Indrasya Shatchatvarimshanama Stotram

 इन्द्रस्य षट्चत्वारिंशनामस्तोत्रम् 

नन्द उवाच ।
इन्द्रः सुरपतिः शक्रो दितिजः पवनाग्रजः ॥ १५०॥

सहस्राक्षो भगाङ्गश्च कश्यपाङ्गज एव च ।
बिडौजाश्च सुनासीरो मरुत्वान्पाकशासनः ॥ १५१॥

जयन्तजनकः श्रीमाञ्छचीशो दैत्यसूदनः ।
वज्रहस्तः कामसखो गौतमीव्रतनाशनः ॥ १५२॥

वृत्रहा वासवश्चैव दधीचिदेहभिक्षुकः ।
विष्णुश्च वामनभ्राता पुरुहूतः पुरन्दरः ॥ १५३॥

दिवस्पतिः शतमखः सुत्रामा गोत्रभिद्विभुः ।
लेखर्षभो बलारातिर्जम्भभेदी सुराश्रयः ॥ १५४॥

सङ्क्रन्दनो दुश्च्यवनस्तुराषाण्मेघवाहनः ।
आखण्डलो हरिहयो नमुचिप्राणनाशनः ॥ १५५॥

वृद्धश्रवा वृषश्चैव दैत्यदर्पनिषूदनः ।
षट्चत्वारिंशन्नामानि पापघ्नानि विनिश्चितम् ॥ १५६॥

स्तोत्रमेतत्कौथुमोक्तं नित्यं यदि पठेन्नरः ।
महाविपत्तौ शक्रस्तं वज्रहस्तश्च रक्षति ॥ १५७॥

अतिवृष्टिशिलावृष्टिवज्रपाताच्च दारुणात् ।
कदाचिन्न भयं तस्य रक्षिता वासवः स्वयम् ॥ १५८॥

यत्र गेहे स्तोत्रमिदं यश्च जानाति पुण्यवान् ।
न तत्र वज्रपतनं शिलावृष्टिश्च नारद ॥ १५९॥

इति ब्रह्मवैवर्तपुराणे श्रीकृष्णजन्मखण्डे एकविंशाध्यायान्तर्गतं
         इन्द्रस्य षट्चत्वारिंशनामस्तोत्रं सम्पूर्णम् ।

ब्रह्मवैवर्तपुराण । श्रीकृष्णजन्म, पूर्वभाग । अध्याय २१/१५०-१५९॥


brahmavaivartapurANa . shrIkRRiShNajanma, pUrvabhAga . adhyAya 21/150-159..

Proofread by PSA Easwaran