विश्वकर्मकृता जगन्मातास्तुतिः
विश्वकर्मोवाच ।
नमामि विश्वेश्वरि ! विश्वरूपे ! ब्रह्मेन्द्ररुद्रार्यमविष्णुरूपे ! ।
त्वया ततं विश्वमनन्तशक्ते ब्रह्मादिदेवैरभिनन्द्यरूपे ! ॥ ५॥
त्वमेव विश्वं रजसा विधत्से सत्त्वेन मातः परिपासि तच्च ।
त्वमेव सर्वं तमसाऽथ हंसि त्रैगुण्यमेतत् तव नित्यरूपम् ॥ ६॥
त्वया हता दैत्यगणा विमुक्तिं ब्रह्मर्षयो ज्ञानबलात् प्रपन्नाः ।
त्वमेव विष्णोरतुलाऽसि शक्तिः सर्वस्य हेतुः परमाऽसि माया ॥ ७॥
सतोऽसतो याऽपि परासि शक्तिश्चराचरं त्वं विदधासि विश्वम् ।
सम्मोह्य लोकान् सकलान् सुरेशान् काष्ठाकलाभिश्च ददासि भोगम् ॥ ८॥
ये त्वां प्रपन्ना न भयन्तु तेषां मृत्योस्तस्था दैत्यकृतं कदाचित् ॥ ९॥
त्वमेव लक्ष्मीः सुकृतामलक्ष्मीर्दुष्टात्मनां त्वं प्रमदास्वरूपा ।
विद्यास्वरूपासि जगत्त्रये त्वं प्रभास्वरूपा शशिसूर्ययोत्स्वम् ॥ १०॥
य आश्रितास्ते जगदाश्रयास्ते विपत्तिलेशो न च तेषु मातः ! ।
त्वमेव विश्वेश्वरि ! विश्वमेतद्धरस्यथाप्यायसि वारिरूपा ॥ ११॥
अनादिमध्याऽनिधनाप्यगम्या हरीशलोकेशसुरेश्वराणाम् ।
तेऽनुग्रहात् त्वां प्रभजन्ति भक्ता आनन्दरूपा निवसन्ति नाके ॥ १२॥
अभक्तिकामान् विनिहंसि रुष्टा त्वामेव मातः ! शरणं प्रपन्नः ।
धन्ये ममैते नयनेऽथ विद्या जनुश्च माता पितृवंश एव ॥ १३॥
कुलं चधन्यं चरणौ त्वदीयौ दृष्टौ यतस्ते जगदम्बिके ! मया ।
फलश्रुतिः -
क उवाच ।
एवं स्तुता जगन्माता वरमस्मै न्यवेदयत् ॥ १४॥
स वव्रे परमां भक्तिं सात तथेति तमब्रवीत् ।
इदं स्तोत्रं पठेद् यस्तु सर्वान् कामाँल्लभेच्च सः ॥ १५॥
सर्वत्र विजयं पुष्टिं विद्यामायुः सुखं शिवम् ।
इति विश्वकर्मकृता जगन्मातास्तुतिः सम्पूर्णा ॥
- ॥ श्रीगणेशपुराणं क्रीडा (उत्तर)खण्डः । अध्यायः ९५ । २.९५ ५-१५॥
- .. shrIgaNeshapurANaM krIDA (uttara)khaNDaH . adhyAyaH 95 . 2.95 5-15..
Proofread by Preeti Bhandare