अश्वत्थमहिमास्तोत्रम्
ईश्वरः सर्वभूतानां कृपया वृक्षमाश्रितः ॥ २४॥
चातुर्मास्येऽथ सम्प्राप्ते सर्वभूतदयाकरः ।
अश्वत्थोऽतः सदा सेव्यो मन्दवारे विशेषतः ॥ २५॥
नित्यमश्वत्थसंस्पर्शात्पापं याति सहस्रधा ।
दुग्धेन तर्पणं ये वै तिलमिश्रेण भक्तितः ॥ २६॥
सेचनं वा करिष्यन्ति तृप्तिस्तत्पूर्वजेषु च ।
दर्शनादेव वृक्षस्य पातकं तु विनश्यति ॥ २७॥
पिप्पलः पूजितो ध्यातो दृष्टः सेवित एव वा ।
पापरोगविनाशाय चातुर्मास्ये विशेषतः ।
अश्वत्थं पूजितं सिक्तं सर्वभूतसुखावहम् ॥ २८॥
सर्वामयहरं चैव सर्वपापौघहारिणम् ।
ये नराः कीर्तयिष्यन्ति नामाप्यश्वत्थवृक्षजम् ॥ २९॥
न तेषां यमलोकस्य भयं मार्गे प्रजायते ।
कुङ्कुमैश्चन्दनैश्चैव सुलिप्तं यश्च कारयेत् ॥ ३०॥
तस्य तापत्रयाभावो वैकुण्ठे गणता भवेत् ।
दुःस्वप्नं दुष्टचिन्ताञ्च दुष्टज्वरपराभवान् ॥ ३१॥
विलयं नय पापानि पिप्पल त्वं हरिप्रिय ।
मन्त्रेणानेन ये देवाः पूजयिष्यन्ति पिप्पलम् ॥ ३२॥
ततस्तेषां धर्मराजो जायते वाक्यकारकः ।
अश्वत्थो वचनेनापि प्रोक्तो ज्ञानप्रदो नृणां। ॥१३३॥
श्रुतो हरति पापं च जन्मादि मरणावधि ।
अश्वत्थसेवनं पुण्यं चातुर्मास्ये विशेषतः ॥ ३४॥
सुप्ते देवे वृक्षमध्यमास्थाय भगवान्प्रभुः ।
जलं पृथ्वीगतं सर्वं प्रपिबन्निव सेवते ॥ ३५॥
जलं विष्णुर्जलत्वेन विष्णुरेव रसो महान् ।
तस्माद्वृक्षगतो विष्णुश्चातुर्मास्येऽघनाशनः ॥ ३६॥
सर्वभूतगतो विष्णुराप्याययति वै जगत् ।
तथाश्वत्थगतं विष्णुं यो नमस्येन्न नारकी ॥ ३७॥
अश्वत्थं रोपयेद्यस्तु पृथिव्यां प्रयतो नरः ।
तस्य पापसहस्राणि विलयं यान्ति तत्क्षणात् ॥ ३८॥
अश्वत्थः सर्ववृक्षाणां पवित्रो मङ्गलान्वितः ।
मुक्तिदो रोपितो ध्यातश्चातुर्मास्येऽघनाशनः ॥ ३९॥
अश्वत्थे चरणं दत्त्वा ब्रह्महत्या प्रजायते ।
निष्कारणं सङ्कुथित्वा नरके पच्यते ध्रुवम् ॥ ४०॥
मूले विष्णुः स्थितो नित्यं स्कन्धे केशव एव च ।
नारायणस्तु शाखासु पत्रेषु भगवान्हरिः ॥ ४१॥
फलेऽच्युतो न सन्देहः सर्वदेवैः समन्वितः ।
चातुर्मास्ये विशेषेण द्रुमपूजी स मुक्तिभाक् ॥ ४२॥
तस्मात्सर्वप्रयत्नेन सदैवाश्वत्थसेवनम् ।
यः करोति नरो भक्त्या पापं याति दिनोद्भवम् ॥ ४३॥
स एव विष्णुर्द्रुम एव मूर्तो महात्मभिः सेवितपुण्यमूलः ।
यस्याश्रयः पापसहस्रहन्ता भवेन्नृणां कामदुघो गुणाढ्यः ॥ ४४॥
इति श्रीस्कन्दपुराणे नागरखण्डे सप्तचत्वारिंशाधिकद्विशततमाध्यायान्तर्गतं
अश्वत्थमहिमास्तोत्रं समाप्तम् ।
स्कन्दपुराण । नागरखण्ड । अध्याय २४७/२४-४४॥
skandapurANa . nAgarakhaNDa . adhyAya 247/24-44..
Proofread by PSA Easwaran