Brahmakritam 2 Subhadra Stotram

 ब्रह्मकृतं २ सुभद्रास्तोत्रम् 

जय देवि जगन्मातः प्रसीद परमेश्वरि ॥ ५२॥

कार्यकारणकर्त्री त्वं सर्वशक्त्यै नमोऽस्तु ते ।
सर्वस्य हृदि संविष्टे ज्ञानमोहात्मिके सदा ॥ ५३॥

कैवल्यमुक्तिदे भद्रे त्वां नमामि सुरारणिम् ।
देवि त्वं विष्णुमायासि मोहयन्ती चराचरम् ॥ ५४॥

हृत्पद्मासनसंस्थासि विष्णुभावानुसारिणी ।
त्वमेव लक्ष्मीर्गौरी च शची कात्यायनी तथा ॥ ५५॥

यच्च किञ्चित्क्वचिद्वस्तु सदसद्वाखिलात्मिके ।
तस्य सर्वस्य शक्तिस्त्वं स्तोतुं त्वां कस्तु शक्तिमान् ॥ ५६॥

जय भद्रे सुभद्रे त्वं सर्वेषां भद्रदायिनि ।
भद्राभद्रस्वरूपे त्वं भद्रकालि नमोऽस्तु ते ॥ ५७॥

त्वं माता जगतां देवि पिता नारायणो हि सः ।
स्त्रीरूपं त्वं सर्वमेव पुंरूपो जगदीश्वरः ॥ ५८॥

युवयोर्न हि भेदोऽस्ति नास्त्यन्यत्परमेव हि ।
यथा वयं नियुक्ता हि त्वया वै विष्णुमायया ॥ ५९॥

निदेशकारिणो नित्यं भ्रमामः परमेश्वरि ।
वृत्तिः प्रवृत्तिः परमा क्षुधा निद्रा त्वमेव च ॥ २.२७.६०॥

आशा त्वमाशापूर्णा च सर्वाशा परिपूरिका ।
मुक्तिहेतुस्त्वमेवेशि बन्धहेतुस्त्वमेह हि ॥ ६१॥

सर्वज्ञानप्रदे नित्ये भक्तानां कल्पवल्लरी ।
त्राहि पादाब्जनम्रं मां कृपापाङ्गविलोकनैः ॥ ६२॥

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्ये
      सप्तविंशाध्यायान्तर्गतं ब्रह्मकृतं सुभद्रास्तोत्रं समाप्तम् ।

स्कन्दपुराण । वैष्णवखण्ड । पुरुषोत्तमखण्ड । अध्याय २७/५२-६२॥


skandapurANa . vaiShNavakhaNDa . puruShottamakhaNDa . adhyAya 27/52-62..

Proofread by PSA Easwaran