श्रीब्रह्मानन्दस्तोत्रम्
ब्रजेन्द्रनन्दाङ्गनभासकारिणः सखेति वित्तं प्रभुपादभावितैः ।
व्रजस्य राखालमनन्तसौभगं, नमामि शान्तं शिशुभाव सुन्दरम् ॥ १॥
मुहुर्मुहुः श्रीहरिनामविह्वलं सुनिर्मलं योगसुधाब्धि मज्जनात् ।
दयाघनं नाथमनाथपावनं नमामि दान्तं यतिवृन्दशेखरम् ॥ २॥
न रामकृष्णस्य शरीरसम्भवः स मानसाज्जात इतीह कीर्तितः ।
यथैव तातः सुरसङ्घपूजितस्तथैव पुत्रो नरपाल सेवितः ॥ ३॥
अनन्तभावालयदिव्यसागरं बहिः सुशान्तापिहितात्मभावम् ।
गताखिलाध्यात्म्य सुराज्यसम्पदं भजामि देवाद्य मनोजनन्दनम् ॥ ४॥
प्रफुल्लपङ्केरुहमध्यचारिणा बलानुजेनाङ्ग समूहगामिना ।
करैर्धृत नृत्यसुगीतरम्यकं नमो महाराजमतीन्द्रियप्रियम् ॥ ५॥
न साधनेनेह गतोऽसि भाविनीं वदन्ति सिद्धिं त्वमसौ गदाधराः ।
य तो भवादृक् कृतनित्यसिद्धिगो वशी क्षमा मङ्गलकृत्यविग्रहः ॥ ६॥
मनुष्यदेहं भजतापि दैवताद् वरीयसा शुद्ध विरागिणा त्वया ।
प्रभोर्नियोगेन सलीलमातनि क्रियातपोज्ञानसमाधिसाधनम् ॥ ७॥
गृहाण देव ! प्रणयेन सञ्चितान्योग्यभाजामपि जीवनानि नः ।
अथापि धेयानि मनांसि पादयोस्तवातिशुद्धत्रिदिवेनवन्द्ययोः ॥ ८॥
योऽध्यात्म्यसाम्राज्यबलेन लोकान् सम्भूय सर्वान् भगवद्विभावैः ।
आनन्दयत् काममजस्रमिष्टां स्तं देशिकेन्द्रं प्रणमामि भक्त्या ॥ ९॥
वैराग्यज्योतिरिद्धं गुरुगतहृदयं लोकचारिप्रविज्ञं
सङ्घाध्यक्षं विशालं क्षितिपतिसदृशं दिव्यदृष्टिं कृशानुम् ।
रामश्रीनामकीर्तिर्प्रचरणमनसा दक्षिणस्यां दिशन्तत्,
प्राच्यां भूमौ नमामः सततहितपरं नीतिवन्तं यमीन्द्रम् ॥ १०॥
लोके ख्यातिन्त्वतुल्यां बहुमितविभवं रूपशीलादियुक्तां
पातिव्रत्येस्थितां स्त्रीं सजनकजननीं स्वास्थ्यतारुण्यमाप्तम् ।
सन्त्यज्यस्वामशेषामहिविषयसदृशीं तूर्णमायन् विवेकं
वैराग्येणैकमीशं शरणमवगतो रामकृष्णं गुरुं त्वम् ॥ ११॥
ब्रह्मानन्द्रं वरेण्यं यतिवरमनिशं भावसिन्धौ निमग्नं
संसारार्त्तान् मनुष्यान् सहजकरुणया चेतयन्तं महान्तम् ।
शुद्धं शान्तं प्रकाशं विदितचितिसुखं रामकृष्णान्तरङ्गं
ध्यायेद् दिव्याकृतिं भोः कलिकलुषहरं चिद्घनं मूर्तिमन्तम् ॥ १२॥
इति ब्रह्मचारिमेधाचैतन्यविरचितं ``श्रीब्रह्मानन्दस्तोत्रम्'' सम्पूर्णम् ।
प्रणाममन्त्रः-
रामकृष्णस्त्त्वभूत् येन पुत्रवान् भौममण्डले ।
ब्रह्मानन्दं नमामि त्वां राखालदलनायकम् ॥
Proofread by Aruna Narayanan