Ishvara Dhyana Manjari Compiled from Prapanchasara

प्रपञ्चसारतः सङ्कलिता ईश्वरध्यानमञ्जरी

॥ श्रीः ॥ श्री गुरुभ्यो नमः । जगद्गुरु श्रीशङ्करभगवत्पादविरचितप्रपञ्चसारतः सङ्कलिता श्री गणपतये नमः । गुरुर्ब्रह्मा गुरुर्विष्णुः गुरुर्देवो महेश्वरः । गुरुः साक्षात्परं ब्रह्म तस्मै श्रीगुरवे नमः ॥ श्रुतिस्मृतिपुराणानामालयं करुणालयम् । नमामि भगवत्पादशङ्करं लोकशङ्करम् ॥ शुक्लाम्बरधरं विष्णुं शशिवर्णं चतुर्भुजम् । प्रसन्नवदनं ध्यायेत्सर्वविघ्नोपशान्तये ॥

१. श्री शारदा

अकचटतपयाद्यैः सप्तभिर्वर्णवर्गैः विरचितमुखबाहापाद हृत्कुक्षिमध्या । सकलजगदधीशा शाश्वता विश्वयोनिः वितरतु परिशुद्धिं चेतसः शारदा वः ॥ १.१॥

२. मातृका सरस्वती

पञ्चाशद्वर्णभेदैः विहितवदनदोः पादयुक् कुक्षिवक्षो- देशां भास्वत्कपर्दाकलितशशिकलामिन्दुकुन्दावदाताम् । अक्षस्रक्कुम्भचिन्तालिखितवरकरां त्रीक्षणां पद्मसंस्थां अच्छाकल्पामतुच्छस्तनजघनभरां भारतीं तां नमामि ॥

३. त्रिपुरा

आताम्रार्कायुताभां कलितशशिकलारञ्जितप्तां त्रिणेत्रां देवीं पूर्णेन्दुवक्त्रां विधृतजपपटीपुस्तकाभीत्यभीष्टाम् । पीनोत्तुङ्गस्तनार्तां वलिलसितवलग्नामसृक्पङ्कराजन्- मुण्डस्रङ्मण्डिताङ्गीमरुणतरदुकूलानुलेपां नमामि ॥

४. वागीश्वरी

अमलकमलसंस्था लेखिनीपुस्तकोद्यत्- करयुगलसरोजा कुन्दमन्दारगौरा । धृतशशधरखण्डोल्लासिकोटीरचूडा भवतु भवभयानां भङ्गिनी भारती वः ॥

५. सरस्वती

हंसारूढा भसितहर हारेन्दुकुन्दावदाता वाणी मन्दस्मितयुतमुखी मौलिबद्धेन्दुलेखा । विद्या वीणामृतमयघटाक्षस्रगादीप्तहस्ता शुभ्राब्जस्था भवदभिमतप्राप्तये भारती स्यात् ॥

६. भुवनेश्वरी

उद्यद्भास्वत्समाभां विजितनवजपामिन्दुखण्डावनद्ध- द्योतन्मौलिं त्रिणेत्रां विविधमणिलसत्कुण्डलां पद्मगां च । हारग्रैवेयकाञ्चीगुणमणिवलयाद्यैर्विचित्राम्बराढ्यां अम्बां पाशाङ्कुशेष्टाभयकरकमलामम्बिकां तां नमामि ॥ भास्वद्रत्नौघमौलिस्फुरदमृतरुचो रञ्जयच्चारु रेखां सम्यक्सन्तप्तकार्तस्वरकमलजपाभासुराभिः प्रभाभिः । विश्वाकाशावकाशं ज्वलयदशिशिरं धर्तृ पाशाङ्कुशेष्टा- भीतीनां भङ्गितुङ्गस्तनमवतु जगन्मातुरार्कं वपुर्वः ॥

७. लक्ष्मीः

भूयाद्भूयो द्विपद्माभयवरदकरा तप्तकार्तस्वराभा शुभ्राभ्राभेभयुग्मद्वयधृतकरकुम्भाद्भिरासिच्यमाना । रत्नौघाबद्धमौलिर्विमलतरदुकूलार्तवालेपनाढ्या पद्माक्षी पद्मनाभोरसि कृतवसतिः पद्मगा श्रीः श्रिये वः ॥ पद्मस्था पद्मनेत्रा कमलयुगवराभीतियुग्दोःसरोजा देहोत्थाभिः प्रभाभिस्त्रिभुवनमखिलं भासुरा भासयन्ती । मुक्ताहाराभिरामोन्नतकुचकलशा रत्नमञ्जीरकाञ्ची- ग्रैवेयोर्म्यङ्गदाढ्या धृतमणिमकुटा श्रेयसे श्रीर्भवेद्वः ॥ हस्तोद्यद्वसुपात्रपङ्कजयुगादर्शा स्फुरन्नूपुर- ग्रैवेयाङ्गदहारकङ्कणमहामौलिज्वलत्कुण्डला । पद्मस्था परिचारिकापरिवृता शुक्लाङ्गरागांशुका देवी दिव्यगणानता भवदघप्रध्वंसिनी स्याद्रमा ॥ अरुणकमलसंस्था तद्रजःपुञ्जवर्णा करकमलधृतेष्टाभीति युग्माम्बुजा च । मणिमकुटविचित्रालङ्कृतकल्पजातैः भवतु भुवनमाता सन्ततं श्रीः श्रिये वः ॥

८. त्रिपुटादेवी

आबद्धरत्नमकुटां मणिकुण्डलोद्यत्- केयूरकोर्मिरशनाह्वयनूपुराढ्याम् । ध्याये धृताब्जयुगपाशकशाङ्कुशेक्षु- चापां सपुष्पविशिखां नवहेमवर्णाम् ॥

९. भूदेवी

मुख्याम्भोजे निविष्टारुणचरणतला श्यामलाङ्गी मनोज्ञा चञ्चच्छाल्यग्रचुम्बच्छुकलसितकरा प्राप्तनीलोत्पला च । रत्नाकल्पाभिरामा मणिमयमकुटा चित्रवस्त्रा प्रसन्ना दिश्याद्विश्वम्भरा नः सततमभिमतं वल्लभा कैटभारेः ॥

१०. त्वरिता

श्यामतनुमरुणपङ्कजचरणतलां वृषलनागमञ्जीराम् । स्वर्णांशुकपरिधानां वैश्याहिद्वन्द्वमेखलाकलिताम् ॥ तनुमध्यलतां पृथुलस्तनयुगलां करविराजदभयवराम् । शिखिपिञ्छनालवलयां गुञ्जाफलगुणितभूषणारुणिताम् ॥ नृपफणिकेयूरां तां गलविलसद्विविधमणियुताभरणाम् । द्विजनागविहितकुण्डलमण्डितगण्डद्वयी मुकुरशोभाम् ॥ शोणतराधरपल्लवविद्रुममणिभासुरां प्रसन्नां च । पूर्णशशिबिम्बवदनामरुणायतलोचनत्रयीनलिनाम् । कुञ्चितकुन्तलविलसन्मकुटाघटिताहि वैरिपिञ्छयुताम् ॥ कैरातीं वनकुसुमोज्ज्वलां मयूरातपत्रकेतनिकाम् । सुरुचिरसिंहासनगां विभ्रमसमुदायमन्दिरां तरुणीम् ॥ (ध्याये)

११. वज्रप्रस्तारिणी

इन्दुकलाकलितोज्ज्वलमौलिः मारमदाकुलिता युगनेत्रा । शोणितसिन्धुतरङ्गितपोत- द्योतितभानुदलाम्बुजसंस्था ॥ दोर्धृतदाडिमसायकपाशा साङ्कुशचापकपालसमेता । शोणदुकूलविलेपनमाल्या शोणतरा भवतोऽवतु देवी ॥

१२. नित्यक्लिन्ना

रक्ता रक्तांशुककुसुमविलेपादिका सेन्दुमौलिः स्विद्यद्वक्त्रा मदविवशसमाघूर्णितत्रीक्षणा च । दोस्सत्पाशाङ्कुशयुतकपालाभया पद्मसंस्था देवी पायादमितफलदा नित्यशः पार्वती वः ॥

१३. दुर्गा

शङ्खारिचापशरभिन्नकरां त्रिणेत्रां तिग्मेतरांशुकलया विलसत्किरीटाम् । सिंहस्थितां ससुरसिद्धनुतां च दुर्गां दूर्वानिभां दुरितगर्वहरां नमामि ॥ हेमप्रख्यामिन्दुखण्डात्तमौलिं शङ्खारिष्टाभीति हस्तां त्रिणेत्राम् । हेमाब्जस्थां पीतवस्त्रां प्रसन्नां देवीं दुर्गां दिव्यरूपां नमामि ॥ अरिशङ्ख कृपाणखेटबाणान् सधनुःशूलकतर्जनीर्दधाना । भवतां महिषोत्तमाङ्गसंस्था नवदूर्वासदृशी श्रियेऽस्तु दुर्गा ॥

१४. शूलिनीदुर्गा

बिभ्राणा शूलबाणास्यरिसदरगदाचापपाशान् कराब्जैः मेघश्यामा किरीटोल्लिखितजलधरा भीषणा भूषणाढ्या । सिंहस्कन्धाधिरूढा चतसृभिरसिखेटान्विताभिः परीता कन्याभिर्भिन्नदैत्या भवतु भवभयध्वंसिनी शूलिनी वः ॥

१५. जातवेदो दुर्गा

भास्वद्विद्युत्करालाकुलहरिगलसंस्थारिशङ्खासिखेटे- ष्वस्त्रासाख्यत्रिशूलानरिगणभयदां तर्जनीं चादधाना । चर्मास्युद्घूर्णदोर्भिः प्रहरणनिपुणाभिर्वृता कन्यकाभिः दद्यात्कार्शानवीष्टान् त्रिणयनलसिता कापि कात्यायनी वः । करकमलविराजच्चक्रशङ्खासिशूला परिलसितकिरीटा पातितानेकविद्या । त्रिणयन लसिताङ्गी तिग्मरश्मिप्रकाशा- पवनसखनिभाङ्गी पातु कात्यायनी वः ॥

१६. अजपामूर्तिः

अरुणकनकवर्णं पद्मसंस्थं च गौरी- हरनियमितचिह्नं सौम्यतानूनपातम् । भवतु भवदभीष्टप्राप्तये पाशटङ्का- भयवरदविचित्रं रूपमर्धाम्बिकेशम् ॥

१७. अग्निः

अग्निं प्रज्वलितं वन्दे जातवेदं हुताशनम् । सुवर्णवर्णममलं समिद्धं विश्वतोमुखम् ॥ त्रिणयनमरुणप्ताबद्धमौलिं सुशुक्लां- शुकमरुणमनेकाकल्पमम्भोजसंस्थम् । अभिमतवरशक्तिस्वस्तिकाभीति हस्तं नमत कनकमालालङ्कृतांसं कृशानुम् ॥ शक्ति स्वस्तिक पाशान् साङ्कुशवरदाभयान् दधत् त्रिमुखः । मकुटादिविविधभूषोऽवताच्चिरं पावकः प्रसन्नो नः ॥ हैमाश्वत्थसुरद्रुमोदरभुवो निर्यान्तमश्वाकृतिं वर्षन्तं धनधान्यरत्ननिचयान् रन्ध्रैः स्वकैः सन्ततम् । ज्वालापल्लवित स्वरोमविवरं भक्तार्तिसंभेदनं वन्दे धर्मसुखार्थमोक्षफलदं दिव्याकृतिं पावकम् ॥

१८. सूर्यः

अरुणसरोरुहसंस्थः त्रिदृगरुणोऽरुणसरोजयुगलधरः । कलिताभयवरदो द्युतिबिम्बोऽमितभूषणस्त्विनोऽवतु नः ॥ अरुणोऽरुणपङ्कजे निषण्णः कमलेऽभीतिवरौ करैर्दधानः । स्वरुचाहितमण्डलत्रिणेत्रो रविराकल्पशताकुलोऽवताद्वः ॥

१९. चन्द्रः

अमलकमलसंस्थः सुप्रसन्नाननेन्दुः वरदकुमुदहस्तश्चारुहारादिभूषः । स्फटिकरजतवर्णो वाञ्छितप्राप्तये वो भवतु भवदभीष्टोद्योतिताङ्कः शशाङ्कः ॥

२०. महागणपतिः

मन्दाराद्यैः कल्पकवृक्षविशेषैर्विशिष्टतरफलदैः । शिशिरतरचतुराशेऽन्तर्बालातपचन्द्रिकाकुले च तले ॥ ऐक्षवजलनिधिलहरीकणजालकवाहिना च गन्धवहेन । संसेविते च सुरतरु सुमनःश्रितमधुपपक्षचलनपरेण ॥ रत्नमये मणिवज्रप्रवालफलपुष्पपल्लवस्य सतः । महतोऽधस्तादृतुभिः युगपत् संसेवितस्य कल्पतरोः ॥ सिंहमुखपादपीठगलिपिमयपद्मे त्रिषट्कोणोल्लसिते । आसीनस्त्वेकरदो बृहदुदरो दशभुजोऽरुणतनुश्च गजवदनः ॥ बीजापूरगदेक्षुकार्मुकरुजाचक्रब्जपाशोत्पल- व्रीह्यग्रस्वविषाणरत्नकलशप्रोद्यत्कराम्भोरुहः । ध्येयो वल्लभया सपद्मकरया श्लिष्टो ज्वलद्भूषया विश्वोत्पत्तिविपत्तिसंस्थितिकरो विघ्नो विशिष्टार्थदः ॥ करपुष्करधृतकलशस्रुतमणिमुक्ताप्रवालवर्षेण । अविरतधारां विकिरन् परितः साधकसमग्रसम्पत्त्यै । मदजललोलुपमधुकरमालां निजकर्णतालताडनया । निर्वासयन्मुहुर्मुहुः अमरैरसुरैश्च सेवितो युगपत् ॥ रक्तो रक्ताङ्ग रागांशुककुसुमयुतस्तुन्दिलश्चन्द्रमौलिः नेत्रैर्युक्तस्त्रिभिर्वामनकरचरणो बीजपूरात्तनासः । हस्ताग्राक्लृप्तपाशाङ्कुशरदवरदो नागवक्त्रोऽहिभूषो देवः पद्मासनो नो भवतु नतसुरो भूतये विघ्नराजः ॥

२१. क्षिप्रप्रसादनगणपतिः

धृतपाशाङ्कुशकल्पकलतिकास्वरदश्च बीजपूरयुतः । शशिशकलकलितमौलिः त्रिलोचनोऽरुणश्च गजवदनः ॥ भासुरभूषणदीप्तो बृहदुदरः पद्मविष्टरो ललितः । ध्येयोऽनायतदोःपदसरसिरुहः सम्पदे सदा मनुजैः ॥

२२. कामदेवः

अरुणमरुणवासोमाल्यदामाङ्गरागं स्वकरकलितपाशं साङ्कुशास्त्रेषुचापम् । मणिमयमकुटाद्यैर्दीप्तमाकल्पजातैः अरुणनलिनसंस्थं चिन्तयेदङ्गयोनिम् ॥

२३. श्रीकृष्णः

अव्यान्मीलत्कलायद्युतिरहिरिपुपिञ्छोल्लसत्केशजालो गोपीनेत्रोत्पलाराधित ललितवपुर्गोपगोवृन्दवीतः । श्रीमद्वक्त्रारविन्द प्रतिहसितशशाङ्काकृतिः पीतवासाः देवोऽसौ वेणुवाद्यक्षपितजनधृतिर्देवकीनन्दनो वः ॥

२४. श्री विष्णुः

विष्णुं भास्वत्किरीटाङ्गदवलयगलाकल्पहारोदराङ्घ्रि- श्रोणीभूषं सवक्षोमणिमकरमहाकुण्डलामण्डिताङ्गम् । हस्तोद्यच्चक्रशङ्खाम्बुजगदममलं पीतकौशेयमाशा- विद्योतद्भासमुद्यद्दिनकरसदृशं पद्मसंस्थं नमामि ॥ अर्कौघाभं किरीटान्वितमकरलसत्कुण्डलं दीप्तिराजत्- केयूरं कौस्तुभाभाशबलरुचिरहारं सपीताम्बरं च । नानारत्नांशुभिन्नाभरणशतयुजं श्रीधराश्लिष्टपार्श्वं वन्दे दोःसक्त चक्राम्बुरुहदरगदं विश्ववन्द्यं मुकुन्दम् ॥ हरिमुज्ज्वल चक्रदराब्जगदा- कुलदोःपरिघं सितपद्मगतम् । वलयाङ्गदहारकिरीटधरं नवकुन्दरुचिं प्रणमामि सदा ॥

२५. श्री सुदर्शन नारायणः

अव्याद्भास्कर सप्रभाभिरखिलाभाभिर्दिशो भासयन् भीमाक्षः क्षरदट्टहास विकसद् दंष्ट्राग्रदीप्ताननः । दोर्भिश्चक्रदरौ गदाब्जमुसलास्त्रासींश्च पाशाङ्कुशौ बिभ्रत्पिङ्ग शिरोरुहोऽथ भवन्तश्चक्राभिधानो हरिः ॥

२६. श्रीकरः विष्णुः

दुग्धाब्धिद्वीपवर्यप्रविलसितसुरोद्यानकल्पद्रुमाधो भद्राम्भोजन्मपीठोपरिगतविनतानन्दनस्कन्धसंस्थः । दोर्भिर्बिभ्रद्रथाङ्गं सदरमथ गदापङ्कजे स्वर्णवर्णो भास्वन्मौलिर्विचित्राभरणपरिगतः स्याच्छ्रिये वो मुकुन्दः ॥

२७. वराहः

जान्वोरापादमुद्यत्कनकमिव हिमप्रख्यमाजानु नाभेः कण्ठादानाभि वह्निप्रभमथ शिरसश्चागलं नीलवर्णम् । मौलेर्व्योमाभमाङ्कं करलसदरिशङ्खासिखेटं गदाश- क्त्याख्येष्टाभीतियुक्तं प्रणमत वसुधोल्लासिदंष्ट्रं वराहम् ॥

२८. नृसिंहः

जान्वोरासक्ततीक्ष्णस्वनख रुचिलसद्बाहुसंस्पृष्टकेशः चक्रं शङ्खं च दोर्भ्यां दधदनलसमज्योतिषा भग्नदैत्यः । ज्वालामालापरीतं रविशशिदहनत्रीक्षणं दीप्तजिह्वं दंष्ट्रोग्रं धूतकेशं वदनमपि वहन् पातु वो नारसिंहः ॥ उद्यद्भास्वत्सहस्रप्रभमशनिनिभत्रीक्षणैर्विक्षरन्तं वह्नीनह्नाय विद्युत्ततिविततसटाभीषणं भूषणैश्च । दिव्यैरादीप्तदेहं निशितनखलसद्बाहुदण्डैरनेकैः संभिन्नं भिन्नदैत्येश्वरतनुमतनुं नारसिंहं नमामि ॥ अव्यान्निर्व्याजरौद्राकृतिरभिविवृतास्योल्लसत्तीक्षणदंष्ट्रः चक्रं शङ्खं च पाशाङ्कुशकुलिशगदादारणाख्यान्दधानः । रक्ताकारश्च नाभेरध उपरि सितो दिव्यभूषाविशेषः देवोऽर्काग्नीन्दुनेत्रो निखिलसुखकरो नारसिंहश्चिरं वः ॥

२९. विश्वरूपो विष्णुः

अग्नीषोमात्मकमरिगदाशार्ङ्गखड्गैः सशङ्खैः उद्यद्बाहुं हलमुसलशूलैः सकुन्तैः सदण्डैः । शक्त्या पाशाङ्कुशकुलिशटङ्काग्निभिश्चार्कवह्नि- द्योतद्वक्त्राङ्घ्रिकसरसिजं तप्तकार्तस्वराभम् ॥ विष्णुं भास्वत्किरीटं मणिमकुटकटीसूत्रकेयूरहार- ग्रैवेयोर्म्यादिमुख्याभरणमणिगणोल्लासिदिव्याङ्गरागम् । विश्वाकाशावकाशप्रविततमयुतादित्यनीकाशमुद्यद्- बाह्वग्रव्यग्रनानायुधनिकरकरं विश्वरूपं नमामि ॥

३०. विष्णुपञ्जरदेवता

नमो भगवते सर्वविष्णवे विश्वरूपिणे । वासुदेवाय चक्रादिसर्वायुधभृते नमः ॥

३१. शिवः

शूलाहीटङ्क घण्टासिसृणिकुलिशपाशाग्न्यभीतीर्दधानं दोर्भिः शीतांशुखण्डप्रतिघटितजटाभारमौलिं त्रिणेत्रम् । नानाकल्पाभिरामापघनमभिमतार्थप्रदं सुप्रसन्नं पद्मस्थं पञ्चवक्त्रं स्फटिकमणिनिभं पार्वतीशं नमामि ॥ बिभ्रद्दोर्भिः कुठारं मृगमभयवरौ सुप्रसन्नो महेशः सर्वालङ्कारदीप्तः सरसिजनिलयो व्याघ्रचर्मात्तवासाः । ध्येयो मुक्तापरागामृतरसकलिताद्रिप्रभः पञ्चवक्त्रः त्र्यक्षः कोटीरकोटीघटिततुहिनरोचिष्कलोत्तुङ्गमौलिः ॥ नमोऽस्तु स्थाणुभूताय ज्योतिर्लिङ्गावृतात्मने । चतुर्मूर्तिवपुश्छायाभासिताङ्गाय शम्भवे ॥ वन्दे हरं वरदशूलकपालहस्तं साभीतिमद्रिसुतयोज्ज्वलदेहकान्तिम् । वामोरुपीठगतया निजवामहस्त- न्यस्तारुणोत्पलरुचा परिरब्धदेहम् ॥ वामाङ्कन्यस्तवामेतरकरकमलायास्तथा वामबाहु- न्यस्तारक्तोत्पलायाः स्तनविधृतिलसद्वामबाहुः प्रियायाः । सर्वाकल्पाभिरामो धृतपरशुमृगेष्टः करैः काञ्चनाभः ध्येयः पद्मासनस्थः स्मरललिततनुः सम्पदे पार्वतीशः ॥

३२. दक्षिणामूर्तिः

मुद्रां भद्रार्थदात्रीं सपरशुहरिणां बाहुभिर्बाहुमेकं जान्वासक्तं दधानो भुजगवरसमाबद्धकक्ष्यो वटाधः । आसीनश्चन्द्रखण्डप्रतिघटितजटः क्षीरगौरस्त्रिणेत्रः दद्यादाद्यैः शुकाद्यैर्मुनिभिरभिनुतो भावशुद्धिं भवो वः ॥ दक्षिणामूर्तये तुभ्यं वटमूलनिवासिने । ध्यानैकनिरताङ्गाय नमो रुद्राय शम्भवे ॥

३३. अघोररुद्रः

कालाभ्राभः कराग्रैः परशुडमरुकौ खड्गखेटौ च बाणे- ष्वासौ शूलं कपालं दधदतिभयदो भीषणास्यस्त्रिणेत्रः । रक्ताकाराम्बरोऽहिप्रवरघटितगात्रोऽरिनागग्रहादीन् खादन्निष्टार्थदायी भवदनभिमतच्छित्तये स्यादघोरः ॥

३४. मृत्युञ्जयः

स्फुटितनलिनसंस्थं मौलिबद्धेन्दुरेखा- गलदमृतजलार्द्रं चन्द्रवह्न्यर्कनेत्रम् । स्वकरकलितमुद्रापाशवेदाक्षमालं स्फटिकरजतमुक्तागौरमीशं नमामि ॥

३५. चिन्तामणिशिवः (अर्धनारीश्वरः)

अहिशशधरगङ्गाबद्धतुङ्गप्तमौलिः त्रिदशगणनताङ्घ्रिस्त्रीक्षणः स्त्रीविलासी । भुजगपरशुशूलान् खड्ग वह्नी कपालं शरमपि धनुरीशो बिभ्रदव्याच्चिरं वः ॥ हावभावलसितार्धनारिकं भीषणार्धमथवा महेश्वरम् । पाशसोत्पलकपालशूलिनं चिन्तये जपविधौ विभूतये ॥

३६. चण्डेश्वरः

अव्यात्कपर्दकलितेन्दुकरः करात्त- शूलाक्षसूत्रककमण्डलुटङ्क ईशः । रक्ताभवर्णवसनोऽरुणपङ्कजस्थो नेत्रत्रयोल्लसित वक्त्रसरोरुहो वः (नः) ॥

३७. गायत्री

मन्दाराह्वयरोचनाञ्जनजपाख्या(खा)भैर्मुखैरिन्दुमद्- रत्नोद्यन्मकुटांशुभिस्तत चतुर्विंशार्णचित्रा तनुः । अम्भोजारिदराह्वयौ गुणकपालाख्ये च पाशाङ्कुशे- ष्टाभीतीर्दधती भवेद्भवदभीष्टोत्तारिणी तारिणी ॥

३८. त्र्यम्बकः

अच्छस्वच्छारविन्दस्थितिरुभयकराङ्कस्थितं पूर्णकुम्भं द्वाभ्यां वेदाक्षमाले निजकरकमलाभ्यां घटौ नित्यपूर्णौ । द्वाभ्यां तौ च स्रवन्तौ शिरसि शशिकलाबन्धुरे प्लावयन्तौ देहं देवो दधानः प्रदिशतु विशदाकल्पजालः श्रियं वः ॥

३९. सवितृजातवेदोदुर्गात्र्यम्बकाः

स्मर्तव्याखिललोकवर्ति सततं यज्जङ्गमस्थावरं व्याप्तं येन च यत्प्रपञ्चविहितं मुक्तिश्च यत्सिद्धितः । यद्वा स्यात्प्रणवत्रिभेदगहनं श्रुत्या च यद्गीयते तद्वः काङ्क्षितसिद्धयेऽस्तु परमं तेजस्त्रयोत्थं महः ॥

४०. संवादाग्निः

धवलनलिनराजच्चन्द्रमध्ये निषण्णं करविलसितपाशं साङ्कुशं साभयं च । सवरदममलेन्दुक्षीरगौरं त्रिणेत्रं प्रणमत सुरवक्त्रं मङ्क्षु संवादयन्तम् ॥

४१. वरुणः

अच्छांशुकाभरणमाल्यविलेपनाढ्यः पाशाङ्कुशाभयवरोद्यतदोस्सरोजः । स्वच्छारविन्दवसतिः सुसितः प्रसन्नो भूयाद्विभूतिविधये वरुणश्चिरं वः ॥

४२. भद्रकाली

सुरौद्रसितदंष्ट्रिका त्रिणयनोर्ध्वकेशोल्बणा कपालपरशूल्लसड्डमरुका त्रिशूलाकुला । घनाघननिभा रणद्रुचिरकिङ्किणीमालिका भवद्विभवसिद्धये भवतु भद्रकाली चिरात् ॥

४३. प्राणशक्तिः

रक्ताम्भोधिस्थपोतोल्लसदरुणसरोजाधिरूढा कराब्जैः पाशं कोदण्डमिक्षूद्भवमथ गुणमप्यङ्कुशं पञ्च बाणान् । बिभ्राणासृक्कपालं त्रिणयनलसिता पीनवक्षोरुहाढ्या देवी बालार्कवर्णा भवतु सुखकरी प्राणशक्तिस्वरूपा ॥

४४. पार्वती

असकलशशिराजन्मौलिराबद्धपाशा- ङ्कुशरुचिरकराब्जा बन्धुजीवारुणाङ्गी । अमरनिकरवन्द्या त्रीक्षणा शोणलेपां- शुककुसुमयुता स्यात्सम्पदे पार्वती वः ॥

४५. अन्नपूर्णा

रुद्रताण्डवविलोकनलोलां भद्रवक्त्रनयनां भवकान्ताम् । अन्नदाननिरतां जननीं तां चिन्तयञ्जपतु चित्रदुकूलाम् ॥

४६. अश्वारूढा

अश्वारूढा कराग्रे नवकनकमयीं वेत्रयष्टिं दधाना दक्षेऽन्येनानयन्ती स्फुरिततनुलतापाशबद्धां स्वसाध्याम् । देवी नित्यप्रसन्नाननशशधरबिम्बा त्रिनेत्राभिरामा दद्यादाद्यानवद्या प्रवरसुखफलप्राप्तिहृद्यां श्रियं वः ॥

४७. व्यासः

मुनिव्रातावीतं मुदितधियमम्भोदरुचिर- द्युतिं व्याख्यामुद्राकलनविलसद्दक्षिणकरम् । परं जानौ कृत्वा दृढकलितकक्ष्ये कविवरं समासीनं व्यासं स्मरत निरतं पुण्यचरितम् ॥

मङ्गलं

यदाश्रया विप्रकृतिप्रभावतो विभिन्नतारांशसमुत्थितौजसः । जगन्ति पुष्णन्ति रवीन्दुवह्नयो नमोऽस्तु तस्मै परिपूर्णतेजसे ॥ इति जगद्गुरु श्रीशङ्करभगवत्पादविरचित प्रपञ्चसारतः सङ्कलिता ईश्वरध्यानमञ्जरी समाप्ता । Proofread by Aruna Narayanan