Shri Sharada Stava 4

 श्रीशारदास्तवः ४ 
     (पृथ्वी)
नमामि धवलांशुकां सरसिजासनां शारदां
     नमामि तिमिरापहां सकलबुद्धिदां देवताम् ।
नमाम्यमरपूजितां विविध-गीत-सन्तोषितां
     नमामि शरणार्थिनां व्यसननाशिनीं सिद्धिदाम् ॥ १॥

नमामि सरसीरुहासन-विभूषितां सुन्दरीं
     करे स्फटिकमालिकां विदधतीं प्रसन्नाननाम् ।
सदाऽध्ययनतत्परान् सततभक्तिसेवारतान्
     जनानवसि शारदे सकल सौख्यदे देवते ॥ २॥

न राज्यमपि कामये न च सूखेऽपि मे कामना
     न कीर्तिमपि काङ्क्षते मम मनो यशोदायिनि ।
मदीयहृदये दयामयि सदा निवासं कुरु
     त्वदीयगुणकीर्तने मम रतिः सदा वर्धताम् ॥ ३॥

त्वमेव वरदायिनी सकलवाङ्मयाधीश्वरी
     सुकीर्तिधनदायिनी त्वमसि देवि वीणाधरे ।
नमन्ति विबुधाः सदा तव पदारविन्दद्वयं
     त्वमेव भव शारदे भवनिधौ ममोद्धारिणी ॥ ४॥

तवैव कृपया विधिः सृजति देवि विश्वावलीं
     सरस्वति मुरारिणा जगदिदं सुसंरक्षितम् ।
तवैव कृपया हरो हरति विश्वपापावलीं
     कृपा न तव चेत्कथं हरिहरादयः पान्तु नः ॥ ५॥

त्रिलोकभयनाशिनी त्रिविधतापसंहारिणी
     सुधामधुरभाषिणी सुमनसां यशोदायिनी ।
सुवर्णपदधारिणी नवरसैश्च सन्तोषिणी
     ममागुणविनाशिनी भवतु साऽथ तेजस्विनी ॥ ६॥

सदैव कविमानसे विजयसे जगन्मोहिनी
     मरालनृपवाहिनी मधुरमालपन्ती सदा ।
नितान्तरमणीयतां विदधती सुवर्णायुता
     मदीयमनसि स्थिता भवतु दिव्यवागीश्वर ॥ ७॥

अनल्पसुखदायिनी दुरितदुःखविध्वंसिनी
     सुभाषितसुभाषिणी नवरसाम्बुसन्तोषिणी ।
मनोमलविनाशिनी सकलसौख्यनिष्यन्दिनी
     मदन्तरनिवासिनी भव सदैव मेधाविनी ॥ ८॥

इमं संस्तवं शारदायाः सुरम्यं
     पठेत् प्रत्यहं सादरं मानवो यः ।
जडत्वं मतेस्तस्य नीत्वा विनाशं
     प्रसन्ना भवेत् शारदा ज्ञानदात्री ॥ ९॥

इति श्री आपटीकरविरचितः श्रीशारदास्तवः सम्पूर्णः ।

Encoded and proofread by Mandar Mali aryavrutta gmail.com