परमाद्वयद्वादशिका
(परमार्थद्वादशिका)
तथ्यातथ्यमकल्पमल्पश्यनैर्जल्पक्रमं संहरं-
स्तत्संहारक्रमे न किं कथमिदं कोऽस्मीति माचीकॢपः ।
(शान्तिं सम्भज नित्यमल्पवचनैर्जल्पक्रमं संहर
तत्संहारगमेन किं कथमिदं कोऽसीति मा चीकॢपः ।)
भावाभावविभागभासनतया यद्भात्यभग्नक्रमं
तच्छून्यं शिवधाम वस्तु परमं ब्रह्मात्र कोऽर्थग्रहः ॥ १॥
यद्यतत्त्वपरिहारपूर्वकं तत्त्वमेषि तदतत्त्वमेव हि ।
यद्यतत्त्वमथ तत्त्वमेव वा तत्त्वमेव ननु तत्त्वमीदृशम् ॥ २॥
यद्यद्भाति न भानतः पृथगिदं भेदोऽपि भातीति चेत्
भाने सोऽपि न भाति किं जहि ततस्तद्भङ्गिभङ्गग्रहम् ।
स्वप्ने स्वप्नतया प्रथां गतवति क्रीडैव नो भीतिकृ- (गतवती)
च्छस्त्राघातजलावपातहुतभुङ्निर्घातबन्धादिकम् ॥ ३॥
ध्यानक्रियाकलनपूर्वकमध्यवस्ये- (ज्ञानक्रिया)
द्यद्यद्भवान् कथय कोऽस्य जडाद्विशेषः ।
स्फूर्जञ्जडोऽपि न किमद्वयबोधधाम (स्फूर्जन्जडोऽपि)
निस्सीमनित्यनिरवग्रहसत्यरूपम् ॥ ४॥
भावानामवभासकोऽसि यदि तैर्मालिन्यमातयन्ते (तैर्मोहः किमातन्यते)
किं ते तद्यदि भान्ति हन्त भवतस्तत्राप्यखण्डं महः ।
नोचेन्नास्ति तदेवमप्युभयथा निर्व्याजनिर्यन्त्रणा-
त्रुट्यद्विभ्रमनित्यतृप्तमहिमा नित्यप्रबुद्धोऽसि भोः ॥ ५॥ (नित्यं प्रबुद्धोऽसि))
दृष्टिं बहिः प्रहिणु लक्ष्यमथान्तरित्थं (लक्ष्यपथातिरिक्तं)
स्याद्भैरवानुकरणं वत वञ्चनेयम् ।
निर्द्वन्द्वबोधगगनस्य न बाह्यमस्ति
नाभ्यन्तरं निरवकाशविकासधाम्नः ॥ ६॥
वासनाप्रसरविभ्रमोदये यद्यदुल्लसति तत्तदीक्ष्यताम् ।
आदिमध्यनिधनेषु तत्र चेत् भासि भासि तव लीयतेऽखिलं (लीयते जगत्) ॥ ७॥
मोहो दुःखवितर्कतर्कणघनो हेतुप्रथानन्तर-
प्रोद्यद्विभ्रमशृङ्खलातिबहुलो गन्धर्वपूस्सन्निभः (गन्धर्वपूःसन्निभः) ।
द्वैताद्वैतविकल्पनाश्रयपदे चिद्व्योम्नि नाभाति चेत्
कुत्रान्यत्र चकास्तु कास्तु परमा निष्ठाप्यनेकात्मना ॥ ८॥
स्वप्ने तावदसत्यमेव मरणं सौषुम्नधाम्निप्रथा
(स्वप्ने तावदसत्यमेव सरणं सौसुप्तधाम्निप्रथा)
नैवास्यास्ति तदुत्तरे निरुपधौ चिद्व्योम्नि कोऽस्य ग्रहः ।
जाग्रत्येव घटावभासवदथ स्याच्चेत्क्षणे कुत्रचि- (जाग्रत्येव धरावदर्थनिचयः)
दारोप्यापि तदत्ययेपृथगिदं तत्रापि का खण्डना ॥ ९॥ (ज्ञानेनाथ तदत्ययेऽपृथगिदं)
ये ये केऽपि प्रकाशा मयि सति परमव्योम्नि लब्धावकाशाः
क्वाशामेतेषु नित्ये महिमनि मयि भोः निर्विभागं विभान्ति ।
(काशा ह्येतेषु / काशामेतेषु / काशांह्येतेषु)
सोऽहं निर्व्याजनित्यप्रतिहतकलनानन्तसत्यस्वतन्त्र-
(ध्वस्तद्वैताऽद्वयारिद्वयमयतिमिरापारबोधप्रकाशः)
ध्वस्तद्वैताऽद्वयादि द्वयमयतिमिरापारबोधप्रकाशः ॥ १०॥
कालः सङ्कलयन्कलाः कलयतु स्रष्टा सृजत्वादरा-
दाज्ञायाः परतन्त्रतामुपगतो मथ्नातु वा मन्मथः ।
क्रीडाडम्बरामम्बराश्रयमिव स्वे लेखरेखाक्रमं (स्वोल्लेखरेखाक्रमं)
देहाद्याश्रयमस्तु वैकृतिमहामोहो न पश्यामि किम् ॥ ११॥ (वैकृतमहामोहे)
कः कोऽत्र भोऽहं कवलीकरोमि (कोऽत्र भोर्यं)
कः कोऽत्र भोऽहं सहसानिडन्मि । (कोऽत्र भोर्यं सहसा निहीन्म)
कः कोऽत्र भोऽहं परबोधधाम (कोऽत्र भोर्यं)
सञ्चर्वणोन्मत्ततनुः पिबामि ॥ १२॥
भवोत्थभयभङ्गदं गदशृगालविद्रावणं (भवोत्थभयभङ्गदङ्गदशृगालविद्रावणं)
प्रबोधधुरिधीमतामपि सकृद्यदुद्दीपयन् । (सकृद्यदुद्दीपनम्)
स्वगाध(सुधा)मगहनाटवीविहरणातितृप्त्युद्गमाद्
विभेदहरिबृंहितं व्यधित रम्यदेवो हरिः ॥ १३॥ (अभेदकरिबृंहितं)
इत्याचार्याभिनवगुप्तकृता परमाद्वयद्वादशिका अथवा
परमार्थद्वादशिका भव्यायास्तुतराम् ॥
Encoded and proofread by Ruma Dewan