%@@1
% File name             : kirATArjunIya.itx
%--------------------------------------------
% Text title            : kirATArjunIya bhAsakR^ita
% Author                : 
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Kaushal S. Kaloo kaushalskaloo at gmail.com
% Proofread by          : Kaushal S. Kaloo kaushalskaloo at gmail.com
% Translation by        : 
% Latest update         : APril 6, 2014
% Send corrections to   : sanskrit at cheerful dot c om
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.3
% Site access  :         
% https://sanskritdocuments.org
% http://sanskrit.gde.to/
%-----------------------------------------------------
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Kiratarjuniya of Bharavi ..}##
\itxtitle{.. kirATArjunIya bhAravIrachitam ..}##\endtitles ##
shriyaH kurUNAmadhipasya pAlanIM prajAsu vR^ittiM yamayu~Nkta veditum |
sa varNili~NgI viditaH samAyayau yudhiShThiraM dvaitavane vanecharaH || 1\.1||

kR^itapraNAmasya mahIM mahIbhuje jitAM sapatnena nivedayiShyataH |
na vivyathe tasya mano na hi priyaM pravaktumichChanti mR^iShA hitaiShiNaH || 1\.2||

dviShAM vighAtAya vidhAtumichChato rahasyanuj~nAmadhigamya bhUbhR^itaH |
sa sauShThavaudAryavisheShashAlinIM vinishchitArthAmiti vAchamAdadhe || 1\.3||

kriyAsu yuktairnR^ipa chArachakShuSho na va~nchanIyAH prabhavo.anujIvibhiH |
ato.arhasi kShantumasAdhu sAdhu vA hitaM manohAri cha durlabhaM vachaH || 1\.4||

sa kiMsakhA sAdhu na shAsti yo.adhipaM hitAn na yaH saMshR^iNute sa kiMprabhuH
|
sadAnukUleShu hi kurvate ratiM nR^ipeShvamAtyeShu cha sarvasampadaH || 1\.5||

nisargadurbodhamabodhaviklavAH kva bhUpatInAM charitaM kva jantavaH |
tavAnubhAvo.ayamabodhi yan mayA nigUDhatattvaM nayavartma vidviShAm || 1\.6||

visha~NkamAno bhavataH parAbhavaM nR^ipAsanastho.api vanAdhivAsinaH |
durodarachChadmajitAM samIhate nayena jetuM jagatIM suyodhanaH || 1\.7||

tathApi jihmaH sa bhavajjigIShayA tanoti shubhraM guNasampadA yashaH |
samunnayan bhUtimanAryasaMgamAd varaM virodho.api samaM mahAtmabhiH || 1\.8||

kR^itAriShaDvargajayena mAnavImagamyarUpAM padavIM prapitsunA |
vibhajya naktaMdinamastatandriNA vitanyate tena nayena pauruSham || 1\.9||

sakhIn iva prItiyujo.anujIvinaH samAnamAnAn suhR^idash cha bandhubhiH |
sa santataM darshayate gatasmayaH kR^itAdhipatyAmiva sAdhu bandhutAm || 1\.10||

asaktamArAdhayato yathAyathaM vibhajya bhaktyA samapakShapAtayA |
guNAnurAgAd iva sakhyamIyivAn na bAdhate.asya trigaNaH parasparam || 1\.11||

niratyayaM sAma na dAnavarjitaM na bhUri dAnaM virahayya satkriyAm |
pravartate tasya visheShashAlinI guNAnurodhena vinA na satkriyA || 1\.12||

vasUni vA~nChan na vashI na manyunA svadharma ityeva nivR^ittakAraNaH |
gurUpadiShTena ripau sute.api vA nihanti daNDena sa dharmaviplavam || 1\.13||

vidhAya rakShAn paritaH paretarAn asha~NkitAkAramupaiti sha~NkitaH |
kriyApavargeShvanujIvisAtkR^itAH kR^itaj~natAmasya vadanti sampadaH || 1\.14||

anArataM tena padeShu lambhitA vibhajya samyag viniyogasatkriyAm |
phalantyupAyAH paribR^iMhitAyatIrupetya saMgharShamivArthasampadaH || 1\.15||

anekarAjanyarathAshvasaMkulaM tadIyamAsthAnaniketanAjiram |
nayatyayugmachChadagandhirArdratAM bhR^ishaM nR^ipopAyanadantinAM madaH || 1\.16||

sukhena labhyA dadhataH kR^iShIvalairakR^iShTapachyA iva sasyasampadaH |
vitanvati kShemamadevamAtR^ikAsh chirAya tasmin kuravash chakAsati || 1\.17||

mahaujaso mAnadhanA dhanArchitA dhanurbhR^itaH saMyati labdhakIrtayaH |
na saMhatAstasya na bhedavR^ittayaH priyANi vA~nChantyasubhiH samIhitum || 1\.18||

udArakIrterudayaM dayAvataH prashAntabAdhaM dishato.abhirakShayA |
svayaM pradugdhe.asya guNairupasnutA vasUpamAnasya vasUni medinI || 1\.19||

mahIbhujAM sachcharitaish charaiH kriyAH sa veda niHshesamasheShitakriyaH |
mahodayaistasya hitAnubandhibhiH pratIyate dhAturivehitaM phalaiH || 1\.20||

na tena sajyaM kvachid udyataM dhanurna vA kR^itaM kopavijihmamAnanam |
guNAnurAgeNa shirobhiruhyate narAdhipairmAlyamivAsya shAsanam || 1\.21||

sa yauvarAjye navayauvanoddhataM nidhAya duHshAsanamiddhashAsanaH |
makheShvakhinno.anumataH purodhasA dhinoti havyena hiraNyaretasam || 1\.22||

pralInabhUpAlamapi sthirAyati prashAsad AvAridhi maNDalaM bhuvaH |
sa chintayatyeva bhiyastvad eShyatIraho durantA balavadvirodhitA || 1\.23||

kathAprasa~Ngena janairudAhR^itAd anusmR^itAkhaNDalasUnuvikramaH |
tavAbhidhAnAd vyathate natAnanaH sa duHsahAn mantrapadAd ivoragaH || 1\.24||

tad Ashu kartuM tvayi jihmamudyate vidhIyatAM tatra vidheyamuttaram |
parapraNItAni vachAMsi chinvatAM pravR^ittisArAH khalu mAdR^ishAM dhiyaH || 1\.25||

itIrayitvA giramAttasatkriye gate.atha patyau vanasaMnivAsinAm |
pravishya kR^iShNA sadanaM mahIbhujA tad AchachakShe.anujasannidhau vachaH || 1\.26||

nishamya siddhiM dviShatAmapAkR^itIstatastatastyA viniyantumakShamA |
nR^ipasya manyuvyavasAyadIpinIrudAjahAra drupadAtmajA giraH || 1\.27||

bhavAdR^isheShu pramadAjanoditaM bhavatyadhikShepa ivAnushAsanam |
tathApi vaktuM vyavasAyayanti mAM nirastanArIsamayA durAdhayaH || 1\.28||

akhaNDamAkhaNDalatulyadhAmabhish chiraM dhR^itA bhUpatibhiH svavaMshajaiH |
tvayA svahastena mahI madachyutA mata~Ngajena srag ivApavarjitA || 1\.29||

vrajanti te mUDhadhiyaH parAbhavaM bhavanti mAyAviShu ye na mAyinaH |
pravishya hi ghnanti shaThAstathAvidhAn asaMvR^itA~NgAn nishitA iveShavaH || 1\.30||

guNAnuraktAmanuraktasAdhanaH kulAbhimAnI kulajAM narAdhipaH |
paraistvadanyaH ka ivApahArayen manoramAmAtmavadhUmiva shriyam || 1\.31||

bhavantametarhi manasvigarhite vivartamAnaM naradeva vartmani |
kathaM na manyurjvalayatyudIritaH shamItaruM shuShkamivAgniruchChikhaH || 1\.32||

avandhyakopasya nihanturApadAM bhavanti vashyAH svayameva dehinaH |
amarShashUnyena janasya jantunA na jAtahArdena na vidviShAdaraH || 1\.33||

paribhramaMllohitachandanochitaH padAtirantargiri reNurUShitaH |
mahArathaH satyadhanasya mAnasaM dunoti te kachchid ayaM vR^ikodaraH || 1\.34||

vijitya yaH prAjyamayachChad uttarAn kurUn akupyaM vasu vAsavopamaH |
sa valkavAsAMsi tavAdhunAharan karoti manyuM na kathaM dhanaMjayaH || 1\.35||

vanAntashayyAkaThinIkR^itAkR^itI kachAchitau viShvag ivAgajau gajau |
kathaM tvametau dhR^itisaMyamau yamau vilokayann utsahase na bAdhitum || 1\.36||

imAmahaM veda na tAvakIM dhiyaM vichitrarUpAH khalu chittavR^ittayaH |
vichintayantyA bhavadApadaM parAM rujanti chetaH prasabhaM mamAdhayaH || 1\.37||

purAdhirUDhaH shayanaM mahAdhanaM vibodhyase yaH stutigItima~NgalaiH |
adabhradarbhAmadhishayya sa sthalIM jahAsi nidrAmashivaiH shivArutaiH || 1\.38||

puropanItaM nR^ipa rAmaNIyakaM dvijAtisheSheNa yad etad andhasA |
tad adya te vanyaphalAshinaH paraM paraiti kArshyaM yashasA samaM vapuH || 1\.39||

anArataM yau maNipIThashAyinAvara~njayad rAjashiraHsrajAM rajaH |
niShIdatastau charaNau vaneShu te mR^igadvijAlUnashikheShu barhiShAm || 1\.40||

dviShannimittA yad iyaM dashA tataH samUlamunmUlayatIva me manaH |
parairaparyAsitavIryasampadAM parAbhavo.apyutsava eva mAninAm || 1\.41||

vihAya shAntiM nR^ipa dhAma tat punaH prasIda saMdhehi vadhAya vidviShAm |
vrajanti shatrUn avadhUya niHspR^ihAH shamena siddhiM munayo na bhUbhR^itaH || 1\.42||

puraHsarA dhAmavatAM yashodhanAH suduHsahaM prApya nikAramIdR^isham |
bhavAdR^ishAsh ched adhikurvate parAn nirAshrayA hanta hatA manasvitA || 1\.43||

atha kShamAmeva nirastasAdhanash chirAya paryeShi sukhasya sAdhanam |
vihAya lakShmIpatilakShma kArmukaM jaTAdharaH sa~n juhudhIha pAvakam || 1\.44||

na samayaparirakShaNaM kShamaM te nikR^itipareShu pareShu bhUridhAmnaH |
ariShu hi vijayArthinaH kShitIshA vidadhati sopadhi saMdhidUShaNAni || 1\.45||

vidhisamayaniyogAd dIptisaMhArajihmaM shithilabalamagAdhe magnamApatpayodhau
|
riputimiramudasyodIyamAnaM dinAdau dinakR^itamiva lakShmIstvAM samabhyetu
bhUyaH || 1\.46||

\medskip\hrule\medskip
vihitAM priyayA manaHpriyAmatha nishchitya giraM garIyasIm |
upapattimad UrjitAshrayaM nR^ipamUche vachanaM vR^ikodaraH || 2\.1||

yad avochata vIkShya mAninI paritaH snehamayena chakShuShA |
api vAgadhipasya durvachaM vachanaM tad vidadhIta vismayam || 2\.2||

viShamo.api vigAhyate nayaH kR^itatIrthaH payasAmivAshayaH |
sa tu tatra visheShadurlabhaH sad upanyasyati kR^ityavartma yaH || 2\.3||

pariNAmasukhe garIyasi vyathake.asmin vachasi kShataujasAm |
ativIryavatIva bheShaje bahuralpIyasi dR^ishyate guNaH || 2\.4||

iyamiShTaguNAya rochatAM ruchirArthA bhavate.api bhAratI |
nanu vaktR^ivisheShaniHspR^ihA guNagR^ihyA vachane vipashchitaH || 2\.5||

chatasR^iShvapi te vivekinI nR^ipa vidyAsu nirUDhimAgatA |
kathametya matirviparyayaM kariNI pa~NkamivAvasIdati || 2\.6||

vidhuraM kimataH paraM parairavagItAM gamite dashAmimAm |
avasIdati yat surairapi tvayi sambhAvitavR^itti pauruSham || 2\.7||

dviShatAmudayaH sumedhasA gururasvantataraH sumarShaNaH |
na mahAn api bhUtimichChatA phalasampatpravaNaH parikShayaH || 2\.8||

achireNa parasya bhUyasIM viparItAM vigaNayya chAtmanaH |
kShayayuktimupekShate kR^itI kurute tatpratikAramanyathA || 2\.9||

anupAlayatAmudeShyatIM prabhushaktiM dviShatAmanIhayA |
apayAntyachirAn mahIbhujAM jananirvAdabhayAd iva shriyaH || 2\.10||

kShayayuktamapi svabhAvajaM dadhataM dhAma shivaM samR^iddhaye |
praNamantyanapAyamutthitaM pratipachchandramiva prajA nR^ipam || 2\.11||

prabhavaH khalu koshadaNDayoH kR^itapa~nchA~NgavinirNayo nayaH |
sa vidheyapadeShu dakShatAM niyatiM loka ivAnurudhyate || 2\.12||

abhimAnavato manasvinaH priyamuchchaiH padamArurukShataH |
vinipAtanivartanakShamaM matamAlambanamAtmapauruSham || 2\.13||

vipado.abhibhavantyavikramaM rahayatyApadupetamAyatiH |
niyatA laghutA nirAyateragarIyAn na padaM nR^ipashriyaH || 2\.14||

tad alaM pratipakShamunnateravalambya vyavasAyavandhyatAm |
nivasanti parAkramAshrayA na viShAdena samaM samR^iddhayaH || 2\.15||

atha ched avadhiH pratIkShyate kathamAviShkR^itajihmavR^ittinA |
dhR^itarAShTrasutena sutyajyAsh chiramAsvAdya narendrasampadaH || 2\.16||

dviShatA vihitaM tvayAthavA yadi labdhA punarAtmanaH padam |
jananAtha tavAnujanmanAM kR^itamAviShkR^itapauruShairbhujaiH || 2\.17||

madasiktamukhairmR^igAdhipaH karibhirvartayati svayaM hataiH |
laghayan khalu tejasA jagan na mahAn ichChati bhUtimanyataH || 2\.18||

abhimAnadhanasya gatvarairasubhiH sthAsnu yashash chichIShataH |
achirAMshuvilAsacha~nchalA nanu lakShmIH phalamAnuSha~Ngikam || 2\.19||

jvalitaM na hiraNyaretasaM chayamAskandati bhasmanAM janaH |
abhibhUtibhayAd asUn ataH sukhamujjhanti na dhAma mAninaH || 2\.20||

kimavekShya phalaM payodharAn dhvanataH prArthayate mR^igAdhipaH |
prakR^itiH khalu sA mahIyasaH sahate nAnyasamunnatiM yayA || 2\.21||

kuru tan matimeva vikrame nR^ipa nirdhUya tamaH pramAdajam |
dhruvametad avehi vidviShAM tvadanutsAhahatA vipattayaH || 2\.22||

dviradAn iva digvibhAvitAMsh chaturastoyanidhIn ivAyataH |
prasaheta raNe tavAnujAn dviShatAM kaH shatamanyutejasaH || 2\.23||

jvalatastava jAtavedasaH satataM vairikR^itasya chetasi |
vidadhAtu shamaM shivetarA ripunArInayanAmbusantatiH || 2\.24||

iti darshitavikriyaM sutaM marutaH kopaparItamAnasam |
upasAntvayituM mahIpatirdviradaM duShTamivopachakrame || 2\.25||

apavarjitaviplave shuchay hR^idayagrAhiNi ma~NgalAspade |
vimalA tava vistare girAM matirAdarsha ivAbhidR^ishyate || 2\.26||

sphuTatA na padairapAkR^itA na cha na svIkR^itamarthagauravam |
rachitA pR^ithagarthatA girAM na cha sAmarthyamapohitaM kvachit || 2\.27||

upapattirudAhR^itA balAd anumAnena na chAgamaH kShataH |
idamIdR^ig anIdR^igAshayaH prasabhaM vaktumupakrameta kaH || 2\.28||

avitR^iptatayA tathApi me hR^idayaM nirNayameva dhAvati |
avasAyayituM kShamAH sukhaM na vidheyeShu visheShasampadaH || 2\.29||

sahasA vidadhIta na kriyAmavivekaH paramApadAM padam |
vR^iNate hi vimR^ishyakAriNaM guNalubdhAH svayameva sampadaH || 2\.30||

abhivarShati yo.anupAlayan vidhibIjAni vivekavAriNA |
sa sadA phalashAlinIM kriyAM sharadaM loka ivAdhitiShThati || 2\.31||

shuchi bhUShayati shrutaM vapuH prashamastasya bhavatyalaMkriyA |
prashamAbharaNaM parAkramaH sa nayApAditasiddhibhUShaNaH || 2\.32||

matibhedatamastirohite gahane kR^ityavidhau vivekinAm |
sukR^itaH parishuddha AgamaH kurute dIpa ivArthadarshanam || 2\.33||

spR^ihaNIyaguNairmahAtmabhish charite vartmani yachChatAM manaH |
vidhiheturaheturAgasAM vinipAto.api samaH samunnateH || 2\.34||

shivamaupayikaM garIyasIM phalaniShpattimadUShitAyatim |
vigaNayya nayanti pauruShaM vijitakrodharayA jigIShavaH || 2\.35||

apaneyamudetumichChatA timiraM roShamayaM dhiyA puraH |
avibhidya nishAkR^itaM tamaH prabhayA nAMshumatApyudIyate || 2\.36||

balavAn api kopajanmanastamaso nAbhibhavaM ruNaddhi yaH |
kShayapakSha ivaindavIH kalAH sakalA hanti sa shaktisampadaH || 2\.37||

samavR^ittirupaiti mArdavaM samaye yash cha tanoti tigmatAm |
adhitiShThati lokamojasA sa vivasvAn iva medinIpatiH || 2\.38||

kva chirAya parigrahaH shriyAM kva cha duShTendriyavAjivashyatA |
sharadabhrachalAsh chalendriyairasurakShA hi bahuchChalAH shriyaH || 2\.39||

kimasAmayikaM vitanvatA manasaH kShobhamupAttaraMhasaH |
kriyate patiruchchakairapAM bhavatA dhIratayAdharIkR^itaH || 2\.40||

shrutamapyadhigamya ye ripUn vinayante sma na sharIrajanmanaH |
janayantyachirAya sampadAmayashaste khalu chApalAshrayam || 2\.41||

atipAtitakAlasAdhanA svasharIrendriyavargatApanI |
janavan na bhavantamakShamA nayasiddherapanetumarhati || 2\.42||

upakArakamAyaterbhR^ishaM prasavaH karmaphalasya bhUriNaH |
anapAyi nibarhaNaM dviShAM na titikShAsamamasti sAdhanam || 2\.43||

praNatipravaNAn vihAya naH sahajasnehanibaddhachetasaH |
praNamanti sadA suyodhanaM prathame mAnabhR^itAM na vR^iShNayaH || 2\.44||

suhR^idaH sahajAstathetare matameShAM na vila~Nghayanti ye |
vinayAd iva yApayanti te dhR^itarAShTrAtmajamAtmasiddhaye || 2\.45||

abhiyoga imAn mahIbhujo bhavatA tasya tataH kR^itAvadheH |
pravighATayitA samutpatan haridashvaH kamalAkarAn iva || 2\.46||

upajApasahAn vila~Nghayan sa vidhAtA nR^ipatIn madoddhataH |
sahate na jano.apyadhaHkriyAM kimu lokAdhikadhAma rAjakam || 2\.47||

asamApitakR^ityasampadAM hatavegaM vinayena tAvatA |
prabhavantyabhimAnashAlinAM madamuttambhayituM vibhUtayaH || 2\.48||

madamAnasamuddhataM nR^ipaM na viyu~Nkte niyamena mUDhatA |
atimUDha udasyate nayAn nayahInAd aparajyate janaH || 2\.49||

aparAgasamIraNeritaH kramashIrNAkulamUlasantatiH |
sukarastaruvat sahiShNunA ripurunmUlayituM mahAn api || 2\.50||

aNurapyupahanti vigrahaH prabhumantaHprakR^itiprakopajaH |
akhilaM hi hinasti bhUdharaM tarushAkhAntanigharShajo.analaH || 2\.51||

matimAn vinayapramAthinaH samupekSheta samunnatiM dviShaH |
sujayaH khalu tAdR^ig antare vipadantA hyavinItasampadaH || 2\.52||

laghuvR^ittitayA bhidAM gataM bahirantash cha nR^ipasya maNDalam |
abhibhUya haratyanantaraH shithilaM kUlamivApagArayaH || 2\.53||

anushAsatamityanAkulaM nayavartmAkulamarjunAgrajam |
svayamartha ivAbhivA~nChitastamabhIyAya parAsharAtmajaH || 2\.54||

madhurairavashAni lambhayann api tirya~nchi shamaM nirIkShitaiH |
paritaH paTu bibhrad enasAM dahanaM dhAma vilokanakShamam || 2\.55||

sahasopagataH savismayaM tapasAM sUtirasUtirenasAm |
dadR^ishe jagatIbhujA muniH sa vapuShmAn iva puNyasaMchayaH || 2\.56||

athochchakairAsanataH parArdhyAd udyan sa dhUtAruNavalkalAgraH |
rarAja kIrNAkapishAMshujAlaH shR^i~NgAt sumeroriva tigmarashmiH || 2\.57||

avahitahR^idayo vidhAya sa arhAm R^iShivad R^iShipravare gurUpadiShTAm |
tadanumatamalaMchakAra pashchAt prashama iva shrutamAsanaM narendraH || 2\.58||

vyaktoditasmitamayUkhavibhAsitoShThastiShThan munerabhimukhaM sa
vikIrNadhAmnaH |
tanvantamiddhamabhito gurumaMshujAlaM lakShmImuvAha sakalasya
shashA~NkamUrteH || 2\.59||

\medskip\hrule\medskip
tataH sharachchandrakarAbhirAmairutsarpibhiH prAMshumivAMshujAlaiH |
bibhrANamAnIlaruchaM pisha~NgIrjaTAstaDitvantamivAmbuvAham || 3\.1||

prasAdalakShmIM dadhataM samagrAM vapuHprakarSheNa janAtigena |
prasahya chetaHsu samAsajantamasaMstutAnAmapi bhAvamArdram || 3\.2||

anuddhatAkAratayA viviktAM tanvantamantaHkaraNasya vR^ittim |
mAdhuryavisrambhavisheShabhAjA kR^itopasambhAShamivekShitena || 3\.3||

dharmAtmajo dharmanibandhinInAM prasUtimenaHpraNudAM shrutInAm |
hetuM tadabhyAgamane parIpsuH sukhopaviShTaM munimAbabhAShe || 3\.4||

anAptapuNyopacharairdurApA phalasya nirdhUtarajAH savitrI |
tulyA bhavaddarshanasampad eShA vR^iShTerdivo vItabalAhakAyAH || 3\.5||

adya kriyAH kAmadughAH kratUnAM satyAshiShaH samprati bhUmidevAH |
A saMsR^iterasmi jagatsu jAtastvayyAgate yad bahumAnapAtram || 3\.6||

shriyaM vikarShatyapahantyaghAni shreyaH parisnauti tanoti kIrtim |
saMdarshanaM lokaguroramoghamamoghaM tavAtmayoneriva kiM na dhatte || 3\.7||

shchyotanmayUkhe.api himadyutau me nanirvR^itaM nirvR^itimeti chakShuH |
samujjhitaj~nAtiviyogakhedaM tvatsaMnidhAvuchChvasatIva chetaH || 3\.8||

nirAspadaM prashnakutUhalitvamasmAsvadhInaM kimu niHspR^ihANAm |
tathApi kalyANakarIM giraM te mAM shrotumichChA mukharIkaroti || 3\.9||

ityuktavAn uktivisheSharamyaM manaH samAdhAya jayopapattau |
udArachetA giramityudArAM dvaipAyanenAbhidadhe narendraH || 3\.10||

chichIShatAM janmavatAmalaghvIM yashovataMsAmubhayatra bhUtim |
abhyarhitA bandhuShu tulyarUpA vR^ittirvisheSheNa tapodhanAnAm || 3\.11||

tathApi nighnaM nR^ipa tAvakInaiH prahvIkR^itaM me hR^idayaM guNaughaiH |
vItaspR^ihANAmapi muktibhAjAM bhavanti bhavyeShu hi pakShapAtAH || 3\.12||

sutA na yUyaM kimu tasya rAj~naH suyodhanaM vA na guNairatItAH |
yastyaktavAn vaH sa vR^ithA balAd vA mohaM vidhatte viShayAbhilAShaH || 3\.13||

jahAtu nainaM kathamarthasiddhiH saMshayya karNAdiShu tiShThate yaH |
asAdyuyogA hi jayAntarAyAH pramAthinInAM vipadAM padAni || 3\.14||

pathash chyutAyAM samitau ripUNAM dharmyAM dadhAnena dhuraM chirAya |
tvayA vipatsvapyavipatti ramyamAviShkR^itaM prema paraM guNeShu || 3\.15||

vidhAya vidhvaMsanamAtmanInaM shamaikavR^itterbhavatash Chalena |
prakAshitatvanmatishIlasArAH kR^itopakArA iva vidviShaste || 3\.16||

labhyA dharitrI tava vikrameNa jyAyAMsh cha vIryAstrabalairvipakShaH |
ataH prakarShAya vidhirvidheyaH prakarShatantrA hi raNe jayashrIH || 3\.17||

triHsaptakR^itvo jagatIpatInAM hantA gururyasya sa jAmadagnyaH |
vIryAvadhUtaH sma tadA viveda prakarShamAdhAravashaM guNAnAm || 3\.18||

yasminn anaishvaryakR^itavyalIkaH parAbhavaM prApta ivAntako.api |
dhunvan dhanuH kasya raNe na kuryAn mano bhayaikapravaNaM sa bhIShmaH || 3\.19||

sR^ijantamAjAviShusaMhatIrvaH saheta kopajvalitaM guruM kaH |
parisphurallolashikhAgrajihvaM jagaj jighatsantamivAntavahnim || 3\.20||

nirIkShya saMrambhanirastadhairyaM rAdheyamArAdhitajAmadagnyam |
asaMstuteShu prasabhaM bhayeShu jAyeta mR^ityorapi pakShapAtaH || 3\.21||

yayA samAsAditasAdhanena sudushcharAmAcharatA tapasyAm |
ete durApaM samavApya vIryamunmIlitAraH kapiketanena || 3\.22||

mahattvayogAya mahAmahimnAmArAdhanIM tAM nR^ipa devatAnAm |
dAtuM pradAnochita bhUridhAmnImupAgataH siddhimivAsmi vidyAm || 3\.23||

ityuktavantaM vraja sAdhayeti pramANayan vAkyamajAtashatroH |
prasedivAMsaM tamupAsasAda vasann ivAnte vinayena jiShNuH || 3\.24||

niryAya vidyA+tha dinAdiramyAd bimbAd ivArkasya mukhAn maharSheH |
pArthAnanaM vahnikaNAvadAtA dIptiH sphuratpadmamivAbhipede || 3\.25||

yogaM cha taM yogyatamAya tasmai tapaHprabhAvAd vitatAra sadyaH |
yenAsya tattveShu kR^ite.avabhAse samunmimIleva chirAya chakShuH || 3\.26||

AkAramAshaMsitabhUrilAbhaM dadhAnamantaHkaraNAnurUpam |
niyojayiShyan vijayodaye taM tapaHsamAdhau munirityuvAcha || 3\.27||

anena yogena vivR^iddhatejA nijAM parasmai padavImayachChan |
samAcharAchAramupAttashastro japopavAsAbhiShavairmunInAm || 3\.28||

kariShyase yatra sudushcharANi prasattaye gotrabhidastapAMsi |
shilochchayaM chArushilochchayaM tameSha kShaNAn neShyati guhyakastvAm || 3\.29||

iti bruvANena mahendrasUnuM maharShiNA tena tirobabhUve |
taM rAjarAjAnucharo.asya sAkShAt pradeshamAdeshamivAdhitasthau || 3\.30||

kR^itAnatirvyAhR^itasAntvavAde jAtaspR^ihaH puNyajanaH sa jiShNau |
iyAya sakhyAviva samprasAdaM vishvAsayatyAshu satAM hi yogaH || 3\.31||

athoShNabhAseva sumeruku~njAn vihIyamAnAn udayAya tena |
bR^ihaddyutIn duHkhakR^itAtmalAbhaM tamaH shanaiH pANDusutAn prapede || 3\.32||

asaMshayAlochitakAryanunnaH premNA samAnIya vibhajyamAnaH |
tulyAd vibhAgAd iva tanmanobhirduHkhAtibhAro.api laghuH sa mene || 3\.33||

dhairyeNa vishvAsyatayA maharShestIvrAd arAtiprabhavAchcha manyoH |
vIryaM cha vidvatsu sute maghonaH sa teShu na sthAnamavApa shokaH || 3\.34||

tAn bhUridhAmnash chaturo.api dUraM vihAya yAmAn iva vAsarasya |
ekaughabhUtaM tad asharma kR^iShNAM vibhAvarIM dhvAntamiva prapede || 3\.35||

tuShAralekhAkulitotpalAbhe paryashruNI ma~Ngalabha~NgabhIruH |
agUDhabhAvApi vilokane sA na lochane mIlayituM viShehe || 3\.36||

akR^itrimapremarasAbhirAmaM rAmArpitaM dR^iShTivilobhi dR^iShTam |
manaHprasAdA~njalinA nikAmaM jagrAha pAtheyamivendrasUnuH || 3\.37||

dhairyAvasAdena hR^itaprasAdA vanyadvipeneva nidAghasindhuH |
niruddhabAShpodayasannakaNThamuvAcha kR^ichChrAd iti rAjaputrI || 3\.38||

magnAM dviShachChadmani pa~NkabhUte sambhavAnAM bhUtimivoddhariShyan |
AdhidviShAmA tapasAM prasiddherasmad vinA mA bhR^ishamunmanIbhUH || 3\.39||

yasho.adhigantuM sukhalipsayA vA manuShyasaMkhyAmativartituM vA |
nirutsukAnAmabhiyoggabhAjAM samutsukevA~Nkamupaiti siddhiH || 3\.40||

lokaM vidhAtrA vihitasya goptuM kShattrasya muShNan vasu jaitramojaH |
tejasvitAyA vijayaikavR^itternighnan priyaM prANamivAbhimAnam || 3\.41||

vrIDAnatairAptajanopanItaH saMshayya kR^ichChreNa nR^ipaiH prapannaH |
vitAnabhUtaM vitataM pR^ithivyAM yashaH samUhann iva digvikIrNam || 3\.42||

vIryAvadAneShu kR^itAvamarShastanvann abhUtAmiva sampratItim |
kurvan prayAmakShayamAyatInAmarkatviShAmahna ivAvasheShaH || 3\.43||

prasahya yo.asmAsu paraiH prayuktaH smartuM na shakyaH kimutAdhikartum |
navIkariShyatyupashuShyad ArdraH sa tvad vinA me hR^idayaM nikAraH || 3\.44||

prApto.abhimAnavyasanAd asahyaM dantIva dantavyasanAd vikAram |
dviShatpratApAntaritorutejAH sharadghanAkIrNa ivAdirahnaH || 3\.45||

savrIDamandairiva niShkriyatvAn nAtyarthamastrairavabhAsamAnaH |
yashaHkShayakShINajalArNavAbhastvamanyamAkAramivAbhipannaH || 3\.46||

duHshAsanAmarSharajovikIrNairebhirvinArthairiva bhAgyanAthaiH |
keshaiH kadarthIkR^itavIryasAraH kachchit sa evAsi dhanaMjayastvam || 3\.47||

sa kShattriyastrANasahaH satAM yastat kArmukaM karmasu yasya shaktiH |
vahan dvayIM yadyaphale.arthajAte karotyasaMskArahatAmivoktim || 3\.48||

vItaujasaH sannidhimAtrasheShA bhavatkR^itAM bhUtimapekShamANAH |
samAnaduHkhA iva nastvadIyAH sarUpatAM pArtha guNA bhajante || 3\.49||

AkShipyamANaM ripubhiH pramAdAn nAgairivAlUnasaTaM mR^igendram |
tvAM dhUriyaM yogyatayAdhirUDhA dIptyA dinashrIriva tigmarashmim || 3\.50||

karoti yo.asheShajanAtiriktAM sambhAvanAmarthavatIM kriyAbhiH |
saMsatsu jAte puruShAdhikAre na pUraNI taM samupaiti saMkhyA || 3\.51||

priyeShu yaiH pArtha vinopapattervichintyamAnaiH klamameti chetaH |
tava prayAtasya jayAya teShAM kriyAd aghAnAM maghavA vighAtam || 3\.52||
mA gAsh chirAyaikacharaH pramAdaM vasann asambAdhashive.api deshe |
mAtsaryarAgopahatAtmanAM hi skhalanti sAdhuShvapi mAnasAni || 3\.53||

tad Ashu kurvan vachanaM maharShermanorathAn naH saphalIkuruShva |
pratyAgataM tvAsmi kR^itArthameva stanopapIDaM parirabdhukAmA || 3\.54||

udIritAM tAmiti yAj~nasenyA navIkR^itodgrAhitaviprakArAm |
AsAdya vAchaM sa bhR^ishaM didIpe kAShThAmudIchImiva tigmarashmiH || 3\.55||

athAbhipashyann iva vidviShaH puraH purodhasAropitahetisaMhatiH |
babhAra ramyo.api vapuH sa bhIShaNaM gataH kriyAM mantra ivAbhichArikIm || 3\.56||

avila~NghyavikarShaNaM paraiH prathitajyAravakarma kArmukam |
agatAvaridR^iShTigocharaM shitanistriMshayujau maheShudhI || 3\.57||

yashaseva tirodadhan muhurmahasA gotrabhidAyudhakShatIH |
kavachaM cha saratnamudvaha~n jvalitajyotirivAntaraM divaH || 3\.58||

akalAdhipabhR^ityadarshitaM shivamurvIdharavartma samprayAn |
hR^idayAni samAvivesha sa kShaNamudbAShpadR^ishAM tapobhR^itAm || 3\.59||

anujaguratha divyaM dundubhidhvAnamAshAH+ surakusumanipAtairvyomni lakShmIr
vitene |
priyamiva kathayiShyann Alili~Nga sphurantIM bhuvamanibhR^itavelAvIchibAhuH
payodhiH || 3\.60||

\medskip\hrule\medskip
tataH sa kUjatkalahaMsamekhalAM sapAkasasyAhitapANDutAguNAm |
upAsasAdopajanaM janapriyaH priyAmivAsAditayauvanAM bhuvam || 4\.1||

vinamrashAliprasavaughashAlinIrapetapa~NkAH sasaroruhAmbhasaH |
nananda pashyann upasIma sa sthalIrupAyanIbhUtasharadguNashriyaH || 4\.2||

nirIkShyamANA iva vismayAkulaiH payobhirunmIlitapadmalochanaiH |
hR^itapriyAdR^iShTivilAsavibhramA mano.asya jahruH shapharIvivR^ittayaH || 4\.3||

tutoSha pashyan kalamasya sa adhikaM savArije vAriNi rAmaNIyakam |
sudurlabhe nArhati ko.abhinandituM prakarShalakShmImanurUpasaMgame || 4\.4||

nunoda tasya sthalapadminIgataM vitarkamAviShkR^itaphenasaMtati |
avAptaki~njalkavibhedamuchchakairvivR^ittapAThInaparAhataM payaH || 4\.5||

kR^itormirekhaM shithilatvamAyatA shanaiH shanaiH shAntarayeNa vAriNA |
nirIkShya reme sa samudrayoShitAM tara~NgitakShaumavipANDu saikatam || 4\.6||

manoramaM prApitamantaraM bhruvoralaMkR^itaM kesarareNuNANunA |
alaktatAmrAdharapallavashriyA samAnayantImiva bandhujIvakam || 4\.7||

navAtapAlohitamAhitaM muhurmahAniveshau paritaH payodharau |
chakAsayantImaravindajaM rajaH parishramAmbhaHpulakena sarpatA || 4\.8||

kapolasaMshleShi vilochanatviShA vibhUShayantImavataMsakotpalam |
sutena pANDoH kalamasya gopikAM nirIkShya mene sharadaH kR^itArthatA || 4\.9||

upAratAH pashchimarAtrigocharAd apArayantaH patituM javena gAm |
tamutsukAsh chakruravekShaNotsukaM gavAM gaNAH prasnutapIvaraudharasaH || 4\.10||

parItamukShAvajaye jayashriyA nadantamuchchaiH kShatasindhurodhasam |
dadarsha puShTiM dadhataM sa shAradIM savigrahaM darpamivAdhipaM gavAm || 4\.11||

vimuchyamAnairapi tasya mantharaM gavAM himAnIvishadaiH kadambakaiH |
sharannadInAM pulinaiH kutUhalaM galaddukUlairjaghanairivAdadhe || 4\.12||

gatAn pashUnAM sahajanmabandhutAM gR^ihAshrayaM prema vaneShu bibhrataH |
dadarsha gopAn upadhenu pANDavaH kR^itAnukArAn iva gobhirArjave || 4\.13||

paribhraman mUrdhajaShaTpadAkulaiH smitodayAdarshitadantakesaraiH |
mukhaish chalatkuNDalarashmira~njitairnavAtapAmR^iShTasarojachArubhiH || 4\.14||

nibaddhaniHshvAsavikampitAdharA latA iva prasphuritaikapallavAH |
vyapoDhapArshvairapavartitatrikA vikarShaNaiH pANivihArahAribhiH || 4\.15||

vrajAjireShvambudanAdasha~NkinIH shikhaNDinAmunmadayatsu yoShitaH |
muhuH praNunneShu mathAM vivartanairnadatsu kumbheShu mR^ida~Ngamantharam || 4\.16||

sa mantharAvalgitapIvarastanIH parishramaklAntavilochanotpalAH |
nirIkShituM nopararAma ballavIrabhipranR^ittA iva vArayoShitaH || 4\.17||

papAta pUrvAM jahato vijihmatAM vR^iShopabhuktAntikasasyasampadaH |
rathA~NgasImantitasAndrakardamAn prasaktasampAtapR^ithakkR^itAn pathaH || 4\.18||

janairupagrAmamanindyakarmabhirviviktabhAve~NgitabhUShaNairvR^itAH |
bhR^ishaM dadarshAshramamaNDapopamAH sapuShpahAsAH sa niveshavIrudhaH || 4\.19||

tataH sa samprekShya sharadguNashriyaM sharadguNAlokanalolachakShuSham |
uvAcha yakShastamachodito.api gAM na hI~Ngitaj~no.avasare.avasIdati || 4\.20||

iyaM shivAyA niyaterivAyatiH kR^itArthayantI jagataH phalaiH kriyAH |
jayashriyaM pArtha pR^ithUkarotu te sharat prasannAmburanambuvAridA || 4\.21||

upaiti sasyaM pariNAmaramyatA nadIranauddhatyamapa~NkatA mahIm |
navairguNaiH samprati saMstavasthiraM tirohitaM prema ghanAgamashriyaH || 4\.22||

patanti nAsmin vishadAH patattriNo dhR^itendrachApA na payodapa~NktayaH |
tathApi puShNAti nabhaH shriyaM parAM na ramyamAhAryamapekShate guNam || 4\.23||

vipANDubhirglAnatayA payodharaish chyutAchirAbhAguNahemadAmabhiH |
iyaM kadambAnilabharturatyaye na digvadhUnAM kR^ishatA na rAjate || 4\.24||

vihAya vA~nChAmudite madAtyayAd araktakaNThasya rute shikhaNDinaH |
shrutiH shrayatyunmadahaMsaniHsvanaM guNAH priyatve.adhikR^itA na saMstavaH
|| 4\.25||

amI pR^ithustambabhR^itaH pisha~NgatAM gatA vipAkena phalasya shAlayaH |
vikAsi vaprAmbhasi gandhasUchitaM namanti nighrAtumivAsitotpalam || 4\.26||

mR^iNAlinInAmanura~njitaM tviShA vibhinnamambhojapalAshashobhayA |
payaH sphurachChAlishikhApisha~NgitaM drutaM dhanuShkhaNDamivAhividviShaH || 4\.27||

vipANDu saMvyAnamivAniloddhataM nirundhatIH saptapalAshajaM rajaH |
anAvilonmIlitabANachakShuShaH sapuShpahAsA vanarAjiyoShitaH || 4\.28||

adIpitaM vaidyutajAtavedasA sitAmbudachChedatirohitAtapam |
tatAntaraM sAntaravArishIkaraiH shivaM nabhovartma sarojavAyubhiH || 4\.29||

sitachChadAnAmapadishya dhAvatAM rutairamIShAM grathitAH patatriNAm |
prakurvate vAridarodhanirgatAH parasparAlApamivAmalA dishaH || 4\.30||

vihArabhUmerabhighoShamutsukAH sharIrajebhyash chyutayUthapa~NktayaH |
asaktamUdhAMsi payaH kSharantyamUrupAyanAnIva nayanti dhenavaH || 4\.31||

jagatprasUtirjagadekapAvanI vrajopakaNThaM tanayairupeyuShI |
dyutiM samagrAM samitirgavAmasAvupaiti mantrairiva saMhitAhutiH || 4\.32||

kR^itAvadhAnaM jitabarhiNadhvanau suraktagopIjanagItaniHsvane |
idaM jighatsAmapahAya bhUyasIM na sasyamabhyeti mR^igIkadambakam || 4\.33||

asAvanAsthAparayAvadhIritaH saroruhiNyA shirasA namann api |
upaiti shuShyan kalamaH sahAmbhasA manobhuvA tapta ivAbhipANDutAm || 4\.34||

amI samuddhUtasarojareNunA hR^itA hR^itAsArakaNena vAyunA |
upAgame dushcharitA ivApadAM gatiM na nishchetumalaM shilImukhAH || 4\.35||

mukhairasau vidrumabha~NgalohitaiH shikhAH pisha~NgIH kalamasya bibhratI |
shukAvalirvyaktashirIShakomalA dhanuHshriyaM gotrabhido.anugachChati || 4\.36||

iti kathayati tatra nAtidUrAd atha dadR^ishe pihitoShNarashmibimbaH |
vigalitajalabhArashuklabhAsAM nichaya ivAmbumuchAM nagAdhirAjaH || 4\.37||

tamatanuvanarAjishyAmitopatyakAntaM nagamupari himAnIgauramAsadya jiShNuH |
vyapagatamadarAgasyAnusasmAra lakShmImasitamadharavAso bibhrataH sIrapANeH
|| 4\.38||

\medskip\hrule\medskip
atha jayAya nu merumahIbhR^ito rabhasayA nu digantadidR^ikShayA |
abhiyayau sa himAchalamuchChritaM samuditaM nu vila~NghayituM nabhaH || 5\.1||

tapanamaNDaladItitamekataH satatanaishatamovR^itamanyataH |
hasitabhinnatamisrachayaM puraH shivamivAnugataM gajacharmaNA || 5\.2||

kShitinabhaHsuralokanivAsibhiH kR^itaniketamadR^iShTaparasparaiH |
prathayituM vibhutAmabhinirmitaM pratinidhiM jagatAmiva shambhunA || 5\.3||

bhujagarAjasitena nabhaHshriyA kanakarAjivirAjitasAnunA |
samuditaM nichayena taDitvatIM laghayatA sharadambudasaMhatim || 5\.4||

maNimayUkhachayAMshukabhAsurAH suravadhUparibhuktalatAgR^ihAH |
dadhatamuchchashilAntaragopurAH pura ivoditapuShpavanA bhuvaH || 5\.5||

aviratojjhitavArivipANDubhirvirahitairachiradyutitejasA |
uditapakShamivArataniHsvanaiH pR^ithunitambavilambibhirambudaiH || 5\.6||

dadhatamAkaribhiH karibhiH kShataiH samavatArasamairasamaistaTaiH |
vividhakAmahitA mahitAmbhasaH sphuTasarojavanA javanA nadIH || 5\.7||

navavinidrajapAkusumatviShAM dyutimatAM nikareNa mahAshmanAm |
vihitasAMdhyamayUkhamiva kvachin nichitakA~nchanabhittiShu sAnuShu || 5\.8||

pR^ithukadambakadambakarAjitaM grahitamAlatamAlavanAkulam |
laghutuShAratuShArajalashchyutaM dhR^itasadAnasadAnanadantinam || 5\.9||

rahitaratnachayAn na shilochchayAn aphalatAbhavanA na darIbhuvaH |
vipulinAmburuhA na saridvadhUrakusumAn dadhataM na mahIruhaH || 5\.10||

vyathitasindhumanIrashanaiH shanairamaralokavadhUjaghanairghanaiH |
phaNabhR^itAmabhito vitataM tataM dayitaramyalatAbakulaiH kulaiH || 5\.11||

sasurachApamanekamaNiprabhairapapayovishadaM himapANDubhiH |
avichalaM shikharairupabibhrataM dhvanitasUchitamambumuchAM chayam || 5\.12||

vikachavAriruhaM dadhataM saraH sakalahaMsagaNaM shuchi mAnasam |
shivamagAtmajayA cha kR^iterShyayA sakalahaM sagaNaM shuchimAnasam || 5\.13||

grahavimAnagaNAn abhito divaM jvalayatauShadhijena kR^ishAnunA |
muhuranusmarayantamanukShapaM tripuradAhamupApatisevinaH || 5\.14||

vitatashIkararAshibhiruchChritairupalarodhavivartibhirambubhiH |
dadhatamunnatasAnusamuddhatAM dhR^itasitavyajanAmiva jAhnavIm || 5\.15||

anuchareNa dhanAdhipateratho nagavilokanavismitamAnasaH |
sa jagade vachanaM priyamAdarAn mukharatAvasare hi virAjate || 5\.16||

alameSha vilokitaH prajAnAM sahasA saMhatimaMhasAM vihantum |
ghanavartma sahasradheva kurvan himagaurairachalAdhipaH shirobhiH || 5\.17||

iha duradhigamaiH kiMchid evAgamaiH satatamasutaraM varNayantyantaram |
amumativipinaM veda digvyApinaM puruShamiva paraM padmayoniH param || 5\.18||

ruchirapallavapuShpalatAgR^ihairupalasajjalajairjalarAshibhiH |
nayati saMtatamutsukatAmayaM dhR^itimatIrupakAntamapi striyaH || 5\.19||

sulabhaiH sadA nayavatAyavatA nidhiguhyakAdhiparamaiH paramaiH |
amunA dhanaiH kShitibhR^itAtibhR^itA samatItya bhAti jagatI jagatI || 5\.20||

akhilamidamamuShya gairIgurostribhuvanamapi naiti manye tulAm |
adhivasati sadA yad enaM janairaviditavibhavo bhavAnIpatiH || 5\.21||

vItajanmajarasaM paraM shuchi brahmaNaH padamupaitumichChatAm |
AgamAd iva tamopahAd itaH sambhavanti matayo bhavachChidaH || 5\.22||

divyastrINAM sacharaNalAkShArAgA rAgAyAte nipatitapuShpApIDAH |
pIDAbhAjaH kusumachitAH sAshaMsaM shaMsantyasmin suratavisheShaM shayyAH || 5\.23||

guNasampadA samadhigamya paraM mahimAnamatra mahite jagatAm |
nayashAlini shriya ivAdhipatau viramanti na jvalitumauShadhayaH || 5\.24||

kurarIgaNaH kR^itaravastaravaH kusumAnatAH sakamalaM kamalam |
iha sindhavash cha varaNAvaraNAH kariNAM mude sanaladAnaladAH || 5\.25||

sAdR^ishyaM gatamapanidrachUtagandhairAmodaM madajalasekajaM dadhAnaH |
etasmin madayati kokilAn akAle lInAliH surakariNAM kapolakAShaH || 5\.26||

sanAkavanitaM nitambaruchiraM chiraM suninadairnadairvR^itamamum |
matA phalavato.avato rasaparA parAstavasudhA sudhAdhivasati || 5\.27||

shrImallatAbhavanamoShadhayaH pradIpAH shayyA navAni harichandanapallavAni |
asmin ratishramanudash cha sarojavAtAH smartuM dishanti na divaH
surasundarIbhyaH || 5\.28||

IshArthamambhasi chirAya tapash charantyA yAdovila~NghanavilolavilochanAyAH |
AlambatAgrakaramatra bhavo bhavAnyAH shchyotannidAghasalilA~NgulinA kareNa || 5\.29||

yenApaviddhasalilaH sphuTanAgasadmA devAsurairamR^itamambunidhirmamanthe |
vyAvartanairahipaterayamAhitA~NkaH khaM vyAlikhann iva vibhAti sa
mandarAdriH || 5\.30||

nItochChrAyaM muhurashishirarashmerusrairAnIlAbhairvirachitaparabhAgA
ratnaiH |
jyotsnAsha~NkAmiva vitarati haMsashyenI madhye.apyahnaH
sphaTikarajatabhittichChAyA || 5\.31||

dadhata iva vilAsashAli nR^ityaM mR^idu patatA pavanena kampitAni |
iha lalitavilAsinIjanabhrU gatikuTileShu payaHsu pa~NkajAni || 5\.32||

asminn agR^ihyata pinAkabhR^itA salIlamAbaddhavepathuradhIravilochanAyAH |
vinyastama~NgalamahauShadhirIshvarAyAH srastoragapratisareNa kareNa pANiH || 5\.33||

krAmadbhirghanapadavImanekasaMkhyaistejobhiH shuchimaNijanmabhirvibhinnaH
|
usrANAM vyabhicharatIva saptasapteH paryasyann iha nichayaH sahasrasaMkhyAm || 5\.34||

vyadhatta yasmin puramuchchagopuraM purAM vijeturdhR^itaye dhanAdhipaH |
sa eSha kailAsa upAntasarpiNaH karotyakAlAstamayaM vivasvataH || 5\.35||
nAnAratnajyotiShAM saMnipAtaish ChanneShvantaHsAnu vaprAntareShu |
baddhAM baddhAM bhittisha~NkAmamuShmin nAvAnAvAn mAtarishvA nihanti || 5\.36||

ramyA navadyutirapaiti na shAdvalebhyaH shyAmIbhavantyanudinaM nalinIvanAni
|
asmin vichitrakusumastabakAchitAnAM shAkhAbhR^itAM pariNamanti na pallavAni || 5\.37||

parisaraviShayeShu lIDhamuktA haritatR^iNodgamasha~NkayA mR^igIbhiH |
iha navashukakomalA maNInAM ravikarasaMvalitAH phalanti bhAsaH || 5\.38||

utphullasthalanalinIvanAd amuShmAd uddhUtaH sarasijasambhavaH parAgaH |
vAtyAbhirviyati vivartitaH samantAd Adhatte kanakamayAtapatralakShmIm || 5\.39||

iha saniyamayoH surApagAyAmuShasi sayAvakasavyapAdarekhA |
kathayati shivayoH sharIrayogaM viShamapadA padavI vivartaneShu || 5\.40||

saMmUrChatAM rajatabhittimayUkhajAlairAlokapAdapalatAntaranirgatAnAm |
gharmadyuteriha muhuH paTalAni dhAmnAmAdarshamaNDalanibhAni samullasanti || 5\.41||

shuklairmayUkhanichayaiH parivItamUrtirvaprAbhighAtaparimaNDalitorudehaH |
shR^i~NgANyamuShya bhajate gaNabharturukShA kurvan vadhUjanamanaHsu
shashA~Nkasha~NkAm || 5\.42||

samprati labdhajanma shanakaiH kathamapi laghuni kShINapayasyupeyuShi bhidAM
jaladharapaTale |
khaNDitavigrahaM balabhido dhanuriha vividhAH pUrayituM bhavanti vibhavaH
shikharamaNiruchaH || 5\.43||

snapitanavalatAtarupravAlairamR^italavasrutishAlibhirmayUkhaiH |
satatamasitayAminIShu shambho amalayatIha vanAntamindulekhA || 5\.44||

kShipati yo.anuvanaM vitatAM bR^ihad bR^ihatikAmiva rauchanikIM rucham |
ayamanekahiraNmayakaMdarastava piturdayito jagatIdharaH || 5\.45||

saktiM lavAd apanayatyanile latAnAM vairochanairdviguNitAH sahasA mayUkhaiH
|
rodhobhuvAM muhuramutra hiraNmayInAM bhAsastaDidvilasitAni viDambayanti || 5\.46||

kaShaNakampanirastamahAhibhiH kShaNavimattamata~NgajavarjitaiH |
iha madasnapitairanumIyate suragajasya gataM harichandanaiH || 5\.47||

jaladajAlaghanairasitAshmanAmupahataprachayeha marIchibhiH |
bhavati dIptiradIpitakaMdarA timirasaMvaliteva vivasvataH || 5\.48||

bhavyo bhavann api muneriha shAsanena kShAtre sthitaH pathi tapasya
hatapramAdaH |
prAyeNa satyapi hitArthakare vidhau hi shreyAMsi labdhumasukhAni
vinAntarAyaiH || 5\.49||

mA bhUvann apathahR^itastavendriyAshvAH saMtApe dishatu shivaH shivAM
prasaktim |
rakShantastapasi balaM cha lokapAlAH kalyANImadhikaphalAM kriyAM kriyAyuH || 5\.50||

ityuktvA sapadi hitaM priyaM priyArhe dhAma svaM gatavati rAjarAjabhR^itye |
sotkaNThaM kimapi pR^ithAsutaH pradadhyau saMdhatte bhR^ishamaratiM hi
sadviyogaH || 5\.51||

tamanatishayanIyaM sarvataH sArayogAd avirahitamanekenA~NkabhAjA phalena |
akR^ishamakR^ishalakShmIsh chetasAshaMsitaM sa svamiva puruShakAraM shailam
abhyAsasAda || 5\.52||

\medskip\hrule\medskip
ruchirAkR^itiH kanakasAnumatho paramaH pumAn iva patiM patatAm |
dhR^itasatpathastripathagAmabhitaH sa tamAruroha puruhUtasutaH || 6\.1||

tamanindyabandina ivendrasutaM vihitAlinikvaNajayadhvanayaH |
pavaneritAkulavijihmashikhA jagatIruho.avachakaruH kusumaiH || 6\.2||

avadhUtapa~NkajaparAgakaNAstanujAhnavIsalilavIchibhidaH |
parirebhire.abhimukhametya sukhAH suhR^idaH sakhAyamiva taM marutaH || 6\.3||

uditopalaskhalanasaMvalitAH sphuTahaMsasArasavirAvayujaH |
mudamasya mA~NgalikatUryakR^itAM dhvanayaH pratenuranuvapramapAm || 6\.4||

avarugNatu~NgasuradArutarau nichaye puraH surasaritpayasAm |
sa dadarsha vetasavanAcharitAM praNatiM balIyasi samR^iddhikarIm || 6\.5||

prababhUva nAlamavalokayituM paritaH sarojarajasAruNitam |
sariduttarIyamiva saMhatimat sa tara~Ngara~Ngi kalahaMsakulam || 6\.6||

dadhati kShatIH pariNatadvirade muditAliyoShiti madasrutibhiH |
adhikAM sa rodhasi babandha dhR^itiM mahate rujann api guNAya mahAn || 6\.7||

anuhemavapramaruNaiH samatAM gatamUrmibhiH sahacharaM pR^ithubhiH |
sa rathA~NganAmavanitAM karuNairanubadhnatImabhinananda rutaiH || 6\.8||

sitavAjine nijagadU ruchayash chalavIchirAgarachanApaTavaH |
maNijAlamambhasi nimagnamapi sphuritaM manogatamivAkR^itayaH || 6\.9||

upalAhatoddhatatara~NgadhR^itaM javinA vidhUtavitataM marutA |
sa dadarsha ketakashikhAvishadaM saritaH prahAsamiva phenamapAm || 6\.10||

bahu barhichandrikanibhaM vidadhe dhR^itimasya dAnapayasAM paTalam |
avagADhamIkShitumivaibhapatiM vikasadvilochanashataM saritaH || 6\.11||

pratibodhajR^imbhaNavibhInamukhI puline saroruhadR^ishA dadR^ishe |
patadachChamauktikamaNiprakarA galadashrubinduriva shuktivadhUH || 6\.12||

shuchirapsu vidrumalatAviTapastanusAndraphenalavasaMvalitaH |
smaradAyinaH smarayati sma bhR^ishaM dayitAdharasya dashanAMshubhR^itaH || 6\.13||

upalabhya cha~nchalatara~NgahR^itaM madagandhamutthitavatAM payasaH |
pratidantinAmiva sa sambubudhe kariyAdasAmabhimukhAn kariNaH || 6\.14||

sa jagAma vismayamudvIkShya puraH sahasA samutpipatiShoH phaNinaH |
prahitaM divi prajavibhiH shvasitaiH sharadabhravibhramamapAM paTalam || 6\.15||

sa tatAra saikatavatIrabhitaH shapharIparisphuritachArudR^ishaH |
lalitAH sakhIriva bR^ihajjaghanAH suranimnagAmupayatIH saritaH || 6\.16||

adhiruhya puShpabharanamrashikhaiH paritaH pariShkR^itatalAM tarubhiH |
manasaH prasattimiva mUrdhni gireH shuchimAsasAda sa vanAntabhuvam || 6\.17||

anusAnu puShpitalatAvitatiH phalitorubhUruhaviviktavanaH |
dhR^itimAtatAna tanayasya harestapase.adhivastumachalAmachalaH || 6\.18||

praNidhAya tatra vidhinAtha dhiyaM dadhataH purAtanamunermunitAm |
shramamAdadhAvasukaraM na tapaH kimivAvasAdakaramAtmavatAm || 6\.19||

shamayan dhR^itendriyashamaikasukhaH shuchibhirguNairaghamayaM sa tamaH |
prativAsaraM sukR^itibhirvavR^idhe vimalaH kalAbhiriva shItaruchiH || 6\.20||

adharIchakAra cha vivekaguNAd aguNeShu tasya dhiyamastavataH |
pratighAtinIM viShayasa~NgaratiM nirupaplavaH shamasukhAnubhavaH || 6\.21||

manasA japaiH praNatibhiH prayataH samupeyivAn adhipatiM sa divaH |
sahajetare jayashamau dadhatI bibharAMbabhUva yugapan mahasI || 6\.22||

shirasA harinmaNinibhaH sa vahan kR^itajanmano.abhiShavaNena jaTAH |
upamAM yayAvaruNadIdhitibhiH parimR^iShTamUrdhani tamAlatarau || 6\.23||

dhR^itahetirapyadhR^itajihmamatish charitairmunIn adharaya~n shuchibhiH |
rajayAMchakAra virajAH sa mR^igAn kamiveshate ramayituM na guNAH || 6\.24||

anukUlapAtinamachaNDagatiM kiratA sugandhimabhitaH pavanam |
avadhIritArtavaguNaM sukhatAM nayatA ruchAM nichayamaMshumataH || 6\.25||

navapallavA~njalibhR^itaH prachaye bR^ihatastarUn gamayatAvanatim |
stR^iNatA tR^iNaiH pratinishaM mR^idubhiH shayanIyatAmupayatIM vasudhAm || 6\.26||

patitairapetajaladAn nabhasaH pR^iShatairapAM shamayatA cha rajaH |
sa dayAluneva parigADhakR^ishaH paricharyayAnujagR^ihe tapasA || 6\.27||

mahate phalAya tad avekShya shivaM vikasannimittakusumaM sa puraH |
na jagAma vismayavashaM vashinAM na nihanti dhairyamanubhAvaguNaH || 6\.28||

tad abhUrivAsarakR^itaM sukR^itairupalabhya vaibhavamananyabhavam |
upatasthurAsthitaviShAdadhiyaH shatayajvano vanacharA vasatim || 6\.29||

viditAH pravishya vihitAnatayaH shithilIkR^ite.adhikR^itakR^ityavidhau |
anapetakAlamabhirAmakathAH kathayAMbabhUvuriti gotrabhide || 6\.30||

shuchivalkavItatanuranyatamastimirachChidAmiva girau bhavataH |
mahate jayAya maghavann anaghaH puruShastapasyati tapaj jagatIm || 6\.31||

sa bibharti bhIShaNabhujaMgabhujaH pR^ithi vidviShAM bhayavidhAyi dhanuH |
amalena tasya dhR^itasachcharitAsh charitena chAtishayitA munayaH || 6\.32||

marutaH shivA navatR^iNA jagatI vimalaM nabho rajasi vR^iShTirapAm |
guNasampadAnuguNatAM gamitaH kurute.asya bhaktimiva bhUtagaNaH || 6\.33||

itaretarAnabhibhavena mR^igAstamupAsate gurumivAntasadaH |
vinamanti chAsya taravaH prachaye paravAn sa tena bhavateva nagaH || 6\.34||

uru sattvamAha viparishramatA paramaM vapuH prathayatIva jayam |
shamino.api tasya navasaMgamane vibhutAnuSha~Ngi bhayameti janaH || 6\.35||

R^iShivaMshajaH sa yadi daityakule yadi vAnvaye mahati bhUmibhR^itAm |
charatastapastava vaneShu sadA na vayaM nirUpayitumasya gatim || 6\.36||

vigaNayya kAraNamanekaguNaM nijayAthavA kathitamalpatayA |
asad apyadaH sahitumarhati naH kva vanecharAH kva nipuNA matayaH || 6\.37||

adhigamya guhyakagaNAd iti tan manasaH priyaM priyasutasya tapaH |
nijugopa harShamuditaM maghavA nayavartmagAH prabhavatAM hi dhiyaH || 6\.38||

praNidhAya chittamatha bhaktatayA vidite.apyapUrva iva tatra hariH |
upalabdhumasya niyamasthiratAM surasundarIriti vacho.abhidadhe || 6\.39||

sukumAramekamaNu marmabhidAmatidUragaM yutamamoghatayA |
avipakShamastramaparaM katamad vijayAya yUyamiva chittabhuvaH || 6\.40||

bhavavItaye hatabR^ihattamasAmavabodhavAri rajasaH shamanam |
paripIyamANamiva vo.asakalairavasAdameti nayanA~njalibhiH || 6\.41||

bahudhA gatAM jagati bhUtasR^ijA kamanIyatAM samabhihR^itya purA |
upapAditA vidadhatA bhavatIH surasadmayAnasumukhI janatA || 6\.42||

tad upetya vighnayata tasya tapaH kR^itibhiH kalAsu sahitAH sachivaiH |
hR^itavItarAgamanasAM nanu vaH sukhasa~NginaM prati sukhAvajitiH || 6\.43||

avimR^iShyametad abhilaShyati sa dviShatAM vadhena viShayAbhiratim |
bhavavItaye na hi tathA sa vidhiH kva sharAsanaM kva cha vimuktipathaH || 6\.44||

pR^ithudAmni tatra paribodhi cha mA bhavatIbhiranyamunivad vikR^itiH |
svayashAMsi vikramavatAmavatAM na vadhUShvaghAni vimR^iShyanti dhiyaH || 6\.45||

AshaMsitApachitichAru puraH surANAmAdeshamityabhimukhaM samavApya bhartuH |
lebhe parAM dyutimamartyavadhUsamUhaH sambhAvanA hyadhikR^itasya tanoti
tejaH || 6\.46||

praNatimatha vidhAya prasthitAH sadmanastAH stanabharanamitA~NgIra~NganAH
prItibhAjaH |
achalanalinalakShmIhAri nAlaM babhUva stimitamamarabharturdraShTumakShNAM
sahasram || 6\.47||

shrImadbhiH sarathagajaiH surA~NganAnAM guptAnAmatha sachivaistrilokabhartuH
|
\medskip\hrule\medskip
saMmUrChann alaghuvimAnarandhrabhinnaH prasthAnaM samabhidadhe mR^ida~NganAdaH
|| 7\.1||

sotkaNThairamaragaNairanuprakIrNAn niryAya jvalitaruchaH purAn maghonaH |
rAmANAmupari vivasvataH sthitAnAM nAsede charitaguNatvamAtapatraiH || 7\.2||

dhUtAnAmabhimukhapAtibhiH samIrairAyAsAd avishadalochanotpalAnAm |
Aninye madajanitAM shriyaM vadhUnAmuShNAMshudyutijanitaH kapolarAgaH || 7\.3||

tiShThadbhiH kathamapi devatAnubhAvAd AkR^iShTaiH prajavibhirAyataM
tura~NgaiH |
nemInAmasati vivartanaI rathaughairAsede viyati vimAnavat pravR^ittiH || 7\.4||

kAntAnAM kR^itapulakaH stanA~NgarAge vaktreShu chyutatilakeShu mauktikAbhaH |
sampede shramasalilodgamo vibhUShA ramyANAM vikR^itirapi shriyaM tanoti || 7\.5||

rAjadbhiH pathi marutAmabhinnarUpairulkArchiH sphuTagatibhir
dhvajA~NkushAnAm |
tejobhiH kanakanikASharAjigaurairAyAmaH kriyata iva sma sAtirekaH || 7\.6||

rAmANAmavajitamAlyasaukumArye samprApte vapuShi sahatvamAtapasya |
gandharvairadhigatavismayaiH pratIye kalyANI vidhiShu vichitratA vidhAtuH || 7\.7||

sindUraiH kR^itaruchayaH sahemakakShyAH srotobhistridashagajA madaM
kSharantaH |
sAdR^ishyaM yayuraruNAMshurAgabhinnairvarShadbhiH sphuritashatahradaiH
payodaiH || 7\.8||

atyarthaM durupasadAd upetya dUraM paryantAd ahimamayUkhamaNDalasya |
AshAnAmuparachitAmivaikaveNIM ramyormIM tridashanadIM yayurbalAni || 7\.9||

AmattabhramarakulAkulAni dhunvann udbhUtagrathitarajAMsi pa~NkajAni |
kAntAnAM gagananadItara~NgashItaH saMtApaM viramayati sma mAtarishvA || 7\.10||

sambhinnairibhaturagAvagAhanena prApyorvIranupadavIM vimAnapa~NktIH |
tatpUrvaM pratividadhe surApagAyA vaprAntaskhalitavivartanaM payobhiH || 7\.11||

krAntAnAM grahacharitAt patho rathAnAmakShAgrakShatasuraveshmavedikAnAm |
niHsa~NgaM pradhibhirupAdade vivR^ittiH sampIDakShubhitajaleShu toyadeShu || 7\.12||

taptAnAmupadadhire viShANabhinnAH prahlAdaM surakariNAM ghanAH kSharantaH |
yuktAnAM khalu mahatAM paropakAre kalyANI bhavati rujatsvapi pravR^ittiH || 7\.13||

saMvAtA muhuranilena nIyamAne divyastrIjaghanavarAMshuke vivR^ittim |
paryasyatpR^ithumaNimekhalAMshujAlaM saMjaj~ne yutakamivAntarIyamUrvoH || 7\.14||

pratyArdrIkR^itatilakAstuShArapAtaiH prahlAdaM shamitaparishramA dishantaH |
kAntAnAM bahumatimAyayuH payodA nAlpIyAn bahu sukR^itaM hinasti doShaH || 7\.15||

yAtasya grathitatara~NgasaikatAbhe vichChedaM vipayasi vArivAhajAle |
AtenustridashavadhUjanA~NgabhAjAM saMdhAnaM suradhanuShaH prabhA maNInAm || 7\.16||

saMsiddhAviti karaNIyasaMnibaddhairAlApaiH pipatiShatAM vila~Nghya vIthIm |
Asede dashashatalochanadhvajinyA jImUtairapihitasAnurindrakIlaH || 7\.17||
AkIrNA mukhanalinairvilAsinInAmudbhUtasphuTavishadAtapatraphenA |
sA tUryadhvanitagabhIramApatantI bhUbhartuH shirasi nabhonadIva reje || 7\.18||

setutvaM dadhati payomuchAM vitAne saMrambhAd abhipatato rathA~n javena |
AninyurniyamitarashmibhugnaghoNAH kR^ichChreNa kShitimavanAmitastura~NgAH
|| 7\.19||

mAhendraM nagamabhitaH kareNuvaryAH paryantasthitajaladA divaH patantaH |
sAdR^ishyaM nilayananiShprakampapakShairAjagmurjalanidhishAyibhirnagendraiH
|| 7\.20||

utsa~Nge samaviShame samaM mahAdreH krAntAnAM viyadabhipAtalAghavena |
A mUlAd upanadi saikateShu lebhe sAmagrI khurapadavI tura~NgamANAm || 7\.21||

sadhvAnaM nipatitanirjharAsu mandraiH saMmUrChan pratininadairadhityakAsu |
udgrIvairghanaravasha~NkayA mayUraiH sotkaNThaM dhvanirupashushruve rathAnAm
|| 7\.22||

sambhinnAmaviralapAtibhirmayUkhairnIlAnAM bhR^ishamupamekhalaM maNInAm |
vichChinAmiva vanitA nabhontarAle vaprAmbhaHsrutimavalokayAMbabhUvuH || 7\.23||

AsannadvipapadavImadAnilAya krudhyanto dhiyamavamatya dhUrgatAnAm |
savyAjaM nijakariNIbhirAttachittAH prasthAnaM surakariNaH kathaMchid IShuH || 7\.24||

nIrandhraM pathiShu rajo rathA~NganunnaM paryasyan navasalilAruNaM vahantI |
Atene vanagahanAni vAhinI sA gharmAntakShubhitajaleva jahnukanyA || 7\.25||

sambhogakShamagahanAmathopaga~NgaM bibhrANAM jvalitamaNIni saikatAni |
adhyUShush chyutakusumAchitAM sahAyA vR^itrAreraviralashAdvalAM dharitrIm || 7\.26||

bhUbhartuH samadhikamAdadhe tadorvyAH shrImattAM harisakhavAhinIniveshaH |
saMsaktau kimasulabhaM mahodayAnAmuchChrAyaM nayati yadR^ichChayApi yogaH || 7\.27||

sAmodAH kusumatarushriyo viviktAH sampattiH kisalayashAlinIlatAnAm |
sAphalyaM yayuramarA~NganopabhuktAH sA lakShmIrupakurute yayA pareShAm || 7\.28||

klAnto.api tridashavadhUjanaH purastAllInAhishvasitavilolapallavAnAm |
sevyAnAM hatavinayairivAvR^itAnAM samparkaM pariharati sma chandanAnAm || 7\.29||

utsR^iShTadhvajakuthaka~NkaTA dharitrImAnItA viditanayaiH shramaM vinetum |
AkShiptadrumagahanA yugAntavAtaiH paryastA giraya iva dvipA virejuH || 7\.30||

prasthAnashramajanitAM vihAya nidrAmAmukte gajapatinA sadAnapa~Nke |
shayyAnte kulamalinAM kShaNaM vilInaM saMrambhachyutamiva shR^i~NkhalaM
chakAshe || 7\.31||

AyastaH surasaridogharuddhavartmA samprAptuM vanagajadAnagandhi rodhaH |
mUrdhAnaM nihitashitA~NkushaM vidhunvan yantAraM na vigaNayAMchakAra nAgaH || 7\.32||

AroDhuH samavanatasya pItasheShe sAsha~NkaM payasi samIrite kareNa |
saMmArjann aruNamadasrutI kapolau sasyande mada iva shIkaraH kareNoH || 7\.33||

AghrAya kShaNamatitR^iShyatApi roShAd uttIraM nihitavivR^ittalochanena |
sampR^iktaM vanakarinAM madAmbusekairnAcheme himamapi vAri vAraNena || 7\.34||

prashchyotanmadasurabhINi nimnagAyAH krIDanto gajapatayaH payAMsi kR^itvA |
ki~njalkavyavahitatAmradAnalekhairutteruH sarasijagandhibhiH kapolaiH || 7\.35||

AkIrNaM balarajasA ghanAruNena prakShobhaiH sapadi tara~NgitaM taTeShu |
mAta~NgonmathitasarojareNupi~NgaM mA~njiShThaM vasanamivAmbu nirbabhAse || 7\.36||

shrImadbhirniyamitakandharAparAntaiH saMsaktairaguruvaneShu sA~NgahAram |
samprApe nisR^itamadAmbubhirgajendraiH prasyandiprachalitagaNDashailashobhA
|| 7\.37||

niHsheShaM prashamitareNu vAraNAnAM srotobhirmadajalamujjhatAmajasram |
AmodaM vyavahitabhUripuShpagandho bhinnailAsurabhimuvAha gandhavAhaH || 7\.38||

sAdR^ishyaM dadhati gabhIrameghaghoShairunnidrakShubhitamR^igAdhipashrutAni |
Atenush chakitachakoranIlakaNThAn kachChAntAn amaramahebhabR^iMhitAni || 7\.39||

sAsrAvasaktakamaniyaparichChadAnAmadhvashramAturavadhUjanasevitAnAm |
jaj~ne niveshanavibhAgapariShkR^itAnAM lakShmIH puropavanajA vanapAdapAnAm || 7\.40||

\medskip\hrule\medskip
atha svamAyAkR^itamandirojjvalaM jvalanmaNi vyomasadAM sanAtanam |
surA~NganA gopatichApagopuraM puraM vanAnAM vijihIrShayA jahuH || 8\.1||

yathAyathaM tAH sahitA nabhashcharaiH prabhAbhirudbhAsitashailavIrudhaH |
vanaM vishantyo vanajAyatekShaNAH kShaNadyutInAM dadhurekarUpatAm || 8\.2||

nivR^ittavR^ittorupayodharaklamaH pravR^ittainirhrAdivibhUShaNAravaH |
nitambinInAM bhR^ishamAdadhe dhR^itiM nabhaHprayANAd avanau parikramaH || 8\.3||

ghanAni kAmaM kusumAni bibhrataH karapracheyAnyapahAya shAkhinaH |
puro.abhisasre surasundarIjanairyathottarechChA hi guNeShu kAminaH || 8\.4||

tanUralaktAruNapANipallavAH sphurannakhAMshUtkarama~njarIbhR^itaH |
vilAsinIbAhulatA vanAlayo vilepanAmodahR^itAH siShevire || 8\.5||

nipIyamAnastabakA shilImukhairashokayaShTish chalabAlapallavA |
viDambayantI dadR^ishe vadhUjanairamandadaShTauShThakarAvadhUnanam || 8\.6||

karau dhunAnA navapallavAkR^itI vR^ithA kR^ithA mAnini mA parishramam |
upeyuShI kalpalatAbhisha~NkayA kathaM nvitastrasyati ShaTpadAvaliH || 8\.7||

jahIhi kopaM dayito.anugamyatAM purAnushete tava cha~nchalaM manaH |
iti priyaM kAMchid upaitumichChatIM puro.anuninye nipuNaH sakhIjanaH || 8\.8||

samunnataiH kAshadukUlashAlibhiH parikvaNatsArasapa~NktimekhalaiH |
pratIradeshaiH svakalatrachArubhirvibhUShitAH ku~njasamudrayoShitaH || 8\.9||

vidUrapAtena bhidAmupeyuShash chyutAH pravAhAd abhitaH prasAriNaH |
priyA~NkashItAH shuchimauktikatviSho vanaprahAsA iva vAribindavaH || 8\.10||

sakhIjanaM prema gurUkR^itAdaraM nirIkShamANA iva namramUrtayaH |
sthiradvirephA~njanasharitodarairvisAribhiH puShpavilochanairlatAH || 8\.11||

upeyuShINAM bR^ihatIradhityakA manAMsi jahruH surarAjayoShitAm |
kapolakAShaiH kariNAM madAruNairupAhitashyAmaruchash cha chandanAH || 8\.12||

svagochare satyapi vittahAriNA vilobhyamAnAH prasavena shAkhinAm |
nabhashcharANAmupakartumichChatAM priyANi chakruH praNayena yoShitaH || 8\.13||

prayachChatochchaiH kusumAni mAninI vipakShagotraM dayitena lambhitA |
na kiMchid Uche charaNena kevalaM lilekha bAShpAkulalochanA bhuvam || 8\.14||

priye.aparA yachChati vAchamunmukhI nibaddhadR^iShTiH shithilAkulochchayA |
samAdadhe nAMshukamAhitaM vR^ithA viveda puShpeShu na pANipallavam || 8\.15||

salIlamAsaktalatAntabhUShaNaM samAsajantyA kusumAvataMsakam |
stanopapIDaM nunude nitambinA ghanena kashchij jaghanena kAntayA || 8\.16||

kalatrabhAreNa vilolanIvinA galaddukUlastanashAlinorasA |
balivyapAyasphuTaromarAjinA nirAyatatvAd udareNa tAmyatA || 8\.17||

vilambamAnAkulakeshapAshayA kayAchid AviShkR^itabAhumUlayA |
taruprasUnAnyapadishya sAdaraM manodhinAthasya manaH samAdade || 8\.18||

vyapohituM lochanato mukhAnilairapArayantaM kila puShpajaM rajaH |
payodhareNorasi kAchid unmanAH priyaM jaghAnonnatapIvarastanI || 8\.19||

imAnyamUnItyapavarjite shanairyathAbhirAmaM kusumAgrapallave |
vihAya niHsAratayeva bhUruhAn padaM vanashrIrvanitAsu saMdadhe || 8\.20||

pravAlabha~NgAruNapANipallavaH parAgapANDUkR^itapIvarastanaH |
mahIruhaH puShpasugandhirAdade vapurguNochChrAyamivA~NganAjanaH || 8\.21||

varorubhirvAraNahastapIvaraish chirAya khinnAn navapallavashriyaH |
same.api yAtuM charaNAn anIshvarAn madAd iva praskhalataH pade pade || 8\.22||

visArikA~nchImaNirashmilabdhayA manoharochChAyanitambashobhayA |
sthitAni jitvA navasaikatadyutiM shramAtiriktairjaghanAni gauravaiH || 8\.23||

samuchChvasatpa~NkajakoshakomalairupAhitashrINyupanIvi nAbhibhiH |
dadhanti madhyeShu valIvibha~NgiShu stanAtibhArAd udarANi namratAm || 8\.24||

samAnakAntIni tuShArabhUShaNaiH saroruhairasphuTapattrapa~NktibhiH |
chitAni gharmAmbukaNaiH samantato mukhAnyanutphullavilochanAni cha || 8\.25||

viniryatInAM gurusvedamantharaM surA~NganAnAmanusAnuvartmanaH |
savismayaM rUpayato nabhashcharAn vivesha tatpUrvamivekShaNAdaraH || 8\.26||

atha sphuranmInavidhUtapa~NkajA vipa~NkatIraskhalitormisaMhatiH |
payo.avagADhuM kalahaMsanAdinI samAjuhAveva vadhUH surApagA || 8\.27||

prashAntagharmAbhibhavaH shanairvivAn vilAsinIbhyaH parimR^iShTapa~NkajaH |
dadau bhujAlambamivAttashIkarastara~NgamAlAntaragocharo.anilaH || 8\.28||

gataiH sahAvaiH kalahaMsavikramaM kalatrabhAraiH pulinaM nitambibhiH |
mukhaiH sarojAni cha dIrghalochanaiH surastriyaH sAmyaguNAn nirAsire || 8\.29||

vibhinnaparyantagamInapa~NktayaH puro vigADhAH sakhibhirmarutvataH |
kathaMchid ApaH surasundarIjanaiH sabhItibhistatprathamaM prapedire || 8\.30||

vigADhamAtre ramaNIbhirambhasi prayatnasaMvAhitapIvarorubhiH |
vibhidyamAnA visasAra sArasAn udasya tIreShu tara~NgasaMhatiH || 8\.31||

shilAghanairnAkasadAmuraHsthalairbR^ihanniveshaish cha vadhUpayodharaiH |
taTAbhinItena vibhinnavIchinA ruSheva bheje kaluShatvamambhasA || 8\.32||

vidhUtakeshAH parilolitasrajaH surA~NganAnAM praviluptachandanAH |
atiprasa~NgAd vihitAgaso muhuH prakampamIyuH sabhayA ivormayaH || 8\.33||

vipakShachittonmathanA nakhavraNAstirohitA vibhramamaNDanena ye |
hR^itasya sheShAn iva ku~Nkumasya tAn vikatthanIyAn dadhuranyathA striyaH || 8\.34||

sarojapattre nu vilInaShaTpade viloladR^iShTeH svid amU vilochane |
shiroruhAH svin natapakShmasantaterdvirephavR^indaM nu nishabdanishchalam || 8\.35||

agUDhahAsasphuTadantakesaraM mukhaM svid etad vikasan nu pa~Nkajam |
iti pralInAM nalinIvane sakhIM vidAMbabhUvuH suchireNa yoShitaH || 8\.36||

priyeNa saMgrathya vipakShasaMnidhAvupAhitAM vakShasi pIvarastane |
srajaM na kAchid vijahau jalAvilAM vasanti hi premNi guNA na vastuni || 8\.37||

asaMshayaM nyastamupAntaraktatAM yad eva roddhuM ramaNIbhira~njanam |
hR^ite.api tasmin salilena shuklatAM nirAsa rAgo nayaneShu na shriyam || 8\.38||

dyutiM vahanto vanitAvataMsakA hR^itAH pralobhAd iva vegibhirjalaiH |
upaplutAstatkShaNashochanIyatAM chyutAdhikArAH sachivA ivAyayuH || 8\.39||

vipattralekhA niralaktakAdharA nira~njanAkShIrapi bibhratIH shriyam |
nirIkShya rAmA bubudhe nabhashcharairalaMkR^itaM tadvapuShaiva maNDanam || 8\.40||

tathA na pUrvaM kR^itabhUShaNAdaraH priyAnurAgeNa vilAsinIjanaH |
yathA jalArdro nakhamaNDanashriyA dadAha dR^iShTIsh cha vipakShayoShitAm || 8\.41||

shubhAnanAH sAmburuheShu bhIravo vilolahArAsh chalaphenapa~NktiShu |
nitAntagauryo hR^itaku~NkumeShvalaM na lebhire tAH parabhAgamUrmiShu || 8\.42||

hradAmbhasi vyastavadhUkarAhate ravaM mR^ida~NgadhvanidhIramujjhati |
muhustanaistAlassamaM samAdade manoramaM nR^ityamiva pravepitam || 8\.43||

shriyA hasadbhiH kalamAni sasmitairalaMkR^itAmbuH pratimAgatairmukhaiH |
kR^itAnukUlyA surarAjayoShitAM prasAdasAphalyamavApa jAhvanI || 8\.44||

parisphuranmInavighaTTitoravaH surA~NganAstrAsaviloladR^iShTayaH |
upAyayuH kampitapANipallavAH sakhIjanasyApi vilokanIyatAm || 8\.45||

bhayAd ivAshliShya jhaShAhate.ambhasi priyaM mudAnandayati sma mAninI |
akR^itrimapremarasAhitairmano haranti rAmAH kR^itakairapIhitaiH || 8\.46||

tirohitAntAni nitAntamAkulairapAM vigAhAd alakaiH prasAribhiH |
yayurvadhUnAM vadanAni tulyatAM dvirephavR^indAntaritaiH saroruhaiH || 8\.47||

karau dhunAnA navapallavAkR^itI payasyagAdhe kila jAtasambhramA |
sakhIShu nirvAchyamadhArShThyadUShitaM priyA~NgasaMshleShamavApa mAninI || 8\.48||

priyaiH salIlaM karavArivAritaH pravR^iddhaniHshvAsavikampitastanaH |
savibhramAdhUtakarAgrapallavo yathArthatAmApa vilAsinIjanaH || 8\.49||

udasya dhairyaM dayitena sAdaraM prasAditAyAH karavArivAritam |
mukhaM nimIlannayanaM natabhruvaH shriyaM sapatnIvadanAd ivAdade || 8\.50||

vihasya pANau vidhR^ite dhR^itAmbhasi priyeNa vadhvA madanArdrachetasaH |
sakhIva kA~nchI payasA ghanIkR^itA babhAra vItochchayabandhamaMshukam || 8\.51||

nira~njane sAchivilokitaM dR^ishAvayAvakaM vepathuroShThapallavam |
natabhruvo maNDayadi sma vigrahe balikriyA chAtilakaM tadAspadam || 8\.52||

nimIladAkekaralochachakShuShAM priyopakaNThaM kR^itagAtravepathuH |
nimajjatInAM shvasitoddhatastanaH shramo nu tAsAM madano nu paprathe || 8\.53||

priyeNa siktA charamaM vipakShatash chukopa kAchin na tutoSha sAntvanaiH |
janasya rUDhapraNayasya chetasaH kimapyamarSho.anunaye bhR^ishAyate || 8\.54||

itthaM vihR^itya vanitAbhirudasyamAnaM pInastanorujaghanasthalashAlinIbhiH |
utsarpitormichayala~NghitatIradeshamautsukyanunnamiva vAri puraH pratasthe
|| 8\.55||

tIrAntarANi mithunAni rathA~NganAmnAM nItvA vilolitasarojavanashriyastAH |
saMrejire surasarijjaladhautahArAstArAvitAnataralA iva yAmavatyaH || 8\.56||

saMkrAntachandanarasAhitavarNabhedaM vichChinnabhUShaNamaNiprakarAMshuchitram
|
baddhormi nAkavanitAparibhuktamuktaM sindhorbabhAra salilaM shayanIyalakShmIm
|| 8\.57||

\medskip\hrule\medskip
vIkShya rantumanasaH suranArIrAttachitraparidhAnavibhUShAH |
tatpriyArthamiva yAtumathAstaM bhAnumAn upapayodhi lalambe || 9\.1||
madhyamopalanibhe lasadaMshAvekatash chyutimupeyuShi bhAnau |
dyauruvAha parivR^ittivilolAM hArayaShTimiva vAsaralakShmIm || 9\.2||

aMshupANibhiratIva pipAsuH padmajaM madhu bhR^ishaM rasayitvA |
kShIbatAmiva gataH kShitimeShyaMllohitaM vapuruvAha pata~NgaH || 9\.3||

gamyatAmupagate nayanAnAM lohitAyAti sahasramarIchau |
AsasAda virahayya dharitrIM chakravAkahR^idayAnyabhitApaH || 9\.4||

muktamUlalaghurujjhitapUrvaH pashchime nabhasi sambhR^itasAndraH |
sAmi majjati ravau na vireje khinnajihma iva rashmisamUhaH || 9\.5||

kAntadUtya iva ku~NkumatAmrAH sAyamaNDalamabhi tvarayantyaH |
sAdaraM dadR^ishire vanitAbhiH saudhajAlapatitA ravibhAsaH || 9\.6||

agrasAnuShu nitAntapisha~NgairbhUruhAn mR^idukarairavalambya |
astashailagahanaM nu vivasvAn Avivesha jaladhiM nu mahIM nu || 9\.7||

Akulash chalapatatrikulAnAmAravairanuditauShasarAgaH |
AyayAvaharidashvavipANDustulyatAM dinamukhena dinAntaH || 9\.8||

AsthitaH sthagitavAridapa~NktyA saMdhyayA gaganapashchimabhAgaH |
sormividrumavintAnavibhAsA ra~njitasya jaladheH shriyamUhe || 9\.9||

prA~njalAvapi jane natamUrdhni prema tatpravaNachetasi hitvA |
saMdhyayAnuvidadhe viramantyA chApalena sujanetaramaitrI || 9\.10||

auShasAtapabhayAd apalInaM vAsarachChavivirAmapaTIyaH |
saMnipatya shanakairiva nimnAd andhakAramudavApa samAni || 9\.11||

ekatAmiva gatasya vivekaH kasyachin na mahato.apyupalebhe |
bhAsvatA nidadhire bhuvanAnAmAtmanIva patitena visheShAH || 9\.12||

ichChatAM saha vadhUbhirabhedaM yAminIvirahiNAM vihagAnAm |
Apureva mithunAni viyogaM la~Nghyate na khalu kAlaniyogaH || 9\.13||

yachChati pratimukhaM dayitAyai vAchamantikagate.api shakuntau |
nIyate sma natimujjhitaharShaM pa~NkajaM mukhamivAmburuhiNyA || 9\.14||

ra~njitA nu vividhAstarushailA nAmitaM nu gaganaM sthagitaM nu |
pUritA nu viShameShu dharitrI saMhR^itA nu kakubhastimireNa || 9\.15||

rAtrirAgamalinAni vikAsaM pa~NkajAni rahayanti vihAya |
spaShTatArakamiyAya nabhaH shrIrvastumichChati nirApadi sarvaH || 9\.16||

vyAnashe shashadhareNa vimuktaH ketakIkusumakesarapANDuH |
chUrNamuShTiriva lambhitakAntirvAsavasya dishamaMshusamUhaH || 9\.17||

ujjhatI shuchamivAshu tamisrAmantikaM vrajati tArakarAje |
dikprasAdaguNamaNDanamUhe rashmihAsavishadaM mukhamaindrI || 9\.18||

nIlanIrajanibhe himagauraM shailaruddhavapuShaH sitarashmeH |
khe rarAja nipatatkarajAlaM vAridheH payasi gA~NgamivAmbhaH || 9\.19||

dyAM nirundhad atinIlaghanAbhaM dhvAntamudyatakareNa purastAt |
kShipyamANamasitetarabhAsA shambhuneva karicharma chakAse || 9\.20||

antikAntikagatenduvisR^iShTe jihmatAM jahati dIdhitijAle |
niHsR^itastimirabhAranirodhAd uchChvasann iva rarAja digantaH || 9\.21||

lekhayA vimalavidrumabhAsA saMtataM timiramindurudAse |
daMShTrayA kanakaTa~Nkapisha~NgyA maNDalaM bhuva ivAdivarAhaH || 9\.22||

dIpayann atha nabhaH kiraNaughaiH ku~NkumAruNapayodharagauraH |
hemakumbha iva pUrvapayodherunmamajja shanakaistuhinAMshuH || 9\.23||

udgatendumavibhinnatamisrAM pashyati sma rajanImavitR^iptaH |
vyaMshukasphuTamukhImatijihmAM vrIDayA navavadhUmiva lokaH || 9\.24||

na prasAdamuchitaM gamitA dyairnoddhR^itaM timiramadrivanebhyaH |
di~NmukheShu na cha dhAma vikIrNaM bhUShitaiva rajanI himabhAsA || 9\.25||

mAninIjanavilochanapAtAn uShNabAShpakaluShAn pratigR^ihNan |
mandamandamuditaH prayayau khaM bhItabhIta iva shItamayUkhaH || 9\.26||

shliShyataH priyavadhUrupakaNThaM tArakAstatakarasya himAMshoH |
udvamann abhirarAja samantAd a~NgarAga iva lohitarAgaH || 9\.27||

preritaH shashadhareNa karaughaH saMhatAnyapi nunoda tamAMsi |
kShIrasindhuriva mandarabhinnaH kAnanAnyaviralochchatarUNi || 9\.28||

shAratAM gamitayA shashipAdaish ChAyayA viTapinAM pratipede |
nyastashuklabalichitratalAbhistulyatA vasativeshmamahIbhiH || 9\.29||

Atape dhR^itimatA saha vadhvA yAminIvirahiNA vihagena |
sehire na kiraNA himarashmerduHkhite manasi sarvamasahyam || 9\.30||

gandhamuddhatarajaHkaNavAhI vikShipan vikasatAM kumudAnAm |
AdudhAva parilInaviha~NgA yAminImarud apAM vanarAjIH || 9\.31||

saMvidhAtumabhiShekamudAse manmathasya lasadaMshujalaughaH |
yAminIvanitayA tatachihnaH sotpalo rajatakumbha ivenduH || 9\.32||

ojasApi khalu nUnamanUnaM nAsahAyamupayAti jayashrIH |
yad vibhuH shashimayUkhasakhaH sann Adade vijayi chApamana~NgaH || 9\.33||

sadmanAM virachanAhitashobhairAgatapriyakathairapi dUtyam |
saMnikR^iShTaratibhiH suradArairbhUShitairapi vibhUShaNamIShe || 9\.34||

na srajo ruruchire ramaNIbhyash chandanAni virahe madirA vA |
sAdhaneShu hi raterupadhatte ramyatAM priyasamAgama eva || 9\.35||

prasthitAbhiradhinAthanivAsaM dhvaMsitapriyasakhIvachanAbhiH |
mAninIbhirapahastitadhairyaH sAdayann iva mado.avalalambe || 9\.36||

kAntaveshma bahu saMdishatIbhiryAtameva rataye ramaNIbhiH |
manmathena pariluptamatInAM prAyashaH skhalitamapyupakAri || 9\.37||

Ashu kAntamabhisAritavatyA yoShitaH pulakaruddhakapolam |
nirjigAya mukhamindumakhaNDaM khaNDapatratilakAkR^iti kAntyA || 9\.38||

uchyatAM sa vachanIyamasheShaM neshvare paruShatA sakhi sAdhvI |
AnayainamanunIya kathaM vA vipriyANi janayann anuneyaH || 9\.39||

kiM gatena na hi yuktamupaituM kaH priye subhagamAnini mAnaH |
yoShitAmiti kathAsu sametaiH kAmibhirbahurasA dhR^itirUhe || 9\.40||

yoShitaH pulakarodhi dadhatyA gharmavAri navasaMgamajanma |
kAntavakShasi babhUva patantyA maNDanaM lulitamaNDanataiva || 9\.41||

shIdhupAnavidhurAsu nigR^ihNan mAnamAshu shithilIkR^italajjaH |
saMgatAsu dayitairupalebhe kAminIShu madano nu mado nu || 9\.42||

dvAri chakShuradhipANi kapolau kIvitaM tvayi kutaH kalaho.asyAH |
kAminAmiti vachaH punaruktaM prItaye navanavatvamiyAya || 9\.43||

sAchi lochanayugaM namayantI rundhatI dayitavakShasi pAtam |
subhruvo janayati sma vibhUShAM saMgatAvupararAma cha lajjA || 9\.44||

savyalIkamavadhIritakhinnaM prasthitaM sapadi kopapadena |
yoShitaH suhR^id iva sma ruNaddhi prANanAthamabhibAShpanipAtaH || 9\.45||

sha~NkitAya kR^itabAShpanipAtAmIrShyayA vimukhitAM dayitAya |
mAninimabhimukhAhitachittAM shaMsati sma ghanaromavibhedaH || 9\.46||

loladR^iShTi vadanaM dayitAyAsh chumbati priyatame rabhasena |
vrIDayA saha vinIvi nitambAd aMshukaM shithilatAmupapade || 9\.47||

hrItaya agalitanIvi nirasyann antarIyamavalambitakA~nchi |
maNDalIkR^itapR^ithustanabhAraM sasvaje dayitayA hR^idayeshaH || 9\.48||

AdR^itA nakhapadaiH parirambhAsh chumbitAni ghanadantanipAtaiH |
saukumAryaguNasambhR^itakIrtirvAma eva surateShvapi kAmaH || 9\.49||

pANipallavavidhUnanamantaH sItkR^itAni nayanArdhanimeShAH |
yoShitAM rahasi gadgadavAchAmastratAmupayayurmadanasya || 9\.50||

pAtumAhitaratInyabhileShustarShayantyapunaruktarasAni |
sasmitAni vadanAni vadhUnAM sotpalAni cha madhUni yuvAnaH || 9\.51||

kAntasaMgamaparAjitamanyau vAruNIrasanashAntavivAde |
mAninIjana upAhitasaMdhau saMdadhe dhanuShi neShumana~NgaH || 9\.52||

kupyatAshu bhavatAnatachittAH kopitAMsh cha varivasyata yUnaH |
ityaneka upadesha iva sma svAdyate yuvatibhirmadhuvAraH || 9\.53||

bhartR^ibhiH praNayasambhramadattAM vAruNImatirasAM rasayitvA |
hrIvimohavirahAd upalebhe pATavaM nu hR^idayaM nu vadhUbhiH || 9\.54||

svAditaH svayamathaidhitamAnaM lambhitaH priyatamaiH saha pItaH |
AsavaH pratipadaM pramadAnAM naikarUparasatAmiva bheje || 9\.55||

bhrUvilAsasubhagAn anukartuM vibhramAn iva vadhUnayanAnAm |
Adade mR^iduvilokapalAshairutpalaish chaShakavIchiShu kampaH || 9\.56||

oShThapallavavidaMsharuchInAM hR^idyatAmupayayau ramaNAnAm |
phullalochanavinIlasarojaira~NganAsyachaShakairmadhuvAraH || 9\.57||

prApyate guNavatApi guNAnAM vyaktamAshrayavashena visheShaH |
tat tathA hi dayitAnanadattaM vyAnashe madhu rasAtishayena || 9\.58||

vIkShya ratnachaShakeShvatiriktAM kAntadantapadamaNDanalakShmIm |
jaj~nire bahumatAH pramadAnAmoShThayAvakanudo madhuvArAH || 9\.59||

lochanAdharakR^itAhR^itarAgA vAsitAnanavisheShitagandhA |
vAruNI paraguNAtmaguNAnAM vyatyayaM vinimayaM nu vitene || 9\.60||

tulyarUpamasitotpalamakShNoH karNagaM nirupakAri viditvA |
yoShitaH suhR^id iva pravibheje lambhitekShaNaruchirmadarAgaH || 9\.61||

kShINayAvakaraso.apyatipAnaiH kAntadantapadasambhR^itashobhaH |
AyayAvatitarAmiva vadhvAH sAndratAmadharapallavarAgaH || 9\.62||

rAgajAntanayaneShu nitAntaM vidrumAruNakapolataleShu |
sarvagApi dadR^ishe vanitAnAM darpaNeShviva mukheShu madashrIH || 9\.63||

baddhakopavikR^itIrapi rAmAsh chArutAbhimatatAmupaninye |
vashyatAM madhumado dayitAnAmAtmavargahitamichChati sarvaH || 9\.64||

vAsasAM shithilatAmupanAbhi hrInirAsamapade kupitAni |
yoShitAM vidadhatI guNapakShe nirmamArja madirA vachanIyam || 9\.65||

bhartR^iShUpasakhi nikShipatInAmAtmano madhumadodyamitAnAm |
vrIDayA viphalayA vanitAnAM na sthitaM na vigataM hR^idayeShu || 9\.66||

rundhatI nayanavAkyavikAsaM sAdito bhayakarA parirambhe |
vrIDitasya lalitaM yuvatInAM kShIbatA bahuguNairanujahre || 9\.67||

yoShid uddhatamanobhavarAgA mAnavatyapi yayau dayitA~Nkam |
kArayatyanibhR^itA guNadoShe vAruNI khalu rahasyavibhedam || 9\.68||

Ahite nu madhunA madhuratve cheShTitasya gamite nu vikAsam |
Ababhau nava ivoddhatarAgaH kAminIShvavasaraH kusumeShoH || 9\.69||

mA gaman madavimUDhadhiyo naH projjhya rantumiti sha~NkitanAthAH |
yoShito na madirAM bhR^ishamIShuH prema pashyati bhayAnyapade.api || 9\.70||

chittanirvR^itividhAyi viviktaM manmatho madhumadaH shashibhAsaH |
saMgamash cha dayitaiH sma nayanti prema kAmapi bhuvaM pramadAnAm || 9\.71||

dhArShTyala~NghitayathochitabhUmau nirdayaM vilulitAlakamAlye |
mAninIratividhau kusumeShurmattamatta iva vibhramamApa || 9\.72||

shIdhupAnavidhureShu vadhUnAM vighnatAmupagateShu vapuHShu |
IhitaM ratirasAhitabhAvaM vItalakShyamapi kAmiShu reje || 9\.73||

anyonyaraktamanasAmatha bibhratInAM chetobhuvo harisakhApsarasAM nidesham |
vaibodhikadhvanivibhAvitapashchimArdhA sA saMhR^iteva parivR^ittimiyAya
rAtriH || 9\.74||

nidrAvinoditanitAntaratiklamAnAmAyAmima~NgalaninAdavibodhitAnAm |
rAmAsu bhAvivirahAkulitAsu yUnAM tatpUrvatAmiva samAdadhire ratAni || 9\.75||

kAntAjanaM suratakhedanimIlitAkShaM saMvAhituM samupayAn iva mandamandam |
harmyeShu mAlyamadirAparibhogagandhAn AvishchakAra rajanIparivR^ittivAyuH || 9\.76||

AmodavAsitachalAdharapallaveShu nidrAkaShAyitavipATalalochaneShu |
vyAmR^iShTapattratilakeShu vilAsinInAM shobhAM babandha vadaneShu
madAvasheShaH || 9\.77||

gatavati nakhalekhAlakShyatAma~NgarAge samadadayitapItAtAmrabimbAdharANAm |
virahavidhuramiShTA satsakhIva~NganAnAM hR^idayamavalalambe
rAtrisambhogalakShmIH || 9\.78||

\medskip\hrule\medskip
atha parimalajAmavApya lakShmImavayavadIpitamaNDanashriyastAH |
vasatimabhivihAya ramyahAvAH surapatisUnuvilobhanAya jagmuH || 10\.1||

drutapadamabhiyAtumichChatInAM gamanaparikramalAghavena tAsAm |
avaniShu charaNaiH pR^ithustanInAmalaghunitambatayA chiraM niShede || 10\.2||

nihitasarasayAvakairbabhAse charaNatalaiH kR^itapaddhatirvadhUnAm |
aviralavitateva shakragopairaruNitanIlatR^iNolapA dharitrI || 10\.3||

dhvaniragavivareShu nUpurANAM pR^ithurashanAguNashi~njitAnuyAtaH |
pratiravavitato vanAni chakre mukharasamutsukahaMsasArasAni || 10\.4||
avachayaparibhogavanti hiMsraiH sahacharitAnyamR^igANi kAnanAni |
abhidadhurabhito muniM vadhUbhyaH samuditasAdhvasaviklavaM cha chetaH || 10\.5||

nR^ipatimuniparigraheNa sA bhUH surasachivApsarasAM jahAra chetaH |
upahitaparamaprabhAvadhAmnAM na hi jayinAM tapasAmala~Nghyamasti || 10\.6||

sachakitamiva vismayAkulAbhiH shuchisikatAsvatimAnuShANi tAbhiH |
kShitiShu dadR^ishire padAni jiShNorupahitaketurathA~NgalA~nChanAni || 10\.7||

atishayitavanAntaradyutInAM phalakusumAvachaye.api tadvidhAnAm |
R^ituriva taruvIrudhAM samR^iddhyA yuvatijanairjagR^ihe muniprabhAvaH || 10\.8||

mR^iditakisalayaH surA~NganAnAM sasalilavalkalabhArabhugnashAkhaH |
bahumatimadhikAM yayAvashokaH parijanatApi guNAya sadguNAnAm || 10\.9||

yamaniyamakR^ishIkR^itasthirA~NgaH paridadR^ishe vidhR^itAyudhaH sa tAbhiH |
anupamashamadIptatAgarIyAn kR^itapadapa~NktiratharvaNeva vedaH || 10\.10||

shashadhara iva lochanAbhirAmairgaganavisAribhiraMshubhiH parItaH |
shikharanichayamekasAnusadmA sakalamivApi dadhan mahIdharasya || 10\.11||

surasariti paraM tapo.adhigachChan vidhR^itapisha~NgabR^ihajjaTAkalApaH |
haviriva vitataH shikhAsamUhaiH samabhilaShann upavedi jAtavedAH || 10\.12||

sadR^ishamatanumAkR^iteH prayatnaM tadanuguNAmaparaiH kriyAmala~NghyAm |
dadhad alaghu tapaH kriyAnurUpaM vijayavatIM cha tapaHsamAM samR^iddhim || 10\.13||

chiraniyamakR^isho.api shailasAraH shamanirato.api durAsadaH prakR^ityA |
sasachiva iva nirjane.api tiShThan munirapi tulyaruchistrilokabhartuH || 10\.14||

tanumavajitalokasAradhAmnIM tribhuvanaguptisahAM vilokayantyaH |
avayayuramarastriyo.asya yatnaM vijayaphale viphalaM tapodhikAre || 10\.15||

munidanutanayAn vilobhya sadyaH pratanubalAnyadhitiShThatastapAMsi |
alaghuni bahu menire cha tAH svaM kulishabhR^itA vihitaM pade niyogam || 10\.16||

atha kR^itakavilobhanaM vidhitsau yuvatijane harisUnudarshanena |
prasabhamavatatAra chittajanmA harati mano madhurA hi yauvanashrIH || 10\.17||

sapadi harisakhairvadhUnideshAd dhvanitamanoramavallakImR^ida~NgaiH |
yugapad R^itugaNasya saMnidhAnaM viyati vane cha yathAyathaM vitene || 10\.18||

sajalajaladharaM nabho vireje vivR^itimiyAya ruchistaDillatAnAm |
vyavahitarativigrahairvitene jalagurubhiH stanitairdigantareShu || 10\.19||

parisurapatisUnudhAma sadyaH samupadadhan mukulAni mAlatInAm |
viralamapajahAra baddhabinduH sarajasatAmavanerapAM nipAtaH || 10\.20||

pratidishamabhigachChatAbhimR^iShTaH kakubhavikAsasugandhinAnilena |
nava iva vibabhau sachittajanmA gatadhR^itirAkulitash cha jIvalokaH || 10\.21||

vyathitamapi bhR^ishaM mano harantI pariNatajambuphalopabhogahR^iShTA |
parabhR^itayuvatiH svanaM vitene navanavayojitakaNTharAgaramyam || 10\.22||

abhibhavati manaH kadambavAyau madamadhure cha shikhaNDinAM ninAde |
jana iva na dhR^itesh chachAla jiShNurna hi mahatAM sukaraH samAdhibha~NgaH
|| 10\.23||

dhR^itabisavalayAvalirvahantI kumudavanaikadukUlamAttabANA |
sharadamalatale sarojapANau ghanasamayena vadhUrivAlalambe || 10\.24||

samadashikhirutAni haMsanAdaiH kumudavanAni kadambapuShpavR^iShTyA |
shriyamatishayinIM sametya jagmurguNamahatAM mahate guNAya yogaH || 10\.25||

sarajasamapahAya ketakInAM prasavamupAntikanIpareNukIrNam |
priyamadhurasanAni ShaTpadAlI malinayati sma vinIlabandhanAni || 10\.26||

mukulitamatishayya bandhujIvaM dhR^itajalabinduShu shAdvalasthalIShu |
aviralavapuShaH surendragopA vikachapalAshachayashriyaM samIyuH || 10\.27||

aviralaphalinIvanaprasUnaH kusumitakundasugandhigandhavAhaH |
guNamasamayajaM chirAya lebhe viralatuShArakaN.astuShArakAlaH || 10\.28||

nichayini lavalIlatAvikAse janayati lodhrasamIraNe cha harSham |
vikR^itimupayayau na pANDusUnush chalati nayAn na jigIShatAM hi chetaH || 10\.29||

katipayasahakArapuShparamyastanutuhino.alpavinidrasinduvAraH |
surabhimukhahimAgamAntashaMsI samupayayau shishiraH smaraikabandhuH || 10\.30||

kusumanagavanAnyupaitukAmA kisalayinImavalambya chUtayaShTim |
kvaNadalikulanUpurA nirAse nalinavaneShu padaM vasantalakShmIH || 10\.31||

vikasitakusumAdharaM hasantIM kurabakarAjivadhUM vilokayantam |
dadR^ishuriva surA~NganA niShaNNaM sasharamana~NgamashokapallaveShu || 10\.32||

muhuranupatatA vidhUyamAnaM virachitasaMhati dakShiNAnilena |
alikulamalakAkR^itiM prapede nalinamukhAntavisarpi pa~NkajinyAH || 10\.33||

shvasanachalitapallavAdharoShThe navanihiterShyamivAvadhUnayantI |
madhusurabhiNi ShaTpadena puShpe mukha iva shAlalatAvadhUsh chuchumbe || 10\.34||

prabhavati na tadA paro vijetuM bhavati jitendriyatA yad AtmarakShA |
avajitabhuvanastathA hi lebhe sitaturage vijayaM na puShpamAsaH || 10\.35||

kathamiva tava saMmatirbhavitrI samam R^itubhirmuninAvadhIritasya |
iti virachitamallikAvikAsaH smayata iva sma madhuM nidAghakAlaH || 10\.36||

balavad api balaM mithovirodhi prabhavati naiva vipakShanirjayAya |
bhuvanaparibhavI na yat tadAnIM tam R^itugaNaH kShaNamunmanIchakAra || 10\.37||

shrutisukhamupavINitaM sahAyairaviralalA~nChanahAriNash cha kAlAH |
avihitaharisUnuvikriyANi tridashavadhUShu manobhavaM vitenuH || 10\.38||

na dalati nichaye tathotpalAnAM na cha viShamachChadaguchChayUthikAsu |
abhiratumupalebhire yathAsAM haritanayAvayaveShu lochanAni || 10\.39||

munimabhimukhatAM ninIShavo yAH samupayayuH kamanIyatAguNena |
madanamupadadhe sa eva tAsAM duradhigamA hi gatiH prayojanAnAm || 10\.40||

prakR^itamanusasAra nAbhineyaM pravikasada~Nguli pANipallavaM vA |
prathamamupahitaM vilAsi chakShuH sitaturage na chachAla nartakInAm || 10\.41||

abhinayamanasaH surA~NganAyA nihitamalaktakavartanAbhitAmram |
charaNamabhipapAta ShaTpadAlI dhutanavalohitapa~NkajAbhisha~NkA || 10\.42||

aviralamalaseShu nartakInAM drutapariShiktamalaktakaM padeShu |
savapuShAmiva chittarAgamUhurnamitashikhAni kadambakesarANi || 10\.43||

nR^ipasutamabhitaH samanmathAyAH parijanagAtratirohitA~NgayaShTeH |
sphuTamabhilaShitaM babhUva vadhvA vadati hi saMvR^itireva kAmitAni || 10\.44||

abhimuni sahasA hR^ite parasyA ghanamarutA jaghanAMshukaikadeshe |
chakitamavasanoru satrapAyAH pratiyuvatIrapi vismayaM ninAya || 10\.45||

dhR^itabisavalaye nidhAya pANau mukhamadhirUShitapANDugaNDalekham |
nR^ipasutamaparA smarAbhitApAd amadhumadAlasalochanaM nidadhyau || 10\.46||

sakhi dayitamihAnayeti sA mAM prahitavatI kusumeShuNAbhitaptA |
hR^idayamahR^idayA na nAma pUrvaM bhavadupakaNThamupAgataM viveda || 10\.47||

chiramapi kalitAnyapArayantyA parigadituM parishuShyatA mukhena |
gataghR^iNa gamitAni satsakhInAM nayanayugaiH samamArdratAM manAMsi || 10\.48||

achakamata sapallavAM dharitrIM mR^idusurabhiM virahayya puShpashayyAm |
bhR^ishamaratimavApya tatra chAsyAstava sukhashItamupaituma~NkamichChA
|| 10\.49||

tad anagha tanurastu sA sakAmA vrajati purA hi parAsutAM tvadarthe |
punarapi sulabhaM tapo.anurAgI yuvatijanaH khalu nApyate.anurUpaH || 10\.50||

jahihi kaThinatAM prayachCha vAchaM nanu karuNAmR^idu mAnasaM munInAm |
upagatamavadhIrayantyabhavyAH sa nipuNametya kayAchid evamUche || 10\.51||

salalitachalitatrikAbhirAmAH shirasijasaMyamanAkulaikapANiH |
surapatitanaye.aparA nirAse manasijajaitrasharaM vilochanArdham || 10\.52||

kusumitamavalambya chUtamuchchaistanuribhakumbhapR^ithustanAnatA~NgI |
tadabhimukhamana~NgachApayaShTirvisR^itaguNeva samunnanAma kAchit || 10\.53||

sarabhasamavalambya nIlamanyA vigalitanIvi vilolamantarIyam |
abhipatitumanAH sasAdhvaseva chyutarashanAguNasaMditAvatasthe || 10\.54||

yadi manasi shamaH kima~Nga chApaM shaTha viShayAstava vallabhA na muktiH |
bhavatu dishati nAnyakAminIbhyastava hR^idaye hR^idayeshvarAvakAsham || 10\.55||

iti viShamitachakShuShAbhidhAya sphuradadharoShThamasUyayA kayAchit |
agaNitagurumAnalajjayAsau svayamurasi shravaNotpalena jaghne || 10\.56||

savinayamaparAbhisR^itya sAchi smitasubhagaikalasatkapolalakShmIH |
shravaNaniyamitena taM nidadhya sakalamivAsakalena lochanena || 10\.57||

karuNamabhihitaM trapA nirastA tadabhimukhaM cha vimuktamashru tAbhiH |
prakupitamabhisAraNe.anunetuM priyamiyatI hyabalAjanasya bhUmiH || 10\.58||

asakalanayanekShitAni lajjA gatamalasaM paripANDutA viShAdaH |
iti vividhamiyAya tAsu bhUShAM prabhavati maNDayituM vadhUrana~NgaH || 10\.59||

alasapadamanoramaM prakR^ityA jitakalahaMsavadhUgati prayAtam |
sthitamurujaghanasthalAtibhArAd uditaparishramajihmitekShaNaM vA || 10\.60||

bhR^ishakusumashareShupAtamohAd anavasitArthapadAkulo.abhilApaH |
adhikavitatalochanaM vadhUnAmayugapad unnamitabhru vIkShitaM cha || 10\.61||

ruchikaramapi nArthavad babhUva stimitasamAdhishuchau pR^ithAtanUje |
jvalayati mahatAM manAMsyamarShe na hi labhate.avasaraM sukhAbhilAShaH || 10\.62||

svayaM saMrAdhyaivaM shatamakhamakhaNDena tapasA parochChittyA labhyAm
abhilaShati lakShmIM harisute |
manobhiH sodvegaiH praNayavihataidhvastaruchayaH sagandharmA dhAma
tridashavanitAH svaM pratiyayuH || 10\.63||

\medskip\hrule\medskip
athAmarShAn nisargAchcha jitendriyatayA tayA |
AgajAmAshramaM jiShNoH pratItaH pAkashAsanaH || 11\.1||

munirUpo.anurUpeNa sUnunA dadR^ishe puraH |
drAghIyasA vayotItaH pariklAntaH kilAdhvanA || 11\.2||

jaTAnAM kIrNayA keshaiH saMhatyA paritaH sitaiH |
pR^iktayendukarairahnaH paryanta iva saMdhyayA || 11\.3||

vishadabhrUyugachChanna valitApA~NgalochanaH |
prAleyAvatatimlAna palAshAbja iva hradaH || 11\.4||

AsaktabharanIkAshaira~NgaiH parikR^ishairapi |
adyUnaH sadgR^ihiNyeva prAyo yaShTyAvalambitaH || 11\.5||

gUDho.api vapuShA rAjan dhAmnA lokAbhibhAvinA |
aMshumAn iva tanvabhra paTalachChannavigrahaH || 11\.6||

jaratImapi bibhrANastanumaprAkR^itAkR^itiH |
chakArAkrAntalakShmIkaH sasAdhvasamivAshrayam || 11\.7||

abhitastaM pR^ithAsUnuH snehena paritastare |
avij~nAte.api bandhau hi balAt prahlAdate manaH || 11\.8||

AtitheyImathAsAdya sutAdapachitiM hariH |
vishramya viShTare nAma vyAjahAreti bhAratIm || 11\.9||

tvayA sAdhu samArambhi nave vayasi yat tapaH |
hriyate viShayaiH prAyo varShIyAn api mAdR^ishaH || 11\.10||

shreyasIM tava samprAptA guNasampadamAkR^itiH |
sulabhA ramyatA loke durlabhaM hi guNArjanam || 11\.11||

sharadambudharachChAyA gatvaryo yauvanashriyaH |
ApAtaramyA viShayAH paryantaparitApinaH || 11\.12||

antakaH paryavasthAtA janminaH saMtatApadaH |
iti tyAjye bhave bhavyo muktAvuttiShThate manaH || 11\.13||

chittavAn asi kalyANI yat tvAM matirupasthitA |
viruddhaH kevalaM veShaH saMdehayati me manaH || 11\.14||

yuyutsuneva kavachaM kimAmuktamidaM tvayA |
tapasvino hi vasate kevalAjinavalkale || 11\.15||

prapitsoH kiM cha te muktiM niHspR^ihasya kalevare |
maheShudhI dhanurbhImaM bhUtAnAmanabhidruhaH || 11\.16||

bhayaMkaraH prANabhR^itAM mR^ityorbhuja ivAparaH |
asistava tapasthasya na samarthayate shamam || 11\.17||

jayamatrabhavAn nUnamarAtiShvabhilAShukaH |
krodhalakShma kShamAvantaH kvAyudhaM kva tapodhanAH || 11\.18||

yaH karoti vadhodarkA niHshreyasakarIH kriyAH |
glAnidoShachChidaH svachChAH sa mUDhaH pa~NkayatyapaH || 11\.19||

mUlaM doShasya hiMsAderarthakAmau sma mA puShaH |
tau hi tattvAvabodhasya duruchChedAvupaplavau || 11\.20||

abhidroheNa bhUtAnAmarjayan gatvarIH shriyaH |
udanvAn iva sindhUnAmApadAmeti pAtratAm || 11\.21||

yA gamyAH satsahAyAnAM yAsu khedo bhayaM yataH |
tAsAM kiM yan na duHkhAya vipadAmiva sampadAm || 11\.22||
durAsadAn arIn ugrAn dhR^itervishvAsajanmanaH |
bhogAn bhogAn ivAheyAn adhyAsyApan na durlabhA || 11\.23||

nAntaraj~nAH shriyo jAtu priyairAsAM na bhUyate |
AsaktAstAsvamI mUDhA vAmashIlA hi jantavaH || 11\.24||

ko.apavAdaH stutipade yad ashIleShu cha~nchalAH |
sAdhuvR^ittAn api kShudrA vikShipantyeva sampadaH || 11\.25||

kR^itavAn anyadeheShu kartA cha vidhuraM manaH |
apriyairiva saMyogo viprayogaH priyaiH saha || 11\.26||

shUnyamAkIrNatAmeti tulyaM vyasanamutsavaiH |
vipralambho.api lAbhAya sati priyasamAgame || 11\.27||

tadA ramyANyaramyANi priyAH shalyaM tadAsavaH |
tadaikAkI sabandhuH sann iShTena rahito yadA || 11\.28||

yuktaH pramAdyasi hitAd apetaH paritapyase |
yadi neShTAtmanaH pIDA mA sa~nji bhavatA jane || 11\.29||

janmino.asya sthitiM vidvAMllakShmImiva chalAchalAm |
bhavAn mA sma vadhIn nyAyyaM nyAyAdhArA hi sAdhavaH || 11\.30||

vijahIhi raNotsAhaM mA tapaH sAdhi nInashaH |
uchChedaM janmanaH kartumedhi shAntastapodhana || 11\.31||

jIyantAM durjayA dehe ripavash chakShurAdayaH |
jiteShu nanu loko.ayaM teShu kR^itsnastvayA jitaH || 11\.32||

paravAn arthasaMsiddhau nIchavR^ittirapatrapaH |
avidheyendriyaH puMsAM gaurivaitei vidheyatAm || 11\.33||

shvastvayA sukhasaMvittiH smaraNIyAdhunAtanI |
iti svapnopamAn matvA kAmAn mA gAstada~NgatAm || 11\.34||

shraddheyA vipralabdhAraH priyA vipriyakAriNaH |
sudustyajAstyajanto.api kAmAH kaShTA hi shatravaH || 11\.35||

vivikte.asmin nage bhUyaH plAvite jahnukanyayA |
pratyAsIdati muktistvAM purA mA bhUrudAyudhaH || 11\.36||

vyAhR^itya marutAM patyAviti vAchamavasthite |
vachaH prashrayagambhIramathovAcha kapidhvajaH || 11\.37||

prasAdaramyamojasvi garIyo lAghavAnvitam |
sAkA~NkShamanupaskAraM viShvaggati nirAkulam || 11\.38||

nyAyanirNItasAratvAn nirapekShamivAgame |
aprakampyatayAnyeShAmAmnAyavachanopamam || 11\.39||

ala~NghyatvAj janairanyaiH kShubhitodanvadUrjitam |
audAryAd arthasampatteH shAntaM chittam R^iSheriva || 11\.40||

idamIdR^igguNopetaM labdhAvasarasAdhanam |
vyAkuryAt kaH priyaM vAkyaM yo vaktA nedR^igAshayaH || 11\.41||

na j~nAtaM tAta yatnasya paurvAparyamamuShya te |
shAsituM yena mAM dharmaM munibhistulyamichChasi || 11\.42||

avij~nAtaprabandhasya vacho vAchaspateriva |
vrajatyaphalatAmeva nayadruha ivehitam || 11\.43||

shreyaso.apyasya te tAta vachaso nAsmi bhAjanam |
nabhasaH sphuTatArasya rAtreriva viparyayaH || 11\.44||

kShatriyastanayaH pANDorahaM pArtho dhanaMjayaH |
sthitaH prAstasya dAyAdairbhrAturjyeShThasya shAsane || 11\.45||

kR^iShNadvaipAyanAdeshAd bibharmi vratamIdR^isham |
bhR^ishamArAdhane yattaH svArAdhyasya marutvataH || 11\.46||

durakShAn dIvyatA rAj~nA rAjyamAtmA vayaM vadhUH |
nItAni paNatAM nUnamIdR^ishI bhavitavyatA || 11\.47||

tenAnujasahAyena draupadyA cha mayA vinA |
bhR^ishamAyAmiyAmAsu yAminIShvabhitapyate || 11\.48||

hR^itottarIyAM prasabhaM sabhAyAmAgatahriyaH |
marmachChidA no vachasA niratakShann arAtayaH || 11\.49||

upAdhatta sapatneShu kR^iShNAyA gurusaMnidhau |
bhAvamAnayane satyAH satyaMkAramivAntakaH || 11\.50||

tAmaikShanta kShaNaM sabhyA duHshAsanapuraHsarAm |
abhisAyArkamAvR^ittAM ChAyAmiva mahAtaroH || 11\.51||

ayathArthakriyArambhaiH patibhiH kiM tavekShitaiH |
arudhyetAmitIvAsyA nayane bAShpavAriNe || 11\.52||

soDhavAn no dashAmantyAM jyAyAn eva guNapriyaH |
sulabho hi dviShAM bha~Ngo durlabhA satsvavAchyatA || 11\.53||

sthityatikrAntibhIrUNi svachChAnyAkulitAnyapi |
toyAni toyarAshInAM manAMsi cha manasvinAm || 11\.54||

dhArtarAShTraiH saha prItirvairamasmAsvasUyata |
asanmaitrI hi doShAya kUlachChAyeva sevitA || 11\.55||

apavAdAd abhItasya samasya guNadoShayoH |
asadvR^itterahovR^ittaM durvibhAvaM vidheriva || 11\.56||

dhvaMseta hR^idayaM sadyaH paribhUtasya me paraiH |
yadyamarShaH pratIkAraM bhujAlambaM na lambhayet || 11\.57||

avadhUyAribhirnItA hariNaistulyavR^ittitAm |
anyonyasyApi jihrImaH kiM punaH sahavAsinAm || 11\.58||

shaktivaikalyanamrasya niHsAratvAllaghIyasaH |
janmino mAnahinasya tR^iNasya cha samA gatiH || 11\.59||

ala~NghyaM tat tad udvIkShya yad yad uchchairmahIbhR^itAm |
priyatAM jyAyasIM mA gAn mahatAM kena tu~NgatA || 11\.60||

tAvad AshrIyate lakShmyA tAvad asya sthiraM yashaH |
puruShastAvad evAsau yAvan mAnAn na hIyate || 11\.61||

sa pumAn arthavaj janmA yasya nAmni puraHsthite |
nAnyAma~Ngulimabhyeti saMkhyAyAmudyatA~NguliH || 11\.62||

durAsadavanajyAyAn gamyastu~Ngo.api bhUdharaH |
na jahAti mahaujaskaM mAnaprAMshumala~NghyatA || 11\.63||

gurUn kurvanti te vaMshyAn anvarthA tairvasuMdharA |
yeShAM yashAMsi shubhrANi hrepayantIndumaNDalam || 11\.64||

udAharaNamAshIHShu prathame te manasvinAm |
shuShke.ashanirivAmarSho yairarAtiShu pAtyate || 11\.65||

na sukhaM prArthaye nArthamudanvadvIchicha~nchalam |
nAnityatAshanestrasyan viviktaM brahmaNaH padam || 11\.66||

pramArShTumayashaHpa~NkamichCheyaM ChadmanA kR^itam |
vaidhavyatApitArAti vanitAlochanAmbubhiH || 11\.67||

apahasye.athavA sadbhiH pramAdo vAstu me dhiyaH |
asthAnavihitAyAsaH kAmaM jihretu vA bhavAn || 11\.68||

vaMshalakShmImanuddhR^itya samuchChedena vidviShAm |
nirvANamapi manye.ahamantarAyaM jayashriyaH || 11\.69||

ajanmA puruShastAvad gatAsustR^iNameva vA |
yAvan neShubhirAdatte viluptamaribhiryashaH || 11\.70||

anirjayena dviShatAM yasyAmarShaH prashAmyati |
puruShoktiH kathaM tasmin brUhi tvaM hi tapodhana || 11\.71||

kR^itaM puruShashabdena jAtimAtrAvalambinA |
yo.a~NgIkR^itaguNaiH shlAghyaH savismayamudAhR^itaH || 11\.72||

grasamAnamivaujAMsi sadasA gauraveritam |
nAma yasyAbhinandanti dviSho.api sa pumAn pumAn || 11\.73||

yathApratij~naM dviShatAM yudhi pratichikIrShayA |
mamaivAdhyeti nR^ipatistR^iShyann iva jalA~njaleH || 11\.74||

sa vaMshasyAvadAtasya shashA~Nkasyeva lA~nChanam |
kR^ichChreShu vyarthayA yatra bhUyate bharturAj~nayA || 11\.75||

kathaM vAdIyatAmarvA~N munitA dharmarodhinI |
AshramAnukramaH pUrvaiH smaryate na vyatikramaH || 11\.76||

AsaktA dhUriyaM rUDhA jananI dUragA cha me |
tiraskaroti svAtantryaM jyAyAMsh chAchAravAn nR^ipaH || 11\.77||

svadharmamanurundhante nAtikramamarAtibhiH |
palAyante kR^itadhvaMsA nAhavAn mAnashAlinaH || 11\.78||

vichChinnAbhravilAyaM vA vilIye nagamUrdhani |
ArAdhya vA sahasrAkShamayashaHshalyamuddhare || 11\.79||

ityuktavantaM parirabhya dorbhyAM tanUjamAviShkR^itadivyamUrtiH |
aghopaghAtaM maghavA vibhUtyai bhavodbhavArAdhanamAdidesha || 11\.80||

prIte pinAkini mayA saha lokapAlairlokatraye.api vihitAprativAryavIryaH |
lakShmIM samutsukayitAsi bhR^ishaM pareShAmuchchArya vAchamiti tena
tirobabhUve || 11\.81||

\medskip\hrule\medskip
atha vAsavasya vachanena ruchiravadanastrilochanam |
klAntirahitamabhirAdhayituM vidhivat tapAMsi vidadhe dhanaMjayaH || 12\.1||

abhirashmimAli vimalasya dhR^itajayadhR^iteranAshuShaH |
tasya bhuvi bahutithAstithayaH pratijagmurekacharaNaM niShIdataH || 12\.2||

vapurindriyopatapaneShu satatamasukheShu pANDavaH |
vyApa nagapatiriva sthiratAM mahatAM hi dhairyamavibhAvyavaibhavam || 12\.3||

na papAta saMnihitapakti surabhiShu phaleShu mAnasam |
tasya shuchini shishire cha payasyamR^itAyate hi sutapaH sukarmaNAm || 12\.4||

na visismiye na viShasAda muhuralasatAM nu chAdade |
sattvamurudhR^iti rajastamasI na hataH sma tasya hatashaktipelave || 12\.5||

tapasA kR^ishaM vapuruvAha sa vijitajagattrayodayam |
trAsajananamapi tattvavidAM kimivAsti yan na sukaraM manasvibhiH || 12\.6||

jvalato.analAd anunishIthamadhikaruchirambhasAM nidheH |
dhairyaguNamavajayan vijayI dadR^ishe samunnatataraH sa shailataH || 12\.7||

japataH sadA japamupAMshu vadanamabhito visAribhiH |
tasya dashanakiraNaiH shushubhe pariveShabhIShaNamivArkamaNDalam || 12\.8||

kavachaM sa bibhrad upavIta padanihitasajyakArmukaH |
shailapatiriva mahendradhanuH parivItabhImagahano vididyute || 12\.9||

pravivesha gAmiva kR^ishasya niyamasavanAya gachChataH |
tasya padavinamito himavAn gurutAM nayanti hi guNA na saMhatiH || 12\.10||

parikIrNamudyatabhujasya bhuvanavivare durAsadam |
jyotirupari shiraso vitataM jagR^ihe nijAn munidivaukasAM pathaH || 12\.11||

rajanIShu rAjatanayasya bahulasamaye.api dhAmabhiH |
bhinnatimiranikaraM na jahe shashirashmisaMgamayujA nabhaH shriyA || 12\.12||

mahatA mayUkhanichayena shamitaruchi jiShNujanmanA |
hrItamiva nabhasi vItamale na virAjate sma vapuraMshumAlinaH || 12\.13||

tamudIritAruNajaTAMshumadhiguNasharAsanaM janAH |
rudramanuditalalATadR^ishaM dadR^ishurmimanthiShumivAsurIH purIH || 12\.14||

marutAM patiH svid ahimAMshuruta pR^ithushikhaH shikhI tapaH |
taptumasukaramupakramate na jano.ayamityavayaye sa tApasaiH || 12\.15||

na dadAha bhUruhavanAni haritanayadhAma dUragam |
na sma nayati parishoShamapaH susahaM babhUva na cha siddhatApasaiH || 12\.16||

vinayaM guNA iva vivekamapanayabhidaM nayA iva |
nyAyamavadhaya ivAsharaNAH sharaNaM yayuH shivamatho maharShayaH || 12\.17||

parivItamaMshubhirudasta dinakaramayUkhamaNDalaiH |
shambhumupahatadR^ishaH sahasA na cha te nichAyitumabhiprasehire || 12\.18||

atha bhUtabhavyabhavadIshamabhimukhayituM kR^itastavAH |
tatra mahasi dadR^ishuH puruShaM kamanIyavigrahamayugmalochanam || 12\.19||

kakude vR^iShasya kR^itabAhumakR^ishapariNAhashAlini |
sparshasukhamanubhavantamumA kuchayugmamaNDala ivArdrachandane || 12\.20||

sthitamunnate tuhinashaila shirasi bhuvanAtivartinA |
sAdrijaladhijalavAhapathaM sadigashnuvAnamiva vishvamojasA || 12\.21||

anujAnumadhyamavasakta vitatavapuShA mahAhinA |
lokamakhilamiva bhUmibhR^itA ravitejasAmavadhinAdhiveShTitam || 12\.22||
pariNAhinA tuhinarAshi vishadamupavItasUtratAm |
nItamuragamanura~njayatA shitinA galena vilasanmarIchinA || 12\.23||

plutamAlatIsitakapAla kamudamuparuddhamUrdhajam |
sheShamiva surasaritpayasAM shirasA visAri shashidhAma bibhratam || 12\.24||

munayastato.abhimukhametya nayanavinimeShanoditAH |
pANDutanayatapasA janitaM jagatAmasharma bhR^ishamAchachakShire || 12\.25||

tarasaiva ko.api bhuvanaika puruSha puruShastapasyati |
jyotiramalavapuSho.api raverabhibhUya vR^itra iva bhImavigrahaH || 12\.26||

sa dhanurmaheShudhi nibharti kavachamasitamuttamaM jaTAH |
valkamajinamiti chitramidaM munitAvirodhi na cha nAsya rAjate || 12\.27||

chalane.avanish chalati tasya karaNaniyame sadi~Nmukham |
stambhamanubhavati shAntamarud grahatArakAgaNayutaM nabhastalam || 12\.28||

sa tadojasA vijitasAramamaraditijopasaMhitam |
vishvamidamapidadhAti purA kimivAsti yan na tapasAmaduShkaram || 12\.29||

vijigIShate yadi jaganti yugapad atha saMjihIrShati |
prAptumabhavamabhivA~nChati vA vayamasya no viShahituM kShamA ruchaH || 12\.30||

kimupekShase kathaya nAtha na tava viditaM na kiMchana |
trAtumalamabhayadArhasi nastvayi mA sma shAsati bhavatparAbhavaH || 12\.31||

iti gAM vidhAya virateShu muniShu vachanaM samAdade |
bhinnajaladhijalanAdaguru dhvanayan dishAM vivaramandhakAntakaH || 12\.32||

badarItapovananivAsa niratamavagAta mAnyathA |
dhAturudayanidhane jagatAM naramaMshamAdipuruShasya gAM gatam || 12\.33||

dviShataH parAsisiShureSha sakalabhuvanAbhitApinaH |
krAntakulishakaravIryabalAn madupAsanaM vihitavAn mahat tapaH || 12\.34||

ayamachyutash cha vachanena sarasiruhajanmanaH prajAH |
pAtumasuranidhanena vibhU bhuvamabhyupetya manujeShu tiShThataH || 12\.35||

surakR^ityametad avagamya nipuNamiti mUkadAnavaH |
hantumabhipatati pANDusutaM tvarayA tad atra saha gamyatAM mayA || 12\.36||

vivare.api nainamanigUDhamabhibhavitumeSha pArayan |
pApaniratiravisha~NkitayA vijayaM vyavasyati varAhamAyayA || 12\.37||

nihate viDambitakirAta nR^ipativapuShA ripau mayA |
muktanishitavishikhaH prasabhaM mR^igayAvivAdamayamAchariShyati || 12\.38||

tapasA nipIDitakR^ishasya virahitasahAyasampadaH |
sattvavihitamatulaM bhujayorbalamasya pashyata mR^idhe.adhikupyataH || 12\.39||

iti tAn udAramanunIya viShamaharichandanAlinA |
gharmajanitapulakena lasad gajamauktikAvaliguNena vakShasA || 12\.40||

vadanena puShpitalatAnta niyamitavilambitamaulinA |
bibhrad aruNanayanena ruchaM shikhipichChalA~nChitakapolabhittinA || 12\.41||

bR^ihadudvaha~n jaladanAdi dhanurupahitaikamArgaNam |
meghanichaya iva saMvavR^ite ruchiraH kirAtapR^itanApatiH shivaH || 12\.42||

anukUlamasya cha vichintya gaNapatibhirAttavigrahaiH |
shUlaparashusharachApabhR^itairmahatI vanecharachamUrvinirmame || 12\.43||

virachayya kAnanavibhAgamanugiramatheshvarAj~nayA |
bhImaninadapihitorubhuvaH parito.apadishya mR^igayAM pratasthire || 12\.44||

kShubhitAbhiniHsR^itavibhinna shakunimR^igayUthaniHsvanaiH |
pUrNapR^ithuvanaguhAvivaraH sahasA bhayAd iva rarAsa bhUdharaH || 12\.45||

na virodhinI ruShamiyAya pathi mR^igaviha~NgasaMhatiH |
ghnanti sahajamapi bhUribhiyaH samamAgatAH sapadi vairamApadaH || 12\.46||

chamarIgaNairgaNabalasya balavati bhaye.apyupasthite |
vaMshavitatiShu viShaktapR^ithu priyabAlavAladhibhirAdade dhR^itiH || 12\.47||

harasainikAH pratibhaye.api gajamadasugandhikesaraiH |
svasthamabhidadR^ishire sahasA pratibodhajR^imbhamukhairmR^igAdhipaiH || 12\.48||

bibharAMbabhUvurapavR^itta jaTharashapharIkulAkulAH |
pa~NkaviShamitataTAH saritaH karirugNachandanarasAruNaM payaH || 12\.49||

mahiShakShatAgurutamAla naladasurabhiH sadAgatiH |
vyastashukanibhashilAkusumaH praNudan vavau vanasadAM parishramam || 12\.50||

mathitAmbhaso rayavikIrNa mR^iditakadalIgavedhukAH |
klAntajalaruhalatAH sarasIrvidadhe nidAgha iva sattvasamplavaH || 12\.51||

iti chAlayann achalasAnu vanagahanajAn umApatiH |
prApa muditahariNIdashana kShatavIrudhaM vasatimaindrasUnavIm || 12\.52||

sa tamAsasAda ghananIlamabhimukhamupasthitaM muneH |
pitranikaShaNavibhinnabhuvaM danujaM dadhAnamatha saukaraM vapuH || 12\.53||

kachChAnte surasarito nidhAya senAmanvatiH sakatipayaiH kirAtavaryaiH |
prachChannastarugahanaiH sagulmajAlairlakShmIvAn anupadamasya sampratasthe
|| 12\.54||

\medskip\hrule\medskip
vapuShAM parameNa bhUdharANAmatha sambhAvyaparAkramaM vibhede |
mR^igamAshu vilokayAMchakAra sthiradaMShTrogramukhaM mahendrasUnuH || 13\.1||

sphuTabaddhasaTonnatiH sa dUrAd abhidhAvann avadhIritAnyakR^ityaH |
jayamichChati tasya jAtasha~Nke manasImaM muhurAdade vitarkam || 13\.2||

ghanapotravidIrNashAlamUlo nibiDaskandhanikASharugNavapraH |
ayamekacharo.abhivartate mAM samarAyeva samAjuhUShamANaH || 13\.3||

iha vItabhayAstaponubhAvAj jahati vyAlamR^igAH pareShu vR^ittim |
mayi tAM sutarAmayaM vidhatte vikR^itiH kiM nu bhaved iyaM nu mAyA || 13\.4||

athavaiSha kR^itaj~nayeva pUrvaM bhR^ishamAsevitayA ruShA na muktaH |
avadhUya virodhinIH kimArAn mR^igajAtIrabhiyAti mAM javena || 13\.5||

na mR^igaH khalu ko.apyayaM jighAMsuH skhalati hyatra tathA bhR^ishaM mano
me |
vimalaM kaluShIbhavachcha chetaH kathayatyeva hitaiShiNaM ripuM vA || 13\.6||

munirasmi nirAgasaH kuto me bhayamityeSha na bhUtaye.abhimAnaH |
paravR^iddhiShu baddhamatsarANAM kimiva hyasti durAtmanAmala~Nghyam || 13\.7||

danujaH svid ayaM kShapAcharo vA vanaje neti balaM bad asti sattve |
abhibhUya tathA hi meghanIlaH sakalaM kampayatIva shailarAjam || 13\.8||

ayameva mR^igavyasattrakAmaH prahariShyan mayi mAyayA shamasthe |
pR^ithubhirdhvajinIsravairakArShIchchakitodbhrAntamR^igANi kAnanAni || 13\.9||

bahushaH kR^itasatkR^itervidhAtuM priyamichChann athavA suyodhanasya |
kShubhitaM vanagocharAbhiyogAd gaNamAshishriyad AkulaM tirashchAm || 13\.10||

avalIDhasanAbhirashvasenaH prasabhaM khANDavajAtavedasA vA |
pratikartumupAgataH samanyuH kR^itamanyuryadi vA vR^ikodareNa || 13\.11||

balashAlitayA yathA tathA vA dhiyamuchChedaparAmayaM dadhAnaH |
niyamena mayA nibarhaNIyaH paramaM lAbhamarAtibha~NgamAhuH || 13\.12||

kuru tAta tapAMsyamArgadAyI vijayAyetyalamanvashAn munirmAm |
balinash cha vadhAd R^ite.asya shakyaM vrasaMrakShaNamanyathA na kartum || 13\.13||

iti tena vichintya chApanAma prathamaM pauruShachihnamAlalambe |
upalabdhaguNaH parasya bhede sachivaH shuddha ivAdade cha bANaH || 13\.14||

anubhAvavatA guru sthiratvAd avisaMvAdi dhanurdhanaMjayena |
svabalavyasane.api pIDyamAnaM guNavan mitramivAnatiM prapede || 13\.15||

pravikarShaninAdabhinnarandhraH padaviShTambhanipIDitastadAnIm |
adhirohati gANDivaM maheShau sakalaH saMshayamAruroha shailaH || 13\.16||

dadR^ishe.atha savismayaM shivena sthirapUrNAyatachApamaNDalasthaH |
rachitastisR^iNAM purAM vidhAtuM vadhamAtmeva bhayAnakaH pareShAm || 13\.17||

vichakarSha cha saMhiteShuruchchaish charaNAskandananAmitAchalendraH |
dhanurAyatabhogavAsukijyA vadanagranthivimuktavahni shambhuH || 13\.18||

sa bhavasya bhavakShayaikahetoH sitasaptesh cha vidhAsyatoH sahArtham |
ripurApa parAbhavAya madhyaM prakR^itipratyayayorivAnubandhaH || 13\.19||

atha dIpitavArivAhavartmA ravavitrAsitavAraNAd avAryaH |
nipapAta javAdiShu pinAkAn mahato.abhrAd iva vaidyutaH kR^ishAnuH || 13\.20||

vrajato.asya bR^ihat patattrajanmA kR^itatArkShyopanipAtavegasha~NkaH |
pratinAdamahAn mahoragANAM hR^idayashrotrabhid utpapAta nAdaH || 13\.21||

nayanAd iva shUlinaH pravR^ittairmanaso.apyAshutaraM yataH pisha~NgaiH |
vidadhe vilasattaDillatAbhaiH kiraNairvyomani mArgaNasya mArgaH || 13\.22||

apayan dhanuShaH shivAntikasthairvivaresadbhirabhikhyayA jihAnaH |
yugapad dadR^ishe vishan varAhaM tadupoDhaish cha nabhashcharaiH pR^iShatkaH
|| 13\.23||

sa tamAlanibhe ripau surANAM ghananIhAra ivAviShaktavegaH |
bhayaviplutamIkShito nabhaHsthairjagatIM grAha ivApagAM jagAhe || 13\.24||

sapadi priyarUpaparvarekhaH sitalohAgranakhaH khamAsasAda |
kupitAntakatarjanA~NgulishrIrvyathayan prANabhR^itaH kapidhvajeShu || 13\.25||

paramAstraparigrahorutejaH sphuradulkAkR^iti vikShipan vaneShu |
sa javena patan paraHshatAnAM patatAM vrAta ivAravaM vitene || 13\.26||

avibhAvitaniShkramaprayANaH shamitAyAma ivAtiraMhasA saH |
saha pUrvataraM nu chittavR^itterapatitvA nu chakAra lakShyabhedam || 13\.27||

sa vR^iShadhvajasAyakAvabhinnaM jayahetuH pratikAyameShaNIyam |
laghu sAdhayituM sharaH prasehe vidhinevArthamudIritaM prayatnaH || 13\.28||

avivekavR^ithAshramAvivArthaM kShayalobhAviva saMshritAnurAgam |
vijigIShumivAnayapramAdAvavasAdaM vishikhau vininyatustam || 13\.29||

atha dIrghatamaM tamaH pravekShyan sahasA rugNrayaH sa sambhrameNa |
nipatantamivoShNarashmimurvyAM valayIbhUtataruM dharAM cha mene || 13\.30||

sa gataH kShitimuShNashoNitArdraH khuradaMShTrAgranipAtadAritAshmA |
asubhiH kShaNamIkShitendrasUnirvihitAmarShagurudhvanirnirAse || 13\.31||

sphuTapauruShamApapAta pArthastamatha prAjyasharaH sharaM jighR^ikShuH |
na tathA kR^itavedinAM kariShyan priyatAmeti yathA kR^itAvadAnaH || 13\.32||

upakAra ivAsati prayuktaH sthitimaprApya mR^ige gataH praNAsham |
kR^itashaktiravA~Nmukho gurutvAj janitavrIDa ivAtmapauruSheNa || 13\.33||

sa samuddharatA vichintya tena svaruchaM kIrtimivottamAM dadhAnaH |
anuyukta iva svavArtamuchchaiH parirebhe nu bhR^ishaM vilochanAbhyAm || 13\.34||

tatra kArmukabhR^itaM mahAbhujaH pashyati sma sahasA vanecharam |
saMnikAshayitumagrataH sthitaM shAsanaM kusumachApavidviShaH || 13\.35||

sa prayujya tanaye mahIpaterAtmajAtisadR^ishIM kilAnatim |
sAntvapUrvamabhinItihetukaM vaktumitthamupachakrame vachaH || 13\.36||

shAntatA vinayayogi mAnasaM bhUridhAma vimalaM tapaH shrutam |
prAha te nu sadR^ishI divaukasAmanvavAyamavadAtamAkR^itiH || 13\.37||

dIpitastvamanubhAvasampadA gauraveNa laghayan mahIbhR^itaH |
rAjase munirapIha kArayann Adhipatyamiva shAtamanyavam || 13\.38||

tApaso.api vibhutAmupeyivAn AspadaM tvamasi sarvasampadAm |
dR^ishyate hi bhavato vinA janairanvitasya sachivairiva dyutiH || 13\.39||

vismayaH ka iva vA jayashriyA naiva muktirapi te davIyasI |
Ipsitasya na bhaved upAshrayaH kasya nirjitarajastamoguNaH || 13\.40||

hrepayann ahimatejasaM tviShA sa tvamitthamupapannapauruShaH |
hartumarhasi varAhabhedinaM nainamasmadadhipasya sAyakam || 13\.41||

smaryate tanubhR^itAM sanAtanaM nyAyyamAcharitamuttamairnR^ibhiH |
dhvaMsate yadi bhavAdR^ishastataH kaH prayAtu vada tena vartmanA || 13\.42||

AkumAramupadeShTumichChavaH saMnivR^ittimapathAn mahApadaH |
yogashaktijitajanmamR^ityavaH shIlayanti yatayaH sushIlatAm || 13\.43||

tiShThatAM tapasi puNyamAsajan sampado.anuguNayan sukhaiShiNAm |
yoginAM pariNaman vimuktaye kena nAstu vinayaH satAM priyaH || 13\.44||

nUnamatrabhavataH sharAkR^itiM sarvathAyamanuyAti sAyakaH |
so.ayamityanupapannasaMshayaH kAritastvamapathe padaM yayA || 13\.45||

anyadIyavishikhe na kevalaM niHspR^ihasya bhavitavyamAhR^ite |
nighnataH paranibarhitaM mR^igaM vrIDitavyamapi te sachetasaH || 13\.46||

saMtataM nishamayanta utsukA yaiH prayAnti mudamasya sUrayaH |
kIrtitAni hasite.api tAni yaM vrIDayanti charitAni mAninam || 13\.47||

anyadoShamiva saH svakaM guNaM khyApayet kathamadhR^iShTatAjaDaH |
uchyate sa khalu kAryavattayA dhig vibhinnabudhasetumarthitAm || 13\.48||

durvachaM tad atha mA sma bhUn mR^igastvAvasau yad akariShyad ojasA |
nainamAshu yadi vAhinIpatiH pratyapatsyata shitena pattriNA || 13\.49||
ko nvimaM haritura~NgamAyudha stheyasIM dadhatama~NgasaMhatim |
vegavattaramR^ite chamUpaterhantumarhati shareNa daMShTriNam || 13\.50||

mitramiShTamupakAri saMshaye medinIpatirayaM tathA cha te |
taM virodhya bhavatA nirAsi mA sajjanaikavasatiH kR^itaj~natA || 13\.51||

labhyamekasukR^itena durlabhA rakShitAramasurakShyabhUtayaH |
svantamantavirasA jigIShatAM mitralAbhamanu lAbhasampadaH || 13\.52||

cha~nchalaM vasu nitAntamunnatA medinImapi harantyarAtayaH |
bhUdharasthiramupeyamAgataM mAvamaMsta suhR^idaM mahIpatim || 13\.53||

jetumeva bhavatA tapasyate nAyudhAni dadhate mumukShavaH |
prApsyate cha sakalaM mahIbhR^itA saMgatena tapasaH phalaM tvayA || 13\.54||

vAjibhUmiribharAjakAnanaM santi ratnanichayAsh cha bhUrishaH |
kA~nchanena kimivAsya pattriNA kevalaM na sahate vila~Nghanam || 13\.55||

sAvalepamupalipsate parairabhyupaiti vikR^itiM rajasyapi |
arthitastu na mahAn samIhate jIvitaM kimu dhanaM dhanAyitum || 13\.56||

tat tadIyavishikhAtisarjanAd astu vAM guru yadR^ichChayAgatam |
rAghavaplavagarAjayoriva prema yuktamitaretarAshrayam || 13\.57||

nAbhiyoktumanR^itaM tvamiShyate kastapasvivishikheShu chAdaraH |
santi bhUbhR^iti sharA hi naH pare ye parAkramavasUni vajriNaH || 13\.58||

mArgaNairatha tava prayojanaM nAthase kimu patiM na bhUbhR^itaH |
tvadvidhaM suhR^idametya sa arthinaM kiM na yachChati vijitya medinIm || 13\.59||

tena sUrirupakAritAdhanaH kartumichChati na yAchitaM vR^ithA |
sIdatAmanubhavann ivArthinAM veda yat praNayabha~NgavedanAm || 13\.60||

shaktirarthapatiShu svayaMgrahaM prema kArayati vA niratyayam |
kAraNadvayamidaM nirasyataH prArthanAdhikabale vipatphalA || 13\.61||

astravedamadhigamya tattvataH kasya cheha bhujavIryashAlinaH |
jAmadagnyamapahAya gIyate tApaseShu charitArthamAyudham || 13\.62||

abhyaghAni munichApalAt tvayA yan mR^igaH kShitipateH parigrahaH |
akShamiShTa tad ayaM pramAdyatAM saMvR^iNoti khalu doShamaj~natA || 13\.63||

janmaveShatapasAM virodhinIM mA kR^ithAH punaramUmapakriyAm |
Apad etyubhayalokadUShaNI vartamAnamapathe hi durmatim || 13\.64||

yaShTumichChasi pitRRIn na sAmprataM saMvR^ito.archichayiShurdivaukasaH |
dAtumeva padavImapi kShamaH kiM mR^ige.a~Nga vishikhaM nyavIvishaH || 13\.65||

sajjano.asi vijahIhi chApalaM sarvadA ka iva vA sahiShyate |
vAridhIn iva yugAntavAyavaH kShobhayantyanibhR^itA gurUn api || 13\.66||

astravedavid ayaM mahIpatiH parvatIya iti mAvajIgaNaH |
gopituM bhuvamimAM marutvatA shailavAsamanunIya lambhitaH || 13\.67||

tat titikShitamidaM mayA munerityavochata vachash chamUpatiH |
bANamatrabhavate nijaM dishann Apnuhi tvamapi sarvasampadaH || 13\.68||

AtmanInamupatiShThate guNAH sambhavanti viramanti chApadaH |
ityanekaphalabhAji mA sma bhUd arthitA kathamivAryasaMgame || 13\.69||

dR^ishyatAmayamanokahAntare tigmahetipR^itanAbhiranvitaH |
sAhivIchiriva sindhuruddhato bhUpatiH samayasetuvAritaH || 13\.70||

sajyaM dhanurvahati yo.ahipatisthavIyaH stheyA~n jayan
haritura~NgamaketulakShmIm |
asyAnukUlaya matiM matimann anena sakhyA sukhaM samabhiyAsyasi chintitAni || 13\.71||

\medskip\hrule\medskip
tataH kirAtasya vachobhiruddhataiH parAhataH shaila ivArNavAmbubhiH |
jahau na dhairyaM kupito.api pANDavaH sudurgrahAntaHkaraNA hi sAdhavaH || 14\.1||

saleshamulli~NgitashAtrave~NgitaH kR^itI girAM vistaratattvasaMgrahe |
ayaM pramANIkR^itakAlasAdhanaH prashAntasaMrambha ivAdade vachaH || 14\.2||

viviktavarNAbharaNA sukhashrutiH prasAdayantI hR^idayAnyapi dviShAm |
pravartate nAkR^itapuNyakarmaNAM prasannagambhIrapadA sarasvatI || 14\.3||

bhavanti te sabhyatamA vipashchitAM manogataM vAchi niveshayanti ye |
nayanti teShvapyupapannanaipuNA gambhIramarthaM katichit prakAshatAm || 14\.4||

stuvanti gurvImabhidheyasampadaM vishuddhimukterapare vipashchitaH |
iti sthitAyAM pratipUruShaM ruchau sudurlabhAH sarvamanoramA giraH || 14\.5||

samasya sampAdayatA guNairimAM tvayA samAropitabhAra bhAratIm |
pragalbhamAtmA dhuri dhurya vAgminAM vanachareNApi satAdhiropitaH || 14\.6||

prayujya sAmAcharitaM vilobhanaM bhayaM vibhedAya dhiyaH pradarshitam |
tathAbhiyuktaM cha shilImukhArthinA yathetaran nyAyyamivAvabhAsate || 14\.7||

virodhi siddheriti kartumudyataH sa vAritaH kiM bhavatA na bhUpatiH |
hite niyojyaH khalu bhUtimichChatA sahArthanAshena nR^ipo.anujIvinA || 14\.8||

dhruvaM praNAshaH prahitasya pattriNaH shilochchaye tasya vimArgaNaM nayaH |
na yuktamatrAryajanAtila~NghanaM dishatyapAyaM hi satAmatikramaH || 14\.9||

atItasaMkhyA vihitA mamAgninA shilAmukhAH khANDavamattumichChatA |
anAdR^itasyAmarasAyakeShvapi sthitA kathaM shailajanAshuge dhR^itiH || 14\.10||

yadi pramANIkR^itamAryacheShTitaM kimityadoSheNa tiraskR^itA vayam |
ayAtapUrvA parivAdagocharaM satAM hi vANI guNameva bhAShate || 14\.11||

guNApavAdena tadanyaropaNAd bhR^ishAdhirUDhasya sama~njasaM janam |
dvidheva kR^itvA hR^idayaM nigUhataH sphurad asAdhorvivR^iNoti vAgasiH || 14\.12||

vanAshrayAH kasya mR^igAH parigrahAH shR^iNAti yastAn prasabhena tasya te |
prahIyatAmatra nR^ipeNa mAnitA na mAnitA chAsti bhavanti cha shriyaH || 14\.13||

na vartma kasmaichid api pradIyatAmiti vrataM me vihitaM maharShiNA |
jighAMsurasmAn nihato mayA mR^igo vratAbhirakShA hi satAmalaMkriyA || 14\.14||

mR^igAn vinighnan mR^igayuH svahetunA kR^itopakAraH kathamichChatAM tapaH |
kR^ipeti ched astu mR^igaH kShataH kShaNAd anena pUrvaM na mayeti kA gatiH || 14\.15||

anAyudhe sattvajighAMsite munau kR^ipeti vR^ittirmahatAmakR^itrimA |
sharAsanaM bibhrati sajyasAyakaM kR^itAnukampaH sa kathaM pratIyate || 14\.16||

atho sharastena madarthamujjhitaH phalaM cha tasya pratikAyasAdhanam |
avikShate tatra mayAtmasAtkR^ite kR^itArthatA nanvadhikA chamUpateH || 14\.17||

yad Attha kAmaM bhavatA sa yAchyatAmiti kShamaM naitad analpachetasAm |
kathaM prasahyAharaNaiShiNAM priyaH parAvanatyA malinIkR^itAH shriyaH || 14\.18||

abhUtamAsajya viruddhamIhitaM balAd alabhyaM tava lipsate nR^ipaH |
vijAnato.api hyanayasya raudratAM bhavatyapAye parimohinI matiH || 14\.19||

asiH sharA varma dhanush cha nochchakairvivichya kiM prArthitamIshvareNa te
|
athAsti shaktiH kR^itameva yAch~nayA na dUShitaH shaktimatAM svayaMgrahaH || 14\.20||

sakhA sa yuktaH kathitaH kathaM tvayA yadR^ichChayAsUyati yastapasyate |
guNArjanochChrAyaviruddhabuddhayaH prakR^ityamitrA hi satAmasAdhavaH || 14\.21||

vayaM kva varNAshramarakShaNochitAH kva jAtihInA mR^igajIvitachChidaH |
sahApakR^iShTairmahatAM na saMgataM bhavanti gomAyusakhA na dantinaH || 14\.22||

paro.avajAnAti yad aj~natAjaDastad unnatAnAM na vihanti dhIratAm |
samAnavIryAnvayapauruSheShu yaH karotyatikrAntimasau tiraskriyA || 14\.23||

yadA vigR^ihNAti hataM tadA yashaH karoti maitrImatha dUShitA guNAH |
sthitiM samIkShyobhayathA parIkShakaH karotyavaj~nopahataM pR^ithagjanam || 14\.24||

mayA mR^igAn hanturanena hetunA viruddhamAkShepavachastitikShitam |
sharArthameShyatyatha lapsyate gatiM shiromaNiM dR^iShTiviShAj
jighR^ikShataH || 14\.25||

itIritAkUtamanIlavAjinaM jayAya dUtaH pratitarjya tejasA |
yayau samIpaM dhvajinImupeyuShaH prasannarUpasya virUpachakShuShaH || 14\.26||

tato.apavAdena patAkinIpatesh chachAla nirhrAdavatI mahAchamUH |
yugAntavAtAbhihateva kurvatI ninAdamambhonidhivIchisaMhatiH || 14\.27||

raNAya jaitraH pradishann iva tvarAM tara~NgitAlambitaketusaMtatiH |
puro balAnAM saghanAmbushIkaraH shanaiH pratasthe surabhiH samIraNaH || 14\.28||

jayAravakShveDitanAdamUrChitaH sharAsanajyAtalavAraNadhvaniH |
asambhavanbhUdhararAjakukShiShu prakampayan gAmavatastare dishaH || 14\.29||

nishAtaraudreShu vikAsatAM gataiH pradIpayadbhiH kakubhAmivAntaram |
vanesadAM hetiShu bhinnavigrahairvipusphure rashmimato marIchibhiH || 14\.30||

udUDhavakShaHsthagitaikadi~Nmukho vikR^iShTavisphAritachApamaNDalaH |
vitatya pakShadvayamAyataM babhau vibhurguNAnAmuparIva madhyagaH || 14\.31||

sugeShu durgeShu cha tulyavikramairjavAd ahaMpUrvikayA yiyAsubhiH |
gaNairavichChedaniruddhamAbabhau vanaM niruchChvAsamivAkulAkulam || 14\.32||

tirohitashvabhraniku~ncharodhasaH samashnuvAnAH sahasAtiriktatAm |
kirAtasainyairapidhAya rechitA bhuvaH kShaNaM nimnatayeva bhejire || 14\.33||

pR^ithUruparyastabR^ihallatAtatirjavAnilAghUrNitashAlachandanA |
gaNAdhipAnAM paritaH prasAriNI vanAnyavA~nchIva chakAra saMhatiH || 14\.34||

tataH sadarpaM pratanuM tapasyayA madasrutikShAmamivaikavAraNam |
parijvalantaM nidhanAya bhUbhR^itAM dahantamAshA iva jAtavedasam || 14\.35||

anAdaropAttadhR^itaikasAyakaM jaye.anukUle suhR^idIva saspR^iham |
shanairapUrNapratikArapelave niveshayantaM nayane balodadhau || 14\.36||

niShaNNamApatpratikArakAraNe sharAsane dhairya ivAnapAyini |
ala~NghanIyaM prakR^itAvapi sthitaM nivAtaniShkampamivApagApatim || 14\.37||

upeyuShIM bibhratamantakadyutiM vadhAd adUre patitasya daMShTriNaH |
puraH samAveshitasatpashuM dvijaiH patiM pashUnAmiva hUtamadhvare || 14\.38||

nijena nItaM vijitAnyagauravaM gabhIratAM dhairyaguNena bhUyasA |
vanodayeneva ghanoruvIrudhA samandhakArIkR^itamuttamAchalam || 14\.39||

maharShabhaskandhamanUnakaMdharaM bR^ihachChilAvapraghanena vakShasA |
samujjihIrShuM jagatIM mahAbharAM mahAvarAhaM mahato.arNavAd iva || 14\.40||

harinmaNishyAmamudagravigrahaM prakAshamAnaM paribhUya dehinaH |
manuShyabhAve puruShaM purAtanaM sthitaM jalAdarsha ivAMshumAlinam || 14\.41||

gurukriyArambhaphalairalaMkR^itaM gatiM pratApasya jagatpramAthinaH |
gaNAH samAseduranIlavAjinaM tapAtyaye toyaghanA ghanA iva || 14\.42||

yathAsvamAshaMsitavikramAH purA muniprabhAvakShatatejasaH pare |
yayuH kShaNAd apratipattimUDhatAM mahAnubhAvaH pratihanti pauruSham || 14\.43||

tataH prajahre samameva tatra tairapekShitAnyonyabalopapattibhiH |
mahodayAnAmapi saMghavR^ittitAM sahAyasAdhyAH pradishanti siddhayaH || 14\.44||

kirAtasainyAd uruchApanoditAH samaM samutpeturupAttaraMhasaH |
mahAvanAd unmanasaH khagA iva pravR^ittapattradhvanayaH shilImukhAH || 14\.45||

gabhIrarandhreShu bhR^ishaM mahIbhR^itaH pratisvanairunnamitena sAnuShu |
dhanurninAdena javAd upeyuShA vibhidyamAnA iva dadhvanurdishaH || 14\.46||

vidhUnayantI gahanAni bhUruhAM tirohitopAntanabhodigantarA |
mahIyasI vR^iShTirivAnileritA ravaM vitene gaNamArgaNAvaliH || 14\.47||

trayIm R^itUnAmanilAshinaH sataH prayAti poShaM vapuShi prahR^iShyataH |
raNAya jiShNorviduSheva satvaraM ghanatvamIye shithilena varmaNA || 14\.48||

patatsu shastreShu vitatya rodasI samantatastasya dhanurdudhUShataH |
saroShamulkeva papAta bhIShaNA baleShu dR^iShTirvinipAtashaMsinI || 14\.49||

dishaH samUhann iva vikShipann iva prabhAM raverAkulayann ivAnilam |
munish chachAla kShayakAladAruNaH kShitiM sashailAM chalayann iveShubhiH || 14\.50||

vimuktamAshaMsitashatrunirjayairanekamekAvasaraM vanecharaiH |
sa nirjaghAnAyudhamantarA sharaiH kriyAphalaM kAla ivAtipAtitaH || 14\.51||

gataiH pareShAmavibhAvanIyatAM nivArayadbhirvipadaM vidUragaiH |
bhR^ishaM babhUvopachito bR^ihatphalaiH sharairupAyairiva pANDunandanaH || 14\.52||

divaH pR^ithivyAH kakubhAM nu maNDalAt patanti bimbAd uta tigmatejasaH |
sakR^id vikR^iShTAd atha kArmukAn muneH sharAH sharIrAd iti te.abhimenire || 14\.53||

gaNAdhipAnAmavidhAya nirgataiH parAsutAM marmavidAraNairapi |
javAd atIye himavAn adhomukhaiH kR^itAparAdhairiva tasya pattribhiH || 14\.54||

dviShAM kShatIryAH prathame shilAmukhA vibhidya dehAvaraNAni chakrire |
na tAsu pete vishikhaiH punarmuneraruMtudatvaM mahatAM hyagocharaH || 14\.55||

samujjhitA yAvadarAti niryatI sahaiva chApAn munibANasaMhatiH |
prabhA himAMshoriva pa~NkajAvaliM ninAya saMkochamumApatesh chamUm || 14\.56||

ajihmamojiShThamamoghamaklamaM kriyAsu bahvIShu pR^itha~N niyojitam |
prasehire sAdayituM na sAditAH sharaughamutsAhamivAsya vidviShaH || 14\.57||

shivadhvajinyaH pratiyodhamagrataH sphurantamugeShumayUkhamAlinam |
tamekadeshasthamanekadeshagA nidadhyurarkaM yugapat prajA iva || 14\.58||

muneH sharaugheNa tadugraraMhasA balaM prakopAd iva viShvag AyatA |
vidhUnitaM bhrAntimiyAya sa~NginIM mahAnileneva nidAghajaM rajaH || 14\.59||
tapobalenaiSha vidhAya bhUyasIstanUradR^ishyAH svid iShUn nirasyati |
amuShya mAyAvihataM nihanti naH pratIpamAgatya kimu svamAyudham || 14\.60||

hR^itA guNairasya bhayena vA munestirohitAH svit praharanti devatAH |
kathaM nvamI saMtatamasya sAyakA bhavantyaneke jaladherivormayaH || 14\.61||

jayena kachchid viramed ayaM raNAd bhaved api svasti charAcharAya vA |
tatApa kIrNA nR^ipasUnumArgaNairiti pratarkAkulitA patAkinI || 14\.62||

amarShiNA kR^ityamiva kShamAshrayaM madoddhateneva hitaM priyaM vachaH |
balIyasA tad vidhineva pauruShaM balaM nirastaM na rarAja jiShNunA || 14\.63||

pratidishaM plavagAdhipalakShmaNA vishikhasaMhatitApitamUrtibhiH |
ravikaraglapitairiva vAribhiH shivabalaiH parimaNDalatA dadhe || 14\.64||

pravitatasharajAlachChannavishvAntarAle vidhuvati dhanurAvirmaNDalaM
pANDusUnau |
kathamapi jayalakShmIrbhUtabhUtA vihAtuM viShamanayanasenApakShapAtaM
viShehe || 14\.65||

\medskip\hrule\medskip
atha bhUtAni vArtraghna sharebhyastatra tatrasuH |
bheje dishaH parityakta maheShvAsA cha sA chamUH || 15\.1||

apashyadbhiriveshAnaM raNAn nivavR^ite gaNaiH |
muhyatIva hi kR^ichChreShu sambhramajvalitaM manaH || 15\.2||

khaNDitAshaMsayA teShAM parA~NmukhatayA tayA |
Avivesha kR^ipA ketau kR^itochchairvAnaraM naram || 15\.3||

AsthAmAlambya nIteShu vashaM kShudreShvarAtiShu |
vyaktimAyAti mahatAM mAhAtmyamanukampayA || 15\.4||

sa sAsiH sAsusUH sAso yeyAyeyAyayAyayaH |
lalau lIlAM lalo.alolaH shashIshashishushIH shashan || 15\.5||

trAsajihmaM yatash chaitAn mandamevAnviyAya saH |
nAtipIDayituM bhagnAn ichChanti hi mahaujasaH || 15\.6||

athAgre hasatA sAchi sthitena sthirakIrtinA |
senAnyA te jagadire kiMchidAyastachetasA || 15\.7||

mA vihAsiShTa samaraM samarantavyasaMyataH |
kShataM kShuNNAsuragaNairagaNairiva kiM yashaH || 15\.8||

vivasvadaMshusaMshleSha dviguNIkR^itatejasaH |
amI vo moghamudgUrNA hasantIva mahAsayaH || 15\.9||

vane.avane vanasadAM mArgaM mArgamupeyuShAm |
vANairbANaiH samAsaktaM sha~Nke.ashaM kena shAmyati || 15\.10||

pAtitottu~NgamAhAtmyaiH saMhR^itAyatakIrtibhiH |
gurvIM kAmApadaM hantuM kR^itamAvR^ittisAhasam || 15\.11||

nAsuro.ayaM na vA nAgo dharasaMstho na rAkShasaH |
nA sukho.ayaM navAbhogo dharaNistho hi rAjasaH || 15\.12||

mandamasyann iShulatAM ghR^iNayA munireSha vaH |
praNudatyAgatAvaj~naM jaghaneShu pashUn iva || 15\.13||

na nonanunno.anunneno na nA nAnAnanA nanu |
nunno.anunno na nunneno nAnenAnunnanun na nut || 15\.14||

varaM kR^itadhvastaguNAd atyantamaguNaH pumAn |
prakR^ityA hyamaNiH shreyAn nAlaMkArash chyutopalaH || 15\.15||

syandanA no chaturagAH surebhA vAvipattayaH |
syandanA no cha turagAH surebhAvA vipattayaH || 15\.16||

bhavadbhiradhunArAti parihApitapauruShaiH |
hradairivArkaniShpItaiH prAptaH pa~Nko durutsahaH || 15\.17||

vetrashAkakuje shaile.aleshaije.akukashAtrave |
yAta kiM vidisho jetuM tu~njesho divi kiMtayA || 15\.18||

ayaM vaH klaibyamApannAn dR^iShTapR^iShThAn arAtinA |
ichChatIshash chyutAchArAn dArAn iva nigopitum || 15\.19||

nanu ho mathanA rAgho ghorA nAthamaho nu na |
tayadAtavadA bhImA mAbhIdA bata dAyata || 15\.20||

kiM tyaktApAstadevatva mAnuShyakaparigrahaiH |
jvalitAnyaguNairgurvI sthitA tejasi mAnyatA || 15\.21||

nishitAsirato.abhIko nyejate.amaraNA ruchA |
sArato na virodhI naH svAbhAso bharavAn uta || 15\.22||

tanuvArabhaso bhAsvAn adhIro.avinatorasA |
chAruNA ramate janye ko.abhIto rasitAshini || 15\.23||

nirbhinnapAtitAshvIya niruddharathavartmani |
hatadvipanagaShThyUta rudhirAmbunadAkule || 15\.24||

devAkAnini kAvAde vAhikAsvasvakAhi vA |
kAkArebhabhare kAkA nisvabhavyavyabhasvani || 15\.25||

pranR^ittashavavitrasta turagAkShiptasArathau |
mArutApUrNatUNIra vikruShTahatasAdini || 15\.26||

sasattvaratide nityaM sadarAmarShanAshini |
tvarAdhikakasannAde ramakatvamakarShati || 15\.27||

Asure lokavitrAsa vidhAyini mahAhave |
yuShmAbhirunnatiM nItaM nirastamiha pauruSham || 15\.28||

iti shAsati senAnyAM gachChatastAn anekadhA |
niShidhya hasatA kiMchit tatra tasthe.andhakAriNA || 15\.29||

munIShudahanAtaptAMllajjayA nivivR^itsataH |
shivaH prahlAdayAmAsa tAn niShedhahimAmbunA || 15\.30||

dUnAste.aribalAd UnA nirebhA bahu menire |
bhItAH shitasharAbhItAH shaMkaraM tatra shaMkaram || 15\.31||

maheShujaladhau shatrorvartamAnA duruttare |
prApya pAramiveshAnamAshashvAsa patAkinI || 15\.32||

sa babhAra raNApetAM chamUM pashchAd avasthitAm |
puraH sUryAd upAvR^ittAM ChAyAmiva mahAtaruH || 15\.33||

mu~nchatIshe sharA~n jiShNau pinAkasvanapUritaH |
dadhvAna dhvanayann AshAH sphuTann iva dharAdharaH || 15\.34||

tadgaNA dadR^ishurbhImaM chitrasaMsthA ivAchalAH |
vismayena tayoryuddhaM chitrasaMsthA ivAchalAH || 15\.35||

parimohayamANena shikShAlAghavalIlayA |
jaiShNavI vishikhashreNI parijahre pinAkinA || 15\.36||

avadyan patriNaH shambhoH sAyakairavasAyakaiH |
pANDavaH parichakrAma shikShayA raNashikShayA || 15\.37||

chArachu~nchush chirArechI cha~nchachchIraruchA ruchaH |
chachAra ruchirash chAru chArairAchAracha~nchuraH || 15\.38||

sphuratpisha~NgamaurvIkaM dhunAnaH sa bR^ihaddhanuH |
dhR^itolkAnalayogena tulyamaMshumatA babhau || 15\.39||

pArthabANAH pashupaterAvavrurvishikhAvalim |
payomucha ivArandhrAH sAvitrImaMshusaMhatim || 15\.40||

sharavR^iShTiM vidhUyorvImudastAM savyasAchinA |
rurodha mArgaNairmArgaM tapanasya trilochanaH || 15\.41||

tena vyAtenire bhImA bhImArjanaphalAnanAH |
na nAnukampya vishikhAH shikhAdharajavAsasaH || 15\.42||

dyuviyadgAminI tAra saMrAvavihatashrutiH |
haimIShumAlA shushubhe vidyutAmiva saMhatiH || 15\.43||

vila~Nghya patriNAM pa~NktiM bhinnaH shivashilImukhaiH |
jyAyo vIryaM samAshritya na chakampe kapidhvajaH || 15\.44||

jagatIsharaNe yukto harikAntaH sudhAsitaH |
dAnavarShIkR^itAshaMso nAgarAja ivAbabhau || 15\.45||

viphalIkR^itayatnasya kShatabANasya shambhunA |
gANDIvadhanvanaH khebhyo nishchachAra hutAshanaH || 15\.46||

sa pisha~NgajaTAvaliH kirann urutejaH parameNa manyunA |
jvalitauShadhijAtavedasA himashailena samaM vididyute || 15\.47||

shatasho vishikhAn avadyate bhR^ishamasmai raNavegashAline |
prathayann anivAryavIryatAM prajigAyeShumaghAtukaM shivaH || 15\.48||

shambho dhanurmaNDalataH pravR^ittaM taM maNDalAd aMshumivAMshubhartuH |
nivArayiShyan vidadhe sitAshvaH shilImukhachChAyavR^itAM dharitrIm || 15\.49||

ghanaM vidAryArjunabANapUgaM sasArabANo.ayug alochanasya |
ghanaM vidAryArjunabANapUgaM sasAra bANo.ayugalochanasya || 15\.50||

rujan pareShUn bahudhAshupAtino muhuH sharaughairapavArayan dishaH |
chalAchalo.aneka iva kriyAvashAn maharShisaMghairbubudhe dhanaMjayaH || 15\.51||

vikAshamIyurjagatIshamArgaNA vikAshamIyurjagatIshamArgaNAH |
vikAshamIyurjagatIshamArgaNA vikAshamIyurjagatIshamArgaNAH || 15\.52||

sampashyatAmiti shivena vitAyamAnaM lakShmIvataH kShitipatestanayasya vIryam
|
a~NgAnyabhinnamapi tattvavidAM munInAM romA~nchama~nchitataraM
bibharAmbabhUvuH || 15\.53||

\medskip\hrule\medskip
tataH kirAtAdhipateralaghvImAjikriyAM vIkShya vivR^iddhamanyuH |
sa tarkayAmAsa viviktatarkash chiraM vichinvann iti kAraNAni || 16\.1||

madasrutishyAmitagaNDalekhAH krAmanti vikrAntanarAdhirUDhAH |
sahiShNavo neha yudhAmabhij~nA nAgA nagochChrAyamivAkShipantaH || 16\.2||

vichitrayA chitrayateva bhinnAM ruchaM raveH ketanaratnabhAsA |
mahArathaughena na saMniruddhAH payodamandradhvaninA dharitrI || 16\.3||

samullasatprAsamahormimAlaM parisphurachchAmaraphenapa~Nkti |
vibhinnamaryAdamihAtanoti nAshvIyamAshA jaladherivAmbhaH || 16\.4||

hatAhatetyuddhatabhIShmaghoShaiH samujjhitA yoddhR^ibhirabhyamitram |
na hetayaH prAptataDittviShaH khe vivasvadaMshujvalitAH patanti || 16\.5||

abhyAyataH saMtatadhUmadhUmraM vyApi prabhAjAlamivAntakasya |
rajaH pratUrNAshvarathA~NganunnaM tanoti na vyomani mAtarishvA || 16\.6||

bhUreNunA rAsabhadhUsareNa tirohite vartmani lochanAnAm |
nAstyatra tejasvibhirutsukAnAmahni pradoShaH surasundarINAm || 16\.7||

rathA~NgasaMkrIDitamashvaheShA bR^ihanti mattadvipabR^iMhitAni |
saMgharShayogAd iva mUrChitAni hrAdaM nigR^ihNanti na dundubhInAm || 16\.8||

asmin yashaHpauruShalolupAnAmarAtibhiH pratyurasaM kShatAnAm |
mUrChAntarAyaM muhuruchChinatti nAsArashItaM karishIkarAmbhaH || 16\.9||

asR^i~NnadInAmupachIyamAnairvidArayadbhiH padavIM dhvajinyAH |
uchChrAyamAyAnti na shoNitaughaiH pa~NkairivAshyAnaghanaistaTAni || 16\.10||

parikShate vakShasi dantidantaiH priyA~NkashItA nabhasaH patantI |
neha pramohaM priyasAhasAnAM mandAramAlA viralIkaroti || 16\.11||

niShAdisaMnAhamaNiprabhaughe parIyamANe karishIkareNa |
arkatviShonmIlitamabhyudeti na khaNDamAkhaNDalakArmukasya || 16\.12||

mahIbhR^itA pakShavateva bhinnA vigAhya madhyaM paravAraNena |
nAvartamAnA ninadanti bhImamapAM nidherApa iva dhvajinyaH || 16\.13||

mahArathAnAM pratidantyanIkamadhisyadasyandanamutthitAnAm |
AmUlalUnairatimanyuneva mAta~Ngahastairvriyate na panthAH || 16\.14||

dhR^itotpalApIDa iva priyAyAH shiroruhANAM shithilaH kalApaH |
na barhabhAraH patitasya sha~NkorniShAdivakShaHsthalamAtanoti || 16\.15||

ujjhatsu saMhAra ivAstasaMkhyamahnAya tejasviShu jIvitAni |
lokatrayAsvAdanalolajihvaM na vyAdadAtyAnanamatra mR^ityuH || 16\.16||

iyaM cha durvAramahArathAnAmAkShipya vIryaM mahatAM balAnAm |
shaktirmamAvasyati hInayuddhe saurIva tArAdhipadhAmni dIptiH || 16\.17||

mAyA svid eShA mativibhramo vA dhvastaM nu me vIryamutAhamanyaH |
gANDIvamuktA hi yathA purA me parAkramante na sharAH kirAte || 16\.18||

puMsaH padaM madhyamamuttamasya dvidheva kurvan dhanuShaH praNAdaiH |
nUnaM tathA naiShA yathAsya veShaH prachChannamapyUhayate hi cheShTA || 16\.19||

dhanuH prabandhadhvanitaM ruSheva sakR^id vikR^iShTA vitateva maurvI |
saMdhAnamutkarShamiva vyudasya muShTerasambheda ivApavarge || 16\.20||

aMsAvavaShTabdhanatau samAdhiH shirodharAyA rahitaprayAsaH |
dhR^itA vikArAMstyajatA mukhena prasAdalakShmIH shashalA~nChanasya || 16\.21||

prahIyate kAryavashAgateShu sthAneShu viShTabdhatayA na dehaH |
sthitaprayAteShu sasauShThavash cha lakShyeShu pAtaH sadR^ishaH sharANAm || 16\.22||
parasya bhUyAn vivare.abhiyogaH prasahya saMrakShaNamAtmarandhre |
bhIShme.apyasambhAvyamidaM gurau vA na sambhavatyeva vanechareShu || 16\.23||

aprAkR^itasyAhavadurmadasya nivAryamasyAstrabalena vIryam |
alpIyaso.apyAmayatulyavR^ittermahApakArAya riporvivR^iddhiH || 16\.24||

sa sampradhAryaivamahAryasAraH sAraM vineShyan sagaNasya shatroH |
prasvApanAstraM drutamAjahAra dhvAntaM ghanAnaddha ivArdharAtraH || 16\.25||

prasaktadAvAnaladhUmadhUmrA nirundhatI dhAma sahasrarashmeH |
mahAvanAnIva mahAtamisrA ChAyA tatAneshabalAni kAlI || 16\.26||

AsAditA tatprathamaM prasahya pragalbhatAyAH padavIM harantI |
sabheva bhImA vidadhe gaNAnAM nidrA nirAsaM pratibhAguNasya || 16\.27||

gurusthirANyuttamavaMshajatvAd vij~nAtasArANyanushIlanena |
kechit samAshritya guNAn vitAni suhR^itkulAnIva dhanUMShi tasthuH || 16\.28||

kR^itAntadurvR^itta ivApareShAM puraH pratidvandvini pANDavAstre |
atarkitaM pANitalAn nipetuH kriyAphalAnIva tadAyudhAni || 16\.29||

aMsasthalaiH kechid abhinnadhairyAH skandheShu saMshleShavatAM tarUNAm |
madena mIlannayanAH salIlaM nAgA iva srastakarA niSheduH || 16\.30||

tirohitendoratha shambhumUrdhnaH praNamyamAnaM tapasAM nivAsaiH |
sumerushR^i~NgAd iva bimbamArkaM pisha~NgamuchchairudiyAya tejaH || 16\.31||

ChAyAM vinirdhUya tamomayIM tAM tattvasya saMvittirivApavidyAm |
yayau vikAsaM dyutirindumaulerAlokamabhyAdishatI gaNebhyaH || 16\.32||

tviShAM tatiH pATalitAmbuvAhA sA sarvataH pUrvasarIva saMdhyA |
ninAya teShAM drutamullasantI vinidratAM lochanapa~NkajAni || 16\.33||

pR^ithagvidhAnyastravirAmabuddhAH shastrANi bhUyaH pratipedire te |
muktA vitAnena balAhakAnAM jyotIMShi ramyA iva digvibhAgAH || 16\.34||

dyaurunnanAmeva dishaH praseduH sphuTaM visasre saviturmayUkhaiH |
kShayaM gatAyAmiva yAmavatyAM punaH samIyAya dinaM dinashrIH || 16\.35||

mahAstradurge shithilaprayatnaM digvAraNeneva pareNa rugNe |
bhuja~NgapAshAn bhujavIryashAlI prabandhanAya prajighAya jiShNuH || 16\.36||

jihvAshatAnyullasayantyajasraM lasattaDillolaviShAnalAni |
trAsAn nirastAM bhujagendrasenA nabhashcharaistatpadavIM vivavre || 16\.37||

di~NnAgahastAkR^itimudvahadbhirbhogaiH prashastAsitaratnanIlaiH |
rarAja sarpAvalirullasantI tara~NgamAleva nabhorNavasya || 16\.38||

niHshvAsadhUmaiH sthagitAMshujAlaM phaNAvatAmutphaNamaNDalAnAm |
gachChann ivAstaM vapurabhyuvAha vilochanAnAM sukhamuShNarashmiH || 16\.39||

prataptachAmIkarabhAsureNa dishaH prakAshena pisha~NgayantyaH |
nishchakramuH prANaharekShaNAnAM jvAlA maholkA iva lochanebhyaH || 16\.40||

AkShiptasampAtamapetashobhamudvahni dhUmAkkuladigvibhAgam |
vR^itaM nabho bhogikulairavasthAM paroparuddhasya purasya bheje || 16\.41||

tamAshu chakShuHshravasAM samUhaM mantreNa tArkShyodayakAraNena |
netA nayeneva paropajApaM nivArayAmAsa patiH pashUnAm || 16\.42||

pratighnatIbhiH kR^itamIlitAni dyulokabhAjAmapi lochanAni |
garutmatA saMhatibhirvihAyaH kShaNaprakAshAbhirivAvatene || 16\.43||

tataH suparNavrajapakShajanmA nAnAgatirmaNDalaya~n javena |
jarattR^iNAnIva viyan ninAya vanaspatInAM gahanAni vAyuH || 16\.44||

manaHshilAbha~Nganibhena pashchAn nirudhyamAnaM nikareNa bhAsAm |
vyUDhairurobhish cha vinudyamAnaM nabhaH sasarpeva puraH khagAnAm || 16\.45||

darImukhairAsavarAgatAmraM vikAsi rukmachChadadhAma pItvA |
javAnilAghUrNitasAnujAlo himAchalaH kShIba ivAchakampe || 16\.46||

pravR^ittanaktaMdivasaMdhidIptairnabhastalaM gAM cha pisha~NgayaShTiH |
antarhitArkaiH paritaH patadbhish ChAyAH samAchikShipire vanAnAm || 16\.47||

sa bhogasaMghaH shamamugradhAmnAM sainyena ninye vinatAsutAnAm |
mahAdhvare vidhyapachAradoShaH karmAntareNeva mahodayena || 16\.48||

sAphalyamastre ripupauruShasya kR^itvA gate bhAgya iavApavargam |
anindhanasya prasabhaM samanyuH samAdade.astraM jvalanasya jiShNuH || 16\.49||

UrdhvaM tirashchInamadhash cha kIrNairjvAlAsaTairla~Nghitameghapa~NktiH |
AyastasiMhAkR^itirutpapAta prANyantamichChann iva jAtavedAH || 16\.50||

bhittveva bhAbhiH saviturmayUkhA~n jajvAla viShvag visR^itasphuli~NgaH |
vidIryamANAshmaninAdadhIraM dhvaniM vitanvann akR^ishaH kR^ishAnuH || 16\.51||

chayAn ivAdrIn iva tu~NgashR^i~NgAn kvachit purANIva hiraNmayAni |
mahAvanAnIva cha kiMshukAnAmattAna vahniH pavanAnuvR^ittyA || 16\.52||

muhush chalatpallavalohinIbhiruchchaiH shikhAbhiH shikhino.avalIDhAH |
taleShu muktAvishadA babhUvuH sAndrA~njjanashyAmaruchaH payodAH || 16\.53||

lilikShatIva kShayakAlaraudre lokaM vilolArchiShi rohitAshve |
pinAkinA hUtamahAmbuvAhamastraM punaH pAshabhR^itaH praNinye || 16\.54||

tato dharitrIdharatulyarodhasastaDillatAli~NgitanIlamUrtayaH |
adhomukhAkAshasarinnipAtinIrapaH prasaktaM mumuchuH payomuchaH || 16\.55||

parAhatadhvastashikhe shikhAvato vapuShyadhikShiptasamiddhatejasi |
kR^itAspadAstapta ivAyasi dhvaniM payonipAtAH prathame vitenire || 16\.56||

mahAnale bhinnasitAbhrapAtibhiH sametya sadyaH kathanena phenatAm |
vrajadbhirArdrendhanavat parikShayaM jalairvitene divi dhUmasaMtatiH || 16\.57||

svaketubhiH pANDuranIlapATalaiH samAgatAH shakradhanuHprabhAbhidaH |
asaMsthitAmAdadhire vibhAvasorvichitrachInAMshukachArutAM tviShaH || 16\.58||

jalaughasaMmUrChanamUrChitasvanaH prasaktavidyullasitaidhitadyutiH |
prashAntimeShyan dhR^itadhUmamaNDalo babhUva bhUyAn iva tatra pAvakaH || 16\.59||

pravR^iddhasindhUrmichayasthavIyasAM chayairvibhinnAH payasAM prapedire |
upAttasaMdhyAruchibhiH sarUpatAM payodavichChedalavaiH kR^ishAnavaH || 16\.60||

upaityanantadyutirapyasaMshayaM vibhinnamUlo.anudayAya saMkShayam |
tathA hi toyaughavibhinnasaMhatiH sa havyavAhaH prayayau parAbhavam || 16\.61||

atha vihitavidheyairAshu muktA vitAnairasitanaganitambashyAmabhAsAM ghanAnAm
|
vikasadamaladhAmnAM prApa nIlotpalAnAM shriyamadhikavishuddhAM vahnidAhAd iva
dyauH || 16\.62||

iti vividhamudAse savyasAchI yad astraM bahusamaranayaj~naH sAdayiShyann
arAtim |
vidhiriva viparItaH pauruShaM nyAyavR^itteH sapadi tad upaninye riktatAM
nIlakaNThaH || 16\.63||

vItaprabhAvatanurapyatanuprabhAvaH pratyAchakA~NkSha jayinIM
bhujavIryalakShmIm |
astreShu bhUtapatinApahR^iteShu jiShNurvarShiShyatA dinakR^iteva jaleShu
lokaH || 16\.64||

\medskip\hrule\medskip
athApadAmuddharaNakShameShu mitreShvivAstreShu tirohiteShu |
dhR^itiM gurushrIrguruNAbhipuShyan svapauruSheNeva sharAsanena || 17\.1||

bhUriprabhAveNa raNAbhiyogAt prIto vijihmash cha tadIyavR^iddhyA |
spaShTo.apyavispaShTavapuHprakAshaH sarpanmahAdhUma ivAdrivahniH || 17\.2||

tejaH samAshritya parairahAryaM nijaM mahanmitramivorudhairyam |
AsAdayann askhalitasvabhAvaM bhIme bhujAlambamivAridurge || 17\.3||

vaMshochitatvAd abhimAnavatyA samprAptayA sampriyatAmasubhyaH |
samakShamAditsitayA pareNa vadhveva kIrtyA paritapyamAnaH || 17\.4||

patiM nagAnAmiva baddhamUlamunmUlayiShyaMstarasA vipakSham |
laghuprayatnaM nigR^ihItavIryastrimArgagAvega iveshvareNa || 17\.5||

saMskAravattvAd ramayatsu chetaH prayogashikShAguNabhUShaNeShu |
jayaM yathArtheShu shareShu pArthaH shabdeShu bhAvArthamivAshashaMse || 17\.6||

bhUyaH samAdhAnavivR^iddhatejA naivaM purA yuddhamiti vyathAvAn |
sa nirvavAmAsramamarShanunnaM viShaM mahAnAga ivekShaNAbhyAm || 17\.7||

tasyAhavAyAsavilolamauleH saMrambhatAmrAyatalochanasya |
nirvApayiShyann iva roShataptaM prasnApayAmAsa mukhaM nidAghaH || 17\.8||

krodhAndhakArAntarito raNAya bhrUbhedarekhAH sa babhAra tisraH |
ghanoparuddhaH prabhavAya vR^iShTerUrdhvAMshurAjIriva tigmarashmiH || 17\.9||

sa pradhvanayyAmbudanAdi chApaM hastena di~NnAga ivAdrishR^i~Ngam |
balAni shambhoriShubhistatApa chetAMsi chintAbhirivAsharIraH || 17\.10||

sadvAditevAbhiniviShTabuddhau guNAbhyasUyeva vipakShapAte |
agochare vAg iva chopareme shaktiH sharANAM shitikaNThakAye || 17\.11||

umApatiM pANDusutapraNunnAH shilImukhA na vyathayAMbabhUvuH |
abhyutthitasyAdripaternitambamarkasya pAdA iva haimanasya || 17\.12||

samprIyamANo.anubabhUva tIvraM parAkramaM tasya patirgaNAnAm |
viShANabhedaM himavAn asahyaM vaprAnatasyeva suradvipasya || 17\.13||

tasmai hi bhAroddharaNe samarthaM pradAsyatA bAhumiva pratApam |
chiraM viShehe.abhibhavastadAnIM sa kAraNAnAmapi kAraNena || 17\.14||

pratyAhataujAH kR^itasattvavegaH parAkramaM jyAyasi yastanoti |
tejAMsi bhAnoriva niShpatanti yashAMsi vIryajvalitAni tasya || 17\.15||

dR^iShTAvadAnAd vyathate.arilokaH pradhvaMsameti vyathitAchcha tejaH |
tejovihInaM vijahAti darpaH shAntArchiShaM dIpamiva prakAshaH || 17\.16||

tataH prayAtyastamadAvalepaH sa jayyatAyAH padavIM jigIShoH |
gandhena jetuH pramukhAgatasya pratidvipasyeva mata~NgajaughaH || 17\.17||

evaM pratidvandviShu tasya kIrtiM maulIndulekhAvishadAM vidhAsyan |
iyeSha paryAyajayAvasAdAM raNakriyAM shambhuranukrameNa || 17\.18||

munervichitrairiShubhiH sa bhUyAn ninye vashaM bhUtapaterbalaughaH |
sahAtmalAbhena samutpatadbhirjAtisvabhAvairiva jIvalokaH || 17\.19||

vitanvatastasya sharAndhakAraM trastAni sainyAni ravaM nishemuH |
pravarShataH saMtatavepathUni kShapAghanasyeva gavAM kulAni || 17\.20||

sa sAyakAn sAdhvasaviplutAnAM kShipan pareShAmatisauShThavena |
shashIva doShAvR^italochanAnAM vibhidyamAnaH pR^ithag AbabhAse || 17\.21||

kShobheNa tenAtha gaNAdhipAnAM bhedaM yayavAkR^itirIshvarasya |
tara~Ngakampena mahAhradAnAM ChAyAmayasyeva dinasya kartuH || 17\.22||

prasedivAMsaM na tamApa kopaH kutaH parasmin puruShe vikAraH |
AkAravaiShamyamidaM cha bheje durlakShyachihnA mahatAM hi vR^ittiH || 17\.23||

visphAryamANasya tato bhujAbhyAM bhUtAni bhartrA dhanurantakasya |
bhinnAkR^itiM jyAM dadR^ishuH sphurantIM kruddhasya jihvAmiva takShakasya || 17\.24||

svyApasavyadhvanitograchApaM pArthaH kirAtAdhipamAshasha~Nke |
paryAyasampAditakarNatAlaM yantA gajaM vyAlamivAparAddhaH || 17\.25||

nijaghnire tasya hareShujAlaiH patanti vR^indAni shilImukhAnAm |
UrjasvibhiH sindhumukhAgatAni yAdAMsi yAdobhirivAmburAsheH || 17\.26||

vibhedamantaH padavInirodhaM vidhvaMsanaM chAviditaprayogaH |
netArilokeShu karoti yad yat tat tachchakArAsya shareShu shambhuH || 17\.27||

soDhAvagItaprathamAyudhasya krodhojjhitairvegitayA patadbhiH |
Chinnairapi trAsitavAhinIkaiH pete kR^itArthairiva tasya bANaiH || 17\.28||

alaMkR^itAnAm R^ijutAguNena gurUpadiShTAM gatimAsthitAnAm |
satAmivAparvaNi mArgaNAnAM bha~NgaH sa jiShNordhR^itimunmamAtha || 17\.29||

bANachChidaste vishikhAH smarAreravA~NmukhIbhUtaphalAH patantaH |
akhaNDitaM pANDavasAyakebhyaH kR^itasya sadyaH pratikAramApuH || 17\.30||

chitrIyamANAn atilAghavena pramAthinastAn bhavamArgaNAnAm |
samAkulAyA nichakhAna dUraM bANAn dhvajinyA hR^idayeShvarAtiH || 17\.31||

tasyAtiyatnAd atirichyamAne parAkrame.anyonyavisheShaNena |
hantA purAM bhUri pR^iShatkavarShaM nirAsa naidAgha ivAmbu meghaH || 17\.32||

anAmR^ishantaH kvachid eva marma priyaiShiNAnuprahitAH shivena |
suhR^itprayuktA iva narmavAdAH sharA muneH prItikarA babhUvuH || 17\.33||

astraiH samAnAmatirekiNIM vA pashyanIShUNAmapi tasya shaktim |
viShAdavaktavyabalaH pramAthI svamAlalambe balamindumauliH || 17\.34||

tapastapovIryasamuddhatasya pAraM yiyAsoH samarArNavasya |
maheShujAlAnyakhilAni jiShNorarkaH payAMsIva samAchachAma || 17\.35||

rikte savisrambhamath+arjunasya niSha~Ngavaktre nipatAta pANiH |
anyadvipApItajale satarShaM mata~Ngajasyeva nagAshmarandhre || 17\.36||

chyute sa tasminn iShudhau sharArthAd dhvastArthasAre sahaseva bandhau |
tatkAlamoghapraNayaH prapede nirvAchyatAkAma ivAbhimukhyam || 17\.37||

AghaTTayAmAsa gatAgatAbhyAM sAvegamagrA~Ngulirasya tUNau |
vidheyamArge matirutsukasya nayaprayogAviva gAM jigIShoH || 17\.38||

babhAra shUnyAkR^itirarjunastau maheShudhI vItamaheShujAlau |
yugAntasaMshuShkajalau vijihmaH pUrvAparau loka ivAmburAshI || 17\.39||
tenAtimittena tathA na pArthastayoryathA riktatayAnutepe |
svAmApadaM projjhya vipattimagnaM shochanti santo hyupakAripakSham || 17\.40||

pratikriyAyai vidhuraH sa tasmAt kR^ichChreNa vishleShamiyAya hastaH |
parA~Nmukhatve.api kR^itopakArAt tUNImukhAn mitrakulAd ivAryaH || 17\.41||

pashchAtkriyA tUNayugasya bharturjaj~ne tadAnImupakAriNIva |
sambhAvanAyAmadharIkR^itAyAM patyuH puraH sAhasamAsitavyam || 17\.42||

taM shambhurAkShiptamaheShujAlaM lohaiH sharairmarmasu nistutoda |
hR^ittottaraM tattvavichAramadhye vakteva doShairgurubhirvipakSham || 17\.43||

jahAra chAsmAd achireNa varma jvalanmaNidyotitahaimalekham |
chaNDaH pata~NgAn marudekanIlaM taDitvataH khaNDamivAmbudasya || 17\.44||

vikoshanirdhautatanormahAseH phaNAvatash cha tvachi vichyutAyAm |
pratidvipAbaddharuShaH samakShaM nAgasya chAkShiptamukhachChadasya || 17\.45||

vibodhitasya dhvaninA ghanAnAM harerapetasya cha shailarandhrAt |
nirastadhUmasya cha rAtrivahnervinA tanutreNa ruchiM sa bheje || 17\.46||

achittatAyAmapi nAma yuktAmanUrdhvatAM prApya tadIyakR^ichChre |
mahIM gatau tAviShudhI tadAnIM vivavratush chetanayeva yogam || 17\.47||

sthitaM vishuddhe nabhasIva sattve dhAmnA tapovIryamayena yuktam |
shastrAbhighAtaistamajasramIshastvaShTA vivasvantamivollilekha || 17\.48||

saMrambhavegojjhitavedaneShu gAtreShu bAhiryamupAgateShu |
munerbabhUvAgaNiteShurAsherlauhastiraskAra ivAtmamanyuH || 17\.49||

tato.anupUrvAyatavR^ittabAhuH shrImAn kSharallohitadigdhadehaH |
Askandya vegena vimuktanAdaH kShitiM vidhunvann iva pArShNighAtaiH || 17\.50||

sAmyaM gatenAshaninA maghonaH shashA~NkakhaNDAkR^itipANDureNa |
shambhuM bibhitsurdhanuShA jaghAna stambaM viShANena mahAn ivebhaH || 17\.51||

rayeNa sA saMnidadhe patantI bhavodbhavenAtmani chApayaShTiH |
samuddhatA sindhuranekamArgA pare sthitenaujasi jahnuneva || 17\.52||

vikArmukaH karmasu shochanIyaH parichyutaudArya ivopachAraH |
vichikShipe shUlabhR^itA salIlaM sa patribhirdUramadUrapAtaiH || 17\.53||

upoDhakalyANaphalo.abhirakShan vIravrataM puNyaraNAshramasthaH |
japopavAsairiva saMyatAtmA tepe munistairiShubhiH shivasya || 17\.54||

tato.agrabhUmiM vyavasAyasiddheH sImAnamanyairatidustaraM saH |
tejaHshriyAmAshrayamuttamAsiM sAkShAd ahaMkAramivAlalambe || 17\.55||

sharAn avadyann anavadyakarmA chachAra chitraM pravichAramArgaiH |
hastena nistriMshabhR^itA sa dIptaH sArkAMshunA vAridhirUrmiNeva || 17\.56||

yathA nije vartmani bhAti bhAbhish chyAyAmayash chApsu sahasrarashmiH |
tathA nabhasyAshu raNasthalIShu spaShTadvimUrtirdadR^ishe sa bhUtaiH || 17\.57||

shivapraNunnena shilImukhena tsarupradeshAd apavarjitA~NgaH |
jvalann asistasya papAta pANerghanasya vaprAd iva vaidyuto.agniH || 17\.58||

AkShiptachApAvaraNeShujAlash ChinnottamAsiH sa mR^idhe.avadhUtaH |
riktaH prakAshash cha babhUva bhUmerutsAditodyAna iva pradeshaH || 17\.59||

sa khaNDanaM prApya parAd amarShavAn bhujadvitIyo.api vijetumichChayA |
sasarja vR^iShTiM parirugNapAdapAM dravetareShAM payasAmivAshmanAm || 17\.60||

nIrandhraM parigamite kShayaM pR^iShatkairbhUtAnAmadhipatinA shilAvitAne |
uchChrAyasthagitanabhodigantarAlaM chikShepa kShitiruhajAlamindrasUnuH || 17\.61||

niHsheShaM shakalitavalkalA~NgasAraiH kurvadbhirbhuvamabhitaH kaShAyachitrAm
|
IshAnaH sakusumapallavairnagaistairAtene balimiva ra~NgadevatAbhyaH || 17\.62||

unmajjan makara ivAmArApagAyA vegena pratimukhametya bANanadyAH |
gANDIvI kanakashilAnibhaM bhujAbhyAmAjaghne viShamavilochanasya vakShaH || 17\.63||

abhilaShata upAyaM vikramaM kIrtilakShmyorasugamamarisainyaira~Nkam
abhyAgatasya |
janaka iva shishutve supriyasyaikasUnoravinayamapi sehe pANDavasya smarAriH
|| 17\.64||

\medskip\hrule\medskip
tata udagra iva dvirade munau raNamupeyuShi bhImabhujAyudhe |
dhanurapAsya sabANadhi shaMkaraH pratijaghAna ghanairiva muShTibhiH || 18\.1||

harapR^ithAsutayordhvanirutpatann amR^idusaMvalitA~NgulipANijaH |
sphuTadanalpashilAravadAruNaH pratinanAda darIShu darIbhR^itaH || 18\.2||

shivabhujAhatibhinnapR^ithukShatIH sukhamivAnubabhUva kapidhvajaH |
ka iva nAma bR^ihanmanasAM bhaved anukR^iterapi sattvavatAM kShamaH || 18\.3||

vraNamukhachyutashoNitashIkara sthagitashailataTAbhabhujAntaraH |
abhinavauShasarAgabhR^itA babhau jaladhareNa samAnamumApatiH || 18\.4||

urasi shUlabhR^itaH prahitA muhuH pratihatiM yayurarjunamuShTayaH |
bhR^isharayA iva sahyamahIbhR^itaH pR^ithuni rodhasi sindhumahormayaH || 18\.5||

nipatite.adhishirodharamAyate samamaratniyuge.ayugachakShuShaH |
trichatureShu padeShu kirITinA lulitadR^iShTi madAd iva chaskhale || 18\.6||

abhibhavoditamanyuvidIpitaH samabhisR^itya bhR^ishaM javamojasA |
bhujayugena vibhajya samAdade shashikalAbharaNasya bhujadvayam || 18\.7||

pravavR^ite.atha mahAhavamallayorachalasaMchalanAharaNo raNaH |
karaNashR^i~NkhalasaMkalanAgururgurubhujAyudhagarvitayostayoH || 18\.8||

ayamasau bhagavAn uta pANDavaH sthitamavA~N muninA shashimaulinA |
samadhirUDhamajena nu jiShNunA svid iti vegavashAn mumuhe gaNaiH || 18\.9||

prachalite chalitaM sthitamAsthite vinamite natamunnatamunnatau |
vR^iShakapidhvajayorasahiShNunA muhurabhAvabhayAd iva bhUbhR^itA || 18\.10||

karaNashR^i~NkhalaniHsR^itayostayoH kR^itabhujadhvani valgu vivalgatoH |
charaNapAtanipAtitarodharasaH prasasR^ipuH saritaH paritaH sthalIH || 18\.11||

viyati vegapariplutamantarA samabhisR^itya rayeNa kapidhvajaH |
charaNayosh charaNAnamitakShitirnijagR^ihe tisR^iNAM jayinaM purAm || 18\.12||

vismitaH sapadi tena karmaNA karmaNAM kShayakaraH paraH pumAn |
kSheptukAmamavanau tamaklamaM niShpipeSha parirabhya vakShasA || 18\.13||

tapasA tathA na mudamasya yayau bhagavAn yathA vipulasattvatayA |
guNasaMhateH samatiriktamaho nijameva sattvamupakAri satAm || 18\.14||

atha himashuchibhasmabhUShitaM shirasi virAjitamindulekhayA |
svavapuratimanoharaM haraM dadhatamudIkShya nanAma pANDavaH || 18\.15||

sahasharadhi nijaM tathA kArmukaM vapuratanu tathaiva saMvarmitam |
nihitamapi tathaiva pashyann asiM vR^iShabhagatirupAyayau vismayam || 18\.16||

siShichuravanimambuvAhAH shanaiH surakusumamiyAya chitraM divaH |
vimalaruchi bhR^ishaM nabho dundubherdhvanirakhilamanAhatasyAnashe || 18\.17||

AseduShAM gotrabhido.anuvR^ittyA gopAyakAnAM bhuvanatrayasya |
rochiShNuratnAvalibhirvimAnairdyaurAchitA tArakiteva reje || 18\.18||

haMsA bR^ihantaH surasadmavAhAH saMhrAdikaNThAbharaNAH patantaH |
chakruH prayatnena vikIryamANairvyomnaH pariShva~NgamivAgrapakShaiH || 18\.19||

muditamadhuliho vitAnIkR^itAH sraja upari vitatya sAtAnikIH |
jalada iva niShedivAMsaM vR^iShe marudupasukhayAMbabhUveshvaram || 18\.20||

kR^itadhR^iti parivanditenochchakairgaNapatibhirabhinnaromodgamaiH |
tapasi kR^itaphale phalajyAyasI stutiriti jagade hareH sUnunA || 18\.21||

sharaNaM bhavantamatikAruNikaM bhava bhaktigamyamadhigamya janAH |
jitamR^ityavo.ajita bhavanti bhaye sasurAsurasya jagataH sharaNam || 18\.22||

vipad eti tAvad avasAdakarI na cha kAmasampad abhikAmayate |
na namanti chaikapuruShaM puruShAstava yAvad Isha na natiH kriyate || 18\.23||

saMsevante dAnashIlA vimuktya sampashyanto janmaduHkhaM pumAMsaH |
yanniHsa~NgastvaM phalasyAnatebhyastat kAruNyaM kevalaM na svakAryam || 18\.24||

prApyate yad iha dUramagatvA yat phalatyaparalokagatAya |
tIrthamasti na bhavArNavabAhyaM sArvakAmikam R^ite bhavatastat || 18\.25||

vrajati shuchi padaM tvati prItimAn pratihatamatireti ghorAM gatim |
iyamanagha nimittashaktiH parA tava varada na chittabhedaH kvachit || 18\.26||

dakShiNAM praNatadakShiNa mUrtiM tattvataH shivakarImaviditvA |
rAgiNApi vihitA tava bhaktyA saMsmR^itirbhava bhavatyabhavAya || 18\.27||

dR^iShTvA dR^ishyAnyAcharaNIyAni vidhAya
prekShAkArI yAti padaM muktam apAyaiH |
samyagdR^iShTistasya paraM pashyati yastvAM
yash chopAsti sAdhu vidheyaM sa vidhatte || 18\.28||

yuktAH svashaktyA munayaH prajAnAM hitopadeshairupakAravantaH |
samuchChinatsi tvamachintyadhAmA karmANyupetasya duruttarANi || 18\.29||

saMnibaddhamapahartumahAryaM bhUri durgatibhayaM bhuvanAnAm |
adbhutAkR^itimimAmatimAyastvaM bibharShi karuNAmaya mAyAm || 18\.30||

na rAgi chetaH paramA vilAsitA vadhUH sharIre.asti na chAsti manmathaH |
namaskriyA choShasi dAturityaho nisargadurbodhamidaM tavehitam || 18\.31||

tavottarIyaM karicharma sA~NgajaM jvalanmaNiH sArashanaM mahAnahiH |
srag Asyapa~NktiH shavabhasma chandanaM kalA himAMshosh cha samaM chakAsati || 18\.32||

avigrahasyApyatulena hetunA sametabhinnadvayamUrti tiShThataH |
tavaiva nAnyasya jagatsu dR^ishyate viruddhaveShAbharaNasya kAntatA || 18\.33||

AtmalAbhapariNAmanirodhairbhUtasaMgha iva na tvamupetaH |
tena sarvabhuvanAtiga loke nopamAnamasi nApyupemayaH || 18\.34||

tvamantakaH sthAvaraja~NgamAnAM tvayA jagat prANiti deva vishvam |
tvaM yoginAM hetuphale ruNatsi tvaM kAraNaM kAraNakAraNAnAm || 18\.35||

rakShobhiH suramanujairditeH sutairvA yallokeShvavikalamAptamAdhipatyam
|
pAvinyAH sharaNagatArtihAriNe tan mAhAtmyaM bhava bhavate namaskriyAyAH || 18\.36||

tarasA bhuvanAni yo bibharti dhvanati brahma yataH paraM pavitram |
parito duritAni yaH punIte shiva tasmai pavanAtane namaste || 18\.37||

bhavataH smaratAM sadAsane jayini brahmamaye niSheduShAm |
dahate bhavabIjasaMtatiM shikhine.anekashikhAya te namaH || 18\.38||

AbAdhAmaraNabhayArchiShA chirAya pluShTebhyo bhava mahatA bhavAnalena |
nirvANaM samupagamena yachChate te bIjAnAM prabhava namo.astu jIvanAya || 18\.39||

yaH sarveShAmAvarItA varIyAn sarvairbhAvairnAvR^ito.anAdiniShThaH |
mArgAtItAyendriyANAM namaste.avij~neyAya vyomarUpAya tasmai || 18\.40||

aNIyase vishvavidhAriNe namo namo.antikasthAya namo davIyase |
atItya vAchAM manasAM cha gocharaM sthitAya te tatpataye namo namaH || 18\.41||

asaMvidAnasya mamesha saMvidAM titikShituM dushcharitaM tvamarhasi |
virodhya mohAt punarabhyupeyuShAM gatirbhavAn eva durAtmanApi || 18\.42||

AstikyashuddhamavataH priyadharma dharmaM
dharmAtmajasya vihitAgasi shatruvarge |
samprApnuyAM vijayamIsha yayA samR^iddhyA
tAM bhUtanAtha vibhutAM vitarAhaveShu || 18\.43||

iti nigaditavantaM sUnumuchchairmaghonaH
praNatashirasamIshaH sAdaraM sAntvayitvA |
jvaladanalaparItaM raudramastraM dadhAnaM
dhanurupapadamasmai vedamabhyAdidesha || 18\.44||

sa pi~NgAkShaH shrImAn bhuvanamahanIyena mahasA
tanuM bhImAM bibhrat triguNaparivArapraharaNaH |
parItyeshAnaM triH stutibhirupagItaH suragaNaiH
sutaM pANDorvIraM jaladamiva bhAsvAn abhiyayau || 18\.45||

atha shashadharamaulerabhyanuj~nAmavApya
tridashapatipurogAH pUrNakAmAya tasmai |
avitathaphalamAshirvAdamAropayanto vijayi
vividhamastraM lokapAlA viteruH || 18\.46||

asaMhAryotsAhaM jayinamudayaM prApya tarasA
dhuraM gurvIM voDhuM sthitamanavasAdAya jagataH |
svadhAmnA lokAnAM tamupari kR^itasthAnamamarAstapolakShmyA
dIptaM dinakR^itamivochchairupajaguH || 18\.47||

vraja jaya ripulokaM pAdapadmAnataH san
gadita iti shivena shlAghito devasaMghaiH |
nijagR^ihamatha gatvA sAdaraM pANDuputro
dhR^itagurujayalakShmIrdharmasUnuM nanAma || 18\.48||
##

Encoded by Harunaga Isaacson for indology use at GRETIL.
http://fiindolo.sub.uni-goettingen.de/gretil/1\_{}sanskr/5\_{}poetry/2\_{}kavya/bhakirpu.htm
Text follows that commented on by Mallinaatha, also as regards e.g./
worddivision; note that there are often other possible worddivisions
(especially in the citraverses of sarga 15) and quite a few variants in the
texts of other commentators.

Processed for Devanagari display on sanskritdocuments.org

Proofread by Kaushal S. Kaloo kaushalskaloo at gmail.com
\medskip\hrule\obeylines
\medskip
{\rm Please send corrections to sanskrit at cheerful dot c om}
{\rm Last updated \today}
{\rm From https://sanskritdocuments.org .}
{\rm The text is prepared by volunteers and is to be used for personal study
% The text is prepared by volunteers and is to be used for personal study
% and research.  The file is not to be copied or reposted for promotion of 
% any website or individuals or for commercial purpose without permission.
%        Please help to maintain respect for volunteer spirit.
{\rm and research.  The file is not to be copied or reposted for promotion}
{\rm of any website or individuals or commercial purpose without permission.}
\end{document}