Shri Advaitananda Stotram

 श्रीअद्वैतानन्दस्तोत्रम् 
नमोऽस्तुते देववरार्थित क्रियाकृते समस्तान्मनुजे यशस्विने ।
``बूड़ओ तु गोपाल'' इति प्रथाधृते तीर्थाटने लब्ध सुपुण्य वर्मणे ॥ १॥

युवानमेवापि गुरुं प्रियं चिरं विनेय वृद्धा वृणते तपस्विनः ।
तथा त्वमद्वैतपराभिनिष्ठितः क्षमोऽभियाने स्वगुरोरमायया ॥ २॥

तपः समाधौ निरतः स सर्वदाप्रिजुर्बलिष्ठः परमाप्तितर्षुकः ।
समाप्य कर्माणि फलेष्वनाश्रयो यतिर्नियम्येन्द्रियकायमानसः ॥ ३॥

यताशनः संयतभाषणो व्रती गुरोः क्रियासाधनजागृतिर्यमी ।
अहन्यन्यक्षयसिद्धिहेतवे चकार सर्वं भगवन्नियन्त्रितः ॥ ४॥

परेयमेव कृतिभिः समादृताऽपरा च विद्या न तथा सुशोभना ।
विविच्य साधुः स परां समाददे न चापरस्यां रमते स्म संयमी ॥ ५॥

प्रसूनसारग्रहणे समारतो मधुव्रततृप्ततयाऽस्फुटस्वरः ।
परात्मनित्याप्तरसालयग्रहो मुनिर्न वाचं वदति प्रियङ्करः ॥ ६॥

सशारदश्रीभगवद्गदाधरे मनोवचोभिः सहदेहमेव सः ।
समर्पयामास विरज्य सर्वतः ससम्पदो बन्धुजनात्ममित्रतः ॥ ७॥

स्वपार्षदत्वेन वृतस्त्वमस्यहो स्वयं--प्रभू-श्रीभगवन्महात्मभिः ।
न चान्यथात्वं प्रतियाति संसृतौ विधेर्विधानं यदिह प्रधार्यते ॥ ८॥

नभो विशाले विततोर्द्धवर्त्मनि ज्वलत्प्रभो मेदुरभास्वरग्रहः ।
प्रतीयमानोऽधिविराजसे यथा त्वमात्मनेशेन परेण चिन्मयः ॥ ९॥

अद्वैतानन्दनाथाय नमस्तुभ्यं महाप्रभो ।
पुण्यपुञ्जविपाकेभ्य गृहीतयतिमूर्तये ॥ १०॥

त्वादृशानां कृपादृष्ट्या त्वत्प्रभूचरणाब्जयोः ।
मादृशानां भवेत् स्नानं प्रार्थनेयं प्रपूर्यताम् ॥ ११॥

इति ब्रह्मचारिमेधाचैतन्यविरचितं ``श्रीमदद्वैतानन्दस्तोत्रम्'' सम्पूर्णम् ।
प्रणाममन्त्रः-
प्रौढ़ायाद्वैतपादाय शिवध्यानपराय च ।
कारुण्यपूर्णचित्ताय सत्यनिष्ठाय ते नमः ॥


Proofread by Aruna Narayanan