Guru Ashtakam

गुर्वष्टकम्

॥ श्रीगणेशाय नमः ॥ अज्ञाननाशकं वन्द्यं पूज्यपाद सरोरुहम् । मोक्षदं ज्ञानदातारं प्रणमामि गुरुं परम् ॥ १॥ संसारसागरात् शीघ्रमुद्धर्तुमागतं प्रभुम् । शिष्याय ज्ञानदं पूज्यं प्रणमामि गुरुं परम् ॥ २॥ कैवल्यज्ञानमूर्तिश्च तत्त्वमस्यादि वाक्यदम् । मोक्षार्थपरमाधारं प्रणमामि गुरुं परम् ॥ ३॥ आज्ञाचक्रे स्थितं नित्यं द्विदलं रक्तवर्णकम् । द्वयक्षरं हंसरूपाख्यं प्रणमामि गुरुं परम् ॥ ४॥ ब्रह्मा विष्णुश्च रुद्रश्च गुरुरेव न संशयः । सच्चिदानन्दरूपं त्वां प्रणमामि गुरुं परम् ॥ ५॥ असाररूपसंसारादुद्धृत्य परमं पदम् । तत्त्वदं ब्रह्मरूपं त्वां प्रणमामि गुरुं परम् ॥ ६॥ कुलालचक्रवन्नित्यं भ्रमन्ति च सदा जनाः । नौरिव तारकं तेषां प्रणमामि गुरुं परम् ॥ ७॥ हे गुरो परमानन्द परमं पददर्शनम् । कर्तुमिच्छामि तत्त्वज्ञ प्रणमामि गुरुं परम् ॥ ८॥ गुर्वष्टकमिदं स्तोत्रं ये पठन्ति नराः सदा । ते नराः गुरु शिक्षातः गच्छन्ति परमं पदम् ॥ ९॥ इति गायत्रीस्वरूप ब्रह्मचारीविरचितं श्रीगुर्वष्टकं सम्पूर्णम् ॥ Proofread by Vani V