श्रीभूतनाथ अथवा अय्यप्पस्वामिनः सुप्रभातम्
श्रीगणेशाय नमः ।
श्रीकण्ठपुत्र हरिनन्दन विश्वमूर्ते
लोकैकनाथ करुणाकर चारुमूर्ते ।
श्रीकेशवात्मज सुमनोहर सत्यमूर्ते
श्रीभूतनाथ भगवन् तव सुप्रभातम् ॥ १॥
श्रीविष्णुरुद्रसुत मङ्गळ कोमलाङ्ग
देवाधिदेव जगदीश सरोजनेत्र ।
कान्तारवास सुरमानववृन्दसेव्य
श्रीभूतनाथ भगवन् तव सुप्रभातम् ॥ २॥
आशानुरूपफलदायक कान्तमूर्ते
ईशानकेशवसुत मणिकण्ठ सुदिव्यमूर्ते ।
भक्तेश भक्तहृदयस्थितभूमिपाल
श्रीभूतनाथ भगवन् तव सुप्रभातम् ॥ ३॥
सत्यस्वरूप सकलेश गुणार्णवेश
मर्त्यस्वरूप वरदेश रमेशसूनो ।
मुक्तिप्रद त्रिदशराज मुकुन्दसूनो
श्रीभूतनाथ भगवन् तव सुप्रभातम् ॥ ४॥
कालारिपुत्र महिषीमदनाशन श्री
कैलासवास शबरीश्वर धन्यमूर्ते ।
नीलाम्बराभरणशोभितसुन्दराङ्ग
श्रीभूतनाथ भगवन् तव सुप्रभातम् ॥ ५॥
नारायणात्मज परात्पर दिव्यरूप
वाराणसीशशिवनन्दन काव्यरूप ।
गौरीशपुत्र पुरुषोत्तम बालरूप
श्रीभूतनाथ, भगवान् तव सुप्रभातम् ॥ ६॥
त्रैलोक्यनाथ गिरिवास वनेनिवास
भूलोकवास भुवनाधिपदास देव ।
वेलायुधप्रियसहोदर शम्भुसूनो
श्रीभूतनाथ भगवन् तव सुप्रभातम् ॥ ७॥
आनन्दरूप करधारितचापबाण
ज्ञानस्वरूप, गुरुनाथ, जगन्निवास ।
ज्ञानप्रदायक जनार्दननन्दनेश
श्रीभूतनाथ भगवन् तव सुप्रभातम् ॥ ८॥
अम्भोजनाथसुत सुन्दर धन्यमूर्ते
शम्भुप्रियाकलितपुण्य पुराणमूर्ते ।
इन्द्रादिदेवगणवन्दित ब्रह्मचारिन्
श्रीभूतनाथ भगवन् तव सुप्रभातम् ॥ ९॥
देवेश देवगुणपूरित भाग्यमूर्ते
श्रीवासुदेवसुत पावन भक्तबन्धो ।
सर्वेश सर्वमनुजार्चित दिव्यमूर्ते
श्रीभूतनाथ भगवन् तव सुप्रभातम् ॥ १०॥
नारायणात्मज सुरेश नरेश भक्त-
लोकेश केशवशिवात्मज भूतनाथ ।
श्रीनारदादि मुनिपुङ्गवपूजितेश
श्रीभूतनाथ भगवन् तव सुप्रभातम् ॥ ११॥
आनन्दरूप सुरसुन्दरदेहधारिन्
शर्वात्मज शबरीश सुरालयेश । सुगरीश
नित्यात्मसौख्यवरदायक देवदेव
श्रीभूतनाथ भगवन् तव सुप्रभातम् ॥ १२॥
सर्वेश सर्वमनुजार्जितसर्वपाप-
संहारकारक चिदात्मक रुद्रसूनो ।
सर्वेश सर्वगुणपूर्णकृपाम्बुराशे
श्रीभूतनाथ भगवन्, तव सुप्रभातम् ॥ १३॥
ओङ्काररूप जगदीश्वर भक्तबन्धो
पङ्केरुहाक्ष पुरुषोत्तम कर्मसाक्षिन् ।
माङ्गल्यरूप मणिकण्ठ मनोभिराम
श्रीभूतनाथ भगवन् तव सुप्रभातम् ॥ १४॥
इति श्रीभूतनाथ अथवा अय्यप्पस्वामिनः सुप्रभातम् ।
Proofread by PSA Easwaran