श्रीहनुमदाचार्यप्रणीतः श्रीहनुमत्स्तवः
आनन्दभाष्यकृद्रामानन्दं रामं तथेश्वरम् ।
भावानन्दं गुरुं नत्त्वा कुर्वेऽहं हनुमत्स्तवम् ॥ १॥
स्फुरद्विद्युदुल्लासवालाग्रघण्टा झणत्कारनादप्रवृद्धाट्टहासम् ।
भजे वायुसूनुं भजे रामदूतं भजे वज्रदेहं भजे भक्तबन्धुम् ॥ २॥
प्रपन्नानुरागप्रभाकाञ्चनाङ्गं जगद्गीतशौर्यं तुषाराद्रिधैर्यम् ।
तृणीभूतहेतिं रणोद्यद्विभूतिं भजे वायपुत्रं पवित्रात् पवित्रम् ॥ ३॥
भजे हेमरम्भावने नित्यवासं भजे बालभानुप्रभाचारुहासम् ।
भजे चन्द्रिकाकुन्दमन्दारहासं भजे सन्ततं रामसर्वेशदासम् ॥ ४॥
भजे लक्ष्मणप्राणरक्षासुदक्षं भजे तोषितानेकगीर्वाणपक्षम् ।
भजे घोरसङ्ग्रामसीमाहताक्षं भजे राममन्त्रप्रचारे सुदक्षम् ॥ ५॥
मृगाधीशनाथं क्षितिक्षिप्तपादं घनाक्रान्तजङ्ङ्घ कटिस्थोडुसङ्घम् ।
अजाण्डस्थकेशं भुजश्लेषिताशं जयश्रीसमेतं भजे रामदूतम् ॥ ६॥
चलद्वालघातं भ्रमच्चक्रवालं कठोराट्टहासप्रभिन्नाब्धिकाण्डम् ।
महासिंहनादाद् विशीर्णत्रिलोकं भजे चाञ्जनेयं प्रभुं वज्रकायम् ॥ ७॥
रणे भीषणे मेघनादे सनादे सरोषं समारोप्य सौमित्रिमंसे ।
घनानां खगानं सुराणां च मार्गे नटन्तं ज्वलन्तं हनूमन्तमीडे ॥ ८॥
नखध्वस्तजम्भारिदम्भोलिधारं भुजाग्रेण निर्भूतकालाग्रदण्डम् ।
पदाघातभीताहिजाताऽधिवासं रणक्षोणिदक्षं भजे पिङ्गलाक्षम् ॥ ९॥
महाभूतपीडां महोत्पातपीडां महाव्याधिपीडां महाधिप्रपीडाम् ।
हरत्याशु ते पादपद्मानुरक्तिः नमस्ते कपिश्रेष्ठरामप्रियाय ॥ १०॥
सुधासिन्धुमुल्लङ्घय सान्द्रे निशीथे सुरान्तः प्रगुप्तां सुधामोषधीं ताम् ।
रणाद् द्रोणशैलेयसारेण नेतुं विनाऽज त्वया कः समर्थः कपीन्द्र ॥ ११॥
समुद्रं तरङ्गादिरौद्रं विनिद्रो विलङ्घयोडुसङघं स्तुतो मर्त्यसङघैः ।
निरातङ्कमाविश्य लङ्कां विशङ्को भवानेव सीतावियोगापहारी ॥ १२॥
क्षमानाथनाम्ना क्षमाजेशनाम्ना ह्यशोकां सशोकां विहायाप्रहर्षात् ।
वनं तद् घनं जीवनं दानवानां विपाट्य प्रहृष्यन् हनूमँस्त्वमेव ॥ १३॥
जने हारयन् भीतिपीडां शरीरे निरूढं रणारूढगाढप्रताप ।
भवत्पादभक्तिं भवद्भक्तिरक्तिं कुरु त्वं हनूमन् प्रभो मे दयालो ॥ १४॥
नमस्ते महासत्ववाहाय तुभ्यं नमस्ते महाकालकालाय तुभ्यम् ।
नमस्ते महामर्त्यकायाय तुभ्यं नमस्ते सदा स्वामिकार्याय तुभ्यम् ॥ १५॥
द्वारपीठेश्वरश्रीमधनुमदार्यनिर्मितः ।
स्तवोऽयं पठतां भूयात् सर्वसौख्यप्रदायकः ॥ १६॥
इति श्रीहनुमदाचार्यप्रणीतः श्रीहनुमत्स्तवः सम्पूर्णः ।
Encoded and proofread by Mrityunjay Pandey