शिवस्तुतिः
(पारमेश्वरागमान्तर्गते)
नमः शिवाय रुद्राय नम ओङ्काररूपिणे ।
भक्तस्थलस्वरूपाय शिवलिङ्गाय ते नमः ॥ १॥
गजचर्माम्बरभृते व्याघ्रचर्मधराय ते ।
महेशस्थलरूपाय शिवलिङ्गाय ते नमः ॥ २॥
कपर्दिने सकलाय ककुद्भिध्वजशोभिने ।
प्रसादस्थलरूपाय शिवलिङ्गाय ते नमः ॥ ३॥
नमः परमात्मने तुभ्यं प्राणलिङ्गस्थलात्मने ।
शुद्धस्फटिकवर्णाय शिवलिङ्गाय ते नमः ॥ ४॥
नीलकण्ठाय नित्याय निर्मलाय परात्मने ।
शरणस्थलरूपाय शिवलिङ्गाय ते नमः ॥ ५॥
त्रिशूलमृगहस्ताय कुठारभयपाणये ।
शिवलिङ्गैकरूपाय शिवलिङ्गाय ते नमः ॥ ६॥
नमो दक्षमखान्ताय नमोऽन्धकविघातिने ।
नमः सर्वज्ञरूपाय शिवलिङ्गाय ते नमः ॥ ७॥
पार्वतीशाय पृथवे पराय परमेष्ठिने ।
नमस्ते नित्यतृप्ताय शिवलिङ्गाय ते नमः ॥ ८॥
नमस्ते वेदरूपाय नमः कन्थानिषङ्गिणे ।
नमस्त्वनादिबोधाय शिवलिङ्गाय ते नमः ॥ ९॥
नाटिताखिलभूताय नगजार्धशरीरिणे ।
नमः स्वतन्त्रतन्त्राय शिवलिङ्गाय ते नमः ॥ १०॥
नमः शशाङ्कचूडाय शशङ्कायुतरोचिषे ।
अलुप्तशक्तये नित्यं शिवलिङ्गाय ते नमः ॥ ११॥
नमः कैलासवासाय नमस्ते पुरघातिने ।
नमोऽस्त्वनन्तशक्ताय शिवलिङ्गाय ते नमः ॥ १२॥
निःश्वासोत्पन्नवेदाय साश्वी(क्षि)भूतत्रयीमते । (श्वाश्वी)
नमस्ते भक्तिरूपाय शिवलिङ्गाय ते नमः ॥ १३॥
कमलोद्भववन्द्याय कपर्दिन् जटिने नमः ।
कर्मक्षयात्मने तुभ्यं शिवलिङ्गाय ते नमः ॥ १४॥
नमो गणेशपुत्राय नमस्ते स्कन्दसूनवे ।
नमो बुद्धिस्वरूपाय शिवलिङ्गाय ते नमः ॥ १५॥
गङ्गाधराय गोभर्त्रे गौरीवक्त्रावलोकिने ।
नमो विचाररूपाय शिवलिङ्गाय ते नमः ॥ १६॥
विश्वेश्वराय विश्वाय विश्वरूपाय वेधसे ।
दर्पक्षयस्वरूपाय शिवलिङ्गाय ते नमः ॥ १७॥
सर्वसधाराय सर्वाय सर्वोत्पत्तिलयात्मने ।
सम्यग्ज्ञानस्वरूपाय शिवलिङ्गाय ते नमः ॥ १८॥
मृत्युञ्जयाय रुद्राय त्र्यम्बकाय त्रिमूर्तये ।
महावीर्याय वीराय शिवलिङ्गाय ते नमः ॥ १९॥
वेदवेदान्तवेद्याय वेदार्थाय विवेकिने ।
महसे यशसे तुभ्यं शिवलिङ्गाय ते नमः ॥ २०॥
सोमसूर्याग्निनेत्राय नमस्ते त्वष्टमूर्तये ।
नमो महाश्रीरूपाय शिवलिङ्गाय ते नमः ॥ २१॥
निराकाराय कवये कारणाय कलात्मने ।
नित्यज्ञानस्वरूपाय शिवलिङ्गाय ते नमः ॥ २२॥
सूर्यकोटिप्रकाशाय सूक्षमाय सुखरूपिणे ।
शुद्धवैराग्यरूपाय शिवलिङ्गाय ते नमः ॥ २३॥
नमः षड्भाग्यरूपाय नमः षड्भाग्यदायिने ।
मुक्तये मुक्तिसन्धात्रे शिवलिङ्गाय ते नमः ॥ २४॥
अतीतत्र्यष्टतत्त्वाय त्र्यष्टतत्त्वस्वरूपिणे ।
पञ्चविंशात्मतत्त्वाय शिवलिङ्गाय ते नमः ॥ २५॥
वरदमृगकुठाराभीतिहस्ताम्बुजाय
स्फुटमुकुटविराजच्चन्द्रमःशेखराय ।
मृदुलविमलदूर्वाश्लिष्टभुभृत्सुताय
प्रणवमय नमः श्रीशङ्करायों नमस्ते ॥ २६॥
फलश्रुतिः -
इति स्तुवीत यो भक्त्या त्रिसन्ध्यं प्रत्यहं शिवे ।
तद्दृष्टिगोचराः सर्वे शिवा एव न संशयः ॥ २७॥
एतद्विजानतो देवि नान्यदस्ति ततः परम् ।
ज्ञातव्यं परतत्त्वाख्यं सोऽहमेव न संशयः ॥ २८॥
अनेन स्तवराजेन भावयेन्मामधीश्वरम् ।
देहान्ते सर्वमाप्नोति मम सायुज्यमव्ययम् ॥ २९॥
विचारयेदेतदर्थं सम्यग् गुरुमुखाच्छिवे ।
न स भूयो निपतति संसारे दुःखसागरे ॥ ३०॥
परित्यज्यापि सर्वस्वं सर्वयत्नेन सर्वदा ।
सर्वदा वर्तयेदेतद् यदीच्छेत् सुखमात्मनः ॥ ३१॥
॥ इति श्रीपारमेश्वरागमान्तर्गते शिवस्तुतिः सम्पूर्णा ॥
6th paTala of Parameshvaragama/Parameshvaratantra Verses 77 to 108
Encoded and proofread by Ruma Dewan