Prayers for Eight Immortal Beings

चिरञ्जीवीप्रार्थना

अश्वत्थामा बलिर्व्यासो हनूमांश्च बिभीषणः । कृपः परशुरामश्च सप्तैते चिरजीविनः ॥ सप्तैतान् संस्मरेन्नित्यं मार्कण्डेयमथाष्टमम् । जीवेत् वर्षशतं साग्रमपमृत्युविवर्जितः ॥ मार्कण्डेयाद्यावाहितदेवताः प्रार्थयेत् । ॐ मार्कण्डेयाय नमः । पुत्रपौत्रप्रदं नित्यं प्रार्थयामि महामतिम् । रत्नगर्भसुमङ्गल्यचूतपल्लवशोभितम् । चन्दनाक्षतपुष्पाढ्यं पूर्णकुम्भं नमोऽस्तु ते ॥ १ आयुष्प्रद महाभाग सोमवंशविवर्धन । महाव्रत महाश्रेष्ठ मार्कण्डेय नमोऽस्तु ते ॥ २ मार्कण्डेय महाभाग सप्तकल्पान्तजीवन । आयुरारोग्यमैश्वर्यमस्माकं वरदो भव ॥ ३ नववर्षायुषं प्राप्य तपसा महता परम् । सप्तकल्पकृतं येन ह्यायुषं मे प्रयच्छतु ॥ ४ क्षित्यव्वायुवियत्तेजोब्रह्मविष्णुमहेश्वराः । मामेव हि सदा पान्तु मार्कण्डेयो भवाम्यहम् ॥ ५ मनो बुद्धिरहङ्कारचन्द्रादित्याश्च देवताः । मामेव हि सदा पान्तु चिरञ्जीवी भवाम्यहम् ॥ ६ कालात्मरथमध्यस्थ उग्रवीर क्षयान्तक । ग्रहर्क्षवत्सराद्यात्मन् नमस्ते मृत्युनायक ॥ ७ ममागतादुग्ररथभयादुद्धर रक्षक । पाहि पाहि महादेव त्वमेव शरणं मम ॥ ८ षष्टिसंवत्सरे पूर्णे प्राप्ते ह्युग्ररथाह्वये । दीर्घायुषं तु मां कुर्वन् सुप्रीतो भव सर्वदा ॥ ९ मार्कण्डेय महाभाग कल्पायुर्ज्ञानविग्रह । आयुर्बलं यशो धैर्यं यच्छ मे ब्रह्मनन्दन ॥ १० अश्वत्थामा -- द्रौणे मे त्वं महाभाग रुद्रतेजःसमुद्भव । आयुर्बलं यशो देहि अश्वत्थामन् नमोऽस्तु ते ॥ बलिः -- दैत्येन्द्रकुलसम्भूत यज्ञदानक्रियारत । बले त्वां शरणं यामि दीर्घमायुः प्रयच्छ मे ॥ व्यासः -- वसिष्ठकुलसम्भूत वेदशास्त्रविशारद । नारायणांशसम्भूत वेदव्यास नमोऽस्तु ते ॥ हनुमान् -- अञ्जनीगर्भसम्भूत कपीन्द्र सचिवोत्तम । रामप्रिय नमस्तुभ्यं हनूमन् रक्ष मां सदा ॥ बिभीषणः -- बिभीषण नमस्तुभ्यं रामपादाब्जपूजक । आयुरारोग्यमैश्वर्यं देहि पौलस्त्यनन्दन ॥ कृपः -- द्विजेन्द्र भरताचार्य सर्वविद्याविशारद । शरणं त्वां प्रपन्नोऽस्मि कृप मां रक्ष सर्वदा ॥ परशुरामः -- रेणुकेय महावीर्य कार्तवीर्यकृतान्तक । आयुः प्रयच्छ मे राम जामदग्न्य नमोऽस्तु ते ॥ षष्ठीदेवी -- षष्ठि देवि नमस्तुभ्यं सूतिकागृहशायिनि । पूजिताऽसि परत्तया दीर्घमायुः प्रयच्छ मे ॥ आयुर्देह्यभयं देहि अद्य जन्मदिने मम । रक्ष रक्षस्व मां नित्यं देवानामपि रक्षिणि ॥ सर्वदेवप्रियकरि सर्वमङ्गलकं कुरु ! ॥ इति चिरञ्जीवीप्रार्थना समाप्ता । NA This is to be chanted for ugrarathashAnti (celebrating 60+ years) or called ShaShTyabdapUrti ShaShTi pUrti