ब्रह्मकृतं गौरीस्तोत्रम्
(सौरपुराणे २५-अध्यायान्तर्गतम्)
ब्रह्मोवाच-
त्वां नमामि शिवां शान्तामीश्वरार्धशरीरिणीम् ।
अनाद्यनन्तविभवां मूलप्रकृतिमीश्वरीम् ॥ १३॥
जन्ममृत्युजरातीतां जन्ममृत्युजरपहाम् ।
क्षेत्रज्ञशक्तिनिलयां परमाकाशमध्यगाम् ॥ १४॥
ब्रह्मेन्द्रविष्णुनमितामष्टमूर्त्यङ्गिनीमजाम् ।
प्रधानपुरुषातीतां सावित्रीं वेदमातरम् ॥ १५॥
ऋग्यजुःसामनिलयामृज्वीं कुण्डलिनीं पराम् ।
विश्वेश्वरीं विश्वमयीं विश्वेश्वरपतिव्रताम् ॥ १६॥
विश्वसंहारकरणीं विश्वमायाप्रवर्तिनीम् ।
सर्गस्थित्यन्तकरिणीं व्यक्ताव्यक्तस्वरूपिणीम् ॥ १७॥
पाहि मां देवदेवेशि शरणागतवत्सले ।
नान्या गतिर्महेशानि मम त्रैलोक्यचन्दिते ॥ १८॥
त्वं माता मम कल्याणि पिता सर्वेश्वरः शिवः ।
सृष्टोऽहं त्रिपुरघ्नेन सृष्टयर्थं शङ्करप्रिये ॥ १९॥
विविधाश्च प्रजाः सृष्टा न वृद्धिमुपयान्ति ताः ।
ततः परं प्रजाः सर्वा मैथुनप्रभवाः किल ॥ २०॥
संवधयितुमिच्छामि कृत्वा सृष्टिमतः परम् ।
शक्तिनी खलु सर्वासां त्वत्तः सृष्टिः प्रवर्तते ॥ २१॥
नैव सृष्टं त्वया पूर्वं शक्तीनां यत्कुलं शिवे ।
सर्वेषां देहिनां देवि सर्वशक्तिप्रदायिनी ॥ २२॥
त्वमेव नात्र सन्देहस्तस्मात्त्वं वरदा भव ।
मम सृष्टिविवृद्ध्यर्थमंशेनैकेन शाश्वते ॥ २३॥
मम पुत्रस्य दक्षस्य पुत्री भव शुचिस्मिते ।
प्रार्थिता वै तदा देवी ब्रह्मणा मुनिपुङ्गवाः ॥ २४॥
एकां शक्तिं भूयोर्मध्यात्ससर्जात्मसमप्रभाम् ।
आह तां प्रहसन्प्रेक्ष्य देवीं विश्वेश्वरो हरः ॥ २५॥
ब्रह्मणो वचनाद्देवि कुरु तस्य यथेप्सितम् ।
आदाय शिरसा शम्भोराज्ञां सा परमेश्वरी ॥ २६॥
अभवद्दक्षदुहिता स्वेच्छया ब्रह्मरूपिणी ।
पुनराद्या परा शक्तिः शम्भोर्देहं समाविशत् ॥ २७॥
अर्धनारीश्वरो देवो विभातीति हि नः श्रुतिः ॥
ततः प्रभृति विप्रेन्द्रा मैथुनप्रभवाः प्रजाः ॥ २८॥
एवं वः कथिता विप्रा देव्याः सम्भूतिरुत्तमा ।
पठेद्यः शृणुयाद्वाऽपि सन्ततिस्तस्य वर्धते ॥ २९॥
इति सौरपुराणे पञ्चविंशत्यध्यायान्तर्गतं ब्रह्मकृतं
गौरीस्तोत्रं सम्पूर्णम् ।
Encoded and proofread by PSA Easwaran