श्रीराघवेन्द्रपूजाविधानम्
अथ पूजाविधिं वक्ष्ये राघवेन्द्रार्यसद्गुरोः ।
यतस्तुष्टेन गुरुणा हरौ रुष्टोऽपि रक्ष्यते ॥ १॥
कृतनित्याह्निकः शुद्धः स्वस्थचित्तः सुखासनः ।
आदौ पूजाङ्गभूतं च जपं कुर्यात् गुरोन्मनोः ॥ २॥
प्राणानायम्य मन्त्रेण संस्मरेन्मूर्ध्नि तं गुरुम् ।
ऋषिछन्दो देवबीजशक्तिकीलान्यथोच्चरेत् ॥ ३॥
न्यासं ध्यानं जपं कृत्वा गुरुपादे समर्पयेत् ॥ ४॥
राघवेन्द्रगुरं ध्यायेत् काषायाम्बरधारिणम् ।
नीलाम्बुदसमाभासं भव्याङ्गं दीर्घबाहुकम् ॥ ५॥
रक्तराजीवपत्राक्षं ऊर्ध्वद्वादशपुण्ड्रकम् ।
बद्धपद्मासनं देवस्वभावं दण्डधारिणम् ॥ ६॥
आनाभिलम्बितस्वच्छतुलसीदलमालिकम् ।
ज्ञानमुद्राऽभयकरं प्रणतेष्टसुरद्रुमम् ॥ ७॥ (इति मन्त्रजपे ध्यानम्)
ध्यायामि गुरुमब्जाक्षं महासाम्राज्यशोभिनम् ।
प्रसन्नमप्पणाचार्ययोगीन्द्राद्यैः परीवृतम् ॥ ७॥ (इति ध्यानम्)
आवाहयामि त्वामत्र सर्वदेवैरधिष्ठितम् ।
शिष्यसङ्घैः परिवृतमिष्टदानोद्यतं प्रभुम् ॥ ८॥ (इत्यावाहनम्)
गुरुराज महाराज द्विजराजादि सेवितः ।
स्वर्णपीठासनं तुभ्यं ददामि स्वीकुरु प्रभो ॥ ९॥ (इत्यासनम्)
आगच्छ श्रीमहाराज सार्वभौम गुरूत्तम ।
यावत्पूजां करोम्यत्र तावत्सन्निहितो भव ॥ १०॥ (इति सन्निधापनम्)
श्रीगुरो राघवेन्द्रार्य भक्तवत्सल भूसुर ।
त्वदीयैस्सकलैः साकमत्रस्थः सुस्थिरो भव ॥ ११॥ (इति स्थिरीकरणम्)
जय श्रीगुरुराजेन्द्र राघवेन्द्र यतीश्वर ।
पूजां गृहीतुं भक्तस्य त्वं ममाभिमुखो भव ॥ १२॥ (इत्यभिमुखीकरणम्)
स्मृतिमात्रेण सन्तुष्ट प्रसिद्ध करुणानिधे ।
प्रसन्नो भव ते पूजां यथाशक्ति करोम्यहम् ॥ १३॥ (इति प्रसन्नीकरणम्)
अभिव्यक्तस्वस्वरूपज्ञानानन्द गरूत्तम ।
मया दत्तं गृहाणार्घ्यं नमः सात्विक सात्विक ॥ १४॥ (इत्यर्घ्यम्)
भूलोकपावनार्थाय कृतावतरण प्रभो ।
पाद्यं गृहाण राजर्षे पवित्रं कुरु मां प्रभो ॥ १५॥ (इति पाद्यम्)
सदा साक्षात्कृतश्रीश केशवादिकरूपिणे ।
नमस्तुभ्यं मया दत्तं गृहाणाचमनं गुरो ॥ १६॥ (इत्याचमनम्)
प्रह्लादस्यावताराय कल्याणोन्मुखरूपिणे ।
मधुपर्कं गृहाणेदं राजराजाय ते नमः ॥ १७॥ (इति मधुपर्कम्)
गुरुराज महोदार स्नाने पाने च सर्वदा ।
क्षीरप्रियस्य ते गव्यपयसा स्नापयाम्यहम् ॥ १८॥ (इति क्षीरस्नानम्)
गुरुराघवराजेन्द्र त्वां दध्ना स्नापयाम्यहम् ।
सदा मे त्वत्प्रसादेन शान्ताः स्युर्दुरुपद्रवाः ॥ १९॥ (इति दधिस्नानम्)
महाबलिमहाप्राज्ञ गुरुराज घृतप्रिय ।
घृतेन स्नापयामि त्वां पुष्टिर्मे वर्धतां बलम् ॥ २०॥ (इति घृतस्नानम्)
मधुरं मधुरावारं मधुवाचं मधुव्रतम् ।
मधुना स्नापयामि त्वां लोके मां मधुरं कुरु ॥ २१॥ (इति मधुस्नानम्)
शर्वरीश मनोहारिन् विषदोषनिवारण ।
शर्कराभ स्नापये त्वां शर्कराभं कुरुष्व माम् ॥ २२॥ (इति शर्करास्नानम्)
बदरी कदली चूतफलैस्त्वां स्नापयाम्यहम् ।
सफलं कुरु मे सर्वं तारकस्त्वं गुरुप्रभो ॥ २३॥ (इति फलस्नानम्)
शुद्धैः शुद्धिप्रदैः शान्तशीतलैः सुखदर्शन ।
शुद्धस्नानं कारयिष्ये शुद्धं मां कुरु ते गुरो ॥ २४॥ (इति शुद्धोदकस्नानम्)
विधिबद्धसुतैलेन चम्पकाद्यैः सुगन्धिना ।
कारये मङ्गलं स्नानं कुरु त्वं मम मङ्गलम् ॥ २५॥ (इति मङ्गलस्नानम्)
भूलोकमध्यसंसिद्धतीर्थपावनरूपिणम् ।
स्नापयामि सुतीर्थोत्थैः जलैर्मां पावय प्रभो ॥ २६॥ (इति तीर्थस्नानम्)
स्वर्णप्रख्यं शशिप्रख्यं रविप्रख्यं सदम्बरम् ।
कौपीनं यतिराजेन्द्र सव्यानं च गृहाण भोः ॥ २७॥ (इति वस्त्रम्)
ऊर्मिका मौक्तिकादि स्रक्कुण्डलादि सुभूषणम् ।
गृहाण गुरुराजेन्द्र कुरु मां लोकभूषणम् ॥ २८॥ (इति आभरणम्)
द्वादशाप्यूर्ध्वपुण्ड्राणि गोपीचन्दनगन्धतः ।
विष्णुपादोदकं दास्ये साकं श्रीतुलसीदलैः ।
गृहाण विष्णुभक्तानां सम्प्रदायप्रवर्तक ॥ २९॥ (इति ऊर्ध्वपुण्ड्रादिकम्)
गन्धकक्कोलकस्तूरी कर्पूरागरुकुङ्कुमैः ।
मिश्रितं चन्दनं तुभ्यं दास्यामि स्वीकुरु प्रभो ॥ ३०॥ (इति गन्धम्)
कस्तूरितिलकं चूर्णहरिद्रातण्डुलैर्युतान् ।
गृहाण गुरुवर्य त्वमलङ्कारार्थमक्षतान् ॥ ३१॥ (इति अक्षतान्)
मल्लिकामालतीमालां तुलसीदलमालिकाम् ।
केतकादीनि पुष्पाणि गृह्णीष्व गुरुसत्तम ॥ ३२॥ (इति पुष्पाणि)
वनस्पतिरसोत्पन्नं सुरभिं सुरभिप्रिय ।
महाभोगिन्निमं धूपं गृहाण प्रीतिमान् भव ॥ ३३॥ (इति धूपम्)
वर्तिद्वययुतं साज्यं दीपद्वन्द्वं तमोऽपहम् ।
निरन्तरप्रकाशोऽपि गृहाण कृपया मयि ॥ ३४॥ (इति दीपम्)
मयाऽऽनीतं यथाशक्ति यथाकालं यथाधनम् ।
भक्ष्योपदंशदध्याज्यक्षीराद्यन्वितमोदनम् ॥ ३५॥
शुण्ठीरामठ जम्बीरलवणादिसमन्वितम् ।
तक्रं च चन्दनोशीर कर्पूर घुसृणान्वितम् ॥ ३६॥
पानीयं च हरौ वायौ निवेद्य त्वं गुरूत्तम ।
भुक्त्वा परिजनैः साकं तुष्टो भव पितर्मम ॥ ३७॥ (इति नैवेद्यं -३५,३६,३७)
श्रीतेत्यादिदशस्तोत्रपठनं ते करोम्यहम् ।
साङ्गभोजनसाफल्यसिद्ध्यै स्वीकुरु सद्गुरो ॥ ३८॥ (इति दशस्तोत्रपाठम्)
वरदौ भक्तलोकस्य गरदौ सकलापदाम् ।
उदकेन करौ पादौ प्रक्षालय यतीश्वर ॥ ३९॥ (इति हस्तप्रक्षालनम्)
कुरुष्वाचमनं स्वामिन् मङ्गलार्थं मयाकृतम् ।
त्वन्त्रस्तवराजेन सहितं स्वीकुरु प्रभो ॥
कुरुष्वाचमनं स्वामिन् विष्णुपादोदकं पिब ।
गृहाण तुलसीपत्रं गुरुराज प्रसीद मे ॥ ४०॥ (इति पुनराचमनम्)
अपरोक्षीकृतश्रीश विधिबन्धविवर्जित ।
कामचार मयाऽऽनीतं ताम्बूलं प्रतिगृह्यताम् ॥ ४१॥ (इति ताम्बूलम्)
नीराजनाष्टकं स्वामिन् मङ्गलार्थं मयाकृतम् ।
त्वन्मन्त्रस्तवराजेन सहितं स्वीकुरु प्रभो ॥ ४२॥
राघवेन्द्रगुरुं राजसार्वभौमपदस्थितम् ।
रामचन्द्रप्रियं वन्दे रां बीजप्रतिपादितम् ॥ ४३॥ (इति प्रथमनीराजनम्)
रामचन्द्रमहाभक्तं पापाटव्यग्निरूपिणम् ।
राघवेन्द्रगुरुं वन्दे द्वितीयाक्षरवेदितम् ॥ ४४॥ (इति द्वितीयनीराजनम्)
घनाघनाभनीलाङ्गं घनरोगनिवारणम् ।
घोरतापत्रयहरं तृतीयावेदितं भजे ॥ ४५॥ (इति तृतीय नीराजनं)
वेदान्त सारसर्वज्ञं वेदव्यासपदार्चकम् ।
प्रह्लादस्यांशसम्भूतं तुरीयार्णवगतं भजे ॥ ४६॥ (इति चतुर्थनीराजनं)
द्रावयन्तं पिशाचादीन् द्राघिमामयहारकम् ।
द्राग्भक्तेष्टप्रदं वन्दे पञ्चमाक्षर वेदितम् ॥ ४७॥ (इति पञ्चमनीराजनम्)
यथाशक्ति यथाभक्ति सेवकानां फलप्रदम् ।
यवनाद्यैश्च संसेव्यं वन्दे षष्ठप्रपञ्चितम् ॥ ४८॥ (इति षष्ठनीराजनम्)
नन्दतीर्थकृतानेकग्रन्थभावप्रकाशकम् ।
अघविद्रावकं वन्दे सप्तमाक्षरवेदितम् ॥ ४९॥ (इति सप्तमनीराजनम्)
मानदं मध्वभक्तानां शठानां मानहानिदम् ।
मान्यं विरोधिनां चापि वन्दे वसुनिरूपितम् ॥ ५०॥ (इत्यष्टमनीराजनं)
इति श्रीराघवेन्द्राष्टाक्षरमन्त्रात्मकस्तवम् ।
नीराजनेषु पठतां राघवेन्द्रः प्रसीदति ॥ ५१॥
सुवर्णरत्नखचितं पुष्पं पुष्पाञ्जलिं तव ।
श्रीराघवेन्द्रगुरुराट् ददामि स्वीकुरु प्रभो ॥ ५२॥ (इति पुष्पाञ्जलिः)
जयशब्दैः पाहिशब्दैः गद्यैः पद्यैः प्रदक्षिणाम् ।
करोमि राघवेन्द्रार्य सन्तुष्टो भव सर्वदा ॥ ५३॥ (इति प्रदक्षिणा)
गुरुराड्राघवेन्द्रस्य एकैकस्मिन् प्रदक्षिणे ।
सप्तद्वीपमहीयात्राफलं विन्दति मानवः ॥ ५४॥
बाहुभ्यामथ जानुभ्यां शिरसा मनसा हृदा ।
पञ्चाङ्गकं प्रणामं ते कुर्वेऽभीष्टार्थदायिने ॥ ५५॥ (इति नमस्कारान्)
तव सेवारतान् कांश्चिद्भक्तान् प्रेषय मां प्रति ।
तेषां मरोरथं तात मया पुत्रेण पूरय ॥ ५६॥
अथवा करुणासिन्धो मयि सन्निहितः सदा ।
पुत्रस्य मम वाक्येन सर्वसर्वेष्टदो भव ॥ ५७॥
येन केनाप्युपायेन दूने दुर्यशसा भुवि ।
माहात्म्यं मयि विन्यस्य कुरुं मां लोकपूजितम् ॥ ५८॥
युक्ताऽयुक्तमजानानो याचे त्वां बालवद्गुरो ।
दाता त्राता दयालुस्त्वं यथेच्छसि तथा कुरु ॥ ५९॥
सर्वज्ञाय स्वतन्त्राय भक्तक्लेशविनाशिने ।
उदारचेतसे किं ते वदे मद्भारवाहिने ॥ ६०॥
ब्राह्मे मुहूर्ते चोत्थाय शयनावधि यत्कृतम् ।
मनोवाक्कायजनितं कर्म यद्वा शुभाशुभम् ।
तत्सर्वं प्रीतये भूयात् पादयोस्ते समर्पये ॥ ६१॥ (इति समर्पणम्)
क्षणे क्षणेऽपराधांस्तान् मत्कृतान् वै सहस्रशः ।
क्षमस्व गुरुराजेन्द्र प्रसीद तनये मयि ॥ ६२॥ (इति क्षमापणम्)
एवं यः कुरुते पूजां सकृद्वाऽपि बहिर्हृदि ।
गुरुराजप्रसादेन भुक्तिं मुक्तिं च विन्दति ॥ ६३॥
दिने दिने प्रकुर्वीत गुरुवारे विशेषतः ।
पूजाकालेऽथवा भक्त्या गुरुराजस्य सन्निधौ ॥ ६४॥
इदं च पूजापटलं पठतां सकलापदः ।
नश्यन्ति साङ्गपूजायाः फलं प्राप्नोत्यसंशयः ॥ ६५॥
इति श्रीमत्कृष्णावधूतपण्डितकृत श्रीमद्राघवेन्द्रतन्त्रे
प्रत्यक्षसिद्धिप्रदे गुरुपूजाविधानं नाम चतुर्थः पटलः ॥
Proofread by Gopalakrishnan, PSA Easwaran