiḥ parye̍ti bā̱huṁ jyāyā̍ he̱tiṁ pa̍ri̱bādha̍mānaḥ |
ha̱sta̱ghno viśvā̍ va̱yunā̍ni vi̱dvānpumā̱npumā̍ṁsa̱ṁ pari̍ pātu vi̱śvata̍ḥ || 6.075.14
ālā̍ktā̱ yā ruru̍śī̱rṣṇyatho̱ yasyā̱ ayo̱ mukha̍m |
i̱daṁ pa̱rjanya̍retasa̱ iṣvai̍ de̱vyai bṛ̱hannama̍ḥ || 6.075.15
ava̍sṛṣṭā̱ parā̍ pata̱ śara̍vye̱ brahma̍saṁśite |
gacchā̱mitrā̱npra pa̍dyasva̱ māmīṣā̱ṁ kaṁ ca̱nocchi̍ṣaḥ || 6.075.16
yatra̍ bā̱ṇāḥ sa̱mpata̍nti kumā̱rā vi̍śi̱khā i̍va |
tatrā̍ no̱ brahma̍ṇa̱spati̱radi̍ti̱ḥ śarma̍ yacchatu vi̱śvāhā̱ śarma̍ yacchatu || 6.075.17
marmā̍ṇi te̱ varma̍ṇā chādayāmi̱ soma̍stvā̱ rājā̱mṛte̱nānu̍ vastām |
u̱rorvarī̍yo̱ varu̍ṇaste kṛṇotu̱ jaya̍nta̱ṁ tvānu̍ de̱vā ma̍dantu || 6.075.18
yo na̱ḥ svo ara̍ṇo̱ yaśca̱ niṣṭyo̱ jighā̍ṁsati |
de̱vāstaṁ sarve̍ dhūrvantu̱ brahma̱ varma̱ mamānta̍ram || 6.075.19
Last udpated July 2, 2013
Special mention : Initial processing and help by Avinash and Shashi Sathaye,
Avinash Chopde, Shree Devi Kumar, Sunder Hattangadi, John Gardner.
Reprocessed from Original in final form by Detlef Eichler with additional corrections.
See Detlef's site http://www.detlef108.de/Rigveda.htm
for other details and formats.
The text is shown with accents (Anudattas, dependent Svaritas,
and independent Svaritas including Kampas). Words are connected (agnimILe).
Ch is doubled as in gachChati according to the rules of Rigveda-Pratishakhya.
At the end of a word m is replaced by Anusvara M if the initial letter of the
following word is a labial stop consonant (p, ph, b, bh, m).
Visarga H before sh, Sh or s followed by a voiceless consonant has been restored.
Source : The Aufrecht/van Nooten/Holland (Samhita) version
of the Rigveda (http://www.people.fas.harvard.edu/~witzel/onlineRV.htm).
In this text accented vowels have Udatta or 'independent Svarita' markers.
Kampas are not shown. Words are separated (agnim ILe).
Ch is not doubled as in gaChati. At the end of a word we find m before
a following labial stop consonant (p, ph, b, bh, m).
Visarga H before sh, Sh or s followed by a voiceless consonant has
been dropped according to a rule of Rigveda-Pratishakhya.
Send corrections to : detlefeichler@googlemail.com, sanskrit@cheerful.com
The text is to be used for personal studies and research only.
Any use for commercial purpose is prohibited as a `gentleman's' agreement.