श्रीभवानीशङ्कराष्टावधानश्लोकाः
विप्राणामुपकारकान् शुभकरान् ऋग्वेदमन्त्रानिमान्
नानार्थाभिहितांस्त्वया प्रकटितान् भक्त्या मया भाषितान् ।
स्वर्गाधिष्ठितवासवादिविबुधैः सम्पूजिताङ्घ्रिद्वय
भक्तानामभयप्रदायक शिव त्वं शङ्कराकर्णय ॥
देव देवोत्तम देवतासार्वभौम अखिलाण्डकोटिब्रह्माण्डनायक
``ऋग्वेदप्रिय ऋग्वेद''सेवामवधारय ॥ १॥
दिव्यं सुस्वर शोभनार्थकमिमं भक्त्या मया भाषितं
यज्ञानामुपयोगिनं शृणु यजुर्वेदं तवाह्लादकम् ।
स्वाहाकारयुजं सुरादिसुखदं दक्षाध्वरध्वंसक
साधूनां भवभीतिनाशनकर श्रीमद्भवानीपते ॥
देव देवोत्तम देवतासार्वभौम अखिलाण्डकोटिब्रह्माण्डनायक
``यजुर्वेदप्रिय यजुर्वेद''सेवामवधारय ॥ २॥
वेदानां परमं मया निगदितं कर्णामृतं तोषदं
दुष्टानां क्रथने विशारद चिरं त्रैलोक्यनाथाग्रणीः ।
भक्तानां परिपालनोत्सुकतम प्याट् सामगानप्रिय
हेमाद्रिस्थितयोगिवन्दितपद त्वं सामगानं शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``सामवेदप्रिय सामवेद''सेवामवधारय ॥ ३॥
नानार्थाभिहितांस्त्वया प्रकटितांश्चाथर्ववेदोदयान्
मन्त्रान्वीर्ययुतानभीष्टफलदान् लोके त्वया विस्तृतान् ।
कैलासस्थितनन्दिमुख्यगणपैः स्तोत्रैः सदा वन्दित
लोकाभीष्टफलप्रदातृ गिरिश त्वं कृत्तिवासः शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``अथर्ववेदप्रिय अथर्ववेद''सेवामवधारय ॥ ४॥
षट्त्रिंशात्मकतत्त्वसाधनकरं वेदान्तवेद्याव्यय
विश्वोत्पादक विश्वतोमुखमिदं त्वल्पाक्षरं सारवत् ।
अस्तोभं त्वनवद्यसूत्रममलं सर्वार्थसम्पादकं
शश्वत्संश्रुतिसागरं समुदितं वेदान्तशास्त्रं शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``वेदान्तशास्त्रप्रिय वेदान्तशास्त्र''सेवामवधारय ॥ ५॥
भस्मोद्धूलितविग्रहोपनिषदां वाक्यैरुपबृंहितं
पाराशर्यकृतं पुराणमुदितं नित्यं मया भक्तितः ।
एतत्पञ्चसुलक्षणान्वितपदं ह्यध्यात्मतत्त्वं परं
शश्वत्संश्रुतिसागरोद्धर विभो त्वं सेतिहासं शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``पुराणप्रिय पुराण''सेवामवधारय ॥ ६॥
विश्वाधारक विश्वपोषक भवन् विश्वाद्य विश्वेश्वर
विश्वेषां स्थितिसृष्टिनाशनविधे विश्वात्मकाधीश्वर ।
विद्याधारक विश्वरूपक गुरो विद्याप्रदातः प्रभो
विद्वद्भिर्नुत वन्द्यमानचरण त्वं गद्यमाकर्णय ॥
देव देवोत्तम देवतासार्वभौम अखिलाण्डकोटिब्रह्माण्डनायक
``गद्यपद्यप्रिय गद्यपद्य''सेवामवधारय ॥ ७॥
माताङ्गासुरकन्धरापहर भो माराङ्गसन्दाहक
माया पारग मान्य माधवसुहृन् मायागुणैर्मोहक ।
मायातीत निरञ्जनात्मक सदा माहेन्द्रवन्द्याद्य भो
मार्कण्डेयमुनीन्द्रपूजितपद सोमाष्टकं त्वं शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``अष्टकप्रिय अष्टक''सेवामवधारय ॥ ८॥
श्रुत्यादिस्तुतिभिः प्रकाशित जटिन् विध्वग्निसूर्याम्बक
नानालङ्कृतभोऽन्धकासुररिपो विद्याधराख्यापितम् ।
भो स्वामिंस्तवमानसप्रियमिदं षड्जादिभेदान्वितं
श्रीरागादियुतं शुभं सुरुचिरं सङ्गीतमाकर्णय ॥
देव देवोत्तम देवतासार्वभौम अखिलाण्डकोटिब्रह्माण्डनायक
``सङ्गीतप्रिय सङ्गीत''सेवामवधारय ॥ ९॥
दैत्योन्मन्थविधौ पराक्रमनिधे हे शीर्षमालाधर
साधूनां हृदयाम्बुजस्थ सततं रुद्राक्षमालाधर ।
रक्षोहृद्भयकारकं शुभकरं दुग्धाच्छशङ्खोत्थितं
ॐकारध्वनिमीश कर्णमधुरं शम्भो सदाकर्णय ॥
देव देवोत्तम देवतासार्वभौम अखिलाण्डकोटिब्रह्माण्डनायक
``शङ्खवाद्यप्रिय शङ्खवाद्य''सेवामवधारय ॥ १०॥
श्रीमच्छङ्करदेशिकादिगुरुभिः स्वाराधितानन्दद
श्रीमद्भक्तजनोत्तमैः कृतमिदं नादेन संशोभितम् ।
सप्तध्वानयुतं शुभं सुरुचिरं श्रीमन् मृडानीपते
शृङ्गालङ्कृतरागनादसहितं वेणुं सदा त्वं शृणु ॥
देव देवोत्तम देवतासार्वभौम अखिलाण्डकोटिब्रह्माण्डनायक
``वेणुवाद्यप्रिय वेणुवाद्य''सेवामवधारय ॥ ११॥
त्रिपुरदहनमूर्ते पावनापारकीर्ते
त्रिभुवनधरमूर्ते शूलपाणे त्रिमूर्ते ।
डमरुकधरमूर्ते विश्वमूर्तेऽष्टमूर्ते
भवभयहरमूर्ते मौरिवाद्यं श्रुणु त्वम् ॥
देव देवोत्तम देवतासार्वभौम अखिलाण्डकोटिब्रह्माण्डनायक
``मौरिवाद्यप्रिय मौरिवाद्य''सेवामवधारय ॥ १२॥
भेरिदुन्दुभिझर्झरोर्ध्वकतुरीशङ्खानकाङ्कीतत
ढक्कामर्दलतालवेणुडमरुश्रुत्यादिवाद्यारवान् ।
नानाभेदयुतान् जडीकृतककुभ्घोषाश्रवो रन्ध्रकान्
श्रीवल्याख्यपुराधिवास भगवन् श्रीशङ्कराकर्णय ॥
देव देवोत्तम देवतासार्वभौम अखिलाण्डकोटिब्रह्माण्डनायक
``सर्ववाद्यप्रिय सर्ववाद्य''सेवामवधारय ॥ १३॥
इति वत्सगोत्रोत्पन्नगणपतिशर्मणा विरचिताः
श्रीभवानीशङ्कराष्टावधानश्लोकाः सम्पूर्णाः ।
Encoded and proofread by Rajesh Thyagarajan