श्रीदत्तात्रेयकवचस्तोत्रम्
विनियोगः -
अस्य श्रीदत्तात्रेयकवचस्तोत्रमहामन्त्रस्य नारायण ऋषिः ।
अनुष्टुप् छन्दः । श्रीदत्तात्रेयो देवता । द्रां बीजम् ।
क्लीं शक्तिः । स्वाहा कीलकम् ।
श्रीदत्तात्रेयप्रसादसिद्ध्यर्थे जपे विनियोगः ॥
अथ करहृदयादिन्यासः -
ॐ द्रां अङ्गुष्ठाभ्यां नमः ।
ॐ द्रीं तर्जनीभ्यां नमः ।
ॐ द्रूं मध्यमाभ्यां नमः ।
ॐ द्रैं अनामिकाभ्यां नमः ।
ॐ द्रौं कनिष्ठिकाभ्यां नमः ।
ॐ द्रः करतलकरपृष्ठाभ्यां नमः ॥
ॐ द्रां हृदयाय नमः ।
ॐ द्रीं शिरसे स्वाहा ।
ॐ द्रूं शिखायै वषट् ।
ॐ द्रैं कवचाय हुम् ।
ॐ द्रौं नेत्रत्रयाय वौषट् ।
ॐ द्रः अस्त्राय फट् ॥
इति करहृदयादिन्यासः ॥
अथ ध्यानम् -
दत्तात्रेय हरेकृष्ण उन्मत्तानन्ददायक ।
दिगम्बरमुने बालापिशाच ज्ञानसागर ॥
अथ पञ्चोपचारपूजा -
लं पृथिव्यात्मने गन्धं समर्पयामि ।
हं आकाशात्मने पुष्पं समर्पयामि ।
यं वाय्वात्मने धूपं समर्पयामि ।
रं वह्न्यात्मने दीपं दर्शयामि ।
वं अमृतात्मने नैवेद्यं निवेदयामि ।
सं सर्वात्मने ताम्बूलादिसर्वोपचारान् समर्पयामि ॥
अथ श्रीदत्तात्रेयकवचम् ।
ॐ भक्ताश्रयः शिरः पातु ललाटं मुनिशेखरः ।
योगीश्वरो दृशौ पातु त्रैलोक्यस्यप्रियः श्रविः ॥ १॥
कपोलौ मुनिराजेन्द्रः मुखं पातु कुमारकः ।
जिह्वां मे पातु मन्त्रात्मा कण्ठं विष्णुस्वरूपकः ॥ २॥
स्कन्धौ कपिलवर्णश्च दत्तात्रेयो भुजौ तथा ।
कर्णौ तु तापसो नित्यं हृदयराजयोगवित् ॥ ३॥
वक्षो मे हठयोगी च स्तनो मे नादयोगवित् ।
पार्श्वे तु योगराजेन्द्र कुक्षिं मे योगवान् प्रभुः ॥ ४॥
मध्यं पातु तेजस्वी नाभिं मे जृम्भयोगिराट् ।
कटिं पिङ्गलयोगी च योगीशो जघनं मम ।
गुह्यं मे कर्मयोगी च तन्मूलं तत्त्वयोगवित् ॥ ५॥
ऊरू परमहंसश्च जानुनी बिन्दुयोगवित् ।
जङ्घे जटाधरः पातु गुल्फौ मे शिवयोगवान् ॥ ६॥
पादौ मे विष्णुयोगी च पूर्वाङ्गं ब्रह्मयोगवित् ।
अपराङ्गं सदा रक्षेद् दत्तात्रेयो मुनिस्तथा ।
सर्वाङ्गानि सदा रक्षेद् दत्तात्रेयो ऋषीश्वरः ॥ ७॥
पूर्वस्यां दिशि मे पात्वष्टाङ्गयोगाभ्यासवित् ।
आग्नेय्यां पातु योगीशो याम्यां मे निगमप्रियः ॥ ८॥
नैरृत्यां पातु विश्वेशः सदा षट्कर्मयोगवित् ।
वारुण्यां दिशि पार्श्वे तु पातु मे मुनिपुङ्गवः ॥ ९॥
कौबेर्यां तथैशान्यां पातु मे सर्वामरप्रियः ।
अनसूयासुतो रक्षेदूर्ध्वं त्वधरमेव च ॥ १०॥
पठने श्रवणे चैव गिरिगह्वरेषु च ।
अश्वारोहे गजारोहे चान्दोलिके तथा ।
वृक्षारोहे शिलारोहे युद्धे भुवि रसातले ॥ ११॥
उद्याने वनवासे च आसने जपे तथा ।
बाह्याभ्यन्तरकालेषु सर्वं रक्षेच्च ईश्वरः ॥ १२॥
शङ्खचक्रकुठाराद्यायुधेभ्यस्त्रिसन्ध्यया ।
सर्वरक्षाकरो रक्षेत् कार्तवीर्यप्रियङ्करः ॥ १३॥
ब्रह्मराक्षसभेतालकूष्माण्डराक्षसादयः ।
पिशाचा डाकिनीभूता शाकिनीबालकग्रहाः ।
सर्वभूतहितार्थाय सदा रक्षेन्महामुनिः ॥ १४॥
उदये चास्तमाने च मध्याह्ने सार्वकालिके ।
दिवारात्र्योर्निशायां च रक्षेत्सर्ववरप्रदः ॥ १५॥
दत्तात्रेयस्य कवचं यः पठेत् प्रियतो नरः ।
आयुरारोग्यसिद्धिं च ऐश्वर्यमधिकं तथा ॥ १६॥
ज्ञानवैराग्यसिद्धिं च यः पठेत् स्तोत्रसहस्रकम् ।
स्वातन्त्र्यं च भवेन्नराणां सर्वकामार्थसाधकम् ॥ १७॥
धारयेत् सुपुष्करयोगकाले पठेन्नरः ।
पुत्रपौत्रं च यन्नित्यं फलमेतन्न संशयः ॥ १८॥
इति ब्रह्माण्डपुराणे ब्रह्मनारायणसंवादे
श्रीदत्तात्रेयकवचस्तोत्रं सम्पूर्णम् ॥
From shrIdattAtreyakalpaH
Encoded and proofread by Durga Sharma