दिक्पूर्वपदाट् ठञ् च ४।३।६

दिक्पूर्वपदादर्धान्तात् प्रातिपदिकात् ठञ् प्रत्ययो भवति, चकाराद् यत् च शैषिकः। अणो ऽपवादः। पौर्वार्धिकम्। पूर्वार्ध्यम्। दाक्षिणार्धिकम्, दक्षिणार्ध्यम्। पदग्रहणं स्वरूपविधिनिवारणार्थम्।

दिक्पूर्वपदाट्ठञ्च। , ४।३।६

"पौर्वार्द्धिकम्" इति। पूर्वस्मिन्नर्थे जातः। " तद्धितार्थ" २।१।५० इत्यादिना समासः,ततस्तद्धितः। अथ पदग्रहणं किमर्थम्, दिक्पूर्वादित्येवोच्येत? इत्याह-- "पदग्रहणम्" इत्यादि। असति हि पदग्रहणे स्वरूपविधिः स्यात्, ततश्च दिगर्द्धे जात इत्यत्रैव स्यात्। पदग्रहणे तु सति यन्नाम किञ्चिद्()दिक्सम्बन्धिः पूर्वपदं तस्य ग्रहणमुपपन्नं भवति॥

दिक्पूर्वपदाट्ठञ्च १३५६, ४।३।६

दिक्पूर्वपदायट्ठञ् च। अर्धादित्येव। परावरपूर्वार्धशब्दात्पूर्वसूत्रेण यदेव, विशिष्य विहितत्वात्।

दिक्पूर्वपदाट्ठञ्च १०६९, ४।३।६

दिक्। पूर्वपदग्रहणं स्वरूपविधिनिरासार्थमित्याहुः।