श्रीराधाकृष्णकवचम्
ॐ श्रीगणेशाय नमः ।
श्रीभैरव उवाच ।
अधुना कथयिष्यामि राधकृष्णस्य भैरवि ।
कवचं मन्त्रगर्भं तु वज्रपञ्जरसंज्ञकम् ॥ १॥
रहस्यं सर्वदेवानां मर्त्यानां च विशेषतः ।
अस्यैव धारणाच्चाहं सर्वज्ञोऽस्मि महेश्वरि ॥ २॥
यद्धारणात्ससर्जादौ ब्रह्मा सृष्टिं पृथग्विधाम् ।
यं धृत्वा त्रिदशेन्द्रत्वं प्रालेभे पाकशासनः ॥ ३॥
व्योम्नि प्रकाशते भानुर्नित्यं यद्धारणात्प्रिये ॥
सर्वप्राणिनियन्तापि बभूव धर्मराड्यतः ॥ ४॥
धनाध्यक्षः कुबेरोऽभूदस्य सन्धारणादपि ॥
यस्मिन्धृते पाशहस्तः सलिलेशो बभूव ह ॥ ५॥
ये ये पूर्वं दानवेन्द्राः प्रबलाः कर्मणापि च ॥
अस्यैव धारणात्सर्वे ते ते नीता मृतिं मया ॥ ६॥
शक्नुयात्को गणयितुं माहात्म्यमस्य चेश्वरि ।
विनानेन न सिद्धिः स्यादिह लोके परत्र च ॥ ७॥
कवचं यं समाबध्य मन्त्रजापं समाचरेत् ।
तेनैव मन्त्रसिद्धिश्च जायते परमाद्भुता ॥ ८॥
कवचस्यास्य देवेशि ब्रह्मा प्रोक्तो मुनिस्तथा ।
गायत्रं छन्द इत्युक्तं श्रीराधाप्रियवल्लभः ॥ ९॥
देवतात्र परं बीजं मायायाः परमेश्वरि ।
रमा शक्तिः कामराजबीजं कीलकमीश्वरि ॥ १०॥
चतुर्वर्गफलावाप्तौ विनियोगः प्रकीर्तितः ॥ ११॥
अथ ध्यानम् ॥
ध्यानं वक्ष्ये महादेवि श्रीराधामाधवस्य च ।
यज्ज्ञात्वा मन्त्रवित्प्राज्ञः सिद्धिं प्राप्नोति चैश्वरीम् ॥ १२।
श्रीमदुद्यानकल्पद्रुमविटपलसत्स्वर्णदोलाधिरूढं
श्रीराधां रिङ्खमाणं कटितटविलसत्क्षुद्रघणटारवाढयम् ।
वंशीरन्ध्रान्तरं श्रीमुखकमलगलद्वायुना पूर्यमाणं
राधाप्रेक्षणहर्षफुल्लनयनं वन्दे सदा माधवम् ॥ १३॥
श्यामं पूर्णेन्दुवदनं वराभयलसत्करम् ।
राधाऽऽश्लिष्टतनुं कान्तं मुक्तिदं माधवं भजे ॥ १४॥
ॐ ह्रीं मस्तकं माधवोऽव्याच्छ्रीं श्रीकृष्णो ललाटकम् ।
पायान्नेत्रे सदा पातु क्लीं गोविन्दः समन्ततः ॥ १५॥
श्रीराधावल्लभः पातु नासां मे भक्तवत्सलः ॥
दामोदरो मुखं पातु वैकुण्ठः पातु कण्ठकम् ॥ १६॥
वक्षःस्थलं सदा पायान्मम श्रीवत्सलाञ्छनः ॥
चतुर्भुजो भुजौ पातु हस्तौ रक्षतु केशवः ॥ १७॥
पार्श्वौ मम सदा पातु पूर्णचन्द्रनिभाननः ॥
हृदयं मुकुन्दः पायान्मे कुक्षिं विश्वम्भरो मम ॥ १८॥
पृष्ठं पार्थसखः पातु नाभिं पञ्चजनाभियुक् ॥
गुह्यं मे रक्षतु श्रीमान्सर्वतोविष्टरश्रवाः ॥ १९॥
शिश्नं श्रीशः सदा पायात्कटिं कैटभजित्तथा ॥
ऊरू त्रिविक्रमः पातु जानुनी च जनार्दनः ॥ २०॥
जङ्घे गदाधरः पातु गुल्फौ मे गरुडध्वजः ॥
पादौ सहस्रपात्पातु राधेशः सकलं वपुः ॥ २१॥
इन्द्रो मां पूर्वतः पातु वह्निर्वह्नौ सदा मम ॥
यमो दक्षिणतः पातु नैरृते निरृतिस्तथा ॥ २२॥
वरुणः पश्चिमे पायाद्वायव्येऽव्यात्सदागतिः ॥
कुबेर उत्तरे पायादैशान्यामीश्वरोऽवतु ॥ २३॥
दशदिक्षु सदा पातु श्रीराधावल्लभः प्रभुः ॥
प्रभाते पातु श्रीकृष्णो मध्याह्ने गोपवल्लभः ॥ २४॥
सायं राधाप्रियः पातु प्रदोषे गोपतिप्रियः ॥
अर्धरात्रे सदा पातु प्रद्युम्नो भगवान्मम ॥ २५॥
निशान्ते माधवः पातु विष्वक्सेनस्तु सर्वदा ॥
रणे राजभये द्यूते विवादे शत्रुसङ्कटे ॥ २६॥
ॐ ह्रीं श्रीं क्लीं सदा पातु श्रीराधावल्लभः प्रभुः ॥ २७॥
ॐ ह्रीं श्रीं गरुडध्वजः सगतिमान्पायाद्रणे सङ्कटे
श्रीकृष्णो भगवान्ममारिनिवहान्विध्वंसयेत्तत्क्षणात् ।
गोविन्दोऽवतु मां सदा हरिभयाद्राधाप्रियो माधवो
मां पायाद्विपदः श्मशानगचरोऽव्याद्भयात्सर्वतः ॥ २८॥
(तोयौघाज्ज्वलनोद्भवादरिभयान्माम्पातु राधेश्वरः)।
इतीदं कवचं दिव्यं वज्रपञ्जरकाभिधम् ॥
सर्वसौभाग्यजननं सुखदं सन्ततिप्रदम् ॥ २९॥
लक्ष्मीसंवर्धनं देवि परमार्थरसायनम् ॥ ३०॥
मन्त्रगर्भपरं साररहस्यं त्रिदिवौकसाम् ।
त्रिसन्ध्यं यः पठेन्नित्यं कवचं प्रयतः पुमान् ॥ ३१॥
स याति परमं धाम वैष्णवं साधकोत्तमः ।
दशवारं पठेद्यस्तु रतादौ वैष्णवोत्तमः ॥ ३२॥
विष्णुभक्तिरतं पुत्रं प्राप्नोति कुलदीपकम् ॥
रविवारे लिखेद्यस्तु तिष्यर्क्षे साधकोत्तमः ॥ ३३॥
गन्धाष्टकेन विमले भूर्जे रन्ध्रविहीनके ॥
लिखित्वा रक्तवस्त्रेण संवेष्ट्य स मनुं जपन् ॥ ३४॥
सुवर्णगुटिकामध्ये स्थापयित्वा विधानतः ॥
मूर्ध्नि तान्धारयेद्धीमान् श्रीराधावल्लभं स्मरन् ॥ ३५॥
रणे रिपूञ्जयत्याशु वादे स्तुत्यो भविष्यति ॥
नारीं रूपवतीं साध्वीं लभते नात्रसंशयः ॥ ३६॥
वन्ध्या वा काकवन्ध्या वा मृतवत्सापि याङ्गना ॥
सा बध्नीयात्कण्ठदेशे लभेत्पुत्रांश्चिरायुषः ॥ ३७॥
गुरूपदेशतो धृत्वा गुरुं ध्यात्वा मनुं जपन् ॥
वर्णलक्षपुरश्चर्याफलं प्राप्नोति साधकः ॥ ३८॥
बहुनात्र किमुक्तेन कवचस्यास्य पार्वति ॥
विनानेन न सिद्धिः स्यान्मन्त्रस्यास्य महेश्वरि ॥ ३९॥
गोप्याद्गोप्यं महादेवि श्रीराधाकृष्णसम्भवम् ।
वज्रपञ्जरकं वर्म गोपनीयं महेश्वरि ॥ ४०॥
दीक्षिताय कुलीनाय शिष्याय गुणशालिने ।
दातव्यं श्रद्दधानाय कृष्णभक्तिरतायच ॥ ४१॥
अभक्ताय न दातव्यं कुचैलाय दुरात्मने ॥
क्रूराय परशिष्याय शठाय परमेश्वरि ॥ ४२॥
रहस्यं सर्वसाराढ्यं गोपनीयं स्वयोनिवत् ॥ ४३॥
॥ इति श्रीविश्वनाथसारोद्धारे महातन्त्रे
श्रीराधाकृष्णकवचं समाप्तम् ॥
Entered by Sivakumar Thyagarajan
Proofread by Sivakumar Thyagarajan, PSA Easwaran