Brahmakritam Agni Stotram

ब्रह्मकृतं अग्निस्तोत्रम्

ब्रह्मोवाच । सप्ततेजो नमस्तेऽस्तु परस्य परमात्मने । अद्भुतानां प्रतिश्रोत्रे तेजसां निधये नमः ॥ ६१॥ बीजं यो विश्वभावानां सम्मोहनविमोहनम् । अन्धकारो युगावर्तकाले काले च दुःसहः ॥ ६२॥ ऊर्ध्ववक्त्र नमस्तेऽस्तु सत्त्वात्मक धरात्मक । ज्वलज्ज्वालोत्पन्नजल जलजेश जलेचर ॥ ६३॥ जलजोत्फुल्लपत्राक्ष जलदेव हुताशन । कृष्णकान्तः कृष्णमार्गः स्वर्गमार्गप्रदायक ॥ ६४॥ यज्ञाहुतिसमाचार यज्ञरूप नमो नमः । स्वर्णगर्भ शमीगर्भ जय देव सनातन ॥ ६५॥ तमोहार महाहार स्वाहाप्रिय तमोहर । प्रदीप्तरोचिर्देवेश चित्रभानो नमोऽस्तु ते ॥ ६६॥ वैश्वानरानलोदग्र ऊर्ध्वपावक सर्वग । विभावसो महाभाग कृष्णवर्त्मन्नमोनमः ॥ ६७॥ इति श्रीस्कन्दपुराणे आवन्त्यखण्डे अवन्तीक्षेत्रमाहात्म्ये चतुर्थाध्यायान्तर्गतं ब्रह्मकृतं अग्निस्तोत्रं समाप्तम् । स्कन्दपुराण । आवन्त्यखण्ड । आवन्त्यखण्ड । अध्याय ४/६१-६७॥ skandapurANa . AvantyakhaNDa . AvantyakhaNDa . adhyAya 4/61-67.. Proofread by PSA Easwaran