नवरत्नमालिका अम्बिकास्तुतिः
(श्रीकालहस्तिक्षेत्रस्थज्ञानप्रसूनाम्बिकास्तुतिः)
श्रीनरकण्ठीरवशास्त्रिविरचिता ।
श्रीनाकनाथमुखनानासहस्रसुरसेनाग्रमौलिवलभी-
सूनावलीबहुललीनालिनीमधुरगानाञ्चिताङ्घ्रिनलिना ।
मानातिलङ्घिमहिमानादिरानतजनानामनेकफलदा
ज्ञानाम्बिका भवतु दीनावनी कुशलदानाय मे भगवती ॥ १॥
राकाशशाङ्करुचिराकारचारुपादना(पतदा)काशसिन्धुलहरी-
नीकाशसूक्तिसरणीकारिणी प्रकृतिमूकात्मनामपि नृणाम् ।
पाकाहितप्रमुखनाकालयप्रकरशोकापनोदनचणा
श्रीकालहस्तिनगरैकायनावतु पिनाकायुधस्य दयिता ॥ २॥
श्रेणीभवद्दिविषदेणीदृगुल्लसितवेणीपिनद्धसुमनो-
द्रोणीमरन्दरसवेणीप्रसारभृशशोणीकृताङ्घ्रिकमला ।
श्रोणीनटत्सरकृपाणीमनोज्ञघनवेणी कृपार्द्रहृदया
क्षोणीधरेन्द्रतनयाणीयसीमपि च वाणीं प्रगल्भयतु मे ॥ ३॥
केलीसमाकलिततालीदलश्रवणपालीविभूषणमणी-
वा(पा)ली मदोद्धतमरालीगतिर्दिंशतु नालीकदीर्घनयना ।
चूलीतलाभरणनालीकवैरिशकलालीभवत्सुरवधूःऽ
काली गिरं मृदु मृणालीभुजा मम मधूलीरसोर्मिमधुराम् ॥ ४॥
हृद्यानवद्यतरगद्यानुबद्धमृदुपद्याभिरूपकवितां
दद्याज्जगन्महितविद्यां त्रयीशिखरवेद्या हिमाद्रितनया ।
आद्या परा मम शरद्यामिनीशभृदविद्याविलासशमनी
विद्याधरी समभिवाद्या ज्वलन्मणिनिषद्यायमाणरशना ॥ ५॥
हालामदाकलितहेलालसद्बहुललोलारुणाक्षियुगली
लीलापिनद्धसुरसालावलीप्रसवमालासुगन्धचिकुरा ।
कैलासनाथहितशीला कराञ्चितशुकालापलोलहृदया
वेलातिलङ्घिशुभजालाय मे भवतु शैलाधिनाथतनया ॥ ६॥
चण्डापदानयुतचण्डाभिधासुरपिचण्डावदारणचणा
भण्डासुरोग्रभुजदण्डाग्रनिर्दलनशौण्डायुधोद्धतकरा ।
शुण्डानुकारिकरकाण्डावदीर्णजगदण्डाट्टहासभयदा
दण्डायुधाय शशिखण्डावतंसितशिखण्डा न चार्पयतु माम् ॥ ७॥
हुङ्कारनिर्गलदशङ्कापतद्विषदहङ्कारमारतिमिरां
अङ्कान्तलम्बिसितक्ङ्कालहारसदलङ्कारबन्धुरगलाम् ।
ह्रीङ्कारिणीं भयदटङ्कारकार्मुककरां कालहस्तिनिलयां
पङ्कापहामपकलङ्कावतंसहरिणाङ्कां भजे भगवतीम् ॥ ८॥
कण्ठारवोद्यदुपकण्ठारिदुर्विषहकण्ठीरवेन्द्रगमनो-
त्कण्ठा निकामशितिकण्ठानुकर्षिकलकण्ठानुलापललिता ।
शुण्ठीभवद्दनुजकण्ठीरवप्रकरकुण्ठीकृतिक्षमबला
कुण्ठीकरोतु नरकण्ठीरवाख्यकविकण्ठीरवस्य दुरितम् ॥ ९॥
श्रीकालहस्तिनिलयज्ञानप्रसवाम्बिकामुदे रचिता ।
नरकण्ठीरवकृतिना नवरत्नस्तुतिरियं चिरं जयतु ॥ १०॥
॥ इति श्रीनरकण्ठीरवशास्त्रिविरचिता नवरत्नमालिका समाप्ता ॥
श्रीनरकण्ठीरवशास्त्रि कविरयं आन्ध्रो वट्टियल्लिवंशीयः
१९-शतकान्ते मद्रास-नगरान्नतिदवीयसि कार्वेटिनगरनाम्नि स्थले
तदधीशस्य बोम्मराजस्यास्थानकविरासीत् । अस्य पौत्रा अद्यापि जीवन्ति ।
अस्य कृतय -
१ अभिनवासवदत्ता (सुबन्धुकृत-वासवदत्तागद्यकाव्यस्य पद्यैः सङ्ग्रहः),
२ यतिसार्वभौमोपहारः (श्रीशङ्कराचार्यपारम्पर्यवर्णनम्)
३ कपिलेश्वरस्तुतिः (तिरुप्पतिक्षेत्रस्थशिवस्तुतिः); गैर्वाण्यां (४-११, १५-११-६६) मुद्रिता ।-
४ ज्ञानप्रसूनाम्बिका नवरत्नमालिका (अत्र मुद्र्यमाणा)।
एता अद्य उपलभ्यन्ते । केचन शास्त्रग्रन्थाश्चानेन रचिताः ।
नवरत्नमालिकाया मातृका अड्यार-कोशागारेऽप्युपलभ्यते । इयं
क्वचिदन्यत्र मुद्रितेति श्रूयते, किन्तु अप्रसिद्धा दुर्लभा च ।
Encoded and proofread by Sunder Hattangadi