श्रीकृष्णचैतन्यचन्द्रसहस्रनामस्तोत्रम् २
निसर्ग दुर्बोध-निजप्रभाव-विमोहिताशेषजनो गभीरः ।
शचीस्तन-क्षीरसुधाशमत्तः कवीन्द्रपारीन्द्रसहस्रविक्रमः ॥ १॥
निरस्तमायावरण-निजदेह-प्रकाशकृत्
गौडदेश-जनासङ्ख्य-पुण्यसार-समुच्चयः ॥ २॥
आद्यन्तमध्यरहितस्तारुण्य-प्रस्फुरद्वपुः
अदोषदर्षी सौन्दर्य-धैर्य-गाम्भीर्य-शौर्यवान् ॥ ३॥
द्विजराज-जगन्नाथ-द्विजराजगुणात्मजः ।
शचीजठररत्नाब्धि -महारत्नं गुणार्णवः ॥ ४॥
नवद्वीपशिशुक्रोडापरः शैरावविभ्रमः ।
पदाम्भोजाङ्कित-शचीगेह-क्रीडापरायणः ॥ ५॥
शचीस्मेरे-कृतस्मेरः शचीरोदन-रोदनः ।
औग्रक्रीडनकोद्विग्न-शचीशिक्षा स्मिताननः ॥ ६॥
काकपक्षधरो धूलिधूसरः स्वेदवन्मुखः ।
क्रीडाश्रान्तिस्खलद्बद्धधटिव्यक्तलसत्कटिः ॥ ७॥
श्लथद्बन्धधटीलम्ब-केशव्यग्रकराम्बुजः ।
लोलालकः पञ्चजूटः प्रतिवेशिगृहप्रियः ॥ ८॥
जगन्नाथकरालम्बी जगन्नाथसुखप्रदः
तद्विश्रुत-रिक्तपाद-मञ्जुमञ्जीर सिञ्जितः ॥ ९॥
सप्त-पञ्चार्भकाक्रीडी लम्बकेशाकुलेक्षणः ।
ध्वजाङ्कित-पदालक्ष्य-बालकान्वेष्य-पद्धतिः ॥ १०॥
मुरारिगुप्त-करुणाकृत-तद्वेश्म-खेलनः
मुरारिगुप्तभवन-क्रीडाताण्डवपण्डितः ॥ ११॥
स्वमायामुग्ध-चौरासङ्गतः सर्व सुखावहः ।
शिशुक्रीडाचलत्पाद-रणत्कनकनूपुरः ॥ १२॥
अदृष्टाश्रुतचाञ्चल्य-शचीविस्मयकारकः ।
अलब्धभक्ष्य-सामर्षो भग्नकुम्भान्नभाजनः ॥ १३॥
मधुरोक्तिरञ्जिताम्बामार्जितनिजदोषसञ्चयश्चतुरः ।
पूर्वावतार-निजजन-सम्भ्रमकारी निगूढनिजभावः ॥ १४॥
भ्रमणपरः पटुधावनशब्दित-मणिकिङ्किणीजालः ।
अम्बाकौतुकवर्धनताण्डवलीला-गतिर्मायी ॥ १५॥
मोहनखेलाविकल-स्वाम्बात्यक्तेतिकर्तव्यनिचयः ।
प्रतिपदताण्डवलीलः पावित मोहिताङ्कितक्षौणिः ॥ १६॥
गङ्गातीर-विहारी निजजन-नयनोत्सवाक्रीडः ।
गङ्गातरङ्गशीकर-सेवनकुतुकी दरस्मेरः ॥ १७॥
वालुकातटनटो नटवेशो वालुकानिचयखेलनोत्सुकः ।
अच्छवालुकातटतद्दोशोद्वीक्षणास्तिमितविस्तृतेक्षणः ॥ १६॥
धावमानशिशुसङ्घसङ्गतः शैशवोचितमनोहरवेशः ।
बालयुद्ध-परिहासलम्पटश्चित्तविभ्रमविमोहितबालः ॥ १९॥
पादलम्बिघटिकाञ्चलश्चलत्पुष्पदामविभूषितचूडः ।
वर्तुलायतसुचारुनितम्बश्चित्रनाट्य महिताङ्घ्रिपङ्कजः ॥ २०॥
भूरिकाल-विरहातुरगङ्गा-नूतनीकृत-पदाम्बुजसङ्गः ।
वालुकानिचय-पादविक्रम-स्थाणुपादसरसीरुहचिह्नः ॥ २१॥
स्थूलसूक्ष्म-पतगाङ्घ्रिलक्षणप्रेक्षणातिकुतुकी तरलाक्षः ।
पङ्क्तिभागपर-पक्षिगणाङ्घ्र्युद्दोशधावनपरो दरस्मितः ॥ २२॥
मज्जनार्थगतमातृविलोकप्राप्तभीतिभरलब्धसमीपः ।
धावनभ्रमणताण्डवलीला-कौतुकातिसुखविस्मृतगेहः ॥ २३॥
कृतस्नान-शचीस्पर्श-दोष-हर्ष-परायणः ।
पाकस्थाली-स्पर्शहर-शचीचुम्बन-भाजनम् ॥ २४॥
स्तनपान-क्षणस्मेर-मातृमोदकराननः ।
वस्त्रगुप्तामरार्चार्ह -शर्करागुटिकामहः ॥ २५॥
कालवर्धिततनुद्युतिव्रज-प्रस्फुरन्मधुरिमाच्छटाश्रयः ।
तातवाक्य-परिशीलनधीरः सुन्दराम्बरधरः स्थिरबुद्धिः ॥ २६॥
निजकुलसमुचितविद्या-परिशीलनमाधुरीचतुरः ।
गङ्गादास-महाशय-गुरुत्व-विख्यापनाभिज्ञः ॥ २७॥
उपनतशतशतशिष्यप्रधानभृतः स्फुरन्मेघः ।
विशदार्थ-बोधकारी शिष्यगणोद्गीतबहुमानः ॥ २८॥
मध्यनीलमणिस्वर्गारो रजतहारवान् ।
विश्वरूपानुजः सन्ध्यवतारः सुरचेष्टितः ॥ २९॥
विद्याभ्यासासक्तिः स्फुरिताशेषदर्शनः ।
वयस्यगणसंसर्ग-परिहासपरायणः ॥ ३०॥
परिहास-रसावेश-विस्मापितसभाजनः ।
परिहासकथाभङ्गीहासितानुगतगुरुः ॥ ३१॥
गुरुभक्तिपरायणः सुशीलः सहजानन् सुधामहाम्बुधीन्दुः ।
अनिरूपित रूपयौवनश्रीः परमानन्दरसायनः सुधीरः ॥ ३२॥
शङ्ख-चक्र-गदाम्भोज-वज्राङ्कितपदाम्बुजः
सर्वलक्षण-सम्पन्नतनुः सर्वगुणाश्रयः ॥ ३३॥
अङ्गप्रत्यङ्गचक्रादि भक्तदेह-प्रकल्पनः
क्रीडाकलाबद्धसङ्ग-पण्डितश्रीगदाधरः ॥ ३४॥
शचीजठरसम्भूतः शचीक्रोडविभूषणः ।
नानामणिगणप्रोत-हेमकुण्डलमण्डितः ॥ ३५॥
रक्तहेमाम्बुजपदः पद्मपत्रविलोचनः ।
अशेषशास्त्रज्ञानार्कः शुद्धबुद्धि-विशारदः ॥ ३६॥
अधीतसर्वविद्यश्च सदुपाध्यायसम्मतः ।
दृष्टश्रुताधीतशास्त्रव्याख्याता लोकपूजितः ॥ ३७॥
गुरुव्याख्यातशास्त्रार्थनानावर्त्मप्रदर्शकः
सर्वशास्त्रनिगूढार्थ-व्याख्याकृत् स्वप्रकाशकः ॥ ३८॥
आकस्मिकप्रेमधारा-मातृविस्मयकारकः
मिलितानेकसच्छिष्य-नित्याध्यापन-तत्परः ॥ ६९॥
कन्याग्रहण-कारुण्य-पावितश्रीसनातनः
स्वयङ्गृहीतभगिनीगङ्गान्तर्जलदायकः ॥ ४८॥
कालप्राप्त-जगन्नाथ-स्वपदाम्बुनदीददः
कृतशोको लोकपरो विषण्णमुखपङ्कजः ॥ ४१॥
अशेषद्रव्यसम्भार-निर्वाहितपितृक्रियः
दानपूजितभूदेव-पापदैन्यविनाशनः ॥ ४२॥
सम्मानितानेयविप्रः प्रीणिताशेषसज्जनः ।
भोजिताशेषभूदेवो विनीतो नयभूषणः ॥ ४३॥
शचीप्रियः शचीपुत्रः शचीत्राण-परायणः ।
लोकशिक्षाविधानार्थ-कृष्णनामप्रगायनः ॥ ४४॥
अम्बाश्रताग्रजकथः सदाग्रजपरायणः ।
अजान्वेषणपरो गयाविजयसादरः ॥ ४५॥
अश्रुताग्रजवृत्तान्तो न दृष्टाजपद्धतिः ।
अदृष्टभ्रातृदुःखार्तो निजमाया-प्रकाशकः ॥ ४६॥
श्रीमदीश्वरपुरी-कथान्तरस्मारिताग्रजनि-पूर्ववैभवः ।
श्रीमदीश्वरपुरीस्तुतिपाठकलनोच्छलितप्रेमसागरः ॥ ४७॥
आत्मविस्मृतिकरात्मशैशवः प्रेमभक्तिविदितात्मवैभवः ।
नोदितार्थदिनरात्रिविचारः सुप्तिभुक्तिरहितः स्फुटकान्तिः ॥ ४८॥
कोटिकोटिकमलाश्रितदेहः कोटिकोटिकमलाप्रकाशकृत् ।
कोटिकोटिरविदुःसहतेजाः कोटिकोटिशशिनिर्मलकान्तिः ॥ ४९॥
त्यक्तेश्वरपुरीसङ्ग-क्षुब्धातिक्षब्धमानसः
भक्तिप्रख्यापनाचार्यः शचीस्नेहभरालसः ॥ ५०॥
क्षणदिनमुहूर्त-समुदित-मधुरमहावेशविस्मिताशेषः ।
अतिमृदुसुमधुरकान्तिः सुचारुवेशो नटानन्दः ॥ ५१॥
निरवधिकृतजनसङ्गोत्कीर्तन-निहितात्मसम्पत्तिः
स्वपदप्रवर्तितजगज्जनताविख्यातलसत्कीर्तिः ॥ ५२॥
पूर्वप्रथितभातृश्रीमन्नित्यानन्दशुभागमः
लब्धावधूतसङ्गः स्वयशः प्रख्यापनप्रयतः ॥ ५३॥
मिलितावधूत-ताण्डव-महः-प्रकाशितकृपाजलधिः ।
उभयप्रकाशमोहित-सकल-नवद्वीपनेत्रवल्लोकः ॥ ५४॥
पूर्ववर्ति-निजसत्कथारसप्रीतिगान-परितोषितानुगः ।
नागरीजनदृगन्तपातजस्नेहहर्षपुलकातिलज्जितः ॥ ५५॥
श्रीनारद श्रीनिवासपण्डितस्तुतिमोदकृत्
श्रीचन्द्रशेखरागारसुखक्रीडा-परायणः ॥ ५६॥
अमलः कमलानाथो गोपीनामस्मिताननः ।
गीतताण्डववैदग्ध्य-चातुर्य-रससागरः ॥ ५७॥
चतुःषष्टिकलानाथो गोपीनामनताननः ।
निजगोकुलवैदग्ध्यप्रकाशी निजभक्तिमान् ॥ १८।
तरुणारुणसच्छायदुकुलोज्ज्वलविग्रहः ।
अशेषभावचतुरो भावास्वादनलालसः ॥ ५९॥
कुमारलीलः कुतुकी परिहासकलागुरुः ।
ऊर्ध्वबद्धस्थूलजूटः सर्वशात्रबृहस्पतिः ॥ ६८॥
ताण्डवोल्लासितश्रीमच्चरणाम्बुजभूषणः ।
कोटिकन्दर्प लावण्यः कोटिकन्दर्पसुन्दरः ॥ ६१॥
भक्तभावरसास्वादगुप्तरासविशारदः ।
कोटिकन्दर्पसूः श्रीमान् कोटिकन्दर्पनागरः ॥ ६२॥
संसारोत्तापनिस्तारी मायानाशकरोदयः ।
सुचारुवदनः कञ्जलोचनः क्लेशमोचनः ॥ ६३॥
लावण्यसारसर्वस्व-प्रादुर्भूतलसद्वपुः
ब्रह्माण्डकोटिलावण्यसारसञ्चयलाञ्छितः ॥ ६४॥
अलेख्यस्वर्गपीयूषसारशीतलभाषणः ।
सिंहचारुलसद्ग्रीवः कम्बुचारुसुकण्ठवान् ॥ ६५॥
विशाल भालविभ्राजच्चन्दनालेपमोहनः ।
कपोलमण्डलद्वन्द्वविभ्राजन्मणिकुण्डलः ॥ ६६॥
अरुणाधरविभ्राजन्मन्दहाससुधाश्रयः ।
मृदुहासदरव्यक्तदन्तद्योतितदिङ्मुखः ॥ ६७॥
अरुणोष्ठचारुसौष्ठवनिन्दितमुखजातपक्वबिम्बश्रीः ।
विभूषणमणिमयकुण्डलयुगलच्छटाघटाकामभृत् ॥ ६८॥
कोटिसुधानिधिघटितवर्तुलसाह्लादसीधुमद्वदनः ।
कुटिलकटाक्षोदयावनद्धनवद्वीपनागरीनिकरः ॥ ६९॥
मदमत्तवारणेन्द्रप्रतिमगतिः सिंहशावकोजस्वी ।
काञ्चननिर्मितमणिमयनूपुरनादाहृताङ्गनानिवहः ॥ ७०॥
अरुणघटिकटिभूषणस्ताण्डवपाण्डित्यशिक्षिताशेषः ।
विस्तृतललितसुकोमलपादाम्बुजमाधुरीसिन्धुः ॥ ७१॥
स्वर्णप्रवालगुम्फितमध्यमणिस्फीतहार लसद्वक्षः ।
पल्लवमृदुतरकरतलकलितलक्ष्यनामजपलीलः ॥ ७२॥
दयाप्रेमार्द्रहसितवितीर्णप्रेमसागरः ।
कृपामधुरदृक्पातवशीकृतजगज्जनः ॥ ७३॥
अङ्गलेपमृगनाभिललितो भावसूचकद्दगञ्चलपातः ।
सर्वलोकनयनोत्सवकारी हासभास्वरमुखाम्बुजद्युतिः ॥ ७४॥
पूगपुञ्जपरिपूर्णमुखश्रीः स्वेदकारिमहितोरुनासिकः ।
तत्तदद्भुतरहस्यशीलनः प्रान्तरक्तपरिवेष्टिताम्बरः ॥ ७५॥
कर्पूरागुरुकस्तुरीगन्धपूरितदिङ्मुखः ।
सुवृत्तदीर्घदोर्दण्डलसत्कनककङ्कणः ॥ ७६॥
सुवर्ण-वर्ण-कण्ठस्थस्वर्णहारविभूषितः ।
प्रेमाश्रुधौतसर्वाङ्गस्फुरन्निर्मलकान्तिभृत् ॥ ७७॥
नवस्फुरितबन्धूकबन्धुराधरपल्लवः ।
पद्मरागमणिन्यस्तमुक्तास्वच्छरदच्छविः ॥ ७८॥
सुचारुकेशः सुमुखो हेमस्फुरितनासिकः ।
धनुर्ध्वजादिसम्पन्नपाणिव्यक्तयवाङ्गुलिः ॥ ७९॥
अशेषदेहसौन्दर्य-कोटिकन्दर्पनिन्दकः ।
अशेषगुणसम्पत्तिः सर्वलोकोपकारकः ॥ ८०॥
सुगु'फश्चारुचलनः सुकोमलपदाम्बुजः ।
आत्मारामेश्वरोन्मादि-राधावेशमनोहरः ॥ ८१॥
नागरीनयनानन्द-मन्दहाससुधाकरः ।
मनोरथपराभीष्ट-संसूचकनिरीक्षणः ॥ ८ २॥
भावप्रभूतप्रमदासाकूतेक्षणपण्डितः ।
अत्यन्तप्रेमसंरम्भबलद्दृढहासभृत् ॥ ८३॥
प्रेमप्रकाशविस्तीर्णसिंहनादसमस्वनः ।
कोटिसूर्यप्रतीकाश-सुमाधुर्यारुणांशुकः ॥ ८४॥
सुदुर्धर्षं-सुदुर्दर्श-प्रेमारम्भमहोदयः ।
सुदर्शनपराशेषमङ्गलप्रेमऋद्धिदः ॥ ८५॥
प्रेमाश्रुविगलद्वारोगलन्निष्ठीवनाम्बुधिः ।
गलद्घर्मार्द्रवसनः स्रवदुत्फुल्लनासिकः ॥ ८६॥
घनशीत्कारवान् जृम्भावान् घनश्वासवान् मुहुः ।
घनहासः स्वपार्श्वस्थ-तत्कालप्रेमदायकः ॥ ८७॥
प्रेमप्रोद्यत्सिंहनादशङ्कितीकृतदिग्गजः ।
अनवच्छिन्नपुलको मनःकम्पः स्थिरासनः ॥ ८८॥
वामपार्ष्णिकराघातकृष्णोऽहमितिसूचकः
एकद्वित्रदिनव्यापि प्रेमारम्भमहोत्सवः ॥ ८९॥
त्रयोविंशदिनव्यापि-प्रेमहासप्रकाशकृत्
त्रिकोणचिबुकः शुष्कनिमीलितमुखस्मितः ॥ ९०॥
त्रिवलीवलितः श्रीमद्दीर्घस्थूलशिरोधरः ।
केशविन्यास-सम्बद्ध-मालतीमाल्यमण्डितः ॥ ९१॥
ललिताङ्गुलिविभ्राजन्मणिकाञ्चनमुद्रिकः ।
गभीरारक्तमावर्त-नाभिमन्नघटीधरः ॥ ९२॥
समानवक्षोजघनो वर्तुलोरुः सुगुल्फ्वान् ।
चारुजानुश्चारुजङ्घः सुकोमलपदाम्बुजः ॥ ९३॥
हयग्रीवो मणिग्रीवः सुन्दरस्पर्शकेशभृत् ।
कमलाश्लेषरसिकः कमलास्तनचन्दनः ॥ ९४॥
कमलाहृदयानन्दः कमलानयनाञ्जनः ।
त्रिवली-विलसन्मध्यः सिंहमध्यः स्मरालसः ॥ ९५॥
सुपीन-वर्तुल-स्निग्ध-क्रमस्थूलमहाभुजः ।
करिशुण्डकृतिभुजो नामासक्तकराङ्गुलिः ॥ ९६॥
स्फुरन्नखमणिश्रेणीमिश्रांशुकरपल्लवः ।
लावण्यसारसर्वाङ्गश्चन्दनाञ्चितविग्रहः ॥ ९७॥
प्रत्यङ्गरभसावेशप्रभवानन्दबन्धुरः ।
स्वभावशीतलः प्रेमदर्शितानेकपौरुषः ॥ ९८॥
सदाप्रेमभराक्रान्तसर्वाङ्गो गतिमन्थरः ।
आभङ्गुरभ्रूयुगलः ईषदारक्तलोचनः ॥ ९९॥
घूर्णायमाननयनः पूर्णचन्द्रामलाननः ।
बहिः श्यामायतस्थूलचमत्कारिकनीनिकः ॥ १००॥
कर्णान्तायत-दृक्पात-हेलालावण्यसूचकः ।
भाववान् स्वगुणालाप-जगतीभावदायकः ॥ १०१॥
श्रोत्रानन्द-यशोराशिर्नेत्रानन्दतनुच्छविः ।
घ्राणानन्दलसद्गन्धः हृदयानन्द-सद्गुणः ॥ १०२॥
अमृतस्रावि- दृक्पातः सुधासारार्द्रसङ्कथः ।
अमृतोद्गारिसद्वेणुसुवास्यन्दिकलस्वनः ॥ १०३॥
रसनामृतसम्भुक्तः स्पर्शामृतकराम्बुजः ।
केशामृतलसन्मूर्धाप्रकाशामृतदेहधृक् ॥ १०४॥
अनन्यसाधारणरूपयौवनः शचीतनुप्राणमनोऽक्षिरञ्जनः ।
अशेषलोकोत्सवसारदर्शनः समस्तलोकाभ्युदयोरुसद्गुणः ॥
यज्ञोपवीतधारी द्विधा विवाहोत्सवे कुतुकी ।
अखिलविनोदविदग्धः कमलालावण्यमाधुरीमुग्धः ॥ १०६॥
आचमनागतकमलास्मितसम्मुखमार्जनारसिकः
निजकर्णाहितचम्पककलिका-कर्णार्पणप्रसादपरः ॥ १०७॥
कमलापितृगृहभोजनविनोदकारी विनोदमयदेहः ।
अनुगतकमलाजनतानिर्मितकौतुककलितकृपामधुरः ॥ १०८॥
परिहास्यजनोपहासकः प्रणयाधीनजनाङ्कसुप्तदेहः ।
परिहास्यजनोपहसितः सकलानन्दमयकुटुम्बलोलः ॥ १०९॥
वर्त्मवीक्षितपदाम्बुजचिह्नः स्निग्धदृष्टिमिलिताखिललोकः ।
तन्मुखाकलनविस्मितलोकः स्निग्धवीक्षणचकोरनिपीतः ॥ ११०॥
भग्नावधूतदण्डप्रकटकपटक्रोधोऽन्तरानन्दः ।
गोकुलवर्त्मविहारी निजपार्षदश्रमनिरासी च ॥ १११॥
भारतीकेशवप्रेमकृष्णनामवरप्रदः ।
जगन्नाथकुलानन्दः शचीकुलविभूषणः ॥ ११२॥
श्रीसार्वभौमविश्वासकृत्तत्स्थाल्यन्नभोजनः ।
कोमलाङ्घ्रितलो दूरीभूतसङ्गिगणाग्रणीः ॥ ११३॥॥
पीततक्रपरिपूरितरत्नस्तोमकुम्भयुगतोषितगोपः ।
प्रीतिमज्जनविनोदितुरीयप्रेमभक्तिदकृपाविजयिश्रीः ॥ ११४॥
निजसङ्गिगणश्रान्तिनाशक श्री मुखाम्बुजः ।
घनपल्लवित स्निग्धनवशाखिकुलाश्रयः ॥ ११५॥
श्रमोषितानुगस्वेच्छामण्डलीगणमध्यगः ।
स्वपादधूलिमहितपुरप्रामाकरव्रजः ॥ ११६॥
मथुरानगरीलोकलोचनानन्दचन्द्रमाः ।
गोपीपूर्वपरानन्दस्मारकस्मेरसन्मुखः ॥ ११७॥
विपरीतवेशविस्मित-व्रजवनितान्योन्यकथाहसितः ।
गोमुखसमुदितहाम्बारवस्थिरलोचनावलितः ॥ ११८॥
हृदयप्रमोदनिर्भरविस्मितगोपाललोचनापीतः ।
आलोकनजडलोचनगोकुलनगरीजनानन्दः ॥ ११९॥
मथुरामल्लदुष्प्रेक्ष्यदृप्तोरः स्कन्धसद्भुजः ।
आत्मसङ्गोपनव्यग्रः स्वप्रकाशमहोदयः ॥ १२०॥
गोकुलप्रेक्षणत्साहि गोकुलानन्दवर्धनः ।
स्वसङ्केतस्थल-क्षेम-प्रेक्षणप्रेमविह्वलः ॥ १२१॥
श्रमोपशमनप्रेयः पूर्वनीपतलाश्रयः ।
नौकाविनोदसंस्मारियमुनादर्शनोत्सुकः ॥ १२२॥
लुप्तपदाङ्कव्याकुलयमुनातटपादचिह्नधनदानः ।
रासमण्डलविनोदकौतुकी प्रेमाश्रुलहरीलसद्वपुः ॥ १२३॥
व्यक्तरासरसासक्तगोपीभावाकुलध्वनिः ।
गोपीभावालसतनुर्भावप्रस्मरणाकुलः ॥ १२४॥॥
गुप्तपद्धतिसंन्यास-प्रकाशगुरुदीपकः ।
अन्तर्विलोलितहरिप्रेमसारसुखाम्बुधिः ॥ १२५॥
भावसंवरणात्यन्तविस्फारिप्रेमविह्वलः ।
सोढानेकाबलाभावशस्त्रः सर्वंसहासमः ॥ १२६॥
अलब्धरासगोपस्त्रीदुःखकारुण्यरोदनः
गोपीहृदयसम्भूतदुःखदावाग्निहारकः ॥ १२७॥
कृपादृक्पातलहरीसुधाधारानिपानभूः ।
कान्तागारेक्षणसुधीः कृतगोवर्धनाश्रयः ॥ १२८॥
इन्द्रकोपश्रुधारौघवृष्टिप्लावितगोत्रभः ।
समसानुस्थलावासकृतेक्षणमुदार्द्रधीः ।
यमुनाकूलावसथो द्वादशोपवनाश्रयः ॥ १२९॥
निजजननयनमनःसुखदायकपूर्वावतारसुखभूमिः ।
लीलाविहारकारी हसितनिजलोकनिजहासः ॥ १३०॥
स्वविभूतिविहारलम्पटः स्मरसञ्चारकभङ्गुराक्षिपातः ।
मदमन्दगतिः स्मिताननो रससङ्घूर्णितलोचनो नृधर्मा ॥ १३१॥
प्रख्यातनागराचार्यः सौन्दर्यानन्ददेहधृक् ।
प्रेमभावोदितवपुः प्रकटानन्दविग्रहः ॥ १३२॥
मथुराजन-सद्भावप्रीतो मधुर भाषणः ।
उपायनकरासङ्ख्यजनविस्मयकारकः ॥ १३३॥
नानागुणमयद्रव्यभोजनैक-प्रलोभनः ।
निजलोक-क्षेम-परकथामधुरभाषणः ।
कथाहास्यातिमधुरदीर्घकालकृतासनः ॥ १३४॥
नित्यानन्दप्रियभ्राता नित्यानन्दबलप्रदः ।
नित्यानन्दप्रभावज्ञो नित्यानन्दैकजीवनः ॥ १३५॥
वक्रेश्वरदयोन्मादी प्रेमसर्वस्वदायकः ।
काशीश्वरप्रश्रयदो रामानन्दकथाप्रियः ॥ १३६॥
आचार्य-श्रीमदद्वैतदेहशक्तिबलप्रदः ।
अद्वैतभावसम्पूर्णः श्रीमदद्वैतपालकः ॥ १३७॥
मुकुन्ददत्तातुलभक्तिभाव-दयाप्रदत्ताखिलगीतिकासुधः ।
अशेषसंसेव्यपदारविन्दो गदाधरोपास्यपदाम्बुजासवः ॥ १३८॥
सूक्तापूतमुखाम्भोज-कविचन्द्रार्चदः प्रभुः ।
सुखानन्दपुरीत्राता भवानन्दप्रसादकृत् ॥ १३९॥
निसर्गशीतलालाप-निजलोकसुखार्णवः ।
सत्य राजान्वयत्राता गृहीत-शिशुनन्दनः ॥ १४०॥
रामानन्दाद्यतिप्रीतो गङ्गादाराद्विजप्रियः ।
वेदतत्त्वार्थनिर्णीत-मानुषातीतविग्रहः ॥ १४१॥
अनन्यसाधारणभक्तिभाव-गृहीतदत्तान्वयवासुदेवः ।
सर्वावतारप्रथितोरुदास्यमुरारिगुप्तप्रणयैकदाता ॥ १४२॥
प्रेमभक्तिरसव्यग्रदासवंशगदाधरः ।
निजकारुण्यविभव-कृष्णदासकृपाकरः ॥ १४३॥
नानादेशोद्गीयमानस्वगाथामृतयज्ञभुक ।
धातुद्वयोपभोगार्हद्रव्य भोजनपुष्टिभाक् ॥ १४४॥
हरिदासप्रणयदः श्रीमद्विष्णुपुरीश्वरः ।
भारती केशवाता सत्यसन्धः सनातनः ॥ १४५॥
नानादिग्देशसञ्चारी वानप्रस्थमुनिप्रियः ।
उपवीतधरो ब्रह्मचारी मातृवशो गृही ॥ १४६॥
संन्यासी लोकशिक्षावान् लोकाभिप्रायपूरकः ।
सार्वभौमदयासम्पद्दर्शिताद्भुतषड्भुजः ॥ १४७॥
वर्णेष्वहं द्विज इति वेदरीत्या द्विजाश्रयः ।
भक्तिशिक्षाकल्पतरुः संन्यासाश्रमपावनः ॥ १४८॥
संन्यासवेशविस्फूर्जल्लावण्याम्बुधिनायकः
द्विजभक्तो द्विजप्रियो द्विजनाथोऽतिथिप्रियः ॥ १४९॥
कीर्तनैर्विश्वभरणात् श्रीविश्वम्भरनामधृक् ।
सतीशचीप्रेमदाता पाता कलियुगे नृणाम् ॥ १५०॥
सर्वावतारसुखदः स्वचरित्रकथाघृणः ।
निजप्रेमप्रदानोत्थ-भक्तप्रेमरसावशः ॥ १५१॥
धन्याधीनकृपादत्तो लोकनिस्तारभारधृक् ।
अमानीमानदः कृष्णदासवैद्यप्रियेश्वरः ॥ १५२॥
रघुनाथभिषज्ञातो देवानन्दद्विजप्रियः ।
रामभद्रपतिर्वीरभद्रत्राता कृपाम्बुधिः ॥ १५३॥
वल्लभसेनसदीशः श्रीमद्रघुनाथनायकः सुमनाः ।
श्रीचन्द्रशेखरपतिर्वैद्यश्रीविष्णुदासेश्वरः ॥ १५४॥
विद्यानिधिप्रियः श्रीमत्कलानिधिगुणप्रियः ।
जानकीनाथविप्रेशो द्विजश्रीधरबान्धवः ॥ १५५॥
गोपालेशो यादवेशो रामलक्ष्मणसुप्रियः ।
चन्दनेश्वरसुप्रीतो जगन्नाथगणप्रियः ॥ १५६॥
ओड्रप्रियशिखिभर्ता केशवबन्धुर्मुरारिदासेशः ।
परमानन्दसदीशः सेनजगन्नाथबान्धवो बन्धुः ॥ १५७॥
धन्यश्रीजयदेवभाग्यविलसत्तगीतनृत्योदयः
श्रीविद्यापति-भावबोधविकसद्गोपीसुखोद्दापनः ।
चण्डीदाससुखप्रसादकुतुकी सङ्गीतगीतार्णवः
श्रीमद्भागवतार्थबोधविजयी वैदग्ध्यचूडामणिः ॥ १५८॥
यतिवेशक्षमासारश्चतुर्थाश्रमपावनः ।
नवद्वीपावनीचन्द्रः सर्वसम्पद्सुधाम्बुधिः ॥ १५९॥
दामोदरस्वरलेशः सनातनदयालवः ।
वाणीनाथमिश्रस्वामी दासगोविन्दवत्सलः ॥ १६८॥
श्रीरामदास-कविचन्द्रसुगानतुष्टः
स्वाधीनः ईश्वरपुरी-प्रणयप्रसादः ।
कंसारिभूरिकरुणो नरसिंहतीर्थ-
गोप्ता कृपार्द्रनयनेक्षितशङ्कराख्यः ॥ १६१॥
जगद्विख्यात-सत्कीर्तिरवधूतप्रियानुजः ।
गभीरनाभिकमलो राजत्तनुरुहावलिः ॥ १६२॥
नामसूत्रधरः सत्यः कृष्णनामपरायणः ।
अतर्क्यमहिमा पुष्पोद्यानगूढाश्रमः सुधीः ॥ १६३॥
निजलोकप्रेमदाता दर्शनक्षीणपातकः ।
भक्ताभिप्रायवशगः प्रेमभावलसद्वपुः ।
वेदगर्भनिगूढात्मा गोविन्देच्छा विनोदकः ॥ १६४॥
प्रेमोद्गारस्वनाहूतचन्द्रसूर्यसुराधिपः
महानन्दप्रियः सर्वदोषहा गुणसागरः ॥ १६५॥
नीतिप्रवर्तनाचार्यो मायिनामपि मायिकः ।
सर्वलोकैकरसदः कलिदोषसहस्रहा ॥ १६६॥
वेदवक्ताऽनहंवादी निजभक्तात्मशोधकः ।
अनेकपातकव्यग्रनाममृग्यमहोदयः ॥ १६७॥
कौस्तुभोद्भासितश्रीमद्वक्षा हेमाङ्गुलीयकः ।
गौरज्योतिः कृष्णवर्णो द्विजवंशसुधानिधिः ॥ १६८॥
कविराजमिश्रभर्ता कर्ता संसारचक्रस्य ।
हन्ता दुष्टजनानां च संसारसागरोद्धर्ता ॥ १६९॥
सर्वज्ञः सर्वदर्शी च सर्वसाक्षी महाप्रभुः ।
भक्तित्राता भक्तिदाता भक्तिदानजगद्गुरुः ॥ १७०॥
लोकबन्धुर्लोकनाथो भक्तपक्षकृपामयः ।
गृहीतैश्वर्यमाधुर्य-परमानन्दमण्डितः ॥ १७१॥
दासवंशजगन्नाथनागरो रससागरः ।
अशेषनागरीनाथः स्वयंशक्तिश्च शक्तिमान् ॥ १७२॥
जगत्पिता जगद्बन्धुः जगत्स्वामी जगद्धनम् ।
वैकुण्ठनाथः श्रीनाथः क्षीराब्धिशयनप्रियः ॥ १७३॥
अनन्तशायी भूमीन्द्र-कवीन्द्र-कार्यकौतुकी ।
मुनिधर्मा मुनीन्द्रश्च नारदादिमुनीश्वरः ॥ १७४॥
ब्रह्मपादो मुक्तिपादस्तीर्थ पादः सरित्पादः ।
अकिञ्चनः शुद्धसत्त्वः सङ्ख्यातीतगुणाश्रयः ॥ १७५॥
वेदमृग्यः शास्त्रमृग्यो योगीमृग्योऽतिदुर्लभः ।
मुनिमृग्यः सत्यमृग्यो दयामृग्यः शुभोदयः ॥ १७६॥
ज्ञानमृग्यो ध्यानमृग्यः स्वाध्यायव्रतमार्गितः ।
दुर्वासनातमोहन्ता प्रेमधारामहासिधृक् ॥ १७७॥
धर्मशास्त्रार्थनिर्णेता तत्तद्दशैकनायकः ।
नीलाचलतलावासो वनमालाविभूषणः ॥ १७८॥
व्युदस्तमायः सर्वज्ञःः साधुनेत्रमहोत्सवः ।
दयाश्रुतरसाविष्टो गोविन्दानन्दसंस्तवः ॥ १७९॥
प्रेमभक्तिवलितः सुखभोक्ता वेदसारनिजकीर्तनवक्ता ।
प्रेमदृष्टिमयकौतुकरासः शैशवावधिसुलालितवासः ॥ १८०॥
कृष्णक्रीडः कृष्णलीलः कृष्णमानी कृपाजडः ।
शान्तोऽपि नागरः शुद्धः ईषत्कपिललोचनः ॥ १८१॥
वेदान्तमृग्यः सङ्कल्पबाह्यः स्वेच्छाप्रकाशकः ।
कृपालु भक्तसुलभः स्वगुणाख्यानरूपधृक् ॥ १८२॥
मूर्तिमत्केलिसम्पत्तिमुक्तानन्दरसोत्सवः ।
कृपाप्रत्यक्ष शृङ्गाररसदो रसिकाप्रणीः ॥ १८३॥
भूतिदाता भूतिहन्ता भवदो भवनाशकः ।
अच्युतानन्द-सद्भक्तिदत्तस्वपदपङ्कजः ॥ १८४॥
ब्रह्मानन्दपुरीश्वर ओड्रवासी-कृष्णदासेशः ।
श्रीपुरुषोत्तमभर्ता ओड्रशिवानन्दवान्धवोद्धर्ता ॥ १८५॥
कृष्णानन्दपुरीश्वरः कल्पितनागकेशराकल्पः ।
श्रीवासुदेवभर्ता गायनगोविन्ददाससन्त्राता ॥ १८६॥
द्विजहरिदासकृपालुस्तीर्थजगन्नाथपावनो वीरः ।
त्यक्तमृगाजिनवासः श्रीमद्ब्रह्मानन्दद्भारतीशः ॥ १८७॥
मुकुन्दकविचन्द्रेशः सच्चिदानन्दबान्धव ।
गोपालदाससन्त्राता गोपालाचार्यसत्पतिः ॥ १८८॥
कमलाकान्तविश्वासशिक्षादानस्फुरन्मनाः
सर्वसङ्कल्पदाता च सत्यसङ्कल्पनामधृक् ॥ १८९॥
सत्यसारः सत्यतनुः सत्यवाक सत्यभक्तिदः ।
सर्वंसहः सुनियमः स्वयङ्कामः स्वयम्मधुः ॥ १९०॥
भवव्याधिहरः साक्षाज्ज्ञानशुद्ध-चिकित्सकः ।
कृतत्रिरात्रविश्राम-दासमाधवलालनः ॥ १९१॥
गृहीतपूजा-सत्कारविख्यातमधुसूदनः ।
अशेषमाधुरीहृद्य-गद्यपद्यविशारदः ॥ १९२॥
अध्यात्मविद्या-दुर्बोधो यमदुर्गमपद्धतिः ।
शमदुर्दर्शपादाब्जः शान्ताशान्तमनोरथः ॥ १९३॥
धर्मकर्मपथातीतः आत्मज्ञान-विनिस्पृहः ।
पादसेवारसाधीन-गुणकीर्तनलालसः ॥ १९४॥
स्नेहसद्भक्तिसुलभस्तरुणारुणसत्पदः ।
आत्मविद्याराजस्रनिजसेवनबोधकः ॥ १९५॥
शुद्धसत्त्वभक्तिदाता भक्तिभुग् भक्तिपालकः ।
भक्तिसेवातिसुलभः कोटिजन्माघनाशनः ॥ १९६॥
नामकोटिधनक्रीतो ममेति व्रततोषितः ।
निजनामरवाहूतो निजदासगृहाश्रयः ॥ १९७॥
शुद्धवेशः सर्ववर्णप्रियो भक्तान्नभोजकः ।
भक्तचित्तानुशायी च भक्तपालनतत्परः ॥ १९८॥
भक्तचित्तैकवसतिर्भक्तमङ्गलवर्धनः ।
सम्बोधनपदाधीनः ``सर्वशास्त्रार्थगोपकः ॥ १९९॥
गीताभागवतव्याख्या-भक्तिमात्रप्रकाशकः ।
असङ्ख्ययोगविश्रान्तभक्तियोगप्रकाशकृत् ॥ २००॥
अध्यात्मज्ञानसन्तप्त-कीर्तनामृतशान्तिदः
प्रधानभक्तिबोधार्थप्रेमभक्तिप्रकाशकः ॥ २०१॥
निजभक्तिसुखास्वाद-विज्ञानो निजभक्तिमान् ।
श्रीकृष्णः कृष्णचैतन्यः स्वर्णाचललसद्वपुः ॥ २०२॥
युगानुरूपवेदोक्त-गौरदेहप्रकाशकः ।
रघुनन्दनमाधुर्य-प्रेमधैर्यसुखावहः ॥ २०३॥
गुरुभक्तो गभीरात्मा सुशीलो मातृवत्सलः ।
दयालुर्दुर्गतत्राणो वशी त्यागी कविः सुधीः ॥ २०४॥
द्विजदामोदरप्राणनाथो नारायणेश्वरः ।
आत्मप्रकाशावेशोत्थ-कालोऽहमितिवाङ्मयः ॥ २०५॥
सिंहग्रीवातिमधुरः संन्यासावेशवीक्षणः ।
नरसिंहावेशमाद्यत्करालमधुरोद्यमः ॥ २०६॥
निजलोकदयागभीरधीः परमानन्दपुरी-परायणः ।
निजकिङ्करशङ्करद्विज-प्रणयस्नेहदयामयः प्रभुः ॥ २०७॥
काशीमिश्राश्रमप्रीतः काशीमिश्रात्मशक्तिदः ।
नीलाचलपतिप्राणो नीलाचलपतिः स्वयम् ॥ २०८॥
जगन्नाथान्नसम्भोग-संसूचिततदादरः ।
प्रतापरुद्रसन्त्राता गौडसत्कीर्तिदुन्दुभिः ॥ २०९॥
शिवानन्दप्रणयदः प्रेमसद्भक्तिलम्पटः ।
मुकुन्ददाससुप्रीतो लोकत्राता महाबलः ॥ २१०॥
समुद्रकुलसञ्चारी जनसञ्चारभीतवत् ।
अशेषजगतीज्ञातो निजगोपनतत्परः ॥ २११॥
सत्यानन्दो जितक्रोधः कोटिब्रह्माण्डनायकः ।
अन्तर्यामी कृती दान्तो लोकप्रीणनपण्डितः ॥ २१२॥
ओड्रदेशजनानन्दः सर्वसुन्दरसुन्दरः ।
निजप्रेमभरोन्माद-विस्मृतात्मा जगन्मयः ॥ २१३॥
अशेषगुणसम्पन्नः शूरसिंहपराक्रमः ।
लघुभोजी शीघ्रभोजी लघुगामी सतां गतिः ॥ २१४॥
पद्मरागसुधासार-सुखसारतनुप्रभः ।
शैशवोचितमाधुर्यभक्तप्रणयवर्धनः ॥ २२५॥
जगाइ-प्रेमदाता च माधाइ त्राणतत्परः ।
सर्ववर्णाश्रमप्रीतो वाचोयुक्तिविशारदः ॥ २१६॥
जयदेवप्रीतिदाता प्रीतिदः करुणानिधिः ।
संसारगरलाम्भोधौ पीयूषाम्बुधिसृग्यशः ॥ २१७॥
स्वभक्तदोषगोप्ता च भक्ताभक्तेषु भक्तिमान् ।
पद्मधृक् शङ्खभृच्चक्री गदावान् हेमवेणुवान् ॥ २११॥
धनुर्धरो मल्लभुजो मुक्ताहारविभूषणः ।
पुरन्दराचार्यस्नेहदत्तस्वपदपङ्कजः ॥ २१९॥
शास्त्रमूर्तिर्महातेजा दयाप्राकृतचेष्टितः ।
माधवाचार्यसन्त्राता सिंहेश्वरदयापरः ॥ २२०॥
कृपानयनपातार्ह-द्विजश्रीरघुनन्दनः ।
सेनवंशशिवानन्दप्रियः संसारमङ्गलः ॥ २२१॥
गोपीनाथप्रतिष्ठाता गोपीनाथशुभप्रदः ।
गोपीभक्तिग्राहयिता त्वालवन्दारपाठकः ॥ २२२॥
पूर्वावतार-स्वयशः कथानिक्षिप्तकालिमा
तपनाचार्यसुखदश्चिरञ्जीवदयापरः ॥ २२३॥
दामोदरप्रेमदाता सदाचारविभूषणः ।
गौरीनाथप्रियः शान्तः कृपात्तयदुनन्दनः ॥ २२४॥
रासनिर्वाहसङ्क्षोभ-प्रकाशीकृतषड्भगः
सुगीतो नर्तकगुरुः सर्वसङ्गीतसारवित् ॥ २२५॥
मनोहारी चमत्कारी रूपो मन्मथमन्मथः ।
दीनानुरक्तः सर्वेशो दाता मेघगभीरवाकू ॥ २२६॥
काव्यशास्त्रविनोदी च नाट्यालङ्कारपण्डितः ।
पुराणकथाश्रोता गीतापाठपरायणः ॥ २२७॥
ज्ञानदाता ज्ञानसारो ज्ञानीन्द्रो योगदुर्लभः ।
योगीन्द्रो यज्ञपादश्च कोटि ब्रह्माण्डविश्रुतः । २२८॥
निर्वाणतत्परानस्य विभूति-ब्रह्मदायकः ।
हरिदासद्विजत्राता शिशु गोपालकौतुकी ॥ २३९॥
आपच्छत-समुद्धर्ता भवशोक-सहस्रहा ।
तीर्थकोटिसमाख्यानो जगन्नाथविनोदकृत् ॥ २३२॥
जगन्नाथजनप्रीतो जगन्नाथप्रसाददः ।
जगन्नाथपरो विष्णुर्महापतितपावनः ॥ २३१॥
जितकामो जितक्रोधो ब्रह्माण्डप्रेमभाण्डकृत् ।
प्रेमदण्डः प्रेमदानो द्विभुजोऽथ चतुर्भुजः ॥ २३२॥
भक्तरक्षाविधानार्थ- दृप्तबाहुसहस्रभृत्
सीतास्नेहपरो रामस्त्रेता-भाग्यवती-प्रियः ॥ २३३॥
रामानन्दस्नेहपरः कमलाकान्तवत्सलः ।
प्रेमामृतघटव्याज-सूत्रनद्धकरङ्गभृत् ॥ २३४॥
सनातनप्रियस्वामी रूपप्रेमरतिप्रदः ।
अनुपमप्रियः कृष्णदासत्राता रघुप्रियः ॥ २३५॥
गरुडावधूतशुद्धप्रकार-भजनाविरतिसुखदाता ।
रघुनाथमिश्रसेवावश्यो भक्तानतावत्राता ॥ २३६॥
गोपालपण्डितानन्दो रामदासप्रियः शुचिः ।
नाशिताशेषदुर्बोधप्रेमधारासुदर्शनः ॥ २३७॥
कलौ तु स्वर्णवर्णाभः सत्ये पाण्डुरविग्रहः ।
द्वापरे । अञ्जनपुञ्जाभस्त्रेतायामरुणद्युतिः ॥ २३८॥
दशाननशिरश्छेत्ता दंष्ट्रोद्धृतवसुन्धरः ।
दृप्तक्षत्रबलोच्छेत्ता वेदोद्धारपरायणः ॥ २३९॥
यमुनाकर्षणबली लीलाधृतधराधरः ।
कलिदैत्यच्छलकरः प्रह्लादप्रीतिसादरः ॥ २४०॥
म्लेच्छदण्डकरक्रीडो हिंसायज्ञविनिन्दकः ।
पट्टगोपीनाथवसुच्छेदकाराहरस्मृतिः ॥ २४१॥
श्रीनाथमिश्रकरुणो नानाकायधरः परः ।
षण्मासग्राहितस्वाख्यरामानन्दस्वपाददः ॥ २४२॥
धन्योपास्यपदाम्भोजो धन्यलब्धकृपालवः ।
स्वेच्छाप्रवर्तिताशेषनिजभक्तमनोरथः ।
बन्धुप्रियो देवबन्धुर्लोकातीतवरप्रदः ॥ २४३॥
प्रेमसम्पत्ति-विदलित-निजलोकभूरिभयशोकः ।
गङ्गाभक्तिवशोद्धृत-धन्यनवद्वीपवृद्धशिशुदारः ॥ २४४॥
लोकातीतो रसस्रष्टा लोकातीतसुदुःखहा ।
लोकातीतरसस्वामी भावसंस्निग्धभक्तिदः ॥ २४५॥
सर्वलोक सुखस्तम्भः सर्वधर्मसुखोदयः ।
सर्वाश्रमप्रार्थ्यफलश्चतुर्वर्गफलप्रदः ॥ २४६॥
तीर्थीकृताशेषतीर्थः स्वजनानन्दवर्धनः ।
तीर्थगामी तीर्थभक्तो निजनाम्नाघकम्पनः ॥ २४७॥
श्रीरङ्गनाथदर्शी हर्षाकलितत्रिमल्लनाथश्रीः ।
श्रद्धापरार्धवीक्षित-निरवधिलोकप्रसादधनदाता ॥ २४८॥
प्रद्युम्नानुग्रहकरः शुभानन्दरसप्रदः ।
महेशपण्डितस्वामी श्रीमदीशानपालकः ॥ २४९॥
स्निग्धमाधुर्यकरुणः कृष्णदासान्नभोजकः ।
कल्याणीदत्तकल्याणः शिवपूजापरायणः ॥ २५०॥
कीर्तनानन्दवैदग्ध्यदाता नादहृतस्मृतिः ।
तुलसीसेवनपरस्तुलसीमूलमोचकः ॥ २५१॥
तुलसीपूजनपरस्तुलसीप्रणतप्रियः ।
संन्यासी मानदः सर्वपूजकः सर्वपूजितः ॥ २५२॥
मिश्रश्रीनिधिसुखदः श्रीयुक्तभगवान् मिश्रसन्त्राता ।
श्रीवासप्रियदयितो गोपीकान्तप्रियो धीमान् ॥ २५३॥
सद्वैद्यश्रीहृदयानन्द-कलादृकूपातकारी
कमलनयनसुखदाता कमलाकान्तप्रियप्राणः । २५४॥
गोपीनाथविनोदो निजमातृविलास-सुखवसतिः ।
हरिदासकीर्तनसुखी अद्वैताचार्यमानन-प्रणयी ।
अम्बागौरवपूजनचतुरो गुरुमानपूजितः श्रीमान् ॥ २५५॥
अद्वैतपूजको धीमान् सर्वमानसरञ्जकः ।
सुबुद्धिमिश्रीतप्रीतो मधुसूदनवत्सलः ॥ २५६॥
सप्तधैकत्रसम्भूत-तमालतरुमोक्षकृत् ।
मुरारिगुप्तवसिता भक्तभोजनकौतुकी ॥ २५७॥
गदाधरप्रेमभास्वद्-राधारभसमोदकृत् ।
अनेकद्विज-दिव्यान्नपानभोजनतत्परः ॥ २५८॥
प्रेमावासः प्रेमतत्त्वं प्रेमविस्तारकारणः ।
प्रेमवारिधिपूर्णेन्दुः प्रेमनामपरायणः ॥ २५९॥
प्रेमानुरागभूः स्नेहसेव्यमानपदाम्बुजः ।
प्रेमप्रीतिपरानन्दसन्दोहस्तत्त्वभूर्विभुः ॥ २६०॥
अष्टभक्तिप्रसूर्धीरो नवभक्तिविनोदकृत् ।
एकभक्तितनुर्धन्यः एकभक्तिविहारकृत् ॥ २६१॥
लीलातनुः केलितनुर्भक्तिभावकलातनुः ।
श्रीमतीर्थतनुर्धर्मतनुः कर्मतनुर्महान् ॥ २६२॥
सर्वसम्पत्तनुः सर्वसारतनुः प्रभुः ।
नामतनू रूपतनुः सङ्गीततनुरच्युतः ॥ २६३॥
शान्तनुर्वेदतनुः स्वभक्तेच्छातनुः प्रियः ।
भगवान् भक्तिसन्दानो भगवद्भक्तिरूपधृक् ॥ २६४॥
श्रीमन्नरहरिप्राणः श्रीमन्नरहरिप्रियः ।
सर्वावतारकरुणा-परिपाकदयापरः ॥ २६५॥
दुर्गतम्लेच्छचण्डाल-पतिताधमतारकः ।
द्विजवंशाम्बुजश्रेणी-प्रकाशैकदिवाकरः ॥ २६६॥
इति श्रीनरहरिसरकारठक्कुरविरचितं
श्रीकृष्णचैतन्यचन्द्रस्य सहस्रनामस्तोत्रं (२) सम्पूर्णम् ।
Proofread by Rajesh Thyagarajan