श्रीगदाधरस्तोत्रम्
घनचेतनमक्रियमादिमजं, चिर-निश्चल-निष्कल निर्विरुजम् ।
सुख-सद्म-विशुद्ध-विबुद्ध वरं, प्रणमामि-गदाधर ब्रह्मपरम् ॥ १॥
शत-सौरि-मुरारि-तरङ्गयुतं, अयुतायुत-भास्कर-कुक्षिवृतम् ।
सुविशाल-समुद्र-सुदभ्रकरं, प्रणमामि गदाधर ब्रह्मपरम् ॥ २॥
क्षुदिराम-विराम-विलासकरं, छल जृम्भितकारण कार्यवलम् ।
जितकाञ्चन-काम-प्रपञ्चहरं, प्रणमामि गदाधर ब्रह्मपरम् ॥ ३॥
युगधर्म-प्रवर्तक-गुप्तनरं, जनपावन-गाङ्ग्य-तटावसथम् ।
शिशुसौम्यमगम्य-प्रणम्यवरं, प्रणमामि गदाधर-ब्रह्मपरम् ॥ ४॥
शिव-केशव-वासव-सङ्गयुतं, अवतारगरिष्ठमरिष्ट-हतम् ।
अघमोचन दुष्कृत मुक्तिकरं, प्रणमामि गदाधर-ब्रह्मपरम् ॥ ५॥
करुणाघन-कर्मकठोर-पणं, गुणहीनमपापमशेष गुणम् ।
युगचक्र-विवर्तक तर्कहरं, प्रणमामि गदाधर-ब्रह्मपरम् ॥ ६॥
शुभ बेलूड़-मन्दिर-सन्निहितं, निजशिष्य प्रशिष्य-विशेषरतम् ।
शिवमोक्ष-धनेश्वरमादिगुरुं, प्रणमामि गदाधर-ब्रह्मपरम् ॥ ७॥
सुगभीर-समाधिसमुद्र-गतं, कृतभक्तिविकासन-विश्वहितम् ।
तव शुभनाम-भवतापहरं, प्रणमामि गदाधर-ब्रह्मपरम् ॥ ८॥
इति श्रीशरच्चन्द्रचक्रवर्ती विरचितं ``श्रीगदाधरस्तोत्रम्'' सम्पूर्णम् ।
Proofread by Aruna Narayanan